ལོག་ཡེམ་ ཅོ་ཀ་ནེ་ པོ་མོ་།
8
ཏེ་ནི་ ཡི་ཤུ་ ཨོ་ལི་ཝེ་ རི་ ཟེར་སེ་ན་ རྐྱོད་, 2 ནམ་ ཟ་ར་ཟི་རེ་ ལྃ་རྡེ་རྡང་ ཁོང་ ལོག་ཏེ་ ཀོན་འཇོག་རྒེ་ ཁང་པ་ལ་ རྐྱོད་། མི་ཚང་མ་ ཁོང་ས་ ཛོམ་, ཡི་ཤུ་ མི་ཚོག་ལ་ ལབ་ཞ་ སལ་ཅེ་ལ་ ཐང་ཀེ་ཀ་ ཞུའུ་། 3 ཏེ་རྒ་ ཏུའི་ལ་ ཆོའེ་ཁྲིམ་ལ་ ཁེ་སྤ་རྒུན་ འདང་ པ་རུ་ཤི་པ་རྒུ་ནི་ པོ་མོ་ཞིག་ ཁྱོང་ ཀའོ་ ཁོ་རང་ངེ་ ཞི་མེད་ མན་ཀན་ ཡང་ མི་ཞིག་ ཉམ་པོ་ ལུའི་འབྲེལ་ ཅོའེན་ ཟུམ་འདེ་ འིན་འབེན་, ཡང་ ཁོ་ལ་ མི་ཚོག་རྒེ་ འདུན་ལ་ ལྃ་ཤུག་།4 ཁོང་རྒུ་ནི་ ཡི་ཤུ་ལ་ ཟེར་, “ལོབ་རྦོན་ལེ་, འི་ པོ་མོ་ ལོག་ཡེམ་ ཅོའེན་ཡོད་ཟེར་ནི་ ཟུམ་འབེན་། 5 མོ་ཤེ་ ཁྲིམ་ ནང་ཞིན་ལ་, ཡུ་ཙོག་སེ་ པོ་མོ་ལ་ རྡོ་ རྒྱབ་ཏེ་ སེད་ཅེ་ ཨ་ཧོ་ལ་ ཀཱ་ ཡོད་, འིན་ན་ ཉེ་རང་ངེ་ ཅི་ མོལ་ལེ་ཡོད་?”
6 ཁོང་རྒུ་ནི་ འི་ ཏྲི་ཝ་འབོ་ ཁོང་ལ་ ཉེད་ ཕོ་ཅེ་ཕི་ལ་ འདྲི་།
འིན་ན་ ཡི་ཤུའི་ ཨུ་ རྒུའི་རྡེ་ ཛུ་རྒུ་ ཉམ་པོ་ ཐང་ཀེ་ཀ་ འབྲི་ཛེད་ཅེ་ འགོ་ཟུག་། 7 ཁོང་རྒུ་ནི་ ཡང་འདང་ཡང་ ཁོང་ལ་ འདྲིན་ འདེད་པེ་ ཁོང་ངེ་ ཨུ་ ཏག་ཏེ་ ཁོང་རྒུན་ལ་ མོལ་, “ཁྱི་ཞི་ ཕྲོ་ནི་ ཏ་ས་ཚུག་པ་ རྡིག་པ་ མ་ནི་ མ་ཅོ་ ཡོ་ཀན་འབོ་ལ་ འགོ་མ་ འི་ པོ་མོ་ལ་ རྡོ་ རྒྱབ་ཅུག་།” 8 ཡང་ ཁོང་ངེ་ ཨུ་ རྒུའི་རྡེ་ ཐང་ཀེ་ཀ་ འབྲི་ ཛེད་།
9 ཏོ་ ཚོར་རེ་རྡང་, མི་ རྒད་པོ་རྒུན་ འགོ་ཟུག་ཏེ་ ཆུང་ཙེ་རྒུན་ཚུག་པ་ རེ་རེ་ ཅོའེ་རྡེ་ ཏེ་ཀ་ནི་ ལོག་ཏེ་ སོང་། ཡང་ ཏུ་རུ་ ཡི་ཤུ་ ཅིག་པོ་ རྡང་ ཁོང་ངེ་ འདུན་ལ་ པོ་མོ་ ལུའི་། 10 ཡི་ཤུ་ ཞྃ་རྡེ་ ཁོ་ མོལ་, “པོ་མོ་, ཁོང་ ཚང་མ་ ཀ་རུ་ སོང་? སུ་ཞིག་རྒེ་ ཁྱེ་རང་ལ་ ཤི་ཅེ་ ཁྲིམ་ མ་ཅེད་རྡེ་?”
11 ཁོའེ་ ཟེར་, “ཙོབོ་ལེ་, སུ་ཞིག་རྒེ་ ཅང་ མ་ཅོའེ་།”
ཏེ་ནི་ ཡི་ཤུའི་ མོལ་, “ངེ་ལ་ རྐྱོན་ མི་ཀལ་། སོང་, འེ་རྒ་ནི་ཕ་ལ་ རྡིག་པ་ མ་ཅོ་།”
རྐྱབ་འགོན་ ཡི་ཤུ་རྦོ་ འཇིག་རྟེན་ནེ་ འོད་།
12 ཡི་ཤུའི་ མི་རྒུན་ལ་ ལབ་ཞ་ ས་ལེན་ མོལ་, “ང་ནི་ འཇིག་རྟེན་པ་རྒུ་ནི་ཕི་ འོད་ འིན་། ངེ་ ལྟིང་འགྲྃ་ནི་ འགྲང་ཀན་རྒུན་ མུན་ཀྲག་རྒེ་ན་ མི་ཀྲུལ་, ཅེ་ཟེར་ནི་ ཐ་མེད་པེ་ མི་ཙེ་ ཆོག་ལ་ ཁྲིད་ཀ་ནེ་ འོད་ ཁོང་རྒུ་ནི་ན་ ཡོད་ཏེ་ ནོག་།”
13 ཏོ་ ཚོར་རེ་རྡང་ པ་རུ་ཤི་པ་རྒུ་ནི་ ཡི་ཤུ་ ཟེར་, “ཁྱེ་རང་ངེ་ རང་ངེ་ཕི་ སྤང་པོ་ ཏྃ་རྦེ་ ཁྲིམ་ ནང་ཞིན་ ཁྱེ་རང་ངེ་ སྤང་པོ་ རིན་མེད་ ཐེའེ་ནོག་།”
14 ཡི་ཤུའི་ ཁོང་རྒུན་ལ་ ལེན་སལ་, “ངེ་ ང་རང་ངེ་ ཧོར་ལ་ སྤང་པོ་ ཏང་ངེ་ཡོད་ ངེ་ སྤང་པོ་ རིན་མེད་ མན་ ཅེ་ཟེར་ནི་ ང་ ཀ་ནི་ ཡོྃ་རྡེ་ འིན་, ཡང་ ཀ་རུ་ ཆ་ཅེ་ འིན་ ང་ རྒྱུའི་ཡོད་། འིན་ན་ ཁྱི་ཞ་རྒུན་ལ་ ཏོ་རྒུན་ རྒྱུའི་མེད་། 15 ཁྱི་ཞ་རྒུ་ནི་ མི་ སམ་ཚུལ་ ནང་ཞིན་ ཤའ་ ཅེད་ཏུག་, འིན་ན་ ངེ་ སུ་ལ་ ཤའ་ ཅེད་རྡེ་མེད་། 16 ཀལ་ཏེ་ ཁྲིམ་ཅེད་ནི་ ངེ་ ཁྲིམ་ཅེད་པོ་ ཀྲང་པོ་ ཡོང་ངེན་ ཅེ་ཟེར་ནི་ ཁྲིམ་ཅེད་ཟ་ནི་ ང་ ཅིག་པོ་ མེད་, ང་ ཀ་ལེ་ ཛེད་ཀ་ནེ་ ཡབ་ ང་ ཉམ་པོ་ ཡོད་། 17 ཁྱི་ཞི་ ཁྲིམ་མེ་ན་ འབྲི་ཛེད་ཏེ་ འདུག་ ‘མི་ ཉི་རྡེ་ སྤང་པོ་ ཏང་ནི་, རྐྱོན་འབོ་ རྡེན་འབའ་ ཐེན་’ 18 ངེ་ ང་རང་ངེ་ཕི་ སྤང་པོ་ ཏང་ངེ་ཡོད་, ཡང་ ངེ་ སྤང་པོ་ ཉི་སྤ་རྦོ་ ང་ ཀ་ལེ་ ཛེད་ཀ་ནེ་ ཡབ་ འིན་།”
19 ཏེ་ནི་ པ་རུ་ཤི་པ་རྒུ་ནི་ ཡི་ཤུ་ལ་ འདྲི་, “ཁྱེ་རང་ངེ་ ཡབ་ ཀ་རེ་?”
ཡི་ཤུའི་ ལེན་སལ་, “ཁྱི་ཞ་རྒུ་ནི་ ང་ མ་ཤེ་ ཡང་ ངེ་ ཡབ་ལ་ མ་ཤེ་། ཀལ་ཏེ་ ཁྱི་ཞི་ ང་ ཤེ་རྦེན་ནི་ ངེ་ ཡབ་རྦང་ ཤེ་རྡེ་ ཡོད་ཁྲོ་” 20 ཀོན་འཇོག་རྒེ་ ཁང་པེ་ འབུལ་ལྡུཏ་ པུལ་སེ་ རྒམ་མེ་ འདུན་ལ་ ལབ་ཞ་ སལ་ཏུའི་ ཁོང་ངེ་ ཏེ་ སྤེ་ར་རྒུན་ མོལ་ལེ་ ཛེད་། འིན་ན་ སུ་ཞིག་ལ་ ཁོང་ མ་ཟུམ་ ཅེ་ཟེར་ནི་ ཁོང་ངེ་ ཏུའི་རྦོ་ ཏ་རུང་ མ་ལེ་རྦེ་ འིན་འབེན་།
21 ཡི་ཤུའི་ ཡང་ ཁོང་རྒུན་ལ་ མོལ་, “ང་ ཐག་རིང་ལ་ ཆ་ཡོད་, ཁྱི་ཞི་ ང་ ཙལ་ལེན་, འིན་ན་ ཁྱི་ཞ་ ཁྱི་ཞི་ རྡིག་པེ་ན་ ཤིན་། ཀ་རུ་ ང་ ཆ་ཡོད་ ཁྱི་ཞ་ ཏུ་རུ་ ཡོང་ མི་ཉེན་།”
22 ཡ་ཧུ་འདཱ་པ་ འུ་རྐྱོང་རྒུ་ནི་ ཟེར་, “ཅེ་ ཁོའེ་ ཁོ་རང་ སེད་ཅེ་ ནོག་? ཏོ་རྦེ་ཕི་ ཁོའེ་ ‘ཀ་རུ་ ང་ ཆ་ཡོད་ ཁྱི་ཞ་ ཡོང་ མི་ཉེན་’ ཟེར་རྡེ་ ནོག་རྒེ་?”
23 ཡི་ཤུའི་ ཏ་རུང་ང་ མོལ་, “ཁྱི་ཞ་རྒུན་ ཡོག་ནི་ ནོག་, ཡང་ ང་ ལྟག་ནི་ འིན་། ཁྱི་ཞ་རྒུན་ འི་ འཇིག་རྟེན་ནི་ ནོག་, ང་ འི་ འཇིག་རྟེན་ནི་ མན་། 24 ངེ་ ཁྱི་ཞ་རྒུན་ལ་ ཟེར་རྦེན་, ཁྱི་ཞ་ ཁྱི་ཞི་ རྡིག་པེ་ན་ ཤིན་། ཀལ་ཏེ་ ཁྱི་ཞི་ ང་ ཏེ་རྒ་རྦོ་ འིན་ ཟེར་ཧན་འབོ་ལ་ རྡེན་ མ་ཆེ་ནི་, ཁྱི་ཞ་ ཁྱི་ཞི་ རྡིག་པེ་ན་ ཤིན་།”
25 ཁོང་རྒུ་ནི་ འདྲི་, “ཁྱེ་རང་ སུ་ འིན་?”
ཡི་ཤུའི་ མོལ་, “ང་ ཏེ་རྒ་རྦོ་ འིན་ ཀ་ཟུག་ འགོ་མ་ནི་ཕ་ལ་ ངེ་ ཁྱི་ཞ་རྒུན་ལ་ ཟེར་རྡེ་ཡོད་པེན་། 26 ཁྱི་ཞི་ ཧོར་ལ་ ང་ ཟེར་རྒྱུ་ རྡང་ ཤའ་ ཅོ་རྒྱུ་ མང་པོ་ ཡོད་, འིན་ན་ ངེ་ མི་ཅོ་། ངེ་ ང་ ཀ་ལེ་ ཛེད་ཀ་ནེ་ཀ་ནི་ ཚོར་ཧན་རྒུན་ འཇིག་རྟེན་པ་རྒུན་ལ་ ཤེད་ཏེ་ ཡང་ ཁོང་ནི་ ལོ་ཁྱེལ་ཅེན་ ཞུ་རྡེ་ འིན་།” 27 ཁོང་ངེ་ ཡབ་ ཀོན་འཇོག་རྒེ་ ཧོར་ལ་ མོལ་ཧན་འབོ་ འུ་རྐྱོང་རྒུ་ནི་ ཧ་མ་ཀོ་།
28 ཏེ་ནི་ ཡི་ཤུའི་ མོལ་, “ཁྱི་ཞི་ མི་རིག་རྒེ་པུ་ རྐྱང་ཤིང་ངེ་ཀ་ ཏག་ཟ་ནི་, ཁྱི་ཞ་རྒུན་ལ་ ང་ ཏེ་རྒ་རྦོ་ འིན་ཀན་འབོ་ རྒྱུའི་ཆེན་། ངེ་ ང་རང་ངེ་ ཅང་ ཅོ་མེད་, འིན་ན་ ཡབ་རྦེ་ ང་ ལབ་རྦེ་ ཛེད་ཀན་འབོ་ ཟེ་འིན་། 29 ཡང་ ང་ ཀ་ལེ་ ཛེད་ཀན་འབོ་ ང་ ཉམ་པོ་ ཡོད་, ཁོང་ངེ་ ང་ ཅིག་པོ་ པྃ་རྡེ་ པོ་རེ་ མ་ཛེད་ ཅེ་ཞུ་ནི་ ངེ་ ཏུའི་རྒྱུན་ ཁོང་ ཐུག་ཐེད་ཀན་འབོ་ ཅོའེན་།” 30 ཡི་ཤུའི་ ཏེ་ ཞལ་ཏ་རྒུན་ མོལ་ལེན་ ཡོད་ཟ་ནི་ མི་ མང་པེ་ ཁོང་ངེ་ཀ་ ཏེཏ་པ་ ཅོའེ་།
ཨབ་ར་ཧམ་ འདང་ རྡུད་རྡེ་ འགོ་འབེ་ ཕར་རྒྱུད་།
31 ཡི་ཤུའི་ ཁོང་ངེ་ཀ་ ཏེཏ་པ་ ཅོ་ཀ་ནེ་ ཡ་ཧུ་འདཱ་པ་རྒུན་ལ་ མོལ་, “ཀལ་ཏེ་ ཁྱི་ཞ་ ངེ་ ལབ་ཞ་རྒུ་ནི་ཀ་ རྟེམ་པོ་ འདེད་ནི་, ཁྱི་ཞ་ ངེ་ རྡེན་འབེ་ ལོབ་ཀྲུག་རྒུན་ འིན་། 32 ཏེ་ནི་ ཁྱི་ཞ་ ཀོན་འཇོག་རྒེ་ རྡེན་འབའ་རྦེ་ ཧ་ཀོ་ ཉེན་ནེན་ ཡང་ ཏེ་རྒ་ རྡེན་འབའ་རྦེ་ ཁྱི་ཞ་ ར་ཝང་ ཏང་ངེན་།”
33 ཁོང་རྒུ་ནི་ ལེན་ཏྃ་, “ང་ཞ་ ཨབ་ར་ཧམ་མེ་ ཕར་རྒྱུད་ འིན་ ཡང་ མ་ནི་ ཚེ་ཡོག་ལ་ མ་ལུའི་རྡེ་ འིན་འབེན་། ཉེ་རང་ངེ་ ང་ཞ་ ར་ཝང་ ཐོབ་རྦེན་ ཟེར་ཤེ་ ཏོན་འབོ་ ཅི་ འིན་?”
34 ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, རྡིག་པ་ ཅོ་ཀན་ ཚང་མ་ རྡིག་པེ་ ཚེ་ཡོག་ ནོག་། 35 ཡང་ ཚེ་ཡོག་ སྤོན་འབེ་ ནང་མི་ མ་ནི་ མི་འགྱུར་, འིན་ན་ པུ་ཙ་ ཏུའི་རྒྱུན་ ནང་ཚང་ ཁག་ཞིག་ ནོག་། 36 ཀལ་ཏེ་ སྲེ་ ཁྱི་ཞ་རྒུན་ལ་ ར་ཝང་ ཏང་ནི་ ཁྱི་ཞ་རྒུན་ལ་ རྡེན་འབའ་ ར་ཝང་ ཐོབ་རྦེན་། 37 ཁྱི་ཞ་ ཨབ་ར་ཧམ་མེ་ ཕར་རྒྱུད་ འིན་ཀན་འབོ་ ངེ་ ཤེ་རྡེ་ཡོད་, ཏེ་ན་ ཁྱི་ཞི་ ང་ སེད་ཅེ་ ཙོན་འགྲུའི་ ཅོ་རུག་ ཅེ་ཟེར་ནི་ ཁྱི་ཞ་རྒུ་ནི་ སེམ་མེ་ ནང་ལ་ ངེ་ ལབ་ཞེ་ཕི་ མལ་ མེད་ཏེ་ ནོག་། 38 ཡབ་རྦེ་ འདུན་ལ་ ཡོད་ཟ་ནི་ ཐོང་ཀན་རྒུན་ ངེ་ ཁྱི་ཞ་ ཤེད་རྡེ་ཡོད་, འིན་ན་ ཁྱི་ཞ་རྒུ་ནི་ ཁྱི་ཞི་ ཨ་རྦེ་ཀ་ནི་ ཚོར་ཧན་རྒུན་ ཅོ་ནོག་།”
39 ཁོང་རྒུ་ནི་ ལེན་ཏྃ་, “ང་ཞི་ ཨ་རྦ་ ཨབ་ར་ཧམ་ འིན་།”
ཡི་ཤུའི་ ཁོང་རྒུན་ལ་ མོལ་, “ཀལ་ཏེ་ ཁྱི་ཞ་རྒུན་ ཨབ་ར་ཧམ་མེ་ ཕར་རྒྱུད་ འིན་འབེན་ནི་ ཁྱི་ཞི་ལ་ ཨབ་ར་ཧམ་ ཙོག་སེ་ ལེ་ཧ་རྒུན་ ཅོ་ཡོད་ཁྲོ་། 40 ངེ་ ཁྱི་ཞ་རྒུན་ལ་ ཀོན་འཇོག་ནི་ ཚོར་ཧ་ནེ་ ཀྲང་པོ་ སྤེ་ར་རྒུན་ ཤེད་ཅེ་ཀ་ནི་, ཁྱི་ཞི་ ང་ སེད་ཅེ་ ཙོན་འགྲུའི་ ཅོ་རུག་། ཨབ་ར་ཧམ་མེ་ ཏུ་ཟུག་ མ་ནི་ མ་ཅོའེ་། 41 ཁྱི་ཞི་ ཨ་རྦེ་ ཅོ་ཀ་ནེ་ ལེ་ཧ་རྒུན་ ཁྱི་ཞི་ ཅོ་ནོག་།”
ཁོང་རྒུ་ནི་ ཡི་ཤུ་ལ་ ཟེར་, “ང་ཞ་རྒུན་ ནལ་ཁྲུག་ མན་། ཀོན་འཇོག་ ཅིག་པོ་ ང་ཞི་ ཡབ་ འིན་།”
42 ཡི་ཤུའི་ ཁོང་རྒུན་ལ་ མོལ་, “ཀལ་ཏེ་ ཁྱི་ཞ་རྒུ་ནི་ ཡབ་, ཀོན་འཇོག་ འིན་འབེན་ནི་, ཁྱི་ཞི་ ང་ ཤེ་སྤ་ ཅོ་ཡོད་ཁྲོ་, ཅེ་ཟེར་ནི་ ང་ ཀོན་འཇོག་ས་ནི་ ཡོྃ་རྡེ་ ཏག་ས་ འེ་ཀ་ ཡོད་། ང་ འེ་ཀ་ ང་རང་ངེ་ ཝང་ཆེ་ན་ ཡོྃ་རྡེ་ མན་, ཁོང་ངེ་ ང་ ཀ་ལེ་ ཛེད་ཏེ་ འིན་། 43 ཅི་, ཁྱི་ཞ་ ངེ་ སྤེ་ར་རྒུན་ ཧ་མ་ཀོ་ ནོག་? ཅེ་ཟེར་ནི་ ཁྱི་ཞ་ ངེ་ ལབ་ཞ་རྒུན་ལ་ ཉེན་ཅེ་ལ་ ན་ཝ་ མི་འདུག་། 44 ཁྱི་ཞ་རྒུ་ནི་ ཨ་རྦ་རྦོ་ རྡུད་རྒུན་ ནོག་, ཡང་ ཁྱི་ཞ་ ཁྱི་ཞི་ ཨ་རྦེ་ འདོད་པ་ ནང་ཞིན་ ལེ་ཧ་རྒུན་ ཅོའོ་ ཐེད་རྡེ་ནོག་། ཁོ་ འཇིག་རྟེན་ ཚུག་རྦ་ནི་ཕ་ལ་ མི་སེད་ཞིག་ འིན་, ཡང་ ཀོན་འཇོག་རྒེ་ རྡེན་འབེ་ ལབ་ཞ་རྒུན་ལ་ སོག་པོ་ ཅོ་ནོག་, ཁོའེ་ན་ ཀྲང་པོ་ ཅང་ མེད་རྡེ་ ནོག་། ཁོའེ་ ཟུན་ ཏང་ཟ་ནི་ ཁོ་རང་ངེ་ ཤེ་ཧན་ ནང་ཞིན་ ཟེར་རྡེ་ནོག་། ཅེ་ཟེར་ནི་ ཁོ་ ཟུན་ཅེན་ ཡང་ ཟུན་རྒུ་ནི་ ཨ་རྦ་ ནོག་། 45 འིན་ན་ ངེ་ ཀོན་འཇོག་རྒེ་ རྡེན་འབེ་ ལབ་ཞ་ ཤེད་ཅེའོ་ ཁྱི་ཞ་རྒུ་ནི་ ངེ་ཀ་ རྡེན་ཆེ་ཤེ་ མག་། 46 ངེ་ཀ་ནི་ རྡིག་པ་ ཡོད་ ཟེར་རྡེ་ ཁྱི་ཞ་རང་ སུའི་ རང་ངེ་ཀ་ རྐྱོན་ ཀལ་ཉེན་ཅེ་ར་? ཀལ་ཏེ་ ཀོན་འཇོག་རྒེ་ རྡེན་འབེ་ ལབ་ཞ་ ངེ་ ཁྱི་ཞ་ ཤེད་རྡེ་ཡོད་ནི་, ཏེ་ནི་ ཁྱི་ཞ་རྒུ་ནི་ ངེ་ཀ་ ཏེཏ་པ་ ཅེ་ ཅོ་མེད་? 47 ཀོན་འཇོག་རྒེ་ འིན་ཀན་རྒུ་ནི་ ཁོང་ངེ་ མོལ་ཧན་ ཚང་མ་ ཉེན་ནེ་ནོག་, འིན་ན་ ཁྱི་ཞི་ མི་ཉེན་ཅེ་ རྒྱུ་ཚན་འབོ་ ཁྱི་ཞ་རྒུན་ ཀོན་འཇོག་རྒེ་ མག་།”
ཡི་ཤུ་ ཨབ་ར་ཧམ་མེ་སང་ ཆེ་ འིན་ཀན་།
48 ཡ་ཧུ་འདཱ་པ་རྒུ་ནི་ ལེན་ཏྃ་, “ང་ཞི་ ཁྱེ་རང་ ས་མ་རི་ཡཱ་པ་ ཡང་ ཁྱེ་རང་ངེ་ན་ རྡུད་ ཞུ་རྡེ་ནོག་ ཟེར་ཧན་འབོ་ རྡེན་འབའ་ མ་ནོག་རྒེ་?”
49 ཡི་ཤུའི་ མོལ་, “ངེ་ན་ རྡུད་ ཞུ་རྡེ་ མེད་། ངེ་ ང་རང་ངེ་ ཡབ་ལ་ སི་ཝ་ ཅོ་ཡོད་, འིན་ན་ ཁྱི་ཞ་རྒུ་ནི་ ང་ སི་ཝ་ ཅོའོ་ མི་འདུག་། 50 ངེ་ ང་རང་ངེ་ སི་ཝ་ ས་ལེ་ མེད་། འོ་ནེ་ ང་ སི་ཝ་ སལ་ལེ་ ཛེད་ཀན་ཞིག་ ཡོད་ ཡང་ ཁོང་ ཁྲིམ་ཅེད་ ཛེད་ཀན་འབོ་ འིན་། 51 ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ ལབ་ཞ་རྒུན་ལ་ ཁ་ཉེན་ཀན་རྒུན་ མ་ནི་ མི་ཤི་།”
52 ཁོང་རྒུ་ནི་ ཁོང་ལ་ ཟེར་, “ཏ་ ང་ཞ་ ཧ་ཀོ་ ཁྱེ་རང་ངེ་ན་ རྡུད་ ཞུ་རྡེ་ ཡོད་ཏེ་ ནོག་། ཨབ་ར་ཧམ་ རྡང་ ཏེ་རྒ་ ཙོག་སེ་ ཞེན་ ལུང་རྟོན་པ་རྒུན་ ཀྲོྃ་། འིན་ན་ ཁྱེ་རང་ངེ་ ཟེ་རེ་ནོག་ ཁྱེ་རང་ངེ་ ལབ་ཞ་ ཁ་ཉེན་ཀན་རྒུན་ མ་ནི་ མི་ཤི་། 53 ཁྱེ་རང་ ཅི་ ང་ཞི་ ཕ་མེ་པོ་ ཨབ་ར་ཧམ་མེ་སང་ ཆེ་ འིན་ནེ་? ཁོང་ ཀྲོྃ་ ཡང་ ལུང་རྟོན་པ་རྒུན་ན་, ཁྱེ་རང་ རང་འདང་རང་ སུ་ འིན་ ས་མེ་རག་?”
54 ཡི་ཤུའི་ མོལ་, “ཀལ་ཏེ་ ངེ་ ང་རང་ལ་ རང་རྟོད་ ཏང་ནི་ ཏེ་ འདོད་པ་འབོ་ ཏོན་མེད་ ནོག་། ངེ་ ཡབ་རྦེ་ ང་ སྤལ་ ས་ལེན་, ཁྱི་ཞི་ ཁོང་ལ་ ཁྱི་ཞ་ རང་ངེ་ ཀོན་འཇོག་ ཟེར་རྡུག་། 55 ཁྱི་ཞི་ ཁོང་ ཤེ་རྡེ་ མག་ འིན་ན་ ངེ་ ཁོང་ ཤེ་རྡེ་ཡོད་། ཀལ་ཏེ་ ངེ་ ཤེ་རྡེ་མེད་ ཟེར་ནི་ ང་ ཁྱི་ཞ་རྒུན་ ཙོག་སེ་ ཟུན་ཅེན་ འགྱུ་རེན་། འིན་ན་ ངེ་ ཁོང་ ཤེ་རྡེ་ཡོད་ ཡང་ ངེ་ ཁོང་ངེ་ ཀའ་ ཉེན་ནེ་ཡོད་། 56 ཁྱི་ཞི་ ཕ་མེ་པོ་ ཨབ་ར་ཧམ་མེ་ ངེ་ ཏུའི་རྦོ་ ཐོང་ཅེ་ ཧོར་ལ་ སམ་ཟ་ནི་ ཁོང་ ཧོཔ་ ཐེད་། ཁོང་ངེ་ ཏོ་རྦོ་ ཐོང་ ཡང་ མ་ ཐེད་པོ་ སོང་།”
57 ཡ་ཧུ་འདཱ་པ་རྒུ་ནི་ ཡི་ཤུ་ ཟེར་, “ཁྱེ་རང་ངེ་ ལོ་ ཏ་རུང་ ངཔ་ཅུ་ མ་སོང་, ཁྱེ་རང་ངེ་ ཨབ་ར་ཧམ་ ཐོང་ ཟེར་རྡེ་ ཀ་ཟུག་རྒེ་ ཟེ་འིན་?”