ཡོ་ཧཱ་ནན་ 1

ཡོ་ཧཱ་ནན་ནེ་ འབྲི་ཛེད་ཀ་ནེ་ ནེ་ཚུལ་ ཟང་པོ་།

མ་ཤི་ཀ་, ཐ་མེད་པེ་ ཀའ་།

འཇིག་རྟེན་ ཙུག་རྒེ་སང་ ངུལ་ལ་ ཀའ་འབོ་ ཡོད་པེན་།

ཏེ་ ཀའ་འབོ་ ཀོན་འཇོག་ ཉམ་པོ་ ཡོད་པེན་།

ཡང་ ཏེ་རྒ་ ཀའ་འབོ་ ཀོན་འཇོག་ ཁོ་རང་ འིན་འབེན་།

2 ཁོང་ འགོ་མ་ནི་ཕ་ལ་ ཀོན་འཇོག་ ཉམ་པོ་ ཞུ་རྡེ་ ཡོད་པེན་།

3 ཁོང་ རྒྱུད་ཏེ་ ཀོན་འཇོག་རྒེ་ ཅི་ཚང་མ་ ཞང་ངེ་ ཛེད་།

ཁོང་ མེད་པེ་ ཅི་ཞིག་ལ་ ཅོ་ མ་ཛེད་།

4 ཁོང་ནི་ སྲོག་ ཚང་མེ་ འཇུང་ཁུང་པོ་ ནོག་།

ཡང་ ཁོང་ངེ་ ཧུ་ཚེ་, མི་ཚང་མེ་ཕི་ འོད་ ནོག་,

5 འི་ འོད་པེ་ མུན་ཀྲག་རྒེ་ན་ འདྃའ་ནོག་

ཡང་ མུན་ཀྲག་རྒེ་ ཏེ་ འོད་པོ་ མ་ནི་ ཁྲང་ མི་ཉེན་།

6 ཀོན་འཇོག་རྒེ་ མི་ཞིག་ ཀ་ལེ་ ཛེད་, ཁོང་ངེ་ ཚན་ ཁྲུའི་སལ་ཧན་ ཡོ་ཧཱ་ནན་ འིན་འབེན་། 7 ཁོང་ རྒྱུད་ཏེ་ མི་ཚང་མེ་ ཏེ་ འོད་པེ་ཀ་ ཏེཏ་པ་ ཅོ་ཅེ་ཕི་ ཁོང་ ཏེ་ འོད་རྡེ་ ཧོར་ལ་ སྤང་པོ་ ཏང་ཅེ་ལ་ རྐྱོད་། 8 ཡོ་ཧཱ་ནན་ ཁོ་རང་ ཏེ་ འོད་པོ་ མན་འབེན་, འིན་ན་ ཁོང་ ཏེ་ འོད་པེ་ ཧོར་ལ་ སྤང་པོ་ སལ་ལེ་ རྐྱོད་། 9 མི་ཚང་མ་ འོད་ སལ་ཧ་ནེ་ ཏེ་ རྡེན་འབེ་ འོད་པོ་ འཇིག་རྟེན་ནེ་ན་ རྐྱོད་རྡེ་ ཛེད་ཏེ་ ནོག་།

10 འཇིག་རྟེན་ ཛེད་ཀན་འབོ་ འཇིག་རྟེན་ནེ་ན་ རྐྱོད་རྡེ་རྡང་, འཇིག་རྟེན་པ་རྒུ་ནི་ ཁོང་ ངོ་ མ་ཤེ་། 11 ཁོང་ ཁོང་རང་ངེ་ མི་རྒུ་ནི་ཀ་ རྐྱོད་, འིན་ན་ ཁོང་རྒུ་ནི་ ཁོང་ལ་ རྒ་སུའི་ མ་ཞུའི་། 12 ཁོང་ལ་ རྒ་སུའི་ ཞུའི་ཧན་ ཡང་ ཏེཏ་པ་ ཅོ་ཀན་རྒུན་ལ་ ཁོང་ངེ་, ཀོན་འཇོག་རྒེ་ ཕྲུ་རྒུ་རྒུན་ འགྱུར་ཤེ་ འོའེ་སྤ་ སལ་འདེ་ འིན་། 13 ཁོང་རྒུན་ ཀོན་འཇོག་རྒེ་ ཕྲུ་རྒུ་, མིར་རྒྱུད་ ཡང་ མི་ ཡི་ ཐབ་ ཡང་ ཨ་རྦེ་ འདོད་པེ་ ཅོའེ་རྡེ་ མ་འགྱུར་རེ་ལ་ ཀོན་འཇོག་ནི་ རྐྱེ་རྡེ་ ནོག་།

14 ཏེ་ ཀའ་འབོ་ ཧུ་ ལུའི་ལ་ འགྱུར་རེ་ ཛེད་ཏེ་ ང་ཞ་རྒུ་ནི་ ཕྲོ་ ཞུ་རྡེ་ ཛེད་། ང་ཞ་རྒུ་ནི་ ཁོང་ངེ་ ཟི་ཞིད་པོ་ འཇལ་, ཏེ་ ཟི་ཞིད་པོ་ ཡབ་རྦེ་ སྲེ་ ཅིག་ཅིག་པོ་, ཐུག་ཞེ་ རྡང་ རྡེན་འབེ་ ཀང་ཀན་འབོ་ འིན་།

15 ཁྲུའི་སལ་ཧན་ ཡོ་ཧཱ་ནན་ནེ་ ཁོང་ངེ་ ཧོར་ལ་ སྤང་པོ་ སལ་རྡེ་ ཀུ་ཅུ་ ཏང་ངེན་ མོལ་, “ཁོང་ནི་ ངེ་ ཟེར་ཧན་ ཏེ་རྒ་རྦོ་ འིན་, ‘ངེ་ ལྟིང་ནི་ རྐྱོད་ཅེ་ཅེན་འབོ་ ངེ་སང་ ཀྲག་པོ་ ཞུ་རྡེ་ འིན་, ཅེ་ཟེར་ནི་ ཁོང་ ངེ་སང་ ངུལ་ལ་ ཞུ་རྡེ་ ཡོད་པེན་།’”

16 ཁོང་ངེ་ ཐུག་ཞེ་ ཀང་འདེ་ ཡོད་ཅེ་རྦེ་, ཨ་ཧོ་རྒུན་ལ་ ཐུག་ཞེ་ཅེན་ནེ་ ཅིན་ལབ་ ཅིག་རྒེ་ ལྟིང་ནི་ ཅིག་ ཐོབ་, 17 ལུང་རྟོན་པ་ མོ་ཤེ་ རྒྱུད་ཏེ་ ཀོན་འཇོག་རྒེ་ ཀཱ་ཁྲིམ་རྒུན་ ཨ་ཧོ་རྒུན་ལ་ སལ་ལེ་ ཛེད་ཏེ་ འིན་འབེན་, ཡང་ ཐུག་ཞེ་ རྡང་ རྡེན་འབེ་ ཨ་ཧོ་རྒུན་ལ་ ཡི་ཤུ་ མ་ཤི་ཀ་ རྒྱུད་ཏེ་ སལ་ལེ་ ཛེད་ཏེ་ འིན་། 18 ཀོན་འཇོག་པོ་ སུ་ལ་ མ་འཇལ་ལེ་ ནོག་, འིན་ན་ ཡབ་ ཀོན་འཇོག་རྒེ་ ཉིང་ནི་ ཤེ་སྤ་ ཛེད་ཀན་ སྲེ་ ཅིག་ཅིག་པོ་, ཀའོ་ ཀོན་འཇོག་ འིན་, ཁོང་ངེ་ ཨ་ཧོ་ ཡབ་ ངོན་ཅུག་རྒེ་ ཛེད་།

ཁྲུའི་སལ་ཧན་ ཡོ་ཧཱ་ནན་ནེ་ སྤང་པོ་།

19 ཡེ་རུ་ཤ་ལེམ་མེ་ རྒྱལ་སེ་ན་ ཡོ་ཀ་ནེ་ ཡ་ཧུ་འདཱ་པེ་ ཝང་སྲུལ་ཧན་ནེ་, ལ་མ་རྒུན་ འདང་ ལི་ཝི་པ་རྒུན་ ཡོ་ཧཱ་ནན་ནེ་ཀ་ ཁོང་ སུ་ འིན་ ཟེར་རྡེ་ འདྲི་ལ་ ལམ་ཅུག་། 20 ཡོ་ཧཱ་ནན་ནེ་ ཐེ་ཚོམ་ མེད་པེ་ སལ་སྤོ་ རྡང་ ཀྲང་པོ་ མོལ་, “ང་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ མན་།”

21 ཁོང་རྒུ་ནི་ འདྲི་, “ཏེ་ནི་ ཉེ་རང་ སུ་ ཞུ་རྡེ་ འིན་, ཉེ་རང་ ལུང་རྟོན་པ་ ཨེ་ལི་ཡཱ་ འིན་ནེ་?”

ཡོ་ཧཱ་ནན་ནེ་, “ང་ མན་” མོལ་།

ཁོང་རྒུ་ནི་ འདྲི་, “ཏེ་ནི་ ཉེ་རང་ ཀོན་འཇོག་རྒེ་ ཀ་ལེ་ ཛེད་ཅེ་ ཁ་ཅེད་ ཅོའོ་ ཛེད་ཀ་ནེ་ ལུང་རྟོན་པ་འབོ་ འིན་ནེ་?”

ཁོང་ངེ་, “མན་” མོལ་།

22 ལྟིང་འཇུག་ལ་ ཏེ་ མི་རྒུ་ནི་ ཁོང་ལ་ འདྲི་, “ཏེ་ནི་ ཉེ་རང་ འིན་འབོ་ སུ་ འིན་། ཤོད་རྡང་ ཅེ་ཟེར་ནི་ ང་ཞ་, ང་ཞ་ ཀལ་ཧན་རྒུན་ལ་ ལེན་ཏྃ་རྒོའེ་ཡོད་། ཉེ་རང་ རང་ངེ་ ཧོར་ལ་ ཅི་ མོལ་ལེ་ཡོད་?”

23 ཡོ་ཧཱ་ནན་ནེ་ ལུང་རྟོན་པ་ ཡེ་ཤ་ཡཱེ་ མོལ་ཧན་ ནང་ཞིན་ལ་ ལེན་སལ་, “རི་ལྟོང་ངེ་ན་ ཧད་ ཆོན་མོ་ ཏང་ཀན་འབོ་ ང་ འིན་, ‘ཙོབོ་ ཕེབ་ལམ་འབོ་ ཀྲང་པོ་ ཅོའེ་ཧེ་།’”

24 ཏེ་ནི་ ཀལ་ཧ་ནེ་ པ་རུ་ཤི་པ་རྒུ་ནི་ 25 ཡོ་ཧཱ་ནན་ལ་ འདྲི་, “ཀལ་ཏེ་ ཉེ་རང་ འདམ་མེ་ ཛེད་ཀ་ནེ་ མ་ཤི་ཀ་ ཡང་ ཨེ་ལི་ཡཱ་ ཡང་ ཏེ་ ལུང་རྟོན་པ་འབོ་ མན་ནེ་, ཏེ་ནི་ ཉེ་རང་ངེ་ ཁྲུའི་ ཅེ་ སལ་ལེ་ཡོད་?”

26 ཡོ་ཧཱ་ནན་ནེ་ ཁོང་རྒུན་ལ་ ལེན་སལ་, “ངེ་ མི་རྒུན་ལ་ ཆུ་ ཉམ་པོ་ ཁྲུའི་ ཏང་ངེ་ཡོད་། འིན་ན་ ཁྱི་ཞ་རྒུ་ནི་ ཕྲོ་ ཁྱི་ཞི་ མ་ཤེ་ཀ་ནེ་ མིའུ་ ཞུ་རྡེ་ཡོད་། 27 ཁོང་, ངེ་ ལྟིང་ནི་ རྐྱོད་རྡེན་, ང་ ཁོང་ངེ་ ཞཔ་ལམ་ རོ་རྦུད་ ཀྲོལ་ཤེ་ འོའེ་སྤ་ མེད་།”

28 འི་ ཚང་མ་ ཡོ་ཧཱ་ནན་ནེ་ མི་རྒུན་ལ་ ཁྲུའི་སལ་སེ་ ཡོར་འདཱན་ སྃ་སྤེ་ ཤར་ ཆོག་ལ་ ཡོ་ཀ་ནེ་ འབེད་ཐཱ་ནི་ ཀྲོང་ཁྱེར་ལ་ སོང་།

ཡི་ཤུ་ ཀོན་འཇོག་རྒེ་ ལུ་རྒུ་།

29 ཐོ་རེ་ཚུག་པ་ ཡོ་ཧཱ་ནན་ནེ་ ཡི་ཤུ་ ཁོ་རང་ ཆོག་ལ་ རྐྱོད་རྡེ་ ཟི་རྡེ་ མོལ་, “ལྟོའེ་རྡང་ ཁོང་ནི་ ཀོན་འཇོག་རྒེ་ ལུ་རྒུ་, འཇིག་རྟེན་པ་རྒུ་ནི་ རྡིག་པ་ མེ་ཀན་ ཅོའོ་ ཛེད་ཀན་འབོ་ ནོག་། 30 ཁོང་ ཏེ་རྒ་རྦོ་ ཞུ་རྡེ་ འིན་, ཀ་རྦེ་ ཧོར་ལ་ ངེ་ ཟེར་རྦེན་, ‘ངེ་ ལྟིང་ནི་ རྐྱོད་ཅེ་ཅེན་འབོ་ ངེ་སང་ ཀྲག་པོ་ ཞུ་རྡེ་ འིན་ ཅེ་ཟེར་ནི་ ཁོང་ ངེ་སང་ ངུལ་ལ་ ཞུ་རྡེ་ ཡོད་པེན་།’ 31 ངུལ་ལ་ ངེ་ལ་ ཁོང་ ངོ་ མ་ཤེ་, འིན་ན་ ཨིས་ར་ཡེལ་པ་རྒུན་ལ་ ཁོང་ ངོན་ཅུག་ཅེ་ཕི་, ངེ་ ཆུ་ ཉམ་པོ་ ཁྲུའི་ ཏང་ངེན་ ཡོང་འབེན་།”

32 ཏེ་ནི་ ཡོ་ཧཱ་ནན་ནེ་ སྤང་པོ་ སལ་, “ངེ་ ཏམ་པེ་ ཐུག་ཡིད་ ཕུར་རྒོན་ཞིག་རྒེ་ ཚུལ་ལ་ ནམ་ཀ་ནི་ པབ་ཏེ་ ཁོང་ངེ་ཀ་ ཞུ་རྒྱ་ལ་ ཐོང་། 33 འགོ་མ་ ངེ་ ཁོང་ སུ་ འིན་ཀན་འབོ་ ངོ་ཤེ་རྡེ་ མེད་པེན་, འིན་ན་ ང་ ཆུ་ ཉམ་པོ་ ཁྲུའི་ ཏང་ངེ་ལ་ ཀ་ལེ་ ཛེད་ཀན་འབེ་ མོལ་, ‘ཁྱེ་རང་ངེ་ ཏམ་པེ་ ཐུག་ཡིད་ པབ་ཏེ་ ཞུ་རྡེ་ ཐོང་ཀན་འབེ་, ཏམ་པེ་ ཐུག་ཡིད་ ཉམ་པོ་ ཁྲུའི་སལ་ལེ་ ཛེ་རྡེན་།’ 34 ངེ་ ཁོང་ འཇལ་རྦེ་ ངེ་ ཁོང་ ཀོན་འཇོག་རྒེ་ སྲེ་ འིན་ཀན་འབེ་ སྤང་པོ་ ཏང་ངེ་ཡོད་།”

ཡི་ཤུའི་ འགོ་མེ་ ལོབ་ཀྲུག་།

35 ཐོ་རེ་ཚུག་པ་ ཡོ་ཧཱ་ནན་ ཡང་ ཁོ་རང་ངེ་ ལོབ་ཀྲུག་ ཉི་ ཉམ་པོ་ ཡོད་པེན་། 36 ཁོང་ངེ་ ཡི་ཤུ་ ཏེ་ཀ་ནི་ འགྲུལ་ལེན་ རྐྱོད་རྡེ་ལ་ ཟི་རྡེ་ མོལ་, “ལྟོའེ་རྡང་, ཁོང་ ཀོན་འཇོག་རྒེ་ ལུ་རྒུ་ ནོག་” 37 ཡང་ ཡོ་ཧཱ་ནན་ནེ་ ལོབ་ཀྲུག་ ཉ་ཧ་ ཁོང་ངེ་ ཏུ་ཟུག་ མོལ་ལེ་ ཚོར་རེ་རྡང་, ཁོང་རྒུན་ ཡི་ཤུའི་ ལྟིང་འགྲྃ་ནི་ སོང་།

38 ཡི་ཤུའི་ རྒྱབ་ ལོག་ཏེ་ ཁོང་རྒུན་ ལྟིང་འགྲྃ་ནི་ ཡོང་ངེ་ ཟི་རྦེ་, ཁོང་རྒུན་ལ་ འདྲི་ ཛེད་, “ཁྱི་ཞ་ ཅི་ རྒོའེ་?”

ཁོང་རྒུ་ནི་ ལེན་ཏྃ་, “རབ་འབི་” ཡང་ན་ “ལོབ་རྦོན་ལེ་”, “ཉེ་རང་ ཀ་རུ་ ཞུ་རྡེན་?”

39 ཡི་ཤུའི་ ཁོང་རྒུན་ལ་ ལེན་སལ་, “ང་ ཉམ་པོ་ ཡོྃ་རྡེ་ ལྟོའེ་ཧེ་།” ཏེ་ནི་ ཁོང་ ཉ་ཧ་ ཡི་ཤུ་ ཉམ་པོ་ སོང་འདེ་ ཁོང་ ཞུ་སེ་ མལ་ ཐོང་། ཏོ་ཟ་ནི་ ཕི་ཏོག་རྒེ་ ཆུ་ཙོད་ ཞི་པ་ ཟམ་ སོང་འབེ་ ཏེ་ ཚེན་འབོ་ ཁོང་རྒུན་ ཡི་ཤུ་ ཉམ་པོ་ འདེད་།

40 ཡོ་ཧཱ་ནན་ནེ་ མོལ་ཧན་རྒུན་ ཚོར་རྡེ་, ཡི་ཤུའི་ རྒྱབ་ནི་ འགྲང་ཀན་ ཉི་ ནང་ནི་ ཅིག་པོ་ ཤི་མོན་ པི་ཏྲ་རེ་ ནོ་ ཨན་འགྲིརུ་ འིན་འབེན་། 41 ཚང་མེ་སང་ ངུལ་ལ་ ཨན་འགྲིརུ་འི་ ཁོའེ་ ཨ་ཅོ་ ཤི་མོན་པི་ཏྲར་ ཙལ་རྡེ་ ཁོ་ ཟེར་, “ང་ཞ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ཡང་ན་ ཧོ་ ཛེད་ཀན་འབོ་ ཐོབ་།”

42 ཨན་འགྲིརུ་འི་ ཤི་མོན་ ཁྲིད་ཏེ་ ཡི་ཤུའི་ཀ་ ཁྱེར་། ཡི་ཤུའི་ ཁོ་ ཟི་རྡེ་ མོལ་, “ཁྱེ་རང་ ཡོ་ཧཱ་ནན་ནེ་ པུ་ཙ་ ཤི་མོན་ མན་ནེ་? ཏི་ནི་ཕ་ལ་ ཁྱེ་རང་ངེ་ མིང་ལ་ ཀྱེ་ཕ་ ཡང་ན་ པི་ཏྲར་ ཟེ་འིན་།”

ཕི་ལིབ་ ཏང་ ན་ཐན་ནི་ཨེལ་ འདམ་མེ་ ཛེད་།

43 ཐོ་རེ་ཚུག་པ་ ཡི་ཤུ་ འགཱ་ལིལ་ལེ་ ཡུལ་ཞོང་ལ་ རྐྱོད་ཅེ་ ཐག་ཅེད་རྡེ་ ཛེད་། ཕི་ལིབ་ ཐོབ་རྦེ་རྡང་ ཁོང་ངེ་ ཁོ་, “ངེ་ ལྟིང་འགྲྃ་ནི་ ཤོ་” མོལ་། 44 ཕི་ལིབ་, ཨན་འགྲིརུ་ རྡང་ པི་ཏྲ་རེ་ ཀྲོང་ཁྱེར་ འབེད་སེ་འདཱ་ འིན་འབེན་།

45 ན་ཐན་ནི་ཨེལ་ ཐོབ་རྦེ་རྡང་ ཕི་ལིབ་རྦེ་ ཟེར་, “མོ་ཤེ་ རྡང་ ལུང་རྟོན་པ་རྒུ་ནི་ འབྲི་ཛེད་ཀ་ནེ་ མིའུ་ ང་ཞ་ ཐོབ་། ཁོང་ ཡོ་སེབ་རྦེ་ སྲེ་ ན་ཙ་རེད་པ་ ཡི་ཤུ་ ནོག་།”

46 ན་ཐན་ནི་ཨེལ་ལེ་ ཁོ་ ཟེར་, “ན་ཙ་རེད་ ཟང་པོ་ཞིག་ འབིང་ སྲིད་རྡེ་ནོག་རྒེ་?” ཕི་ལིབ་རྦེ་ ཁོ་ ཟེར་, “ཡོྃ་རྡེ་ ལྟོའེ་།”

47 ཡི་ཤུའི་ ན་ཐན་ནི་ཨེལ་ ཡོང་ངེ་ལ་ ཟི་རྡེ་ ཁོའེ་ ཧོར་ལ་ མོལ་, “ལྟོའེ་རྡང་, འི་ མིའུ་ལ་ ཨིས་ར་ཡེལ་པ་ ཟེར་ཤེ་ འོའེ་སྤ་ ནོག་, ཅེ་ཟེར་ནི་ ཁོའེ་ སུ་ཞི་ལ་ མ་ནི་ འགོ་མི་ཧོར་།”

48 ན་ཐན་ནི་ཨེལ་ལེ་ ཡི་ཤུ་, “ཉེ་རང་ངེ་ ང་ ཀ་ཟུག་རྒེ་ ཁྱེན་ནེད་” ཟེར་།

ཡི་ཤུའི་ ཁོ་, “ཕི་ལིབ་རྦེ་ འབོ་སང་ ངུལ་ལ་ ངེ་ ཁྱེ་རང་ སྤིག་རྒེ་ ཁ་ཟོའེ་ ལྕང་མེ་ ཡོག་ལ་ ཡོད་ཟ་ནི་ ཐོང་” མོལ་།

49 ན་ཐན་ནི་ཨེལ་ལེ་ ཟེར་, “ལོབ་རྦོན་ལེ་, ཉེ་རང་ ཀོན་འཇོག་རྒེ་ སྲེ་ རྡང་ ཁོང་ངེ་ ཨིས་ར་ཡེལ་ལེ་ རྒྱ་སྤོ་ ནོག་།”

50 ཡི་ཤུའི་ ན་ཐན་ནི་ཨེལ་ལ་, “ངེ་ ཁྱེ་རང་ སྤིག་རྒེ་ ཁ་ཟོའེ་ ལྕང་མེ་ ཡོག་ལ་ ཡོད་ཟེར་ནི་ ཐོང་ ཟེར་རྦེ་ ཁྱེ་རང་ངེ་ ཏེཏ་པ་ ཅོའེ་རྡེ་ འིན་ནེ་? ཁྱེ་རང་ངེ་ འི་སང་ ཧ་ལེ་ཤེ་ ལེ་ཧ་ ཆེ་ ཐོང་ངེན་” མོལ་། 51 ཡི་ཤུ་ ཏ་རུང་ང་ མོལ་, “ངེ་ ཁྱེ་རང་ལ་ རྡེན་འབའ་ ཟེ་འིན་, ཁྱེ་རང་ངེ་ རྡེ་བ་ཅན་ པེ་རྡེ་ ཡང་ ཀོན་འཇོག་རྒེ་ ཕོ་ཉ་རྒུན་, ང་ མི་རིག་རྒེ་པུའི་ཀ་ ཛག་རྒེན་ ཡང་ པབ་རྦེན་ ཐོང་ངེན་།”