མར་ཀུ་ 15

ཡི་ཤུ་ པི་ལ་ཏུ་ས་ ཁྱེར་།

ང་མོ་ ང་ཏོག་ནི་ ལ་མ་ འུ་རྐྱོང་རྒུན་, ཡ་ཧུ་འདཱ་པེ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ ཚོག་འདུའི་ ཐུའི་མི་ སོན་ཏེ་ ཡི་ཤུ་ སེད་ཅེ་ལ་ ཐ་ཅོད་། ཁོང་རྒུ་ནི་ ཁོང་ངེ་ ཆག་ རྡམ་འདེ་ ཀ་ལོན་ པི་ལ་ཏུ་ ལག་ལ་ ལྟེད་རྡེ་ལ་ ཁྱེར་།

2 པི་ལ་ཏུ་ ཡི་ཤུ་ འདྲི་, “ཁྱེ་རང་ ཡ་ཧུ་འདཱ་པེ་ རྒྱ་སྤོ་ འིན་ནེ་?”

ཡི་ཤུའི་ ལེན་སལ་, “འིན་ ཉེ་རང་ངེ་ ཟེར་ཧན་འབོ་ འིན་།”

3 ཏེ་ནི་ ལ་མ་ འུ་རྐྱོང་རྒུ་ནི་ ཁོང་ངེ་ རྒྱཔ་འགལ་ལ་ ཉེད་ཀལ་ མང་པོ་ ཀལ་། 4 པི་ལ་ཏུ་ ཡང་ ཁོང་ལ་ འདྲི་, “ཁྱེ་རང་ངེ་ ཁོང་རྒུན་ལ་ ལེན་ཏྃ་ངེ་ མེད་རྡེ་? ལྟོའེ་རྡང་! ཁྱེ་རང་ངེ་ རྒྱཔ་འགལ་ལ་ ཁོང་རྒུ་ནི་ ཙམ་ཤིག་རྒེ་ ཉེད་ཀལ་ ཅོ་རུག་?” 5 འིན་ན་ ཡི་ཤུའི་ ཅང་ ལེན་ མ་སལ་རྦེ་, པི་ལ་ཏུ་ ཧ་ལེ་།

6 ལུག་སྲོལ་ ནང་ཞིན་ པེ་སག་རྒེ་ ཏུའི་ཤེན་ནེ་ ཏུའི་ལ་, ཀ་ལོན་ནེ་ མི་རྒུ་ནི་ ཞུ་ཝ་ ནང་ཞིན་ ཙོན་པ་ ཅིག་ པུད་རྡེ་ཡོད་པེན་། 7 ཏེ་ཏུའི་ལ་ རོམ་མེ་ ཞུང་ངེ་ རྒྱཔ་འགལ་ལ་ ངོ་ལོག་ ཅོའེ་རྡེ་ མི་ སེད་ཀན་ འབཱ་ར་འབཱ་ རྡང་ ཁོའེ་ ཁྲོ་པ་རྒུན་ ཙོན་ཁང་ངེ་ན་ ཡོད་པེན་། 8 མི་ཚོག་ པི་ལ་ཏུ་ས་ ཡོྃ་རྡེ་ ཁོ་ ཏུའི་རྒྱུན་ ཙོག་སེ་ ཙོན་པ་ཞིག་ པུད་ཅེ་ཕི་ ཟེར་།

9 པི་ལ་ཏུའི་ འདྲི་, “ཁྱི་ཞི་ཕི་ ངེ་ ཡ་ཧུ་འདཱ་པེ་ རྒྱ་སྤོ་ པུད་རྡེ་?” 10 ལ་མ་ འུ་རྐྱོང་རྒུན་ ཡི་ཤུའི་ཀ་ ཕྲ་རྡོག་ ཅོའེ་འདེ་, ཁོང་ ཁོའེ་ ལག་ལ་ ལྟེད་ཀན་འབོ་ པི་ལ་ཏུ་ལ་ རྒྱུའི་སོང་། 11 འིན་ན་ ལ་མ་ འུ་རྐྱོང་རྒུ་ནི་ མི་ཚོག་ལ་ ལྕེ་ ཀོལ་རྡེ་ ཡི་ཤུའི་ ཚབ་ལ་ འབཱ་ར་འབཱ་ པུད་ཅེ་ཕི་ པི་ལ་ཏུ་ལ་ ཞུ་ཝ་ པུལ་ཤུག་། 12 པི་ལ་ཏུ་ ཁོང་རྒུན་ལ་ འདྲི་, “ཏེ་ནི་ ངེ་ ཁྱི་ཞ་རྒུ་ནི་ ཡ་ཧུ་འདཱེ་ རྒྱ་སྤོ་ ཟེར་ཧ་ནེ་ མིའུ་ ཅི་ ཅོ་?”

13 ཁོང་རྒུ་ནི་ ཀུ་ཅུ་ ཏང་ངེན་ ལེན་ཏྃ་, “ཁོ་ རྐྱང་ཤིང་ལ་ རྐྱོང་།”

14 པི་ལ་ཏུའི་ འདྲི་, “ཅི་ཕི་, ཁོའེ་ ལེ་ངན་ ཅི་ཅོའེ་?”

འིན་ན་ མི་ཚོག་རྒེ་ ཀུ་ཅུ་ ཧོཔ་ ཏང་ངེན་ ཟེར་, “ཁོ་ རྐྱང་ཤིང་ལ་ རྐྱོང་།”

15 མི་ཚོག་པོ་ ཐེད་ཅུག་ཏེ་ པི་ལ་ཏུ་ ཁོང་རྒུ་ནི་ཕི་ འབཱ་ར་འབཱ་ ཙོན་ཁང་ནི་ པུད་ཅུག་ ཡང་ ཡི་ཤུ་ རྟལ་ལྕག་ རྒྱབ་རྦེན་ འདང་ རྐྱང་ཤིང་ངེ་ཀ་ རྐྱང་ཅེ་ལ་ མག་མི་རྒུན་ལ་ ལྟེད་།

མག་མི་རྒུ་ནི་ ཡི་ཤུ་ ཁྲེལ་རྒོད་ ཏྃ་།

16 མག་མི་རྒུ་ནི་ ཀ་ལོན་ནེ་ ཁར་, ཀ་འབོ་ལ་ པ་རེ་ཏོ་རི་ཡམ་ ཟེ་རེན་, ཏེ་ན་ ཡི་ཤུ་ ཁྱེར་རྡེ་ མག་ཚོག་ སོན་ཏེ་ ཛོམ་ཅེ་ལ་ འབོའེ་། 17 ཁོང་རྒུ་ནི་ ཁོང་ལ་ རྒྱ་སྤོ་ ཀོན་ཀན་ ཙོག་སེ་ ནམ་ཟ་ མར་སྤོ་ཞིག་ ཧོན་, ཡང་ ཚེར་མེ་ ཐོར་ཤོག་ ལེ་རྡེ་ ཁོང་ངེ་ ཨུ་ལ་ ཧོན་། 18 ཁོང་རྒུ་ནི་ ཁོང་ལ་ ཁྲེལ་རྒོད་ ཏང་ངེན་ ཟེར་, “ཡ་ཧུ་འདཱ་པེ་ རྒྱ་སྤོ་ལ་ ཧུ་ཚེ་རྟེན་ཅིག་།” 19 ཁོང་རྒུ་ནི་ ཁོང་ངེ་ ཨུ་ལ་ པེར་ཧ་ ཉམ་པོ་ ལེན་ མང་པོ་ རྡུྃ་རྡེ་ ཁོང་ལ་ ཐུ་ རྒྱབ་, ཡང་ ཡི་ཤུའི་ འདུན་ལ་ པིག་མེ་ཀ་ འགྱེལ་རྡེ་ ཁོང་ལ་ ཆག་པུལ་ ཟུན་ཏྃ་། 20 ཁྲེལ་རྒོད་ ཏྃ་རྡེ་ ལྟིང་ནི་ ཁོང་རྒུ་ནི་ ནམ་ཟ་ མར་སྤོ་ པུད་ཏེ་, ཡི་ཤུ་ ཁོ་རང་ངེ་ ནམ་ཟ་འབོ་ ཧོན་། ཏེ་ནི་ ཁོང་ རྐྱང་ཤིང་ངེ་ཀ་ རྐྱང་ཅེ་ལ་ ཁྱེར་།

རྐྱང་ཤིང་ངེ་ཀ་ རྐྱང་།

21 ཡི་ཤུ་ ཁྲིད་ཏེ་ ཁྱེར་ཟ་ནི་ ཨ་ལེག་ཟན་འདྲེར་ རྡང་ རུ་ཕེ་ ཨ་རྦ་, ཀི་རིན་པ་ ཤི་མོན་ འགམ་ཡུལ་ནི་ རྒྱལ་སེ་ན་ ཡོང་ངེ་ཡོད་པེན་ ཡང་ མག་མི་རྒུ་ནི་ ཁོ་ ཝང་ ཏྃ་རྡེ་ ཡི་ཤུའི་ རྐྱང་ཤིང་ ཁུར་ཤུག་། 22 ཁོང་རྒུ་ནི་ ཡི་ཤུ་ འགོལ་འགོ་ཐཱ་ ཀ་རྦེ་ ཏོན་ཏག་པོ་ “འགོའེ་ རུའི་སྤེ་ ས་ཀྱེཏ་” ཟེར་ཧ་ནེ་ མལ་ལེ་ཀ་ ཁྱེར་། 23 ཏེ་ནེ་ ཁོང་རྒུ་ནི་ ཡི་ཤུ་ མིར་ ཟེར་ཧ་ནེ་ མན་ རྒུན་འགྲུམ་མེ་ ཁོའེ་ན་ སྲེ་རྡེ་ ཏྃ་, འིན་ན་ ཁོང་ངེ་ ཏོ་ འདོན་ནེ་ མ་ཛེད་། 24 ཁོང་རྒུ་ནི་ ཡི་ཤུ་ རྐྱང་ཤིང་ངེ་ཀ་ རྐྱང་ ཡང་ ཁོང་ངེ་ ནམ་ཟ་ རྒོའེ་རྡེ་ སུ་ལ་ ཐོབ་ཏུག་ ལྟ་ཅེ་ལ་ རྒྱེན་ ཏྃ་།

25 ཡི་ཤུ་ རྐྱང་ཤིང་ངེ་ཀ་ རྐྱང་ཟ་ནི་, ང་ཏོག་རྒེ་ ཆུ་ཙོད་ རྒུ་པ་ ཆ་ཡོད་པེན་། 26 ཁོང་ངེ་ ཨུའི་ ལྟག་ལ་ ཉེད་ཀལ་ ཀལ་ཧ་ནེ་ ལྟའ་རྦེ་ཀ་ “ཡ་ཧུ་འདཱ་པེ་ རྒྱ་སྤོ་” འབྲི་རྡེ་ ཡོད་པེན་། 27 ཅག་པ་ ཉི་ ཁོང་ ཉམ་པོ་ རྐྱང་ཤིང་ངེ་ཀ་ རྐྱང་, ཅིག་པོ་ ཁོང་ངེ་ ཡོའེ་སྤ་ ཡང་ ཅིག་པོ་ ཡོའེ་མེ་ཀ་ རྐྱང་། 28 འི་རྦེ་ ཏམ་པེ་ སུང་རབ་རྦེ་ན་ འབྲི་ཛེད་ཀན་འབོ་ “ཁོང་ རྡིག་ཅེན་རྒུ་ནི་ ཕྲོ་ སི་རྒེན་” ཟེར་ཧན་འབོ་ འདྲན་འདྲ་ ཀྲུཔ་ཏེ་ ནོག་།

29 ཏེ་ ས་ཅ་ རྒྱུད་ཏེ་ འགྲུལ་ཧན་རྒུ་ནི་ འགོ་ ཡུག་ཏེ་ ཁྲེལ་རྒོད་ ཏང་ངེན་ ཟེར་, “ཀོན་འཇོག་རྒེ་ ཁང་པ་ ཞིག་ཏེ་ ཞག་ སུམ་མེ་ན་ སིག་རྒེན་ ཟེར་ཧན་ ཁྱོད་, 30 རྐྱང་ཤིང་ངེ་ཀ་ནི་ ཡོག་ལ་ པབ་ཏེ་ རང་ རྐྱོབ་རྦང་།”

31 ཏེ་རྒ་ ཙོག་སེ་ ལ་མ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ལ་ ཁྲེལ་རྒོད་ ཏང་ངེན་ ཟེར་, “ཁོའེ་ ཞེན་མ་རྒུན་ རྐྱོབ་, འིན་ན་ ཁོ་རང་ རྐྱོབ་ཉེན་ནེ་ མི་འདུག་། 32 འི་ འདམ་མེ་ ཛེད་ཀ་ནེ་ མ་ཤི་ཀ་, ཨིས་ར་ཡེལ་ལེ་ རྒྱ་སྤོ་, རྐྱང་ཤིང་ངེ་ཀ་ནི་ ཏག་ས་ པབ་ཏེ་ ཡོང་ནི་, ང་ཞི་ ཐོང་འདེ་ ཏེཏ་པ་ ཅོའེན་།” ཡི་ཤུ་ ཉམ་པོ་ རྐྱང་ཤིང་ངེ་ཀ་ རྐྱང་ཀན་རྒུ་ནི་ ཁོང་ལ་ ཚིག་ ཏྃ་།

ཡི་ཤུ་ ཀྲོྃ་།

33 ཉི་མེ་ཀུང་ནི་ ཆུ་ཙོད་ སུམ་པ་ཚུག་པ་ ཡུལ་ སོན་ཏེ་ མུན་ཀྲག་ སོང་། 34 ཏེ་ནི་ ཆུ་ཙོད་ སུམ་པེ་ཀ་ ཡི་ཤུའི་ སུང་ཧད་ ཆོན་མེ་ན་ འབོ་ ཛེད་, “ཨེ་ལོ་འི་, ཨེ་ལོ་འི་, ལེ་མ་ ས་འབག་ཐ་ནི་།” ཀ་རྦེ་ ཏོན་ཏག་པོ་ “ངེ་ ཀོན་འཇོག་ ངེ་ ཀོན་འཇོག་ ཉེ་རང་ངེ་ ང་ ཅེ་ ཕང་ངེ་ ཛེ་རྡེ་ འིན་?” མོལ་རྡེ་ ནོག་།

35 ཏུ་རུ་ ཡོ་ཀན་རྒུ་ནི་ ནང་ནི་ ཁ་ཅིག་རྒེ་ ཏོ་ ཚོར་རེ་རྡང་ ཟེར་, “ཉོན་ཤིག་ཧེ་ ཁོའེ་ ལུང་རྟོན་པ་ ཨེ་ལི་ཡཱ་ འབོ་རུག་།” 36 ཁོང་རྒུ་ནི་ ཕྲོ་ནི་ ཅིག་ རྒྱུག་འདེ་ སོང་ ཡང་ རེ་རྦལ་ཞིག་ རྒུན་འགྲུམ་མེ་ ཁོའེ་ རྐྱུར་མོ་ན་ ཅུག་ཏེ་ པེར་ཧེ་ཀ་ རྐྱོན་འདེ་ ཡི་ཤུ་ འདོན་ཅེ་ལ་ ཏྃ་། ཞེན་ཅིག་རྒེ་ ཟེར་, “སྲུང་ཧེ་། ལུང་རྟོན་པ་ ཨེ་ལི་ཡཱ་ ཁོ་ རྐྱོབ་རྦེ་ལ་ རྐྱོད་ཏུག་རྒེ་ ལྟོའེན་འབེ་།”

37 ཏེ་ནི་ ཡི་ཤུའི་ ཧད་ ཆོན་མོ་ ཉམ་པོ་ ཀུ་ཅུ་ སལ་འདེ་ ལྟིང་འཇུག་རྒེ་ འུག་རྦོ་ ནེན་ནེ་ ཛེད་ ཡང་ ཀྲོྃ་། 38 ཏེ་རྒ་ ཏུའི་ལ་ ཀོན་འཇོག་རྒེ་ ཁང་པེ་ ཡོ་ལ་ ཐུག་མོ་ ལྟག་ནི་ ཡོག་ཚུག་པ་ ཆེད་ཏེ་ པོ་ཉི་ སོང་།

39 ཡི་ཤུའི་ འདུན་ལ་ ཡོ་ཀ་ནེ་ མག་མི་རྒྱེ་ སྤོན་འབེ་ ཁོང་ ཀྲོྃ་ཚུལ་རྦོ་ ཐོང་འདེ་ ཟེར་, “འི་ མི་ ཀོན་འཇོག་རྒེ་ སྲེ་ འིན་ཀན་འབོ་ ནེན་ཏེན་ ནོག་།”

40 ཐག་རིང་ཞིག་ནི་ པོ་མོ་ ཁ་ཅིག་རྒེ་ ཡི་ཤུ་ ཀྲོྃ་ཤེའོ་ ལྟོའེན་ ཡོད་པེན་། ཁོང་རྒུ་ནི་ ཕྲོ་ མ་ཧ་འདལ་ལེན་མ་ མར་ཡམ་, ཡོ་སེབ་ ཏང་ ཁོའེ་ ནོ་ ཡ་ཀུབ་རྦེ་ ཨ་མ་ མར་ཡམ་ འདང་ ས་ལོ་མི་རྒུན་ ཡོད་པེན་། 41 འགཱ་ལིལ་ལེ་ན་ ཁོང་རྒུན་ ཡི་ཤུའི་ རྒྱབ་ནི་ འགྲུལ་རྡེ་ ཁོང་ངེ་ རྒོའེ་ཤེ་རྒུན་ རི་རྡེ་ ཞབ་ཤི་ ཞུ་ཡོད་པེན་། ཁོང་ ཉམ་པོ་ ཡེ་རུ་ཤ་ལེམ་ལ་ ཡོང་ཀ་ནེ་ པོ་མོ་ མང་པོ་ཞིག་ལ་ ཏུ་རུ་ ཡོད་པེན་།

ཡི་ཤུའི་ སྤུར་ སྤུར་ཧང་ངེ་ན་ པོ་རེ་ ཛེད་།

42 ཟ་པ་སང་ ཞག་ ཡང་ནི་ ངལ་ཚོའེ་ ཞག་རྒེ་སང་ ངུལ་མེ་ ཞག་པོ་, ཀྲལ་འགྲིག་རྒེ་ ཞག་ འིན་འབེན་, ཕི་ཏོག་ ལེབ་ཅེ་ ཉེ་མོ་ ཡོད་ཟ་ནི་, 43 ཡ་ཧུ་འདཱ་པེ་ ཚོག་འདུའི་ ཐུའི་མི་ ཁག་ཅེན་ འིན་ཀན་ ཨ་རི་མ་ཐཱ་པ་ ཡོ་སེབ་, ཀའོ་ ཀོན་འཇོག་རྒེ་ རྒྱལ་སྲིད་ ལེབ་ཅེ་ལ་ སྲུྃ་རྡེ་ ཡོད་པེན་, ཁོའེ་ ཧམ་བ་ ཅོའེ་རྡེ་ པི་ལ་ཏུའི་ཀ་ སོང་འདེ་ ཁོ་ ཡི་ཤུའི་ སྤུར་ སལ་ ཟེར་རྡེ་ ཞུ་ཝ་ པུལ་། 44 ཡི་ཤུ་ ཀྲོྃ་ཚར་ཧན་འབོ་ ཚོར་རྡེ་ པི་ལ་ཏུ་ ཧ་ལེ་, ཡང་ མག་མི་རྒྱེ་ སྤོན་འབོ་ འབོའེ་རྡེ་ ཡི་ཤུ་ ཀྲོྃ་ཚར་རྡོག་ ཟེར་རྡེ་ འདྲི་། 45 ཁོའེ་ཀ་ནི་ ཡི་ཤུ་ ཀྲོང་ཚར་ཧན་འབོ་ ཚོར་རྡེ་ ལྟིང་ནི་, པི་ལ་ཏུ་ ཡོ་སེབ་ལ་ ཁོང་ངེ་ སྤུར་རྦོ་ ཁྱེར་ཤེ་ལ་ རྒོང་སྤ་ ཏྃ་། 46 ཏེ་ནི་ ཡོ་སེབ་རྦེ་ རེ་ ཀུའི་སྤོ་ ཁྱོྃ་ ཡང་ ཡི་ཤུའི་ སྤུར་རྦོ་ རྐྱང་ཤིང་ངེ་ཀ་ནི་ སྤབ་ཏེ་ ཏེ་ན་ ཏུམ་, ཡང་ ཀྲག་རྒེ་ན་ ཧོའེ་རྡེ་ ཡོ་ཀ་ནེ་ སྤུར་ཧང་ཞིག་རྒེ་ན་ པོར་། ཏེ་ནི་ ཁོའེ་ སྤུར་ཧང་ངེ་ ཁེ་ཀ་ ཕོ་ལོང་ ཆོན་མོ་ཞིག་ རིལ་རྡེ་ ཀབ་། 47 མ་ཧ་འདལ་ལེན་མ་ མར་ཡམ་ འདང་ ཡོ་སེབ་རྦེ་ ཨ་མ་ མར་ཡམ་མེ་ ཡི་ཤུའི་ སྤུར་ པོ་རེ་ ཛེད་ཀ་ནེ་ མལ་རྦོ་ ཐོང་།