ཡོ་ཧཱ་ནན་ 11

ལ་ཟར་རེ་ སོན་པོ་ ལང་ངེ་ ཛེད་།

ཏ་ ལ་ཟར་ ཟེར་ཧ་ནེ་ མི་ཞིག་ལ་ ཟུར་མོ་ ཡོྃ་རྡེ་ ཡོད་པེན་། ཁོ་, ཁོའེ་ ཨ་ཅེ་ མར་ཡམ་ འདང་ མར་ཐཱ་རྒུན་ འབེད་ཐཱ་ནི་ ཀྲོང་ཁྱེར་ནི་ འིན་འབེན་། 2 མར་ཡམ་ ཏེ་རྒ་ པོ་མོ་ ནོག་, ཀ་རྦེ་ ལྟིང་ནི་ ཙོབོ་ ཡི་ཤུའི་ ཞབ་ལ་ ཏྲི་ཞིམ་ ལུག་ཏེ་ ཁོ་རང་ངེ་ སྲ་ ཉམ་པོ་ ཕི་། ཁོའེ་ མིང་པོ་ ལ་ཟར་ལ་ ཟུར་མོ་ ཡོད་པེན་། 3 ཏོ་རྦེ་ཕི་ སྲིང་མོ་ ཉ་ཧེ་, “ཙོབོ་ལེ་, ཉེ་རང་ངེ་ ཤེ་སྤ་ ཛེད་ཀ་ནེ་ ལ་ཟར་ལ་ ཟུར་མོ་ ཧོཔ་ འདུག་” ཟེར་རྡེ་ ཡི་ཤུ་ ཞུ་ཁྲིན་ ཀལ་།

4 ཡི་ཤུའི་ ཏོ་ ཚོར་རེ་རྡང་ མོལ་, “འི་ ཟུར་མོ་ ཁོ་ ཤི་ཅུག་ཅེ་ལ་ མག་། ཡུ་རྦོ་ ཀོན་འཇོག་རྒེ་ སྤལ་ལེ་ཕི་ ནོག་, ཀའོ་ རྒྱུད་ཏེ་ ཁོང་ངེ་ སྲེ་ལ་ སྤལ་ ཐོབ་རྦེན་།” 5 ཡི་ཤུའི་ མར་ཐཱ་, ཁོའེ་ ནོ་མོ་ མར་ཡམ་ འདང་ ལ་ཟར་ལ་ ཤེ་སྤ་ ཛེ་རྡེ་ཡོད་པེན་། 6 ལ་ཟར་ལ་ ཟུར་མོ་ ཡོ་ཀ་ནེ་ ནེ་ཚུལ་ ཚོར་རྡེ་ ཁོང་ མ་རྐྱོད་, ཏེ་རྒ་རུ་ ཡང་ ཞག་ ཉི་ ཞུའུ་།

7 ཏེ་ ལྟིང་ནི་ ཁོང་ངེ་ ལོབ་ཀྲུག་རྒུན་ལ་ མོལ་, “ཨ་ཧོ་ ལོག་ཏེ་ ཡ་ཧུ་འདཱ་ ཆེན་།”

8 འིན་ན་ ལོབ་ཀྲུག་རྒུ་ནི་ ཟེར་, “ལོབ་རྦོན་ལེ་, ཞག་ ཁ་ཅིག་རྒེ་ ངུལ་ལ་ ཡ་ཧུ་འདཱ་པ་ འུ་རྐྱོང་རྒུ་ནི་ ཉེ་རང་ལ་ རྡོ་ རྒྱབ་ཏེ་ སེད་ཅེ་ ཅོའེ་, ཏེ་ནི་ ཉེ་རང་ ཏུ་རུ་ རྐྱོད་རྡེ་ཡོད་རྡེ་?”

9 ཡི་ཤུའི་ ལེན་སལ་, “ཉི་མེ་ ཆུ་ཙོད་ ཅུག་ཉི་རྦོ་ འོད་ མེ་ཀག་རྒེ་? ཉི་མེ་ འོད་རྡེ་ན་ འགྲུལ་ཧན་རྒུན་ རྒག་ ཕུག་ཏེ་ འགྱེལ་ལེ་ མག་ ཅེ་ཟེར་ནི་ འཇིག་རྟེན་ནེ་ཀ་ ཕོག་ཀ་ནེ་ འོད་རྡེ་ ཁོང་ལ་ ཐོང་ ཉེན་ནེ་ནོག་། 10 འིན་ན་ ཚེན་ནེ་ མུན་ཀྲག་རྒེ་ན་ འགྲུལ་ཟ་ནི་ ཁོ་ རྒག་ ཕུག་ཏེ་ འགྱེལ་ལེ་ནོག་, ཅེ་ཟེར་ནི་ འོད་ མེད་ཏེ་ ནོག་།”

11 ཏུ་ཟུག་ མོལ་རྡེ་ ལྟིང་ནི་, ཡི་ཤུའི་ ཁོང་རྒུན་ལ་ མོལ་, “ཨ་ཧོ་རྒུ་ནི་ ཡ་ཏོ་ ལ་ཟར་ ཉིད་ལ་ སོང་འདེ་ ནོག་, འིན་ན་ ང་ ཏུ་རུ་ ཁོ་ ཉིད་ཚེད་རྡེ་ལ་ ཆ་ཡོད་།”

12 ལོབ་ཀྲུག་རྒུ་ནི་ ཡི་ཤུ་ ཟེར་, “ཙོབོ་ལེ་, ཀལ་ཏེ་ ཁོ་ ཉིད་ལ་ སོང་འདེ་ ཡོད་ནི་ ཁོ་ རྒྱ་ལེ་ ནོག་།” 13 ཡི་ཤུའི་ ཁོ་ ཤི་རྡེ་ ནོག་ མོལ་རྡེ་ འིན་འབེན་, འིན་ན་ ཁོང་ངེ་ ལོབ་ཀྲུག་རྒུ་ནི་ ཁོ་ རྡེན་འབེ་ ཉིད་ལ་ སོང་འདེ་ འིན་ཀག་ སམ་།

14 ཡི་ཤུའི་ ཁོང་རྒུན་ལ་ སལ་སྤོ་ ཤེད་རྡེ་ ཛེད་, “ལ་ཟར་ ཤི་རྡེ་ ནོག་, 15 འིན་ན་ ཁྱི་ཞ་རྒུ་ནི་ ཕན་ཏོག་རྡེ་ཕི་ ཁོ་ ཤི་ཟ་ནི་ ང་ ཁོ་ ཉམ་པོ་ ཏུ་རུ་ མེད་པེ་ མ་ ཐེད་པོ་ རག་ ཅེ་ཟེར་ནི་ ཏེ་ནི་ ཁྱི་ཞི་ རྡེན་འབའ་ ཏེཏ་པ་ ཅོའེན་། ཏ་ ཨ་ཧོ་རྒུན་ ཁོ་ས་ ཆེན་།”

16 ཐོ་མཱེ་ ཀ་འབོ་ལ་ ཚག་ཀྲུག་ལ་ ཟེ་ཡོད་པེན་ ཞེན་མ་ ལོབ་ཀྲུག་རྒུན་ལ་ ཟེར་, “ཤོག་ཧེ་ ཨ་ཧོ་རྒུ་ནི་ལ་, ཨ་ཧོའེ་ ལོབ་རྦོན་ ཉམ་པོ་ ཤི་ལ་ ཆེན་།”

ཐ་མེད་པེ་ མི་ཙེ་ ཡི་ཤུ་ནི་ ཐོབ་རྦེན་།

17 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ འབེད་ཐཱ་ནི་ ཀྲོང་ཁྱེར་རེ་ ཉེ་མོ་ལ་ ལེབ་རྦེ་རྡང་, ལ་ཟར་རེ་ སྤུར་ སྤུར་ཧང་ངེ་ན་ པོར་རྡེ་ ཞག་ ཞི་ སོང་ཀན་འབོ་ ཡི་ཤུ་ རྒྱུའི་ རྐྱོད་། 18 འབེད་ཐཱ་ནི་ ཀྲོང་ཁྱེར་, ཡེ་རུ་ཤ་ལེམ་ལ་ ཀྱེ་ལོ་མི་ཀྲར་ སུམ་མེ་ ཐག་རིང་ལ་ ཡོད་ཏེ་ འིན་འབེན་། 19 ཡང་ ཡ་ཧུ་འདཱ་པ་ མང་པོ་ཞིག་ མར་ཐཱ་ རྡང་ མར་ཡམ་མེ་ མིང་པོ་ ཤི་ཅེ་རྦེ་ ཁོང་ལ་ སེམ་སོ་ ཏང་ཅེ་ལ་ ཡོྃ་རྡེ་ ཡོད་པེན་། 20 མར་ཐཱེ་ ཡི་ཤུ་ རྐྱོད་ཏུག་ ཟེར་རྡེ་ ཚོར་རེ་རྡང་, ཡི་ཤུ་ འཇལ་ལེ་ལ་ ཕི་ཏ་ལ་ སོང་, འིན་ན་ མར་ཡམ་ ཁང་པེ་ན་ འདེད་།

21 མར་ཐཱེ་ ཡི་ཤུ་ ཟེར་, “ཙོབོ་ལེ་, ཀལ་ཏེ་ ཉེ་རང་ འེ་ཀ་ ཡོད་པེ་ནི་ ངེ་ ནོ་ མ་ཤི་ ཡོད་ཁྲོ་། 22 འིན་ན་ ང་ རྒྱུའི་ཡོད་, ཉེ་རང་ངེ་ ཅི་ཞིག་ ཀོན་འཇོག་ལ་ ཞུ་ན་ ཁོང་ངེ་ སལ་ལེ་ ཛེ་རྡེ་ནོག་།”

23 ཡི་ཤུའི་ ཁོ་ མོལ་, “ཁྱེ་རང་ངེ་ ནོ་ ཡང་ སོན་པོ་ ལང་ངེན་།”

24 མར་ཐཱེ་ ལེན་ཏྃ་, “ང་ རྒྱུའི་ཡོད་ལེ་, ཐ་མེ་ ཞག་ལ་ ཤི་ཀན་རྒུན་ སོན་པོ་ ལང་ངེ་ ཏུའི་ལ་, ཁོ་ལ་ སོན་པོ་ ལང་ངེན་།”

25 ཡི་ཤུའི་ ཁོ་ མོལ་, “ང་ནི་ ཤི་ཀན་རྒུན་ སོན་པོ་ ལང་ཀན་ འདང་ ཐ་མེད་པེ་ མི་ཙེ་ ཏང་ཀན་འབོ་ འིན་། ངེ་ཀ་ ཏེཏ་པ་ ཅོ་ཀན་རྒུན་ ཤི་རྡེ་ལ་ སོན་པོ་ ལུའི་རྡེན་, 26 ཡང་ ངེ་ཀ་ ཏེཏ་པ་ ཅོའེ་རྡེ་ སོན་པོ་ ཡོ་ཀན་རྒུན་ མ་ནི་ མི་ཤི་། ཁྱེ་རང་ངེ་ ཏོ་ལ་ རྡེན་ཆེ་ཤེ་ ཅོ་ཡོད་རྡེ་?”

27 མར་ཐཱེ་ ཟེར་, “འོ་ནེ་ ཙོབོ་ལེ་, ངེ་ ཏེཏ་པ་ ཅོའེན་, ཉེ་རང་ འདམ་མེ་ ཛེད་ཀ་ནེ་ མ་ཤི་ཀ་, ཀོན་འཇོག་རྒེ་ སྲེ་ འི་ འཇིག་རྟེན་ལ་ རྐྱོད་ཀན་འབོ་ ནོག་།”

28 ཏོ་ ཟེར་རྡེ་ ལྟིང་ནི་ ཁོ་ ལོག་ཏེ་ སོང་, ཡང་ མར་ཡམ་ སོ་སོ་ལ་ འབོའེ་རྡེ་, “ལོབ་རྦོན་ འི་རུ་ རྐྱོད་ཏེ་ ཁྱེ་རང་ལ་ འབོ་ ཛེད་ཏུག་” ཟེར་། 29 ཏོ་ ཚོར་རེ་རྡང་, མར་ཡམ་ ཀོའག་ ལྃ་ ཡང་ རྒྱུག་ཏེ་ ཡི་ཤུ་ས་ སོང་། 30 ཡི་ཤུ་ ཏ་རུང་ ཡུལ་ལེ་ན་ མ་ལེ་རྦེ་ལ་ ཏེ་རྒ་ མལ་རྦེ་ཀ་ ཞུ་རྡེ་ ཡོད་པེན་, ཀ་རུ་ མར་ཐཱ་ ཁོང་ལ་ ཐུག་རྒེ་ལ་ ཡོྃ་། 31 ཁང་པེ་ན་ མར་ཡམ་ལ་ སེམ་སོ་ ཏང་ངེ་ འདེད་ཏེ་ ཡོ་ཀན་རྒུ་ནི་ མར་ཡམ་ ཀོའག་ ལྃ་རྡེ་ ཕི་ལོག་ལ་ ཆ་ ཐོང་རྦེ་, ཁོང་རྒུ་ནི་ལ་ ལྃ་རྡེ་ ཁོའེ་ ལྟིང་འགྲྃ་ནི་ སོང་, ཅེ་ཟེར་ནི་ ཁོང་རྒུ་ནི་ མར་ཡམ་ སྤུར་ཧང་ལ་ ངུ་ལ་ སོང་འདེ་ ནོག་ སམ་།

32 མར་ཡམ་ ཡི་ཤུ་ ཞུ་རྡེ་ ཡོད་ས་ ལེབ་རྦེ་རྡང་, ཡི་ཤུ་ ཐོང་འདེ་ ཁོང་ངེ་ ཞབ་རྦེ་ འདུན་ལ་ འགྱེལ་རྡེ་ ཟེར་, “ཙོབོ་ལེ་, ཀལ་ཏེ་ ཉེ་རང་ འི་རུ་ ཞུ་རྡེ་ ཡོད་པེ་ནི་ ངེ་ ནོ་ མ་ཤི་ལ་ ཡོད་ཁྲོ་།”

33 ཡི་ཤུའི་ མར་ཡམ་ འདང་ ཁོ་ ཉམ་པོ་ ཡོ་ཀ་ནེ་ ཡ་ཧུ་འདཱ་པ་རྒུན་ ངུ་ལ་ ཟི་རྡེ་ ཉིང་ངེ་ ཐིལ་ནི་ ཐུག་རྐྱོ་མོ་ རྐྱོད་ 34 ཡང་ ཁོང་རྒུན་ལ་, “ལ་ཟར་ ཀ་རུ་ པོར་རྡེ་ ཡོད་” མོལ་།

ཁོང་རྒུ་ནི་ ཟེར་, “ཙོབོ་ལེ་, རྐྱོད་ཏེ་ ཟི་རྡང་།”

35 ཡི་ཤུ་ ཤུམ་མེ་ ཛེད་།

36 ཏེ་ནི་ ཡ་ཧུ་འདཱ་པ་རྒུ་ནི་ ཟེར་, “ལྟོའེ་རྡང་, ཁོང་ངེ་ ལ་ཟར་ལ་ ཙམ་ཤིག་ ཤེ་སྤ་ ཅོའོ་ ཛེད་ཏུག་།”

37 འིན་ན་ ཏེ་ ཕྲོ་ནི་ ཁ་ཅིག་རྒེ་ ཟེར་, “ཁོང་ངེ་ ཞ་ར་ ཐོང་ཅུག་ཏུག་, ཅི་ ལ་ཟར་ ཤི་ཅེ་ནེ་ རྐྱོབ་ མི་ཉེན་ནེ་?”

ཡི་ཤུའི་ ལ་ཟར་ སོན་པོ་ ལང་ངེ་ ཛེད་།

38 ཡི་ཤུ་ ཉིང་ངེ་ ཐིལ་ནི་ ཐུག་རྐྱོ་མོ་ རྐྱོད་ཏེ་ སྤུར་ཧང་ལ་ རྐྱོད་། ཏོ་ འབའ་ཝོ་ཞིག་ འིན་འབེན་། ཏེ་ ཁེ་ཀ་ རྡོ་ ཆོན་མོ་ཞིག་ ཀབ་ཏེ་ ཡོད་པེན་། 39 ཡི་ཤུའི་, “ཁེ་རྡོ་རྦོ་ ཐེན་” མོལ་།

ཤི་ཀན་འབེ་ སྲིང་མོ་ མར་ཐཱེ་ ཡི་ཤུ་ ཟེར་, “ཙོབོ་ལེ་, ཁོའེ་ སྤུར་རྦོ་ ཏོ་ན་ པོར་རྡེ་ ཞག་ ཞི་ སོང་, ཏྲི་མ་ སོག་པོ་ ཡོྃ་རྡེ་ ཡོད་ཁྲོ་།”

40 ཡི་ཤུའི་ མོལ་, “ངེ་ ཟེ་རེ་ མེ་རག་རྒེ་? ཀལ་ཏེ་ ཏེཏ་པ་ ཅོ་ནི་ ཀོན་འཇོག་རྒེ་ སྤལ་ ཁྱེ་རང་ལ་ ཐོང་ངེན་།”

41 ཏེ་ནི་ ཁོང་རྒུ་ནི་ ཁེ་རྡོ་རྦོ་ ཐ་མ་ རིལ་ ཡང་ ཡི་ཤུའི་ ནམ་ཀ་ ཟི་རྡེ་ མོལ་, “ཀྱེ་ ངེ་ ཡབ་, ང་ ཉེན་ནེ་ ཛེད་ཏེ་ ངེ་ ཉེ་རང་ལ་ ཐུག་ཞེ་ཆེ་ ཞུ་འིན་། 42 ཉེ་རང་ངེ་ ཏུའི་རྒྱུན་ ང་ ཉེན་ནེ་ ཛེད་ཀན་འབོ་ ང་ རྒྱུའི་ཡོད་, འིན་ན་ ང་ ཁོར་རྡེ་ ཡོ་ཀན་རྒུ་ནི་ ཉེ་རང་ངེ་ ང་ ཀ་ལེ་ ཛེད་ཀན་འབོ་ ཏེཏ་པ་ ཅོའེ་རྡེ་ ཕན་ཏོག་ ཐོབ་ཅེ་ལ་, ངེ་ འེ་རྒ་རྦོ་ ཟེ་འིན་།”

43 ཏོ་ མོལ་རྡེ་ ལྟིང་ནི་ ཡི་ཤུའི་ ཤེད་ཏང་ མོལ་, “ལ་ཟར་ ཕི་ལོག་ལ་ འབིང་འདེ་ ཤོག་།” 44 ཡང་ ཤི་ཀ་ནེ་ མིའུ་ འབིང་འདེ་ ཡོང་, ཁོའེ་ ཧང་ལག་ ཚང་མ་ རོ་རེ་ ཉམ་པོ་ སྲིལ་རྡེ་ ཡང་ འགོ་ལ་ རེ་ཞིག་ ཧོན་འདེ་ ཡོད་པེན་།

ཡི་ཤུའི་ ཁོང་རྒུན་ལ་ མོལ་, “སྲིལ་ཧན་འབོ་ ཀྲོལ་རྡེ་ ཁོ་ ཆ་ཅུག་།”

ཡི་ཤུ་ སེད་ཅེ་ ཀྲཔ་ ཅོའེ་།

45 མར་ཡམ་ལ་ ཐུག་རྒེ་ ཡོྃ་རྡེ་ ཡོ་ཀ་ནེ་ ཡ་ཧུ་འདཱ་པ་ མང་པེ་ ཡི་ཤུའི་ ཛེད་ཀན་འབོ་ ཐོང་འདེ་ ཁོང་ངེ་ཀ་ ཏེཏ་པ་ ཅོའེ་། 46 འིན་ན་ ཁ་ཅིག་ པ་རུ་ཤི་པ་རྒུ་ནི་ཀ་ སོང་འདེ་ ཡི་ཤུའི་ ཛེད་ཀན་འབོ་ ཁོང་རྒུན་ལ་ ཤེད་།

47 ཏེ་ནི་ ལ་མ་ འུ་རྐྱོང་རྒུན་ འདང་ པ་རུ་ཤི་པ་རྒུ་ནི་ ཡ་ཧུ་འདཱ་པེ་ ཚོག་འདུའི་ ཐུའི་མི་རྒུན་ ཛོམ་ཅེ་ལ་ འབོའེ་རྡེ་ ཀྲཔ་ ཅོའེ་, “ཨ་ཧོ་རྒུ་ནི་ ཅི་ ཅོའེན་? འི་ མི་རྦེ་ ཧ་ལེ་ཤེ་ ལྟའ་ མང་པོ་ ལྟན་འདུག་། 48 ཀལ་ཏེ་ ཨ་ཧོ་རྒུ་ནི་ ཁོ་ འེ་རྒ་ ཟུག་རྒེ་ པུད་ཏང་ནི་ ཚང་མེ་ ཁོའེ་ཀ་ ཏེཏ་པ་ ཅོའེན་། ཏེ་ནི་ རོམ་པ་ མག་མི་རྒུན་ ཡོྃ་རྡེ་ ཨ་ཧོའེ་ ཀོན་འཇོག་རྒེ་ ཁང་པ་ འདང་ ཨ་ཧོའེ་ རྒྱལ་ཁབ་པོ་ མེ་ཀན་ ཅོ་ནོག་།”

49 ཁོང་རྒུ་ནི་ ཕྲོ་ནི་ ཏེ་རྒ་ ལོའེ་ ལ་མ་ ཆོན་མོ་ འིན་ཀན་ ཀ་ཡ་ཕཱེ་ ཟེར་, “ཁྱི་ཞ་རང་རྒུན་ལ་ ཅང་ ཤེ་རྡེ་ མི་འདུག་། 50 ཁྱི་ཞ་རང་རྒུན་ལ་ ཧ་ཀོ་རྒོའེ་ ཁྱི་ཞི་ཕི་ ཨ་ཧོའེ་ རྒྱལ་ཁབ་པོ་ ཞིག་རྒེ་སང་ ཏེ་ ཏོན་ལ་ མི་ཅིག་ ཤི་ན་ མི་རྒྱལ་ལེ་?”

51 ཏེ་ སྤེ་ར་རྒུན་ ཁོའེ་ རང་ངེ་ ཆོག་ནི་ མ་ཟེ་ལ་ ཏེ་ ལོའེ་ ལ་མ་ ཆོན་མོ་ འིན་ཅེ་རྦེ་, ཁོའེ་ ཡ་ཧུ་འདཱ་པེ་ རྒྱལ་ཁབ་རྦེ་ ཏོན་ལ་ ཡི་ཤུ་ ཤི་ཅེ་ ལུང་རྟན་ ཤེད་ཏེ་ འིན་འབེན་། 52 ཡང་ ཡ་ཧུ་འདཱ་པེ་ རྒྱལ་ཁབ་ ཅིག་པོ་ མ་ཚེད་, ཡན་རྡེ་ སོང་ཀ་ནེ་ ཀོན་འཇོག་རྒེ་ མི་རྒུན་ ལོག་ཏེ་ ཁྱོྃ་རྡེ་ ཏོ་ ཉམ་པོ་ ཅིག་ འགྱུར་ཤུག་ཅེ་ཕི་ལ་ འིན་འབེན་། 53 ཏེ་རྒ་ ཞག་ནི་ཕ་ལ་ ཁོང་རྒུ་ནི་ ཡི་ཤུ་ སེད་ཅེ་ ཐབ་ ཙལ་།

54 ཏོ་རྦེ་ཕི་ ཏེ་ནི་ཕ་ལ་ ཡི་ཤུ་ ངོན་ཅུག་ཏེ་ ཡ་ཧུ་འདཱ་པ་རྒུ་ནི་ ཕྲོ་ རྐྱོད་རྡེ་ མ་ཛེད་, རི་ལྟོང་ནི་ ཉེ་མོ་ ཨེཕ་ར་ཡིམ་ ཟེར་སེ་ ཀྲོང་ཁྱེར་ལ་ རྐྱོད་ཏེ་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཞུའུ་།

55 ཡ་ཧུ་འདཱ་པེ་ པེ་སག་རྒེ་ ཏུའི་ཤེན་ ཉེ་མོ་ ལེབ་རྦེ་རྡང་, ཡུལ་ ཆོག་ ཚང་མ་ནི་ མི་ མང་པོ་ པེ་སག་ལ་ ལེབ་རྦེ་སང་ ངུལ་ལ་ སང་རེ་ ཚིར་རྒུན་ འདྲན་འདྲ་ ཅོ་ཅེ་ལ་ ཡེ་རུ་ཤ་ལེམ་མེ་ རྒྱལ་ས་ ཡོྃ་། 56 ཁོང་རྒུ་ནི་ ཡི་ཤུ་ ཙ་ལེ་ཡོད་པེན་, ཡང་ ཀོན་འཇོག་རྒེ་ ཁང་པེ་ན་ ཡོང་ཟ་ནི་ ཅིག་ ཏང་ ཅིག་ལ་ འདྲི་, “ཅི་ ས་མེ་རག་? ཁོ་ ཏུའི་ཤེན་ལ་ འི་རུ་ མི་ཡོང་ངེ་?” 57 ཏེ་རྒ་ ཏུའི་ལ་ ལ་མ་ འུ་རྐྱོང་རྒུན་ འདང་ པ་རུ་ཤི་པ་རྒུ་ནི་ ཀལ་ཏེ་ སུ་ཞིག་ལ་ ཡི་ཤུ་ འི་རུ་ ཡོ་ཀན་འབོ་ རྒྱུའི་ཆ་རྡང་ ཁྲིན་ ཁྱོང་རྒོའེ་ ཟེར་རྡེ་ ཀཱ་ ཏྃ་, ཅེ་ཟེར་ནི་ ཁོང་རྒུ་ནི་ ཡི་ཤུ་ ཟུམ་ཅེ་ འིན་འབེན་།