ཡོ་ཧཱ་ནན་ 14

ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ སེམ་ཤུག་ སལ་།

ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ཁྱི་ཞ་རྒུ་ནི་ སེམ་ལ་ ནག་ མ་ལྟན་། ཀོན་འཇོག་རྒེ་ཀ་ ཏེཏ་པ་ ཅོའེ་ཧེ་ ཡང་ ངེ་ཀ་ལ་ ཏེཏ་པ་ ཅོའེ་། 2 ངེ་ ཡབ་རྦེ་ ཁང་པེ་ན་ འདེད་ས་ མང་པོ་ ཡོད་། ཀལ་ཏེ་ མེད་པེ་ནི་ ངེ་ ཅེ་ ཟེ་རེན་ ང་ ཁྱི་ཞ་རྒུ་ནི་ཕི་ ཏུ་རུ་ འདེད་ས་ ཀྲལ་འགྲིག་ ཅོའོ་ ཆ་འིན་། 3 ཀལ་ཏེ་ ང་ སོང་འདེ་ འདེད་ས་ ཀྲལ་འགྲིག་ ཅོ་ནི་, ང་ ལོག་ཏེ་ ཡོྃ་རྡེ་ ཁྱི་ཞ་རྒུན་ ང་རང་ ཉམ་པོ་ ཁྲིད་ཏེ་ ཁྱེར་རེན་། ཏེ་ནི་ ང་ས་ ཁྱི་ཞ་རྒུ་ནི་ འདེད་རྡེན་། 4 ཁྱི་ཞ་རྒུན་ལ་ ང་ ཆ་སེ་ མལ་ལེ་ ལམ་འབོ་ རྒྱུའི་ཡོད་།”

ཡབ་རྦེ་ཀ་ ཆ་སེ་ ལམ་འབོ་ ཡི་ཤུ་ འིན་།

5 ཐོ་མཱེ་ ཡི་ཤུ་ ཟེར་, “ཙོབོ་, ང་ཞ་ ཉེ་རང་ ཀ་རུ་ རྐྱོད་རྡེ་ ཛེད་ཅེའོ་ རྒྱུའི་མེད་, ཏེ་ནི་ ང་ཞ་ ཀ་ཟུག་རྒེ་ ཏེ་ ལམ་འབོ་ ཤེ་རྡེན་?”

6 ཡི་ཤུའི་ མོལ་, “ང་ནི་ ལམ་འབོ་, རྡེན་འབའ་འབོ་ རྡང་ ཚེ་འབོ་ འིན་, ང་ ཅིག་པོ་ རྒྱུད་ཏེ་ མ་ནི་ སུ་ཞི་ལ་ ཡབ་རྦེ་ ཧུ་འདུན་ལ་ མི་ལེབ་། 7 ཀལ་ཏེ་ ཁྱི་ཞ་རྒུ་ནི་ ང་ སུ་ འིན་ཀན་འབོ་ ནེན་ཏེན་ ཤེ་རྡེ་ འིན་འབེན་ནི་, ཁྱི་ཞ་རྒུ་ནི་ ངེ་ ཡབ་རྦེ་ ཤེ་རྡེ་ ཡོད་ཁྲོ་། ཏི་ནི་ཕ་ལ་ ཁྱི་ཞི་ ཁོང་ ཤེ་རྡེ་ ཡང་ འཇལ་རྡེ་ ནོག་།”

8 ཕི་ལིབ་རྦེ་ ཟེར་, “ཙོབོ་ ང་ཞ་ ཡབ་ ཀོན་འཇོག་ འཇལ་ཅུག་རྒེ་ ཛེད་རྡང་, ཡང་ ཏོ་ ང་ཞ་ འགྲིག་ཅེ་རག་།”

9 ཡི་ཤུའི་ ཕི་ལིབ་ལ་ མོལ་, “ང་ ཁྱི་ཞ་ ཉམ་པོ་ འི་ཟམ་ ཏུའི་ མང་པོ་ འདེད་ཏེ་ལ་ ཁྱེ་རང་ལ་ ཏ་རུང་ངེ་ ང་ མ་ཤེ་རྡེ་? ང་ ཐོང་ཀན་རྒུ་ནི་ ཡབ་རྦེ་ལ་ འཇལ་འདེ་ འིན་། ཏེ་ནི་ ཁྱེ་རང་ངེ་ ཀ་ཟུག་ལ་ ཟེ་འིན་ ‘ང་ཞ་ ཡབ་ འཇལ་ཤུག་’ ཟེར་རྡེ་? 10 ཁྱེ་རང་ལ་ ང་ ཡབ་རྦེ་ན་ ཡང་ ཡབ་ ངེ་ན་ ཡོ་ཀན་འབོ་ རྡེན་ཆེ་རྡེ་ མེ་རག་རྒེ་? ངེ་ ཅི་ སྤེ་ར་ཞིག་ ཁྱི་ཞ་རྒུན་ལ་ ཟེ་རེན་ ཏོ་རྒུན་ ངེ་ ཆོག་ནི་ མན་ ངེ་ ཡབ་རྦེ་ ཆོག་ནི་ འིན་, ཁོང་ ངེ་ན་ ཞུ་རྡེ་ ཁོ་རང་ངེ་ ཆག་ལེ་ ཛེ་རྡེ་ཡོད་། 11 ངེ་ ང་ ཡབ་རྦེ་ན་ ཡང་ ཡབ་ ངེ་ན་ འིན་ ཟེར་ཧན་འབོ་ལ་ རྡེན་ཆེ་ཧེ་། ཡུ་ལ་ རྡེན་ མ་ཆེ་ནི་ ངེ་ ཧོར་ལ་ སྤང་པོ་ ཏང་ཀ་ནེ་ ཛེད་པ་རྒུན་ ཐོང་འདེ་ རྡེན་ཆེ་ཧེ་། 12 ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ཀ་ ཏེཏ་པ་ ཅོ་ཀན་རྒུ་ནི་ ངེ་ ཅོ་ཀ་ནེ་ ལེ་ཧ་རྒུན་ ཙོག་སེ་ ཅོའེན་, མ་ཚེད་ ཏེ་སང་ ཀྲ་རྒེ་ ལེ་ཧ་རྒུན་ ཅོའེན་, ཅེ་ཟེར་ནི་ ང་ནི་ ཡབ་རྦེ་ཀ་ ཆ་ཡོད་། 13 སྲེ་ ཡབ་ལ་ སྤལ་ ཁྱོང་ཅེ་ཕི་ ཁྱི་ཞ་རྒུ་ནི་ ཅི་ཞིག་ ངེ་ མིང་ངེ་ཀ་ ཞུ་ཝ་ པུལ་ནང་ ངེ་ ཁྱི་ཞ་ ཏང་ངེན་། 14 ཁྱི་ཞི་ ཅི་ཞི་རྒེ་ཕི་ ངེ་ མིང་ངེ་ཀ་ ང་ ཞུ་ཝ་ པུལ་ནི་, ངེ་ ཏོ་རྦོ་ ཅོའེན་།”

ཡི་ཤུའི་ ཏམ་པེ་ ཐུག་ཡིད་ སལ་ཅེ་ ཞལ་ཆེཏ་།

15 ཡི་ཤུའི་ མོལ་, “ཀལ་ཏེ་ ཁྱི་ཞི་ ང་ ཤེ་སྤ་ ཅོ་ནི་ ཁྱི་ཞི་ ངེ་ ཀཱ་ ཏང་ཀན་རྒུན་ སྲུང་ངེན་, 16 ངེ་ ཡབ་ལ་ ཞུ་ཝ་ པུ་ལེན་ ཡང་ ཁོང་ངེ་ ཁྱི་ཞ་རྒུན་ལ་ ཞེན་ ཡ་ཏོ་ ཛེད་ཀན་ཞིག་ སལ་ལེ་ ཛེ་རྡེན་, ཁོང་ ཏུའི་རྒྱུན་ ཁྱི་ཞ་ ཉམ་པོ་ ཞུ་རྡེན་། 17 ཁོང་ནི་ མི་རྒུན་ ཀྲང་པེ་ ཆོག་ལ་ ཁྲིད་ཀན་ ཏམ་པེ་ ཐུག་ཡིད་པོ་ འིན་། འཇིག་རྟེན་པ་རྒུ་ནི་ ཁོང་ངེ་ན་ ཏེཏ་པ་ མི་ཅོ་ ཅེ་ཟེར་ནི་ ཁོང་རྒུ་ནི་ ཁོང་ ཐོང་ངེ་ མག་ ཡང་ ཤེ་རྡེ་ལ་ མག་། འིན་ན་ ཁྱི་ཞི་ ཁོང་ ཤེ་རྡེ་ནོག་ ཅེ་ཟེར་ནི་ ཁོང་ ཁྱི་ཞི་ན་ ཞུ་རྡེ་ ཁྱི་ཞ་ ཉམ་པོ་ འི་ནོག་། 18 ངེ་ ཁྱི་ཞ་ ཏོ་ཙེ་ ཙོག་སེ་ མི་ཕང་, ང་ ཁྱི་ཞ་རྒུན་ས་ ཡོང་ངེན་། 19 ཙི་རྦི་ཤི་ནི་ འཇིག་རྟེན་པ་རྒུ་ནི་ ང་ མི་ཐོང་, འིན་ན་ ཁྱི་ཞི་ ང་ ཐོང་ངེན་། ང་ སོན་པོ་ འིན་ཅེ་རྦེ་ ཁྱི་ཞ་རྒུན་ལ་ སོན་པོ་ ལུའི་རྡེན་། 20 ཏོ་ ཞག་ཏེ་, ང་ ཡབ་རྦེ་ན་ ཡང་ ཁྱི་ཞ་རྒུན་ ངེ་ན་ ཡང་ ང་ ཁྱི་ཞི་ན་ འིན་ཀན་འབོ་ ཁྱི་ཞི་ ཧ་ཀོའེན་། 21 ངེ་ ཀཱ་རྒུན་ ཉེན་འདེ་ སྲུང་ཀན་རྒུ་ནི་ ང་ ཤེ་སྤ་ ཅོ་ཀན་རྒུན་ ནོག་། ང་ ཤེ་སྤ་ ཅོ་ཀན་རྒུན་ལ་ ངེ་ ཡབ་རྦེ་ལ་ ཤེ་སྤ་ ཅོའོ་ ཛེད་རྡེན་, ཡང་ ངེ་ལ་ ཁོང་རྒུན་ལ་ ཤེ་སྤ་ ཅོའེ་རྡེ་, ང་རང་ ཁོང་རྒུན་ལ་ ངོན་ཅུག་རྒེན་།”

22 ཏེ་ནི་ ཀར་ཡོད་པ་ མན་ཀ་ནེ་ ཡུ་འདཱེ་ ཟེར་, “ཀྱེ་ ཙོབོ་, ཉེ་རང་ ང་ཞ་རྒུན་ལ་ ངོན་ཅུག་ཅེ་ ཡང་ འཇིག་རྟེན་པ་རྒུན་ལ་ ངོན་ མི་ཅུག་ཅེའོ་ ཅེ་ཕི་ འིན་?”

23 ཡི་ཤུའི་ ལེན་སལ་, “ང་ ཤེ་སྤ་ ཅོ་ཀན་རྒུ་ནི་ ངེ་ ལབ་ཞ་རྒུ་ནི་ཀ་ ལག་ལེན་ ཅོའེན་། ངེ་ ཡབ་རྦེ་ ཁོང་རྒུན་ལ་ ཤེ་སྤ་ ཛེད་རྡེན་ ཡང་ ང་ཞ་ ཉ་ཧ་ ཁོང་རྒུ་ནི་ཀ་ ཡོྃ་རྡེ་ ཁོང་རྒུན་ ཉམ་པོ་ འདེད་རྡེན་། 24 ང་ ཤེ་སྤ་ མ་ཅོ་ཀན་རྒུ་ནི་ ངེ་ ལབ་ཞ་རྒུན་ སྲུང་ངེ་ མག་། ཁྱི་ཞི་ ཚོར་ཧ་ནེ་ འི་ ཁྲིན་འབོ་ ང་རང་ངེ་ མན་, ང་ ཀ་ལེ་ ཛེད་ཀ་ནེ་ ངེ་ ཡབ་རྦེ་ ཆོག་ནི་ འིན་། 25 ང་ ཁྱི་ཞ་རྒུན་ ཉམ་པོ་ ཡོད་ཟ་ནི་ ངེ་ ཡུ་ ཚང་མ་ ཟེར་རྡེ་ འིན་། 26 འིན་ན་ ཡབ་རྦེ་ ངེ་ ཚབ་ལ་ ཡ་ཏོ་ ཛེད་ཀན་, ཏམ་པེ་ ཐུག་ཡིད་ ཁྱི་ཞ་ ཀ་ལེ་ ཛད་རྡེན་། ཁོང་ངེ་ ཁྱི་ཞ་རྒུན་ལ་ ཅི་ཚང་མ་ ལབ་རྦེ་ ཛེད་ཏེ་ ངེ་ ཤེད་ཀན་ ཚང་མ་ ཁྱི་ཞ་རྒུན་ལ་ འི་ཏུ་ ཧུལ་ལེན་། 27 ངེ་ ཁྱི་ཞ་ ཉམ་པོ་ ཞིའི་རྡེ་ པོ་རེ་ཡོད་, ངེ་ ཞིའི་རྡེ་རྦོ་ ཁྱི་ཞ་ ཏང་ངེ་ཡོད་, ངེ་ ཞིའི་རྡེ་རྦོ་ འཇིག་རྟེན་པེ་ ཞིའི་རྡེ་ ཙོག་སེ་ མན་། ཁྱི་ཞ་རྒུ་ནི་ སེམ་ལ་ ནག་ མ་ལྟན་ནེ་ ཡང་ འཇིའི་ མ་འཇིའི་། 28 ང་ ཆེན་ ཡང་ ཁྱི་ཞི་ཀ་ ལོག་ཏེ་ ཡོང་ངེན་ ངེ་ ཟེར་ཧན་འབོ་ ཁྱི་ཞི་ ཚོར་རྡེ་ ནོག་། ཀལ་ཏེ་ ཁྱི་ཞི་ ང་ ཤེ་སྤ་ ཅོ་ནི་ ང་ ཡབ་རྦེ་ཀ་ ཆ་ཅེ་ལ་ ཁྱི་ཞ་ ཐེད་པོ་ ཡོད་ཁྲོ་, ཅེ་ཟེར་ནི་ ཡབ་ ངེ་སང་ ཀྲ་རྒེ་ འིན་། 29 ཏོ་རྒུན་ ཆ་རྡང་ ཁྱི་ཞི་ ངེ་ཀ་ ཏེཏ་པ་ ཅོ་ཅེ་ཕི་ འི་ ཚང་མ་ ཆ་སང་ ངུལ་ལ་ ངེ་ ཁྱི་ཞ་རྒུན་ལ་ ཤེད་ཏེ་ འིན་། 30 ང་ ཁྱི་ཞ་རྒུན་ལ་ སྤེ་ར་ ཏང་ཅེ་ ཏུའི་ མང་པོ་ཞིག་ མེད་, ཅེ་ཟེར་ནི་ འི་ འཇིག་རྟེན་པེ་ ཝང་སྲུལ་པ་རྦོ་ ཡོང་འདུག་, ཁོ་ ངེ་ཀ་ ཅང་ ཝང་ མེད་། 31 འིན་ན་ ངེ་ ཡབ་ལ་ ཤེ་སྤ་ རྡང་ ཁོང་ངེ་ ཀཱ་ སལ་ལེ་ ཛེད་ཀན་རྒུན་ འདྲན་འདྲ་ ཅོ་ཅེའོ་ འཇིག་རྟེན་པ་རྒུན་ལ་ རྒྱུའི་ ཡོང་རྒོའེ་། ཏ་ ལོྃ་ ཨ་ཧོ་རྒུན་ འེ་ཀ་ནེ་ ཆེན་།”