ཡོ་ཧཱ་ནན་ 7

ཡི་ཤུ་ རྡང་ ཁོང་ངེ་ ནོ་རྒུན་།

ཏེ་ ལྟིང་ནི་ ཡི་ཤུ་ འགཱ་ལིལ་ལེ་ ཡུལ་ཞོང་ མང་པེ་ན་ རྐྱོད་། ཁོང་ ཡ་ཧུ་འདཱེ་ ཡུལ་ཞོང་ངེ་ན་ རྐྱོད་ཅེ་ མེད་པེན་, ཅེ་ཞུ་ནི་ ཏུ་རུ་ ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ སེད་ཅེ་ ཧབ་ ཙལ་ལེ་ཡོད་པེན་། 2 ཡ་ཧུ་འདཱ་པེ་ ཀུར་རེ་ ཏུའི་ཤེན་ ཉེ་མོ་ ཡོད་པེན་། 3 ཡི་ཤུའི་ ནོ་རྒུ་ནི་ ཡི་ཤུ་ ཟེར་, “འི་ནི་ འབིང་འདེ་ ཡ་ཧུ་འདཱེ་ ཡུལ་ཞོང་ལ་ རྐྱོད་, ཏེ་ནི་ ཏུ་རུ་ ཡོ་ཀ་ནེ་ ལོབ་ཀྲུག་རྒུ་ནི་ལ་ ཉེ་རང་ངེ་ ཧ་ལེ་ཤེ་ ཛེད་པ་རྒུན་ ཐོང་ཉེན་ནེན་། 4 མིང་ཅེན་ འགྱུར་ཤེ་ འདོད་པ་ ཡོ་ཀན་རྒུ་ནི་ འིཔ་ཏེ་ ལེ་ཧ་ ཅོའོ་ མག་། ཀལ་ཏེ་ ཉེ་རང་ལ་ འི་ཟུག་ ཛེད་པ་རྒུན་ ཛེད་ཉེན་ནི་ འཇིག་རྟེན་ སོན་ཏེ་ ངོན་ ཅུག་རྒང་།” 5 ཁོང་ངེ་ ནོ་རྒུ་ནི་ ཁོང་ངེ་ཀ་ ཏེཏ་པ་ མ་ཅོའེ་།

6 ཡི་ཤུའི་ ཁོང་རྒུན་ལ་ མོལ་, “ཁྱི་ཞ་རྒུན་ ཡེ་རུ་ཤ་ལེམ་མེ་ན་ ནམ་ ཆ་ན་ འགྲིག་རྒེ་ནོག་, འིན་ན་ ངེ་ ཏུའི་རྦོ་ ཏ་རུང་ མ་ལེབ་རྦེ་འིན་། 7 ཁྱི་ཞ་རྒུན་ལ་ འཇིག་རྟེན་ནེ་ ཏེཏ་པ་ མེ་ཀན་རྒུ་ནི་ སོག་པོ་ མི་ཅོ་, འིན་ན་ ང་ སོག་པོ་ ཅོ་ནོག་, ཅེ་ཟེར་ནི་ ངེ་ ཁོང་རྒུ་ནི་ ལེ་ཧ་ ངན་པ་རྒུ་ནི་ ཧོར་ལ་ སྤང་པོ་ ཏང་ངེ་ཡོད་། 8 ཁྱི་ཞ་རྒུན་ ཏུའི་ཤེན་ལ་ སོང་ཧེ་, ང་ མི་ཆ་ ཅེ་ཟེར་ནི་ ངེ་ ཏུའི་ ཏ་རུང་ མ་ལེབ་རྦེ་འིན་།” 9 ཏོ་ མོལ་རྡེ་ ཡི་ཤུ་ འགཱ་ལིལ་ལེ་ ཡུལ་ཞོང་ལ་ ཞུ་རྡེ་ ཛེད་། 10 འིན་ན་ ཁོང་ངེ་ ནོ་རྒུན་ ཏུའི་ཤེན་ལ་ སོང་འདེ་ ལྟིང་ནི་, སུ་ལ་ ཤེ་ མ་ཤུག་ལ་ འིཔ་ཏེ་ ཁོང་ལ་ ཡེ་རུ་ཤ་ལེམ་མེ་ན་ ཏུའི་ཤེན་ལ་ རྐྱོད་། 11 ཏུ་རུ་ ཡ་ཧུ་འདཱ་པེ་ འུ་རྐྱོང་རྒུ་ནི་ ཏུའི་ཤེན་ནེ་ ཏུའི་ལ་, “ཁོ་ ཀ་ན་ འདུག་” ཟེ་རེན་ ཙལ་ལེ་ཡོད་པེན་། 12 ཏུ་རུ་ མི་ཚོག་རྒེ་ན་ ཁོང་ངེ་ ཧོར་ལ་ ཤབ་ཤུབ་ ཏྃ་རྡེ་ ཁ་ཅིག་རྒེ་, “ཁོང་ ཟང་པོ་ ནོག་” ཡང་ ཁ་ཅིག་རྒེ་, “ཁོའེ་ མི་རྒུན་ལ་ འགོ་ཧོར་རྡེ་ ནོག་” ཟེར་། 13 ཡ་ཧུ་འདཱ་པེ་ འུ་རྐྱོང་རྒུན་ལ་ འཇིའི་ ཤེ་ཀ་ནི་, སུ་ཞིག་ལ་ ཁོང་ངེ་ ཧོར་ལ་ ཚང་མེ་ འདུན་ལ་ ཅང་ ཟེ་རེ་མེད་པེན་།

ཡི་ཤུའི་ ཀོན་འཇོག་རྒེ་ ཁང་པེ་ན་ ལབ་ཞ་ སལ་།

14 ཏེ་ནི་ ཏུའི་ཤེན་འབོ་ ཕེད་ ཚར་རེ་ཟམ་ཞིག་, ཡི་ཤུ་ ལྟག་ལ་ ཀོན་འཇོག་རྒེ་ ཁང་པ་ལ་ རྐྱོད་ཏེ་ ལབ་ཞ་ སལ་ཅེ་ འགོ་ཟུག་ ཛེད་། 15 ཡ་ཧུ་འདཱ་པེ་ འུ་རྐྱོང་རྒུན་ ཧ་ལེ་རྡེ་ ཟེར་, “ལོབ་ཞོང་ མ་ནི་ མ་ཐོབ་ཀན་ འི་ མི་རྦོ་ འི་ཟམ་ ཁེ་སྤ་ཞིག་ ཀ་ཟུག་ལ་ ནོག་?”

16 ཡི་ཤུའི་ ལེན་སལ་, “ངེ་ ལབ་ཞ་རྒུན་ ང་རང་ངེ་ མན་, ང་ ཀ་ལེ་ ཛེད་ཀ་ནེ་ ཀོན་འཇོག་རྒེ་ ཆོག་ནི་ འིན་། 17 ཀོན་འཇོག་རྒེ་ ཐུག་འདོད་ ནང་ཞིན་ འགྲུ་ལེ་ ཐེད་ཀན་རྒུན་ལ་, ངེ་ ལབ་ཞ་རྒུན་ ཀོན་འཇོག་རྒེ་ ཆོག་ནི་ ནོག་རྒེ་ ཡང་ ང་ ང་རང་ངེ་ ཆོག་ནི་ འིན་ཀན་འབོ་ ཧ་ཀོ་ནོག་། 18 ཁོ་རང་ངེ་ ཝང་ཆེ་ན་ ཟེར་ཧན་འབེ་ རང་རྟོད་ སལ་རྡེ་ ནོག་, འིན་ན་ ཁོ་ ཀ་ལེ་ ཛེད་ཀན་འབོ་ལ་ སི་ཝ་ སལ་ཧན་འབེ་ ཟུན་ མ་ཏང་ངེ་ ཀྲང་པོ་ ཟེ་རེ་ནོག་། 19 ཁྱི་ཞི་ ཕ་མེ་པོ་རྒུན་ལ་ མོ་ཤེ་ ཀཱ་ཁྲིམ་རྒུན་ སལ་རྡེ་ མན་འབེན་ནེ་? འིན་ན་ ཁྱི་ཞ་ སུ་ཞིག་ལ་ ཏོ་ལ་ ཁ་ མ་ཉེན་། ཁྱི་ཞ་རྒུ་ནི་ ཅེ་ ང་ སེད་ཅེ་ ཙོན་འགྲུའི་ ཅོ་ཡོད་?”

20 མི་ཚོག་རྒེ་ ལེན་ཏྃ་, “ཁྱེ་རང་ངེ་ན་ རྡུད་ ཞུ་རྡེ་ནོག་། སུའི་ ཁྱེ་རང་ སེད་ཅེ་ ཙོན་འགྲུའི་ ཅོ་རུག་?”

21 ཡི་ཤུའི་ ཁོང་རྒུན་ལ་ མོལ་, “ངེ་ ཧ་ལེ་ཤེ་ ཛེད་པ་ཞིག་ ཅོའེ་རྦེ་ ཁྱི་ཞ་རྒུན་ ཧ་ལེ་། 22 འིན་ན་ མོ་ཤེ་ འགོཔ་ཅེཏ་ ཅོའེ་ ཟེར་ཧན་ ནང་ཞིན་ ངོའེ་སྤོ་ལ་ ཁྱི་ཞི་ ཕ་མེ་པོ་རྒུ་ནི་ མོ་ཤེ་སང་ ངུལ་ལ་ ཏེ་ ཚིར་རྦོ་ འགོ་ཟུག་ཏེ་ ཡོད་པེན་, ཁྱི་ཞ་རྒུ་ནི་ ངལ་ཚོའེ་ ཞག་ལ་ ཕྲུ་རྒུ་ པུ་ཙ་རྒུན་ལ་ འགོཔ་ཅེཏ་ ཅོ་རུག་། 23 ཏ་ ཁྱི་ཞ་རྒུ་ནི་ མོ་ཤེ་ ཀཱ་ཁྲིམ་པོ་ ཅག་ མི་ཅག་ཅེ་ཕི་, ཀལ་རྡེ་ ངལ་ཚོའེ་ ཞག་ལ་ ཁྱི་ཞ་རྒུ་ནི་ རང་རང་ངེ་ པུ་ཙ་ འགོཔ་ཅེཏ་ ཅོ་ཅུག་ ཉེན་ནེ་ནེ་, ཏེ་ནི་ ངལ་ཚོའེ་ ཞག་ལ་ ངེ་ མི་ཞིག་ ནེད་ནི་ ཕན་ཅུག་ནི་ ཁྱི་ཞ་རྒུན་ལ་ ངེ་ཀ་ ཅེ་ སྲོ་ ཡོང་ངེ་རག་? 24 མི་ སམ་ཚུལ་ནི་ ཐག་མ་ཆོད་རྡེ་ ཀྲང་པེ་ ཐོག་ནི་ ཐག་ཅོད་ ཅོའེ་ཧེ་།”

ཡི་ཤུ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ནོག་རྒེ་?

25 ཡེ་རུ་ཤ་ལེམ་པ་ ཁ་ཅིག་རྒེ་ འདྲི་ཅེ་ འགོ་ཟུག་, “ཁོང་རྒུ་ནི་ སེད་ཅེ་ ཙོན་འགྲུའི་ ཅོ་ཀ་ནེ་ མིའུ་ འེ་རྒ་རྦོ་ མ་ནོག་རྒེ་? 26 ལྟོའེ་རྡང་ ཁོའེ་ ཨ་ཧོ་ ཚང་མེ་ འདུན་ལ་ ངོན་འདེ་ ལབ་ཞ་ ཏང་ངེ་ལ་, ཡང་ འུ་རྐྱོང་རྒུ་ནི་ ཁོང་ངེ་ རྒྱཔ་འགལ་ལ་ ཅང་ ཟེ་རེ་ མི་འདུག་། ཅི་ ཁོང་རྒུ་ནི་ ཁོ་ མ་ཤི་ཀ་ ནོག་ ཟེར་རྡེ་ རྡེན་འབའ་ ཐག་ཅོད་ ཅོའེ་རྡེ་ མ་ནེ་ཧེ་? 27 འི་ མི་ ཀ་ནི་ འིན་ ང་ཞ་ རྒྱུའི་ཡོད་, འིན་ན་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྐྱོད་རྡེ་རྡང་ ཁོང་ ཀ་ནི་ འིན་ སུ་ལ་ རྒྱུའི་ མི་ཆ་།”

28 ཡི་ཤུའི་ ཀོན་འཇོག་རྒེ་ ཁང་པེ་ན་ ལབ་ཞ་ སལ་ཟ་ནི་ ཤེད་ ཏང་ མོལ་, “ཁྱི་ཞ་ ང་ ཤེ་རྡེ་ནོག་། ཡང་ ང་ ཀ་ནི་ ཡོྃ་ ཏོ་ལ་ རྒྱུའི་ནོག་། ང་ ང་རང་ངེ་ ཝང་ཆེ་ན་ འི་རུ་ མ་ཡོྃ་རྦེན་ འིན་ན་ ང་ ཀ་ལེ་ ཛེད་ཀན་འབོ་ རྡེན་འབའ་ འིན་, ཁྱི་ཞ་རྒུ་ནི་ ཁོང་ ཤེ་རྡེ་ མག་། 29 ངེ་ ཁོང་ ཤེ་རྡེ་ཡོད་ ཅེ་ཟེར་ནི་ ང་ ཁོང་ངེ་ ཆོག་ནི་ ཡོྃ་རྡེ་ འིན་ ཡང་ ཁོང་ངེ་ ང་ ཀ་ལེ་ ཛེད་ཏེ་ འིན་།” 30 ཏོ་ ཚོར་རེ་རྡང་ འུ་རྐྱོང་རྒུ་ནི་ ཁོང་ ཟུམ་ཅེ་ཕི་ ཙོན་འགྲུའི་ ཅོའེ་། འིན་ན་ སུ་ཞིག་ལ་ ཁོང་ལ་ ལག་པ་ མ་སེ་ ཅེ་ཟེར་ནི་ ཁོང་ངེ་ ཏུའི་རྦོ་ ཏ་རུང་ མ་ལེབ་རྦེ་ འིན་འབེན་།

31 འིན་ན་ མི་ཚོག་རྒེ་ ཕྲོ་ནི་ མང་པེ་ ཁོང་ངེ་ཀ་ ཏེཏ་པ་ ཅོའེ་རྡེ་ ཟེར་, “ཅི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྐྱོད་རྡེ་རྡང་ འི་ མི་རྦེ་སང་ མང་ངེ་ ཧ་ལེ་ཤེ་ ལྟའ་རྒུན་ ལྟན་ནེ་ནེ་ཧེ་?”

32 མི་ཚོག་རྒེ་ ཡི་ཤུའི་ ཧོར་ལ་ ཏུ་ཟུག་ ཤབ་ཤུབ་ ཏང་ཅེའོ་ པ་རུ་ཤི་པ་རྒུ་ནི་ ཚོར་རེ་རྡང་, ཁོང་རྒུན་ འདང་ ལ་མ་ འུ་རྐྱོང་རྒུ་ནི་ ཀོན་འཇོག་རྒེ་ ཁང་པ་ སྲུང་ཀ་ནེ་ མག་མི་རྒུན་ ཁོང་ ཟུམ་འདེ་ ཁྱོང་ཅེ་ལ་ ཀལ་། 33 ཡི་ཤུའི་ མི་རྒུན་ལ་ མོལ་, “ཏུའི་ ཉུང་ཙེ་ཞིག་ ང་ ཁྱི་ཞ་རྒུན་ ཉམ་པོ་ ཡོད་, ཏེ་ནི་ ང་ ཀ་ལེ་ ཛེད་ཀ་ནེ་ཀ་ ལོག་ཏེ་ ཆ་ཡོད་། 34 ཁྱི་ཞ་རྒུ་ནི་ ང་ ཙ་ལེན་, འིན་ན་ ང་ མི་ཐོབ་, ཡང་ ང་ས་ ཁྱི་ཞ་ ཡོང་ མི་ཉེན་།”

35 ཡ་ཧུ་འདཱ་པེ་ འུ་རྐྱོང་རྒུ་ནི་ ཅིག་ ཏང་ ཅིག་ལ་ ཟེར་, “ཨ་ཧོ་རྒུ་ནི་ ཙལ་ མི་ཉེན་ཅེ་ འི་ མིའུ་ ཀ་རུ་ ཆེན་ ཟེར་རྡེ་ནོག་། ཅི་ ཁོ་ འགི་རིག་པ་རྒུ་ནི་ ཕྲོ་ ཡེན་འདེ་ ཡོ་ཀ་ནེ་ ཨ་ཧོའེ་ མི་རྒུན་ས་ སོང་འདེ་ འགི་རིག་པ་རྒུན་ལ་ ལབ་ཞ་ ཏང་ངེན་ སམ་འདེ་ ནོག་རྒེ་? 36 ཁོའེ་ ‘ཁྱི་ཞ་རྒུ་ནི་ ང་ ཙ་ལེན་, འིན་ན་ ང་ མི་ཐོབ་, ཡང་ ང་ ཡོད་ས་ ཁྱི་ཞ་ ཡོང་ མི་ཉེན་’ ཟེར་ཤེ་ ཏོན་འབོ་ ཅི་ འིན་ཧེ་?”

37 ཏུའི་ཤེན་ནེ་ ལྟིང་འཇུག་རྒེ་ ཞག་, ཚང་མེ་སང་ ཁག་ཅེན་ནེ་ ཞག་ལ་ ཡི་ཤུའི་ ཞྃ་རྡེ་ ཀུ་ཅུ་ ས་ལེན་ མོལ་, “ཀལ་ཏེ་ སུ་ཞིག་ ཧོམ་མེ་ ཡོད་ནི་, ང་ས་ ཡོྃ་རྡེ་ ཐུང་ཧེ་, 38 ཏམ་པེ་ སུང་རབ་རྦེ་ན་ མོལ་ལེ་ནོག་, ‘ཏེཏ་པ་ ཅོ་ཀ་ནེ་ སེམ་མེ་ ནང་ནི་ མི་ཙེ་ ཏང་ཀ་ནེ་ ཆུའི་ སྃ་སྤོ་རྒུན་ རྒྱུག་རྒེན་།’” 39 མི་ཙེ་ ཏང་ཀ་ནེ་ ཆུ་རྦོ་ ཏམ་པེ་ ཐུག་ཡིད་ འིན་, ཀའོ་ ཁོང་ངེ་ཀ་ ཏེཏ་པ་ ཅོ་ཀན་རྒུན་ལ་ ལྟིང་ནི་ ཐོབ་ཅེ་ འིན་འབེན་, འིན་ན་ ཏེ་ཏུའི་ཚུག་པ་ ཏམ་པེ་ ཐུག་ཡིད་ སལ་ལེ་ མ་ཛེ་རྡེ་ འིན་འབེན་, ཅེ་ཟེར་ནི་ ཏ་རུང་ ཡི་ཤུ་ ཏག་རྒེ་ ཛེད་ཏེ་ ཁོང་ལ་ སྤལ་ མ་ཐོབ་རྦེ་ འིན་འབེན་།

40 ཏེ་ སྤེ་ར་རྒུན་ ཚོར་རྡེ་ ཁ་ཅིག་རྒེ་ ཟེར་, “ནེན་ཏེན་ འི་ མི་རྦོ་ ཀོན་འཇོག་རྒེ་ ལུང་རྟོན་པ་ རྐྱོད་ཅེ་ཅེན་འབོ་ ནོག་ ཀ་འབོ་ལ་ ཨ་ཧོ་རྒུན་ སྲུྃ་རྡེ་ ཡོད་པེན་།” 41 ཡང་ ཁ་ཅིག་རྒེ་ ཟེར་, “ཁོང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ནོག་” ཞེན་ ཁ་ཅིག་རྒེ་, “མ་ཤི་ཀ་ ཅི་ འགཱ་ལིལ་ ཡུལ་ནི་ ཕེབ་ཅེ་ཅེན་ ནོག་རྒེ་? 42 ཏམ་པེ་ སུང་རབ་རྦེ་ན་ མོལ་འདེ་ མི་འདུག་རྒེ་? མ་ཤི་ཀེ་ རྒྱ་སྤོ་ འདཱ་འབིད་རྡེ་ ཕར་རྒྱུད་ ཡང་ རྒྱ་སྤོ་ འདཱ་འབིད་ རྐྱེ་སེ་ ཡུལ་ འབེད་ལེ་ཧེམ་མེ་ ཀྲོང་ཁྱེར་ནི་ འབི་ངེན་།” 43 ཏེ་རྒ་རྦེ་ཕི་ ཡི་ཤུའི་ ཅོའེ་རྡེ་ མི་ཚོག་རྒེ་ན་ པོ་ མང་པོ་ པུད་། 44 ཁ་ཅིག་རྒེ་ ཁོང་ ཟུམ་ཅེ་ འདོད་པ་ པོ་རེ་ཡོད་པེན་, འིན་ན་ སུ་ཞིག་ལ་ ཁོང་ངེ་ ལག་པ་ མ་སེ་།

ཡ་ཧུ་འདཱ་པེ་ འུ་རྐྱོང་ ཁ་ཅིག་རྒེ་ ཡི་ཤུའི་ཀ་ ཏེཏ་པ་ ཅོའེ་།

45 ཀོན་འཇོག་རྒེ་ ཁང་པ་ སྲུང་ཀ་ནེ་ མག་མི་རྒུན་, པ་རུ་ཤི་པ་ རྡང་ ལ་མ་ འུ་རྐྱོང་རྒུ་ནི་ཀ་ ལོག་ཏེ་ ལེབ་རྦེ་རྡང་, ཁོང་རྒུ་ནི་ མག་མི་རྒུན་ལ་ འདྲི་, “ཁྱི་ཞ་རྒུ་ནི་ ཁོ་ ཟུམ་འདེ་ ཅེ་ མ་ཁྱོྃ་རྦེན་?”

46 མག་མི་རྒུ་ནི་ ལེན་ཏྃ་, “ང་ཞ་ ཡུ་ཙོག་སེ་ ལབ་ཞ་ སལ་ཧན་ཞིག་ མ་ནི་ མ་ཚོར་།”

47 ཏེ་ནི་ པ་རུ་ཤི་པ་རྒུ་ནི་ ཟེར་, “ཁྱེ་རང་རྒུ་ནི་ ཁོའེ་ འགོམ་ཧོར་རེ་ན་ སོང་འདེ་ འིན་ནེ་? 48 ཝང་སྲུལ་པ་རྒུན་ འདང་ པ་རུ་ཤི་པ་རྒུ་ནི་ ནང་ནི་ ཅིག་ལ་ ཁོའེ་ཀ་ ཏེཏ་པ་ ཅོའེ་ཧ་རྒེ་? 49 འིན་ན་ ཀཱ་ཁྲིམ་མེ་ ཧོར་ལ་ ཅང་ རྒྱུའི་ མེ་ཀ་ནེ་ འི་ མི་ཚོག་པེ་ ཁོའེ་ཀ་ ཏེཏ་པ་ ཅོའེ་། ཁོང་རྒུན་ལ་ ངན་ ཕོག་ཏེ་ ནོག་།”

50 ཁོང་རྒུ་ནི་ ཁྲོ་པ་ པ་རུ་ཤི་པ་ ནི་ཀོ་འདེ་མུ་ ཀའོ་ ངུལ་ལ་ ཡི་ཤུ་ ཏྲི་ཝ་ འདྲི་ལ་ སོང་འདེ་ འིན་འབེན་, ཁོའེ་ ཁོང་རྒུན་ལ་ འདྲི་, 51 “ཨ་ཧོའེ་ ཀཱ་ཁྲིམ་ ནང་ཞིན་ ངུལ་ལ་ མི་ཞིག་ལ་ ཁོའེ་ ཅོའེ་ཧན་ནེ་ ཧོར་ལ་ ཉེན་འདེ་ མ་ནི་ ཁོ་ ཁྲིམ་ཅེད་ མི་ཉེན་ ཟེར་རྡེ་ མི་འདུག་རྒེ་?”

52 ཁོང་རྒུ་ནི་ ཟེར་, “ཅི་ ཁྱེ་རང་ང་ འགཱ་ལིལ་པ་ འིན་ནེ་? ཏམ་པེ་ སུང་རབ་རྦེ་ན་ ཙལ་ནི་ ཁྱེ་རང་ལ་ འགཱ་ལིལ་ལེ་ ལུང་རྟོན་པ་ཞིག་ འབིང་ཀན་འབོ་ མ་ནི་ མི་ཐོབ་།”

53 ཏེ་ནི་ ཁོང་ ཚང་མ་ ལྃ་རྡེ་ རང་རང་ངེ་ ཁང་པ་ སོང་།