རོམ་པ་ 16

པ་འུ་ལུའི་ ཁོ་རང་ངེ་ ཡ་ཏོ་རྒུན་ལ་ འཇུ་ ཞུའི་།

ངེ་ ཨ་ཧོ་རྒུ་ནི་ སྲིང་མོ་ ཕོ་འབེ་ ཟེར་ཧན་འབེ་ ཧོར་ལ་ ཤེད་རྡེ་ཡོད་། ཁོ་ ཀེན་ཁེ་རེ་ ཆོའེ་ཚོག་རྒེ་ན་ ཞབ་རྟོག་མ་ཞིག་ ནོག་། 2 ཀོན་འཇོག་རྒེ་ མི་རྒུ་ནི་ ཕྲོ་ སི་ཝེ་ འོའེ་སྤ་ཅེན་, ཏེ་ པོ་མོ་ནི་ ཙོབོ་རྡེ་ འིན་ཅེ་རྦེ་ རྒ་སུའི་ ཞུའི་། ཁོ་ རྒོ་ཤེ་ཅེན་རྒུ་ནི་ན་ ཡ་ཏོ་ ཅོའེ་ཧེ་, ཅེ་ཟེར་ནི་ ཁོའེ་ མང་པོ་ཞིག་ལ་ ཡ་ཏོ་ ཅོའེ་རྡེ་ ནོག་, མིག་ས་ལེ་ ང་།

3 པིརི་སི་ལ་ རྡང་ ཁོའེ་ མག་པ་ ཨ་ཀུའི་ལ་, ངེ་ ཁྲོ་པ་ མ་ཤི་ཀ་ ཡི་ཤུའི་ ལེ་ཧ་ ཅོ་ཀན་རྒུན་ལ་ འཇུ་ ཞུའི་། 4 ཁོང་རྒུ་ནི་ ངེ་ཕི་ ཁོ་རང་རྒུ་ནི་ སྲོག་པོ་ལ་ འཇི་སྤེ་ན་ ཏྃ་། ང་ མ་ཚེད་ ཡ་ཧུ་འདཱ་པ་ མན་ཀན་རྒུ་ནི་ ཆོའེ་ཚོག་ ཚང་མེ་ ཁོང་རྒུན་ལ་ ཐུག་ཞེ་ཆེ་ ཞུ་རུག་། 5 ཁོང་རྒུ་ནི་ ཁང་པེ་ན་ ཛོམ་འདེ་ ཡོ་ཀ་ནེ་ ཆོའེ་ཚོག་ལ་ ངེ་ འཇུ་ ཞུའི་།

ངེ་ ཤེ་སྤ་ ཡ་ཏོ་ ཨེ་པེ་ནེ་ཀྲུའི་ལ་ འཇུ་ ཞུའི་། ཁོ་ནི་ ཨ་སི་ཨཱེ་ ཡུལ་ཞོང་ངེ་ ནང་ནི་ མ་ཤི་ཀེ་ རྒྱབ་ནི་ འགྲུལ་ཧན་ ཏང་པོ་རྦོ་ འིན་། 6 ཁྱི་ཞ་རྒུ་ནི་ཕི་ ཧོཔ་ ལེ་ཧ་ ཅོའེ་ཧན་ སྲིང་མོ་ མར་ཡམ་ལ་ ངེ་ འཇུ་ ཞུའི་། 7 ངེ་ ཁྲོ་པ་ ཡ་ཧུ་འདཱ་པ་ ཨེན་འགྲོ་ནི་ཀེ་ རྡང་ ཡུ་ནི་ཡཱ་རྒུན་ལ་ འཇུ་ ཞུའི་, ཀའོ་རྒུན་ ང་ ཉམ་པོ་ ཙོན་ཁང་ངེ་ན་ ཡོད་པེན་། མ་ཤི་ཀེ་ ཧུ་ཚབ་རྒུ་ནི་ ཁོང་རྒུན་ལ་ མ་ སི་ཝ་ ཅོ་ནོག་, ཁོང་རྒུན་ ངེ་སང་ ངུལ་ལ་ མ་ཤི་ཀེ་ རྒྱབ་ནི་ འགྲུལ་ཧན་ རིག་ འགྱུར་རྡེ་ འིན་འབེན་། 8 ཙོབོ་རྡེ་ འིན་ཀན་ ངེ་ ཤེ་སྤ་ ཡ་ཏོ་ ཨམ་པི་ལི་ཡ་ཏུའི་ལ་ འཇུ་ ཞུའི་། 9 མ་ཤི་ཀེ་ན་ ལེ་ཧ་ ཅོ་ཀན་ ང་ཞི་ ཁྲོ་པ་ སྤུན་ ཨུར་འབཱ་ནུའི་ རྡང་ ངེ་ ཤེ་སྤ་ ཡ་ཏོ་ ལྟག་ཡི་ལ་ འཇུ་ ཞུའི་།

10 ངེ་ མ་ཤི་ཀེ་ ཞབ་རྟོག་རྒེ་ན་ ལོ་ཁྱེལ་ཅེན་ ཐེའེ་ཀན་ ཨ་པི་ལེ་ལ་ འཇུ་ ཞུའི་། ཡང་ ཨ་རི་ཏོ་འབུ་ལུའི་ ཁང་པེ་ན་ འདེད་ཀ་ནེ་ ཏེཏ་པ་ཅན་རྒུན་ལ་ འཇུ་ ཞུའི་། 11 ངེ་ ཡ་ཧུ་འདཱ་པ་ ཁྲོ་པ་ ཧེ་རོ་འདིའོན་ལ་ འཇུ་ ཞུའི་། ནར་ཀི་སུའི་ ཁང་པེ་ན་ འདེད་ཀ་ནེ་ ཙོབོ་རྡེ་ མི་རྒུན་ལ་ འཇུ་ ཞུའི་། 12 ཙོབོ་རྡེ་ཕི་ ལེ་ཧ་ ཧོཔ་ ཅོ་ཀན་ སྲིང་མོ་ ཀྲེ་ཕེ་ན་ རྡང་ ཀྲེ་ཕོ་ས་རྒུན་ལ་ ཡང་ ཙོབོ་རྡེ་ཕི་ ཧོཔ་ ལེ་ཧ་ ཅོ་ཀན་ སྲིང་མོ་ ཤེ་སྤ་ པེར་སི་ལ་ འཇུ་ ཞུའི་། 13 ཧ་ལེ་ཤེ་ཅེན་ མ་ཤི་ཀ་པ་, སྤུན་ རུ་ཕུའི་ རྡང་ ཁོའེ་ ཨ་མ་, ཀ་རྦེ་ ང་ པུ་ཙ་ ཙོག་སེ་ ཐེ་ཡོད་པེན་, ཁོང་རྒུན་ལ་ འཇུ་ ཞུའི་།

14 ཨ་སིན་ཀི་རི་ཀྲུའི་, ཕི་ལེ་འགོན་, ཧར་མི་, པེ་ཀྲོ་འབེ་, ཧར་མེ་, ཡང་ ཁོང་རྒུན་ ཉམ་པོ་ ཛོམ་ཀ་ནེ་ སྤུན་རྒུན་ལ་ འཇུ་ ཞུའི་། 15 ཕི་ལོ་ལོ་འགུའི་, ཡུ་ལི་ཡཱ་, ནེ་རུའི་ རྡང་ ཁོའེ་ སྲིང་མོ་ ཡང་ ཨོ་ལིམ་པེ་ རྡང་ ཁོང་རྒུན་ ཉམ་པོ་ ཛོམ་ཀ་ནེ་ ཏེཏ་པ་ཅེན་ ཚང་མ་ལ་ འཇུ་ ཞུའི་། 16 ཅིག་ ཏང་ ཅིག་ལ་ ཤེ་སྤ་ ཉམ་པོ་ འཇུ་ ཞུའི་། མ་ཤི་ཀེ་ ཆོའེ་ཚོག་ ཚང་མེ་ ཁྱི་ཞ་རྒུན་ལ་ འཇུ་ ཞུ་རུག་།

པ་འུ་ལུའི་ ལྟིང་འཇུག་རྒེ་ ལབ་ཞ་།

17 ཡང་ ངེ་ ཤེ་སྤ་ སྤུན་རྒུན་, འི་ ཞུ་ཝ་རྦོ་ ཉེན་ཅེ་ལ་ ངེ་ སེམ་རུའི་ ཏང་ངེ་ཡོད་། ཆོའེ་ཚོག་རྒེ་ན་ པོ་པུད་ཀན་ འདང་ ཁྱི་ཞ་ ལབ་ཀ་ནེ་ ལབ་ཞེ་ འགོ་ལོག་པོ་ ལབ་ཀན་རྒུ་ནི་ཀ་ནི་ ཤང་ ཅོའེ་ཧེ་། ཏོ་རྒུ་ནི་ ཐག་རིང་ལ་ འདོད་ཧེ་། 18 ཏེ་ མི་རྒུ་ནི་ ཨ་ཧོ་རྒུ་ནི་ ཙོབོ་ མ་ཤི་ཀ་ ཞབ་རྟོག་ མ་ཞུ་, ཁོ་རང་རྒུ་ནི་ ཕན་ཏོག་རྡེ་ཕི་ ལེ་ཧ་ ཅོའེ་རྡེ་ ནོག་, སྤེར་ན་ ཁེ་སྤ་ སྤེ་ར་ རྡང་ ལྕེ་ ཀོལ་རྡེ་ ཁོང་རྒུ་ནི་ རྐྱོན་མེད་ མི་རྒུན་ལ་ འགོམ་ཧོར་ ཏྃ་ངེ་ནོག་། 19 འིན་ན་ ཁྱི་ཞ་རྒུན་ ཙོབོ་རྡེ་ ཁ་ཉེན་ཀན་ འིན་ཀན་འབོ་ ཚང་མ་ལ་ རྒྱུའི་ནོག་, ཏོ་རྦེ་ ང་ མ་ ཐེད་པོ་ ཡོང་ཅུག་། ཁྱི་ཞ་རྒུན་ ཟང་པོ་ ཅོ་ཅེ་ན་ ཤེ་རབ་ཅེན་ འདང་ ངན་པེ་ ཐོག་ནི་ རྐྱོན་མེད་ ཡོང་རྒོ་ཤེའོ་ ངེ་ འདོད་པ་ འིན་། 20 ཞིའི་རྡེ་ ཀོན་འཇོག་རྒེ་ འགྱོ་སྤ་ རྡུད་ ཁྱི་ཞི་ ཧང་པེ་ ཡོག་ལ་ ཉེ་ ཛེད་རྡེན་། ཨ་ཧོ་རྒུ་ནི་ ཙོབོ་ ཡི་ཤུའི་ ཐུག་ཞེ་རྦོ་ ཁྱི་ཞ་རྒུན་ ཉམ་པོ་ ལུའི་ཤིག་།

21 ངེ་ ཁྲོ་པ་ ལེ་ཧ་ ཅོ་ཀན་ ཏི་མོ་ཐི་ ཁྱི་ཞ་རྒུན་ལ་ འཇུ་ ཞུ་རུག་, ཏེ་རྒ་ ཙོག་སེ་ ལུ་ཀི་ཡུ་, ཡ་སོན་ འདང་, སོ་སི་པ་ཏར་ ངེ་ ཁྲོ་པ་ ཡ་ཧུ་འདཱ་པ་ སྤུན་རྒུ་ནི་ལ་ འཇུ་ ཞུ་རུག་།

22 པ་འུ་ལུའི་ཕི་ འི་ ཡི་རྒེ་ འབྲི་ཀན་ ང་, ཏེར་ཏི་འུ་ ཙོབོ་རྡེ་ རྒྱབ་ནི་ འགྲུལ་ཧན་ལ་ འཇུ་ ཞུ་ཡོད་།

23 འགཱ་ཡུ་ ཁྱི་ཞ་རྒུན་ལ་ འཇུ་ ཞུ་རུག་། ཁོའེ་ ང་ ཁོ་རང་ངེ་ ཁང་པ་ འདེད་ཅུག་རྒེན་ ནོག་, ཡང་ འི་རུ་ ཡོ་ཀ་ནེ་ ཆོའེ་ཚོག་ སོན་ཏེ་ལ་ ཁོ་རང་ངེ་ ཁང་པེ་ན་ ཛོམ་ཅུ་རྒེན་ ནོག་། ཨེ་རེ་ཏུའི་, རྒྱལ་སེ་ པང་ཛོད་རྡེ་ ཁག་ཁུར་པ་ རྡང་ ཨ་ཧོ་རྒུ་ནི་ སྤུན་ ཀུ་ཨར་ཏུ་རྒུ་ནི་ འཇུ་ ཞུ་རུག་། 24 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ ཁྱི་ཞ་ ཚང་མ་ ཉམ་པོ་ ལུའི་ཤིག་, ཨ་མེན་།

25 ཏ་ ཀོན་འཇོག་ལ་ རྟོད་པ་ པུལ་ཤིག་། ཁོང་ནི་ ཁྱི་ཞ་རྒུན་ ཏེཏ་པེ་ན་ ཤེད་ཅེན་ ཛེད་ཉེན་ཀན་ འིན་, ཀ་ཟུག་ ངེ་ ནེ་ཚུལ་ ཟང་པེ་ན་ ཤེད་། ཡི་ཤུ་ མ་ཤི་ཀེ་ ཧོར་ལ་ འི་ ཁྲིན་འབེ་, ཁྱི་ཞ་ ཡ་ཧུ་འདཱ་པ་ མན་ཀན་རྒུ་ནི་ཕི་ ཁོང་ངེ་ ཐབ་ལྡིང་པོ་ ངོན་ཅུག་རྒེ་ ཛེད་, ཀའོ་ ཏུའི་ འགོ་ཟུག་ནི་ཕ་ལ་ སང་སྤེར་ན་ པོ་རེ་ ཛེད་ཏེ་ ཡོད་པེན་། 26 འིན་ན་ ཡ་ཧུ་འདཱ་པ་ མན་ཀན་ ཚང་མེ་ ཏེཏ་པ་ ཅོའེ་རྡེ་ ཁ་ཉེན་ཅེ་ཕི་ ཏག་ས་ ཐ་མེད་པེ་ ཀོན་འཇོག་རྒེ་ ཀཱ་ སལ་རྡེ་, ལུང་རྟོན་པ་རྒུ་ནི་ ལུང་རྟན་རྒུན་ རྒྱུད་ཏེ་, ཁོང་རྒུན་ལ་ ཏེ་ ཁྲིན་འབོ་ ངོན་ཅུག་རྒེ་ ཛེད་ཏེ་ ནོག་། 27 ཡི་ཤུ་ མ་ཤི་ཀ་ རྒྱུད་ཏེ་ ཤེ་རབ་ཅེན་ནེ་ ཀོན་འཇོག་ ཅིག་པོ་ལ་ ཏུའི་རྒྱུན་ སྤལ་ ཐོབ་ཤིག་, ཨ་མེན་༎