ཀོ་རིན་ཐི་ ཆོའེ་ཚོག་ ཉམ་པོ་ པ་འུ་ལུའི་ འབྲེལ་།
4
ཏོ་རྦེ་ཕི་ལ་ ཨ་པོ་ལོ་ རྡང་ ང་, ཀོན་འཇོག་རྒེ་ སང་སྤེ་རེ་ ཐབ་རྦེ་ ཧོར་ལ་, ཧ་ཀོ་ཅུག་ཅེ་ ཁག་ ཀ་ལེ་ ཛེད་ཀ་ནེ་ མ་ཤི་ཀེ་ ཡོག་པོ་ ཙོག་སེ་ སམ་རྒོ་ཤེ་ ནོག་། 2 ཏ་ ཏུ་ཟུག་ ཁག་ཅེན་ ཁག་ ཀལ་ཧ་ནེ་ མིའུ་ ལོ་ཁྱེལ་ཅེན་འཇིག་ ཡོང་རྒོའེ་། 3 ཁྲིམ་སྤོན་ ཡང་ ཁྱི་ཞི་ ངེ་ ལེ་ཧེ་ ཧོར་ལ་ ཐག་ཅེད་ ཏང་ནི་, ང་ ཅང་ ཚེར་ཤེ་ མེ་རག་, ངེ་ ང་རང་ལ་ ཏེ་ ཧོར་ལ་ ཐག་ཅེད་ ཏང་ངེ་མེད་། 4 ངེ་ སེམ་འབོ་ ལག་མོ་ འིན་, འིན་ན་ ཏོ་རྦེ་ ང་ རྐྱོན་མེད་ འིན་ཀན་ ལྟན་ནེ་ མག་། ཙོབོ་ ཅིག་པེ་, ང་ ལྟག་ཅེད་ ཅོའོ་ ཛེད་ཏེ་ ཐག་ཅེད་ ཛེ་རྡེན་།5 ཏོ་རྦེ་ཕི་ ཀོན་འཇོག་རྒེ་ འདམ་མེ་ ཛེད་ཀ་ནེ་ ཏུའི་ ཡང་ནི་ མ་ཤི་ཀ་ ལོག་ཏེ་ ཕེབ་རྦེ་སང་ ངུལ་ལ་, སུ་ཞིག་རྒེ་ ཧོར་ལ་ ཐག་ཅེད་ མ་ཏང་ཧེ་། ཅེ་ཟེར་ནི་ ཁོང་ངེ་ ཨ་ཧོ་རྒུ་ནི་ མུན་ཀྲག་རྒེ་ན་ རྦེ་རྡེ་ ཡོ་ཀན་རྒུན་ འོད་རྡེ་ན་ ཁྱོང་ངེ་ ཛེད་ཏེ་ ཨ་ཧོ་ རང་རང་ སོ་སོའེ་ ལེ་ཧ་ ཅོ་ཀ་ནེ་ རྒྱུ་ཚན་ ངོན་ཅུག་རྒེ་ ཛེ་རྡེན་། ཏེ་ནི་ ཀོན་འཇོག་རྒེ་ མི་ རེ་རེ་ འོའེ་སྤ་ ནང་ཞིན་ རྟོད་པ་ སལ་ལེ་ ཛེ་རྡེན་།
6 སྤུན་རྒུན་ ཁྱི་ཞི་ ཕན་ཏོག་རྡེ་ཕི་ ངེ་ ལབ་ཞ་ ཏང་ཀན་རྒུ་ནི་ན་ ཨ་པོ་ལོ་ རྡང་ ང་རང་ སྤེ་ ཚུལ་ལ་ ཀོལ་རྦེན་། ཀལ་ཏེ་ ཏམ་པེ་ སུང་རབ་རྦེ་ན་ “འབྲི་ཀ་ནེ་སང་ ཐལ་རྡེ་ མ་ཆ་” མོལ་ཧན་འབེ་ཀ་ ནྃ་ ཅོ་ནི་, ཏེ་ནི་ ཁྱི་ཞ་ ལོབ་སྤོན་འཇིག་, ཞེན་རྒུ་ནི་སང་ ཀྲག་པོ་ སི་རྡེ་ ཁོའེ་ རྒྱབ་ནི་ འགྲུལ་ཅེ་ ཕོ་སོ་ མི་ཚོར་། 7 ཁྱི་ཞ་རྒུན་ལ་ ཏུ་ཟུག་ ཐག་ཅེད་ ཏང་ཅེ་ ཐོབ་ཏང་ སུའི་ ཏྃ་? ཁྱི་ཞ་རྒུ་ནི་ ལག་ལ་ ཡོ་ཀན་ ཚང་མ་ ཀོན་འཇོག་རྒེ་ སལ་ལེ་ ཛེད་ཏེ་ མག་རྒེ་? ཀལ་ཏེ་ ཀོན་འཇོག་རྒེ་ སལ་ལེ་ ཛེད་ཏེ་ འིན་ནི་, ཏེ་ནི་ ཁྱི་ཞི་ མན་ཀན་, ཀོན་འཇོག་རྒེ་ སལ་ཧ་ནེ་ ཁྱུད་རྒུ་ནི་ཀ་ ཀ་ཟུག་རྒེ་ ཕོ་སོ་ ཅོའེན་?
8 ཁྱི་ཞ་རྒུ་ནི་ ལག་ལ་ རྒོའེ་ཤེ་ ཚང་མ་ ཡོད་, ཡང་ ཆུག་པོ་ འིན་ ས་མེ་ རག་རྒེ་? ཅི་ ཁྱི་ཞ་རྒུ་ནི་ ཡི་ཤུ་རྡང་ ཉམ་པོ་ རྒྱ་སྤོ་ ཙོག་སེ་ ཝང་སྲུལ་ཅེ་ འགོ་ཟུག་ ཅོའེ་ ཚར་རྡེ་ འིན་ནེ་? ངེ་ འདོད་པ་ ཅོའེན་ རྡེན་འབའ་ ཁྱི་ཞ་རྒུ་ནི་ ཝང་སྲུལ་ལེན་ ཡོད་ཅེ་ཕི་ལ་, ཏེ་ནི་ ཨ་ཧོ་རྒུ་ནི་ ཉམ་པོ་ ཝང་སྲུལ་ལེ་ ཡོད་ཁྲོ་། 9 པར་པར་ རི་ལ་ ངེ་ ས་མེ་རག་, ཀོན་འཇོག་རྒེ་ ང་ཞ་ མ་ཤི་ཀེ་ ཧུ་ཚབ་རྒུན་ འཇིག་རྟེན་པ་ སོན་ཏེ་ རྡང་ ཕོ་ཉ་རྒུ་ནི་ འདུན་ལ་ ལྟན་མོ་ ལྟན་ནེ་ པོར་ཧན་ ཙོག་སེ་ འདུག་, ཀ་ཟུག་རྒེ་ སེད་ཅེ་ལ་ ཁྲིམ་ཅེད་ ཏང་ཀ་ནེ་ མག་རྒེ་ ཙོན་པ་རྒུན་ རྒྱལ་ཁ་ ཐོབ་ཀ་ནེ་ ཁྲོམ་ཧོར་རེ་ ལྟིང་འཇུག་ལ་ པོ་རེ་ཡོད་།
10 ང་ཞ་རྒུ་ནི་ མ་ཤི་ཀེ་ཕི་ ཞབ་རྟོག་ ཞུ་ཅེ་རྦེ་, ང་ཞ་རྒུན་ ཧ་འགྲང་ ཙོག་སེ་ ཐོང་འདུག་, འིན་ན་ ཁྱི་ཞ་རྒུ་ནི་ མ་ཤི་ཀེ་ན་ མྃ་རྡེ་ ཁེ་སྤ་ རིག་ འིན་ སམ་འདུག་། ང་ཞ་རྒུན་ འུ་ཐུག་ རིག་, ཁྱི་ཞ་རྒུན་ ཤེད་ཅེན་ རིག་། ཁྱི་ཞ་རྒུན་ལ་ སི་ཝ་ རྡང་ ང་ཞ་རྒུ་ནི་ཀ་ ཧབ་རྒོད་ ཏྃ་། 11 ཏག་ས་ ང་ཞ་རྒུན་ལ་ ལྟོག་ཤེ་ རྡང་ ཧོམ་ཅེ་ ཡོང་རག་, ཡང་ ང་ཞ་རྒུན་ ཀོའེ་ལག་ ཉིང་པ་ ཆེཏ་པོ་ ཀོན་ནེ་ཡོད་། ང་ཞ་རྒུན་ལ་ རྡུང་རྒྱབ་ ཏྃ་, ཡང་ འདེད་སེ་ ཁང་པ་ལ་ མེད་། 12 མི་ཙེ་ རྒོའེ་ཤེ་ཅན་རྒུན་ རིག་ཅེ་ཕི་ ང་ཞ་རྒུ་ནི་ ཧོཔ་ ངལ་ངལ་ཚུག་པ་, ང་ཞ་རང་ངེ་ ལག་པ་ནི་ ལེ་ཧ་ ཅོ་ཡོད་། ང་ཞ་ ངན་ ཏབ་ཀན་རྒུན་ལ་ ང་ཞ་རྒུ་ནི་ ཅིན་ལབ་ ཏང་ངེ་ཡོད་། ནག་ ལྟན་ཟ་ནི་, ང་ཞི་ ཟོད་པ་ ཉམ་པོ་ ཁུར་རེ་ཡོད་། 13 ཞེན་མེ་ ང་ཞི་ ཧོར་ལ་ སྤེ་ར་ ངན་པ་ ཟེར་རེ་ཡོད་ནི་ ང་ཞི་ ཁོང་ཀུན་རྡང་ སྤེ་ར་ འཇམ་པོ་ ཏང་ངེ་ཡོད་། ཏག་ས་ཚུག་པ་ ང་ཞ་ ཚང་མ་ འཇིག་རྟེན་ན་ ཁྱིམ་ས་ ཙོག་སེ་, ཚང་མེ་ ཀྲི་མ་ ཕི་རྡེ་ ཕྃ་ཧན་ ཙོག་སེ་ འགྱུར་།
14 ངེ་ ཡུ་ ཟེར་ཧན་ ཚང་མ་ ཁྱི་ཞ་རྒུན་ལ་ ཁྲེལ་རྦ་ ཅོ་ཅེ་ཕི་ འབྲི་མེད་, འིན་ན་ ང་རང་ངེ་ ཤེ་སྤ་ ཕྲུ་རྒུ་རྒུན་ ཙོག་སེ་ སྤང་པུད་རྡེ་ཡོད་། 15 ཁྱི་ཞ་རྒུན་ལ་ མ་ཤི་ཀེ་ ཧོར་ལ་ ལབ་ཀན་ ལྟོང་ཅུ་ ཡོད་ནྃ་, ཁྱི་ཞ་རྒུན་ལ་ སེམ་ཡིད་རྡེ་ ཐོག་ནི་, ཨ་རྦ་ ཅིག་ ཡོད་ཏེ་ ནོག་། ཅེ་ཟེར་ནི་ ནམ་ ངེ་ ཁྱི་ཞ་རྒུན་ལ་ ནེ་ཚུལ་ ཟང་པོ་ ཤེད་, ང་ མ་ཤི་ཀ་ ཡི་ཤུའི་ན་ ཁྱི་ཞ་རྒུ་ནི་ ཨ་རྦ་ འགྱུར་རྡེ་ འིན་འབེན་།
16 ངེ་ ཁྱི་ཞ་རྒུན་ལ་, ང་ ཙོག་སེ་ མི་ཙེ་ པུད་ཅེ་ལ་ ཉིང་ནི་ ཞུ་ཝ་ པུ་ལེ་ཡོད་། 17 ཏེ་རྒ་རྦེ་ཕི་ལ་ ཙོབོ་རྡེ་ན་ ངེ་ ང་རང་ངེ་ ཤེ་སྤ་ རྡང་ ལོ་ཁྱེལ་ཅེན་ནེ་ པུ་ཙ་ ཏི་མོ་ཐི་ ཁྱི་ཞ་རྒུན་ས་ ལམ་ཅུག་པེན་། མི་ཙེ་ པུད་ཅེ་ ཧོར་ལ་ ཀང་ལུང་ས་ ཆོའེ་ཚོག་ ཚང་མེ་ན་ ངེ་ ལབ་ཀན་ ཙོག་སེ་ མི་ཙེ་, ངེ་ མ་ཤི་ཀ་ ཡི་ཤུའི་ རྒྱབ་ནི་ འགྲུ་ལེན་ པུད་ཀན་འབེ་ ཧོར་ལ་ ཏི་མོ་ཐི་ ཁྱི་ཞ་རྒུན་ལ་ འི་ཏུ་ ཧུལ་ལེན་།
18 ང་ ཁྱི་ཞ་རྒུན་ས་ ཡང་ ཐུག་རྒེ་ལ་ ཡོང་ངེ་ མག་ སམ་འདེ་, ཁྱི་ཞ་རྒུ་ནི་ ཕྲོ་ནི་ ཁ་ཅིག་ ཕོ་སོ་ཅེན་ འགྱུར་རྡེ་ ཡོད་ཅེ་རག་། 19 ཙོབོ་ ཀོན་འཇོག་རྒེ་ ཐུག་འདོད་ ཡོད་ནི་, ང་ འགྱོ་སྤ་ ཡོང་ངེན་། ཏེ་ནི་ ངེ་ ཏེ་ ཕོ་སོ་ཅེན་རྒུ་ནི་ ཧ་འགྲང་ངེ་ སྤེ་ར་ ཡང་, ཁོང་རྒུ་ནི་ན་ ཀོན་འཇོག་རྒེ་ རྡེན་འབེ་ ཝང་ཆ་རྒུན་ ཡོ་ཀན་འབོ་ ལྟ་ ཉེན་ནེན་། 20 ཅེ་ཟེར་ནི་ ཀོན་འཇོག་རྒེ་ རྒྱལ་སྲིད་རྡེ་ན་ འདེད་ཀན་རྒུ་ནི་ སྤེ་ར་ ཅིག་པོ་ མ་ནོག་, ཀོན་འཇོག་རྒེ་ ཝང་ཆེ་ན་ མི་ཙེ་ པུད་རྡེ་ནོག་། 21 ཁྱི་ཞ་རྒུ་ནི་ ཀའོ་ འདམ་མེ་ཡོད་? ང་ ཁྱི་ཞ་རྒུན་ས་ པེར་ཧ་ ཁུར་རྡེ་ ཆེད་པ་ ཅེད་རྡེ་ལ་ ཡོང་ངེ་ ཡ་, ཤེ་སྤ་ རྡང་ སེམ་ཡིད་ འཇམ་པོ་ ཉམ་པོ་ ཡོང་?