རོམ་པ་ 14

ཏེཏ་པེ་ན་ ཤུག་མེད་ ཏང་ ཤུག་ཤེན་།

ཏེཏ་པེ་ན་ འུ་ཐུག་ ཡོ་ཀན་རྒུན་ ཁྱི་ཞ་རྒུ་ནི་ ཕྲོ་ སྲེ་, འིན་ན་ ཁོང་རྒུ་ནི་ སམ་ཚུལ་ ཀའོ་ སེམ་ཡིད་རྡེ་ ཐོག་ནི་ ཁག་ཅེན་ མན་ ཏོ་རྒུ་ནི་ ཧོར་ལ་ ཁྲུག་པ་ མ་ཏང་ཧེ་། 2 སྤེར་ན་ མི་ ཅིག་རྒེ་ ཏེཏ་པེ་ ཁོ་ ཅི་ཚང་མ་ ཟ་ནྃ་ ཆོག་ ཟེ་རེ་ནོག་, འིན་ན་ ཏེཏ་པ་ འུ་ཐུག་ ཡོ་ཀན་ ཡང་ མི་ཞིག་རྒེ་, ཚོཏ་མ་ མ་ནི་ ཟ་མག་། 3 ཅི་ཚང་མ་ ཟ་ཀན་རྒུ་ནི་ ཚོཏ་མ་ མ་ནི་ མ་ཟ་ཀན་རྒུན་ལ་ ཉམ་ཤུང་ སི་ཝ་ མེ་ཀན་ ཙོག་སེ་ ལྟ་ མ་རྒོའེ་། ཡང་ ཤ་ མ་ཟ་ཀན་རྒུ་ནི་, ཟ་ཀན་རྒུན་ལ་ རྡིག་པ་ ཅོའེ་རྡེ་ ནོག་ ཟེར་ཏེ་ ཉེད་ཀལ་ ཀལ་ མི་རྒོའེ་, ཅེ་ཟེར་ནི་ ཀོན་འཇོག་རྒེ་ ཁོང་རྒུན་ལ་ རྒ་སུའི་ ཞུ་ ཛེད་ཏེ་ ནོག་། 4 ཞེན་མ་ཞིག་རྒེ་ ཞབ་རྟོག་པ་ཞིག་ལ་ ཁྲིམ་ཅེད་ ཏང་ཀན་ ཁྱེ་རང་ སུ་ འིན་? ཁོང་རྒུན་ རྐྱོན་མེད་ འིན་ནེ་ མན་, ཏོ་ ཁོ་རང་རྒུ་ནི་ སྤོན་འབེ་ ཐག་ཅེད་ ས་ལེན་། ཡང་ ཁོང་རྒུན་ རྐྱོན་མེད་ ལུའི་རྡེན་, ཅེ་ཟེར་ནི་ ཙོབོ་རྡེ་, ཏོ་རྒུན་ རྐྱོན་མེད་ ཅོ་ཉེན་ནེ་ ཛེ་རྡེ་ནོག་།

5 མི་ ཅིག་རྒེ་, ཞག་ཅིག་ ཡང་ཞག་རྒུ་ནི་སང་ མང་ངེ་ ཏམ་པ་ ཐེའེ་ནོག་། ཞེན་ཡང་ མི་ ཅིག་རྒེ་, ཞག་ ཚང་མ་ ཙོག་སེ་ ཐེའེ་ནོག་། ཁྱི་ཞ་ རེ་རེ་ རང་རང་ངེ་ སམ་ཀན་འབེ་ཀ་ རྟེམ་པོ་ ཡོང་རྒོའེ་། 6 ཞག་ཅིག་ ཁག་ཅེན་ ཐེའེ་རྡེ་ ཙོབོ་ལ་ ཅོལ་ཧན་རྒུ་ནི་ ཏོ་ ཁོང་ལ་ སི་ཝ་ པུལ་ཤེ་ལ་ ཅོ་ནོག་། ཤ་ ཟ་ཀན་རྒུ་ནི་ ཙོབོ་རྡེ་ སི་ཝེ་ན་ ཟ་ནོག་, ཅེ་ཟེར་ནི་ ཁོང་རྒུ་ནི་ ཟ་སང་ ངུལ་ལ་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་ ནོག་། ཡང་ ཤ་ མ་ཟ་ཀན་རྒུ་ནི་ལ་ ཙོབོ་རྡེ་ སི་ཝེ་ན་ ཤ་ ཟ་མག་ ཡང་ ཁོང་རྒུ་ནི་ ཀོན་འཇོག་ལ་ ཐུག་ཞེ་ཆེ་ ཞུ་ནོག་། 7 ཨ་ཧོ་རྒུན་ ཨ་ཧོ་རང་ངེ་ཕི་ སོན་པོ་ འདེད་རྡེ་ མག་ ཡང་, ཨ་ཧོ་རང་ངེ་ཕི་ ཤི་ མག་། 8 ཀལ་ཏེ་ ཨ་ཧོ་རྒུན་ སོན་པོ་ མི་ཙེ་ པུད་རྡེ་ཡོད་ནི་, ཏོ་ ཙོབོ་ལ་ སི་ཝེ་ཕི་ ནོག་། ཡང་ ཀལ་ཏེ་ ཨ་ཧོ་རྒུན་ ཤི་ནི་ ཏོ་ལ་ ཙོབོ་རྡེ་ སི་ཝེ་ཕི་ ནོག་། ཏོ་རྦེ་ཕི་ ཨ་ཧོ་རྒུན་ སོན་པོ་ ཡོད་ཁྲོ་ ཡང་ ཤི་རྡེ་, ཨ་ཧོ་རྒུན་ ཙོབོ་རྡེ་ ནོག་། 9 ཤི་ཀན་ འདང་ སོན་པོ་ ཉ་ཧེ་ ཙོབོ་ འགྱུར་ཤེ་ རྒྱུ་ཚན་འབེ་ཕི་, མ་ཤི་ཀ་ ཀྲོང་ངེ་ ཛེད་ཏེ་ ཡང་ སོན་པོ་ ཞྃ་རྡེ་ ཛེད་།

10 ཏེ་ནི་ ཅི་ཕི་ ཁྱེ་རང་ངེ་ སྤུན་ཞིག་ལ་ ཉེད་ ཀ་ལེ་ཡོད་། ཡང་ ཁོང་རྒུན་ལ་ ཉམ་ཤུང་ སི་ཝ་ མེ་ཀན་ ཙོག་སེ་ ཅེ་ ལྟ་ཡོད་? འི་ཏུ་ ཅོའེ་ཧེ་, ཨ་ཧོ་ ཚང་མ་ ཀོན་འཇོག་རྒེ་ ཁྲིམ་ཅེད་རྡེ་ ཞུ་ཁྲིའི་ འདུན་ལ་ ལྃ་རྒོའེ་རྡེ་ནོག་། 11 ཏམ་པེ་ སུང་རབ་རྦེ་ན་ མོལ་རྡེ་ ནོག་,

“ཙོབོ་རྡེ་ མོལ་, ‘ཀ་ཟུག་ ང་ སོན་པོ་ ཡོ་ཀན་འབོ་ རྡེན་འབའ་ འིན་,

པིག་ཛུམ་ རྒྱབ་ཏེ་ ཚང་མེ་ ང་ ཆག་པུ་ལེན་།

ལྕེ་ ཚང་མེ་ རྟོད་པ་ པུ་ལེན་ ང་ ཀོན་འཇོག་ འིན་ཀན་འབེ་ སྤང་པོ་ ཏང་ངེན་།’”

12 ཏེ་རྒ་རྦེ་ཕི་ལ་ ཨ་ཧོ་ རེ་རེ་ ཀོན་འཇོག་རྒེ་ ཧུ་འདུན་ལ་ རང་རང་ངེ་ ཅོ་ཀན་ ཚང་མ་ ཤེད་རྒོའེ་རྡེ་ནོག་, ཏེ་ནི་ ཁོང་ངེ་ ཁྲིམ་ཅེད་ ཛེ་རྡེན་། 13 སོང་འབེ་སང་ ཅིག་ ཏང་ ཅིག་ལ་ ཉེད་ཀལ་ མ་ཅོ་ཧེ་། ཏོ་རྦེ་ ཚབ་ལ་, ཞེན་མ་ ཏེཏ་པ་ཅེན་ཞིག་ རྒག་ ཕུག་ཏེ་ འགྱེལ་ མི་ཅུག་ཤི་ མི་ཙེ་ཞིག་ པུད་ཧེ་།

14 ང་ རྒྱུའི་ཡོད་, ཡང་ ཙོབོ་ ཡི་ཤུའི་ ཝང་ངེ་ན་ ཟ་ཅེ་ན་ ཚང་མ་ ཀྲིཔ་ མན་ཀན་འབོ་ ང་ ནེན་ཏེན་ལ་ ལོ་ཁྱེལ་ རག་། འིན་ན་ ཀལ་ཏེ་ སུ་ཞིག་རྒེ་ ཏོ་ སང་མ་ མག་ སམ་ནི་, ཏེ་ནི་ ཁོའེ་ཕི་ ཏོ་ སང་མ་ མག་། 15 ཀལ་ཏེ་ ཁྱི་ཞི་ ཟ་ཅེ་རྦེ་, ཞེན་ཡང་ སྤུན་ཞིག་ལ་ སེམ་ཕམ་ ཆ་ཅུག་ནི་, ཏེ་ནི་ ཁྱི་ཞི་ ཤེ་སྤེ་ན་ ལེ་ཧ་ མ་ཅོ་ལ་ ནོག་། ཁྱི་ཞ་རྒུ་ནི་ ཟ་ཅེ་རྦེ་, ཁྱི་ཞ་རང་ངེ་ སྤུན་ཞིག་རྒེ་ ཏེཏ་པ་ མེ་ཀན་ མ་ཅོ་ཧེ་, ཀ་རྦེ་ ཏོན་ལ་ མ་ཤི་ཀ་ ཀྲོང་རྡེ་ ཛེད་། 16 ཁྱི་ཞི་ རྒྱ་ལེ་ ནོག་ སམ་འདེ་ ཅོ་ཀན་འབོ་ལ་ སུ་ཞིག་ལ་ ཉེད་ཀལ་ ཅོ་ མ་ཅུག་ཧེ་། 17 ཀོན་འཇོག་རྒེ་ རྒྱལ་སྲིད་རྡེ་ན་ ཁག་ཅེན་འབོ་ནི་, ཟ་ཅེ་ རྡང་ ཐུང་ཅེ་ མག་, ཏམ་པེ་ ཐུག་ཡིད་རྡེ་ན་ ཞིའི་རྡེ་ རྡང་ རྐྱིད་པེ་ མི་ཙེ་ ཀྲང་པོ་ཞིག་ པུད་ཅེའོ་ ནོག་། 18 ཀལ་ཏེ་ ཁྱི་ཞ་རྒུ་ནི་ ཏུ་ཟུག་ མི་ཙེ་ པུད་རྡེན་ མ་ཤི་ཀ་ ཞབ་རྟོག་ ཞུ་ནི་, ཁྱི་ཞ་རྒུ་ནི་ ཀོན་འཇོག་ ཐུག་ཉེ་ ཤུག་རྒེ་ནོག་, ཡང་ ཞེན་མ་རྒུ་ནི་ ཁྱི་ཞ་རྒུན་ལ་ སི་ཝ་ ཅོའེན་། 19 ཨ་ཧོ་རྒུ་ནི་ ཆོའེ་ཚོག་རྒེ་ན་ ཞིའི་རྡེ་ ཁྱོང་ཅེ་ རྡང་ ཙོབོ་རྡེ་ན་ ཅིག་ ཏང་ ཅིག་ལ་ ལྡན་ཅུག་ཅེ་ན་ ཧོཔ་ ཙོན་འགྲུའི་ ཅོའེན་།

20 ཟ་ཅེ་ཞིག་རྒེ་ ཏོན་ལ་ ཀོན་འཇོག་རྒེ་ ཆག་ལེ་རྦོ་ མེ་ཀན་ མ་ཅོ་། ཟ་ཅེ་ ཚང་མེ་ སང་མ་ ནོག་། འིན་ན་ ཁྱི་ཞི་ ཟ་ཅེ་རྦེ་ ཞེན་མི་ཞིག་ ཏེཏ་པེ་ན་ རྒག་ ཕུག་ཅུག་ནི་, ཏེ་ནི་ ཏོ་ རྒྱལ་ལེ་ཞིག་ ཅོའེ་རྡེ་ མག་། 21 ཤ་ ཟ་ཅེ་ རྡང་ ཆང་ ཐུང་ཅེ་ ཡང་ ཞེན་ཡང་ ལེ་ཧ་རྒུ་ནི་, ཁྱི་ཞ་རང་ངེ་ སྤུན་ཞིག་ལ་ ཏེཏ་པེ་ན་ རྒག་ ཕུག་ཅུག་ནི་, ཏེ་ནི་ ཏེ་རྒུན་ མ་ཅོ་ན་ མང་ངེ་ རྒྱ་ལེ་ ནོག་། 22 ཏོ་ ཚང་མེ་ ཧོར་ལ་ ཁྱི་ཞ་རྒུ་ནི་ ཏེཏ་པ་ ཅོ་ཀན་འབོ་ ཀོན་འཇོག་ ཏང་ ཁྱི་ཞ་རང་རྒུ་ནི་ པར་ལ་ པོར་ཧེ་། ཟང་པོ་ འིན་ སམ་འདེ་ ཅོ་ཀ་ནེ་ ལེ་ཧ་རྦེ་ཀ་ རྐྱོན་འཇེན་ མ་ཚོར་ཧན་རྒུན་, ཙམ་ཤིག་རྒེ་ ཅིན་ལབ་ཅེན་ མག་། 23 འིན་ན་ ཐེ་ཚོམ་ ཡོད་ཏེ་ ཟ་ཀ་ནེ་ མི་རྦེ་ རྡིག་པ་ ཅོའེ་རྡེ་ ནོག་, ཅེ་ཟེར་ནི་ ཁོའེ་ ཏེ་ ཁར་ཞི་འབོ་ ཏེཏ་པ་ ཅོའེ་རྡེ་ མ་ཟ་ ནོག་། ཡང་ ཁྱི་ཞི་ ཅོའེ་ཧན་ ཚང་མ་ ཏེཏ་པ་ རྒྱུད་ཏེ་ མ་ནི་, ཁྱི་ཞ་རྒུ་ནི་ རྡིག་པ་ ཅོའེ་རྡེ་ ནོག་།