ཡི་ཤུ་ ཟུམ་།
18
ཡི་ཤུ་ མོ་ལམ་ ཞུའི་ ཚར་རེ་རྡང་, ཁོ་རང་ངེ་ ལོབ་ཀྲུག་རྒུན་ ཉམ་པོ་ ཏེ་ མལ་རྦོ་ནི་ འབིང་འདེ་ ཀིད་རོན་ནེ་ ལུང་པེ་ འ་ངོ་ ཆོག་ལ་ ཡོ་ཀ་ནེ་ ཨོ་ལི་ཝེ་ ལྡུམ་རེ་ན་ རྐྱོད་། 2 ཁོང་ལ་ ངོ་ལོག་ ཅོ་ཀ་ནེ་ ཡུ་འདཱ་ ཏེ་ མལ་རྦོ་ རྒྱུའི་ཡོད་པེན་, ཅེ་ཟེར་ནི་ ཡི་ཤུ་ ལེན་ མང་པོ་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཏུ་རུ་ རྐྱོད་རྡེ་ ཛེ་རྡེ་ཡོད་པེན་། 3 ཏེ་ནི་ ཡུ་འདཱ་ པ་རུ་ཤི་པ་རྒུན་ འདང་ ལ་མ་ འུ་རྐྱོང་རྒུ་ནི་ ཀལ་ཧན་ནེ་ རོམ་པེ་ མག་མི་ ཏུམ་འབུ་ཞིག་ ཏང་ ཀོན་འཇོག་རྒེ་ ཁང་པ་ སྲུང་ཀན་རྒུན་ ཁྲིད་ཏེ་ ལྡུམ་རེ་ན་ ལེཔ་། ཁོང་རྒུ་ནི་ མེ་ཏོ་, རྐྱོང་ཙེ་ རྡང་ ཚོན་ཅ་ ཁུར་རྡེ་ ཡོད་པེ་། 4 ཡི་ཤུ་ ཁོང་ངེ་ཀ་ ཆ་ཅེ་ ཚང་མ་ རྒྱལ་ལ་ ཅོའེ་རྡེ་ ཁྱེན་ནེ་ཡོད་པེན་, ཏེ་རྒ་རྦེ་ཕི་ལ་ ཁོང་ ཕི་ལོག་ལ་ རྐྱོད་ཏེ་ ཁོང་རྒུན་ལ་ འདྲི་ ཛེད་, “ཁྱི་ཞི་ སུ་ ཙལ་ལེ་ཡོད་?”5 ཁོང་རྒུ་ནི་ ལེན་ཏྃ་, “ན་ཙ་རེད་པ་ ཡི་ཤུ་ ཙལ་ལེན་།”
ཡི་ཤུའི་ ཁོང་རྒུན་ལ་, “ང་ འིན་” མོལ་།
ཁོང་ལ་ འགྲ་ཝེ་ ལག་ལ་ ལྟེད་ཀ་ནེ་ ཡུ་འདཱ་ ཁོང་རྒུན་ ཉམ་པོ་ ཡོད་པེན་། 6 ཡི་ཤུའི་, “ང་ འིན་” མོལ་ལེ་རྡང་, ཁོང་རྒུན་ རྒྱབ་ལོག་ལ་ སོང་ ཡང་ ཐང་ཀེ་ཀ་ འགྱེལ་། 7 ཡི་ཤུའི་ ལྡབ་ཏེ་ མོལ་, “ཁྱི་ཞི་ སུ་ ཙལ་ལེ་ཡོད་?”
ཁོང་རྒུ་ནི་ ཟེར་, “ན་ཙ་རེད་པ་ ཡི་ཤུ་།”
8 ཡི་ཤུའི་ མོལ་, “ངེ་ ཁྱི་ཞ་ ཟེར་རྦེན་ ‘ཁོ་ ང་ འིན་’, ཀལ་ཏེ་ ཁྱི་ཞི་ ང་ ཙལ་ལེ་ཡོད་ནི་ ངེ་ ལོབ་ཀྲུག་རྒུན་ ཆ་ཅུག་།” 9 ཏོ་ ཁོང་ངེ་ “ཉེ་རང་ངེ་ ང་ སལ་ཧ་ནེ་ ཕྲོ་ནི་ ཅིག་རྒང་ མ་རྐྱལ་” མོལ་ཧན་འབོ་ འདྲན་འདྲ་ ཀྲུཔ་ཅེའོ་ འིན་འབེན་།
10 ཤི་མོན་ པི་ཏྲ་རེ་ ཁོའེ་ ལག་ལ་ ཡོ་ཀ་ནེ་ ར་ཡི་ ཕིང་འདེ་ ལ་མ་ ཆོན་མེ་ ཡོག་པོ་ལ་ རྒྱབ་ཏེ་ ཁོའེ་ ནམ་ཅོག་ ཡོའེ་སྤ་ ཅེད་ཏྃ་; ཏེ་ ཡོག་པེ་ མིང་པོ་ མལ་ཁུ་ འིན་འབེན་། 11 ཡི་ཤུའི་ པི་ཏྲར་ལ་ ཀཱ་ སལ་རྡེ་ མོལ་, “ར་ཡི་རྦོ་ ཤུབ་རྦེ་ན་ རྒྱོང་། ཅི་ ཡབ་རྦེ་ ང་ སལ་ཧ་ནེ་ རྡུ་ངལ་ལེ་ འདོན་རྐྱོ་རྦོ་ ངེ་ མི་ཐུང་ངེ་?”
ཡི་ཤུ་ ལ་མ་ ཆོན་མེ་ཀ་ ཁྱེར་།
12 ཏེ་ནི་ རོམ་པེ་ མག་མི་, ཁོང་རྒུ་ནི་ མག་སྤོན་ འདང་ ཀོན་འཇོག་རྒེ་ ཁང་པ་ སྲུང་ཀན་རྒུ་ནི་ ཡི་ཤུ་ ཟུམ་ ཡང་ ཁོང་ངེ་ ཆག་ རྡམ་འདེ་ 13 ཨན་ནཱ་ ས་ ཁྱེར་, ཁོ་ ཀ་ཡ་ཕཱེ་ ན་མེ་ ཨ་རྦ་ འིན་འབེན་, ཡང་ ཀ་ཡ་ཕཱེ་ ཏེ་ ལོའེ་ ལ་མ་ ཆོན་མོ་ འིན་འབེན་། 14 འེ་རྒ་ ཀ་ཡ་ཕཱེ་ ཡ་ཧུ་འདཱ་པེ་ འུ་རྐྱོང་རྒུན་ལ་ ཁ་རྡ་ ཏྃ་རྡེ་ “མི་རིག་ སོན་ཏེ་ ཏོན་ལ་ མི་ཅིག་ ཤི་ན་ རྒྱལ་” ཟེར་རྡེ་ འིན་འབེན་།
པི་ཏྲ་རེ་ ཡི་ཤུ་ མི་ཤེ་ཟུན་ ཏྃ་།
15 ཤི་མོན་པི་ཏྲར་ རྡང་ ཞེན་ ལོབ་ཀྲུག་ ཅིག་ ཡི་ཤུའི་ རྒྱབ་རྒྱབ་ནི་ སོང་, ཞེན་ ལོབ་ཀྲུག་པོ་ ལ་མ་ ཆོན་མེ་ ངོ་ཤེ་ཧན་ འིན་འབེ་ ཁོ་ ཡི་ཤུ་ ཉམ་པོ་ ལ་མ་ ཆོན་མེ་ ཕོ་ཀྲང་ངེ་ ཀྱང་རེ་ན་ ཡོང་ཅུག་། 16 འིན་ན་ པི་ཏྲར་ རྒྱེ་རྒོའེ་ ཕི་ལོག་ལ་ ལུའི་། ལ་མ་ ཆོན་མེ་ ངོ་ཤེ་ཧ་ནེ་ ལོབ་ཀྲུག་པོ་ ལོག་ཏེ་ ཡོྃ་ ཡང་ རྒོ་སྲུང་མ་རྦེ་ སྤེ་ར་ ཏྃ་རྡེ་ པི་ཏྲར་ ནང་ཀུ་ལ་ ཁྲིད་ཏེ་ ཁྱེར་། 17 ཏེ་ རྒོ་སྲུང་ཀ་ནེ་ པོ་མོ་རྦེ་ པི་ཏྲར་ལ་ འདྲི་, “ཁྱེ་རང་ལ་ ཁོང་ངེ་ ལོབ་ཀྲུག་ ཅིག་ མན་ནེ་?”
པི་ཏྲ་རེ་ ཟེར་, “ང་ མན་།”
18 ཀྲང་མོ་ ཡོད་ཅེ་ཀ་ནི་, ཏུ་རུ་ ཡོ་ཀ་ནེ་ ཡོག་པོ་རྒུན་ འདང་ སྲུང་ཀན་རྒུ་ནི་ མེ་ ཏྃ་རྡེ་ ཚང་མ་ ཀིར་ཁོར་རྡེ་ མེ་ སྲོ་ཡོད་པེན་, ཁོང་རྒུ་ནི་ ཕྲོ་ པི་ཏྲར་ལ་ མེ་ སྲོ་ཡོད་པེན་།
ལ་མ་ ཆོན་མེ་ ཡི་ཤུ་ ཏྲི་ཝ་ འདྲི་།
19 ཏེ་ཟ་ནི་ ལ་མ་ ཆོན་མེ་a, ཡི་ཤུ་ ཁོང་ངེ་ ལོབ་ཀྲུག་ ཏང་ ལབ་ཞ་རྒུ་ནི་ ཧོར་ལ་ འདྲི་།
20 ཡི་ཤུའི་ ལེན་སལ་, “ངེ་ རྦེ་ མ་རྦེ་ མི་ཚང་མེ་ འདུན་ལ་ ཤེད་པེན་, ངེ་ ཡ་ཧུ་འདཱ་པ་ ཚང་མ་ ཛོམ་འདེ་ འདུ་ཀང་རྒུན་ འདང་ ཀོན་འཇོག་རྒེ་ ཁང་པེ་ན་ ཏུའི་རྒྱུན་ ལབ་ཞ་ ཏང་ངེ་ཡོད་པེན་། ངེ་ སང་སྤེར་ན་ ཅི་ཞིག་ལ་ མ་ཟེར་རྦེན་། 21 ཉེ་རང་ངེ་ ང་ ཅེ་ འདྲི་ཡོད་? ངེ་ ལབ་ཞ་ ཚོར་ཧན་རྒུན་ལ་ འདྲི་; ངེ་ ཟེར་ཧན་རྒུན་ ཁོང་རྒུན་ལ་ ནེན་ཏེན་ རྒྱུའི་ནོག་།”
22 ཡི་ཤུའི་ ཏོ་ མོལ་ལེ་རྡང་, ཀོན་འཇོག་རྒེ་ ཁང་པ་ སྲུང་ཀན་རྒུ་ནི་ ཕྲོ་ནི་ ཡི་ཤུའི་ འདུན་ལ་ འདེད་ཏེ་ ཡོ་ཀན་ ཅིག་རྒེ་ ཁོང་ལ་ འགྲམ་ལྕག་ ཏྃ་རྡེ་ ཟེར་, “ལ་མ་ ཆོན་མོ་ལ་ འི་ཟུག་ལ་ ལེན་ཏྃ་ངེ་ནོག་རྒེ་?”
23 ཡི་ཤུའི་ ཁོ་ མོལ་, “ཀལ་ཏེ་ ངེ་ སོག་པོ་ཞིག་ ཟེར་རྡེ་ ཡོན་ནི་ ཏོ་ ལྟན་འདེ་ ཏོང་། འིན་ན་ རྡེན་འབའ་ ཟེར་རྡེ་ འིན་ནི་ ཏོན་མེད་ལ་ ང་ ཅེ་ རྡུང་ངེ་ཡོད་?” 24 ཏེ་ནི་ ཨན་ནཱེ་ ཆག་ རྡམ་རྡམ་མོ་ ཡི་ཤུ་ ལ་མ་ ཆོན་མོ་ ཀ་ཡ་ཕཱེ་ཀ་ ཀལ་།
པི་ཏྲ་རེ་ ཡང་ ཡི་ཤུ་ ངོ་ མི་ཤེ་ཟུན་ ཏྃ་།
25 ཤི་མོན་པི་ཏྲར་ མེ་ཀ་ སྲོའེན་ ཡོད་ཟ་ནི་ ཏེ་ཀ་ ཡོ་ཀ་ནེ་ ཁོང་ལ་ འདྲི་, “ཁྱེ་རང་ལ་ ཁོང་ངེ་ ལོབ་ཀྲུག་རྒུ་ནི་ ཕྲོ་ནི་ ཅིག་ མན་ནེ་?”
པི་ཏྲ་རེ་ ཟུན་ ཏྃ་རྡེ་ ཟེར་ “ང་ མན་།”
26 ལ་མ་ ཆོན་མེ་ ཡོག་པོ་རྒུ་ནི་ ཕྲོ་ནི་ ཅིག་ པི་ཏྲ་རེ་ ར་ཡི་ ཉམ་པོ་ ནམ་ཅོག་ ཅེད་ཀ་ནེ་ མི་རྦེ་ ཉེན་ འིན་འབེན་, ཁོའེ་ པི་ཏྲར་ལ་ ཟེར་, “ངེ་ ཁྱེ་རང་ ཁོ་ ཉམ་པོ་ ལྡུམ་རེ་ན་ ཐོང་འདེ་ མན་འབེན་ནེ་?” 27 པི་ཏྲ་རེ་ ཡང་ ལན་ཅིག་ མི་ཤེ་ཟུན་ ཏྃ་། ཏེ་རྒ་མ་རྒ་ ཅ་པེ་ ཅ་ཧད་ ཏྃ་།
ཡི་ཤུ་ པི་ལ་ཏུ་ འདུན་ལ་ ཁྲིམ་ཅེད་།
28 ཏེ་ནི་ ཡ་ཧུ་འདཱ་པེ་ འུ་རྐྱོང་རྒུ་ནི་ ང་མོ་ ཟ་ར་ཟི་རེ་ནི་ ཡི་ཤུ་ ཀ་ཡ་ཕཱེ་ཀ་ནི་ རོམ་པེ་ ཀ་ལོན་ནེ་ ཁར་ལ་ ཁྱེར་། ཁོང་རྒུན་ ཀྲིཔ་ སོང་འདེ་ པེ་སག་རྒེ་ འདོན་ཏང་ ཟ་མི་ཉེན་ སམ་འདེ་ འཇིའི་རྡེ་ ཁར་རེ་ ནང་ཀུ་ལ་ མ་སོང་། 29 ཏོ་རྦེ་ཕི་ པི་ལ་ཏུ་ ཁོང་རྒུ་ནི་ འདུན་ལ་ ཕི་ལོག་ལ་ འབིང་འདེ་ ཡོྃ་ ཡང་ ཟེར་, “འི་ མི་རྦེ་ཀ་ ཁྱི་ཞ་རྒུ་ནི་ ཅི་ ཉེད་ ཀ་ལེ་ཡོད་?”
30 ཁོང་རྒུ་ནི་ ཟེར་, “ཀལ་ཏེ་ ཁོ་ ཁྲིམ་ཅག་ཀན་ཞིག་ མན་འབེན་ནི་ ང་ཞི་ ཁོ་ ཉེ་རང་ངེ་ ལག་ལ་ ལྟེད་ཏེ་ མེད་ཁྲོ་།”
31 པི་ལ་ཏུ་ ཟེར་, “ཁྱི་ཞི་ ཁྱེར་རྡེ་ ཁྱི་ཞ་རང་ངེ་ ཀཱ་ཁྲིམ་ ནང་ཞིན་ལ་ ཁོའེ་ཀ་ ཁྲིམ་ཅོད་།”
ཡ་ཧུ་འདཱ་པེ་ འུ་རྐྱོང་རྒུ་ནི་ ཟེར་, “ང་ཞ་ སུ་ཞི་ལ་ སེད་ཅེ་ ཝང་ མེད་།” 32 ཡི་ཤུའི་ ཁོང་ ཀ་ཟུག་ལ་ ཀྲོང་རྒོའེ་འིན་ མོལ་ཧན་འབོ་ འདྲན་འདྲ་ ཀྲུཔ་ཅེ་ལ་ ཏོ་རྒུན་ སོང་།
33 ཏེ་ནི་ པི་ལ་ཏུ་ ཁར་རེ་ ནང་ཀུ་ལ་ སོང་ ཡང་ ཡི་ཤུ་ འབོའེ་རྡེ་ ཁྱོང་ཅུག་ཏེ་ འདྲི་, “ཅི་ ཁྱེ་རང་ ཡ་ཧུ་འདཱ་པེ་ རྒྱ་སྤོ་ འིན་ནེ་?”
34 ཡི་ཤུའི་ ལེན་སལ་, “འི་ ཏྲི་ཝ་འབོ་ ཉེ་རང་ རང་ངེ་ འདྲི་རྡེ་ འིན་ནེ་ ཡང་ ཞེན་མ་རྒུ་ནི་ ངེ་ ཧོར་ལ་ ཤེད་རྡེ་རག་?”
35 པི་ལ་ཏུ་ ཟེར་, “ཅི་ ང་ ཡ་ཧུ་འདཱ་པ་ ནོག་རྒེ་? ཁྱེ་རང་ རང་ངེ་ མི་རྒུན་ འདང་ ལ་མ་ འུ་རྐྱོང་རྒུ་ནི་ ཁྱེ་རང་ ངེ་ ལག་ལ་ ལྟེད་། ཁྱེ་རང་ངེ་ ཅི་ ཅོའེ་རྦེན་?”
36 ཡི་ཤུའི་ ལེན་སལ་, “ངེ་ རྒྱལ་སྲིད་པོ་ལ་, འི་ འཇིག་རྟེན་ནེ་ རྒྱལ་སྲིད་ཞིག་ མན་། ཀལ་ཏེ་ འིན་འབེན་ནི་ ཏེ་ནི་ ངེ་ ཡོག་པོ་རྒུ་ནི་ མག་ ཏྃ་རྡེ་ ང་ ཡ་ཧུ་འདཱ་པ་རྒུ་ནི་ ལག་ལ་ ལྟེད་ཅུག་ཏེ་ མེད་ཁྲོ་, འིན་ན་ ངེ་ རྒྱལ་སྲིད་པོ་ལ་ འི་ འཇིག་རྟེན་ནེ་ མན་།”
37 པི་ལ་ཏུ་ ཟེར་, “ཏེ་ནི་ ཁྱེ་རང་ རྒྱ་སྤོ་ཞིག་ འིན་འགྲག་?”
ཡི་ཤུའི་ ཁོ་ ལེན་སལ་, “ཉེ་རང་ངེ་ ཟེར་ཧན་འབོ་ ཀྲང་པོ་ ནོག་, ང་ རྒྱ་སྤོ་ འིན་། རྡེན་འབའ་, ང་ ཏོ་རྦེ་ཕི་ རྐྱེ་རྡེ་ འིན་ ཡང་ རྡེན་འབེ་ ཧོར་ལ་ སྤང་པོ་ ཏང་ཅེ་ཕི་ འི་ འཇིག་རྟེན་ནེ་ན་ ཡོྃ་རྡེ་ འིན་། རྡེན་འབའ་འབོ་ལ་ ཤེ་སྤ་ ཅོ་ཀན་ ཚང་མེ་ ངེ་ ཟེར་ཧན་རྒུན་ ཀྲང་པོ་ འིན་ཀན་འབོ་ ཤེ་རྡེ་ནོག་།”
38 པི་ལ་ཏུའི་ འདྲི་, “རྡེན་འབའ་འབོ་ ཅི་ ནོག་།” ཏེ་རྒ་རྦོ་ ཟེར་རྡེ་ ཁོ་ ཡང་ ཕི་ལོག་ལ་ ཡ་ཧུ་འདཱ་པེ་ས་ སོང་འདེ་ ཟེར་, “ང་ འི་ མི་རྦེ་ རྒྱཔ་འགལ་ལ་ ཅང་ ཉེད་ ཐོབ་རྦེ་ མི་འདུག་། 39 འིན་ན་ ཁྱི་ཞི་ ལུག་སྲོལ་ ནང་ཞིན་, ངེ་ པེ་སག་རྒེ་ ཏུའི་ལ་ ཁྱི་ཞ་རྒུ་ནི་ཕི་ ཙོན་པ་ཞིག་ པུད་རྡེ་ཡོད་། ངེ་ ཡ་ཧུ་འདཱ་པེ་ རྒྱ་སྤོ་རྦོ་ པུད་རྡེ་?” 40 ཁོང་རྒུ་ནི་ ཀུ་ཅུ་ ཏང་ངེན་, “མན་ ཁོ་ མ་པུད་། ང་ཞི་ཕི་ འབཱ་ར་འབཱ་ པུད་ཏོང་” ཟེར་། འབཱ་ར་འབཱ་ རོམ་མེ་ ཝང་སྲུལ་པ་ ངོ་ལོག་ ཅོ་ཀན་ཞིག་ འིན་འབེན་།