ཤེ་རབ་རྦེ་ ཧོར་ལ་ པ་འུ་ལུའི་ ལབ་ཞ་།
2
སྤུན་རྒུན་ ཁྱི་ཞ་ ཀོན་འཇོག་རྒེ་ ཁྲིན་ ཤེད་ཅེ་ལ་ ང་ འགོ་མ་རང་ ཡོང་ཟ་ནི་, ངེ་ ཀྲག་པོ་ ཤེ་རབ་ ཡ་ ཧ་ལེ་ཤེ་ ཚིག་ མ་ཀོལ་འབེན་། 2 ཅེ་ཟེར་ནི་ ང་ ཁྱི་ཞ་ ཉམ་པོ་ ཡོད་ཟ་ནི་, ངེ་ ཁྱི་ཞ་རྒུན་ལ་ རྐྱང་ཤིང་ངེ་ཀ་ རྐྱང་ཀ་ནེ་ ཡི་ཤུ་ མ་ཤི་ཀ་ ཅིག་པོ་ མ་ཐེ་ལ་ ཞེན་ཡང་ ཅི་ཞིག་རྒེ་ ཧོར་ལ་ མི་ཤེད་ཅེ་ ཐག་ཅེད་པེན་། 3 ཁྱི་ཞ་རྒུན་ ཉམ་པོ་ ཡོད་ཏུའི་, མ་ཤི་ཀེ་ ཆག་ལེ་ ཅོ་ཅེ་ན་ ང་ འུ་ཐུག་, འདར་ཤེ་ རྡང་ འཇིའི་ཧན་ཞིག་ ཚོར་རེ་ རག་པེན་། 4 ངེ་ ལབ་ཞ་ རྡང་ ཆོའེ་ཤེད་ཅེ་རྒུན་ ཧ་ཀོ་ལ་ ལ་མོ་ ཡང་ ཁྲུལ་ཅེ་ རྡང་ ཁེ་སྤ་ སྤེ་ར་རྒུ་ནི་ཀ་ རག་ མ་ལེ་, ངེ་ ཏམ་པེ་ ཐུག་ཡིད་རྡེ་ ཁྱི་ཞ་རྒུ་ནི་ན་ ཆག་ལེ་ ཛེད་ཅེ་རྦེ་ཀ་ རྡེན་ཆེ་ཤེ་ ཅོའེ་རྡེ་ ལབ་ཞ་ ཏྃ་རྦེན་། 5 ངེ་ ཏོ་ ཁྱི་ཞ་རྒུ་ནི་, མི་ ཤེ་རབ་རྦེ་ཀ་ མན་པེན་, ཀོན་འཇོག་རྒེ་ ཤེད་རྡེ་ན་ རྡེན་ཆེ་ཤེ་ ཅོ་ཅེ་ཕི་ ཅོའེ་རྦེན་།6 ཏེཏ་པེ་ན་ ལྡན་ཀན་རྒུ་ནི་ ཕྲོ་ ཡོད་ཟ་ནི་, ངེ་ ཤེ་རབ་ཅེན་ནེ་ ཚིག་རྒུན་ ཉམ་པོ་ སྤེ་ར་ ཏང་ངེ་ཡོད་། འིན་ན་ ཏེ་ ཤེ་རབ་རྒུན་, འགྱོ་སྤ་ མེ་ཀན་ ཆ་ཅེ་ཅེན་ནེ་ འི་ འཇིག་རྟེན་པ་ ཡང་ འི་ འཇིག་རྟེན་ནེ་ ཝང་སྲུལ་པ་རྒུ་ནི་ མག་། 7 ང་ཞི་ སྤེ་ར་ ཏང་ཀ་ནེ་ ཤེ་རབ་པོ་ནི་, ཀོན་འཇོག་རྒེ་ སང་སྤེ་རེ་ ཐབ་པོ་ ནོག་, ཀའོ་ ཁོང་ངེ་ རྦེ་རྡེ་ པོ་རེ་ ཛེད་ཏེ་ འིན་། འིན་ན་ ཨ་ཧོ་རྒུན་ལ་ ཟི་ཞིད་ ཐོབ་ཅེ་ཕི་ འཇིག་རྟེན་ མ་ཆག་རྡེ་སང་ ངུལ་ལ་, ཁོང་ངེ་ འི་ ཐབ་པོ་ ཅོའོ་ ཛེད་ཏེ་ འིན་འབེན་། 8 འི་ འཇིག་རྟེན་ནེ་ ཝང་སྲུལ་པ་རྒུ་ནི་ ཏེ་ ཤེ་རབ་རྦེ་ ཐབ་པོ་, ཧ་མ་ཀོ་ ནོག་། ཀལ་ཏེ་ ཧ་ཀོ་རྦེན་ནི་, ཁོང་རྒུ་ནི་ ཨ་ཧོའེ་ ཟི་ཞིད་ཅེན་ནེ་ ཙོབོ་ རྐྱང་ཤིང་ངེ་ཀ་ རྐྱང་འདེ་ མེད་ཁྲོ་། 9 ཏེ་རྒ་རྦེ་ཕི་ལ་ ཏམ་པེ་ སུང་རབ་རྦེ་ན་ མོལ་རྡེ་ ནོག་
“སུ་ཞིག་ལ་ མ་ཐོང་ཀན་ ཡང་ མ་ཚོར་ཧན་
ཡང་ སམ་འབེ་ན་ མེ་ཀན་ཞིག་
ཀོན་འཇོག་ལ་ ཤེ་སྤ་ ཅོ་ཀན་རྒུ་ནི་ཕི་
ཀྲལ་འགྲིག་ ཅོའོ་ ཛེད་ཏེ་ ཡོད་ཏེ་ ནོག་།”
10 འིན་ན་ ཏོ་རྒུན་ ཀོན་འཇོག་ ཁོ་རང་ངེ་ ཐུག་ཡིད་པེ་, ཨ་ཧོ་རྒུན་ལ་ ངོན་ཅུག་རྒེ་ ཛེད་ཏེ་ ནོག་། ཏམ་པེ་ ཐུག་ཡིད་ལ་ ཅི་ཚང་མ་ ཐུག་རྒྱུའི་ ནོག་, ཀོན་འཇོག་རྒེ་ སང་སྤེར་རྒུན་ལ་། 11 མི་ཞིག་རྒེ་ སམ་ཀན་རྒུན་ ཏེ་རྒ་ མི་རྦེ་ སེམ་ཡིད་ མ་ཐེ་ལ་ ཞེན་ སུ་མི་ཞིག་རྒེ་ལ་ རྒྱུའི་ ཆ་མག་། ཏེ་རྒ་ ཙོག་སེ་ ཀོན་འཇོག་རྒེ་ ཐུག་སམ་རྒུན་ ཁོང་ངེ་ ཐུག་ཡིད་ ཅིག་པོ་ མ་ཐེ་ལ་, ཞེན་སུ་ཞི་ལ་ རྒྱུའི་ ཆ་མག་། 12 ཡང་ ཨ་ཧོ་རྒུན་ལ་ འཇིག་རྟེན་པེ་ སེམ་ཡིད་ མ་ནོག་, ཀོན་འཇོག་རྒེ་ ཐུག་ཡིད་ ཐོབ་ཏེ་ འིན་ཅེ་རྦེ་, ཨ་ཧོ་རྒུན་ལ་ ཀོན་འཇོག་རྒེ་ ཧ་ལེ་ཤེ་ ཁྱོའེ་མ་རྒུན་ རིན་ མེད་པེ་ སལ་ལེ་ ཛེད་ཀན་འབོ་ ཧ་ཀོ་ ཉེན་ཏེ་ ནོག་།
13 ཁྱི་ཞ་རྒུན་ལ་ ཏེ་ ཚང་མེ་ ཧོར་ལ་ ཤེད་ཟ་ནི་, ང་ཞི་ མི་ ཤེ་རབ་ནེ་ སོང་ཀ་ནེ་ ཚིག་རྒུན་ མ་ཀོལ་ལ་, ཐུག་ཡིད་རྡེ་ སལ་ཧ་ནེ་ ཚིག་རྒུན་ རྒྱུད་ཏེ་, སྤེ་ར་ ཏང་ངེ་ཡོད་། ཐུག་ཡིད་རྡེ་ རྡེན་འབའ་རྒུན་a ལབ་ཅེ་ལ་ ཐུག་ཡིད་ཅེན་ནེ་ ཚིག་རྒུན་ ཀོལ་ལེ་ཡིན་། 14 འིན་ན་ ཐུག་ཡིད་ མེ་ཀ་ནེ་ མི་རྦེ་, ཀོན་འཇོག་རྒེ་ ཐུག་ཡིད་ནི་ ཡོང་ཀ་ནེ་ རྡེན་འབའ་རྒུ་ནི་ཀ་ རྡེན་ཆེ་ཤེ་ ཅོའོ་ མག་། ཏེ་ མི་རྦོ་ལ་ ཡུ་རྒུན་ ཏོན་མེད་ ཚོར་རེ་ནོག་, ཡང་ ཁོ་ ཧ་ཀོ་ མག་, ཅེ་ཟེར་ནི་ ཐུག་ཡིད་ ཡོ་ཀན་རྒུན་ལ་ མ་ཐེ་ལ་, ཡང་སུ་ལ་ ཏོ་རྒུན་ ཧ་ཀོ་ ཉེན་ནེ་ མག་། 15 ཐུག་ཡིད་ ཡོ་ཀན་རྒུ་ནི་ ཅི་ཚང་མེ་ ཧོར་ལ་ ལྟག་ཅེད་ ཅོའེ་རྡེ་ ཧ་ཀོ་ཉེན་ནེ་ནོག་, འིན་ན་ ཐུག་ཡིད་ མེ་ཀན་རྒུ་ནི་ ཐུག་ཡིད་ ཡོ་ཀན་རྒུ་ནི་ ཅོ་ཟོ་ རྡང་ སམ་ཟོ་རྒུན་ ཧ་ཀོ་ ཉེན་ནེ་ མག་། 16 ཅེ་ཟེར་ནི་
“སུ་ལ་ ཙོབོ་རྡེ་ ཐུག་སམ་རྒུན་ རྒྱུའི་ཆེན་?
སུའི་ ལག་ལ་, ཁོང་ལ་ ལབ་ཞ་ ཏང་ཅེ་ ཤེ་རབ་ ཡོད་?”
འིན་ན་ ཨ་ཧོ་རྒུ་ནི་ན་ མ་ཤི་ཀེ་ ཐུག་སམ་རྒུན་ ཡོད་ཅེ་ཀ་ནི་, ཨ་ཧོ་རྒུན་ལ་ ཏེ་རྒུན་ ཧ་ཀོ་ཉེ་ནོག་།