ཡི་ཤུའི་ མི་ ལྟོང་ང་ འགྲྃ་ཤུག་རྒེ་ ཛེད་།
6
ཞག་ ཁ་ཅིག་རྒེ་ ལྟིང་ནི་ ཡི་ཤུ་ ཆུ་འགྲུལ་ལེ་ན་ ཞོན་ནེ་ ཛེད་ཏེ་, འགཱ་ལིལ་ལེ་ ཚོའེ་ ཕར་ཧ་ རྐྱོད་ ཀ་འབོ་ལ་ ཏི་འབེ་རི་ཡཱེ་ ཚོ་ ཟེར་རེ་ནོག་། 2 མི་ཚོག་ མང་པོ་ཞིག་ ཁོང་ལ་ འགྲྃ་རྡེ་ ཡོྃ་, ཅེ་ཟེར་ནི་ ཁོང་རྒུ་ནི་ ཡི་ཤུའི་ ནེད་པ་ ཕན་ཅུག་རྒེ་ ཛེད་ཀ་ནེ་ ལྟའ་རྒུན་ ཐོང་འདེ་ འིན་འབེན་། 3 ཡི་ཤུ་ རི་ལ་ ཛག་ཏེ་ རྐྱོད་ཏེ་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཐང་ཀེ་ཀ་ ཞུའུ་། 4 ཡ་ཧུ་འདཱ་པེ་ པེ་སག་རྒེ་ ཏུའི་ཤེན་ ཉེ་མོ་ ཡོད་པེན་། 5 ཡི་ཤུའི་ ཨུ་ ཏག་ཏེ་ མི་ཚོག་ མང་པོ་ ཁོང་ ཆོག་ལ་ ཡོང་ངེན་ ཟིའི་ ཡང་ ཁོང་ངེ་ ཕི་ལིབ་ལ་, “འི་ མི་ཚང་མ་ ཟ་ ཏང་ཅེ་ ཏི་རྒིར་ ཨ་ཧོའེ་ ཀ་ནི་ ཉོའེན་” མོལ་། 6 ཡི་ཤུའི་ ཁོའེ་ ཅི་ ཟེར་འདུག་ ལྟ་ཅེ་ལ་ ཏོ་ འདྲི་ ཛེད་, ཅེ་ཟེར་ནི་ ཁོང་ངེ་ ཅོའོ་ ཛེད་ཅེའོ་ ཁོང་ལ་ ཐུག་རྒྱུའི་ ཡོད་པེན་།7 ཕི་ལིབ་རྦེ་ ཁོང་ལ་ ཟེར་, “ཀལ་ཏེ་ ལྡ་ རྒྱེད་རྡེ་ ལ་ཆ་ འདྲན་འདྲེ་ ཏི་རྒིར་ ཉོ་ནང་ འི་ མི་ཚང་མ་ལ་ ཁམ་འབུ་ རེ་རེ་ མ་ནི་ ཏི་རྒིར་ མི་ཐོབ་།”
8 ཡི་ཤུའི་ ཡང་ ལོབ་ཀྲུག་ ཅིག་, ཤི་མོན་ པི་ཏྲ་རེ་ ནོ་ ཨན་འགྲིརུ་ ཁོང་ལ་ ཟེར་, 9 “འི་ཀ་ ཕྲུ་རྒུ་ཞིག་རྒེ་ ལག་ལ་ ནེའེ་རྡེ་ ཏི་རྒིར་ ང་ རྡང་ ཉ་ ཉི་ འདུག་, འིན་ན་ ཏོ་རྦེ་ འི་ཟམ་ཤི་རྒེ་ མི་ལ་ ཅི་ ཅོའེན་?”
10 ཡི་ཤུའི་, “མི་རྒུན་ ཐང་ཀེ་ཀ་ འདེད་ཅུག་” མོལ་། ཏུ་རུ་ སྤང་ ངོན་པོ་ མང་པོ་ ཡོད་པེན་ མི་ཚང་མ་ ཐང་ཀེ་ཀ་ འདེད་, ཏེ་ མི་ཚོག་རྒེ་ན་ པུ་ཙ་ ལྡན་ཀན་ ལྟོང་ང་ ཧ་ལམ་ ཡོད་པེན་། 11 ཡི་ཤུའི་ ཏི་རྒིར་རྒུན་ ཆག་ལ་ ནམ་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་, འདེད་ཏེ་ ཡོ་ཀན་ ཚང་མ་ལ་ རང་རང་ངེ་ རྒོའེ་འདོམ་ ནང་ཞིན་ རྒོའེ་རྡེ་ ཏང་ལ་ སལ་, ཏེ་རྒ་ ཙོག་སེ་ ཉ་རྒུན་ལ་ རྒོའེ་རྡེ་ ཏང་ངེ་ ཛེད་། ཡང་ ཏེ་ མི་ཚང་མ་ ཙམ་ ཐེད་ཐེད་ ཟོའེ་། 12 ཁོང་ ཚང་མ་ ཟོའེ་རྡེ་ ཚིམ་མེ་རྡང་, ཡི་ཤུའི་ ལོབ་ཀྲུག་རྒུན་ལ་ མོལ་, “ཀོད་ལ་ ཅང་ མི་ཆ་ཤེ་ཕི་ ལག་ལུའི་རྒུན་ རྡུའི་རྡེ་ ཁྱོང་།” 13 ཏེ་ནི་ མི་རྒུ་ནི་ ནེའེ་རྡེ་ ཏི་རྒིར་ ལྔེ་ཀ་ནི་ ཟོའེ་རྡེ་ ལག་ལུའི་ ཏི་རྒིར་རྒུན་ རྡུའི་རྦེ་ ཙེ་སྤོ་ ཅུག་ཉི་ ཀང་།
14 མི་རྒུ་ནི་ ཁོང་ངེ་ ཧ་ལེ་ཤེ་ ལྟའ་རྦོ་ ཐོང་ངེ་རྡང་, “ནེན་ཏེན་ལ་ ཨ་ཧོ་ སྲུྃ་རྡེ་ ཡོ་ཀ་ནེ་ ལུང་རྟོན་པ་, འེ་རྒ་རྦོ་ ནོག་” ཟེར་། 15 ཁོང་རྒུ་ནི་ ཡི་ཤུ་ ཟུམ་འདེ་ ཝང་ ཉམ་པོ་ ཁོ་རང་རྒུ་ནི་ རྒྱ་སྤོ་ལ་ ཧོ་ཅེ་འབོ་ ཁོང་ངེ་ ཁྱེན་ཅེ་ཀ་ནི་ ཅེཔ་ཁ་རོག་ཏེ་ མི་ཚོག་རྒེ་ ནང་ནི་ འབིང་འདེ་ ཁོ་རང་ ཅིག་པོ་ རི་ཀ་ ཛག་ཏེ་ རྐྱོད་།
ཡི་ཤུ་ ཆུའི་ཀ་ འགྲུ་ལེ་ ཛེད་།
16 ནམ་ཅུ་རུ་རྒེ་རྡང་ ཁོང་ངེ་ ལོབ་ཀྲུག་རྒུན་ ཡོག་ལ་ པབ་ཏེ་ ཚོའེ་ ཐ་མ་ རྐྱོད་, 17 ཡང་ ཚོའེ་ ཕར་ཧ་ལ་ ཀ་ཕར་ན་ཧུམ་མེ་ ཀྲོང་ཁྱེར་ལ་ ལོག་ཏེ་ ཆ་ཅེ་ལ་ ཆུ་འགྲུལ་ལེ་ན་ ཞོན་། ཏ་ ནམ་ཅུ་ རུ་ཏེ་ ཡོད་པེན་ ཡང་ ཡི་ཤུ་ ཁོང་རྒུན་ ཉམ་པོ་ མ་རྐྱོད་རྡེ་ འིན་འབེན་། 18 ཧུན་མེད་ལ་ རྒྱམ་ཚོའེ་ན་ ལུང་ཀྲག་ ཡོྃ་རྡེ་ ཆུལ་རྦག་ ཀྲག་པོ་ རྒྱཔ་། 19 ཆུ་འགྲུལ་རྦོ་ ཚོའེ་ ཐ་མ་ནི་ ཀྱེ་ལོ་མི་ཀྲར་ ལྔ་ ཡང་ ཀྲུག་ ཟམ་ཤིག་ ཐག་རིང་ལ་ ལེབ་ཏེ་ ཡོད་ཟ་ནི་ ལོབ་ཀྲུག་རྒུ་ནི་ ཡི་ཤུ་ ཆུ་འགྲུལ་ ཆོག་ལ་ ཆུའི་ཀ་ ཞཔ་འགྲུལ་ལ་ རྐྱོད་རྡེ་ ཐོང་འདེ་ ཧོཔ་ འཇིའི་། 20 འིན་ན་ ཡི་ཤུའི་ ཁོང་རྒུན་ལ་ འབོ་ ཛེད་ཏེ་ “འཇིའི་ མ་འཇིའི་ ང་ འིན་” མོལ་། 21 ཏེ་ནི་ ཁོང་རྒུ་ནི་ ཡི་ཤུ་ ཆུ་འགྲུལ་ན་ རྐྱོད་ཅུག་, ཁོང་རྒུ་ནི་ ཆུ་འགྲུལ་རྦོ་ ཏེ་རྒ་མ་རྒ་ འ་ངོ་ ཕར་ཧ་ ལེཔ་ ཀ་རུ་ ཁོང་རྒུན་ ཆ་ཅེ་ འིན་འབེན་། 22 ཐོ་རེ་ ང་མོ་ ཚོའེ་ ཕར་ཧ་ འདེད་ཏེ་ ཡོ་ཀ་ནེ་ མི་ཚོག་པོ་ལ་ ཏུ་རུ་ ཆུ་འགྲུལ་ ཅིག་ཅིག་ མ་ནི་ མེ་ཀན་ ཡང་ ཡི་ཤུ་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཏེ་ ཆུ་འགྲུལ་ལེ་ན་ མ་རྐྱོད་ཀན་འབོ་ རྒྱུའི་སོང་། 23 ཏེ་ནི་ ཏི་འབེ་རི་ཡཱེ་ ཀྲོང་ཁྱེར་ནི་ ཞེན་ ཆུ་འགྲུལ་ རིག་ ལེབ་ཏེ་ ཏེ་རྒ་ མལ་རྦོ་ལ་ འདེད་, ཀ་རུ་ ཙོབོ་ འདོན་ཀྱིར་རེ་ཕི་ ཐུག་ཞེ་ཆེ་ པུལ་རྡེ་ ཡང་ མི་ཚོག་རྒུ་ནི་ ཟོའེ་རྡེ་ འིན་འབེན་། 24 མི་ཚོག་རྒེ་ ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཏེ་ཀ་ མེ་ཀན་འབོ་ ཧ་ཀོ་རྡང་, ཁོང་རྒུན་ ཆུ་འགྲུལ་རྒུ་ནི་ན་ ཞོན་འདེ་, ཀ་ཕར་ན་ཧུམ་མེ་ ཀྲོང་ཁྱེར་ལ་ ཡི་ཤུ་ ཙལ་ལེ་ སོང་།
ཡི་ཤུའི་ སྲོག་ སལ་ཧ་ནེ་ འདོན་ཀྱིར་།
25 ཚོའེ་ ཕར་ཧ་ མི་ཚོག་རྒེ་ ཡི་ཤུ་ ཐོབ་རྦེ་རྡང་ ཟེར་, “ལོབ་རྦོན་ལེ་, ཉེ་རང་ འེ་ཀ་ ནམ་ རྐྱོད་པེན་?”
26 ཡི་ཤུའི་ ཁོང་རྒུན་ལ་ ལེན་སལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ཁྱི་ཞི་ ངེ་ ཧ་ལེ་ཤེ་ ཛེད་པ་རྒུན་ ཧ་ཀོ་ཅོའེ་ མན་འབེ་ ངེ་ ཁྱི་ཞ་ ཟ་ཅེ་ ཏི་རྒིར་ ཏང་ཅེ་ཀ་ནི་ ང་ ཙལ་རྡེ་ ནོག་། 27 རུལ་ཅེ་ཅེན་ མན་ཀན་, ཐ་མེད་པེ་ མི་ཙེ་ ཐོབ་ཅེ་ ཁར་ཞི་ ཙལ་ཤེ་ལ་ ཙོན་འགྲུའི་ ཅོའེ་ཧེ་, ཏོ་ མི་རིག་རྒེ་པུའི་ ཁྱི་ཞ་རྒུན་ལ་ ཏང་ངེན་ ཅེ་ཟེར་ནི་ ཡབ་ ཀོན་འཇོག་རྒེ་ ཏོ་འབོ་ ཏང་ཅེ་ ཝང་ཆ་ ང་ སལ་ལེ་ ཛེད་ཏེ་ འིན་།”
28 ཁོང་རྒུ་ནི་ ཡི་ཤུ་ ཟེར་, “ཀོན་འཇོག་ ཐུག་ཐེད་ཅུག་ཅེ་ལ་ ང་ཞི་ ཅི་ ལེ་ཧ་ རིག་ ཅོ་རྒོའེ་?”
29 ཡི་ཤུའི་ ཁོང་རྒུན་ལ་ མོལ་, “ཀོན་འཇོག་ ཐུག་ཐེད་ཀ་ནེ་ ལེ་རྦོ་ ཁོང་ངེ་ ཀ་ལེ་ ཛེད་ཀན་འབེ་ཀ་ ཏེཏ་པ་ ཅོ་ཅེ་འབོ་ ནོག་།”
30 ཏེ་ནི་ ཁོང་རྒུ་ནི་ ཡི་ཤུ་ ཟེར་, “ཉེ་རང་ངེ་ ཅི་ ཅོའོ་ ཛེད་རྡེན་? ང་ཞི་ ཉེ་རང་ངེ་ཀ་ ཏེཏ་པ་ ཅོ་ཅེ་ལ་ ཉེ་རང་ངེ་ ང་ཞ་ ཧ་ལེ་ཤེ་ ལྟའ་ ཀ་ཟུག་ཤིག་ ལྟན་ནེ་ ཛེ་རྡེན་? 31 སྤེར་ན་ ང་ཞི་ ཕ་མེ་པོ་རྒུ་ནི་ རི་ལྟོང་ངེ་ན་ མན་ན་ ཟེར་ཧ་ནེ་ ཏི་རྒིར་ ཟོའེ་, སུང་རབ་རྦེ་ན་ མོལ་རྡེ་ ནོག་, ‘མོ་ཤེ་ ཁོང་རྒུན་ལ་ རྡེ་བ་ཅན་ནེ་ ཟ་ཅེ་ལ་ ཏི་རྒིར་ སལ་།’”
32 ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ཏེ་ ཏི་རྒིར་རྒུན་ རྡེ་བ་ཅན་ནེ་ ཁྱི་ཞི་ ཕ་མེ་པོ་རྒུན་ལ་ མོ་ཤེ་ མ་ནོག་, ངེ་ ཡབ་རྦེ་ སལ་ལེ་ ཛེད་ཏེ་ འིན་འབེན་, ཁོང་ངེ་ རྡེ་བ་ཅན་ནེ་ རྡེན་འབེ་ ཏི་རྒིར་རྦོ་ སལ་ལེ་ ཛེ་རྡེ་ནོག་། 33 ཀོན་འཇོག་རྒེ་ ཏི་རྒིར་རྦོ་ རྡེ་བ་ཅན་ནི་ ཡོྃ་རྡེ་ འཇིག་རྟེན་པ་རྒུན་ལ་ མི་ཙེ་ སལ་ཧན་འབོ་ འིན་།”
34 ཁོང་རྒུ་ནི་ ཟེར་, “ཙོབོ་ལེ་, འི་ ཏི་རྒིར་རྦོ་ ང་ཞ་ ཏུའི་རྒྱུན་ སལ་ལེ་ ཛེད་།”
35 ཡི་ཤུའི་ ཁོང་རྒུན་ལ་ མོལ་, “ང་ནི་ མི་ཙེ་ ཏང་ཀ་ནེ་ ཏི་རྒིར་ འིན་། ངེ་ཀ་ ཡོང་ཀན་རྒུན་ མ་ནི་ མི་ལྟོག་, ཡང་ ངེ་ཀ་ ཏེཏ་པ་ ཅོ་ཀན་རྒུན་ མ་ནི་ མི་ཧོམ་། 36 འིན་ན་ ཀ་ཟུག་ ངེ་ ཁྱི་ཞ་རྒུན་ལ་ ཟེར་རྦེན་, ཁྱི་ཞ་རྒུ་ནི་ ངེ་ ལེ་ཧ་རྒུན་ ཐོང་འདེ་ ཏེཏ་པ་ མ་ཅོའེ་། 37 ཡབ་རྦེ་ ང་ སལ་ལེ་ ཛེད་ཀན་ ཚང་མ་ ངེ་ཀ་ ཡོང་ངེན་, ཡང་ ངེ་ཀ་ ཡོང་ཀན་རྒུན་ ངེ་ མ་ནི་ མི་ཕང་། 38 ང་རང་ངེ་ འདོད་པ་ མན་ ང་ ཀ་ལེ་ ཛེད་ཀན་ ངེ་ ཡབ་རྦེ་ ཐུག་འདོད་རྒུན་ ཀྲུཔ་ཅུག་ཅེ་ཕི་ ང་ རྡེ་བ་ཅན་ནེ་ ཡོག་ལ་ ཡོང་རྦེན་། 39 ང་ ཀ་ལེ་ ཛེད་ཀན་འབེ་ ཐུག་འདོད་ནི་, ཁོང་ངེ་ ང་ སལ་ལེ་ ཛེད་ཀན་ ཚང་མེ་ ནང་ནི་ ཅིག་ལ་ རྐྱལ་ མ་ཅུག་རྒེ་ལ་, ཐ་མེ་ ཞག་ལ་ ཁོང་རྒུན་ སོན་པོ་ ལང་ཅུག་ཅེའོ་ འིན་། 40 འོ་ནེ་ ངེ་ ཡབ་རྦེ་ ཐུག་འགོང་ནི་, སྲེ་ ཐོང་འདེ་ ཏེཏ་པ་ ཅོ་ཀན་ ཚང་མ་ལ་ ཐ་མེད་པེ་ མི་ཙེ་ ཐོབ་ཅེ་ ཡང་ ངེ་ ཁོང་རྒུན་ ཐ་མེ་ ཞག་ལ་ སོན་པོ་ ལང་ཤེའོ་ འིན་།”
41 “ང་ནི་ རྡེ་བ་ཅན་ནེ་ པབ་ཀ་ནེ་ ཏི་རྒིར་རྦོ་ འིན་།” མོལ་ཅོའེ་ ཡ་ཧུ་འདཱ་པ་རྒུ་ནི་ ཁོང་ངེ་ ཧོར་ལ་ ཟེར་རྒྱུ་ ཏང་ཅེ་ འགོ་ཟུག་། 42 ཁོང་རྒུ་ནི་ ཟེར་, “ཁོ་ ཅི་ ཡོ་སེབ་རྦེ་ པུ་ཙ་ ཡི་ཤུ་ མ་ནོག་རྒེ་? ཁོའེ་ ཕ་མ་རྒུན་ ཨ་ཧོ་རྒུ་ནི་ ཤེ་རྡེ་ནོག་? ཏེ་ནི་ ཁོའེ་ ཀ་ཟུག་རྒེ་ ཟེ་ནོག་, ‘ང་ རྡེ་བ་ཅན་ནེ་ པབ་ཏེ་ འིན་?’”
43 ཡི་ཤུའི་ ཁོང་རྒུན་ལ་ མོལ་, “ངེ་ ཟེར་ཧན་རྒུ་ནི་ ཧོར་ལ་ ཁྱི་ཞ་རྒུ་ནི་ ཟེར་རྒྱུ་ ཏང་ཅེ་ ཕོང་ཧེ་། 44 སུ་ཞི་ལ་ ངེ་ཀ་ ཡོང་ མི་ཉེན་ ནམ་ཚུག་པ་ ང་ ཀ་ལེ་ ཛེད་ཀ་ནེ་ ཡབ་རྦེ་ ཁོ་ ངེ་ཀ་ ཁྱོང་ངེ་ མི་ཛེད་, ཡང་ ངེ་ ཁོ་ ཐ་མེ་ ཞག་ལ་ སོན་པོ་ ལང་ངེན་། 45 ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་, ‘ཀོན་འཇོག་རྒེ་ ཁོང་ ཚང་མ་ལ་ ལབ་རྦེ་ ཛེ་རྡེན་།’ ཡབ་རྦེ་ ལབ་ཞ་ ཉེན་འདེ་ ཁོང་ངེ་ཀ་ནི་ ལོབ་ཀ་ནེ་ མི་རྒུན་ ངེ་ཀ་ ཡོང་ངེན་། 46 ཀོན་འཇོག་རྒེ་ ཆོག་ནི་ ཡོང་ཀན་འབོ་ མན་བ་ སུ་ཞིག་ལ་ ཡབ་ མ་འཇལ་, ཁོ་ ཅིག་པེ་ ཡབ་ འཇལ་རྡེ་ འིན་།”
47 “ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ཀ་ ཏེཏ་པ་ ཅོ་ཀན་རྒུན་ལ་ ཐ་མེད་པེ་ མི་ཙེ་ ཐོབ་ཏེ་ འིན་། 48 ང་ནི་ སྲོག་ ཏང་ཀ་ནེ་ ཏི་རྒིར་རྦོ་ འིན་། 49 ཁྱི་ཞི་ ཕ་མེ་པོ་རྒུ་ནི་ རི་ལྟོང་ངེ་ན་ མན་ན་ ཟེར་ཧ་ནི་ ཏི་རྒིར་ ཟོའེ་ འིན་ན་ ཁོང་རྒུན་ ཤི་། 50 འེ་ཀ་ རྡེ་བ་ཅན་ནེ་ པབ་ཀ་ནེ་ ཏི་རྒིར་རྦོ་ ཡོད་, འི་ ཏི་རྒིར་ ཟེ་ཀན་རྒུན་ མ་ནི་ མི་ཤི་། 51 འོ་ནེ་ ང་ རྡེ་བ་ཅན་ནེ་ པབ་ཀ་ནེ་ མི་ཙེ་ ཏང་ཀ་ནེ་ ཏི་རྒིར་རྦོ་ འིན་། ཀལ་ཏེ་ སུ་ཞིག་རྒེ་ འི་ ཏི་རྒིར་ཀ་ནི་ ཟ་ནི་, ཁོ་ ཐ་མེད་པེ་ སོན་པོ་ ལུའི་རྡེན་། འི་ ཏི་རྒིར་རྦོ་ ངེ་ ཤའོ་ འིན་, ཀའོ་ ངེ་ འཇིག་རྟེན་པ་རྒུན་ལ་ ཐ་མེད་པེ་ མི་ཙེ་ ཐོབ་ཅེ་ཕི་ ཆོད་པ་ ཏང་ངེན་།”
52 ཡ་ཧུ་འདཱ་པ་རྒུ་ནི་ ཕྲོ་ ཟེར་ཟེར་ འགོ་ཟུག་ ཡང་ ཁོང་རྒུ་ནི་ ཟེར་, “འི་ མི་རྦེ་ ཀ་ཟུག་རྒེ་ ཨ་ཧོ་རྒུན་ལ་ ཁོའེ་ ཤ་ ཟ་ ཏང་ངེ་ནོག་?”
53 ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ནམ་ཚུག་པ་ ཁྱི་ཞ་རྒུ་ནི་ མི་རིག་རྒེ་པུའི་ ཤའོ་ མི་ཟ་, ཡང་ ཁོའེ་ ཁྲག་པོ་ མི་ཐུང་ ཁྱི་ཞ་རྒུ་ནི་ན་ རྡེན་འབེ་ མི་ཙེ་ མེད་། 54 ངེ་ ཤ་ ཟོའེ་རྡེ་ ངེ་ ཁྲག་ ཐུང་ཀན་རྒུན་ལ་ ཐ་མེད་པེ་ མི་ཙེ་ ཡོད་། ཐ་མེ་ ཞག་ལ་ ངེ་ ཁོང་རྒུན་ སོན་པོ་ ལང་ངེན་, 55 ཅེ་ཟེར་ནི་ ངེ་ ཤ་ རྡེན་འབེ་ ཁར་ཞི་ ཡང་ ངེ་ ཁྲག་ རྡེན་འབེ་ ཐུང་ཅེའོ འིན་། 56 ཡང་ ངེ་ ཤ་ ཟོའེ་རྡེ་ ངེ་ ཁྲག་ ཐུང་ཀན་རྒུན་ ངེ་ན་ ཡང་ ང་ ཁོང་རྒུ་ནི་ན་ ལུའི་རྡེ་ ཡོད་། 57 སྲོག་ སལ་ལེ་ ཛེད་ཀ་ནེ་ ཡབ་ ཀ་རྦེ་ ང་ ཀལ་ལེ་ ཛེད་ ཁོང་ངེ་ ཅོའེ་རྡེ་ ང་ སོན་པོ་ འིན་, ཏེ་རྒ་ ཙོག་སེ་ སུ་ཞིག་རྒེ་ ངེ་ཀ་ནི་ ཟ་ནི་ ངེ་ ཅོའེ་རྡེ་ ཁོ་ སོན་པོ་ ལུའི་རྡེན་། 58 ང་ རྡེ་བ་ཅན་ནི་ པབ་ཀ་ནེ་ ཏི་རྒིར་རྦོ་ འིན་། ཁྱི་ཞི་ ཕ་མེ་པོ་རྒུ་ནི་ མན་ན་ ཟེར་ཧ་ནེ་ ཏི་རྒིར་ ཟོའེ་རྡེ་ ཤི་, འིན་ན་ འི་ ཏི་རྒིར་ ཟ་ཀན་རྒུན་ ཐ་མེད་པེ་ སོན་པོ་ ལུའི་རྡེན་།”
59 ཡི་ཤུའི་ ཀ་ཕར་ན་ཧུམ་མེ་ ཀྲོང་ཁྱེར་རེ་ འདུ་ཀང་ངེ་ན་ ལབ་ཞ་ སལ་ཟ་ནི་ ཁོང་ངེ་ ཏོ་རྒུན་ མོལ་།
ལོབ་ཀྲུག་ མང་པེ་ ཡི་ཤུ་ པུད་།
60 ཡི་ཤུའི་ ཞལ་ཏ་རྒུན་ ཚོར་རྡེ་ ཁོང་ངེ་ ལོབ་ཀྲུག་ མང་པེ་ ཟེར་, “ཁོང་ངེ་ ལབ་ཞ་རྒུན་ མ་ ཀག་སྤོ་ འདུག་ སུའི་ ཉེན་ནེན་?”
61 ལོབ་ཀྲུག་རྒུ་ནི་ ཡི་ཤུ་ མོལ་ཧན་ནེ་ རྒྱཔ་འགལ་ལ་ ཟེར་རྒྱུ་ ཏང་ཀན་འབོ་ ཁོང་ངེ་ ཁྱེན་ཅེ་ཀ་ནི་, ཁོང་རྒུན་ལ་ མོལ་, “ངེ་ སྤེ་ར་ ཟེར་ཧན་རྒུན་ ཁྱི་ཞ་ ཁམ་ལོག་ ཚོར་རྡེ་? 62 ཀལ་ཏེ་ ཁྱི་ཞ་རྒུ་ནི་ མི་རིག་རྒེ་པུ་ རྡེ་བ་ཅན་ ཏག་རྒེ་ལ་ ཐོང་ནི་ ཀ་རུ་ ཁོ་ ངུལ་ལ་ ཡོད་པེན་, ཏེ་ནི་ ཅི་ ས་མེན་? 63 ཀོན་འཇོག་རྒེ་ ཐུག་ཡིད་རྡེ་ ཐ་མེད་པེ་ མི་ཙེ་ སལ་ལེ་ནོག་, མི་ ཙོན་འགྲུའི་ རྒྱུད་ཏེ་ ཏོ་ ཐོབ་ཅེ་ མེ་ཀག་། ངེ་ ཁྱི་ཞ་ ཟེར་ཧན་རྒུན་ ཀོན་འཇོག་རྒེ་ ཐུག་ཡིད་ནི་ འིན་ ཡང་ མི་ཙེ་ སལ་ལེ་ནོག་། 64 ཏེ་ན་ ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་ ངེ་ཀ་ ཏེཏ་པ་ མ་ཅོའེ་།” སུའི་ ཁོང་ངེ་ཀ་ ཏེཏ་པ་ མི་ཅོ་ ཡང་ སུའི་ ཁོང་ལ་ འགོམ་ཧོར་ ཏྃ་རྡེ་ འགྲ་ཝོ་ལ་ ལྟེད་ཅེ་ རྒྱུའི་ཡོད་པེན་། 65 ཡི་ཤུའི་ མོལ་, “ཏེ་རྒ་རྦེ་ཕི་ལ་ ངེ་ ཁྱི་ཞ་རྒུན་ལ་ ཟེར་རྦེན་, སུ་ཞིག་ལ་ ངེ་ཀ་ ཏེཏ་པ་ ཅོ་ མི་ཉེན་ ནམ་ཚུག་པ་ ངེ་ ཡབ་རྦེ་ ཁོ་ ང་ མི་སལ་།”
66 ཏོ་ ཚོར་རེ་རྡང་ ཁོང་ངེ་ ལོབ་ཀྲུག་ མང་པེ་ ཁོང་ པུད་ཏེ་ ཁོང་ངེ་ ལྟིང་འགྲྃ་ནི་ མ་འགྲྃ་། 67 ཏེ་ནི་ ཡི་ཤུའི་ ལོབ་ཀྲུག་ ཅུག་ཉི་རྦོ་ལ་ མོལ་, “ཁྱི་ཞ་རྒུན་ལ་ ང་ པུད་ཏེ་ ཆ་ ཐེད་རྡེ་ རག་རྒེ་?”
68 ཤི་མོན་ པི་ཏྲ་རེ་ ཟེར་, “ཙོབོ་ལེ་, ང་ཞ་ སུའི་ཀ་ ཆ་? ཐ་མེད་པེ་ མི་ཙེ་ སལ་ཧ་ནེ་ ཞལ་ཏ་ ཉེ་རང་ལ་ འདུག་། 69 ཉེ་རང་ ཀོན་འཇོག་རྒེ་ ཆོག་ནི་ རྐྱོད་ཀ་ནེ་ ཏམ་པ་ འིན་ཀན་འབོ་ ང་ཞ་ རྡེན་འབའ་ ཡང་ རྒྱུའི་ཡོད་།”