ཡི་ཤུའི་ ཁོ་རང་ངེ་ཕི་ མོ་ལམ་ ཞུའི་།
17
ཏོ་རྒུན་ མོལ་ ཚར་རེ་རྡང་, ཡི་ཤུའི་ ནམ་ཀ་ ཟི་རྡེ་ མོ་ལམ་ ཞུའི་, “ཀྱེ་ ཡབ་, ཏ་ ཏུའི་ ལེབ་ཚར་, ཉེ་རང་ངེ་ སྲེ་ ཉེ་རང་ལ་ སྤལ་ ཏང་ཅེ་ཕི་ ཉེ་རང་ངེ་ སྲེ་ལ་ སྤལ་ སལ་ལེ་ ཛེད་། 2 ང་ སལ་ལེ་ ཛེད་ཀན་ ཚང་མ་ ཐ་མེད་པེ་ མི་ཙེ་ ཏང་ཅེ་ལ་ ཉེ་རང་ངེ་ ང་ མི་ཚང་མེ་ཀ་ ཝང་ཆ་ སལ་རྡེ་ འིན་། 3 ཐ་མེད་པེ་ མི་ཙེ་ནི་, ཉེ་རང་ རྡེན་འབེ་ ཀོན་འཇོག་ ཅིག་པོ་ རྡང་ ཉེ་རང་ངེ་ ཀ་ལེ་ ཛེད་ཀ་ནེ་ ཡི་ཤུ་ མ་ཤི་ཀ་ ཤེ་ཤེ་ ནོག་། 4 ཉེ་རང་ངེ་ ང་ ལྟེད་རྡེ་ ཛེད་ཀ་ནེ་ ལེ་ཧ་རྒུན་ ཀྲུབ་ཅུག་འདེ་, འཇིག་རྟེན་ནེ་ཀ་ ངེ་ ཉེ་རང་ལ་ སྤལ་ ཁྱོྃ་རྡེ་ འིན་། 5 ཀྱེ་ ཡབ་ལེ་, ཏ་ ང་ ཉེ་རང་ངེ་ ཧུ་འདུན་ལ་ སྤལ་ སལ་ལེ་ ཛེད་, ཀ་སྤལ་རྦོ་ ང་ འཇིག་རྟེན་ ཙུག་རྒེ་སང་ ངུལ་ལ་ ང་ ཉེ་རང་ ཉམ་པོ་ ཡོད་པེན་།”ཡི་ཤུའི་ ཁོ་རང་ངེ་ ལོབ་ཀྲུག་རྒུ་ནི་ཕི་ མོ་ལམ་ ཞུའི་།
6 ཡི་ཤུའི་ ཏ་རུང་ངེ་ མོ་ལམ་ ཞུའིན་, “འཇིག་རྟེན་པ་རྒུ་ནི་ ཕྲོ་ནི་ ཉེ་རང་ངེ་ འདམ་མེ་ ཛེ་རྡེ་ ང་ སལ་ཧན་རྒུན་ལ་ ངེ་ ཉེ་རང་ ངོན་ཅུག་པེན་། ཁོང་རྒུན་ ཉེ་རང་ངེ་ འིན་འབེན་, ཉེ་རང་ངེ་ ཁོང་རྒུན་ ང་ སལ་རྡེ་ འིན་, ཡང་ ཁོང་རྒུ་ནི་ ཉེ་རང་ངེ་ ཀའ་ ཉེན་འདེ་ ནོག་། 7 ཏ་ ཉེ་རང་ངེ་ ང་ སལ་ཧན་ ཚང་མ་ ཉེ་རང་ངེ་ ཆོ་ནི་ འིན་ཀན་འབོ་ ཁོང་རྒུན་ལ་ ཧ་ཀོ་རྡེ་ ནོག་། 8 ཅེ་ཟེར་ནི་ ཉེ་རང་ངེ་ ང་ སལ་ཧ་ནེ་ ཀའ་རྒུན་ ངེ་ ཁོང་རྒུན་ལ་ ཏྃ་རྦེན་། ཁོང་རྒུ་ནི་ ཐེད་པོ་ ཉམ་པོ་ ནེན་འདེ་ ཉེ་རང་ངེ་ ཆོག་ནི་ ཡོྃ་རྡེ་ འིན་ཀན་འབོ་ ཁོང་རྒུན་ལ་ ནེན་ཏེན་ ཧ་ཀོ་, ཡང་ ཁོང་རྒུ་ནི་ ང་ ཉེ་རང་ངེ་ ཀ་ལེ་ ཛེད་ཀན་འབོ་ལ་ ཏེཏ་པ་ ཅོའེ་།”
9 “ངེ་ ཁོང་རྒུ་ནི་ཕི་ མོ་ལམ་ ཞུ་ཡོད་; ངེ་ འཇིག་རྟེན་པ་རྒུ་ནི་ མན་ཀན་ ཉེ་རང་ངེ་ ང་ སལ་ལེ་ ཛེད་ཀན་རྒུ་ནི་ཕི་ མོ་ལམ་ ཞུ་ཡོད་; ཅེ་ཟེར་ནི་ ཁོང་རྒུན་ ཉེ་རང་ངེ་ ནོག་། 10 ངེ་ འིན་ཀན་ ཚང་མ་ ཉེ་རང་ངེ་ འིན་ ཡང་ ཉེ་རང་ངེ་ འིན་ཀན་རྒུན་ ངེ་ འིན་། ང་ ཁོང་རྒུན་ རྒྱུད་ཏེ་ སྤལ་ ཐོབ་ཏེ་ འིན་། 11 ང་ འི་ འཇིག་རྟེན་ནེ་ན་ མང་པོ་ཞིག་ མི་ལུའི་, ཁོང་རྒུན་ ཏ་རུང་ འཇིག་རྟེན་ནེ་ན་ ལུའི་རྡེན་; ང་ ཉེ་རང་ངེ་ཀ་ ཡོང་ངེ་ཡོད་། ཀྱེ་ ཡབ་ ཏམ་པ་ལེ་, ཀ་ཟུག་ ཨ་ཧོ་ ཉ་ཧ་ ཅིག་ འིན་ ཏེ་རྒ་ ཙོག་སེ་ ཁོང་རྒུ་ནི་ ཅིག་འགྲིལ་ ལུའི་ཤེ་ཕི་ ཉེ་རང་ངེ་ ང་ སལ་ལེ་ ཛེད་ཀ་ནེ་ ཝང་ཆེ་ན་ ཁོང་རྒུན་ རྐྱོབ་ཏེ་ པོ་རེ་ ཛེད་། 12 ང་ ཁོང་རྒུན་ ཉམ་པོ་ ཡོད་ཟ་ནི་, ངེ་ ཁོང་རྒུན་ ཉེ་རང་ངེ་ སལ་ལེ་ ཛེད་ཀ་ནེ་ ཝང་ཆ་ རྒྱུད་ཏེ་ རྐྱོབ་ཏེ་ པོར་རྦེན་། ཏམ་པེ་ སུང་རབ་རྦེ་ན་ འབྲི་ཛེད་ཀན་འབོ་ ཀྲུཔ་ཅེ་ལ་, ཁོང་རྒུ་ནི་ ཕྲོ་ནི་ ཉ་ཝེ་ན་ ལེབ་ཅེ་ ཧོའེ་རྡེ་ ཡོ་ཀན་ ཅིག་ཅིག་ མ་ཐེ་ལ་, སུ་ཞི་ལ་ མི་རྐྱལ་།”
13 “ང་ ཉེ་རང་ངེ་ཀ་ ཡོང་ངེ་ཡོད་, འིན་ན་ ང་ འི་ འཇིག་རྟེན་ནེ་ན་ ཡོད་ཟ་ནི་ ཁོང་རྒུན་ལ་ ངེ་ ཐེད་པོ་ སོན་ཏེ་ ཐོབ་ཅེ་ཕི་, ངེ་ ཡུ་རྒུན་ ཟེར་རྦེན་། 14 ངེ་ ཁོང་རྒུན་ལ་ ཉེ་རང་ངེ་ ཀའ་ ཏྃ་རྦེན་, ཡང་ འཇིག་རྟེན་པ་རྒུ་ནི་ ཁོང་རྒུན་ལ་ སོག་པོ་ ཅོའེ་, ཅེ་ཟེར་ནི་ ང་ འཇིག་རྟེན་ནེ་ མན་ཀན་ ཀ་ཟུག་རྒེ་ ཙོག་སེ་ ངེ་ ལོབ་ཀྲུག་རྒུ་ནི་ འཇིག་རྟེན་ནེ་ མན་། 15 ཉེ་རང་ལ་ ཁོང་རྒུན་ འི་ འཇིག་རྟེན་ནེ་ ཁྱེར་ཤེ་ཕི་ མོ་ལམ་ ཞུ་མེད་པེ་, ཁོང་རྒུན་ རྡུད་རྡེ་ རྐྱོབ་ཏེ་ པོ་རེ་ ཛེད་ཅེ་ཕི་ མོ་ལམ་ ཞུ་ཡོད་། 16 ང་ འཇིག་རྟེན་ནེ་ མན་ཀན་ ཙོག་སེ་ ངེ་ ལོབ་ཀྲུག་རྒུ་ནི་ འཇིག་རྟེན་ནེ་ མན་། 17 ཉེ་རང་ངེ་ རྡེན་འབའ་ རྒྱུད་ཏེ་ ཁོང་རྒུན་ལ་ སང་མ་ ཅོའོ་ ཛེད་; ཉེ་རང་ངེ་ ཀའ་ རྡེན་འབའ་ ནོག་། 18 ཉེ་རང་ངེ་ ང་ འི་ འཇིག་རྟེན་ནེ་ན་ ཀ་ལེ་ ཛེད་ཀན་ ཙོག་སེ་ ངེ་ལ་ ཁོང་རྒུན་ འཇིག་རྟེན་ནེ་ན་ ཀ་ལེ་ཡོད་། 19 ཉེ་རང་ངེ་ རྡེན་འབའ་ ཉམ་པོ་ ཁོང་རྒུན་ ཏམ་པ་ ཅོ་ཅེ་ཕི་ ངེ་ ང་རང་ ཁོང་རྒུ་ནི་ ཏོན་ལ་ ཏམ་པ་ ཆོད་པེ་ ཚུལ་ལ་ པུལ་ལེ་ཡོད་།”
ཏེཏ་པེ་ན་ ཡོང་ཅེ་ཅེན་རྒུ་ནི་ཕི་ ཡི་ཤུའི་ མོ་ལམ་ ཞུའི་།
20 “ངེ་ མོ་ལམ་ ཁོང་རྒུན་ ཅིག་པོ་ མན་, ཁོང་རྒུ་ནི་ ཁྲིན་ རྒྱུད་ཏེ་ ངེ་ཀ་ ཏེཏ་པ་ ཅོ་ཀན་རྒུ་ནི་ཕི་ལ་ འིན་། 21 ངེ་ ཁོང་ ཚང་མ་ ཅིག་ འགྱུར་ཤེ་ཕི་ མོ་ལམ་ ཞུ་ཡོད་། ཀྱེ་ ཡབ་, ཀ་ཟུག་ ང་ ཉེ་རང་ངེ་ན་ ཡང་ ཉེ་རང་ ངེ་ན་ ཞུ་རྡེ་ འིན་, ཉེ་རང་ངེ་ ང་ ཀ་ལེ་ ཛེད་ཀན་འབེ་ཀ་ འཇིག་རྟེན་པ་རྒུ་ནི་ ཏེཏ་པ་ ཅོ་ཅེ་ཕི་, ཁོང་རྒུན་ལ་ ཨ་ཧོ་ ཉ་ཧེ་ན་ འདེད་ཅུག་རྒེ་ ཛེད་།”
22 “ཨ་ཧོ་ ཉ་ཧ་ ཅིག་ འིན་ཀན་ ཙོག་སེ་ ཁོང་རྒུན་ ཅིག་ འགྱུར་ཤེ་ཕི་ ངེ་ ཉེ་རང་ངེ་ ང་ སལ་ཧ་ནེ་ སྤལ་རྦོ་ ཁོང་རྒུན་ལ་ ཏྃ་རྦེན་། 23 ང་ ཁོང་རྒུ་ནི་ན་ ཡང་ ཉེ་རང་ ངེ་ན་ ཡོད་། ཉེ་རང་ངེ་ ང་ ཀ་ལེ་ ཛེད་ཀན་ འདང་ ཉེ་རང་ངེ་ ང་ ཤེ་སྤ་ ཛེད་ཀན་ ཙོག་སེ་ ཏེཏ་པ་ཅན་རྒུན་ལ་ ཤེ་སྤ་ ཛེད་ཅེ་, འཇིག་རྟེན་པ་རྒུན་ལ་ ཧ་ཀོ་ཅེ་ཕི་ ཁོང་རྒུན་ ཅི་ས་ཐོག་ནི་ ཅིག་འགྲིལ་ འགྱུར་ཤུག་རྒེ་ ཛེད་། 24 ཀྱེ་ ཡབ་ལེ་, ཉེ་རང་ངེ་ ང་ སལ་ཧན་རྒུན་ ང་ ཆ་སེ་ན་ ང་ ཉམ་པོ་ ཡོང་ཅུག་རྒེ་ ཛེད་ཅེ་ལ་ ངེ་ འདོད་པ་ ཅོ་ཡོད་། ཏེ་ནི་ ཁོང་རྒུ་ནི་ ཉེ་རང་ངེ་ ང་ སལ་ལེ་ ཛེད་ཀ་ནེ་ སྤལ་རྦོ་ ཐོང་ཉེན་ནེན་, ཅེ་ཞུ་ནི་ ཉེ་རང་ངེ་ འཇིག་རྟེན་ ཙུག་རྒེ་སང་ ངུལ་ལ་ ང་ ཤེ་སྤ་ ཛེ་རྡེ་ཡོད་པེན་།”
25 “ཀྲང་པོ་ ཡབ་ལེ་, འཇིག་རྟེན་པ་རྒུ་ནི་ ཉེ་རང་ མ་ཤེ་ན་, ངེ་ ཉེ་རང་ ཤེ་རྡེ་རྡེ་ཡོད་, ཡང་ ངེ་ ལོབ་ཀྲུག་རྒུ་ནི་ ཉེ་རང་ངེ་ ང་ ཀ་ལེ་ ཛེད་ཀན་འབོ་ ཤེ་རྡེ་ནོག་། 26 ངེ་ ཁོང་རྒུན་ལ་ ཉེ་རང་ ངོན་ཅུག་པེན་, ཏ་རུང་ངེ་ལ་ ངོན་ཅུག་རྒེན་། ཏེ་ནི་ ཉེ་རང་ངེ་ ངེ་ཕི་ ཤེ་སྤ་ ཡོ་ཀན་འབོ་ ཁོང་རྒུ་ནི་ན་ ཡང་ ཁོང་རྒུ་ནི་ན་ ལུའི་རྡེན་།”