རྒུན་འགྲུམ་མེ་ ལྕང་མ་ རྡང་ ཡ་ལག་།
15
ཡི་ཤུའི་ མོལ་, “ང་ནི་ རྒུན་འགྲུམ་མེ་ ལྕང་མ་ རྡེན་འབའ་ རྡང་ ངེ་ ཡབ་རྦེ་ ཚེ་འབད་ཀན་འབོ་ འིན་། 2 འབྲེ་རྦུ་ མ་མིན་ཀ་ནེ་ ཡ་ལག་རྒུན་ ངེ་ཀ་ནི་ ཅེད་ཏེ་ ཕང་ངེ་ ཛེད་ཏུག་, ཡང་ འབྲེ་རྦུ་ མིན་ཀ་ནེ་ ཡ་ལག་རྒུན་ལ་ མང་ངེ་ མིན་ཅེ་ཕི་ ཀ་འདིག་ ཅེད་ཏུག་། 3 ངེ་ ཁྱི་ཞ་ ཤེད་ཀ་ནེ་ ལབ་ཞ་རྒུ་ནི་ ཁྱི་ཞ་རྒུན་ སང་མ་ ཅོའེ་ ཚར་རྡེ་ འིན་། 4 ངེ་ན་ འདོད་ཧེ་ ཡང་ ང་ ཁྱི་ཞི་ན་ འདེད་རྡེན་། ཡ་ལག་ ཅིག་པོ་ལ་ འབྲེ་རྦུ་ མིན་ ཉེན་ནེ་ མག་, ཏོ་ རྒུན་འགྲུམ་མེ་ ལྕང་མེ་ན་ འགྲིལ་རྡེ་ ལུའི་རྒོའེ་། ཏེ་རྒ་ ཙོག་སེ་ ཀལ་ཏེ་ ཁྱི་ཞ་ ངེ་ན་ མ་འདེད་ནི་ ཁྱི་ཞ་རྒུན་ལ་ འབྲེ་རྦུ་ མི་ཆག་།”5 “ང་ནི་ རྒུན་འགྲུམ་མེ་ ལྕང་མ་ ཡང་ ཁྱི་ཞ་ ངེ་ ཡ་ལག་རྒུན་ འིན་། ངེ་ན་ འགྲིལ་ཧན་ ཡང་ ང་ ཁོང་རྒུ་ནི་ན་ འགྲིལ་ཧན་རྒུན་ལ་ འབྲེ་རྦུ་ མང་པོ་ མིན་ནེན་, ང་ མེད་རྡེ་ ཁྱི་ཞ་རྒུན་ལ་ ཅང་ ཅོ་ མི་ཉེན་། 6 ངེ་ན་ མ་འདེད་ཀན་རྒུན་, ཧམ་ཀ་ནེ་ ཡ་ལག་ ཐག་རིང་ལ་ ཕང་ཀན་ ཙོག་སེ་ འིན་, ཏོ་རྒུན་ རྡུའི་རྡེ་ མེ་ན་ ཕྃ་རྡེ་ སྲག་རྒེན་། 7 ཀལ་ཏེ་ ཁྱི་ཞ་ ངེ་ན་ འགྲིལ་རྡེ་ ངེ་ ལབ་ཞ་རྒུན་ ཁྱི་ཞི་ སེམ་མེ་ན་ ལུའི་ནི་, ཁྱི་ཞི་ ཅི་ རྒོའེ་ཤེ་ ཡོད་ན་ ཏོ་ ཁྱི་ཞ་ ས་ལེན་། 8 ཁྱི་ཞ་ འབྲེ་རྦུ་ མང་པོ་ མིན་འདེ་ ངེ་ རྡེན་འབེ་ ལོབ་ཀྲུག་ འིན་ཀན་འབོ་ ལྟན་ནེ་རྡང་ ངེ་ ཡབ་ལ་ སྤལ་ ཐོབ་རྦེན་།”
9 “ཡབ་རྦེ་ ང་ ཤེ་སྤ་ ཛེད་རྡེ་ ཙོག་སེ་ ངེ་ ཁྱི་ཞ་ ཤེ་སྤ་ ཅོ་ཡོད་། ངེ་ ཤེ་སྤེ་ན་ འགྲིལ་རྡེ་ འདོད་ཧེ་། 10 ཀལ་ཏེ་ ཁྱི་ཞི་ ངེ་ ཀཱ་ཁྲིམ་རྒུན་ལ་ ཁ་ཉེན་ནི་ ཁྱི་ཞ་རྒུན་ ངེ་ ཤེ་སྤེ་ན་ ལུའི་རྡེན་ ཀ་ཟུག་ ངེ་ ང་རང་ངེ་ ཡབ་རྦེ་ ཀཱ་རྒུན་ལ་ ཁ་ཉེན་འདེ་ ཁོང་ངེ་ ཤེ་སྤེ་ན་ ལུའི་རྡེ་ འིན་། 11 ངེ་ ཐེད་པོ་ ཁྱི་ཞི་ན་ ལུའི་ཤེ་ ཡང་ ཁྱི་ཞ་རྒུན་ལ་ ཐེད་པོ་ སོན་ཏེ་ ཐོབ་ཅེ་ཕི་ ངེ་ འི་ སྤེ་ར་རྒུན་ ཁྱི་ཞ་ ཟེར་རྡེ་ འིན་། 12 ངེ་ ཀཱ་རྦོ་ འི་རྦོ་ འིན་, ངེ་ ཁྱི་ཞ་རྒུན་ལ་ ཤེ་སྤ་ ཅོ་ཀན་ ཙོག་སེ་ ཁྱི་ཞི་ ཅིག་ ཏང་ ཅིག་ལ་ ཤེ་སྤ་ ཅོའེ་ཧེ་། 13 ཡ་ཏོ་རྒུ་ནི་ཕི་ ཁོ་རང་ངེ་ སྲོག་པོ་ ཏང་ཅེ་སང་ ཆེ་ ཡ་ཤ་ཞིག་ མེད་། 14 ངེ་ ཀཱ་ ཏང་ཀན་རྒུན་ ཅོ་ནི་ ཁྱི་ཞ་ ངེ་ ཡ་ཏོ་ འིན་། 15 ཏི་ནི་ཕ་ལ་ ངེ་ ཁྱི་ཞ་ ཡོག་པོ་ མི་ཟེར་ ཅེ་ཟེར་ནི་ ཡོག་པོ་ལ་ སྤོན་འབེ་ ལེ་ཧེ་ ཧོར་ལ་ རྒྱུའི་ ཡོྃ་ མག་། འིན་ན་ ཁྱི་ཞ་རྒུན་ལ་ ངེ་ ཡ་ཏོ་ ཟེ་འིན་ ཅེ་ཟེར་ནི་ ཡབ་ནི་ ཚོར་ཧན་ ཚང་མ་ ངེ་ ཁྱི་ཞ་ ཤེད་རྡེ་ འིན་། 16 ཁྱི་ཞི་ ང་ འདམ་འདེ་ མན་, ངེ་ ཁྱི་ཞ་རྒུན་ འདམ་འདེ་ འིན་། ཁྱི་ཞ་རྒུན་ སོང་འདེ་ ཏུའི་རྒྱུན་ ལུའི་ཤེ་ འབྲེ་རྦུ་ མིན་ཅུག་ཅེ་ལ་ ངེ་ ཧོའེ་རྡེ་ འིན་། ཏེ་ནི་ ངེ་ མིང་ངེ་ན་ ཁྱི་ཞི་ ངེ་ ཡབ་རྦ་ ཅི་ཞིག་ ཞུ་ནྃ་ སལ་ལེ་ ཛེ་རྡེན་། 17 ངེ་ ཁྱི་ཞ་ འི་ ཀཱ་འབོ་ ཏང་ངེ་ཡོད་, ཅིག་ ཏང་ ཅིག་ལ་ ཤེ་སྤ་ ཅོའེ་།”
འཇིག་རྟེན་པ་རྒུ་ནི་ ཡི་ཤུའི་ ལོབ་ཀྲུག་རྒུན་ལ་ སོག་པོ་ ཅོའེ་།
18 ཡི་ཤུའི་ མོལ་, “ཀལ་ཏེ་ འཇིག་རྟེན་པ་རྒུ་ནི་ ཁྱི་ཞ་ སོག་པོ་ ཅོ་ནི་ ཁོང་རྒུ་ནི་ སོག་པོ་ ཅོ་ཀན་ ཏང་པོ་ ང་ འིན་ཀན་འབོ་ འི་ཏུ་ ཅོའེ་ཧེ་། 19 ཀལ་ཏེ་ ཁྱི་ཞ་ འཇིག་རྟེན་པེ་ འིན་འབེན་ནི་, ཁོང་ངེ་ ཁྱི་ཞ་ ཁོ་རང་རྒུ་ནི་ ཕྲུ་རྒུ་ ཙོག་སེ་ ཤེ་སྤ་ ཅོའེ་རྡེ་ ཡོད་ཁྲོ་། འིན་ན་ ཏ་ ཁྱི་ཞ་ འཇིག་རྟེན་པེ་ ཁག་ཅིག་ མག་། ངེ་ འཇིག་རྟེན་པེ་ ཕྲོ་ནི་ ཁྱི་ཞ་རྒུན་ འདམ་ཅེ་ཀ་ནི་, ཁོང་རྒུ་ནི་ ཁྱི་ཞ་ སོག་པོ་ ཅོ་ནོག་། 20 ངེ་ ཁྱི་ཞ་ འི་ སྤེ་ར་ ཟེར་ཧན་འབོ་ འི་ཏུ་ པོར་ཧེ་, ‘ཡོག་པོ་ སྤོན་འབེ་སང་ ཆེ་ མག་’ ཀལ་ཏེ་ ཁོང་རྒུ་ནི་ ང་ ནག་པར་རྡོ་ ལྟན་འདེ་ འིན་ནི་ ཏེ་ནི་ ཁོང་རྒུ་ནི་ ཁྱི་ཞ་ ནག་པར་རྡོ་ ལྟན་ནེན་། ཀལ་ཏེ་ ཁོང་རྒུ་ནི་ ངེ་ ལབ་ཞ་རྒུ་ནི་ཀ་ ལག་ལེན་ ཅོའེ་རྦི་ནི་ ཏེ་ནི་ ཁྱི་ཞི་ ལབ་ཞ་རྒུ་ནི་ཀ་ལ་ ལག་ལེན་ ཅོའེན་། 21 ཁྱི་ཞ་ ངེ་ འིན་ཅེ་རྦེ་ ཁོང་རྒུ་ནི་ ཁྱི་ཞ་ ཏུ་ཟུག་ ཅོའེན་, ཅེ་ཟེར་ནི་ ཁོང་རྒུ་ནི་ ང་ ཀ་ལེ་ ཛེད་ཀན་འབོ་ ཤེ་རྡེ་ མག་། 22 ཀལ་ཏེ་ ང་ ཡོྃ་རྡེ་ ཁོང་རྒུན་ལ་ ངེ་ ཡབ་རྦེ་ ཁྲིན་འབོ་ མ་ཤེད་པེ་ནི་ ཁོང་རྒུན་ལ་ རྡིག་པ་ མན་འགྲོ་། འིན་ན་ ཏ་ ཁོང་རྒུ་ནི་ ཁོ་རང་ངེ་ རྡིག་པེ་ཕི་ ཅང་ རྐྱོན་ ཅོ་ མི་ཉེན་། 23 ང་ སོག་པོ་ ཅོ་ཀན་རྒུ་ནི་ ངེ་ ཡབ་ལ་ སོག་པོ་ ཅོ་ནོག་། 24 ཀལ་ཏེ་ ངེ་ ཁོང་རྒུ་ནི་ ཕྲོ་ ཞེན་ སུའི་ མ་ཅོའེ་ཀ་ནེ་ ཏེ་ ཧ་ལེ་ཤེ་ ལྟའ་རྒུན་ མ་ཅོའེ་རྦེན་ནི་, ཁོང་རྒུན་ ཁོ་རང་རྒུ་ནི་ རྡིག་པེ་ཕི་ རྐྱོན་འཇེན་ མེད་ཁྲོ་། འིན་ན་ ཁོང་རྒུ་ནི་ ཏོ་རྒུན་ ཐོང་འདེ་ལ་ ང་ རྡང་ ངེ་ ཡབ་ ཉ་ཧ་ སོག་པོ་ ཅོའེ་། 25 ཁོང་རྒུ་ནི་ ཀཱ་ཁྲིམ་མེ་ན་, ‘ཁོང་རྒུ་ནི་ ང་ ཏོན་ཏག་ མེད་རྡེ་ སོག་པོ་ ཅོའེ་’ འབྲི་རྡེ་ ཡོ་ཀན་འབོ་ འདྲན་འདྲ་ ཀྲུཔ་ཏུག་།”