ཡོ་ཧཱ་ནན་ 12

ཡི་ཤུའི་ ཞབ་རྦེ་ཀ་ ཀྲི་ཞིམ་ཅེན་ནེ་ མར་ ལུག་།

པེ་སག་རྒེ་ ཏུའི་ཤེན་ནེ་སང་ ཞག་ ཀྲུག་རྒེ་ ངུལ་ལ་, སོན་པོ་ ལྃ་རྡེ་ ཛེད་ཀན་ ལ་ཟར་རེ་ ཁང་པ་ འབེད་ཐཱ་ནི་ ཀྲོང་ཁྱེར་ལ་ ཡི་ཤུ་ རྐྱོད་། 2 ཏུ་རུ་ ཡི་ཤུའི་ཕི་ ཕི་རོ་ ཚལ་མ་ཞིག་ ཀྲལ་འགྲིག་ ཅོའེ་རྡེ་ མར་ཐཱེ་ ཞབ་རྟོག་ ཞུ་ཡོད་པེན་, ཡི་ཤུ་ ཉམ་པོ་ འདོན་ཏང་ འདོན་ཀན་རྒུ་ནི་ ཕྲོ་ ལ་ཟར་ལ་ ཡོད་པེན་། 3 ཏེ་ཏུའི་ མར་ཡམ་མེ་ མ་ ཀུའི་སྤོ་ ཏྲི་ཞིམ་ཅེན་ནེ་ མར་ ལི་ཀྲར་ ཕེད་ ཧ་ལམ་ ཡི་ཤུའི་ ཞབ་རྦེ་ཀ་ ལུག་ཏེ་ ཁོ་རང་ངེ་ སྲ་ ཉམ་པོ་ ཕི་, ཏེ་ནི་ ཁང་པ་ སོན་ཏེ་ ཀྲི་ཞིམ་མེ་ ཀྲི་མེ་ ཧང་།

4 འིན་ན་ ཡི་ཤུ་ ལྟིང་ནི་ འགྲ་ཝོ་རྒུ་ནི་ ལག་ལ་ ལྟེད་ཀན་, ཁོ་རང་ངེ་ ལོབ་ཀྲུག་རྒུན་ འིན་ཀན་ ཡུ་འདཱ་ ཀར་ཡོད་པེ་ མར་ཡམ་ལ་ ཟེར་, 5 “ཅི་ འི་ ཏྲི་ཞིམ་འབོ་ ཙོྃ་རྡེ་ པེ་ནེ་འབོ་ ཉལ་རྦ་ཅེན་རྒུན་ལ་ ཏང་མི་ཉེན་ནེ་? ཡུ་རྦེ་ རིན་འབོ་ ལོ་ ཅིག་རྒེ་ ལ་ཆ་ ཧ་ལམ་ རི་ཅེ་ འདུག་།” 6 ཉལ་རྦ་ཅེན་རྒུ་ནི་ཕི་ ཚེར་ཧ་ ཡོད་ཏེ་ མག་ ཁོ་རང་ ཧུན་མ་ འིན་ཅེ་ཀ་ནི་ ཁོའེ་ ཏོ་རྦོ་ ཟེར་། ལོབ་ཀྲུག་རྒུ་ནི་ ཀོལ་ཅེ་ མུལ་ ཁོ་མག་, ཁོའེ་ ལག་ལ་ པོར་ཧན་འབེ་ ནང་ནི་ ཁོའེ་ ཧུ་ཡོད་པེན་།

7 ཡི་ཤུའི་ མོལ་, “མར་ཡམ་ པུད་། ང་ སྤུར་ཧང་ལ་ ཞུ་ཅེ་ ཞག་པེ་ཕི་ ཁོའེ་ འི་ ཀྲི་ཞིམ་པོ་ པོར་རྡེ་ ནོག་། 8 ཉལ་རྦ་ཅེན་རྒུན་ ཏུའི་རྒྱུན་ ཁྱི་ཞ་ ཉམ་པོ་ ལུའི་རྡེན་, འིན་ན་ ང་ ཏུའི་རྒྱུན་ ཁྱི་ཞ་ ཉམ་པོ་ མི་ལུའི་།”

9 ཏེ་རྒ་ ཏུའི་ལ་ ཡ་ཧུ་འདཱ་པེ་ མི་ཚོག་ མང་པོ་ལ་ ཡི་ཤུ་ ཏུ་རུ་ ཡོ་ཀན་འབོ་ རྒྱུའི་སོང་འབེ་ ཁོང་རྒུན་ ཡོྃ་, ཅེ་ཟེར་ནི་ ཁོང་རྒུན་ལ་ ཡི་ཤུ་ ཐུག་ཅེ་ ཅིག་པོ་ མན་པེ་, ཁོང་ངེ་ སོན་པོ་ ལང་ངེ་ ཛེད་ཀ་ནེ་ ལ་ཟར་ལ་ ལྟ་ལ་ ཡོྃ་། 10 ཏེ་ནི་ ལ་མ་ འུ་རྐྱོང་རྒུ་ནི་ ལ་ཟར་རྦོ་ལ་ སེད་ཅེ་ ཅུའི་ངན་ ལྡིང་། 11 ཅེ་ཟེར་ནི་ ལ་ཟར་ལ་ སོང་ཀན་འབེ་ ཡ་ཧུ་འདཱ་པ་ མང་པོ་ཞིག་རྒེ་ ལ་མ་རྒུན་ ཕྃ་རྡེ་ ཡི་ཤུའི་ཀ་ ཏེཏ་པ་ ཅོ་ཡོད་པེན་།

ཡི་ཤུ་ རྒྱ་སྤེ་ ཚུལ་ལ་ རྒ་སུའི་ ཞུའི་།

12 ཐོ་རེ་ ང་མོ་ ཏུའི་ཤེན་ལ་ ཡོང་ཀ་ནེ་ མི་ཚོག་ མང་པེ་ ཡི་ཤུ་ ཡེ་རུ་ཤ་ལེམ་ལ་ རྐྱོད་ཏུག་ ཟེར་རྡེ་ ཚོར་རྦེ་, 13 ཁོང་རྒུ་ནི་ ཆོང་ངར་རེ་ ལྕང་མེ་ ཡ་ལག་ ཁུར་རྡེ་ ཁོང་ལ་ རྒ་སུའི་ ཞུ་ལ་ འབིང་འདེ་ ཀུ་ཅུ་ ཏང་ངེན་ ཟེར་,

“རྟོད་པ་ པུལ་ཧེ་།

ཙོབོ་ ཀོན་འཇོག་རྒེ་ ཝང་ངེ་ན་ རྐྱོད་ཀན་འབོ་ ཅིན་ལབ་ཅེན་།

ཨིས་ར་ཡེལ་ལེ་ རྒྱ་སྤོ་ ཅིན་ལབ་ཅེན་།”

14 ཡི་ཤུའི་ པུང་ངུ་ ཅོ་རྦ་ཞིག་ ཟི་རྦེ་ ལུང་རྟན་ འདྲན་འདྲ་ ཀྲུབ་ཅེ་ཕི་ ཁོང་ ཏེ་ཀ་ ཞོན་ནེ་ ཛེད་, ཀ་འབོ་,

15 “ཡེ་རུ་ཤ་ལེམ་པ་རྒུན་ མ་འཇིའི་ཧེ་།

ལྟོའེ་རྡང་ ཁྱི་ཞི་ རྒྱ་སྤོ་,

པུང་ངུ་ ཅོ་རྦེ་ཀ་ ཞོན་འདེ་ རྐྱོད་རྡེ་ལ་།”

16 ཏེ་ཏུའི་ ལོབ་ཀྲུག་རྒུན་ལ་ ཁོང་ངེ་ ཛེད་ཀན་རྒུན་ ཅང་ ཧ་མ་ཀོ་, འིན་ན་ ཡི་ཤུ་ སྤལ་ ཐོབ་ཏེ་ ལྟིང་ནི་, ཁོང་ངེ་ཀ་ ཏོ་ སོང་ཀན་ ཚང་མ་ ཏམ་པེ་ སུང་རབ་རྦེ་ན་ འབྲི་ཛེད་ཏེ་ ཡོ་ཀན་འབོ་ ཁོང་རྒུན་ལ་ ཧ་ཀོ་།

17 ཡི་ཤུའི་ ལ་ཟར་ལ་ སྤུར་ཧང་ནི་ འབོ་ ཛེད་ཏེ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཟ་ནི་, ཏུ་རུ་ ཡོ་ཀ་ནེ་ མི་ཚོག་པེ་ ཏེ་ ནེ་ཚུལ་རྦོ་ ཀང་ལུང་ས་ ཁྱེད་ཤུག་རྒེ་ ཡོཏ་པེན་། 18 ཡི་ཤུའི་ ཏོ་ ཧ་ལེ་ཤེ་ ཛེད་པེ་ ཛེད་ཀན་འབོ་ ཚོར་རྡེ་ མི་ ཡེ་རུ་ཤ་ལེམ་ནི་ ཁོང་ལ་ ཐུག་རྒེ་ལ་ ཡོྃ་། 19 པ་རུ་ཤི་པ་རྒུ་ནི་ ཅིག་ ཏང་ ཅིག་ལ་ ཟེར་, “ཨ་ཧོའེ་ ཅི་ ཅོ་ན་ ཅང་ ཕན་ནེ་མི་འདུག་། ལྟོའེ་རྡང་ མི་ ཚང་མ་ ཁོའེ་ ལྟིང་འགྲྃ་ནི་ ཆ་ལ་།”

ཡི་ཤུའི་ ཁོང་ ཀྲོང་ཤེའོ་ ལུང་རྟན་ ཛེད་།

20 ཏ་ ཏུའི་ཤེན་ནེ་ ཏུའི་ ཀོན་འཇོག་ལ་ ཅོལ་ལེ་ ཡོང་ཀན་རྒུ་ནི་ ཕྲོ་ འགི་རིག་པ་རྒུན་ ཁ་ཅིག་ལ་ ཡོད་པེན་། 21 འགཱ་ལིལ་ལེ་ ཡུལ་ཞོང་ འབེད་སེ་འདཱ་ནི་ འིན་ཀན་རྒུན་, ཕི་ལིབ་ས་ ཡོྃ་རྡེ་ ཁོ་ ཞུ་ཝ་ པུལ་, “སྤོན་འབོ་ལེ་, ང་ཞ་རྒུན་ལ་ ཡི་ཤུ་ འཇལ་ ཉིན་རག་།” 22 ཕི་ལིབ་ ཨན་འགྲིརུ་ ཤེད་རྡེ་ལ་ སོང་, ཡང་ ཁོང་ ཉ་ཧ་ སོང་འདེ་ ཡི་ཤུ་ ཤེད་།

23 ཡི་ཤུའི་ ལེན་སལ་, “མི་རིག་རྒེ་པུ་ལ་ ཀོན་འཇོག་རྒེ་ ཆོག་ནི་ སྤལ་ ཐོབ་ཅེ་ ཏུའི་ ལེཔ་ ཚར་། 24 ངེ་ ཁྱི་ཞ་ ཏེན་ ཏེན་ ཟེ་འིན་, ནམ་ཚུག་པ་ ཀྲོའེ་ ས་ངོན་ ས་ཀྱེཏ་རྡེ་ན་ ཀྲུལ་རྡེ་ ཤི་ མི་ཤི་ ཏོ་ ཀྲོ་ ཅིག་ལ་ ལུའི་རྡེ་ནོག་, འིན་ན་ ཤི་རྡེ་ ལྟིང་ནི་ མིན་འདེ་ ཏོ་ལ་ འབྲེ་རྦུ་ མང་པོ་ ཆག་རྡེ་ནོག་། 25 ངེ་སང་ མང་ངེ་ རང་ངེ་ སྲོག་ལ་ ཡ་ཤ་ ཅོ་ཀན་རྒུ་ནི་ ཏོ་ རྐྱལ་ལེན་, འིན་ན་ འི་ འཇིག་རྟེན་ནེ་ན་ རང་ངེ་ སྲོག་རྒེ་སང་ མང་ངེ་ ང་ ཡ་ཤ་ ཅོ་ཀན་རྒུ་ནི་ ཁོང་ངེ་ སྲོག་པོ་ ཐ་མེད་པེ་ མི་ཙེ་ཕི་ རྐྱོབ་རྦེན་། 26 ང་ ཞབ་རྟོག་ ཞུ་ཀན་རྒུན་ ངེ་ རྒྱབ་ནི་ འགྲང་རྒོའེ་, ང་ས་ ངེ་ ཡོག་པོ་རྒུ་ནི་ལ་ འདེད་རྡེན་། ང་ ཞབ་རྟོག་ ཞུ་ཀན་རྒུན་ལ་ ངེ་ རྡེ་བ་ཅན་ལ་ ཞུ་ཧ་ནེ་ ཡབ་རྦེ་ལ་ སི་ཝ་ ཛེད་རྡེན་།”

27 “ཏ་ ངེ་ སེམ་ལ་ མ་མང་པོ་ ནག་ རག་། ཏེ་ནི་ ཅི་ ངེ་ ཟེ་རེ་, ‘ཀྱེ་ ངེ་ ཡབ་, ཏ་ ང་ འི་ རྡུ་ངལ་ལེ་ ཏུའི་རྦོ་ནི་ རྐྱོབ་རྦེ་ཛེད་?’ མ་ནི་ མི་ཟེར་ ཅེ་ཟེར་ནི་ ང་ འེ་རྒ་ རྒྱུ་ཚན་འབེ་ཕི་ ཡོྃ་རྡེ་ འིན་། 28 ཀྱེ་ ཡབ་, ཉེ་རང་ངེ་ ཚན་ལ་ སྤལ་ ཐོབ་ཅུག་རྒེ་ ཛེད་།”

ཏེ་ནི་ ནམ་ཀ་ནི་ སུང་ཧད་ཅིག་ ཚོར་, “ངེ་ སྤལ་ ཏྃ་རྡེ་ འིན་, ཏ་རུང་ངེ་ སྤལ་ ཏང་ངེན་།” 29 ཏུ་རུ་ ཡོ་ཀན་ མི་ཚོག་ སུང་ཧད་ ཚོར་ཧན་རྒུ་ནི་ འབྲུག་ཧད་ རག་ ཟེར་, ཡང་ ཁ་ཅིག་རྒེ་, “ཕོ་ཉེ་ ཁོང་ལ་ ཞལ་ཏ་ སལ་རྡེ་ ནོག་” ཟེར་།

30 ཡི་ཤུའི་ མོལ་, “འི་ སུང་ཧད་པོ་ ཁྱི་ཞ་རྒུ་ནི་ ཕན་ཏོག་རྡེ་ཕི་ འིན་, ངེ་ཕི་ མན་། 31 ཏ་ འི་ འཇིག་རྟེན་པ་རྒུན་ལ་ ཁྲིམ་ཅེད་ཅེ་ ཏུའི་ ལེབ་ཏེ་ འིན་, འི་ འཇིག་རྟེན་ནེ་ ཏེཏ་པ་ མེ་ཀན་རྒུ་ནི་ ཝང་སྲུལ་པ་ རྡུད་, ཕི་ལོག་ལ་ ཕིང་ངེ་ ཛེད་རྡེན་། 32 ཡང་ ང་ ལྟག་ལ་ ཏག་ཟ་ནི་ ངེ་ མི་ཚང་མེ་ སེམ་ ང་རང་ ཆོག་ལ་ ཁྱོང་ངེན་།” 33 ཡི་ཤུའི་ ཏུ་ཟུག་ མོལ་རྡེ་ ཁོང་ ཀྲོྃ་ཚུལ་རྦོ་ ངོན་ཅུག་རྒེ་ ཛེད་།

34 མི་ཚོག་རྒེ་ ཟེར་, “ང་ཞི་ ཏམ་པེ་ སུང་རབ་རྦེ་ ནང་ནི་ འདམ་མེ་ ཛེད་ཀ་ནེ་ མ་ཤི་ཀ་ ཏུའི་རྒྱུན་ ཞུའིན་ ཟེར་རྡེ་ ཚོར་། ཏེ་ནི་ ཉེ་རང་ངེ་ ཀ་ཟུག་ལ་ མོལ་ལེན་, ‘མི་རིག་རྒེ་པུ་ ཐོན་པོ་ ཏག་རྒོའེ་?’ འི་ མི་རིག་རྒེ་པུ་ སུ་ ནོག་?”

35 ཡི་ཤུའི་ མོལ་, “ངེ་ འོད་པོ་ ཁྱི་ཞ་རྒུན་ ཉམ་པོ་ ཏུའི་ ཉུང་ཙེ་ཞིག་རྒེ་ཕི་ ལུའི་རྡེན་། མུན་ཀྲག་རྒེ་ ཁྱི་ཞ་རྒུ་ནི་ཀ་ ཝང་ མི་སྲུལ་ཅེ་ཕི་ ཏེ་ འོད་ ཡོད་ཡོད་པོ་ ཏེ་ན་ འགྲུལ་ཧེ་། མུན་ཀྲག་རྒེ་ན་ འགྲུལ་ཧན་རྒུན་ལ་ ཀ་རུ་ ཆ་ཅེན་ ཅང་ རྒྱུའི་ མེ་ཀག་། 36 ཁྱི་ཞ་རྒུན་ ཉམ་པོ་ འོད་ ཡོད་རྡེ་ ཏུའི་ལ་ ཁྱི་ཞ་རྒུན་ ཏེ་ འོད་རྡེ་ ཕྲུ་རྒུ་ འགྱུར་ཤེ་ཕི་ ཏེ་ འོད་པེ་ཀ་ ཏེཏ་པ་ ཅོ་རྒོའེ་།” ཏོ་ མོལ་རྡེ་ ལྟིང་ནི་ ཡི་ཤུ་ ཏེ་ཀ་ནི་ འབིང་འདེ་ རྐྱོད་ ཡང་ ཁོང་རྒུ་ནི་ ཡིབ་རྦེ་ ཛེད་།

མི་རྒུ་ནི་ ཏ་རུང་ང་ ཏེཏ་པ་ མ་ཅོའེ་།

37 ཡི་ཤུའི་ ཧ་ལེ་ཤེ་ ལྟའ་རྒུན་ ལྟན་འདེ་ལ་ མི་ མང་ཆེ་ ཁོང་ངེ་ཀ་ ཏེཏ་པ་ མ་ཅོའེ་། 38 འི་རྦོ་ ལུང་རྟོན་པ་ ཡེ་ཤ་ཡཱ་ མོལ་ཧན་འབོ་ འདྲན་འདྲ་ ཀྲུཔ་ཏེ་ འིན་,

“ཉེ་རང་ངེ་ ཤུག་ཤེན་ ཆག་ལེ་རྒུན་ ངོན་ཅུག་ཏེ་ལ་,

ཙོབོ་ལེ་, སུའི་ ཨ་ཧེ་ ཁྲིན་འབོ་ལ་ རྡེན་ཆེ་ཤེ་ ཅོའེ་?”

39 ཏེ་རྒ་ རྒྱུ་ཚན་འབེ་ཕི་ ཁོང་རྒུ་ནི་ ཏེཏ་པ་ མ་ཅོའེ་། ཏམ་པེ་ སུང་རབ་རྦེ་ ཡང་ ཁག་ཅིག་རྒེ་ཀ་ ལུང་རྟོན་པ་ ཡེ་ཤ་ཡཱེ་ མོལ་རྡེ་ འདུག་,

40 “ཁོང་ངེ་ ཁོང་རྒུ་ནི་ མིག་རྒུན་ ཞ་ར་ རྡང་

ཉིང་རྒུན་ ཀྱོང་པོ་ ཅོའོ་ ཛེད་ཅེ་ཀ་ནི་།

ཁོང་རྒུ་ནི་ མིག་ནི་ མི་ཐོང་

ཡང་ ཉིང་རྒུན་ལ་ ཧ་ཀོ་ མི་ཉེན་,

ཏེ་མ་ནི་ ཁོང་རྒུ་ནི་ རྡིག་པ་ ཕྃ་རྡེ་ སེམ་འགྱུར་རྡེ་

ངེ་ ཁོང་རྒུན་ལ་ ཕན་ཅུག་ཏེ་ ཡོད་ཁྲོ་།”

41 ལུང་རྟོན་པ་ ཡེ་ཤ་ཡཱེ་ ཡི་ཤུའི་ སྤལ་རྦོ་ ཐོང་ཅེ་ཀ་ནི་, ཁོང་ངེ་ ཧོར་ལ་ ཏོ་རྒུན་ མོལ་རྡེ་ འིན་འབེན་།

42 ཏེ་ཏུའི་ལ་ མི་ མང་པོ་ཞིག་རྒེ་ ཀ་རྦེ་ ཕྲོ་ ཡ་ཧུ་འདཱ་པེ་ འུ་རྐྱོང་ མང་པོ་ཞིག་ལ་ ཡི་ཤུའི་ཀ་ ཏེཏ་པ་ ཅོའེ་། འིན་ན་ སུ་ལ་ མ་ཤེད་, ཅེ་ཟེར་ནི་ པ་རུ་ཤི་པ་རྒུ་ནི་ ཁོང་རྒུན་ ཆོའེ་ཚོག་རྒེ་ ཕྲོ་ནི་ ཕིང་ ཏང་ངེ་ནོག་ སམ་འདེ་ འཇིའི་རྡེ་ཡོད་པེན་། 43 ཁོང་རྒུ་ནི་ ཀོན་འཇོག་རྒེ་ རྟོད་པེ་སང་ མི་ཚོག་རྒེ་ རྟོད་པ་རྦོ་ རིན་ཆེ་ ཚོར་རེ་ཡོད་པེན་།

44 ཏེ་ནི་ ཡི་ཤུའི་ ཧད་ཅེན་ ཏྃ་རྡེ་ མོལ་, “ང་ ཏེཏ་པ་ ཅོ་ཀན་རྒུ་ནི་ ང་ ཅིག་པོ་ མན་ ང་ ཀ་ལེ་ ཛེད་ཀན་འབོ་ལ་ ཏེཏ་པ་ ཅོ་ནོག་། 45 ཡང་ ང་ ཐོང་ཀན་རྒུ་ནི་ ང་ ཀ་ལེ་ ཛེད་ཀ་ནེ་ ཡབ་ འཇལ་རྡེ་ འི་ནོག་། 46 ངེ་ཀ་ ཏེཏ་པ་ ཅོ་ཀན་རྒུན་ མུན་ཀྲག་རྒེ་ན་ མི་ལུའི་ཤེ་ཕི་ ང་ འཇིག་རྟེན་ནེ་ན་ འོད་རྡེ་ ཚུལ་ལ་ ཡོྃ་རྡེ་ འིན་།”

47 “ངེ་ སྤེ་ར་རྒུན་ ཉེན་འདེ་ ལག་ལེན་ མ་ཅོ་ཀན་རྒུན་ལ་ ངེ་ རྐྱོན་ མི་ཀལ་, ཅི་ཟེར་ནི་ ང་ འཇིག་རྟེན་པ་རྒུན་ལ་ རྐྱོན་ ཀ་ལེ་ མེད་པེ་ ཐར་པ་ ཏང་ངེ་ལ་ ཡོྃ་རྡེ་ འིན་། 48 ང་ ཕྃ་རྡེ་ ངེ་ སྤེ་ར་རྒུན་ མ་ཉེན་ཀན་ ཚང་མ་ ངེ་ ཟེར་ཧན་ ཏེ་རྒ་ སྤེ་ར་རྒུ་ནི་ ཐ་མེ་ ཞག་ལ་ ཁོང་རྒུན་ལ་ ཤའ་ ཅེད་རྡེན་། 49 ངེ་ ང་རང་ངེ་ ཝང་ངེ་ན་ ཟེ་མེད་། འིན་ན་ ང་ ཀ་ལེ་ ཛེད་ཀན་ རྡེ་བ་ཅན་ནེ་ ཞུ་ཧ་ནེ་ ཡབ་རྦེ་ ང་ ཅི་ ཟེར་ཤེ་ རྡང་ ཀ་ཟུག་རྒེ་ ཟེར་ཤེ་ལ་ ཀཱ་ སལ་ལེ་ ཛེད་ཏེ་ འིན་། 50 ཁོང་ངེ་ ཀཱེ་ ཐ་མེད་པེ་ མི་ཙེ་ན་ ཁྲིད་རྡེ་ ཛད་ཅེ་རྦོ་ ངེ་ ཤེ་རྡེ་ཡོད་། ཏེ་རྒ་རྦེ་ཕི་ ངེ་ ཡབ་རྦེ་ ང་ ཟེར་ཤེ་ ཀཱ་ སལ་ཧན་འབོ་ ངེ་ ཟེ་འིན་།”