མ་ཤེ་ཀ་ནེ་ ཧད་ ཏང་ ལུང་རྟན་ ཤེད་ཅེ་།
14
ཤེ་སྤ་ ལམ་མེ་ན་ འགྲུ་ལེན་ཞིག་, ཐུག་ཡིད་རྡེ་ སལ་ལེ་ ཛེད་ཀ་ནེ་ ཁྱུད་རྒུ་ནི་ལ་ འདོད་པ་ པོར་རྒོ་ཤེ་ ནོག་, མིག་སལ་ ཅོའེ་རྡེ་ ལུང་རྟན་ ཤེད་ཅེ་ ཁྱུད་། 2 མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཅེ་ ཁྱུད་ ཡོ་ཀན་རྒུ་ནི་, ཀོན་འཇོག་ ཅིག་པོ་ལ་ སྤེ་ར་ ཏྃ་རྡེ་ ནོག་། ཡང་ ཐུག་ཡིད་ རྒྱུད་ཏེ་ སང་སྤེར་ན་ རྦེ་རྡེ་ ཡོ་ཀན་རྒུན་ ཤེད་ཅེ་ཀ་ནི་, མི་རྒུན་ ཁོང་རྒུ་ནི་ ཟེར་ཧན་རྒུན་ ཧ་ཀོ་ མག་། 3 འིན་ན་ ལུང་རྟན་ ཤེད་ཀན་རྒུ་ནི་ ཞེན་མ་ ཏེཏ་པ་ཅན་རྒུན་ལ་ ཤེད་ཅེན་, སེམ་རུའི་ རྡང་ སེམ་མེ་ན་ ཞིའི་རྡེ་རྒུན་ ཁྱོང་ངེ་ནོག་། 4 མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཀན་འབེ་ ཁོ་རང་ ཅིག་པེ་ སེམ་འབོ་ ཤེད་ཅེན་ ཅོ་ནོག་, འིན་ན་ ལུང་རྟན་ ཤེད་ཀན་འབེ་ ཆོའེ་ཚོག་ སོན་ཏེ་ ཤེད་ཅེན་ ཆ་ཅུག་རྒེ་ནོག་།5 ཁྱི་ཞ་ ཚང་མེ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཉེན་ཅེ་ འིན་ན་ ཏེ་སང་ མང་ངེ་ ལུང་རྟན་ ཤེད་ཉེན་ཅེ་ལ་ ངེ་ རེ་ཝ་ ཅོའེན་། ཆོའེ་ཚོག་ སོན་ཏེ་ ཤེད་ཅེན་ ཅོ་ཅེ་ཕི་ ལུང་རྟན་ ཤེད་ཀན་འབོ་ མ་ཤེ་ཀན་འབེ་སང་ མང་ངེ་ ཀྲག་པོ་ ནོག་, ནམ་ཚུག་པ་ མ་ཤེ་ཀ་ནེ་ ཧད་པོ་ སུ་ཞིག་རྒེ་ ཧད་རྒྱུར་ ཅོའེ་རྡེ་ མི་ཤེད་།
6 སྤུན་རྒུན་, ཀལ་ཏེ་ ང་ ཡོྃ་རྡེ་ ཁྱི་ཞ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ནི་, ཁྱི་ཞ་རྒུན་ལ་ ཅི་ ཕན་ཏོག་ ཐོབ་རྦེན་། འིན་ན་ ཀལ་ཏེ་ ངེ་ ཁྱི་ཞ་རྒུན་ལ་ ཀོན་འཇོག་རྒེ་ ང་ ངོན་ཅུག་རྒེ་ ཛེད་ཀན་རྒུན་ ཡང་ མིག་ས་ལེ་ ཤེ་རྒྱུ་ རྡང་ ལུང་རྟན་ ཡང་ ལབ་ཞ་ ཤེད་ནི་, ཏོ་ ཁྱི་ཞ་རྒུ་ནི་ ཏེཏ་པེ་ཕི་ ཕན་ཏོག་ཅེན་ཞིག་ ནོག་། 7 ཏེ་རྒ་ ཙོག་སེ་ སྲོག་ མེ་ཀ་ནེ་ རོལ་མོ་, ལིང་ངུ་ ཡང་ འགྲམ་ཉན་ ཟེར་ཧན་རྒུན་ སལ་སྤོ་ ཅོའེ་རྡེ་ མ་སྲོག་ནི་, སུ་ཞིག་ལ་ ཏོ་རྦེ་ ཡང་འབེ་ ཧ་ཀོ་ མི་ཉེན་། 8 ཡང་ ཀལ་ཏེ་ ཏུང་རྦོ་ སལ་སྤོ་ ཅོའེ་རྡེ་ མ་ཕུ་ནི་ ཏེ་ནི་ མག་མི་ཞིག་ལ་ མག་རྒེ་ཕི་ འབོ་ཀན་འབོ་ ཀ་ཟུག་རྒེ་ ཧ་ཀོའེན་?
9 ཏེ་རྒ་ ཙོག་སེ་, ཀལ་ཏེ་ ཁྱི་ཞ་རྒུ་ནི་ མི་རྒུན་ལ་ ཧ་མི་ཀོ་ཤིག་ ཚིག་རྒུ་ནི་ན་ སྤེ་ར་ ཏང་ནི་ ཏེ་ནི་ ཁྱི་ཞ་རྒུ་ནི་ ཟེར་ཧན་འབོ་ ཁོང་རྒུ་ནི་ ཀ་ཟུག་རྒེ་ ཧ་ཀོ་ ཉེན་ནེན་? ཏོ་ ཁྱི་ཞ་རྒུ་ནི་ ལུྃ་སྤེ་ན་ སྤེ་ར་ ཏང་ཀན་ ཙོག་སེ་ ནོག་།
10 འཇིག་རྟེན་ནེ་ན་ ཧད་ ན་ཚོག་ མང་པོ་ ཡོད་ཏེ་ ནོག་, ཡང་ ཧད་ ཚང་མ་ལ་ ཏོན་ཏག་ ཡོད་ཏེ་ ནོག་། 11 འིན་ན་ ཀལ་ཏེ་ ང་ ཧད་ཞིག་ ཧ་ཀོ་ མེད་ནི་, ཏོ་རྦེ་ན་ སྤེ་ར་ ཏང་ཀན་འབེ་ འདུན་ལ་ ང་ ཞན་ཡུལ་ལེ་ མི་ཞིག་ ཙོག་, ཡང་ ཏེ་ སྤེ་ར་ ཏང་ཀན་འབོ་ ངེ་ འདུན་ལ་ ཞེན་ཡུལ་ལེ་ མི་ཞིག་ ཙོག་སེ་ ནོག་། 12 ཡང་ ཁྱི་ཞ་རྒུ་ནི་ཕི་ལ་ ཏོ་ཙོག་སེ་ ནོག་། ཁྱི་ཞ་རྒུན་ལ་ ཐུག་ཡིད་རྡེ་ སལ་ཧ་ནེ་ ཁྱུད་ རྒོའེ་ཉིན་ ཡོད་ཅེ་ཀ་ནི་, ཆོའེ་ཚོག་ སོན་ཏེ་ ཤེད་ཅེན་ ཅོ་ཀ་ནེ་ ཁྱུད་རིག་ ཙོལ་ཧེ་།
13 ཏོ་རྦེ་ཕི་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཀན་རྒུ་ནི་, ཏེ་ ཟེར་ཧན་རྒུན་ ཧད་རྒྱུར་ ཅོ་ཅེ་ ཁྱུད་རྡེ་ཕི་ལ་ མོ་ལམ་ ཞུ་རྒོ་ཤེ་ ནོག་། 14 ཀལ་ཏེ་ ངེ་ མ་ཤེ་ཀ་ནེ་ ཧད་རྡེ་ན་ མོ་ལམ་ ཞུ་ནི་, མོ་ལམ་འབོ་ ངེ་ སེམ་ཡིད་རྡེ་ ཞུའི་རྡེ་ ནོག་, འིན་ན་ ངེ་ ཟེར་ཧན་འབོ་ ཕན་ཏོག་ མེ་ཀག་།
15 ཏེ་ནི་ ངེ་ ཅི་ ཅོ་? ང་རང་ངེ་ སེམ་ཉིད་ནྃ་ མོ་ལམ་ ཞུའིན་། ཡང་ ང་རང་ངེ་ མོ་ལམ་འབོ་ ཧ་ཀོའེན་འདང་ ཞུའིན་། ང་རང་ངེ་ སེམ་ཉིད་ནྃ་ རྟོད་ལུ་ པུལ་ལེན་། ཡང་ རྡོད་ལུའི་ ཚིག་རྒུན་ ཧ་ཀོའེན་འདང་ རྟོད་ལུ་ པུལ་ལེན་། 16 ཏེ་མ་ནི་, ང་ སེམ་ཉིད་ ཅིག་པོ་ནི་ ཀོན་འཇོག་ལ་ ཐུག་ཞེ་ཆེ་ ཞུ་ནི་, ང་ ཐུག་ཞེ་ཆེ་ ཞུ་ཀ་ནེ་ མོ་ལམ་ ཧ་མ་ཀོ་ཀན་ ཕི་ལོག་པ་ཞིག་རྒེ་ ངེ་ མོ་ལམ་འབོ་ ཀྲུཔ་ཤིག་ ཟེར་རྡེ་ ཨ་མེན་ ཀ་ཟུག་རྒེ་ ཟེར་ཉེ་ནེན་། 17 ཅེ་ཟེར་ནི་། ང་ རྡེ་མོ་ ཅོའེ་རྡེ་ ཀོན་འཇོག་ལ་ ཐུག་ཞེ་ཆེ་ ཞུའིན་ ཡོད་ཁྲོ་། འིན་ན་ ངེ་ མོ་ལམ་ ཧ་མ་ཀོ་ཀ་ནེ་ མི་རྦེ་ ཏེཏ་པ་ རྐྱེད་ལ་ ཡོང་ངེ་ མག་།
18 ང་ ཁྱི་ཞ་རྒུ་ནི་སང་ མང་ངེ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཉེན་ཅེ་ཕི་ ངེ་ ཀོན་འཇོག་ལ་ ཐུག་ཞེ་ཆེ་ ཞུ་ཡོད་། 19 འིན་ན་ ཆོའེ་ཚོག་རྒེ་ན་, ཞེན་མ་རྒུན་ལ་ ལབ་ཞ་ ཏང་ཅེ་ཕི་ ངེ་ མ་ཤེ་ཀ་ནེ་ ཧད་རྡེ་ན་ ཚིག་ ལྟོང་ཅུ་ ཤེད་རྡེ་སང་ ཧ་ཀོ་ཅེ་ཅེན་ནེ་ ཚིག་ ང་ ཤེད་ཅེ་རག་།
20 སྤུན་རྒུན་, ཁྱི་ཞ་ ཚང་མ་ ཐུག་ཡིད་རྡེ་ན་ མ་ལྡན་ཀན་ ཙོག་སེ་ མ་སམ་། ཤོཏ་ངེན་ནེ་ ཅོའེ་རྡེ་, ཁྱི་ཞ་རྒུན་ ཕྲུ་རྒུ་ ཙོག་སེ་ རྐྱོན་མེད་ ཡོང་རྒོའེ་། འིན་ན་ ཐུག་ཉིད་རྡེ་ན་ ལྡན་ཀན་ ཙོག་སེ་ འགྱུར་།
21 ཙོབོ་ ཀོན་འཇོག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ འདུག་, “ངེ་ ང་རང་ངེ་ མི་རྒུན་ལ་ ཧད་རིག་ སོ་སོ་ རྡང་ ཆི་རྒྱལ་པ་རྒུན་ རྒྱུད་ཏེ་ སྤེ་ར་ ཏང་ངེན་, ཏེ་ན་ ཁོང་རྒུ་ནི་ ངེ་ ཁ་མི་ཉེན་།” 22 མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཅེའོ་, ཏེཏ་པ་ཅེན་ མ་ནོག་, ཏེཏ་པ་ མེ་ཀན་རྒུ་ནི་ཕི་ ལྟའ་ཞིག་ ནོག་། འིན་ན་ ལུང་རྟན་འབོ་, ཏེཏ་པ་ མེ་ཀན་ མ་ནོག་, ཏེཏ་པ་ཅེན་རྒུ་ནི་ ཕན་ཏོག་རྡེ་ཕི་ ནོག་། 23 ཀལ་ཏེ་ ཆོའེ་ཚོག་ སོན་ཏེ་ ཛོམ་འདེ་ ཡོད་ཏུའི་, ཏེཏ་པ་ མེ་ཀན་ ཡང་, ཏོ་ཙོག་སེ་ ཁྱུད་རྡེ་ ཧོར་ལ་ ཧ་མ་ཀོ་ཀན་ འགྲིག་ ཡོྃ་རྡེ་ ཁྱི་ཞ་ ཚང་མེ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ངེན་ ཚོར་ནི་ ཁོང་རྒུ་ནི་ ཁྱི་ཞ་རྒུན་ ཉོན་བ་ ནོག་ ཟེ་རེ་ མ་ནོག་རྒེ་? 24 འིན་ན་ ཀལ་ཏེ་ ཁྱི་ཞ་ ཚང་མ་ ཛོམ་འདེ་ ལུང་རྟན་ ཤེད་རྡེན་ ཡོད་ཏུའི་, ཏེཏ་པ་ མེ་ཀན་ ཡ་ ཏེ་ཙོག་སེ་ ཁྱུད་རྡེ་ ཧོར་ལ་ ཧ་མ་ཀོ་ཀ་ནེ་ མི་རིག་ ཡོང་ནི་, ཁྱི་ཞི་ ཤེད་ཀན་རྒུན་ རྒྱུད་ཏེ་ ཁོང་རྒུན་ རྡིག་ཅེན་ འིན་ཀན་ ཡང་ ཀོན་འཇོག་རྒེ་ ཁྲིམ་ཅེད་ ཛེད་ཅེའོ་ ཧ་ཀོ་ཉན་ནེ་ནོག་། 25 ཁོང་རྒུ་ནི་ ཉིང་ངེ་ན་ རྦེ་རྡེ་ ཡོ་ཀན་རྒུན་ ངོན་ཅེ་ཀ་ནི་ ཁོང་རྒུ་ནི་ པིག་ཛུམ་ རྒྱབ་ཏེ་ ཀོན་འཇོག་ལ་ ཅོལ་རྡེ་ ཟེ་རིན་, “ཀོན་འཇོག་ ཁྱི་ཞ་རྒུ་ནི་ ཕྲོ་ རྡེན་འབའ་ ཞུ་རྡེ་ འདུག་།”
ཚིར་ ནང་ཞིན་ ཆོའེ་ ཅོ་ཅེ་ ཀཱ་།
26 འོ་ནེ་ ངེ་ སྤུན་རྒུན་, འདོར་ལྡུའི་ན་, ཁྱི་ཞ་རྒུན་ ཉམ་པོ་ ཛོམ་ཟ་ནི་ ཚིར་ ནང་ཞིན་ལ་, ཅིག་རྒེ་ ཆོའེ་ལུ་ ཏང་ཅེ་, ཅིག་རྒེ་ ལབ་ཞ་ ཏང་ཅེ་, ཅིག་རྒེ་ ཁྱི་ཞ་རྒུན་ལ་ ཀོན་འཇོག་རྒེ་ ངོན་ཅུག་རྒེ་ ཛེད་ཀན་རྒུ་ནི་ ཧོར་ལ་ ཤེད་ཅེ་, ཅིག་རྒེ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཅེ་, ཡང་ཅིག་རྒེ་ ཁོའེ་ ཟེར་ཧན་རྒུན་ ཧད་རྒྱུར་ ཅོ་རྒོ་ཤེ་ ནོག་། ཡུ་ ཚང་མ་ ཁྱི་ཞ་རྒུན་ ཤེད་ཅེན་ ཅོ་ཅེ་ཕི་ ཅོའེ་རྡེ་ ནོག་།
27 མི་ ཉི་ ཡ་ སུམ་མེ་ མ་ནི་, མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ མི་རྒོའེ་། ཁོང་རྒུ་ནི་ ཅིག་རྒེ་ ལྟིང་ནི་ ཅིག་ ཚིར་ཧ་ ཅོའེ་རྡེ་ སྤེ་ར་ ཏང་རྒོའེ་, ཡང་ཅིག་རྒེ་ ཁོང་རྒུ་ནི་ ཟེར་ཧན་རྒུན་ ཧད་རྒྱུར་ ཅོ་རྒོའེ་། 28 འིན་ན་ ཀལ་ཏེ་ ཧད་རྒྱུར་ཧན་ སུ་ཞི་ལ་ མེད་ནི་, ཏེ་ནི་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཀན་འབེ་, ཆོའེ་ཚོག་རྒེ་ན་ ཅེཔ་ཁ་རོག་ཏེ་ འདེད་ཏེ་ སང་སྤེ་རེ་ ཐོག་ནི་ ཁོ་རང་ འདང་ ཀོན་འཇོག་ལ་ སྤེ་ར་ ཏང་རྒོའེ་།
29 མི་ ཉི་ ཡང་ སུམ་ཞིག་ལ་ ལུང་རྟན་ ཤེད་ཅུག་, ཡང་ ཞེན་མ་རྒུན་ལ་ ཏོ་རྒུ་ནི་ ཟེར་ཧན་འབོ་ རྡེན་འབའ་ ཀོན་འཇོག་རྒེ་ ཆོག་ནི་ ནོག་རྒེ་ ཡང་ མག་, ཐག་ཅེད་ ཅོའེ་ཧེ་། 30 འིན་ན་ ཀལ་ཏེ་ སུ་ཞིག་རྒེ་ ལུང་རྟན་ ཤེད་རྡེ་ ཏུའི་ལ་, ཞེན་མ་ཞིག་ལ་ ཙོབོ་རྡེ་ ཆོག་ནི་ ཁྲིན་ སོ་མ་ཞིག་ ཐོབ་ནི་, ཏེ་ནི་ ལུང་རྟན་ ཏང་ངེན་ ཡོ་ཀ་ནེ་ མི་རྦེ་ ལུང་རྟན་ ཤེད་ཅེའོ་ རྒག་རྒོའེ་། 31 འི་ཟུག་ ཀྲིག་ ཅོ་ནི་, མི་རེ་རེ་ལ་ ཀོན་འཇོག་ཀ་ནི་ ཐོབ་ཀ་ནེ་ ཁྲིན་འབོ་ མི་ཅིག་ ཏུའི་ཅིག་ལ་ ཟེར་ཆོག་རྒེ་ ནོག་། ཏེ་ནེ་ ཆོའེ་ཚོག་ སོན་ཏེ་ ལོབ་ཅེ་ རྡང་ སེམ་རུའི་ རྐྱེན་། 32 འི་ཏུ་ པོར་ཧེ་, ལུང་རྟན་ ཤེད་ཀན་རྒུ་ནི་ ཁོ་རང་རྒུ་ནི་ སེམ་ཉིད་རྒུན་ ཆུན་འདེ་ པོར་ཉེན་ནེ་ནོག་། 33 ཅེ་ཟེར་ནི་ ཀོན་འཇོག་པོ་, ཚིར་ཧ་ མེ་ཀན་ མ་ནོག་, ཞིའི་རྡེ་ ཀོན་འཇོག་ ཞུ་རྡེ་ནོག་, ཀ་ཟུག་ ཞེན་ ཆོའེ་ཚོག་ ཚང་མ་ ཛོམ་ཟ་ནི་ ཡོད་ཏེ་ ནོག་།
34 ཆོའེ་ཚོག་རྒེ་ན་ ཛོམ་ཟ་ནི་, པོ་མོ་རྒུ་ནི་ སྤེ་ར་ མ་ཏང་ལ་ འདེད་རྒོ་ཤེ་ ནོག་། ཁོང་རྒུ་ནི་ སྤེ་ར་ ཏང་ཅེ་པོ་ འོའེ་སྤ་ མག་, ཀ་ཟུག་ མོ་ཤེ་ ཁྲིམ་མེ་ན་ མོལ་ཧན་ ནང་ཞིན་, ཁོང་རྒུན་ རང་ངེ་ མག་པ་རྒུ་ནི་ ཝང་ངེ་ ཡོག་ལ་ འདེད་རྒོ་ཤེ་ ནོག་། 35 ཀལ་ཏེ་ ཁོང་རྒུན་ལ་ ཏྲི་ཝ་ རིག་ ཡོད་ནི་, ཁང་པ་ ཁོ་རང་རྒུ་ནི་ མག་པ་རྒུན་ལ་ འདྲི་རྒོ་ཤེ་ ནོག་, ཅེ་ཟེར་ནི་ ཆོའེ་ཚོག་ ཛོམ་འདེ་ ཡོད་ས་ པོ་མོ་རྒུ་ནི་ སྤེ་ར་ ཏང་ཅེའོ་ ཁྲེལ་རྦ་ཞིག་ ནོག་།
36 ཅི་ ཀོན་འཇོག་རྒེ་ ཀའ་འབོ་, ཁྱི་ཞ་ ཀོ་རིན་ཐི་པ་རྒུ་ནི་ཀ་ནི་ འགོ་མ་རང་ ཅུང་འདེ་ ནོག་ ས་མེ་ རག་རྒེ་? ཅི་ ཁྱི་ཞ་རང་ ཅིག་པོ་ལ་, ཏོ་ སལ་ལེ་ ཛེ་རྡེ་? 37 ཀལ་ཏེ་ སུ་ཞིག་རྒེ་ ཁོ་རང་ ལུང་རྟོན་པ་ ཡང་ སེམ་ཡིད་རྡེ་ ཁྱུད་ ཡོ་ཀན་ཞིག་ འིན་ སམ་མེ་ཡོད་ནི་, ཏེ་ནི་ ངེ་ ཟེར་ཧན་རྒུན་ ཙོབོ་རྡེ་ ཀཱ་ སལ་རྡེ་ འིན་ཀན་འབོ་ ཁྱེ་རང་ལ་ ཧ་ཀོ་རྒོའེ་། 38 འིན་ན་ ཀལ་ཏེ་ ཁྱི་ཞ་རྒུ་ནི་ ཏོ་ལ་ ནང་མེད་ ཅོ་ནི་, ཏེ་ནི་ ཀོན་འཇོག་རྒེ་ ཁྱི་ཞ་རྒུན་ལ་ ནྃ་མེད་ ཅོའོ་ ཛེད་རྡེན་།