ཡོ་ཧཱ་ནན་ 10

རྐྱབ་འགོན་ ཡི་ཤུ་རྦོ་ ལུག་ཟི་ ཟང་པོ་།

ཡི་ཤུའི་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ལུག་རེ་ན་ རྒོ་ནི་ མ་ཡོྃ་ལ་ སིག་པེ་ཀ་ནི་ ཛག་ཏེ་ ཡོང་ཀན་རྒུན་ ཧུན་མ་ རྡང་ ཅག་པ་ ནོག་། 2 རྒོ་ནི་ ཡོང་ཀན་འབོ་ ལུག་རྒུ་ནི་ ལུག་ཟི་ ནོག་། 3 རྒོ་སྲུང་པེ་ ལུག་ཟི་ རྒོ་ པེ་ནོག་ ཡང་ ལུག་རྒུ་ནི་ ལུག་ཟི་ ཧད་ལ་ ཉེན་ནེ་ནོག་། ལུག་ཟི་ ཁོ་རང་ངེ་ ལུག་ རེ་རེ་ལ་ མིང་ འབོའེན་ ཕི་ལོག་ལ་ ཁྲིད་ཏེ་ ཁྱེ་རེ་ནོག་། 4 ཁོའེ་ རང་ངེ་ ལུག་ ཚང་མ་ ཕི་ལོག་ལ་ ཕིང་ ཚར་རེ་རྡང་, ཁོ་ ལུག་རྒུ་ནི་སང་ ངུལ་ལ་ འགྲུ་ལེན་ ཡང་ ལུག་རྒུན་ ཁོའེ་ ལྟིང་འགྲྃ་ནི་ ཡོང་ངེན་ ཅེ་ཟེར་ནི་ ཏོ་རྒུ་ནི་ ཁོའེ་ ཧད་ ངོ་ཤེ་རྡེ་ནོག་། 5 ལུག་རྒུན་ ཞེན་མ་ མི་ རྒྱབ་ནི་ མ་ཆ་ ཐག་རིང་ལ་ ཤོར་རྡེ་ ཆེན་, ཅེ་ཟེར་ནི་ ཏོ་རྒུ་ནི་ ཞེན་མ་ མི་རྦེ་ ཧད་ ངོ་ཤེ་རྡེ་ མག་།”

6 ཡི་ཤུའི་ ཡ་ཧུ་འདཱ་པེ་ འུ་རྐྱོང་རྒུན་ལ་ ཏེ་ སྤེ་རྦོ་ སལ་ལེ་ ཛེད་, འིན་ན་ ཁོང་ངེ་ ཁོང་རྒུན་ལ་ མོལ་ཧན་འབོ་ ཧ་མ་ཀོ་།

7 ཏེ་རྒ་རྦེ་ཕི་ལ་ ཡི་ཤུའི་ ཡང་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ང་ནི་ ལུག་རེ་ རྒོ་ འིན་། 8 ངེ་སང་ ངུལ་ལ་ ཡོང་ཀན་ ཚང་མ་ ཧུན་མ་ རྡང་ ཅག་པ་ འིན་འབེན་, འིན་ན་ ངེ་ ལུག་རྒུ་ནི་ ཁོང་རྒུ་ནི་ ཟེར་ཧན་རྒུན་ མ་ཉེན་། 9 ང་ནི་ རྒོ་ འིན་, ང་ རྒྱུད་ཏེ་ ལུག་རེ་ ནང་ཀུ་ལ་ ཞུ་ཧན་རྒུན་ལ་ ཐར་པ་ ཐོབ་རྦེན་། ཁོང་རྒུན་ རྒག་ཞ་ མེད་རྡེ་ ནང་ཀུ་ལ་ ཡོང་ཅེ་ རྡང་ ཕི་ལོག་ལ་ ཆེན་ ཡང་ ས་ཀ་ རྒྱ་ལ་ ཐོབ་རྦེན་། 10 ཧུན་མ་ནི་ ངེ་ ལུག་རྒུན་ ཧུ་ཅེ་, སེད་ཅེ་ རྡང་ མེ་ཀན་ ཅོ་ཅེ་ ཅིག་པེ་ཕི་ ཡོང་ངེ་ནོག་། འིན་ན་ ང་ནི་ ཏོ་རྒུན་ལ་ སོན་པོ་ མི་ཙེ་ ཚིམ་པོ་ཞིག་ ཏང་ཅེ་ལ་ ཡོྃ་རྡེ་ འིན་།”

11 “ང་ནི་ ལུག་ཟི་ ཟང་པོ་ འིན་། ལུག་ཟི་ ཟང་པེ་ ལུག་རྒུ་ནི་ཕི་ ཁོ་རང་ངེ་ སྲོག་ ཏང་ངེ་ནོག་། 12 ལུག་རྒུ་ནི་ རྡག་པོ་ ཡང་ ལུག་ཟི་ ཟང་པོ་ མན་ཀ་ནེ་ ལ་པ་, ཤང་ཀུ་ ཡོང་ངེ་ ཐོང་ངེ་རྡང་ ཁོའེ་ ལུག་རྒུན་ ཕྃ་རྡེ་ ཤོ་རེ་ནོག་། ཏེ་ནི་ ཤང་ཀུའི་ ལུག་རྒུན་ལ་ ཐར་ ཡེན་ ཅུག་ཏེ་ སེད་རྡེན་། 13 ཁོ་ ཤོར་རྡེ་ ཆ་ནོག་ ཅེ་ཟེར་ནི་ ཁོ་ ལ་པ་ཞིག་ ནོག་། ཡང་ ལུག་རྒུན་ལ་ ཅི་ཆ་ནང་ ཚེར་ཧ་ མེ་ཀག་།”

14 “ང་ནི་ ལུག་ཟི་ ཟང་པོ་ འིན་། ངེ་ ང་རང་ངེ་ ལུག་རྒུན་ ཤེ་རྡེ་ཡོད་ ཡང་ ངེ་ ལུག་རྒུ་ནི་ ང་ ཤེ་རྡེ་ནོག་། 15 ཀ་ཟུག་ ཡབ་རྦེ་ ང་ ཤེ་རྡེ་ཡོད་, ངེ་ལ་ ཡབ་ ཤེ་རྡེ་ཡོད་། ཡང་ ལུག་རྒུ་ནི་ཕི་ ངེ་ ང་རང་ངེ་ སྲོག་ ཏང་ངེན་། 16 ང་ འི་ ལུག་རེ་ ཕྲོ་ མེ་ཀ་ནེ་ ཡང་ ལུག་ རིག་ལ་ ཡོད་། ངེ་ ཏོ་རྒུ་ནི་ལ་ ཁྱོང་རྒོའེ་, ཏོ་རྒུ་ནི་ལ་ ངེ་ ཧད་ལ་ ཉེན་ནེན་, ཏེ་ནི་ ཁོང་ཏུམ་འབུ་ ཅིག་ ཏང་ ལུག་ཟི་ ཅིག་ འགྱུ་རེན་།”

17 “ངེ་ ཡབ་རྦེ་ ང་ ཤེ་སྤ་ ཛེད་ཅེ་ རྒྱུ་ཚེན་འབོ་ ངེ་ ང་རང་ངེ་ སྲོག་པོ་ ཆོད་པ་ ཏང་ཅེ་ འིན་, ཡང་ ལོག་ཏེ་ ཐོབ་ཅེ་ཕི་ ངེ་ ཏོ་རྦོ་ ཅོ་ཡོད་། 18 སུ་ཞི་ལ་ ངེ་ སྲོག་ ངེ་ཀ་ནི་ ནེན་ མི་ཉེན་, ང་ ང་རང་ ཐེད་ཏེ་ ང་ན་ སྲོག་པོ་ ཏང་ངེ་ཡོད་། ང་ ཡུ་རྦོ་ ཏང་ཅེ་ ཡང་ ལོག་ཏེ་ ནེན་ཅེ་ ཝང་ ཡོད་ ཅེ་ཟེར་ནི་ ཡབ་ ཀོན་འཇོག་རྒེ་ ང་ ཀཱ་ སལ་ལེ་ ཛེད་ཏེ་ ཡོད་།”

19 ཏུ་ཟུག་ མོལ་ཧན་འབེ་ ཅོའེ་རྡེ་ ཡ་ཧུ་འདཱ་པ་རྒུ་ནི་ན་ པོ་ པུད་། 20 ཁོང་ མང་པེ་ ཟེར་, “ཁོ་ནི་ རྡུད་ ཞུ་རྡེ་ ཉོའེ་རྡེ་ ནོག་, ཁོ་ལ་ ཅེ་ ཉེན་ནེ་ཡོད་?” 21 འིན་ན་ ཞེན་ ཁ་ཅིག་རྒེ་ ཟེར་, “འི་ སྤེ་ར་རྒུན་ རྡུད་ ཞུ་ཧན་ཞི་རྒེ་ མག་། རྡུད་རྡེ་ ཞ་ར་ མིག་ནི་ ཐོང་ཅུག་ ཉེན་ནེ་ནོག་རྒེ་? མ་ནི་ ཉེན་ནེ་ མག་།”

ཡ་ཧུ་འདཱ་པ་རྒུ་ནི་ ཡི་ཤུའི་ཀ་ ཏེཏ་པ་ མ་ཅོའེ་།

22 རྒུན་ཏུའི་ལ་ ཡེ་རུ་ཤ་ལེམ་མེ་ན་ ཀོན་འཇོག་རྒེ་ ཁང་པ་ ཀྲུཔ་ཀ་ནེ་ ཞག་ འི་ཏུ་ ཅོའེན་ ཏུའི་ཤེན་ སིག་ ཏུའི་ལ་ 23 ཡི་ཤུའི་ ཀོན་འཇོག་རྒེ་ ཁང་པེ་ན་ སོ་ལོ་མོན་ནེ་ ཡབ་རྦེ་ཀ་ནི་ འགྲུ་ལེ་ ཛེ་རྡེ་ཡོད་པེན་། 24 ཡ་ཧུ་འདཱ་པ་རྒུ་ནི་ ཁོང་ལ་ ཁོར་རྡེ་ འདེད་ ཡང་ ཟེར་, “ནམ་ཚུག་པ་ ང་ཞ་ ཐེ་ཚོམ་མེ་ན་ པོ་རེ་ཡོད་། ང་ཞ་ སལ་སྤོ་ ཤོད་རྡང་, ཁྱེ་རང་ འདམ་མེ་ ཛེད་ཀ་ནེ་ མ་ཤི་ཀ་འབོ་ འིན་ནེ་?”

25 ཡི་ཤུའི་ ལེན་སལ་, “ངེ་ ཁྱི་ཞ་ ཤེད་པེན་, འིན་ན་ ཁྱི་ཞ་ རྡེན་ཆེ་རྡེ་ མི་འདུག་། ངེ་ ང་རང་ངེ་ ཡབ་རྦེ་ ཝང་ངེ་ན་ ཅོ་ཀ་ནེ་ ཧ་ལེ་ཤེ་ ལེ་ཧ་རྒུ་ནི་ ངེ་ཕི་ སྤང་པོ་ ཏང་ངེ་ནོག་། 26 འིན་ན་ ཁྱི་ཞ་ནི་ རྡེན་ཆེ་ཤེ་ མི་འདུག་ ཅེ་ཟེར་ནི་ ཁྱི་ཞ་ ངེ་ ལུག་ མག་། 27 ངེ་ ལུག་རྒུ་ནི་ ངེ་ ཧད་ ཉེ་ནེ་ནོག་ ཡང་ ངེ་ ཁོང་རྒུན་ ཤེ་རྡེ་ཡོད་། ཁོང་རྒུན་ ངེ་ རྒྱབ་ནི་ ཡོང་ངེ་ནོག་། 28 ངེ་ ཁོང་རྒུན་ལ་ ཐ་མེད་པེ་ མི་ཙེ་ ཏང་ངེན་ ཡང་ ཁོང་རྒུན་ ཉ་ཝེ་ན་ མ་ནི་ མི་ཕང་། སུ་ཞིག་ལ་ ཁོང་རྒུན་ ངེ་ ལག་ནི་ ཀོག་ཏེ་ ཁྱེར་ མི་ཉེན་། 29 འི་ ལུག་རྒུན་ ངེ་ ལག་ལ་ ལྟེད་རྡེ་ ཛེད་ཀ་ནེ་ ངེ་ ཡབ་ ཚང་མེ་སང་ ཆེ་ཤོག་རྦོ་ ཞུ་རྡེ་ འིན་། སུ་ཞིག་ལ་ ངེ་ ཡབ་རྦེ་ ལག་ནི་ ཁོང་རྒུན་ ཀོག་ཏེ་ ཁྱེར་ མི་ཉེན་། 30 ང་ རྡང་ ཡབ་ ཉ་ཧ་ ཅིག་ འིན་།”

31 ཡང་ ཡ་ཧུ་འདཱ་པ་རྒུ་ནི་ ཁོང་ལ་ རྡོ་ རྒྱབ་ཏེ་ སེད་ཅེ་ཕི་ རྡོ་ ཁུར་། 32 འིན་ན་ ཡི་ཤུའི་ ཁོང་རྒུན་ལ་ མོལ་, “ངེ་ ང་རང་ངེ་ ཡབ་རྦེ་ ཆོག་ནི་ ཧ་ལེ་ཤེ་ ལྟའ་ མང་པོ་ ལྟན་འབེན་, ཏོ་རྒུ་ནི་ ནང་ནི་ ཀ་རྦེ་ཕི་ ང་ རྡོ་ རྒྱབ་ཏེ་ སེད་ཅེ་ ཅོ་ཡོད་?”

33 ཡ་ཧུ་འདཱ་པ་རྒུ་ནི་ ཁོང་ལ་ ཟེར་, “ང་ཞི་ ཁྱེ་རང་ངེ་ ཧ་ལེ་ཤེ་ ལྟའ་རྒུ་ནི་ཕི་ མན་, ཁྱེ་རང་ མི་ འིན་ འིན་ན་ རང་འདང་རང་ལ་ ཀོན་འཇོག་ འིན་ ཟེ་འིན་, ཀོན་འཇོག་ལ་ ཏེཏ་ལོག་ ཞུའི་ཧན་འབེ་ཕི་ རྡོ་ རྒྱབ་རྦེན་།”

34 ཡི་ཤུའི་ ལེན་སལ་, “ཁྱི་ཞ་རྒུ་ནི་ ཀཱ་ཁྲིམ་མེ་ སྤེ་ཆེ་ན་ ཀོན་འཇོག་རྒེ་ འི་ཟུག་ མོལ་ལེ་ ཛེད་ཏེ་ མི་འདུག་རྒེ་? ‘ངེ་ ཟེར་རྦེན་, ཁྱི་ཞ་ ཀོན་འཇོག་རྒུན་ འིན་།’ 35 ཀལ་ཏེ་ ཀོན་འཇོག་རྒེ་ ཀའ་ ཐོབ་ཀ་ནེ་ མི་རྒུན་ལ་ ཀོན་འཇོག་རྒུན་ མོལ་རྡེ་ཡོད་ནི་, ཡང་ ཏམ་པེ་ སུང་རབ་ མ་ནི་ འགྱུར་ མི་ཉེན་ཅེའོ་ ཁྱི་ཞ་ རྒྱུའི་ནོག་, 36 ཡབ་རྦེ་ ཁོང་ངེ་ ཆག་ལེ་ ཅོ་ཅེ་ལ་ ཧོ་ ཛེད་ཏེ་ འི་ འཇིག་རྟེན་ནེ་ན་ ཀ་ལེ་ ཛེད་ཀན་འབེ་ ཧོར་ལ་ ཅི་ མོལ་ལེན་? ངེ་ ‘ང་ ཀོན་འཇོག་རྒེ་ པུ་ཙ་ འིན་’ ཟེར་ཧན་འབོ་ལ་, ཀོན་འཇོག་རྒེ་ ཏེཏ་ལོག་ ཞུའི་རྡེ་ ནོག་ ཅེ་ ཟེ་རེན་? 37 ཀལ་ཏེ་ ངེ་ ང་རང་ངེ་ ཡབ་རྦེ་ ལེ་ཧ་རྦོ་ མ་ཅོ་ནི་ ཏེ་ནི་ ངེ་ཀ་ རྡེན་ མ་ཆེ་ཤིག་། 38 ཀལ་ཏེ་ ངེ་ ཏོ་རྒུན་ ཅོའེ་རྡེ་ ཁྱི་ཞི་ ངེ་ཀ་ རྡེན་ མ་ཆེ་ནི་ ཧ་ལེ་ཤེ་ ལྟའ་རྒུན་ རྡེན་ཆེ་ཤེ་ ཅོའེ་རྡེ་རྡང་, ཀ་རྦེ་ ཡབ་ ངེ་ན་ ཡང་ ང་ ཡབ་རྦེ་ན་ འིན་ཀན་འབོ་ ཁྱི་ཞ་ རྒྱུའི་སོང་འདེ་ ཧ་ཀོ་ ཉེན་ནེན་།” 39 ཁོང་རྒུ་ནི་ ཁོང་ ཡང་ ཟུམ་ཅེ་ ཅོའེ་, འིན་ན་ ཁོང་ ཁོང་རྒུ་ནི་ ལག་ནི་ ཤོར་ཉེན་།

40 ཏེ་ནི་ ཡི་ཤུ་ ཡང་ ཡོར་འདཱན་ནེ་ སྃ་སྤེ་ ཕར་ཧ་ ངུལ་ལ་ ཡོ་ཧཱ་ནན་ནེ་ ཁྲུའི་ ཏང་ཀ་ནེ་ མ་ལེ་ཀ་ ལོག་ཏེ་ རྐྱོད་ ཡང་ ཏུ་རུ་ ཞུའུ་། 41 མི་ མང་པོ་ ཁོང་ས་ ཡོྃ་རྡེ་ ཅིག་ ཏང་ ཅིག་ལ་ ཟེར་, “ཡོ་ཧཱ་ནན་ནེ་ ཧ་ལེ་ཤེ་ ལྟའ་ མ་ནི་ མ་ལྟན་ན་ ཁོང་ངེ་ འི་ མི་རྦེ་ ཧོར་ལ་ མོལ་ཧན་ ཚང་མ་ ཀྲང་པོ་ ནོག་།” 42 ཡང་ ཏུ་རུ་ ཡོ་ཀན་ མི་ མང་པེ་ ཁོང་ངེ་ཀ་ ཏེཏ་པ་ ཅོའེ་།