ཡི་ཤུ་ རྡང་ ནི་ཀོ་འདེ་མུ་།
3
ནི་ཀོ་འདེ་མུ་ ཟེར་ཧ་ནེ་ པ་རུ་ཤི་པ་ཞིག་ ཡོད་པེན་, ཁོ་ ཡ་ཧུ་འདཱ་པེ་ ཝང་སྲུལ་རྦེ་ ཚོག་འདུའི་ ཐུའི་མི་ཞིག་ འིན་འབེན་། 2 ཞ་ཤིག་ ཁོ་ ཡི་ཤུ་ས་ ཚེན་ལ་ ཡོྃ་རྡེ་ ཟེར་, “ལོབ་རྦོན་ལེ་a, ཉེ་རང་ ཀོན་འཇོག་རྒེ་ ཆོག་ནི་ རྐྱོད་ཀ་ནེ་ ལོབ་རྦོན་ འིན་ཀན་འབོ་ ང་ཞི་ ཤེ་, ཅེ་ཞུ་ནི་ ཀོན་འཇོག་ ཉམ་པོ་ ཡོད་ཏེ་ མ་ནི་ སུ་ཞི་ལ་, ཉེ་རང་ངེ་ ལྟན་ནེ་ ཛེད་ཀ་ནེ་ ཧ་ལེ་ཤེ་ ལྟའ་རྒུན་ ལྟན་ མི་ཉེན་།”3 ཡི་ཤུའི་ ཁོ་ ལེན་སལ་, “ངེ་ ཁྱེ་རང་ལ་ ཏེན་ ཏེན་ ཟེ་འིན་, ནམ་ཚུག་པ་ སུ་ཞིག་ ཡང་ མི་རྐྱེ་, ཀོན་འཇོག་རྒེ་ རྒྱལ་སྲིད་པོ་ ཁོ་ མི་ཐོང་།”
4 ནི་ཀོ་འདེ་མུ་ ཟེར་, “མི་ རྒད་པོ་ཞིག་ ཡང་ ཀ་ཟུག་རྒེ་ རྐྱེ་ནོག་? ཁོ་རང་ངེ་ ཨ་མེ་ ཅང་ཀོག་རྒེ་ན་ ཞུ་རྡེ་ ལེན་ ཉི་སྤ་ རྐྱེ་ མི་ཉེན་།”
5 ཡི་ཤུའི་ ལེན་སལ་, “ངེ་ ཁྱི་ཞ་ ཏེན་ ཏེན་ ཟེ་འིན་, ནམ་ཚུག་པ་ མི་ཞིག་ ཆུ་ རྡང་ ཐུག་ཡིད་ནི་ རྐྱེ་ མི་རྐྱེ་, ཏོ་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ཞུའུ་ མི་ཉེན་། 6 མི་ཞིག་ ཟུྃ་སྤེ་ ཐོག་ནི་ ཕ་མ་ནི་ རྐྱེ་ནོག་། འིན་ན་ ཐུག་ཡིད་ནི་ རྐྱེ་ཀན་རྒུན་ ཏམ་པེ་ ཐུག་ཡིད་ནི་ རྐྱེ་ནོག་། 7 ངེ་ ‘ཁྱེ་རང་ལ་ ཡང་ རྐྱེ་རྒོའེ་’ ཟེར་ཧན་འབོ་ལ་ ཧ་མ་ལེ་། 8 ལུང་སྤོ་ ཀ་རུ་ ཐེད་ན་ ཏེ་རྒ་ ཆོག་ལ་ རྒྱུག་རྒེ་ནོག་། ཁྱེ་རང་ལ་ ཏོ་རྦེ་ ཧད་ ཚོར་རེ་ནོག་, འིན་ན་ ཏོ་ ཀ་ནི་ ཡོང་ངེ་ཡོད་ ཡང་ ཀ་རུ་ ཆ་ཡོད་ ཏོ་ ཅང་ ཟེར་ཤེ་ཤེ་ མག་, ཐུག་ཡིད་ནི་ རྐྱེ་ཀན་ ཚང་མ་ ཏེ་རྒ་ ཙོག་སེ་ ནོག་།”
9 ནི་ཀོ་འདེ་མུ་ ཟེར་, “ཀ་ཟུག་རྒེ་ ཏོ་ རྡེན་འབའ་ ནོག་?”
10 ཡི་ཤུའི་ ལེན་སལ་, “ཁྱེ་རང་ ཨིས་ར་ཡེལ་པེ་ ཆོའེ་རྡེ་ ལོབ་རྦོན་ཞིག་ འིན་འདེ་ ཁྱེ་རང་ལ་ ཧ་ཀོ་ མེད་རྡེ་? 11 ངེ་ ཁྱེ་རང་ལ་ ཏེན་ ཏེན་ ཟེ་འིན་, ང་ཞ་ རྒྱུའི་ཡོ་ཀན་རྒུན་ ཟེ་འིན་ ཡང་ ཐོང་འདེ་ འིན་ཀན་འབེ་ སྤང་པོ་ ཏང་ངེ་ཡོད་། ཏེ་ན་ ཁྱི་ཞ་རྒུན་ ང་ཞི་ སྤང་པོ་ལ་ རྡེན་ཆེ་རྡེ་ མི་འདུག་། 12 ངེ་ ཁྱི་ཞ་རྒུན་ལ་ འཇིག་རྟེན་ འདང་ འབྲེལ་ཧ་ནེ་ སྤེ་ར་ ཤེད་པེན་, འིན་ན་ ཏོ་ལ་ ཁྱི་ཞི་ རྡེན་ མ་ཆེ་། ཀལ་ཏེ་ ངེ་ རྡེ་བ་ཅན་ འདང་ འབྲེལ་ཧ་ནེ་ སྤེ་ར་ ཤེད་ནི་, ཁྱེ་རང་ངེ་ ཀ་ཟུ་ལ་ རྡེན་ཆེ་རྡེན་? 13 རྡེ་བ་ཅན་ནེ་ ཡོྃ་རྡེ་ འིན་ཀན་ མི་རིག་རྒེ་པུ་ མ་ནི་ སུ་ཞི་ལ་ རྡེ་བ་ཅན་ མ་སོང་། 14-15 ཀ་ཟུག་ རི་ལྟོང་ངེ་ན་ མོ་ཤེ་ ཨིས་ར་ཡེལ་པ་རྒུན་ རྐྱོབ་ཅེ་ལ་ ལིའི་ རུལ་ཞིག་ པེར་ཧེ་ཀ་ ཏག་རྒེ་ ཙོག་སེ་, མི་རིག་རྒེ་པུའི་ཀ་ ཏེཏ་པ་ ཅོ་ཀན་རྒུན་ལ་ ཐ་མེད་པེ་ མི་ཙེ་ ཐོབ་ཅེ་ཕི་ ང་ལ་ ཏག་རྒོའེ་།”
16 ཀོན་འཇོག་རྒེ་ འཇིག་རྟེན་པ་རྒུན་ལ་ འི་ཟམ་ ཤེ་སྤ་ ཛེད་, ཁོང་ངེ་ ཁོ་རང་ངེ་ སྲེ་ ཅིག་ཅིག་པོ་ སལ་ལེ་ ཛེད་, ཁོང་ངེ་ སྲེ་ཀ་ ཏེཏ་པ་ ཅོ་ཀན་ ཚང་མ་ ཤི་ མ་ཤི་ ཐ་མེད་པེ་ མི་ཙེ་ ཐོབ་རྦེན་། 17 ཀོན་འཇོག་རྒེ་ རང་ངེ་ སྲེ་ འཇིག་རྟེན་པ་རྒུན་ལ་ ཆེད་པ་ ཅད་ཅེ་ལ་ མན་འབེ་, ཁོང་ རྒྱུད་ཏེ་ ཐར་པ་ སལ་ཅེ་ཕི་ འཇིག་རྟེན་ནེ་ན་ ཀ་ལེ་ ཛེད་།
18 སྲེ་ཀ་ ཏེཏ་པ་ ཅོ་ཀན་རྒུན་ ཉ་ཝེ་ན་ མ་ནི་ ཕང་ངེ་ མ་ཛེད་, འིན་ན་ ཏེཏ་པ་ མི་ཅོ་ཀན་རྒུན་ལ་ ཉ་ཝེ་ ཆེད་པ་ ཕོག་ ཚར་རྡེ་ འིན་ ཅེ་ཟེར་ནི་ ཁོང་རྒུ་ནི་ ཀོན་འཇོག་རྒེ་ སྲེ་ ཅིག་ཅིག་པེ་ཀ་ ཏེཏ་པ་ མ་ཅོའེ་། 19 ཏེ་ ཆེད་པ་ སལ་ཅེ་ ཏོན་འབོ་: ཀོན་འཇོག་རྒེ་ འོད་ འཇིག་རྟེན་ནེ་ན་ རྐྱོད་ འིན་ན་ མི་རྒུན་ འོད་རྡེ་སང་ མུན་ཀྲག་པོ་ལ་ ཐེད་ ཅེ་ཟེར་ནི་ ཁོང་རྒུ་ནི་ ལེ་ཧ་རྒུན་ ངན་པ་ ཡོད་ཏེ་ ནོག་། 20 ལེ་ཧ་ ངན་པ་ ཅོ་ཀན་ ཚང་མེ་ འོད་ལ་ སོག་པོ་ ཅོ་ནོག་, ཁོང་རྒུ་ནི་ ལེ་ངན་རྒུན་ ཞེན་མ་རྒུན་ལ་ ངོ་ནེན་ སམ་འདེ་ འོད་རྡེ་ན་ ཡོང་ངེ་ མག་། 21 འིན་ན་ ཀྲང་པེ་ ལམ་མེ་ཀ་ འགྲུལ་ལེན་ ཡོ་ཀན་རྒུན་, འོད་རྡེ་ན་ ཡོང་ངེ་ ཐེད་རྡེ་ནོག་, ཅེ་ཟེར་ནི་ ཁོང་རྒུ་ནི་ ཀོན་འཇོག་ ཐུག་ཐེད་རྡེ་ ཛེད་ཀ་ནེ་ ལེ་ཧ་ ཅོའེན་ ཡོ་ཀན་འབོ་ ཞེན་མ་རྒུ་ནི་ ཐོང་ཉེན་ནེན་།
ཡི་ཤུ་ རྡང་ ཁྲུའི་སལ་ཧན་ ཡོ་ཧཱ་ནན་།
22 ཏོ་རྦེ་ ལྟིང་ནི་ ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ རྒྱལ་ས་ནི་ འབིང་འདེ་ ཡ་ཧུ་འདཱེ་ འགམ་ཡུལ་རྒུན་ལ་ རྐྱོད་, ཡང་ ཏུ་རུ་ ཞག་ ཁ་ཅིག་ ཞུ་རྡེ་ ཁོང་ངེ་ མི་རྒུན་ལ་ ཁྲུའི་སལ་ལེ་ ཛེད་།
23 ཡོ་ཧཱ་ནན་ནེ་ལ་ ཤ་ལིམ་ ཀྲོང་ཁྱེར་ རྡང་ ཉེ་མོ་ལ་ ཡོ་ཀན་ ཨེ་ནོན་ནི་ན་ ཁྲུའི་སལ་ལེ་ཡོད་པེན་ ཅེ་ཟེར་ནི་ ཏུ་རུ་ ཆུ་ མང་པོ་ ཡོ་ཀན་, ཡང་ མི་རྒུན་ ཁྲུའི་ནེན་ནེ་ལ་ ཡོང་ངེན་ འདེད་རྡེ་ཡོད་པེན་། 24 འི་ ཚང་མ་ ཡོ་ཧཱ་ནན་ ཙོན་ལ་ ཧར་རེ་སང་ ངུལ་ལ་ སོང་། 25 ཡོ་ཧཱ་ནན་ནེ་ ལོབ་ཀྲུག་རྒུན་ འདང་ ཡ་ཧུ་འདཱ་པ་ཞིག་རྒེ་ན་ ཆུ་ ཉམ་པོ་ སང་མ་ ཅོ་ཅེ་ ལུག་སྲོལ་ལེ་ ཧོར་ལ་ ཟེར་ཟེར་ སོང་། 26 ཏེ་ནི་ ཡོ་ཧཱ་ནན་ནེ་ ལོབ་ཀྲུག་རྒུན་ ཁོང་ས་ ཡོྃ་རྡེ་ ཡི་ཤུའི་ ཧོར་ལ་ ཤེད་, “ལོབ་རྦོན་ལེ་, ཡོར་འདཱན་ནེ་ སྃ་སྤེ་ ཕར་ཧ་ ཉེ་རང་ ཉམ་པོ་ ཡོ་ཀ་ནེ་ མི་ ཀ་རྦེ་ཕི་ ཉེ་རང་ངེ་ སྤང་པོ་ སལ་ལེ་ཡོད་པེན་, ཁོང་ལ་ ཁྲུའི་སལ་འདུག་ ཡང་ མི་ཚང་མ་ ཁོང་ངེ་ཀ་ ཆ་རུག་།”
27 ཡོ་ཧཱ་ནན་ནེ་ ལེན་ལ་ མོལ་, “ནམ་ཚུག་པ་ ཀོན་འཇོག་རྒེ་ རྡེ་བ་ཅན་ནི་ རྒོང་སྤ་ མི་སལ་, སུ་ཞི་ལ་ ཅང་ ཐོབ་ མི་ཉེན་། 28 ངེ་ ཁྱི་ཞ་ ཟེར་ཧེན་ ནང་ཞིན་, ‘ང་ འདམ་མེ་ ཛེད་ཀ་ནེ་ མ་ཤི་ཀ་ མན་ འིན་ན་ ཁོང་ངེ་སང་ ངུལ་ལ་ ཀལ་ལེ་ ཛེད་ཀན་འབོ་ འིན་’, ཏོ་རྦེ་ སྤང་པོ་ ཁྱི་ཞ་ ནོག་། 29 པག་མ་རྦོ་ པག་པེ་ཕི་ ནོག་། འིན་ན་ པག་པེ་ ཡ་ཏོ་ པག་པེ་ ཚམ་ལ་ འདེད་ཏེ་ སྤེ་ར་རྒུན་ ཉེན་ནེ་ནོག་། ཁོའེ་ སྤེ་ར་རྒུན་ ཉེན་འདེ་ ཁོ་ རྐྱིད་པོ་ ཡོང་ངེ་ནོག་། ཏེ་རྒ་ ཙོག་སེ་ ངེ་ ཉིང་ལ་ རྐྱིད་པོ་ ཡོྃ་། 30 ཁོང་ མིང་ཅེན་ ཡང་ ང་ རིན་མེད་ འགྱུར་རྒོའེ་།”
31 “རྡེ་བ་ཅན་ནི་ རྐྱོད་ཀན་འབོ་ ཚང་མེ་སང་ ཆེ་ཤོ་རྦོ་ ནོག་, ཨ་ཧོ་རྒུན་ལ་ འཇིག་རྟེན་ནེ་ འིན་འབེ་ འཇིག་རྟེན་པེ་ ཚུལ་ལ་ སྤེ་ར་ ཏང་ངེ་ནོག་། འིན་ན་ རྡེ་བ་ཅན་ནི་ རྐྱོད་ཀན་འབོ་ ཚང་མེ་སང་ ཆེ་ཤོག་རྦོ་ ནོག་། 32 ཁོང་ངེ་ ཀོན་འཇོག་རྒེ་ ཚོར་ཧན་ ཡང་ ཟི་ཧན་རྒུ་ནི་ སྤང་པོ་ སལ་ལེ་ནོག་, འིན་ན་ སུ་ཞི་ལ་ ཁོང་ངེ་ སྤང་པེ་ཀ་ རྡེན་ མ་ཆེ་། 33 ཁོང་ངེ་ ཁྲིན་ནེ་ཀ་ རྡེན་ཆེ་ཧན་རྒུ་ནི་ ཙོབོ་ ཀོན་འཇོག་རྒེ་ ཀྲང་པོ་ མོལ་ཧན་འབེ་ སྤང་པོ་ ཏྃ་རྡེ་ ནོག་། 34 ཀོན་འཇོག་རྒེ་ ཀ་ལེ་ ཛེད་ཀན་འབེ་ ཀོན་འཇོག་རྒེ་ ཞལ་ཏ་ མོལ་ལེ་ནོག་ ཅེ་ཟེར་ནི་ ཀོན་འཇོག་རྒེ་ ཁོང་ལ་ ཏམ་པེ་ ཐུག་ཡིད་ མང་པོ་ མ་ཏབ་རྦེ་ སལ་ལེ་ ཛེད་ཏུག་། 35 ཡབ་ ཀོན་འཇོག་རྒེ་ སྲེ་ལ་ ཤེ་སྤ་ ཛེད་པེ་ ཁོང་ངེ་ ཅི་ཚང་མ་ སྲེ་ ཆག་ལ་ ལྟེད་རྡེ་ ཛེད་། 36 སྲེ་ཀ་ ཏེཏ་པ་ ཅོ་ཀན་ ཐ་མེད་པེ་ མི་ཙེའོ་ ཐོབ་ཚར་རྡེ་ ནོག་། འིན་ན་ སྲེ་ཀ་ ཏེཏ་པ་ མ་ཅོ་ལ་ ཁ་ མ་ཉེན་ཀན་རྒུན་ལ་ ཏེ་ མི་ཙེའོ་ མ་ནི་ མི་ཐོབ་, ཡང་ ཀོན་འཇོག་རྒེ་ ཐུག་སྲོ་ ཁོང་རྒུ་ནི་ཀ་ ལུའི་རྡེན་།”