མ་ཤི་ཀེ་ ཞབ་རྟོག་པ་ པ་འུ་ལུ་ རྡང་ ཨ་པོ་ལོ་།
3
སྤུན་རྒུན་ ང་ ཁྱི་ཞ་རྒུན་ ཉམ་པོ་ ཡོད་ཏུའི་, ངེ་ ཁྱི་ཞ་ ལབ་ཟ་ནི་, ཐུག་ཡིད་རྡེ་ན་ ལྡན་ཀ་ནེ་ མི་རྒུན་ ཙོག་སེ་ ལབ་ མ་ཉེན་ནེ་, འི་ འཇིག་རྟེན་པ་ ཡང་ མ་ཤི་ཀེ་ ཏེཏ་པེ་ན་ ཕྲུ་རྒུ་ ཆུང་ཙེ་རྒུན་ ཙོག་སེ་ ལབ་རྒོའེ་། 2 ངེ་ ཁྱི་ཞ་རྒུན་ལ་ ཁར་ཞི་ མ་ཏང་ངེ་, འོ་མ་ ལྟེར་རྒོའེ་, ཅེ་ཟེར་ནི་ ཁྱི་ཞ་རྒུན་ ཁར་ཞི་ ཟ་ཅེ་ལ་ ཀྲལ་འགྲིག་ མི་འདུག་པེན་, ཡང་ ཏ་རུང་ང་ ཁྱི་ཞ་རྒུན་ ཀྲལ་འགྲིག་ མེད་ཏེ་ ནོག་། 3 ཏ་རུང་ང་ འི་ འཇིག་རྟེན་པེ་ པུད་ཀན་ ཙོག་སེ་ མི་ཙེ་, ཁྱི་ཞ་རྒུ་ནི་ལ་ པུད་ཏུག་། ཁྱི་ཞ་རྒུ་ནི་ན་ ཅིག་ ཏང་ ཅིག་ལ་ ཕྲ་རྡོག་ རྡང་ ཁྲུག་པ་ ཡོད་ཏེ་ ནོག་། ཅི་ ཏོ་ ཁྱི་ཞ་རྒུ་ནི་ཀ་ ཁྱི་ཞ་རང་ངེ་ རྡིག་པེ་ འདོད་པ་རྒུ་ནི་ ཝང་སྲུལ་རྡེ་ མ་ནོག་རྒེ་? ཅི་ ཁྱི་ཞ་རྒུ་ནི་, འཇིག་རྟེན་པ་རྒུན་ ཙོག་སེ་ མི་ཙེ་ པུད་རྡེན་ཞིག་ མེད་རྡེ་? 4 ནམ་ ཁྱི་ཞི་ ཕྲོ་ནི་ ཅིག་རྒེ་, “ང་ པ་འུ་ལུའི་ རྒྱབ་ནི་ འགྲུལ་ལེ་ཡོད་” ཡང་ཅིག་རྒེ་, “ང་ ཨ་པོ་ལོའེ་ རྒྱབ་ནི་ འགྲུ་ལེ་ཡོད་” ཟེར་ནི་, ཅི་ ཁྱི་ཞ་རྒུ་ནི་ འི་ འཇིག་རྟེན་པ་རྒུན་ ཙོག་སེ་ ཅོའེ་རྡེ་ མ་ནོག་རྒེ་?5 སུ་ ནོག་ ཨ་པོ་ལོ་? སུ་ ནོག་ པ་འུ་ལུ་? ང་ཞ་ནི་ ཀོན་འཇོག་རྒེ་ ཞབ་རྟོག་པ་ཞིག་ འིན་, ཀའོ་རྒུན་ རྒྱུད་ཏེ་, ཁྱི་ཞ་རྒུ་ནི་ ནེ་ཚུལ་ ཟང་པེ་ན་ རྡེན་ཆེ་ཤེ་ ཅོའེ་རྡེ་ ནོག་། ཙོབོ་རྡེ་ སལ་ལེ་ ཛེད་ཀ་ནེ་ རང་རང་ངེ་ ལེ་ཧ་རྒུན་ ང་ཞི་ ཅོའེ་རྡེ་ ནོག་། 6 ངེ་ ཁྱི་ཞི་ ཉིང་རྒུ་ནི་ན་ ས་ངོན་ ཏབ་ཏེ་, ཨ་པོ་ལོའེ་ ཏོ་ལ་ ཆུ་ ཏྃ་རྡེ་ ནོག་, འིན་ན་ ཏོ་ ལྡན་ཅུག་རྒེ་ ཛེད་ཀན་འབོ་, ཀོན་འཇོག་ ཞུ་རྡེ་ནོག་། 7 ས་ངོན་ ཏབ་ཀན་ ཡང་ ཆུ་ ཏང་ཀན་འབོ་ ཁག་ཅེན་ མག་, ཁག་ཅེན་འབོ་ ས་ངོན་ ལྡན་ཅུག་རྒེ་ ཛེད་ཀ་ནེ་ ཀོན་འཇོག་པོ་ ནོག་། 8 ས་ངོན་ ཏབ་ཀན་ འདང་ ཆུ་ ཏང་ཀན་རྒུ་ནི་ ཉམ་པོ་ འདོད་པ་ ཅིག་ པོར་རྡེ་ ལེ་ཧ་ ཅོའེ་རྡེ་ ནོག་། ཡང་ ཁོང་ ཉ་ཧ་ ཞབ་རྟོག་ ཞུ་ཀན་ ནང་ཞིན་ལ་ སོལ་རེ་ ཐོབ་རྦེན་། 9 ང་ཞ་ ཉ་ཧ་ ཀོན་འཇོག་རྒེ་ ཞབ་རྟོག་པ་ ཡང་ ཁྱི་ཞ་རྒུན་ ཁོང་ངེ་ ཞིང་ འདང་ ཕོ་ཀྲང་རྒུན་ ནོག་།
10 ཀོན་འཇོག་རྒེ་ ཐུག་ཞེ་ ངེ་ན་ ཡོད་ཅེ་རྦེ་ ཅོའེ་རྡེ་ ངེ་ སིག་སྤོན་ ཁེ་སྤ་ཞིག་ ཙོག་སེ་, ཀོན་འཇོག་རྒེ་ ཕོ་ཀྲང་ངེ་ མག་རྡེན་འབོ་ ཏྃ་རྦེན་། ཏ་ ཞེན་མི་ཞིག་ ཏེ་ཀ་ སིག་རྒེན་ ནོག་། ཏེ་ཀ་ སིག་ཀན་རྒུ་ནི་ མ་སྲན་ཀྲེ་ ནྃ་ ཏྃ་རྡེ་ སིག་རྒོའེ་། 11 ཅེ་ཟེར་ནི་ ང་ཞི་ སིག་ཏེ་ ཡོ་ཀན་ ཡི་ཤུ་ མ་ཤི་ཀེ་ མག་རྡེན་ ཅིག་པོ་ མ་ཐེ་ལ་, སུ་ཞིག་ལ་ ཡང་ མག་རྡེན་ཞིག་ ཏང་ མི་ཉེན་།
12 ཏེ་ མག་རྡེན་འབེ་ཀ་ སིག་ཀན་རྒུ་ནི་ རིན་ཐང་ སོ་སོའེ་ རྒྱུ་ ན་ཚོག་ རིག་ ཀོལ་སྲིད་ཅེ་ ནོག་, སྤེར་ན་, ཁ་ཅིག་རྒེ་ སེར་, མུལ་ འདང་, རིན་ཅེན་ རྡོ་རྒུན་ ཡང་ ཁ་ཅིག་རྒེ་ ཤིང་, ཕུག་མ་, ཡང་ ས་ ཧམ་པོ་རྒུན་། 13 འིན་ན་ ཁྲིམ་ཅེད་རྡེ་ ཞག་ལ་, ཏེ་ སིག་སྤོན་ རེ་རེ་ ལེ་ཧ་ ཅོ་ཀན་འབོ་, མེ་ རྒྱུད་ཏེ་ ངོན་ནེན་། ཏེ་རྒ་ མེ་རྦེ་ ལྟག་ཅེད་ ཅོའེ་རྡེ་ མི་ རེ་རེ་ ལེ་ཧ་རྒུ་ནི་ རིན་ཐང་ ལྟན་ནེན་། 14 ཀལ་ཏེ་ མེ་ན་ སོང་འདེ་ལ་ ལེ་ཧ་རྦོ་ མེ་ཀན་ མ་ཆ་ནི་, ཏེ་ སིག་སྤོན་འབོ་ལ་ སོལ་རེ་ ཐོབ་རྦེན་། 15 ཀལ་ཏེ་ ལེ་ཧ་རྦོ་ མེ་ལ་ ཞེན་ནི་, ཏེ་ སིག་སྤོན་འབེ་ ཅི་ཚང་མ་ མེ་ཀན་ ཆེན་, འིན་ན་ མེ་ ནང་ནི་ མི་ཞིག་ ཀག་སྤོ་ ཉམ་པོ་ རྐྱོབ་རྦེ་ ཙོག་སེ་ ཁོ་ རྐྱོབ་རྦེན་།
16 ཅི་ ཁྱི་ཞ་, ཆོའེ་ཚོག་པོ་ ཀོན་འཇོག་རྒེ་ ཁང་པ་ ཡང་ ཀོན་འཇོག་རྒེ་ ཐུག་ཡིད་ ཁྱི་ཞ་རྒུ་ནི་ན་ ཞུ་ཧན་འབོ་, རྒྱུའི་ཆ་ མེ་རག་རྒེ་? 17 ཀལ་ཏེ་ སུ་ཞིག་རྒེ་ འི་ ཀོན་འཇོག་རྒེ་ ཁང་པ་འབོ་ ཞིག་ཅེ་ ཅོ་ནི་, ཁོ་ ཀོན་འཇོག་རྒེ་ མེ་ཀན་ ཛེད་རྡེན་། ཅེ་ཟེར་ནི་ ཀོན་འཇོག་རྒེ་ ཁང་པ་ ཏམ་པ་ ནོག་, ཡང་ ཁྱི་ཞ་རྒུན་ ཏེ་རྒ་ ཀོན་འཇོག་རྒེ་ ཁང་པ་འབོ་ ནོག་།
18 རང་འདང་རང་ལ་ འགོ་མ་ཧོར་ཧེ་། ཀལ་ཏེ་ འི་ འཇིག་རྟེན་འབེ་ སམ་ཀན་ ཙོག་སེ་ ཁྱི་ཞེ་ལ་ ཁྱི་ཞ་རང་ ཤེ་རབ་ཅེན་ འིན་ སམ་མེ་ཡོད་ནི་, ཏོ་ནི་ ཁྱི་ཞ་རྒུན་ རྡེན་འབའ་ ཤེ་རབ་ཅེན་ འགྱུར་ཤེ་ཕི་ སམ་མེད་ རིག་ འགྱུར་རྒོའེ་། 19 ཅེ་ཟེར་ནི་ ཀོན་འཇོག་རྒེ་ ཐོག་ནི་, འི་ འཇིག་རྟེན་ནེ་ ཤེ་རབ་པོ་ལ་ སམ་མེད་ཅིག་ ནོག་, ཀ་ཟུག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ འདུག་ “ཁོང་ངེ་ རྐྱོན་འཇེན་ནི་ ཐབ་རྒུན་ ཀོལ་རྡེ་ ཀོན་འཇོག་རྒེ་ ཤེ་རབ་ཅེན་རྒུན་ ཟུམ་མེ་ ཛེད་།” 20 ཡང་ འི་འབོ་ལ་ མོལ་རྡེ་ ཡོད་ཏེ་ ནོག་, “འཇིག་རྟེན་ནེ་ ཤེ་རབ་ཅེན་ནེ་ སམ་བ་རྒུན་ ཙོབོ་རྡེ་ ཁྱེན་ནེ་ ཛེད་ནོག་, ཡང་ ཏོ་རྒུན་ རིན་མེད་ འིན་ཀན་འབོ་ ཁོང་ལ་ ཐུག་རྒྱུའི་ ནོག་།”
21-22 ཏེ་རྒ་རྦེ་ཕི་ལ་ ཆོའེ་ཚོག་རྒེ་ སྤོན་འབེ་ རྒྱབ་ནི་, འགྲུལ་ཅེ་ན་ ཕོ་སོ་ མ་ཅོ་ཧེ་, ཅེ་ཟེར་ནི་ ཅི་ཚང་མ་ ཁྱི་ཞ་རྒུ་ནི་ ནོག་། རྡེན་འབའ་ པ་འུ་ལུ་, ཨ་པོ་ལོ་, པི་ཏྲར་, འཇིག་རྟེན་, མི་ཙེ་, ཤི་ཅེ་, ཏག་ས་ རྡང་ ཡོང་ཅེ་ཅེན་ ཚང་མ་ ཁྱི་ཞ་རྒུ་ནི་ ཕན་ཏོག་རྡེ་ཕི་ ནོག་། 23 ཡང་ ཁྱི་ཞ་རྒུན་ མ་ཤི་ཀེ་ ནོག་ ཡང་ མ་ཤི་ཀ་ ཀོན་འཇོག་རྒེ་ ནོག་།