ཡི་ཤུའི་ ཆུ་ རྒུན་འགྲུམ་མེ་ ཁོའེ་ འགྱུར་ཤུག་རྒེ་ ཛེད་།
2
ཞག་ ཉི་རྡེ་ ལྟིང་ནི་, འགཱ་ལིལ་ལེ་ ཡུལ་ཞོང་ངེ་ ཀ་ནཱེ་ ཀྲོང་ཁྱེར་རེ་ན་ པག་རྟོན་ཞིག་ ཡོད་པེན་, ཡང་ ཡི་ཤུའི་ ཨ་མ་ ཏུ་རུ་ ཡོད་པེན་། 2 ཡི་ཤུ་ རྡང་ ཁོང་ངེ་ ལོབ་ཀྲུག་རྒུ་ནི་ལ་ ཏེ་ པག་རྟོན་ལ་ འབོའེ་རྡེ་ ཡོད་པེན་། 3 ཏུ་རུ་ པག་རྟོན་ནེ་ འགྲོན་ནེ་ ཏུའི་ལ་ རྒུན་འགྲུམ་མེ་ ཁོའེ་ ཚར་རེ་རྡང་, ཡི་ཤུའི་ ཨ་མེ་ ཡི་ཤུ་, “ཁོང་རྒུན་ལ་ རྒུན་འགྲུམ་མེ་ ཁོའེ་ ཚར་རྡེ་ མི་འདུག་” ཟེར་།4 ཡི་ཤུའི་ ཨ་མ་ མོལ་, “ཤེ་སྤ་ པོ་མོ་, ངེ་ ལེ་ཧེ་ན་ ཅེ་ འདྲེའེ་རྡེ་ཡོད་? ཏ་རུང་ ངེ་ ཏུའི་ མ་ལེབ་རྦེ་འིན་།”
5 ཨ་མེ་ ཡོག་པོ་རྒུན་ལ་, “ཁོང་ངེ་ ཅི་ མོལ་ན་ ཏུ་ཟུག་ ཅོའེ་ཧེ་” ཟེར་།
6 ཏེ་རྒ་ འདུན་ལ་ ཡ་ཧུ་འདཱ་པེ་ སང་མ་ ཅོ་ཅེ་ ལུག་སྲུལ་ ནང་ཞིན་ ཁྲུ་ཅེ་ལ་ ཆུའི་ ཟ་མ་ ཀྲུག་ ཡོད་པེན་། འི་ ཟ་མ་ རེ་རེ་ན་ ཧ་ལམ་ ཆུ་ ལི་ཀྲར་ རྒྱེད་ཅུ་ནི་ རྒྱ་རྡང་ ཉི་ཤུ་ ཟམ་ ཆུད་རྡེ་ཡོད་པེན་།
7 ཡི་ཤུའི་ ཡོག་པོ་རྒུན་ལ་ མོལ་, “ཏེ་ ཟ་མ་རྒུ་ནི་ན་ ཆུ་ ཧོང་”, ཡོག་པོ་རྒུ་ནི་ ཁོང་ངེ་ མོལ་ཧན་ ནང་ཞིན་ ཟ་མ་རྒུན་ ཀང་ཅུག་ཏེ་ ཆུ་ ཧང་།
8 ཏེ་ ལྟིང་ནི་ ཡི་ཤུའི་ ཡོག་པོ་རྒུན་ལ་ མོལ་, “ཏ་ ཟ་མེ་ ནང་ནི་ ཆུ་ ཅུའི་རྡེ་, པ་རྟོན་ནེ་ ཉེར་སྤོན་ལ་ ཁྱེར་ཧེ་”, ཡང་ ཁོང་རྒུ་ནི་ ཡི་ཤུའི་ མོལ་ཧན་འབོ་ ཅོའེ་།
9 ཉེར་སྤོན་འབེ་ རྒུན་འགྲུམ་མེ་ ཁོའེ་ རྒྱུར་ཧན་ནེ་ ཏེ་ ཆུ་ ཉུང་, ཁོ་ འི་ རྒུན་འགྲུམ་མེ་ ཁོའེ་རྦོ་ཀ་ནི་ ཁྱོྃ་ རྒྱུའི་ མེད་པེན་, འིན་ན་ ཆུ་ ཁྱོང་ཀ་ནེ་ ཡོག་པོ་རྒུན་ལ་ རྒྱུའི་ཡོད་པེན་། ཁོའེ་ མག་པ་ འབོའེ་རྡེ་ ཟེར་, 10 “ཚང་མེ་ འགྲོན་པོ་རྒུན་ལ་ རྒུན་འགྲུམ་མེ་ ཁོའེ་ རྒྱལ་ལེ་རྦོ་ ངུལ་ལ་ ཏྃ་རྡེ་ འགྲོན་པོ་རྒུན་ འདོན་ ཚར་རེ་རྡང་ ཞིམ་པོ་ མེ་ཀན་འབོ་ ཁྱོང་ཅེན་, འིན་ན་ ཁྱེ་རང་ངེ་ ཚང་མེ་སང་ ཁོའེ་ རྒྱལ་ལེ་འབོ་ ཏག་ས་ཚུག་པ་ པོར་རྡེ་ རག་།”
11 འི་རྦོ་ ཡི་ཤུའི་ ཧ་ལེ་ཤེ་ ལྟའ་ ཏང་པོ་རྦོ་ འིན་འབེན་, ཀའོ་ ཁོང་ངེ་ འགཱ་ལིལ་ལེ་ ཡུལ་ཞོང་ངེ་ ཀ་ནཱེ་ ཀྲོང་ཁྱེར་ལ་ ལྟན་ནེ་ ཛེད་ཏེ་ ཁོ་རང་ངེ་ ཟི་ཞིད་ ངོན་ཅུག་རྒེ་ ཛེད་, ཡང་ ཁོང་ངེ་ ལོབ་ཀྲུག་རྒུ་ནི་ ཁོང་ངེ་ཀ་ ཏེཏ་པ་ ཅོའེ་།
12 ཏེ་ ལྟིང་ནི་ ཡི་ཤུ་, ཁོང་ངེ་ ཨ་མ་, ནོ་ རྡང་ ལོབ་ཀྲུག་རྒུན་ ཀ་ཕར་ན་ཧུམ་ ཀྲོང་ཁྱེར་ལ་ རྐྱོད་, ཏུ་རུ་ ཞག་ ཁ་ཅིག་ ཞུའུ་།
ཀོན་འཇོག་རྒེ་ ཁང་པ་ སང་མ་ ཛེད་།
13 ཡ་ཧུ་འདཱ་པེ་ པེ་སག་རྒེ་ ཏུའི་ཤེན་ ཉེ་མོ་ ལེབ་རྦེ་རྡང་, ཡི་ཤུ་ ལྟག་ལ་ ཡེ་རུ་ཤ་ལེམ་ལ་ རྐྱོད་། 14 ཁོང་ངེ་ ཏུ་རུ་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ ལང་ཀྲོ་, ལུག་ ཏང་, ཕུར་རྒོན་རྒུན་ ཙོང་ཀན་ ཡང་ པེ་ནེ་ རྡེབ་ཀན་རྒུན་ ཁོ་རང་རྒུ་ནི་ ཅོག་ཙེ་ འདུན་ལ་ འདེད་ཏེ་ ཡོད་རྡེ་ ཟིའི་། 15 ཡི་ཤུའི་ ཐག་པ་ཞིག་ལ་ རྟལ་ལྕག་ ཛེད་ཏེ་, ཀོན་འཇོག་རྒེ་ ཁང་པེ་ ཀྱང་ཧོར་རེ་ན་ ཡོ་ཀ་ནེ་ ལུག་, ལང་ཀྲོ་ རྡང་ ཕུར་རྒོན་ ཚང་མ་ ཕི་ལོག་ལ་ ཕིང་ངེ་ ཛེད་, ཡང་ པེ་ནེ་ རྡེབ་ཀན་རྒུ་ནི་ ལྕ་པེན་རྒུན་ ཕང་ངེ་ ཛེད་ཏེ་ ཅོག་ཙེ་རྒུན་ འགོ་ལོག་རྒེ་ ཛེད་། 16 ཡང་ ཕུར་རྒོན་ ཙོང་ཀན་རྒུན་ལ་ མོལ་, “འི་ ཚང་མ་ ཕིང་འདེ་ ཁྱེར་, ངེ་ ཡབ་རྦེ་ ཁང་པ་འབོ་ སྲང་ ཙོག་སེ་ མ་ཅོ་ཧེ་།”
17 ཡི་ཤུའི་ ལོབ་ཀྲུག་རྒུན་ལ་ ཏམ་པེ་ སུང་རབ་རྦེ་ན་ འབྲི་རྡེ་ ཡོ་ཀན་འབོ་ འི་ཏུ་ ཡོྃ་, “ཉེ་རང་ངེ་ ཞུ་སེ་ ངེ་ ཤེ་སྤའོ་, མེ་ འབར་ཧན་ ཙོག་སེ་ འིན་ ཀ་རྦེ་ ང་ མེ་ཀན་ ཅོའེན་།”
18 ཡ་ཧུ་འདཱ་པེ་ སྤོན་འབོ་རྒུ་ནི་ ཡི་ཤུ་, “ཡུ་རྒུན་ ཅོ་ཅེ་ཕི་ ཝང་ ཡོ་ཀན་འབོ་ ལྟན་ཅེ་ལ་ ཁྱེ་རང་ངེ་ ཅི་ ཧ་ལེ་ཤེ་ ལྟའ་ཞིག་ ལྟན་ནེན་” ཟེར་།
19 ཡི་ཤུའི་ ཁོང་རྒུན་ལ་ ལེན་ས་ལེན་ མོལ་, “འི་ ཀོན་འཇོག་རྒེ་ ཁང་པ་འབོ་ ཞིག་, ངེ་ ཞག་ སུམ་མེ་ན་ ཡང་ ལང་ངེན་།”
20 ཏོ་རྒུ་ནི་ ཁོང་ལ་ འདྲི་, “འི་ ཀོན་འཇོག་རྒེ་ ཁང་པ་འབོ་ སིག་རྒེ་ལ་ ལོ་ ཞིབ་ཅུ་ ཞེ་རུག་ འགོར་རྡེ་ འིན་འབེན་, ཅི་ ཁྱེ་རང་ངེ་ འི་རྦོ་ ཞག་ སུམ་མེ་ན་ ཞང་ངེན་ནེ་?” 21 འིན་ན་ ཡི་ཤུའི་ མོལ་ཧན་ནེ་ ཀོན་འཇོག་རྒེ་ ཁང་པ་འབོ་ ཁོ་རང་ངེ་ ཧུ་ཟུག་རྒེ་ ཧོར་ལ་ འིན་འབེན་། 22 ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་རྡེ་ ལྟིང་ནི་ ཁོང་ངེ་ ལོབ་ཀྲུག་རྒུན་ལ་ ཁོང་ངེ་ འི་ ཞལ་ཏ་ མོལ་ཧན་རྒུན་ འི་ཏུ་ ཡོྃ་, ཡང་ ཁོང་རྒུ་ནི་ ཏམ་པེ་ སུང་རབ་ ཏང་ ཡི་ཤུའི་ མོལ་ཧ་ནེ་ ཞལ་ཏ་རྒུ་ནི་ཀ་ ཏེཏ་པ་ ཅོའེ་།
23 ཡི་ཤུ་ པེ་སག་རྒེ་ ཏུའི་ཤེན་ལ་ ཡེ་རུ་ཤ་ལེམ་ལ་ ཞུ་རྡེ་ ཡོད་ཟ་ནི་, ཏུ་རུ་ མི་ མང་པེ་ ཁོང་ངེ་ ཧ་ལེ་ཤེ་ ཛེད་པ་རྒུན་ ཐོང་འདེ་, ཁོང་ངེ་ཀ་ ཏེཏ་པ་ ཅོའེ་། 24 འིན་ན་ ཡི་ཤུ་ ཁོང་རྒུ་ནི་ཀ་ ལོ་མ་ཁྱེལ་ ཅེ་ཞུ་ནི་ ཁོང་ངེ་ ཚང་མེ་ ཉིང་འབོ་ ཁྱེན་ནེ་ ཛེད་། 25 མི་རྒུན་ ཀ་ཟུ་ཤིག་ འིན་ཀན་འབོ་ ཁོང་ལ་ སུའི་ ཤེད་རྒོའེ་ མེ་ཀག་ ཅེ་ཞུ་ནི་ ཁོང་ངེ་ ཁོང་རྒུ་ནི་ ཉིང་ངེ་ན་ ཡོ་ཀན་འབོ་ ཁྱེན་ནེ་ ཛེ་རྡེ་ནོག་།