ཡོ་ཧཱ་ནན་ 13

ཡི་ཤུའི་ ལོབ་ཀྲུག་རྒུ་ནི་ ཧང་པ་ ཁྲུ་ ཛེད་།

པེ་སག་རྒེ་ འདོན་ཏང་ངེ་སང་ ངུལ་ལ་, ཡི་ཤུ་ འི་ འཇིག་རྟེན་འབོ་ ཕྃ་རྡེ་ ཁོ་རང་ངེ་ ཡབ་རྦེ་ཀ་ རྐྱོད་ཅེ་ ཏུའི་ ལེབ་ཏེ་ འིན་ཀན་འབོ་ ཐུག་རྒྱུའི་ ཡོད་པེན་། ཁོང་ངེ་ འི་ འཇིག་རྟེན་ནེ་ན་ ཁོ་རང་ངེ་ མི་རྒུན་ལ་ ཤེ་སྤ་ ཛེད་, ཏ་ ཁོང་ངེ་ ཁོ་རང་ངེ་ ཤེ་སྤེ་ ཚེད་མེད་ ཁོང་རྒུན་ལ་ ལྟན་ནེ་ ཛེད་། 2 ཁོང་རྒུན་ ཕི་ཏོག་རྒེ་ འདོན་ཏང་ འདོན་ནེན་ ཡོད་པེན་། རྡུད་རྡེ་ ཤི་མོན་ནེ་ པུ་ཙ་ ཡུ་འདཱ་ ཀར་ཡོད་པེ་ ཉིང་ངེ་ན་ ཡི་ཤུ་ འགྲ་ཝེ་ ལག་ལ་ ལྟེད་ཅེ་ སམ་བ་ རྐྱེ་ཅུག་ཅེ་ ཚར་རྡེ་ འིན་འབེན་།

3 ཡི་ཤུའི་ ཡབ་རྦེ་ ཅི་ཚང་མ་ ཁོང་ངེ་ ཆག་ལ་ ལྟེད་རྡེ་ ཛེད་ཀན་ འདང་ ཁོང་ ཀོན་འཇོག་རྒེ་ ཆོག་ནི་ རྐྱོད་ཀན་, ཡང་ ཀོན་འཇོག་རྒེ་ ཧུ་འདུན་ལ་ ལོག་ཏེ་ རྐྱོད་ཅེའོ་ ཁྱེན་ནེ་ ཛེ་རྡེ་ཡོད་པེན་། 4 ཏེ་ནི་ ཁོང་ ཅོག་ཙེ་ འདུན་ལ་ ཞྃ་ ཡང་ རང་ངེ་ ཁ་ཏོཏ་རྡེ་ ནམ་ཟ་ པུད་རྡེ་ ཛེད་ཏེ་ ལག་པི་ ཆོན་མོ་ཞིག་ ཁོ་རང་ངེ་ རྐྱེད་པ་ སྲིལ་ལེ་ ཛེད་། 5 ཏེ་ ལྟིང་ནི་ ཁོང་ངེ་ ཅི་ལིམ་ཅི་ན་ ཆུ་ ལུག་ཏེ་ ཁོ་རང་ངེ་ ལོབ་ཀྲུག་རྒུ་ནི་ ཧང་པ་ ཁྲུ་ཅེ་ འགོ་ཟུག་ ཛེད་ཏེ་ རྐྱེད་པ་ སྲིལ་ལེ་ ཛེད་ཀ་ནེ་ ལག་པི་ ཆོན་མོ་ ཉམ་པོ་ཕི་ ཛེད་།

6 ཁོང་ ཤི་མོན་ པི་ཏྲ་རེ་ འདུན་ལ་ ལེབ་རྦེ་རྡང་, པི་ཏྲ་རེ་ ཟེར་, “ཙོབོ་ ཉེ་རང་ངེ་ ངེ་ ཧང་པ་ ཁྲུ་ ཛེ་རྡེ་ཡོད་རྡེ་?”

7 ཡི་ཤུའི་ ཁོ་ ལེན་སལ་, “ངེ་ ཅོ་ཀན་འབོ་ ཏག་ས་ ཁྱེ་རང་ལ་ ཧ་མི་ཀོ་, འིན་ན་ ལྟིང་ནི་ ཧ་ཀོའེན་།”

8 པི་ཏྲ་རེ་ ཟེར་, “མན་, ཉེ་རང་ངེ་ ངེ་ ཧང་པ་ མ་ནི་ ཁྲུ་ མ་ཛེད་།”

ཡི་ཤུའི་ ཁོ་ མོལ་, “ཀལ་ཏེ་ ངེ་ ཁྱེ་རང་ངེ་ ཧང་པ་ མ་ཁྲུ་ནི་ ཏེ་ནི་ ངེ་ ནོར་ཧལ་ལེ་ན་ ཁྱེ་རང་ལ་ ཁག་ མེད་།”

9 ཤི་མོན་ པི་ཏྲ་རེ་ ཟེར་, “ཏུ་ཟུག་ འིན་ནི་, ཏེ་ནི་ ཙོབོ་ ངེ་ ཧང་པ་ མ་ཚེད་, ལ་པ་ རྡང་ འགོ་ལ་ ཁྲུ་ ཛེད་།”

10 ཡི་ཤུའི་ ཁོ་ ལེན་སལ་, “ཆུ་ ཞུ་ཧ་ནེ་ མི་རྦེ་ ཧང་པ་ མ་ནི་ ཁྲུ་རྒོའེ་ མེད་པེ་, ཁོའེ་ ཟུྃ་སྤོ་ སོན་ཏེ་ ལག་མོ་ ཡོད་པེ་། ཅིག་ཅིག་ མ་ཐེ་ལ་ ཁྱི་ཞ་ ཚང་མ་ སང་མ་ འིན་།” 11 ཡི་ཤུ་ འགྲ་ཝེ་ ལག་ལ་ ལྟེད་ཅེ་ཅེན་ནེ་ མི་རྦོ་ ཐུག་རྒྱུའི་ ཡོད་ཅེ་ཀ་ནི་ “ཅིག་ཅིག་ མ་ཐེ་ལ་ ཁྱི་ཞ་ ཚང་མ་ སང་མ་ འིན་” མོལ་།

12 ཡི་ཤུའི་ ལོབ་ཀྲུག་རྒུ་ནི་ ཧང་པ་ ཁྲུའི་ ཚར་རེ་རྡང་ ནམ་ཟ་ ནམ་འདེ་ ཁོ་རང་ངེ་ མལ་ལེ་ཀ་ ཞུའུ་, ཡང་ ཁོང་ངེ་ ལོབ་ཀྲུག་རྒུན་ལ་ འདྲི་ ཛེད་, “ངེ་ ཅོའེ་ཧན་ནེ་ ཏོན་འབོ་ ཁྱི་ཞ་ ཧ་ཀོ་རྡེ་? 13 ཁྱི་ཞི་ ང་ ལོབ་རྦོན་ འདང་ ཙོབོ་ ཟེ་རེ་ནོག་, ཏུ་ཟུག་ ཟེར་ཤེ་རྦོ་ ཀྲང་པོ་ ནོག་, ཅེ་ཟེར་ནི་ ང་ ཏོ་ ནང་ཞིན་ འིན་ཅེ་འབོ་ འིན་། 14 ཏ་ ང་ ཁྱི་ཞ་རྒུ་ནི་ ལོབ་རྦོན་ འདང་ ཙོབོ་ འིན་ནེན་ཞིག་ ཁྱི་ཞི་ ཧང་པ་ ཁྲུ་ཡོད་ན་, ཁྱི་ཞ་རྒུ་ནི་ལ་ ཅིག་ ཏང་ ཅིག་རྒེ་ ཧང་པ་ ཁྲུ་རྒོའེ་། 15 ངེ་ ཅོ་ཀན་རྒུན་ ཁྱི་ཞི་ལ་ ཅོ་ཅེ་ཕི་ ཁྱི་ཞ་རྒུན་ལ་ ངེ་ སྤེ་ཞིག་ ལྟན་འདེ་ འིན་། 16 ངེ་ ཁྱི་ཞ་ ཏེན་ ཏེན་ ཟེ་འིན་, ཡོག་པོ་ སྤོན་འབེ་སང་ ཆེ་ མག་, ཡང་ ཁྲིན་ ཁྱོང་ཀན་འབོ་ ཁྲིན་ ཀལ་ཧན་འབེ་སང་ ཆེ་ མག་། 17 ཏ་ ཁྱི་ཞ་རྒུན་ལ་ ཡུ་རྒུན་ ཧ་ཀོ་རྡེ་ ནོག་། ཡུ་རྒུ་ནི་ཀ་ ལག་ལེན་ ཅོ་ནི་ ཅིན་ལབ་ ཐོབ་རྦེན་།”

ཡི་ཤུ་ འགྲ་ཝེ་ ལག་ལ་ ལྟེད་ཅེ་རྦེ་ ཁོང་ངེ་ ལུང་རྟན་ སལ་།

18 ཡི་ཤུའི་ མོལ་, “ངེ་ ཁྱི་ཞ་ ཚང་མེ་ ཧོར་ལ་ ཟེ་མེད་, ངེ་ འདམ་ཀན་རྒུན་ ང་ རྒྱུའི་ཡོད་། འིན་ན་ ཏམ་པེ་ སུང་རབ་རྦེ་ན་, ‘ང་ ཉམ་པོ་ ཟ་ཀན་འབེ་ ང་ འགྲ་ཝེ་ ལག་ལ་ ལྟེ་རྡེན་’ འབྲི་ཧན་འབོ་ འདྲན་འདྲ་ ཀྲུཔ་རྒོའེ་། 19 ཡུ་རྒུན་ ཆ་ཟ་ནི་ ཁྱི་ཞ་རྒུ་ནི་ ང་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབོ་ ཏེཏ་པ་ ཅོ་ཅེ་ཕི་ ངེ་ འི་རྦོ་ ཆ་སང་ ངུལ་ལ་ ཏག་ས་ ཁྱི་ཞ་རྒུན་ལ་ ཟེ་འིན་། 20 ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ ཀལ་ཧན་རྒུན་ལ་ རྒ་སུའི་ ཅོ་ཀན་རྒུ་ནི་ ང་ རྒ་སུའི་ ཅོའེ་རྡེ་ འིན་, ཡང་ ང་ རྒ་སུའི་ ཅོ་ཀན་རྒུ་ནི་ ང་ ཀ་ལེ་ ཛེད་ཀན་འབོ་ལ་ རྒ་སུའི་ ཞུའི་རྡེ་ ནོག་།”

21 ཏོ་ མོལ་རྡེ་ ལྟིང་ནི་ ཡི་ཤུའི་ སེམ་ལ་ མ་ནི་ ཧོཔ་ ནག་ ཐོང་, ཡང་ སྤང་པོ་ སལ་རྡེ་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ཁྱི་ཞི་ ཕྲོ་ནི་ ཅིག་ཅིག་རྒེ་ ང་ འགྲ་ཝོ་ ལག་ལ་ ལྟེད་རྡེན་།”

22 ཏེ་ནི་ ལོབ་ཀྲུག་རྒུ་ནི་ ཅིག་ ཏང་ ཅིག་ལ་ ལྟོའེ་, ཅེ་ཟེར་ནི་ ཁོང་ངེ་ སུའི་ ཧོར་ལ་ མོལ་རྡེ་ འིན་ སུ་ལ་ རྒྱུའི་ མེད་པེན་། 23 ཡི་ཤུའི་ ཤེ་སྤ་ ཛེད་ཀ་ནེ་ ལོབ་ཀྲུག་པོ་ ཁོང་ངེ་ ཚམ་ལ་ འདེད་ཏེ་ ཡོད་པེན་། 24 ཤི་མོན་ པི་ཏྲ་རེ་ ཏེ་ ལོབ་ཀྲུག་པོ་ལ་, “སུའི་ ཧོར་ལ་ མོལ་རྡེ་ འིན་ ཡི་ཤུ་ འདྲི་ཅེ་ལ་ འགོ་ རྒུལ་ལེན་?”

25 ཁོ་ ཡི་ཤུའི་ ཆོག་ལ་ ཀན་རྡེ་ ཁོང་ལ་ འདྲི་, “ཙོབོ་ ཁོ་ སུ་ ནོག་?”

26 ཡི་ཤུའི་ ལེན་སལ་, “ངེ་ ཏི་རྒིར་ ཏ་རྦེན་ནེ་ན་ སྤག་ཏེ་ ཏང་ཅེ་ཅེན་འབོ་ འིན་།” ཏེ་ནི་ ཡི་ཤུའི་ ཤི་མོན་ ཀར་ཡོད་པེ་ པུ་ཙ་ ཡུ་འདཱ་ ཏི་རྒིར་ སྤག་ཀན་འབོ་ སལ་། 27 ཏི་རྒིར་ ཁམ་འབུ་རྦོ་ ཟ་རྡང་ རྡུད་ ཁོའེ་ན་ ཞུའུ་། ཡི་ཤུའི་ ཁོ་, “ཁྱེ་རང་ངེ་ ཅོ་ཅེ་ཅེན་འབོ་ འགྱོ་སྤ་ ཅོའེ་” མོལ་། 28 འིན་ན་ ཁར་ཞི་ ཟོའེན་ ཡོ་ཀན་ ཞེན་ཚང་མ་ལ་ ཡི་ཤུའི་ ཁོ་ ཏུ་ཟུག་ ཅེ་ལ་ མོལ་རྡེ་ འིན་ ཅང་ ཧ་མ་ཀོ་། 29 ཡུ་འདཱ་ མུལ་ ཁག་ཁུར་པ་ འིན་འབེ་, ཁ་ཅིག་རྒེ་ ཡི་ཤུའི་ ཁོ་ ཏུའི་ཤེན་ནི་ཕི་ རྒོའེ་ཤེ་ཅན་རྒུན་ ཉོ་ཅེ་ ཡང་ ཉལ་རྦ་ཅེན་རྒུན་ལ་ མུལ་ ཏང་ཅེ་ཕི་ མོལ་རྡེ་ འིན་ཀག་ སམ་། 30 ཡུ་འདཱེ་ ཏི་རྒིར་རེ་ ཁམ་འབུ་ ཟོའེ་རྡེ་ ཁོ་ ཕི་ལོག་ལ་ འབིང་འདེ་ སོང་, ཏོ་ཟ་ནི་ ཚེན་ སོང་འདེ་ ཡོད་པེན་།

པི་ཏྲ་རེ་ མི་ཤེ་ཟུན་ ཏང་ཅེ་ ཡི་ཤུའི་ ལུང་རྟན་ ཛེད་།

31 ཡུ་འདཱ་ སོང་ ཚར་རེ་རྡང་ ཡི་ཤུའི་ མོལ་, “ཏ་ མི་རིག་རྒེ་པུ་ སྤལ་ ཐོབ་རྦེན་, ཡང་ ཁོ་ རྒྱུད་ཏེ་ ཀོན་འཇོག་ལ་ སྤལ་ ཐོབ་རྦེན་། 32 ཀལ་ཏེ་ ཁོའེ་ ཅོའེ་རྡེ་ ཀོན་འཇོག་ལ་ སྤལ་ ཐོབ་རྦེ་ཡོད་ནི་, ཀོན་འཇོག་རྒེ་ ཁོ་རང་ངེ་ན་ སྲེ་ལ་ སྤལ་ འགྱོ་སྤ་ སལ་ལེ་ ཛེ་རྡེན་། 33 ངེ་ ཕྲུ་རྒུ་རྒུན་, ཁྱི་ཞ་རྒུན་ ཉམ་པོ་ ང་ ཏ་རུང་ ཏུའི་ ཉུང་ཙེ་ཞིག་ ལུའི་རྡེན་། ཁྱི་ཞི་ ང་ ཙལ་ལེན་, ཀ་ཟུག་ ངེ་ ཡ་ཧུ་འདཱ་པེ་ འུ་རྐྱོང་རྒུན་ལ་ ཟེར་རྦེན་ ཏག་ས་ ཁྱི་ཞ་རྒུན་ལ་ ཟེ་འིན་, ཀ་རུ་ ང་ ཆེན་ ཁྱི་ཞ་རྒུན་ ཏུ་རུ་ ཡོང་ མི་ཉེན་། 34 ངེ་ ཁྱི་ཞ་རྒུན་ལ་ ཀཱ་རྒྱ་ སོ་མ་ཞིག་ ཏང་ངེ་ཡོད་, ཅིག་ ཏང་ ཅིག་ལ་ ཤེ་སྤ་ ཅོའེ་། ངེ་ ཁྱི་ཞ་ ཤེ་སྤ་ ཅོའོ་ ཙོག་སེ་, ཁྱི་ཞ་རྒུ་ནི་ལ་ ཅིག་ ཏང་ ཅིག་ལ་ ཤེ་སྤ་ ཅོ་རྒོའེ་། 35 ཀལ་ཏེ་ ཁྱི་ཞི་ ཅིག་ ཏང་ ཅིག་ལ་ ཤེ་སྤ་ ཅོ་ནི་, ཏོ་རྦེ་ མི་ཚང་མ་ལ་ ཁྱི་ཞ་རྒུན་ ངེ་ ལོབ་ཀྲུག་ འིན་ཀན་འབོ་ ཤེའེ་རྡེན་།”

36 ཤི་མོན་ པི་ཏྲ་རེ་ ཡི་ཤུ་ ཟེར་, “ཙོབོ་ ཉེ་རང་ ཀ་རུ་ རྐྱོད་ཅེ་ འིན་?”

ཡི་ཤུའི་ ལེན་སལ་, “ང་ ཆ་ས་ ཏག་ས་ ཁྱེ་རང་ ཡོང་ མི་ཉེན་, འིན་ན་ ལྟིང་ནི་ ཁྱེ་རང་ ང་ འགྲྃ་རྡེ་ ཡོང་ངེན་།”

37 པི་ཏྲ་རེ་ འདྲི་, “ཀྱེ་ ཙོབོ་ ང་ ཉེ་རང་ ཉམ་པོ་ ཏག་ས་ ཅེ་ ཡོང་ མི་ཉེན་? ཉེ་རང་ངེ་ཕི་ ངེ་ སྲོག་ ཏང་ངེན་།”

38 ཡི་ཤུའི་ ལེན་སལ་, “ཁྱེ་རང་ངེ་ ངེ་ ཏོན་ལ་ རང་ངེ་ སྲོག་པོ་ ཏང་ངེན་ནེ་? ངེ་ ཁྱེ་རང་ལ་ ཏེན་ ཏེན་ ཟེ་འིན་, ཅ་པེ་ ཧད་ ཏང་ངེ་སང་ ངུལ་ལ་, ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་།”