ཡོ་ཧཱ་ནན་ 5

འབེད་སེ་འདཱེ་ ཟིའིྃ་རྡེ་ཀ་ ནེད་པ་ རྒྱལ་ཅུག་རྒེ་ ཛེད་།

ཏེ་ ལྟིང་ནི་ ཡ་ཧུ་འདཱ་པ་རྒུ་ནི་ ཏུའི་ཤེན་ཞིག་རྒེ་ ཏུའི་ ཡི་ཤུ་ ཡེ་རུ་ཤ་ལེམ་མེ་ རྒྱལ་ས་ལ་ རྐྱོད་། 2 ཡེ་རུ་ཤ་ལེམ་མེ་ན་ ལུག་ ཟེར་ཧ་ནེ་ རྒྱེ་རྒོའེ་ ཚམ་ལ་ ཟིའིྃ་ཞིག་ ཡོད་པེན་, ཀ་འབོ་ལ་ ཨིབ་རི་པེ་ ཧད་ན་ འབེད་སེ་འདཱ་ ཟེར་རེ་ཡོད་པེན་, ཡང་ ཏོ་ལ་ ཐོག་ ཡོ་ཀ་ནེ་ ཡབ་ ངེ་ ཧོར་རྡེ་ ཡོད་པེན་། 3 ཏེ་ ཡབ་རྒུ་ནི་ཀ་ ནེད་པ་: ཞ་ར་, ཞ་འོ་ རྡང་ ཟ་ཕོ་ཀན་ མང་པོ་ཞིག་ འགྱེལ་རྡེ་ ཡོད་པེན་། 4 ཀོན་འཇོག་རྒེ་ ཕོ་ཉ་ ཧུན་མེད་ལ་ པར་པར་ལ་ རྐྱོད་ཏེ་ ཏེ་ ཟིའིྃ་རྦེ་ ཆུ་ རྒུལ་ལེ་ཡོ་ཀག་། ཏོ་རྦེ་ཕི་ ནེད་པ་ མང་པོ་ཞིག་ ཏེ་ ཟིའིྃ་རྦེ་ ཆུ་ རྒུལ་ཅེ་ལ་ སྲུྃ་རྡེ་ འདེད་རྡེ་ཡོད་པེན་ ཅེ་ཟེར་ནི་ ཏེ་ ཆུ་ ཅེབ་ རྒུལ་ལེ་རྡང་ སུ་ ནེད་པ་ཞིག་ ཏེ་ ཟིའིྃ་རྦེ་ན་ འགོ་མ་རང་ ཞུ་ཉེན་ནི་ ཏོ་ལ་ ཅི་ ནེད་ཅི་ ཡོད་ན་ རྒྱལ་ལེ་ཡོ་ཀག་། 5 ལོ་ སུམ་ཅུ་སོབ་ཀྱེཏ་ ཆ་ཀ་ནེ་ ནེད་པ་ཞིག་ ཏེ་ཀ་ ཡོད་པེན་། 6 ཡི་ཤུའི་ ཁོ་ ཟི་རྡེ་ ལོ་ མང་པོ་ཞིག་ནི་ཕ་ལ་ ཟུར་མོ་ ཡོ་ཀན་འབོ་ ཁྱེན་ནེ་ ཛེད་པེ་ ཁོང་ངེ་ ཁོ་ འདྲི་ ཛེད་, “ཁྱེ་རང་ འི་ ཟུར་མོ་ནི་ ཕན་ནེ་ ཐེད་རྡེ་ རག་རྒེ་?”

7 ཁོའེ་ ཟེར་, “ཙོབོ་, ཟི་རྡེ་ ཆུ་ སྲུག་རྒེ་ཟ་ནི་ ང་ འི་ན་ ལེབ་ཅུ་ཀན་འབོ་ སུ་ མེད་, ཡང་ ང་ ལེབ་རྦེ་སང་ ངུལ་ལ་ ཏེ་ན་ ཡང་འཇིག་ ཞུའུ་ ཚར་རྡོག་།”

8 ཡི་ཤུའི་ ཁོ་ མོལ་, “ལོྃ་, རང་ངེ་ མལ་ས་ ཁུར་རྡེ་ འགྲུལ་།”

9 ཁོ་ ཏེ་རྒ་མ་རྒ་ རྒྱལ་, རང་ངེ་ མལ་ས་ ཁུར་རྡེ་ འགྲུལ་ཤེ་ འགོ་ཟུག་, ཏེ་ ཛེད་པ་འབོ་ ངལ་ཚོའེ་ ཞག་ལ་ སོང་འདེ་ འིན་འབེན་། 10 ཏེ་རྒ་རྦེ་ཕི་ལ་ ཡ་ཧུ་འདཱ་པེ་ འུ་རྐྱོང་རྒུ་ནི་ རྒྱལ་ཅུག་རྒེ་ ཛེད་ཀ་ནེ་ མིའུ་ལ་ ཟེར་, “ཏི་རིང་ ངལ་ཚོའེ་ ཞ་ལ་ ཁྱེ་རང་ངེ་ ལེ་ཧ་ ཅོ་མི་ཆོག་། ཆོའེ་ཁྲིམ་ ནང་ཞིན་ ཁྱེ་རང་ལ་ མལ་ས་ ཁུར་ཤེ་ རྒོང་སྤ་ མི་ཏང་།”

11 ཁོའེ་ ཁོང་རྒུན་ལ་ ལེན་ཏྃ་, “ང་ ཕན་ཅུག་རྒེ་ ཛེད་ཀ་ནེ་ མི་རྦེ་ མོལ་ལེ་རག་ ‘རང་ངེ་ མལ་ས་ ཁུར་རྡེ་ འགྲུལ་།’”

12 ཁོང་རྒུ་ནི་ ཁོ་ལ་ འདྲི་, “ཁྱེ་རང་ལ་ མལ་ས་ ཁུར་རྡེ་ འགྲུལ་ ཟེར་ཧན་འབོ་ སུ་ ནོག་?”

13 ཁོའེ་ ཁོ་ ཕན་ཅུག་ཀན་འབོ་ སུ་ འིན་ རྒྱུའི་ མེད་པེན་, ཅེ་ཞུ་ནི་ ཡི་ཤུ་ ཏུ་རུ་ མི་ཚོག་རྡེ་ན་ ཏོག་རྐྱལ་ སོང་། 14 ལྟིང་ནི་ ཡི་ཤུའི་ ཁོ་ ཀོན་འཇོག་རྒེ་ ཁང་པེ་ན་ ཟི་ ཡང་ མོལ་, “ལྟོའེ་ ཏ་ ཁྱེ་རང་ རྒྱལ་རྡེ་ ནོག་། རྡིག་པ་ ཅོ་ཅེ་ ཕོང་, ཏེ་མ་ནི་ ཁྱེ་རང་ལ་ འི་སང་ ཐུ་ ཆ་སྲིད་ཅེ་ ནོག་།” 15 ཏེ་ནི་ ཁོ་ ཡ་ཧུ་འདཱ་པེ་ འུ་རྐྱོང་རྒུ་ནི་ཀ་ སོང་འདེ་, “ང་ ཕན་ཅུག་རྒེ་ ཛེད་ཀན་འབོ་ ཡི་ཤུ་ ནོག་” ཟེར་།

ཀོན་འཇོག་རྒེ་ སྲེ་ ཝང་ཆ་།

16 ཡི་ཤུའི་ ཏེ་རྒ་ ཙོག་སེ་ ཧ་ལེ་ཤེ་ ཛེད་པ་རྒུན་ ངལ་ཚོའེ་ ཞག་ལ་ ཛེད་ཅེ་ཀ་ནི་, ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ངེ་ མོལ་ཧན་ འདང་ ཛེད་ཀན་རྒུ་ནི་ རྒྱཔ་འགལ་ ཅོ་ཅེ་ འགོ་ཟུག་། 17 འིན་ན་ ཡི་ཤུའི་ ཁོང་རྒུན་ལ་ མོལ་, “ངེ་ ཡབ་ ཀོན་འཇོག་རྒེ་ ཏུའི་རྒྱུན་ ཆག་ལེ་ ཛེད་ཅེ་འབོ་, ངེ་ལ་ ཅོ་ཡོད་།” 18 ཡ་ཧུ་འདཱ་པ་རྒུ་ནི་ ཁོང་ སེད་ཅེ་ ཙོན་འགྲུའི་ མང་ངེ་ ཅོའེ་, ཅེ་ཟེར་ནི་ ཡི་ཤུའི་ ཡ་ཧུ་འདཱ་པེ་ ངལ་ཚོའེ་ ཞག་ལ་ ཁྲིམ་འབོ་ ཅག་ཅེ་, མ་ཚེད་ ཁོང་ངེ་ ཀོན་འཇོག་ལ་ ཁོ་རང་ངེ་ ཡབ་ མོལ་རྡེ་ ཁོ་རང་ ཀོན་འཇོག་ འདྲན་འདྲ་ ཐེའེ་ ཛེད་།

19 ཡི་ཤུའི་ ཁོང་རྒུན་ལ་ ལེན་སལ་, “ངེ་ ཁྱི་ཞ་ ཏེན་ ཏེན་ ཟེ་འིན་, སྲེ་ ཁོ་རང་ ཅིག་པོ་ལ་ ཅང་ ཅོ་ཉེན་ནེ་ མག་། ཡབ་ ཀོན་འཇོག་རྒེ་ ཛེད་ཀན་ ཁོའེ་ ཐོང་ཀན་འབོ་ མ་ནི་ སྲེ་ ཅོའོ་ མག་། ཡབ་རྦེ་ ཅི་ ཅོའོ་ ཛེད་ན་ སྲེ་ ཅོ་ནོག་། 20 ཡབ་རྦེ་ སྲེ་ ཤེ་སྤ་ ཛེད་ཅེ་རྦེ་ ཁོང་ངེ་ ཆག་ལེ་ ཚང་མ་ སྲེ་ལ་ ལྟན་ནེ་ ཛེ་རྡེ་ནོག་། ཡབ་རྦེ་ ཡུ་རྒུ་ནི་སང་ ཀྲག་པོ་ ལེ་ཧ་རྒུན་ སྲེ་ལ་ ཅོ་ཅེ་ལ་ ལྟན་ནེ་ ཛེ་རྡེན་, ཏེ་ནི་ ཁྱི་ཞ་རྒུན་ མང་ངེ་ ཧ་ལེ་རྡེན་། 21 སྤེར་ན་ ཀ་ཟུག་ ཡབ་རྦེ་ ཤི་ཀན་རྒུན་ སོན་པོ་ ལྃ་རྡེ་ ཛེ་རྡེ་ སྲོག་ སལ་ལེ་ཡོད་, ཏེ་རྒ་ ཙོག་སེ་ སྲེ་ལ་ ཁོ་རང་ ཐེད་ཀན་རྒུན་ལ་ མི་ཙེ་ ཏང་ངེན་། 22 ཡབ་རྦེ་ སུ་ཞི་ལ་ ཁྲིམ་ཤག་ མ་ཛེ་རྡེ་, ཁྲིམ་ཤག་ ཅེད་ཅེ་ ཝང་ ཚང་མ་ སྲེ་ལ་ སལ་ལེ་ ཛེད་ཏེ་ འིན་། 23 ཏེ་ ཝང་འབོ་ སལ་ལེ་ ཛེད་ཅེ་ རྒྱུ་ཚན་འབོ་, ཀ་ཟུ་རྒེ་ ཡབ་ལ་ མི་ཚང་མེ་ སི་ཝ་ ཅོའེན་ ཏེ་རྒ་ ཙོག་སེ་ མི་ཚང་མེ་ སྲེ་ལ་ སི་ཝ་ ཏང་ཅེ་ ནོག་། སྲེ་ལ་ སི་ཝ་ མ་ཅོ་ཀན་རྒུ་ནི་ ནེན་ཏེན་ལ་ སྲེ་ ཀ་ལེ་ ཛེད་ཀ་ནེ་ ཡབ་ལ་ སི་ཝ་ མ་ཅོ་ ནོག་།”

24 “ངེ་ ཁྱི་ཞ་ ཏེན་ ཏེན་ ཟེ་འིན་, ངེ་ ཁྲིན་རྒུན་ལ་ ཉེན་འདེ་ ང་ ཀལ་ཧན་ནེ་ ཀོན་འཇོག་ལ་ ཏེཏ་པ་ ཅོ་ཀན་རྒུན་ལ་ ཐ་མེད་པེ་ མི་ཙེ་ ཡོད་, ཡང་ ཁོང་རྒུ་ནི་ རྡིག་པ་རྒུན་ལ་ ཆེད་པ་ མི་ཕོག་། ཁོང་རྒུན་ ཤི་ཅེ་ནི་ ཐར་རྡེ་ ཐ་མེད་པེ་ མི་ཙེ་ན་ ལེཔ་ཏེ་ ནོག་།”

25 “ངེ་ ཁྱི་ཞ་ ཏེན་ ཏེན་ ཟེ་འིན་, ཏུའི་རྦོ་ ལེབ་ཅེ་ ཡོད་ མ་ཚེད་ ཏ་ས་ ལེབ་ཏེ་ འིན་, སེམ་ཡིད་རྡེ་ ཐོག་ནི་ ཤི་ཀན་རྒུ་ནི་, ཀོན་འཇོག་རྒེ་ སྲེ་ ཧད་ ཚོར་རེན་། མ་ཚེད་ ཏག་ས་ ལེབ་ཏེ་ འིན་། ཡང་ ཚོར་རྡེ་ རྡེན་ཆེ་ཤེ་ ཅོ་ཀན་རྒུན་ སོན་པོ་ ལུའི་རྡེན་། 26 ཀ་ཟུག་རྒེ་ ཡབ་ སྲོག་ སལ་ཅེ་ ཝང་ ཡོད་, ཏེ་རྒ་ ཙོག་སེ་ ཁོང་ངེ་ སྲེ་ལ་ སྲོག་ ཏང་ཅེ་ ཝང་འབོ་ སལ་ལེ་ ཛེད་ཏེ་ འིན་། 27 ཁོ་ མི་རིག་རྒེ་པུ་ འིན་ཅེ་ཀ་ནི་, ཡབ་རྦེ་ ཁོ་ ཁྲིམ་ཤག་ ཅོ་ཅེ་ ཝང་ཆ་ ལྟེད་རྡེ་ ཛེ་རྡེ་ འིན་། 28 ངེ་ ཟེར་ཧན་འབོ་ལ་ ཧ་མ་ལེ་ཤིག་། ཏེ་ཏུའི་རྦོ་ ལེབ་ཅེ་ ཡོད་, ནམ་ ཤི་ཀན་ ཚང་མེ་ སྤུར་ཧང་ངེ་ན་ ཀོན་འཇོག་རྒེ་ སྲེ་ ཧད་པོ་ ཚོར་རྡེ་ 29 སྤུར་ཧང་རྒུ་ནི་ འབིང་འདེ་ ཡོང་ངེན་། ལེ་ཧ་ ཟང་པོ་ ཅོ་ཀན་རྒུན་ ཐ་མེད་པེ་ མི་ཙེ་ཕི་, ཡང་ ངན་པ་ ཅོ་ཀན་རྒུན་ ཐ་མེད་པེ་ ཆེད་པེ་ཕི་ ལང་ངེན་། 30 ང་ ང་རང་ལ་ ཅང་ ཅོ་ མི་ཉེན་, ཀོན་འཇོག་རྒེ་ མོལ་ཧན་ ནང་ཞིན་ལ་ ཤའ་ ཏང་ངེ་ཡོད་, ཡང་ ངེ་ ཤའ་རྒུ་ནི་ ཀྲང་པོ་ འིན་ ཅེ་ཟེར་ནི་ ངེ་ ང་རང་ ཐེད་ཀན་ ནང་ཞིན་ མན་, ང་ ཀལ་ལེ་ ཛེད་ཀ་ནེ་ ཡབ་རྦེ་ ཐུག་ཐེད་ ནང་ཞིན་ ཅོའེན་།”

ཡི་ཤུའི་ ཧོར་ལ་ སྤང་པོ་།

31 ཡི་ཤུའི་ ཏ་རུང་ང་ མོལ་, “ཀལ་ཏེ་ ངེ་ ང་རང་ངེ་ ཧོར་ལ་ སྤང་པོ་ ཏང་ངེ་ཡོད་ནི་ ངེ་ སྤང་པོ་ལ་ ཞེན་མ་རྒུན་ རྡེན་ མི་ཆེ་། 32 ཞེན་མ་ཞིག་རྒེ་ ངེ་ ཧོར་ལ་ སྤང་པོ་ སལ་ལེ་ཡོད་, ཡང་ ང་ རྒྱུའི་ཡོད་ ཁོང་ངེ་ ངེ་ ཧོར་ལ་ སལ་ཧ་ནེ་ སྤང་པོ་ རྡེན་འབའ་ འིན་། 33 ཁྱི་ཞི་ ཡོ་ཧཱ་ནན་ནེ་ཀ་ མི་རྒུན་ འདྲི་ལ་ ཀལ་རྦེ་, ཁོང་ངེ་ ངེ་ ཧོར་ལ་ རྡེན་འབེ་ སྤང་པོ་ ཏྃ་། 34 ང་ མི་རྒུ་ནི་ སྤང་པོ་ལ་ རག་ལེ་རྡེ་ མེད་, འིན་ན་ ཁྱི་ཞ་རྒུན་ལ་ ཐར་པ་ ཐོབ་ཅེ་ཕི་ ཡོ་ཧཱ་ནན་ནེ་ སྤང་པེ་ ཧོར་ལ་ ཤེད་རྡེ་ འིན་། 35 ཡོ་ཧཱ་ནན་འབོ་ནི་ འོད་ འདང་ཤེན་ འབར་རེན་ འདེད་ཀན་ཞིག་ འིན་འབེན་, ཡང་ ཁྱི་ཞ་རྒུན་ སྲིབ་ཅིག་ ཏེ་ འོད་པེ་ འདང་ངེ་ན་ འདེད་ཏེ་ ཐེད་པོ་ ཅོའེ་། 36 ངེ་ ལག་ལ་ ཡོ་ཧཱ་ནན་ནེ་ སྤང་པེ་སང་ ཆོན་མོ་ སྤང་པོ་ཞིག་ ཡོད་, ཡབ་ ཀོན་འཇོག་རྒེ་ ང་ ཀྲུཔ་ཅུག་ཅེ་ལ་ ལྟེད་རྡེ་ ཛེད་ཀ་ནེ་ ལེ་ཧ་རྒུན་ ངེ་ ཅོའེན་ ཡོད་ ཡང་ ཏེ་རྒ་ ལེ་ཧ་རྒུན་, ང་ ཡབ་རྦེ་ ཀ་ལེ་ ཛེད་ཀན་འབེ་ སྤང་པོ་ འིན་། 37 ང་ ཀ་ལེ་ ཛེད་ཀ་ནེ་ ཡབ་རྦེ་, ངེ་ ཧོར་ལ་ སྤང་པོ་ སལ་འདེ་ འིན་། ཁྱི་ཞ་རྒུ་ནི་ ཁོང་ངེ་ སུང་ཧད་ མ་ནི་ མ་ཚོར་རེ་ ཡང་ ཁོང་ངེ་ ཟུྃ་ཟོ་ མ་ནི་ མ་འཇལ་ལེ་ ནོག་། 38 ཁོང་ངེ་ ཁྲིན་ ཁྱི་ཞ་རྒུ་ནི་ ཉིང་ངེ་ན་ ལུའི་རྡེ་ མི་འདུག་, ཅེ་ཟེར་ནི་ ཁྱི་ཞ་རྒུ་ནི་ ང་ ཀོན་འཇོག་རྒེ་ ཀ་ལེ་ ཛེད་ཀན་འབེ་ཀ་ རྡེན་ མ་ཆེ་།”

39 “ཁྱི་ཞི་ ཏམ་པེ་ སུང་རབ་ལ་ མ་ ཞིབ་སལ་ ཉམ་པོ་ ལོབ་ཞོང་ ཅོ་རུག་, ཅེ་ཟེར་ནི་ ཁྱི་ཞ་རྒུ་ནི་ ཏམ་པེ་ སུང་རབ་ རྒྱུད་ཏེ་ ཐ་མེད་པེ་ མི་ཙེ་ ཐོབ་རྦེ་ནོག་ སམ་འདུག་། ཏེ་རྒ་ སུང་རབ་རྦེ་ ངེ་ ཧོར་ལ་ སྤང་པོ་ ཏང་ངེ་ནོག་། 40 ཏེ་ནི་ ངེ་ཀ་ ཏེཏ་པ་ ཅོའེ་རྡེ་ ཐ་མེད་པེ་ མི་ཙེ་ ཐོབ་ཅེ་ལ་ ཁྱི་ཞ་ ཐེད་རྡེ་ མི་འདུག་།”

41 “ང་རང་ནི་ མི་རྒུ་ནི་ རྟོད་པ་ ཏང་ཅེ་འབོ་ལ་ ཐེད་རྡེ་མེད་, 42 འིན་ན་སང་ ཁྱི་ཞ་རྒུ་ནི་ སེམ་མེ་ན་ ཀོན་འཇོག་རྒེ་ཕི་ ཤེ་སྤ་ མེ་ཀན་འབོ་ ང་ རྒྱུའི་ཡོད་། 43 ང་ ང་རང་ངེ་ ཡབ་རྦེ་ ཝང་ཆེ་ན་ ཡོང་ན་ ཁྱི་ཞ་རྒུ་ནི་ ང་ རྒ་སུའི་ མ་ཅོའེ་། ཀལ་ཏེ་ ཞེན་ཞིག་ ཁོ་རང་ངེ་ ཝང་ཆེ་ན་ ཡོང་ནི་ ཁྱི་ཞ་རྒུ་ནི་ ཁོ་ རྒ་སུའི་ ཅོའེན་། 44 ཁྱི་ཞ་རྒུ་ནི་ ཀ་ཟུག་རྒེ་ ངེ་ཀ་ ཏེཏ་པ་ ཅོའེན་, ནམ་ ཁྱི་ཞ་རྒུན་ ཅིག་ ཏང་ ཅིག་ལ་ རྟོད་པ་ ཐོབ་ཅེ་ལ་ ཐེད་ཏུག་, འིན་ན་ ཀོན་འཇོག་ ཅིག་ཅིག་པོ་ རྟོད་པ་ ཐོབ་ཅེ་འབོ་ ཙལ་ལེ་ མི་འདུག་།”

45 “ཁྱི་ཞི་ མི་སམ་ཤིག་ ཡབ་རྦེ་ ཧུ་འདུན་ལ་ ངེ་ ཁྱི་ཞ་རྒུན་ལ་ ཉེད་ ཀ་ལེན་། ཁྱི་ཞ་རྒུན་ལ་ ཉེད་ཀལ་ཧན་འབོ་ ཁྱི་ཞ་རང་ངེ་ རེ་ཝ་ པོར་ཧན་ནེ་ མོ་ཤེ་ ནོག་། 46 ཀལ་ཏེ་ ཁྱི་ཞ་རྒུ་ནི་ མོ་ཤེ་ཀ་ ཏེཏ་པ་ ཅོའེ་རྦི་ནི་, ངེ་ཀ་ལ་ ཏེཏ་པ་ ཅོའེ་རྡེ་ ཡོད་ཁྲོ་, ཅེ་ཟེར་ནི་ ཁོང་ངེ་ ངེ་ ཧོར་ལ་ འབྲི་ ཛེད་རྡེ་ནོག་། 47 ཁྱི་ཞ་རྒུ་ནི་ མོ་ཤེ་ འབྲི་ ཛེད་ཀན་འབོ་ལ་ རྡེན་ མ་ཆེ་ཀ་ནེ་, ངེ་ ཟེར་ཧན་རྒུན་ལ་ ཁྱི་ཞི་ ཀ་ཟུག་རྒེ་ རྡེན་ཆེ་རྡེན་།”