མར་ཀུ་ 16

ཡི་ཤུ་ སོན་པོ་ ཞང་།

ཟ་སྤེན་འབེ་ ཕི་ཏོག་ ངལ་ཚོའེ་ ཞག་པོ་ ཚར་རེ་རྡང་, མ་ཧ་འདལ་ལེན་མ་ མར་ཡམ་, ཡ་ཀུབ་རྦེ་ ཨ་མ་ མར་ཡམ་ འདང་ ས་ལོ་མི་རྒུན་ ཡི་ཤུའི་ སྤུར་ལ་ ཧུ་ཅེ་ཕི་ ཏྲི་ཞིམ་ཅེན་ནེ་ མར་ ཉོ་ལ་ སོང་། 2 ཟ་ཉི་མེ་ ཞག་ལ་ ང་ཏོག་ ང་མོ་ ཉི་མ་ ཤར་རེ་རྡང་, ཁོང་རྒུན་ ཡི་ཤུའི་ སྤུར་ཧང་ལ་ སོང་། 3 ཆེན་ ཡོད་ཟ་ནི་ ཁོང་རྒུ་ནི་ ཅིག་ ཏང་ ཅིག་ལ་ འདྲི་, “སྤུར་ཧང་ངེ་ ཁ་ལ་ ཀབ་ཏེ་ ཡོག་ཀ་ནེ་ ཕོ་ལོང་འབོ་ ཨ་ཧོའེ་ཕི་ སུའི་ རིལ་ལེན་?” 4 ཏེ་ཀ་ ལེབ་རྦེ་རྡང་ ཁོང་རྒུ་ནི་ ཁ་རྡོ་རྦོ་ རིལ་ཚར་རྡེ་ ཐོང་།

5 སྤུར་ཧང་ངེ་ན་ ཞུ་རྡེ་རྡང་, ཁོང་རྒུ་ནི་ ཡོའེ་སྤེ་ཀ་ ཀོའེ་ལག་ ཀར་སྤོ་ ཀོན་ཀ་ནེ་ ཁྱོ་ཏོང་ཞིག་ འདེད་ཏེ་ ཐོང་འབེ་, ཧོཔ་ འཇིའི་། 6 འིན་ན་ ཁོང་རྒུན་ལ་ མོལ་, “འཇིའི་ མ་འཇིའི་, ཁྱི་ཞི་ རྐྱང་ཤིང་ངེ་ཀ་ རྐྱང་ཀ་ནེ་ ན་ཙ་རེད་པ་ ཡི་ཤུའི་ ཙ་ལེ་ནོག་། ཁོང་ སོན་པོ་ ཞྃ་རྡེ་ འེ་ཀ་ མེད་། ཁོང་ངེ་ སྤུར་ པོར་སེ་ མལ་ལ་ ལྟོའེ་། 7 ཏ་ སོང་འདེ་ ཁོང་ངེ་ ལོབ་ཀྲུག་རྒུན་ འདང་ པི་ཏྲར་ལ་ ཤོད་, ‘ཡི་ཤུ་ ཁྱི་ཞ་རྒུ་ནི་སང་ ངུལ་ལ་ འགཱ་ལིལ་ལེ་ ཡུལ་ཞོང་ངེ་ན་ རྐྱོད་རྡེན་། ཏུ་རུ་ ཁྱི་ཞ་རྒུན་ལ་ ཁོང་ འཇལ་ལེན་, ཀ་ཟུག་ ཁོང་ངེ་ ངུལ་ལ་ མོལ་ལེ་ ཛེད་།’”

8 པོ་མོ་རྒུན་ འཇིའི་རྡེ་ འདར་རེན་ ཐེ་ཚོམ་ ཉམ་པོ་ སྤུར་ཧང་ནི་ རྒྱུག་རྒེན་ སོང་། ཐོང་ཀན་ ཚང་མེ་ སུ་ཞི་ལ་ མ་ཤེད་, ཅེ་ཟེར་ནི་ ཁོང་རྒུན་ ཧོཔ་ འཇིའི་རྡེ་ཡོད་པེན་།

9 ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེ་རྡེ་ ཟ་ཉི་མེ་ ཞག་ལ་ ང་ཏོག་ ང་མོ་ནི་, ཁོ་རང་ འགོ་མ་ ངོན་ཅུག་རྒེ་ ཛེད་ཀན་འབོ་ ཁོང་ངེ་ རྡུད་ རྡུན་ ཕིང་ངེ་ ཛེད་ཀ་ནེ་ པོ་མོ་ མར་ཡམ་ མ་ཧ་འདལ་ལེན་མ་ འིན་འབེན་། 10 ཁོ་ སོང་འདེ་ ཁོ་ ཐོང་ཀན་ ཚང་མ་ རྡུག་པོ་ ཅོའེན་ ངུའིན་ ཡོ་ཀ་ནེ་ ལོབ་ཀྲུག་རྒུན་ལ་ ཤེད་། 11 འིན་ན་ ཡི་ཤུ་ སོན་པོ་ ལྃ་རྡེ་ ཛེད་ཏེ་ འདུག་, ཡང་ ཁོའེ་ ཐོང་ ཟེར་ཧན་འབོ་ལ་ ཁོང་རྒུ་ནི་ རྡེན་ མ་ཆེ་།

12 ཏོ་རྦེ་ ལྟིང་ནི་ ཡི་ཤུའི་ ཐོང་ཟོ་ སོ་སོ་ཞིག་རྒེ་ན་ ཁོ་རང་, ཡེ་རུ་ཤ་ལེམ་མེ་ རྒྱལ་སེ་ ཕི་ལོག་ནི་ འགྲུལ་རྡེ་ ཆེན་ ཡོ་ཀ་ནེ་ ལོབ་ཀྲུག་ ཉི་ལ་ ངོན་ཅུག་རྒེ་ ཛེད་། 13 ཁོང་ ཉ་ཧེ་ ཞེན་ཡང་ ལོབ་ཀྲུག་རྒུན་ལ་ ཤེད་རྡེ་ལ་ ལོག་ཏེ་ སོང་; འིན་ན་ ཁོང་རྒུ་ནི་ ཁོང་ངེ་ ཤེད་ཀན་འབོ་ལ་ རྡེན་ མ་ཆེ་།

14 ཏེ་ ལྟིང་ནི་ ལོབ་ཀྲུག་ ཅུ་ཤིག་པོ་ ཁར་ཞི་ ཟ་ ཡོད་ཟ་ནི་, ཡི་ཤུའི་ ཁོ་རང་ངེ་ ཁོང་རྒུན་ལ་ ངོན་ཅུག་རྒེ་ ཛེད་, ཡང་ ཁོང་རྒུ་ནི་ ཏེཏ་པ་ མི་ཅོ་ཤེ་ རྡང་ ཉིང་ རྐྱོང་པོ་ ཅོའེ་རྡེ་ ཡི་ཤུ་ སོན་པོ་ ལང་ངེ་ ཛེད་ཏེ་ ཐོང་ཀ་ནེ་ མི་རྒུ་ནི་ཀ་ རྡེན་ མ་ཆེ་རྦེ་ ཁོང་རྒུན་ལ་ ཀབ་རྐྱོན་ ཛེད་།

15 ཡི་ཤུའི་ ཁོང་རྒུན་ལ་ མོལ་, “འཇིག་རྟེན་ སོན་ཏེ་ན་ སོང་འདེ་ མི་ཚང་མ་ལ་ ནེ་ཚུལ་ ཟང་པོ་ ཤོད་། 16 ཏེཏ་པ་ ཅོའེ་རྡེ་ ཁྲུའི་ནེན་ཀན་རྒུན་ རྐྱོབ་རྦེན་། འིན་ན་ ཏེཏ་པ་ མ་ཅོ་ཀན་རྒུན་ལ་ ཉ་ཝེ་ ཆེད་པ་ ཕོག་རྒེན་། 17 ཏེཏ་པ་ ཅོ་ཀན་རྒུ་ནི་ འི་ ལྟའ་རྒུན་ ལྟ་ནེན་: ཁོང་རྒུ་ནི་ ངེ་ ཝང་ངེ་ན་ རྡུད་རྒུན་ ཕིང་ངེན་, མ་ཤེ་ཀ་ནེ་ ཧད་རྒུ་ནི་ན་ སྤེ་ར་ ཏང་ངེན་, 18 རུལ་རྒུན་ ལག་པེ་ན་ ནེ་ནེན་, ཏུག་ ཐུང་ནི་ ཁོང་རྒུན་ལ་ ཅང་ ནོད་པ་ མི་ཡོང་, ཁོང་རྒུ་ནི་ ལག་པ་ པོར་ཧན་ནེ་ ནེད་པ་རྒུན་ ཕ་ནེན་།”

19 ཙོབོ་ ཡི་ཤུའི་ ཁོང་རྒུན་ལ་ ཞལ་ཏ་ སལ་ཚར་རྡེ་ ལྟིང་ནི་ ཁོང་ རྡེ་བ་ཅན་ན་ ནེན་ནེ་ ཛེད་, ཡང་ ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ ཞུ་རྡེ་ ཛེད་། 20 ལོབ་ཀྲུག་རྒུན་ ཀང་ལུང་ས་ སོང་འདེ་ ནེ་ཚུལ་ ཟང་པོ་ ཤེད་, ཡང་ ཙོ་རྦེ་ ཁོང་རྒུ་ནི་ ལྟའ་ ལྟན་ཀན་རྒུན་ རྒྱུད་ཏེ་ ཁོང་རྒུ་ནི་ ཤེད་ཀན་འབོ་ རྡེན་འབའ་ འིན་ཀན་ ནེན་ཏེན་ ཛེད་༎