ཞེན་མེ་ ཕན་ཏོག་རྡེ་ཕི་ མི་ཙེ་ པུད་།
15
ཨ་ཧོ་ ཏེཏ་པེ་ན་ ཤུག་ཤེན་ ཡོ་ཀན་རྒུ་ནི་, ཨ་ཧོ་རང་རྒུན་ ཐེད་ཅུག་ཅེ་ མ་ནོག་, ཏེཏ་པེ་ན་ འུ་ཐུག་ ཡོ་ཀན་རྒུ་ནི་ རྒོ་ཤེ་ ཧོར་ལ་ སམ་བ་ ཏང་རྒོ་ཤེ་ ནོག་། 2 ཨ་ཧོ་རྒུ་ནི་ ཞེན་ སྤུན་རྒུ་ནི་ ཕན་ཏོག་རྡེ་ཕི་ ཡ་ཏོ་ ཅོའེ་རྡེ་ ཁོང་རྒུན་ ཙོབོ་ལ་ ཏེཏ་པ་ ཅོ་ཅེ་ན་ ལྡན་ཅུག་རྒོའེ་། 3 འི་ཏུ་ ཅོའེ་རྡང་, མ་ཤི་ཀེ་ལ་ ཁོ་རང་ ཐེད་ཅུག་ཅེ་ལ་ མི་ཙེ་ པུད་རྡེ་ མ་ཛེད་། ཀ་ཟུག་ ཏམ་པེ་ སུང་རབ་རྦེ་ན་ མོལ་འདེ་ ནོག་, “ཏེ་ ཚིག་, ཀའོ་རྒུན་ ཀོན་འཇོག་ལ་ འབར་ཧན་རྒུན་, ཏོ་རྒུན་ ངེ་ཀ་ པབ་ཏེ་ ནོག་།” 4 ཨ་ཧོ་རྒུན་ལ་ ལབ་ཅེ་ཕི་ ཏོ་ ཚང་མ་ ཏམ་པེ་ སུང་རབ་རྦེ་ན་ འབྲི་ཛེད་ཏེ་ ནོག་། ཀོན་འཇོག་རྒེ་ ཞལ་ཆེཏ་རྒུན་ ཀྲུཔ་ཅེ་ལ་ ཨ་ཧོ་ ཟོད་པ་ ཉམ་པོ་ སྲུྃ་རྡེ་ ཡོད་ཟ་ནི་, ཏམ་པེ་ སུང་རབ་རྦེ་ ཨ་ཧོ་ལ་ རེ་ཝ་ རྡང་ སེམ་རུའི་ ཏང་ངེ་ནོག་།5 ཟོད་པ་ རྡང་ སེམ་རུའི་ སལ་ལེ་ ཛེད་ཀ་ནེ་ ཏེ་རྒ་ ཀོན་འཇོག་པེ་ ཁྱི་ཞ་རྒུན་ ཅིག་ ཏང་ ཅིག་ ཉམ་པོ་ ཐུན་འདེ་ འདེད་ཅེ་ལ་ ཡ་ཏོ་ ཛེད་ཤིག་, ཀ་ཟུག་ མ་ཤི་ཀ་ ཡི་ཤུའི་ རྒྱབ་ནི་ འགྲུལ་ཧན་རྒུན་ ཡོང་རྒོ་ཤེ་ ནོག་། 6 ཏེ་ནི་ ཁྱི་ཞ་ ཚང་མ་ ཅིག་འགྲིལ་ སོང་འདེ་ ཧད་ཅིག་རྒེ་ན་ ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ ཡབ་ ཀོན་འཇོག་ལ་ རྟོད་པ་ རྡང་ སྤལ་རྒུན་ པུལ་ཉེ་ནེན་།
7 མ་ཤི་ཀེ་ ཁྱི་ཞ་རྒུན་ལ་ རྒ་སུའི་ ཞུ་ ཙོག་སེ་, ཀོན་འཇོག་རྒེ་ སྤལ་ལེ་ཕི་ ཁྱི་ཞ་རྒུ་ནི་ སྤུན་ ཚང་མ་ ཡ་པེ་ མེད་རྡེ་ རྒ་སུའི་ ཞུའི་ཧེ་། 8 འི་ཏུ་ ཅོའེ་ཧེ་, ཀོན་འཇོག་ ཡ་ཧུ་འདཱ་པ་རྒུ་ནི་ ཕ་མེ་པོ་རྒུན་ལ་ ཞལ་ཆེཏ་ ཛེད་ཀན་འབེ་ན་ ལོ་ཁྱེལ་ཅེན་ ཞུ་རྡེ་ འིན་ཀན་འབོ་ ལྟན་ནེ་ ཛེད་ཅེ་ལ་, མ་ཤི་ཀ་ ཡ་ཧུ་འདཱ་པ་རྒུ་ནི་ ཞབ་རྟོག་པ་ཞིག་རྒེ་ ཚུལ་ལ་ རྐྱོད་རྡེ་ ཛེད་། 9 ཡ་ཧུ་འདཱ་པ་ མན་ཀན་རྒུན་ལ་ ཉིང་ཞེ་ ཛེད་ཅེ་རྦོ་ལ་ ཁོང་རྒུ་ནི་ལ་ ཀོན་འཇོག་ལ་ སྤལ་ པུ་ལེན་། ཀ་ཟུག་ ཏམ་པེ་ སུང་རབ་རྦེ་ན་ འབྲི་ཛེད་ཏེ་ ནོག་,
“ཏོ་རྦེ་ཕི་, ངེ་ ཉེ་རང་ལ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ རྟོད་པ་ པུ་ལེན་།
ངེ་ ཉེ་རང་ངེ་ ཚན་ལ་ རྟོད་པེ་ ལུ་ པུ་ལེན་།”
10 ཏམ་པེ་ སུང་རབ་མེ་ནྃ་ མོལ་རྡེ་ འདུག་།
“ཡ་ཧུ་འདཱ་པ་ མན་ཀན་, ཁྱི་ཞ་རྒུ་ནི་
ཁོང་ངེ་ མི་རྒུན་ ཉམ་པོ་ རྒ་མོ་ ཅོའེ་ཧེ་།”
11 ཡང་ སུང་རབ་འབེ་ནྃ་ མོལ་རྡེ་ འདུག་།
“ཁྱི་ཞ་ ཡ་ཧུ་འདཱ་པ་ མན་ཀན་ ཚང་མེ་ ཙོབོ་ལ་ རྟོད་པ་ པུལ་ཧེ་།
ཡང་ འཇིག་རྟེན་པ་ ཚང་མེ་ ཁོང་ལ་ རྟོད་པ་ པུལ་ཧེ་།”
12 ལུང་རྟོན་པ་ ཡེ་ཤ་ཡཱེ་ འི་ཟུག་ མོལ་,
“འདཱ་འབིད་རྡེ་ ཁྲིའི་ ནོར་ཧལ་ལ་ ཐོབ་ཅེ་ཅེན་འབོ་ རྐྱོད་རྡེན་
ཡང་ ཁོང་ངེ་ ཡ་ཧུ་འདཱ་པ་ མན་ཀན་རྒུ་ནི་ཀ་ ཝང་སྲུལ་ལེན་།
ཁོང་རྒུ་ནི་ ཁོང་ངེ་ཀ་ རེ་ཝ་ པོ་རེན་།”
13 རེ་ཝ་ སལ་ཧ་ནེ་ ཀོན་འཇོག་རྒེ་ ཁྱི་ཞ་རྒུ་ནི་ན་ རྒ་མོ་ རྡང་ ཞིའི་རྡེ་ ཧང་ངེ་ ཛེད་ཤིག་, ཅེ་ཟེར་ནི་ ཁྱི་ཞི་ ཁོང་ངེ་ཀ་ རྡེན་ཆེ་ཤེ་ ཅོའེ་། ཏེ་ནི་ ཏམ་པེ་ ཐུག་ཡིད་ རྒྱུད་ཏེ་, ཁྱི་ཞ་རྒུ་ནི་ན་ རེ་ཝ་ ལུད་ཏེ་ ཆེན་།
པ་འུ་ལུའི་ འབྲི་ཛེད་ཅེ་ རྒྱུན་ཚན་།
14 ངེ་ ཤེ་སྤ་ སྤུན་རྒུན་, ཁྱི་ཞ་ ཟང་པེ་ ཀང་འདེ་ ཡོ་ཀན་འབེ་ཀ་ ང་ ནེན་ཏེན་ལ་ ལོ་ཁྱེལ་ རག་། ཁྱི་ཞ་རྒུན་ལ་ ཏོ་རྒུན་ མ་ རྒྱ་ལེ་ ཅོའེ་རྡེ་ ཤེ་ཤེ་ཀ་ནི་, ཁྱི་ཞ་རྒུ་ནི་ ཅིག་ ཏང་ ཅིག་ལ་ ཏོ་རྦེ་ ཧོར་ལ་ ལབ་ཉེན་ནེན་། 15 ཏེ་ན་ ཁྱི་ཞ་ འི་ཏུ་ ཧུལ་ཅེ་ཕི་, ངེ་ སྤེ་ར་ ཁ་ཅིག་རྒེ་ ཧོར་ལ་ མ་ ཧམ་བ་ ཉམ་པོ་ འབྲི་རྡེ་ འིན་། ཅེ་ཞུ་ནི་ ཀོན་འཇོག་རྒེ་ ཐུག་ཞེ་ རྒྱུད་ཏེ་ 16 ང་, མ་ཤི་ཀ་ ཡི་ཤུའི་ ཞབ་རྟོག་པ་ ཁྱི་ཞ་ ཡ་ཧུ་འདཱ་པ་ མན་ཀན་རྒུ་ནི་ཕི་ ཏམ་པེ་ ཁྲིན་ ཁྱོང་ཀན་འབོ་ འིན་། ཁྱི་ཞ་རྒུན་, ཀོན་འཇོག་རྒེ་ ཐུག་ཐེད་རྡེ་ ཛེད་ཀ་ནེ་ ཆོད་པ་ ཐེའེ་ ཛེད་ཅེ་ལ་ ནེ་ཚུལ་ ཟང་པོ་རྦོ་ ཁྱོང་རྦེན་, ཀའོ་རྒུན་ ཏམ་པེ་ ཐུག་ཡིད་ རྒྱུད་ཏེ་ ཏམ་པ་ ཅོའོ་ ཛེད་ཏེ་ འིན་། 17 ཀོན་འཇོག་རྒེ་ ཞབ་རྟོག་རྒེ་ན་ མ་ཤི་ཀ་ ཡི་ཤུའི་, ང་ རྒྱུད་ཏེ་, ཛེད་ཀན་ ཚང་མེ་ཕི་ ང་ མ་ ཐེད་པོ་ རག་། 18 ཏེ་ན་ མ་ཤི་ཀེ་, ང་ རྒྱུད་ཏེ་, ཅོའོ་ ཛེད་ཀན་རྒུ་ནི་ཕི་ མན་, ཡང་ ཅི་ཞིག་ལ་ ཕོ་སོ་ ཅོ་ཅེ་ ཧམ་བ་ ཅོ་མེད་, ཀའོ་ ངེ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཁྲིན་ འདང་ ལེ་ཧ་ ཅོ་ཚུལ་རྒུན་ རྒྱུད་ཏེ་, ཁོང་རྒུན་ལ་ ཀོན་འཇོག་རྒེ་ན་ ཏེཏ་པ་ ཅོ་ཅུག་ཅེའོ་ འིན་། 19 ཧ་ལེ་ཤེ་ ལྟའ་རྒུན་ འདང་ ལྟའ་རྒུ་ནི་ ཤུག་ ཡང་ ཏམ་པེ་ ཐུག་ཡིད་རྡེ་ ཤུག་ རྒྱུད་ཏེ་, ཁོང་རྒུ་ནི་ ངེ་ ཁྲིན་ ཀྲང་པོ་ འིན་ཀན་འབེ་ཀ་ ལོ་ཁྱེལ་། ཏེ་རྒ་ ཙོག་སེ་ ངེ་ མ་ཤི་ཀེ་ ནེ་ཚུལ་ ཟང་པོ་ སོན་ཏེ་ ཡེ་རུ་ཤ་ལེམ་མེ་ རྒྱལ་ས་ནི་ ཨི་ལི་རི་ཀམ་མེ་ རྒྱལ་ས་ཚུག་པ་ ཤེད་པེན་།
20 ཞེན་མ་ཞིག་རྒེ་ མག་རྡེན་ ཏང་ཀན་འབེ་ཀ་ མི་སིག་ཅེ་ཕི་ ངེ་ མ་ཤི་ཀེ་ ཚན་ མ་ནི་ མི་ཚོར་སེ་ ས་ཅ་རྒུ་ནི་ན་ ནེ་ཚུལ་ ཟང་པོ་ ཤེད་ཅེའོ་, ཏུའི་རྒྱུན་ ངེ་ མིག་ཞི་ འིན་འབེན་། 21 ཀ་ཟུག་ ཏམ་པེ་ སུང་རབ་རྦེ་ན་ མོལ་འདེ་ འདུག་,
“ཀའོ་རྒུན་ལ་ ཁོང་ངེ་ ཧོར་ལ་ མ་ནི་ མ་ཤེད་ ཏོ་རྒུ་ནི་ ཁོང་ འཇལ་ལེན་
ཡང་ ཁོང་ངེ་ ཧོར་ལ་ མ་ནི་ མ་ཚོར་ཧན་རྒུ་ནི་ ཧ་ཀོ་འིན་།”
22 ཏེ་རྒ་རྦེ་ཕི་ལ་ ང་ ཁྱི་ཞ་རྒུན་ས་ ཡོང་ཅེ་ནི་ འགོར་རྡེ་ ནོག་, ཅེ་ཟེར་ནི་ ང་ ཏེ་ ས་ཅ་རྒུ་ནི་ ནང་ལ་ ཆོའེ་ཤེད་རྒོའེ་རྡེ་ ནོག་།
པ་འུ་ལུའི་ རོམ་ལ་ ཆ་ཅེ་ ཐབ་ལྡིང་།
23 འིན་ན་ ཏ་ ངེ་ འི་ ཡུལ་ཞོང་རྒུ་ནི་ན་ ལེ་ཧ་རྒུན་ ཅོའེ་ཚར་། ཡང་ ལོ་ མང་པོ་ཞིག་ནི་ཕ་ལ་ ཁྱི་ཞ་ ཐུག་ཅེ་ལ་ རིང་རྡེན་ ཡོད་པེ་, 24 ང་ སྤེན་ནེ་ ཡུལ་ལ་ ཆ་ཟ་ནི་, ཁྱི་ཞ་ ཐུག་རྒེ་ ཡོང་ངེན་། ཏུ་རུ་ ཆ་ཟ་ནི་ ང་ ཁྱི་ཞ་ས་ འདེད་ཏེ་ ཁྱི་ཞ་རྒུན་ ཉམ་པོ་ རྐྱིད་པེ་ ཏུའི་ཞིག་ པུད་རྡེན་། ཡང་ ངེ་ སྤེན་ལ་ ཆ་ཅེ་ པེ་ལ་ རྒོའེ་ཤེ་ཅན་རྒུ་ནི་ན་ ཁྱི་ཞི་ ཡ་ཏོ་ ཅོ་ཉེ་ནེན་།
25 འིན་ན་ ང་ ཡོང་ངེ་སང་ ངུལ་ལ་, ཡེ་རུ་ཤ་ལེམ་མེ་ན་ ཡོ་ཀ་ནེ་ ཏེཏ་པ་ཅན་རྒུན་ལ་ ཡ་ཏོ་རྦོ་ ཁྱེར་རེ་ལ་ ཆ་རྒོ་ཤེ་ ཡོད་། 26 མ་ཀེ་འདོ་ནི་ཡཱ་ རྡང་ ཨ་ཀ་ཡཱེ་ ཏེཏ་པ་ཅན་རྒུན་, ཡེ་རུ་ཤ་ལེམ་མེ་ ཏེཏ་པ་ཅན་རྒུ་ནི་ ཕྲོ་ ཡོ་ཀ་ནེ་ ཉལ་རྦ་ཅེན་རྒུན་ལ་, རོག་ ཅོའེ་རྡེ་ མུལ་ ཀལ་ཤེ་ལ་ ཐེད་པོ་ ཡོད་ཏེ་ ནོག་། 27 ཁོང་རྒུན་ ཏེ་ ཅོའེ་ཧན་འབེ་ཀ་ མ་སྲན་ཀྲེ་ ཐེད་པོ་ ནོག་, ངོའེ་སྤོ་ལ་ ཁོང་རྒུ་ནི་ ཏོ་ པུ་ལོན་ཞིག་ ཤལ་རྒོའེ་རྡེ་ ནོག་། ཀལ་ཏེ་ ཡ་ཧུ་འདཱ་པ་ མན་ཀན་རྒུ་ནི་, ཡ་ཧུ་འདཱ་པ་རྒུན་ལ་ ཀོན་འཇོག་རྒེ་ ཅིན་ལབ་ ཐོབ་ཀན་རྒུན་ རྒོའོ་ཡོད་ནི་, ཏེ་ནི་ ཁོང་རྒུན་ལ་ ཡོ་ཀ་ནེ་ ནོར་རྒུན་ལ་ ཡ་ཧུ་འདཱ་པེ་ ཏེཏ་པ་ཅན་རྒུན་ ཉམ་པོ་ རྒོ་རྒོའེ་། 28 ངེ་ འི་ མུལ་ རྡུའི་ཧན་འབོ་ ཁོང་རྒུན་ལ་ ཏྃ་རྡེ་ ང་རང་ངེ་ ཁག་པོ་ འདྲན་འདྲ་ ཀྲུབ་ཅུག་ཏེ་ ལྟིང་ནི་, སྤེན་ལ་ ཆ་ཟ་ནི་, ང་ ཁྱི་ཞ་ ཐུག་ཏེ་ ཆེན་། 29 ང་ ཁྱི་ཞ་ས་ ལེབ་ཏེ་ ཨ་ཧོ་རྒུན་ ཉམ་པོ་ ཡོ་ཀ་ནེ་ ཏུའི་རྦོ་ལ་ མ་ཤི་ཀེ་, ཅིན་ལབ་ མང་པོ་ སལ་ལེ་ ཛེ་རྡེན་ ཏོ་ ང་ ནེན་ཏེན་ རྒྱུའི་ རག་།
30 ཤེ་སྤ་ སྤུན་རྒུན་, ངེ་ ཁྱི་ཞ་རྒུན་ལ་ ཙོབོ་ ཡི་ཤུ་ མ་ཤི་ཀེ་ན་ སེམ་རུའི་ ཏང་ངེན་, ངེ་ པར་རྡོའེ་ ཏུའི་ལ་ ངེ་ཕི་ ཀོན་འཇོག་ལ་ མོ་ལམ་ ཞུ་ཅེ་ལ་ ཞུ་ཝ་ པུ་ལེ་ཡོད་། ཏམ་པེ་ ཐུག་ཡིད་རྡེ་ སལ་ལེ་ ཛེད་ཀ་ནེ་ ཁྱི་ཞ་རྒུ་ནི་ ཤེ་སྤ་, ངེ་ཕི་ ཡོད་ཅེའོ་ ཏོ་ ཅོའེ་ཧེ་། 31 ཡ་ཧུ་འདཱེ་ན་ ཡོ་ཀ་ནེ་ ཡ་ཧུ་འདཱ་པ་ ཏེཏ་པ་ མེ་ཀན་རྒུ་ནི་ཀ་ནི་ ང་ རྐྱོབ་ཅེ་ལ་ ཀོན་འཇོག་ལ་ མོ་ལམ་ ཞུའི་ཧེ་། ཡང་ ངེ་ ཡེ་རུ་ཤ་ལེམ་ལ་ ཁྱེར་ཤེ་ཅེན་ནེ་ རོག་རྒེ་ མུལ་འབོ་ ཏུ་རུ་ ཡོ་ཀ་ནེ་ ཏེཏ་པ་ཅན་རྒུ་ནི་ ཐེད་པོ་ ཉམ་པོ་ ནེན་ཅེ་ལ་ མོ་ལམ་ པུལ་ཧེ་། 32 ཏེ་ནི་ ཀོན་འཇོག་རྒེ་ ཐུག་འདོད་ ཡོད་ནི་, ང་ ཁྱི་ཞ་རྒུན་ས་ སེམ་ ཐེད་པོ་ ཉམ་པོ་ ཡོང་ངེན་, ཡང་ ཨ་ཧོ་རྒུ་ནི་ ཅིག་ ཏང་ ཅིག་ལ་ སེམ་རུའི་ ཏང་ ཉེ་ནེན་།
33 ཞིའི་རྡེ་ ཀོན་འཇོག་ ཁྱི་ཞ་ ཚང་མ་ ཉམ་པོ་ ཞུ་ཤིག་, ཨ་མེན་།