ཡི་ཤུའི་ ཞ་ར་ཞིག་ ཕན་ཅུག་རྒེ་ ཛེད་།
9
ཡི་ཤུ་ ལམ་ནི་ རྐྱོད་ཟ་ནི་ ཁོང་ངེ་ རྐྱེ་རྦེ་ནི་ཕ་ལ་ ཞ་ར་ ཡོ་ཀ་ནེ་ མི་ཞིག་ ཟིའི་། 2 ཁོང་ངེ་ ལོབ་ཀྲུག་རྒུ་ནི་ ཁོང་ལ་ འདྲི་, “ལོབ་རྦོན་ལེ་, འི་ མི་ ཞ་ར་ རྐྱེ་ཅེ་འབོ་ སུའི་ རྡིག་པ་ ཅོའེ་རྡེ་ ནོག་, ཁོ་རང་ངེ་ རྡིག་པ་ ནོག་རྒེ་ ཡ་ ཁོའེ་ ཕ་མེ་ རྡིག་པ་ ནོག་?”3 ཡི་ཤུའི་ ཁོང་རྒུན་ལ་ མོལ་, “ཁོའེ་ རྡིག་པེ་ ཡང་ ཁོའེ་ ཕ་མེ་ རྡིག་པ་ ཅོའེ་རྡེ་ མག་, འིན་ན་ ཀོན་འཇོག་རྒེ་ ཆག་ལེ་རྒུན་ ཁོའེ་ མི་ཙེ་ན་ ངོན་ཅུག་རྒེ་ ཛེད་ཅེ་ཕི་ ཁོ་ ཞ་ར་ རྐྱེ་རྡེ་ ནོག་། 4 ཉི་མེ་ འོད་པོ་ ཡོད་ཟ་ནི་ ཨ་ཧོ་རྒུ་ནི་ ང་ ཀ་ལེ་ ཛེད་ཀ་ནེ་ ཆག་ལེ་རྒུན་ ཅོ་རྒོའེ་། ཚེན་ ལེབ་རྦེན་ ནམ་ སུའི་ ལེ་ཧ་ ཅོ་ མི་ཉེན་། 5 ནམ་ཚུག་པ་ ང་ འཇིག་རྟེན་ནེ་ན་ ཡོད་ ང་ འཇིག་རྟེན་པ་རྒུ་ནི་ཕི་ འོད་ འིན་།”
6 ཏུ་ཟུག་ མོལ་རྡེ་ ལྟིང་ནི་ ཡི་ཤུའི་ ཐང་ཀེ་ཀ་ ཐུ་ ཕང་ངེ་ ཛེད་, ཡང་ ཏོ་ལ་ ཀ་ལག་ ཅོའོ་ ཛེད་ཏེ་ ཞ་ར་རྦེ་ མིག་ལ་ ཧུ་ ཛེད་། 7 ཁོང་ངེ་ ཁོ་ མོལ་, “སོང་འདེ་ ཁྱེ་རང་ངེ་ མིག་ སི་ལོམ་མེ་ ཟིའིྃ་རྡེ་ན་ ཁྲུའི་།” སི་ལོམ་མེ་ ཏོན་འབོ་ ལམ་ཅུག་ཅེ་ལ་ ཟེར་རེ་ནོག་། ཏེ་ནི་ ཁོ་ སོང་འདེ་ ཁོ་རང་ངེ་ མིག་ ཟིའིྃ་རྡེ་ན་ ཁྲུའི་ ཡང་ ཁོ་ མིག་ནི་ ཐོང་ངེན་ ཁོ་རང་ངེ་ ཁང་པ་ ལོག་ཏེ་ སོང་།
8 ཞ་ར་རྦེ་ ཁྱིམ་ཙེ་རྒུན་ འདང་ ངུལ་ལ་ ཁོ་ ཞ་ར་ ལང་ངེན་ ཐོང་ཀན་རྒུ་ནི་ ཅིག་ ཏང་ ཅིག་ལ་ འདྲི་, “འི་ མིའུ་ འདེད་ཏེ་ ལང་ངེན་ འདེད་ཀན་འབོ་ མ་ནོག་རྒེ་?” 9 ཁ་ཅིག་རྒེ་, “ཏེ་རྒ་རྦོ་ ནོག་” ཡང་ ཞན་རྒུ་ནི་, “མག་, ཁོ་ ཏེ་ མིའུ་ ཙོག་སེ་ ཐོང་འདུག་” ཟེར་།
འིན་ན་ ཏེ་ མི་རྦེ་ འུ་ཙུག་ ཏང་ངེན་ ཟེར་, “ང་ ཏེ་རྒ་ ཞ་ར་འབོ་ འིན་།”
10 ཁོང་རྒུ་ནི་ འདྲི་, “ཏེ་ནི་ ཁྱེ་རང་ངེ་ མིག་ ཀ་ཟུག་རྒེ་ ཕན་?”
11 ཁོའེ་ ལེན་ཏྃ་, “ཡི་ཤུ་ ཟེར་ཧ་ནེ་ མི་རྦེ་ ཀ་ལག་ ཅོའེ་རྡེ་ ངེ་ མིག་རྒེ་ཀ་ ཧུ་ ཛེད་ཏེ་ ང་ སོང་འདེ་ སི་ལོམ་མེ་ ཟིའི་རྡེ་ན་ མིག་པོ་ ཁྲུ་ལ་ མོལ་། ཏེ་ནི་ ང་ སོང་འདེ་ མིག་ ཟིའི་རྡེ་ན་ ཁྲུ་རྡང་ ང་ མིག་ནི་ ཐོང་།”
12 ཁོང་རྒུ་ནི་ འདྲི་, “ཁོང་ ཀ་ན་ འདུག་?”
ཁོའེ་ ཟེར་, “ང་ རྒྱུའི་མེད་།”
པ་རུ་ཤི་པ་རྒུ་ནི་ སར་ཤོད་ ཏྃ་།
13 ཏེ་ནི་ ཁོང་རྒུ་ནི་ རྐྱེ་རྦེ་ནི་ཕ་ལ་ ཞ་ར་ ཡོ་ཀ་ནེ་ མིའུ་ པ་རུ་ཤི་པ་རྒུ་ནི་ཀ་ ཁྱོྃ་། 14 ཡི་ཤུའི་ ཀ་ལག་ ཅོའོ་ ཛེད་ཏེ་ ཞ་ར་རྦེ་ མིག་ ཕན་ཅུག་རྒེ་ ཛེད་ཀ་ནེ་ ཞག་པོ་ ངལ་ཚོའེ་ ཞག་ འིན་འབེན་། 15 ཏེ་རྒ་རྦེ་ཕི་ལ་ པ་རུ་ཤི་པ་རྒུ་ནི་ལ་ ཁོ་ འདྲི་, “ཁྱེ་རང་ལ་ ཀ་ཟུག་རྒེ་ ཐོང་ཉེན་?” ཁོའེ་ ལེན་ཏྃ་, “ཡི་ཤུའི་ ངེ་ མིག་རྒེ་ཀ་ ཀ་ལག་ ཧུ་ ཛེད་ ཡང་ ངེ་ ཁྲུ་རྡང་ ངེ་ མིག་ནི་ ཐོང་།”
16 པ་རུ་ཤི་པ་ ཁ་ཅིག་རྒེ་ ཟེར་, “ཡི་ཤུའི་ ཟེར་ཧ་ནེ་ ཏེ་ མི་རྦོ་ ཀོན་འཇོག་རྒེ་ ཆོག་ནི་ མག་ ཅེ་ཟེར་ནི་ ཁོའེ་ ངལ་ཚོའེ་ ཞག་རྒེ་ ཁྲིམ་རྒུན་ མ་སྲུང་།”
ཞེན་ ཁ་ཅིག་རྒེ་ ཟེར་, “རྡིག་ཅེན་ཞིག་ལ་ ཡུ་ཙོག་སེ་ ལྟའ་རྒུན་ ཀ་ཟུག་རྒེ་ ལྟན་ ཉེན་ནེན་?” ཏོ་ཕི་ ཁོང་རྒུ་ནི་ན་ པོ་ པུད་།
17 ཏེ་ནི་ ཁོང་རྒུ་ནི་ ཞ་ར་འབོ་ལ་ ཡང་ འདྲི་, “ཁྱེ་རང་ངེ་ མིག་ ཕན་ཅུག་ཀ་ནེ་ མི་རྦེ་ ཧོར་ལ་ ཁྱེ་རང་ངེ་ ཅི་ སམ་རྦེན་?”
ཁོའེ་ ལེན་ཏྃ་, “ནེན་ཏེན་ ཁོང་ ལུང་རྟོན་པ་ཞིག་ ནོག་།”
18 ཡ་ཧུ་འདཱ་པ་ འུ་རྐྱོང་རྒུན་ལ་ འི་ མིའུ་ ཞ་ར་ ཡོ་ཀན་ ཡང་ ཏག་ས་ ཐོང་ ཟེར་ཧན་འབོ་ ཏ་རུང་ངེ་ རྡེན་ མ་ཆེ་སྤེ་ ཁོའེ་ ཕ་མ་རྒུན་ འབོའེ་རྡེ་ ཁྱོང་། 19 ཁོང་རྒུ་ནི་ ཁོའེ་ ཕ་མ་རྒུན་ལ་ འདྲི་, “འི་ མིའུ་ ཁྱི་ཞི་ པུ་ཙ་ འིན་ནེ་? ཅི་ ཁོ་ ཞ་ར་ རྐྱེ་རྡེ་? ཏེ་ནི་ ཁོ་ ཏག་ས་ ཀ་ཟུག་ལ་ ཐོང་འདེ་ ནོག་?”
20 ཕ་མ་རྒུ་ནི་ ལེན་ཏྃ་, “ཁོ་ ང་ཞི་ པུ་ཙ་ འིན་ ཡང་ ཁོ་ རྐྱེ་ཟ་ནི་ ཞ་ར་ ཡོད་པེན་། 21 འིན་ན་ ཁོ་ ཀ་ཟུག་ལ་ ཏ་ས་ ཐོང་ངེ་ཡོད་ ཡང་ སུའི་ ཁོའེ་ མིག་ ཕན་ཅུག་ ང་ཞ་ ཅང་ རྒྱུའི་མེད་, ཁོ་རང་ལ་ འདྲི་ ཛེད་། ཁོ་ ལྡན་ཀན་ཞིག་ འིན་འབེ་ ཉི་ཞི་ འདྲི་ཝ་རྒུན་ལ་ ལེན་ ཏང་ཉེན་ནེ་ནོག་།” 22 ཡ་ཧུ་འདཱ་པེ་ འུ་རྐྱོང་རྒུན་ལ་ འཇིའི་ཤེ་རྦེ་, ཁོའེ་ ཕ་མ་རྒུ་ནི་ ཏུ་ཟུག་ ཟེར་ ཅེ་ཟེར་ནི་ འུ་རྐྱོང་རྒུ་ནི་, ཡི་ཤུ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ནོག་ ཟེར་ཧན་རྒུན་ ཆོའེ་ཚོག་རྒེ་ ཕྲོ་ནི་ ཕིང་ ཏང་ངེན་ ཟེར་རྡེ་ ཐག་ཅོད་ཏེ་ འིན་འབེན་། 23 ཏེ་རྒ་ རྒྱུ་ཚན་འབེ་ཕི་ ཁོའེ་ ཕ་མ་རྒུ་ནི་ ཟེར་, “ཁོ་ ལྡན་ཀན་ཞིག་ ནོག་ ཁོ་རང་ལ་ འདྲི་ ཛེད་།”
24 འུ་རྐྱོང་རྒུ་ནི་ ངུལ་ལ་ ཞ་ར་ ཡོ་ཀ་ནེ་ མིའུ་ལ་ ལེན་ ཉི་སྤ་ འབོའེ་རྡེ་ འདྲི་, “ཀོན་འཇོག་ལ་ སི་ཝ་ ཅོའེ་རྡེ་ ཀྲང་པོ་ ཟེར་། ང་ཞ་ རྒྱུའི་ཡོད་ ཡི་ཤུ་ ཟེར་ཧ་ནེ་ མིའུ་ རྡིག་ཅེན་ ནོག་།”
25 ཁོའེ་ ལེན་ཏྃ་, “ཁོང་ རྡིག་ཅེན་ འིན་ནེ་ མན་ ང་ རྒྱུའི་མེད་, འིན་ན་ སྤེ་ར་ ཅིག་ ང་ ནེན་ཏེན་ ཤེ་རྡེན་ ང་ ངུལ་ལ་ ཞ་ར་ འིན་འབེན་ ཏག་ས་ ང་ ཐོང་ངེ་ཡོད་།”
26 ཁོང་རྒུ་ནི་ ཁོ་ལ་ ཡང་ འདྲི་, “ཁོའེ་ ཁྱེ་རང་ལ་ ཅི་ཅོའེ་? ཁྱེ་རང་ངེ་ མིག་པོ་ ཁོའེ་ ཀ་ཟུག་ལ་ ཕན་ཅུག་?”
27 ཁོའེ་ ལེན་ཏྃ་, “ངེ་ ཁྱི་ཞ་རྒུན་ལ་ ངུལ་ལ་ ཟེར་རྦེན་, འིན་ན་ ཁྱི་ཞ་རྒུ་ནི་ ཉེན་ནེ་ མི་འདུག་། ཏེ་ ཡང་ ཅི་ཕི་ འདྲི་འིན་? ཅི་ ཁྱི་ཞ་རྒུན་ལ་ ཁོང་ངེ་ ལོབ་ཀྲུག་ འགྱུར་ཉིན་ རག་རྒེ་?”
28 ཏེ་ནི་ འུ་རྐྱོང་རྒུ་ནི་ ཁོ་ ཁྲེལ་རྦ་ ཅོའེན་ ཟེར་, “ཁྱེ་རང་ ཁོའེ་ ལོབ་ཀྲུག་ ནོག་། ང་ཞ་ནི་ མོ་ཤེ་རྡེ་ ལོབ་ཀྲུག་ འིན་། 29 ཀོན་འཇོག་རྒེ་ མོ་ཤེ་ ཉམ་པོ་ ཞལ་ཏ་ སལ་རྡེ་ འིན་ཀན་འབོ་ ང་ཞ་ ཤེ་རྡེ་ཡོད་, འིན་ན་ འི་ མིའུ་ ཀ་ནི་ ཡོྃ་རྡེ་ འིན་ ང་ཞ་ ཅང་ རྒྱུའི་མེད་།”
30 ཁོའེ་ ལེན་ཏྃ་, “ཡུ་ མ་ ཡམ་ཚན་ རག་། ཁྱི་ཞ་རྒུན་ལ་ ཁོང་ ཀ་ནི་ ཡོྃ་རྡེ་ འིན་ཀན་ རྒྱུའི་ མེད་ན་ ཁོང་ངེ་ ངེ་ མིག་ ཕན་ཅུག་རྒེ་ ཛེད་། 31 ཡུ་ ཚང་མེ་ རྒྱུའི་ནོག་, ཀོན་འཇོག་རྒེ་ རྡིག་ཅེན་རྒུན་ལ་ ཚོར་རེ་ མག་, འིན་ན་ ཁོང་ངེ་ ཅོལ་ཧན་ འདང་ ཁོང་ངེ་ ཐུག་འདོད་ ནང་ཞིན་ ཅོ་ཀན་རྒུན་ལ་ ཚོར་རེ་ནོག་། 32 རྐྱེ་རྦེ་ནི་ཕ་ལ་ ཞ་ར་ འིན་ཀན་ཞིག་ ཕན་ཅུག་རྒེ་ ཛེད་ཀ་ནེ་ ཧོར་ལ་ སུ་ཞིག་རྒེ་ ཏག་ས་ཚུག་པ་ ཚོར་རྡེ་ མེད་ཁྲོ་། 33 ཀལ་ཏེ་ འི་ མིའུ་ ཀོན་འཇོག་རྒེ་ ཆོག་ནི་ མན་འབེ་ནི་ ཁོང་ལ་ ཅང་ ཅོ་ཉེན་འདེ་ མེད་ཁྲོ་།”
34 ཁོང་རྒུ་ནི་ ཟེར་, “ཁྱེ་རང་ རྐྱེ་རྦེ་ནི་ཕ་ལ་ རྡིག་པེ་ ཀང་འདེ་ ཡོད་ཏེ་ ནོག་། ང་ཞ་རྒུན་ལ་ ལབ་ཅེ་ ཧམ་བ་ ཀ་ཟུག་རྒེ་ ཡོྃ་།” ཏེ་ནི་ ཁོང་རྒུ་ནི་ འི་ མིའུ་ ཆོའེ་ཚོག་རྒེ་ ཕྲོ་ནི་ ཕིང་།
སེམ་ཡིད་རྡེ་ ཐོག་ནི་ ཞ་ར་།
35 ཡ་ཧུ་འདཱ་པེ་ ཆོའེ་ཚོག་རྒེ་ ཕྲོ་ནི་ ཕིང་ཀ་ནེ་ མི་རྦེ་ ཧོར་ལ་ ཡི་ཤུའི་ ཚོར་, ཁོ་ ཐོབ་རྦེ་རྡང་ ཁོང་ངེ་ འདྲི་ ཛེད་, “ཁྱེ་རང་ངེ་ མི་རིག་རྒེ་པུའི་ཀ་ ཏེཏ་པ་ ཅོ་ཡོད་རྡེ་?”
36 ཁོའེ་ ཟེར་, “ཁོང་ སུ་ ནོག་? ཁོང་ངེ་ཀ་ ཏེཏ་པ་ ཅོ་ཉེན་ཅེ་ལ་ ང་ ཤེད་རྡེ་ ཛེད་རྡང་།”
37 ཡི་ཤུའི་ ཁོའོ་, “ཁྱེ་རང་ངེ་ ཁོ་ ཐོང་འདེ་ འིན་, ཡང་ ཏག་ས་ ཁྱེ་རང་ ཉམ་པོ་ སྤེ་ར་ ཏང་ཀན་འབོ་ ཁོ་ འིན་” མོལ་།
38 ཁོའེ་ ཟེར་, “ཀྱེ་ ཙོབོ་། ངེ་ ཉེ་རང་ངེ་ཀ་ ཏེཏ་པ་ ཅོའེན་” ཡང་ ཁོའེ་ ཡི་ཤུ་ ཆག་ པུལ་རྡེ་ ཅོལ་།
39 ཡི་ཤུའི་ མོལ་, “ཞ་ར་རྒུན་ལ་ ཐོང་ཅུག་ཅེ་ ཡང་ ཐོང་ཀན་རྒུན་ལ་ ཞ་ར་ འིན་ཀན་འབོ་ ལྟན་འདེ་ འཇིག་རྟེན་པ་རྒུན་ལ་ ཁྲིམ་ཅེད་ ཅོ་ཅེ་ཕི་ ང་ ཡོྃ་རྡེ་ འིན་།”
40 ཁོང་ ཉམ་པོ་ ཡོ་ཀ་ནེ་ པ་རུ་ཤི་པ་ ཁ་ཅིག་རྒེ་ ཏོ་ ཚོར་རྡེ་ ཟེར་, “ཅི་, ང་ཞ་རྒུ་ནི་ལ་ ཞ་ར་ ནོག་རྒེ་?”
41 ཡི་ཤུའི་ མོལ་, “ཀལ་ཏེ་ ཁྱི་ཞ་རྒུན་ ཞ་ར་ འིན་འབེན་ནི་ ཁྱི་ཞ་རྒུ་ནི་ན་ རྡིག་པ་ ཅོ་ཀ་ནེ་ རྐྱོན་ ཐོབ་ཏེ་ མེད་ཁྲོ་, འིན་ན་ ཏག་ས་ ཁྱི་ཞི་ ང་ཞ་ མིག་ནི་ ཐོང་ངེ་ཡོད་ ཟེར་ ཁྱི་ཞི་ན་ རྐྱོན་ ལུའི་རྡེ་ནོག་།”