ཡོ་ཧཱ་ནན་ 16

ཡི་ཤུའི་ མོལ་, “ཁྱི་ཞ་རྒུ་ནི་ ངེ་ཀ་ ཏེཏ་པ་ ཡོ་ཀན་འབོ་ ཕང་ མི་ཕང་ཅེ་ལ་ ངེ་ འི་ སྤེ་ར་ ཚང་མ་ ཁྱི་ཞ་རྒུན་ལ་ ཤེད་རྡེ་ འིན་། 2 ཁོང་རྒུ་ནི་ ཁྱི་ཞ་ ཆོའེ་ཚོག་རྒེ་ ཕྲོ་ནི་ ཕིང་ ཏང་ངེན་། ཏུ་ཟུག་ ཏུའི་ལ་ ལེབ་རྦེན་, ཁྱི་ཞ་ སེད་ཀན་རྒུ་ནི་ ས་མེན་ ཁོང་རྒུ་ནི་ ཀོན་འཇོག་ལ་ ཞབ་རྟོག་ ཞུའི་རྡེ་ འིན་། 3 ཁོང་རྒུ་ནི་ ཏོ་ཙོག་སེ་ ལེ་ཧ་རྒུན་ ཅོའེན་ ཅེ་ཟེར་ནི་ ཁོང་རྒུ་ནི་ ཡབ་ མ་ཤེ་ ཡང་ ང་ལ་ མ་ཤེ་། 4 ཏེ་ཏུའི་རྦོ་ ལེབ་རྦེ་རྡང་, ངེ་ ངུལ་ལ་ སྤང་པུད་ཀན་འབོ་ ཁྱི་ཞ་རྒུ་ནི་ འི་ཏུ་ ཡོང་ཅེ་ཕི་ ངེ་ ཡུ་རྒུན་ ཁྱི་ཞ་ ཤེད་རྡེ་ འིན་། ངུལ་ལ་ ངེ་ ཁྱི་ཞ་རྒུན་ལ་ འི་ ཚང་མ་ མ་ཤེད་པེན་ ཅེ་ཟེར་ནི་ ང་ ཁྱི་ཞ་རྒུན་ ཉམ་པོ་ ཡོད་པེན་།”

ཏམ་པེ་ ཐུག་ཡིད་རྡེ་ ཆག་ལེ་།

5 ཡི་ཤུའི་ མོལ་, “ཏ་ ང་, ང་ ཀ་ལེ་ ཛེད་ཀ་ནེ་ ཡབ་རྦེ་ ཧུ་འདུན་ས་ ལོག་ཏེ་ ཆ་ཡོད་། འིན་ན་ ཁྱི་ཞི་ ཕྲོ་ནི་ སུ་ཞིག་ལ་ ང་ ‘ཀ་རུ་ ཆེན་’ ཟེར་རྡེ་ འདྲི་ མི་འདུག་, 6 ཅེ་ཟེར་ནི་ ངེ་ ཡུ་ ཚང་མ་ ཤེད་པེ་ ཁྱི་ཞ་རྒུན་ལ་ ཚེར་ཧ་ ཀང་འདེ་ ཡོད་རྡེ་ ནོག་། 7 འིན་ན་ ངེ་ ཁྱི་ཞ་ ཏེན་ ཏེན་ ཟེ་འིན་, ང་ འེ་ཀ་ནི་ ཆ་ཅེའོ་ ཁྱི་ཞི་ཕི་ ཕན་ཏོག་ཅེན་ འིན་, ཅེ་ཟེར་ནི་ ནམ་ཚུག་པ་ ང་ མི་ཆ་ ཏེ་ ཡ་ཏོ་ ཛེད་ཀན་འབོ་ ཁྱི་ཞི་ཀ་ མི་རྐྱོད་, འིན་ན་ ཀལ་ཏེ་ ང་ ཆ་ནི་ ངེ་ ཁོང་ ཁྱི་ཞི་ཀ་ ཀ་ལེན་། 8 ཁོང་ རྐྱོད་རྡེ་རྡང་, ཁོང་ངེ་ འཇིག་རྟེན་པ་རྒུ་ནི་ རྡིག་པ་, ཀྲང་པོ་ རྡང་ ཀོན་འཇོག་རྒེ་ ཁྲིམ་ཅེད་རྒུ་ནི་ ཧོར་ལ་ སམ་ཚུལ་ ནོར་རྡེ་ འིན་ཀན་འབོ་ ལྟན་ནེ་ ཛེ་རྡེན་། 9 རྡིག་པ་རྦོ་ ཁོང་རྒུ་ནི་ ངེ་ཀ་ ཏེཏ་པ་ ནར་རྐྱི་ མི་ཅོ་ཅེ་འབོ་ འིན་། 10 ཀྲང་པོ་ནི་ ང་ འིན་ ཅེ་ཟེར་ནི་ ང་ ང་རང་ངེ་ ཡབ་རྦེ་ཀ་ ལོག་ཏེ་ ཆ་འིན་ ཡང་ ཁྱི་ཞ་རྒུ་ནི་ ང་ མི་ཐོང་། 11 ཀོན་འཇོག་རྒེ་ ཁྲིམ་ཅེད་པོ་ ཡོང་ངེན་ ཅེ་ཟེར་ནི་ ཀོན་འཇོག་རྒེ་ འཇིག་རྟེན་པ་རྒུ་ནི་ཀ་ ཝང་སྲུལ་ཧན་ རྡུད་ལ་ ཁྲིམ་ཅེད་རྡེ་ ཛེད་ ཚར་རྡེ་ འིན་།”

12 “ཏ་རུང་ ང་ ཤེད་རྒྱུ་ མ་མང་པོ་ ཡོད་, འིན་ན་ ཁྱི་ཞ་ ཏག་ས་ ཟོད་ མི་ཉེན་། 13 ཀོན་འཇོག་རྒེ་ ཀྲང་པེ་ ཆོག་ལ་ ཁྲིད་ཀན་ ཏམ་པེ་ ཐུག་ཡིད་ རྐྱོད་རྡེ་རྡང་, ཁྱི་ཞ་རྒུན་ལ་ ཀོན་འཇོག་རྒེ་ རྡེན་འབེ་ ལམ་ ལྟན་ནེ་ ཛེ་རྡེ་ནོག་། ཁོང་ངེ་ ཁོ་རང་ངེ་ ཆོག་ནི་ མ་མོ་ལ་ ཡབ་རྦེ་ཀ་ནི་ ཚོར་ཧན་ ཅིག་པོ་ མོལ་ལེ་ནོག་, ཡང་ ཁྱི་ཞ་རྒུན་ལ་ ཡོང་ཅེ་ཅེན་ནེ་ ཏུའི་རྡེ་ ཧོར་ལ་ ཤེད་རྡེ་ ཛེ་རྡེན་། 14 ཁོང་ངེ་ ང་ སྤལ་ ཁྱོང་ངེན་ ཅེ་ཟེར་ནི་ ཁོང་ངེ་ ངེ་ ཟེར་ཧན་རྒུན་ ཁྱི་ཞ་རྒུན་ལ་ ཤེད་རྡེ་ ཛེ་རྡེན་། 15 ཡབ་རྦེ་ འིན་ཀན་ ཚང་མ་ ངེ་ འིན་། ཏེ་རྒ་རྦེ་ཕི་ལ་ ངེ་ ཟེ་འིན་ ཏམ་པེ་ ཐུག་ཡིད་རྡེ་ ངེ་ ཁ་ནི་ ཚོར་ཧན་ ཚང་མ་ ཁྱི་ཞ་རྒུན་ལ་ ཤེད་རྡེ་ ཛེ་རྡེ་ནོག་།”

ལོབ་ཀྲུག་རྒུ་ནི་ ཚེར་ཧ་ ཐེད་པོ་ལ་ འགྱུར་།

16 ཡི་ཤུའི་ མོལ་, “ཙི་རྦི་ཤིག་རྒེ་ ལྟིང་ནི་ ཁྱི་ཞི་ ང་ མི་ཐོང་ ཡང་ ཙི་རྦི་ཤིག་ ལྟིང་ནི་ ཁྱི་ཞི་ ང་ ཡང་ ཐོང་ངེན་།”

17 ཁོང་ངེ་ ལོབ་ཀྲུག་ ཁ་ཅིག་རྒེ་ ཁོ་རང་ ཅིག་ ཏང་ ཅིག་ལ་ ཟེར་, “ཁོང་ངེ་ ‘ཙི་རྦི་ཤི་རྒེ་ ལྟིང་ནི་ ཁྱི་ཞི་ ང་ མི་ཐོང་ ཡང་ ཙི་རྦི་ཤི་ ལྟིང་ནི་ ཁྱི་ཞི་ ང་ ཡང་ ཐོང་ངེན་’ ཡང་ ‘ཅེ་ཟེར་ནི་ ང་ ཡབ་རྦེ་ཀ་ ཆ་ཡོད་’ མོལ་ཧན་རྒུ་ནི་ ཏོན་འབོ་ ཅི་ ནོག་?” 18 ཁོང་རྒུ་ནི་ ཅིག་ ཏང་ ཅིག་ལ་ འདྲིན་ འདེད་, “‘ཙི་རྦི་ཤིག་རྒེ་’ ཏོན་ཏག་པོ་ ཅི་ ནོག་? ཁོང་ངེ་ མོལ་ཧན་འབོ་ ཨ་ཧོ་ནི་ ཧ་ཀོ་ མེ་རག་།”

19 ཡི་ཤུའི་ ཁོང་རྒུ་ནི་ ཏོ་རྦེ་ ཧོར་ལ་ ཁོང་ལ་ འདྲི་ཉིན་ ཡོ་ཀན་འབོ་ ཁྱེན་འབེ་, ཁོང་ངེ་ ལོབ་ཀྲུག་རྒུན་ལ་ མོལ་, “ཁྱི་ཞ་ནི་ ངེ་, ‘ཙི་རྦི་ཤི་རྒེ་ ལྟིང་ནི་ ཁྱི་ཞི་ ང་ མི་ཐོང་ ཡང་ ཙི་རྦི་ཤིག་ ལྟིང་ནི་ ཁྱི་ཞི་ ང་ ཡང་ ཐོང་ངེན་’ ཟེར་ཧ་ནེ་ ཏོན་འབོ་ ཅིག་ ཏང་ ཅིག་ལ་ འདྲི་རག་རྒེ་? 20 ངེ་ ཁྱི་ཞ་ ཏེན་ ཏེན་ ཟེ་འིན་, འཇིག་རྟེན་པ་རྒུ་ནི་ རྒ་མོ་ ཅོ་ཟ་ནི་ ཁྱི་ཞ་ ངུའིན་ ཡང་ རྡུག་པོ་ ཅོའེན་། ཁྱི་ཞ་རྒུན་ལ་ རྡུག་པོ་ ཅོའེན་ འིན་ན་ ཁྱི་ཞི་ རྡུག་པོ་ ཐེད་པེ་ན་ འགྱུ་རེན་། 21 པོ་མོ་ཞིག་ལ་ ཕྲུ་རྒུ་ རྐྱེ་ཟ་ནི་ ཟུར་མོ་ ཧོཔ་ ཡོང་ངེ་ནོག་ ཅེ་ཟེར་ནི་ ཁོའེ་ ཏུའི་རྦོ་ ལེབ་ཏེ་ ནོག་, འིན་ན་ ཕྲུ་རྒུ་ རྐྱེ་ ཚར་རེ་རྡང་, ཁོ་ ཟུར་མོ་ ཞེད་རྡེན་ ཅེ་ཟེར་ནི་ འཇིག་རྟེན་ནེ་ན་ ཕྲུ་རྒུ་ རྐྱེ་ཀན་འབེ་ཀ་ ཁོ་ ཐེད་པོ་ ཆ་ནོག་། 22 ཏེ་རྒ་ ཙོག་སེ་, ཏག་ས་ ཁྱི་ཞི་ རྡུག་པོ་ ཅོའེན་, འིན་ན་ ང་ ཁྱི་ཞ་ ཡང་ ཐུག་ཅེ་ཀ་ནི་ ཁྱི་ཞ་རྒུན་ལ་ ཐེད་པོ་ ཡོང་ངེན་། ཁྱི་ཞི་ཀ་ནི་ ཏེ་ རྒ་མོ་ སུའི་ལ་ ཀོག་ཏེ་ ཁྱེར་ མི་ཉེན་། 23 ཏེ་ཏུའི་ལ་ ཁྱི་ཞི་, ང་ ཅང་ འདྲི་ རྒོའེ་ མི་ཡོང་། ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ མིང་ངེ་ཀ་ ཁྱི་ཞི་ ངེ་ ཡབ་རྦ་ ཅི་ཏོང་ ཞུ་ནི་ སལ་ལེ་ ཛེ་རྡེན་། 24 ཁྱི་ཞི་ ཏག་ས་ཚུག་པ་ ངེ་ མིང་ངེ་ཀ་ ངེ་ ཡབ་ལ་ ཅི་ཞིག་རྒེ་ཕི་ལ་ མ་ཞུའི་། ཞུ་ན་ ཁྱི་ཞ་རྒུན་ལ་ ཐོབ་རྦེན་ ཡང་ ཐེད་པེ་ ཀང་ངེན་།”

25 “ཏག་ས་ ངེ་ ཡུ་རྒུན་ སྤེ་ རྒྱུད་ཏེ་ ཤེད་རྡེ་ འིན་, ཏུའི་རྦོ་ ལེབ་རྦེན་, ནམ་ ངེ་ ང་རང་ངེ་ ཡབ་རྦེ་ ཧོར་ལ་ ཁྱི་ཞ་རྒུན་ལ་ སྤེ་ མན་ཀན་ སལ་སྤོ་ སྤེ་ར་ རྒྱུད་ཏེ་ ཤེད་རྡེན་། 26 ཏེ་ ཞག་ལ་ ཁྱི་ཞི་ ངེ་ མིང་ངེ་ཀ་ ཞུ་ཝ་ པུ་ལེན་། ངེ་ ཁྱི་ཞ་རྒུ་ནི་ ཚབ་ལ་ ཡབ་ལ་ ཞུ་ཝ་ པུ་ལེན་ ཟེར་རྡེ་ མན་, 27 ཅེ་ཟེར་ནི་ ཁྱི་ཞ་རྒུ་ནི་ ང་ ཤེ་སྤ་ ཅོ་ཅེ་ ཡང་ ང་ ཡབ་རྦེ་ ཆོག་ནི་ ཡོང་ཀན་འབོ་ལ་ ཏེཏ་པ་ ཡོད་ཅེ་རྦེ་ ཡབ་ ཁོ་རང་ངེ་ ཁྱི་ཞ་རྒུན་ལ་ ཤེ་སྤ་ ཛེད་ཏུག་། 28 ང་ ཡབ་རྦེ་ ཆོག་ནི་ འཇིག་རྟེན་ནེ་ན་ ཡོྃ་རྡེ་ འིན་, ཏ་ ང་ འཇིག་རྟེན་ པོར་རྡེ་ ཡབ་ ཧུ་འདུན་ས་ ལོག་ཏེ་ ཆ་ཡོད་།”

29 ཏེ་ནི་ ཡི་ཤུའི་ ལོབ་ཀྲུག་རྒུ་ནི་ ཟེར་, “ཏ་ ཉེ་རང་ངེ་ ང་ཞ་རྒུན་ལ་ སྤེ་ རྒྱུད་ཏེ་ མ་མོལ་ལེ་, ཞལ་ཏ་ སལ་སྤོ་ མོལ་ལེ་ ཛེད་ཏུག་། 30 ཏ་ ང་ཞ་རྒུན་ལ་ ཧ་ཀོ་, ཉེ་རང་ངེ་ ཅི་ཚང་མ་ ཁྱེན་ནེ་ནོག་, ཉེ་རང་ལ་ སུ་ཞིག་ལ་ ཏྲི་ཝ་ ཅོ་རྒོའེ་ཤེ་ མི་འདུག་, ཅེ་ཟེར་ནི་ ང་ཞི་ འདྲི་འིན་ སམ་ཀན་རྒུན་ ཉེ་རང་ངེ་ ངུལ་ལ་ ཁྱེན་ནེ་ ཛེད་ཏུག་། ཏོ་རྦེ་ ཅོའེ་རྡེ་ ཉེ་རང་ ཀོན་འཇོག་རྒེ་ ཆོག་ནི་ རྐྱོད་ཏེ་ འིན་ཀན་འབོ་ལ་ ང་ཞི་ ཏེཏ་པ་ ཅོའེན་།”

31 ཡི་ཤུའི་ ཁོང་རྒུན་ལ་ མོལ་, “ཁྱི་ཞ་རྒུ་ནི་ རྡེན་འབའ་ རྡེན་ཆེ་ཤེ་ ཅོ་ཡོད་རྡེ་? 32 འིན་ན་ ཏུའི་རྦོ་ ལེབ་རྦེན་ ཡང་ ལེཔ་ ཚར་རྡེ་ འིན་ ཁྱི་ཞ་ ཡན་འདེ་ ང་ ཅིག་པོ་ ཕྃ་རྡེ་ རང་རང་ངེ་ ཁང་པ་ ཤོར་རེན་། ཏེ་ན་ ང་ ཅིག་པོ་ མན་ ཅེ་ཟེར་ནི་ ངེ་ ཡབ་ ང་ ཉམ་པོ་ ཞུ་རྡེ་ཡོད་།”

33 “ང་ ཉམ་པོ་ འབྲེལ་ ཡོད་ཅེ་རྦེ་, ཁྱི་ཞ་རྒུན་ལ་ ཞིའི་རྡེ་ ཐོབ་ཅེ་ལ་ ངེ་ འི་ སྤེ་ར་རྒུན་ ཟེར་རྡེ་ འིན་། འི་ འཇིག་རྟེན་ནེ་ན་ ཁྱི་ཞ་རྒུན་ལ་ རྡུ་ངལ་ ཐོང་ངེན་, འིན་ན་ སེམ་རུའི་ པོར་ཧེ་, འཇིག་རྟེན་ནེ་ ཝང་སྲུལ་པ་རྒུ་ནི་ཀ་ ང་ རྒྱལ་ ཐོབ་ཏེ་ འིན་།”