ཏེཏ་པ་ཅན་རྒུན་ལ་ མུལ་ལེ་ རོག་།
16
ཏ་ ཡེ་རུ་ཤ་ལེམ་མེ་ན་ ཀོན་འཇོག་རྒེ་ མི་རྒུ་ནི་ཕི་ རྡུའིན་ ཡོ་ཀ་ནེ་ མུལ་ ཧོར་ལ་ ཁྱི་ཞི་ ཏྲི་ཝ་ འདྲི་ཀ་ནེ་ ལེན་ལ་, འགཱ་ལ་ཏི་ཡཱེ་ ཆོའེ་ཚོག་རྒུན་ལ་ ངེ་ ཏང་ཀ་ནེ་ ལབ་ཞེ་ན་ ཁྱི་ཞ་རྒུན་ལ་ འགྲུལ་རྒོ་ཤེ་ ནོག་། 2 ཟ་ཉི་མེ་ རིམ་ལ་ ཁྱི་ཞ་རྒུ་ནི་ རང་རང་ངེ་ ལེ་ཧ་ ཅོའེ་རྡེ་ ཐོབ་ཀ་ནེ་ པེ་ནེ་ ནང་ནི་ ཁག་ཞིག་ ཐེན་འདེ་, པོར་རྒོ་ཤེ་ ནོག་། ང་ ཏུ་རུ་ ཡོང་ཡོང་ཚུག་པ་ སྲུྃ་རྡེ་ མ་འདེད་ལ་, ཏེ་འབོ་ ཏག་ས་ནི་ཕ་ལ་ ཅོའེ་ཧེ་། 3 ང་ ཏུ་རུ་ ལེབ་ཏེ་ ཁྱོའེ་མ་རྒུན་ ཡེ་རུ་ཤ་ལེམ་མེ་ན་ ཁྱེར་ཤེ་ཕི་ ཁྱི་ཞ་རྒུ་ནི་ འདམ་ཀ་ནེ་ ཁྲིན་ཁྱེར་ཧན་རྒུན་ལ་, ངེ་ ངོ་ཁྲོཏ་ ཡི་རྒེ་ འབྲི་འིན་། 4 ཡང་ ཀལ་ཏེ་ ཁྱི་ཞ་རྒུ་ནི་ ང་ ཁོང་རྒུན་ ཉམ་པོ་ ཆ་ཅེའོ་ ཕན་ཏོག་ཅེན་ འདུག་ སམ་ནི་, ཁོང་རྒུན་ ང་ ཉམ་པོ་ ཡོང་ན་ འགྲིག་ཏེ་ ནོག་།པ་འུ་ལུའི་ ལྟིང་འཇུག་རྒེ་ ལབ་ཞ་རྒུན་།
5 ང་ མ་ཀེ་འདོ་ནི་ཡཱེ་ ཡུལ་ལ་ སོང་འདེ་ ལྟིང་ནི་, ཁྱི་ཞ་རྒུན་ས་ ཐུག་རྒེ་ལ་ ཡོང་ངེན་, ཅེ་ཟེར་ནི་ ངེ་ མ་ཀེ་འདོ་ནི་ཡཱ་ རྒྱུད་ཏེ་ པེ་ལ་ ཆ་ཅེ་ ཐབ་ལྡིང་འདེ་ འིན་། 6 ཅི་ རྒྱུའི་ ང་ ཁྱི་ཞ་རྒུན་ ཉམ་པོ་ ཐུབ་ཅིག་ འདེད་རྡེན་ ཡ་ རྒུན་ སོན་ཏེ་ལ་, ཏེ་ནི་ ཁྱི་ཞ་རྒུ་ནི་ ང་ ཀ་ཡུལ་ལ་ ཆ་ནྃ་, ཏུ་རུ་ ང་ རྒོའེ་ཤེ་ཅན་རྒུན་ ཏྃ་རྡེ་ ལམ་ཅུག་ ཉེན་ཅེ་ ནོག་། 7 འི་ ལེན་ ང་ ཙ་རྦི་ཤིག་ ཐུ་རྒེ་ལ་ ཡོྃ་རྡེ་ ཆ་ཅེ་ འདོད་པ་ མེ་རག་, ཀལ་ཏེ་ ཙོབོ་ ཡི་ཤུའི་ ང་ རྒོང་སྤ་ སལ་ལེ་ ཛེད་ནི་, ང་ ཡོྃ་རྡེ་ ཞག་ ཁ་ཅིག་ འདེད་ཉིན་རག་། 8 འིན་ན་ པེན་ཏི་ཀོའེ་སེ་ རྒ་རྟོན་ ལེབ་ལེབ་ཚུག་པ་ལ་, ང་ འི་རུ་ ཨེ་ཕེ་སུའི་ རྒྱལ་སེ་ན་ འདེ་རྡེན་། 9 ཞེན་ འི་རུ་ མང་པོ་ཞིག་རྒེ་ ངེ་ རྒྱཔ་འགལ་ ཅོ་ནི་, ང་ འབྲེ་རྦུ་ ཟང་པོ་ མིན་སྲིད་ཅེ་ཅེན་ནེ་ ལེ་ཧ་ རྒྱ་ལེ་ ཅོ་ཅེ་ ཧབ་ ཟང་པོ་ རིག་ ཐོབ་ཏེ་ ཡོད་།
10 ངེ་ སྤུན་ ཏི་མོ་ཐི་ ལེཔ་ཟ་ནི་, ཁྱི་ཞི་ ཕྲོ་ ཁོ་ འཇི་ནང་ ཡོང་ མ་ཅུག་ཧེ་ ཅེ་ཟེར་ནི་ ངེ་ ཅོ་ཀན་ ཙོག་སེ་ ཁོའེ་ལ་ ཙོབོ་རྡེ་ ལེ་ཧ་རྒུན་ ཅོའེན་ ནོག་། 11 སུ་ཞི་ལ་ ཁོ་ རིན་མེད་ ཅོ་ མ་ཅུག་ཧེ་། ཁོ་ ང་ས་ ལོག་ཏེ་ ཡོང་ཟ་ནི་ ཁྱི་ཞ་རྒུ་ནི་, ཅིན་ལབ་ ཉམ་པོ་ ཁོ་ ལམ་ཅུག་ཧེ་། ཁོ་ ཞེན་ཡང་ ཏེཏ་པ་ཅན་རྒུན་ ཉམ་པོ་ ཡོང་ཅེ་ ངེ་ རེ་ཝ་ ཅོ་ཡོད་།
12 ཏ་ ཨ་ཧོ་རྒུ་ནི་ སྤུན་ ཨ་པོ་ལོའེ་ ཧོར་ལ་ ཞུ་ནི་, ངེ་ ཁོ་ ཁྱི་ཞ་རྒུ་ནི་ཀ་ ཞེན་ཡང་ ཏེཏ་པ་ཅན་རྒུན་ ཉམ་པོ་ ཆ་ཅེ་ལ་ སེམ་རུའི་ ཏང་ངེན་ ཞུ་ཝ་ པུལ་རྦེན་, འིན་ན་ ཁོ་ ཏག་ས་ ཆ་ཅེ་ འདོད་པ་ མི་འདུག་། ཡང་ ཧབ་ ཐོབ་ཟ་ནི་ ཁོ་ ཁྱི་ཞ་རྒུན་ལ་ ཐུག་རྒེ་ ཡོང་ངེན་།
13 ཤང་ ཅོའེ་ཧེ་, ཏེཏ་པེ་ན་ རྟེམ་པོ་ འདོད་ཧེ་, སེམ་ཤུག་ཤེན་ ཡང་ ཏེཏ་པེ་ན་ ཤེད་ཅེན་ འགྱུར་རྡེ་ འདོད་ཧེ་། 14 ཅི་ཚང་མ་ ཤེ་སྤ་ ཉམ་པོ་ ཅོའེ་ཧེ་།
15-16 ཁྱི་ཞ་རྒུན་ལ་ རྒྱུའི་ནོག་, རྟེ་ཕན་ནེ་ ཟེར་ཧན་ རྡང་ ཁོའེ་ ནང་མི་ ཚང་མ་ ཨ་ཀ་ཡཱེ་ན་ ཏེཏ་པ་ཅེན་ ཏང་པོ་རང་ འིན་འབེན་། ཡང་ ཁོང་རྒུ་ནི་ ཀོན་འཇོག་རྒེ་ མི་རྒུ་ནི་ཕི་ ཞབ་རྟོག་ ཞུ་ཅེ་ན་ ཏུའི་རྒུན་ པུད་རྡེན་ ནོག་། སྤུན་རྒུན་ལ་ ངེ་ སེམ་རུའི་ ཏང་ངེན་ ཞུ་ཝ་ འིན་, ཁྱི་ཞ་རང་རྒུན་ ཁོང་རྒུན་ འདང་ ཞེན་ཡང་ ཡུ་ཙོག་སེ་ འདོད་པ་ ཅིག་པོ་ ཉམ་པོ་ ཞབ་རྟོག་ ཞུ་ཀན་རྒུ་ནི་ ཝང་ངེ་ ཡོག་ལ་ པོར་ཧེ་། 17 ཨ་ཧོའེ་ སྤུན་ རྟེ་ཕན་ནེ་, ཕོར་ཤུན་ན་ཏུ་ རྡང་ ཨ་ཁི་ཀེ་རྒུན་ འི་རུ་ ལེབ་ཅེ་རྦེ་ ང་ མ་ ཐེད་པོ་ རག་, ཅེ་ཟེར་ནི་ ཁོང་རྒུ་ནི་ ཁྱི་ཞི་ ཚབ་ ཅོའེ་རྡེ་ ང་ ཡ་ཏོ་ ཅོ་རུག་། 18 ཁྱི་ཞ་རྒུན་ལ་ ཡོད་རྡེ་ ཙོག་སེ་ ཁོང་རྒུན་ ངེ་ཕི་ལ་ ཧ་ལེ་ཤེ་ སེམ་རུའི་ རིག་ འགྱུར་རྡེ་ འིན་། ཁོང་ ཙོག་སེ་ མི་ རྒྱ་ལེ་ ཅོའེ་རྡེ་ ཞབ་རྟོག་ ཞུ་ཀན་རྒུན་ལ་ ཁྱི་ཞ་རྒུ་ནི་ རྟོད་པ་ པུལ་རྒོའེ་།
པ་འུ་ལུའི་ ལྟིང་འཇུག་རྒེ་ འཇུ་ ཞུའི་།
19 ཨ་སི་ཨཱེ་ རྒྱལ་ཁབ་རྦེ་ན་ ཡོ་ཀ་ནེ་ ཆོའེ་ཚོག་རྒུ་ནི་ ཙོབོ་རྡེ་ ཚན་ནེ་ཀ་ འཇུ་ ཞུ་རུག་། སྤུན་ ཨ་ཀུའི་ལ་ རྡང་ ཁོའེ་ ན་མ་ པིརི་སི་ལ་ ཡང་ ཁོང་ངེ་ ཁང་པེ་ན་ ཚོག་ཧ་ནེ་ ཆོའེ་ཚོག་རྒེ་ལ་ འཇུ་ ཞུ་རུག་། 20 འི་རུ་ ཡོ་ཀ་ནེ་ སྤུན་ ཚང་མེ་ ཁྱི་ཞ་རྒུན་ལ་ འཇུ་ ཞུ་རུག་། ཅིག་ ཏང་ ཅིག་ལ་ ཤེ་སྤ་ ཉམ་པོ་ འཇུ་ ཞུའི་།
21 ཏ་ ང་ པ་འུ་ལུའི་ ཡི་རྒེ་ འབྲི་ཀན་འབེ་ཀ་ནི་ ཉི་འགུ་ ཁྱོྃ་རྡེ་ ང་རང་ངེ་ ལག་འབྲི་ན་ འཇུ་ ཞུ་ཡོད་།
22 ཀལ་ཏེ་ སུ་ཞིག་རྒེ་ ཙོབོ་ ཡི་ཤུ་ལ་ ཤེ་སྤ་ ཅོའོ་ མེད་ནི་, ཏེ་ མིའུ་ལ་ ངན་ ཕོག་རྒེ་ནོག་། ཨ་ཧོ་རྒུ་ནི་ ཙོབོ་ འགྱོ་སྤ་ རྐྱོད་ཤིག་།
23 ཙོབོ་ ཡི་ཤུའི་ ཐུག་ཞེ་ ཁྱི་ཞ་རྒུན་ ཉམ་པོ་ ལུའི་ཤིག་།
24 མ་ཤི་ཀ་ ཡི་ཤུའི་ འིན་ཀན་ ཚང་མ་ལ་ ངེ་ ཤེ་སྤ་ ཞུ་ཡོད་༎