ཡི་ཤུའི་ ཨུའི་ཀ་ ཏྲི་ཞིམ་ཅེན་ནེ་ མར་ ལུག་།
14
ཞག་ ཉི་ ལྟིང་ནི་ པེ་སག་ ཏང་ རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ ལེབ་ཅེ་ འིན་འབེན་ ཡང་ ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ སང་སྤེར་ ཐོག་ནི་ ཡི་ཤུ་ ཟུམ་འདེ་ སེད་ཅེ་ ཧབ་ སལ་ལེ་ཡོད་པེན་། 2 འིན་ན་ ཁོང་རྒུ་ནི་ ཟེར་, “པེ་སག་རྒེ་ ཏུའི་ཤེན་ནེ་ ཏུའི་ལ་ མི་ཟུམ་ ཅེ་ཟེར་ནི་ མི་ཚོག་ལ་ སྲོ་ ཡོྃ་རྡེ་ ཧི་ལིང་ ཕིང་སྲིད་ཅེ་ ནོག་།”3 ཡི་ཤུ་ འབེད་ཐཱ་ནི་ ཀྲོང་ཁྱེར་རེ་ ཛེ་ནེད་ནི་ ཕན་ཀན་ ཤི་མོན་ནེ་ ཁང་པེ་ན་ ཅོག་ཙེ་ཀ་ ཀན་འདེ་ ཡོད་ཏུའི་, ཀ་ཡོལ་ལེ་ ནོད་ ཏྲི་ཞིམ་མེ་ མར་ ཀུའི་སྤོ་ ཧང་འདེ་ ཁུར་ཧ་ནེ་ པོ་མོ་ཞིག་ ཡོྃ་, ཡང་ ནོད་པོ་ ཅག་ཏེ་ ཏྲི་ཞིམ་འབོ་ ཁོང་ངེ་ ཨུའི་ཀ་ ལུག་།
4 ཏེ་རྒ་ ཡོ་ཀན་ ཁ་ཅིག་ལ་ སྲོ་ ཡོྃ་རྡེ་ ཅིག་ ཏང་ ཅིག་ལ་ ཟེར་, “ཅེ་ འི་ཙོག་སེ་ ཏྲི་ཞིམ་ རིན་ཅེན་འབོ་ ཀོད་ལ་ ཏྃ་རྡེ་ ནོག་? 5 འི་རྦོ་ ལོ་ ཅིག་རྒེ་ ལ་ཆ་ ཟམ་ཤིག་ ཙོྃ་རྡེ་ མུལ་འབོ་ ཉལ་རྦ་ཅེན་རྒུན་ལ་ ཏང་ཆོ་རྒེ་།” ཁོང་རྒུ་ནི་ པོ་མོ་ལ་ མ་སྲན་ཀྲེ་ ཁར་རྐྱག་ ཏྃ་།
6 འིན་ན་ ཡི་ཤུའི་ ཁོང་རྒུན་ལ་ མོལ་, “པོར་རང་, ཁོ་ ཅེ་ ཁར་རྐྱག་ ཏང་ངེན་? ཁོའེ་ ངེ་ཕི་ མ་ རྒྱལ་ལེ་ ལེ་ཧ་ ཟང་པོ་ ཅོའེ་རྡེ་ ནོག་། 7 ཉལ་རྦ་ཅེན་རྒུན་ ཏུའི་རྒྱུན་ ཁྱི་ཞ་ ཉམ་པོ་ ལུའི་རྡེན་, ཡང་ ཁྱི་ཞ་རྒུ་ནི་ ནམ་ ཅོའེན་ སམ་ན་ ཁོང་རྒུན་ལ་ ཡ་ཏོ་ ཅོ་ཉེ་ནེན་། འིན་ན་ ང་ ཁྱི་ཞ་ ཉམ་པོ་ ཏུའི་རྒྱུན་ མི་ལུའི་། 8 ཁོའེ་ ཁོ་རང་ལ་ ཅི་ ཉེན་ཀེན་འབོ་ ཅོའེ་རྡེ་ ནོག་, ཁོའེ་ ཏུའི་སང་ ངུལ་ལ་ ངེ་ ཟུྃ་སྤོ་ལ་ ཏྲི་ཞིམ་ ལུག་ཏེ་ ངེ་ ཟུྃ་སྤོ་ སྤུར་ཧང་ལ་ ཁྱེར་ཤེ་ཕི་ ཀྲལ་འགྲིག་ ཅོའེ་རྡེ་ ནོག་། 9 ངེ་ ཁྱི་ཞ་ རྡེན་འབའ་ ཟེ་འིན་, འཇིག་རྟེན་ སོན་ཏེ་ན་ ཀ་རུ་ ནེ་ཚུལ་ ཟང་པོ་ ཤེད་ན་ འི་ པོ་མེ་ ང་ ཅོ་ཀན་འབོ་ ཤེད་ཏེ་ ཁོ་ འི་ཏུ་ ཅོའེན་།”
ཡུ་འདཱེ་ ཡི་ཤུ་ འགོམ་ཧོར་ ཏྃ་རྡེ་ ལྟེད་ཅེ་ལ་ ཁ་ཆམ་།
10 ཏེ་ནི་ ལོབ་ཀྲུག་ ཅུག་ཉི་ ནང་ནི་ ཅིག་, ཡུ་འདཱ་ ཀར་ཡོད་པ་ ལ་མ་ འུ་རྐྱོང་རྒུན་ས་ སོང་འདེ་ ཡི་ཤུ་ འགོམ་ཧོར་ ཏྃ་རྡེ་ ཁོང་རྒུ་ནི་ ལག་ལ་ ལྟེད་ཅེ་ལ་ ཐབ་ལྡིང་། 11 ཏོ་ ཚོར་རྡེ་ ཁོང་རྒུན་ མ་སྲན་ཀྲེ་ ཐེད་, ཡང་ ཁོ་ པེ་ནེ་ ཏང་ཅེ་ ཁ་ཅེད་ ཅོའེ་། ཏེ་ནི་ ཁོའེ་ ཡི་ཤུ་ ལྟེད་ཅེ་ ཧབ་ ཙལ་ཤེ་ འགོ་ཟུག་།
ལྟིང་འཇུག་རྒེ་ ཕི་རོའེ་ ཚལ་མ་།
12 རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ནེ་ འགོ་མེ་ ཞག་, ནམ་ པེ་སག་རྒེ་ ལུག་པོ་ སྲོག་ཆོད་ལ་ པུ་ལེ་ཡོད་, ཡི་ཤུའི་ ལོབ་ཀྲུག་རྒུ་ནི་ ཁོང་ལ་ འདྲི་, “ང་ཞ་ སོང་འདེ་ ཉེ་རང་ འདོན་ཅེ་ཕི་ པེ་སག་རྒེ་ འདོན་ཏང་ ཀ་རུ་ ཀྲལ་འགྲིག་ ཅོ་ལེ་?”
13 ཏེ་ནི་ ཡི་ཤུའི་ ཁོང་རང་ངེ་ ལོབ་ཀྲུག་ ཉི་ ཡེ་རུ་ཤ་ལེམ་ལ་ ལམ་ཅུག་རྒེ་ ཛེ་རྡེན་ མོལ་, “རྒྱལ་སེ་ན་ སོང་, ཏུ་རུ་ ཆུ་ཀར་ ཁུར་ཧ་ནེ་ མི་ཞིག་ ཁྱི་ཞ་རྒུན་ལ་ ཐུག་ཅེན་, ཁོའེ་ ལྟིང་འགྲྃ་ནི་ སོང་། 14 ཁོ་ ཞུ་རྡེ་ ཆ་སེ་ ཁང་པེ་ ཁང་རྡག་པོ་ལ་ ཟེར་ ‘ལོབ་རྦོན་ནེ་ འདྲི་རག་, འགྲོན་པོ་ ཞུ་སེ་ ནང་འབོ་ ཀ་ནེ་ ཡོད་, ཏུ་རུ་ ངེ་ ང་རང་ངེ་ ལོབ་ཀྲུག་རྒུན་ ཉམ་པོ་ པེ་སག་རྒེ་ འདོན་ཏང་ ཟོའེན་?’ 15 ཁོའེ་ ཁྱི་ཞ་ ལྟང་ཏོག་རྒེ་ ཀྲལ་འགྲིག་ ཅོ་ཀ་ནེ་ ནང་ ཆོན་མོ་ཞིག་ ལྟན་ཅེན་, ཨ་ཧོ་རྒུ་ནི་ཕི་ ཏུ་རུ་ འདོན་ཏང་ངེ་ ཀྲལ་འགྲིག་ ཅོའེ་།” 16 ལོབ་ཀྲུག་རྒུན་ རྒྱལ་སེ་ན་ སོང་, ཡང་ ཅི་ཚང་མ་ ཡི་ཤུའི་ མོལ་ཧན་ ནང་ཞིན་ ཐོང་། ཁོང་རྒུ་ནི་ ཏུ་རུ་ པེ་སག་རྒེ་ འདོན་ཏང་ངེ་ ཀྲལ་འགྲིག་ ཅོའེ་།
17 ཕི་ཏོག་ ཆ་རྡང་ ཡི་ཤུ་ ལོབ་ཀྲུག་ ཅུག་ཉི་ ཉམ་པོ་ ཏུ་རུ་ ལེཔ་། 18 ཁོང་རྒུན་ ཅོག་ཙེ་ཀ་ འདོན་ཏང་ འདོན་ནེན་ ཡོད་ཏུའི་ ཡི་ཤུའི་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, འེ་ཀ་ ང་ ཉམ་པོ་ ཟོའེན་ ཡོ་ཀན་རྒུ་ནི་ ནང་ནི་ ཅིག་ཅིག་རྒེ་ ང་ འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེ་རྡེན་།”
19 ཁོང་རྒུན་ མ་སྲན་ཀྲེ་ ཚེར་ཧ་ ཡོང་ ཡང་ རེ་རེ་ ཅོའེ་རྡེ་ ཡི་ཤུ་ འདྲི་, “ནེན་ཏེན་ ང་ཏེ་ མན་འགྲོ་?”
20 ཁོང་ངེ་ ལེན་སལ་, “ང་ ཉམ་པོ་ ཏ་རྦེན་ ཅིག་རྒེ་ ནང་ནི་ ཟ་ཀན་ ཁྱི་ཞ་ ཅུག་ཉི་རྦེ་ ནང་ནི་ ཅིག་ འིན་། 21 ཏམ་པེ་ སུང་རབ་རྦེ་ན་ འབྲི་ཛེད་ཏེ་ ཡོ་ཀན་ ནང་ཞིན་ མི་རིག་རྒེ་པུ་ ཤི་རྒོའེ་, འིན་ན་ མི་རིག་རྒེ་པུ་ འགྲ་ཝེ་ ལག་ལ་ ལྟེད་ཀ་ནེ་ མིའུ་ལ་ ཙམ་ཤིག་རྒེ་ འཇི་སྤ་ མི་ཡོང་། ཏེ་སང་ཏེ་ ཁོ་ མ་རྐྱེ་རྦེ་ནི་ ཁོའེ་ཕི་ རྒྱ་ལེ་ ཡོད་ཁྲོ་།”
22 ཁོང་རྒུན་ འདོན་ཏང་ འདོན་ནེ་ ཡོད་ཏུའི་, ཡི་ཤུའི་ ཏི་རྒིར་ ནམ་འདེ་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་ ཅག་རྒེ་ ཛེད་ ཡང་ ལོབ་ཀྲུག་རྒུན་ལ་ ས་ལེན་ མོལ་, “འི་རྦོ་ ངེ་ ཟུྃ་སྤོ་ འིན་, ནེན་འདེ་ ཟོ་།”
23 ཏེ་ནི་ འདོན་རྐྱོ་རྦོ་ ནམ་ ཡང་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་ ཁོང་རྒུན་ལ་ སལ་ ཡང་ ཁོང་ ཚང་མེ་ ཏེ་ནང་ནི་ ཐུྃ་། 24 ཁོང་ངེ་ ཁོང་རྒུན་ལ་ མོལ་, “འི་རྦོ་ ངེ་ ཁྲག་ འིན་ ཀ་རྦེ་ ཀོན་འཇོག་ ཏང་ ཁོང་ངེ་ མི་རྒུ་ནི་ པར་ལ་ ཆེཏ་ཏོན་ སོ་མ་རྦོ་ ཛེ་རྡེ་ནོག་, ཡང་ མི་ མང་པེ་ཕི་ སྲོག་ཆོད་རྡེ་ ཚུལ་ལ་ པོའེ་། 25 ངེ་ ཁྱི་ཞ་ རྡེན་འབའ་ ཟེ་འིན་, ཀོན་འཇོག་རྒེ་ རྒྱལ་སྲིད་རྡེ་ན་ ཡང་ སོ་མ་ རྒུན་འགྲུམ་མེ་ ཁོའེ་ ཐུང་ཐུང་ཚུག་པ་, ངེ་ རྒུན་འགྲུམ་མེ་ ཁོའེ་ ཡང་ མ་ནི་ མི་ཐུང་།”
26 ཁོང་རྒུ་ནི་ ཀོན་འཇོག་ལ་ རྟོད་པེ་ ལུ་ པུལ་ ཚར་རེ་རྡང་, ཁོང་རྒུན་ ཨོ་ལི་ཝེ་ རི་ལ་ རྐྱོད་།
པི་ཏྲ་རེ་ ཡི་ཤུ་ མི་ཤེ་ཟུན་ ཏང་ཅེ་འབོ་ ལུང་རྟན་ ཛེད་།
27 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ མོལ་, “ཁྱི་ཞ་ ཚང་མེ་ ང་ ཕྃ་རྡེ་ ཆེན་, ཅེ་ཟེར་ནི་ ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་,
‘ངེ་ ལུག་ཟི་རྦོ་ སེད་རྡེན་
ཡང་ ལུག་རྒུན་ ཡན་འདེ་ ཆེན་’
28 འིན་ན་ སོན་པོ་ ལང་ངེ་ ཛེད་ཏེ་ ལྟིང་ནི་ ང་ ཁྱི་ཞི་སང་ ངུལ་ལ་ ང་ འགཱ་ལིལ་ལེ་ ཡུལ་ཞོང་ལ་ ཆེན་།”
29 པི་ཏྲ་རེ་ ཟེར་, “ཚང་མེ་ ཉེ་རང་ ཕང་ནི་, ངེ་ མ་ནི་ མི་ཕང་།”
30 ཡི་ཤུའི་ ལེན་སལ་, “ངེ་ ཁྱེ་རང་ལ་ རྡེན་འབའ་ ཟེ་འིན་, འེ་རྒ་ ཚེན་ལ་ ཅ་པེ་ ཅ་ཧད་ ལེན་ ཉི་ ཏང་ངེ་སང་ ངུལ་ལ་, ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་།”
31 པི་ཏྲ་རེ་ འུ་ཙུག་ ཏྃ་རྡེ་ ཟེར་, “ང་ ཉེ་རང་ ཉམ་པོ་ ཤི་རྒོའེ་ནང་, ངེ་ ཉེ་རང་ མི་ཤེ་ཟུན་ མ་ནི་ མི་ཏང་།” ཏེ་རྒ་ ཙོག་སེ་ ཞེན་ ཚང་མེ་ལ་ ཟེར་།
འགེད་ཤེ་མ་ནེ་ ཚེའེ་ན་ ཡི་ཤུའི་ མོ་ལམ་ ཞུའི་།
32 ཁོང་རྒུན་ འགེད་ཤེ་མ་ནེ་ ཟེར་ཧ་ནེ་ ས་ཅེ་ཀ་ རྐྱོད་, ཡང་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ང་ སོང་འདེ་ མོ་ལམ་ ཞུ་ཟ་ནི་ ཁྱི་ཞ་རྒུན་ འེ་ཀ་ འདོད་།”
33 ཁོང་ངེ་ པི་ཏྲར་, ཡ་ཀུབ་ ཏང་ ཡོ་ཧཱ་ནན་རྒུན་ ཁོ་རང་ ཉམ་པོ་ ཁྱེར་རེ་ ཛེད་, ཡང་ ཡི་ཤུ་ ཐུག་ཚེར་ རྐྱོད་ཏེ་ ཁོང་ ཚབ་རྦེ་ ཛེད་། 34 ཡི་ཤུའི་ ཁོང་རྒུན་ལ་ མོལ་, “ངེ་ སེམ་ལ་ ཚེར་ཧ་ ཧོཔ་ ཤི་ཅེ་ ཙོག་སེ་ རག་། ཤང་ ཅོའེ་རྡེ་ འེ་ཀ་ འདོད་།”
35 ཁོང་ ཙི་རྦིག་ཤིག་ ཐག་རིང་ལ་ རྐྱོད་ ཡང་ ཐང་ཀེ་ཀ་ འགྱེལ་རྡེ་, ཀལ་ཏེ་ ཉེན་ནི་ ཁོང་ངེ་ཀ་ནི་ འི་ རྡུ་ངལ་ལེ་ ཏུའི་རྦོ་ ཐེན་ནེ་ ཛེད་ མོལ་ལེན་ མོ་ལམ་ ཞུ་ ཛེད་། 36 ཁོང་ངེ་ མོལ་, “ཨ་རྦ་, ངེ་ ཡབ་ལེ་, ཉེ་རང་ལ་ ཅི་ཚང་མ་ ཛེད་ ཉེན་ནེ་ནོག་། ཐུག་ཞེ་ ཛེད་ཏེ་ འི་ རྡུ་ངལ་ལེ་ ཀོ་རེའོ་ ངེ་ཀ་ནི་ ཐེན་ནེ་ ཛེད་རྡང་, འིན་ན་ ངེ་ འདོད་པ་ ནང་ཞིན་ མན་, ཉེ་རང་ངེ་ ཐུག་ཐེད་ ནང་ཞིན་ ཅོའོ་ ཛེད་།”
37 ཏེ་ནི་ ཡི་ཤུ་ ལོག་ཏེ་ རྐྱོད་ ཡང་ ཁོང་ སུམ་ཀ་ ཉིད་ལ་ སོང་འདེ་ ཟིའི་། ཁོང་ངེ་ པི་ཏྲར་ལ་ མོལ་, “ཤི་མོན་ ཁྱེ་རང་ ཉིད་ལ་ སོང་འདེ་ འིན་ནེ་? ཅི་ ཆུ་ཙོད་ ཅིག་ལ་ ང་ ཉམ་པོ་ ཉིད་ མ་ཏང་ལ་ འདེད་མ་ཉེན་ནེ་? 38 ཁྱི་ཞ་ རྡིག་པེ་ན་ མི་འགྱེལ་ཤེ་ཕི་ ཉིད་ མ་ཏང་ལ་ མོ་ལམ་ ཞུའི་། སེམ་ཡིད་རྡེ་ འདོད་པ་ རྡིག་པེ་ན་ མི་འགྱེལ་ཤེ་ ཡོད་ན་ ཟུྃ་སྤོ་ རྒུད་པོ་ ཡོད་ཏེ་ ནོག་།”
39 ཡང་ ཙི་རྦིག་ ཐག་རིང་ལ་ རྐྱོད་ཏེ་ ཡི་ཤུའི་ ཏེ་རྒ་ ཙོག་སེ་ མོ་ལམ་ ཞུ་ ཛེད་། 40 ཁོང་ ལོག་ཏེ་ རྐྱོད་རྒྱ་ལ་, ཡང་ ལོབ་ཀྲུག་ སུམ་ཀ་ ཉིད་ལ་ སོང་འདེ་ ཟིའི་ ཅེ་ཟེར་ནི་ ཁོང་རྒུན་ ཧོཔ་ ངལ་རྡེ་ ཡོད་པེན་, ཡང་ ཁྲེལ་རྡེ་ ཁོང་རྒུ་ནི་ ཡི་ཤུ་ ཅང་ ཟེར་ མ་ཉེན་།
41 ཡི་ཤུ་ ལེན་ སུམ་པ་ ལོག་ཏེ་ རྐྱོད་རྒྱ་ལ་, ཁོང་ངེ་ མོལ་, “ཏ་རུང་ང་ ཁྱི་ཞ་ ངལ་ཚོའེ་རྡེ་ ཉིད་ ཏང་འི་ནེ་? ཏ་ འགྲིག་། ལྟོའེ་, མི་རིག་རྒེ་པུ་ལ་ འགོམ་ཧོར་ ཏྃ་རྡེ་ རྡིག་ཅེན་རྒུ་ནི་ ལག་ལ་ ལྟེད་ཅེ་ ཏུའི་ཚོད་པོ་ ལེཔ་ ཚར་། 42 ལོྃ་ ཨ་ཧོ་རྒུན་ ཆེན་། ལྟོའེ་རྡང་, ང་ འགྲ་ཝེ་ ལག་ལ་ ལྟེད་ཀན་འབོ་ ཡོང་ངེ་ལ་།”
ཡི་ཤུ་ འགོམ་ཧོར་ ཏྃ་རྡེ་ ཟུམ་།
43 ཡི་ཤུའི་ ཞལ་ཏ་ ས་ལེན་ ཡོད་ཟ་ནི་ ལོབ་ཀྲུག་ ཅུག་ཉི་རྦེ་ ནང་ནི་ ཡུ་འདཱ་ ཏེ་ཀ་ ལེཔ་, ཁོ་ ཉམ་པོ་ ལ་མ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཀལ་ཧན་ནེ་ མི་ཚོག་, ར་ཡི་ རྡང་ པེར་ཧ་ ཁུར་རྡེ་ ཡོྃ་། 44 འགྲ་ཝེ་ ལག་ལ་ ལྟེད་ཀན་འབེ་ ཁོང་རྒུན་ལ་ ཡི་ཤུ་ ཟུམ་མེ་ལ་ ལྟའ་ཞིག་ ཏང་ངེན་, “ངེ་ འོ་ ཏང་ཀ་ནེ་ མིའུ་ ཁྱི་ཞི་ ཟུམ་འདེ་ རྟེམ་པོ་ ཅོའེ་རྡེ་ ཁྲིད་ཏེ་ ཁྱེར་།” ཟེར་། 45 ཏེ་རྒ་མ་རྒ་ ཡུ་འདཱ་ ཡི་ཤུ་ས་ སོང་འདེ་, “ལོབ་རྦོན་ལེ་” ཟེར་རྡེ་ འོ་ ཏྃ་།
46 ཏེ་ནི་ ཞེན་མ་རྒུ་ནི་ ཡི་ཤུ་ ཟུམ་། 47 འིན་ན་ ཡི་ཤུའི་ འདུན་ལ་ ཡོ་ཀན་ ཞིག་རྒེ་, ར་ཡི་ ཕིང་འདེ་ ལ་མ་ ཆོན་མེ་ ཡོག་པོ་ལ་ རྒྱབ་ཏེ་ ཁོའེ་ ནམ་ཅོག་པོ་ ཅེད་ཏྃ་།
48 ཡི་ཤུའི་ ཁོང་རྒུན་ལ་ མོལ་, “ར་ཡི་ རྡང་ པེར་ཧ་ ཁུར་རྡེ་ ང་ ཟུམ་མེ་ལ་ ཡོྃ་རྡེ་ ཅེ་ ང་ ཅག་པ་ ནོག་རྒེ་? 49 ཀོན་འཇོག་རྒེ་ ཁང་པེ་ན་ ཞག་ཏང་ ངེ་ ལབ་ཞ་ ཏང་ཟ་ནི་ ཁྱི་ཞི་ ང་ ཅེ་ མ་ཟུམ་འབེན་? འིན་ན་ ཏམ་པེ་ སུང་རབ་རྦེ་ན་ འབྲི་ཛེད་ཀན་འབོ་ འདྲན་འདྲ་ ཀྲུཔ་རྒོའེ་།”
50 ཏེ་ནི་ ཡི་ཤུ་ ཕྃ་རྡེ་ ལོབ་ཀྲུག་ ཚང་མ་ ཤོར་། 51 རིན་ཅེན་ རེ་རྒོའེ་ཞིག་ ཀོན་ཀ་ནེ་ ཁྱོག་ཏོང་འཇིག་ ཁོང་ངེ་ རྒྱབ་ནི་ ཡོང་ངེ་ཡོད་པེན་, མི་ཚོག་རྒེ་ ཁོ་ ཟུམ་ཅེ་ ཅོའེ་རྦེ་, 52 ཁོའེ་ ཀོའེ་རྦོ་ ཕྃ་རྡེ་ ཁོ་ ལྕུའི་རུ་ ཤོར་རྡེ་ སོང་།
ཡི་ཤུ་ ཡ་ཧུ་འདཱ་པེ་ ཚོག་འདུའི་རྡེ་ འདུན་ལ་ ཁྱོྃ་།
53 ཁོང་རྒུ་ནི་ ཡི་ཤུ་ ལ་མ་ ཆོན་མོ་ས་ ཁྱེར་, ཀ་རུ་ ལ་མ་ འུ་རྐྱོང་ ཚང་མ་, ཡ་ཧུ་འདཱ་པེ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ ཛོམ་འདེ་ ཡོད་པེན་། 54 པི་ཏྲར་ ལ་མ་ ཆོན་མེ་ ཕོ་ཀྲང་ངེ་ ཀྱང་ཧོར་རེ་ ནང་ཀུ་ཚུག་པ་ ཐག་རིང་ཞིག་ནི་ ཁོང་ངེ་ རྒྱབ་ནི་ ཡོྃ་། ཏུ་རུ་ ཁོ་ སྲུང་ཀན་རྒུན་ ཉམ་པོ་ མེ་ སྲོའེན་ འདེད་།
55 ལ་མ་ ཆོན་མོ་ རྡང་ ཡ་ཧུ་འདཱ་པེ་ ཚོག་འདུའི་ ཐུའི་མི་ ཚང་མེ་, ཡི་ཤུ་ སེད་ཉེན་ཅེ་ སྤང་པོ་ ཙལ་, འིན་ན་ ཁོང་རྒུན་ སུ་ལ་ མ་ཐོབ་། 56 ཁོང་ངེ་ རྒྱཔ་འགལ་ལ་ མི་ མང་པེ་ ཟུན་ནི་ སྤང་པོ་ ཏྃ་, འིན་ན་ ཁོང་རྒུ་ནི་ སྤང་པོ་ ཏང་ཀན་རྒུན་ ཐུན་ མ་ཐུན་། 57 ལྟིང་འཇུག་ལ་ ཁ་ཅིག་ ལྃ་རྡེ་ ཡི་ཤུའི་ རྒྱཔ་འགལ་ལ་ ཟུན་མ་ སྤང་པོ་ ཏང་ངེན་ ཟེར་, 58 “ཁོའེ་ ཟེར་རེ་རག་པེ་ ‘ངེ་, འི་ ཀོན་འཇོག་རྒེ་ ཁང་པ་ མི་ ལག་པ་ནི་ སིག་ཀན་འབོ་ ཞིག་ཏེ་ ཞག་ སུམ་མེ་ན་ མི་ ལག་པ་ནི་ མ་སིག་ཀན་ ཞེན་ཡང་ཞིག་ སིག་རྒེན་།’” 59 འིན་ན་ ཁོང་རྒུ་ནི་ སྤང་པོ་ ཏང་ཀན་རྒུ་ནི་ མ་ཐུན་།
60 ཏེ་ནི་ ཚང་མེ་ འདུན་ལ་ ལ་མ་ ཆོན་མོ་ ལྃ་རྡེ་ ཡི་ཤུ་ འདྲི་, “ཁྱེ་རང་ངེ་ རྒྱཔ་འགལ་ལ་ སྤང་པོ་ ཏང་ཀན་རྒུན་ལ་ ལེན་ཏྃ་ངེ་ མེད་རྡེ་? རང་ རྐྱོབ་ཅེ་ཕི་ ཁྱེ་རང་ལ་ ཟེར་ཤེ་ མེད་རྡེ་?” 61 འིན་ན་ ཡི་ཤུའི་ ལེན་ མ་སལ་ལེ་ ཅེཔ་ཁ་རོག་ཏེ་ ཞུའུ་། ཏེ་ནི་ ལ་མ་ ཆོན་མེ་ ཁོང་ལ་ ཡང་ འདྲི་, “ཁྱེ་རང་ འདམ་མེ་ ཛེད་ཀ་ནེ་ མ་ཤི་ཀ་, ཀོན་འཇོག་རྒེ་ སྲེ་ འིན་ནེ་?”
62 ཡི་ཤུའི་ མོལ་, “ང་ འིན་, ཡང་ མི་རིག་རྒེ་པུ་ ཀུན་ཝང་ ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ འདེད་ཏེ་, ཡང་ ནམ་ཀེ་ སྲིན་ནེ་ཀ་ ཞོན་འདེ་ ཡོང་ངེ་ ཁྱི་ཞི་ ཐོང་ངེན་།”
63 ཏེ་ནི་ ལ་མ་ ཆོན་མོ་ ལྃ་རྡེ་ ཁོ་རང་ངེ་ ཀོའེ་རྦོ་ ཤག་ ཡང་ ཟེར་, “ཨ་ཧོ་ལ་ འི་སང་ མང་ངེ་ སྤང་པོ་ ཅེ་ རྒོའེ་རྡེན་? 64 ཁོའེ་ ཏེཏ་ལོག་ ཅོ་ཀན་འབོ་ ཁྱི་ཞི་ ཚོར་རྡེ་ ནོག་། ཁྱི་ཞི་ ཅི་ ཐག་ཅོད་རྡེ་ཡོད་?”
ཁོང་ ཚང་མེ་ ཁོ་ སེད་རྒོ་ཤེ་ ནོག་ ཟེར་རྡེ་ ཐག་ཅེད་། 65 ཏེ་ནི་ ཁོང་ ཁ་ཅིག་རྒེ་ ཡི་ཤུ་ ཐུ་ རྒྱབ་ཅེ་ འགོ་ཟུག་ ཡང་ ཁོང་ངེ་ མིག་, ལག་པི་ ཉམ་པོ་ ཀབ་ཏེ་ ཁོང་ལ་ མུལ་ཀྲུག་ ཅོའེ་རྡེ་ རྡུང་ངེན་ ཧབ་རྒོད་ ཏང་ངེན་ ཟེར་, “ལུང་རྟན་ ས་ལང་ ཁྱེ་རང་ལ་ རྡུང་ཀན་འབོ་ སུ་ ནོག་?” ཡང་ སྲུང་ཀན་རྒུ་ནི་ལ་ ཁྱེར་རྡེ་ ཁོང་ལ་ རྡུང་།
པི་ཏྲ་རེ་ ཡི་ཤུ་ མི་ཤེ་ཟུན་ ཏྃ་།
66 པི་ཏྲར་ ཕོ་ཀྲང་ངེ་ ཚོམ་མེ་ན་ ཡོད་ཟ་ནི་ ལ་མ་ ཆོན་མེ་ ཡོག་མོ་ཞིག་ ཡོྃ་། 67 པི་ཏྲར་ མེ་ སྲུ་ངེན་ འདེད་ཏེ་ ཐོང་ངེ་རྡང་ ཡོག་མོ་རྦེ་ ཁོ་ ཞིབ་སལ་ ཅོའེ་རྡེ་ ལྟོའེ་ ཡང་ ཟེར་, “ཁྱེ་རང་ལ་ ན་ཙ་རེད་པ་ ཡི་ཤུ་ ཉམ་པོ་ འདུག་པེན་།”
68 འིན་ན་ པི་ཏྲ་རེ་ མི་ཤེ་ཟུན་ ཏྃ་རྡེ་ ཟེར་, “ཁྱེ་རང་ངེ་ ཅི་ ཟེར་རྡེ་ འིན་ ང་ ཧ་ཀོ་ མེ་རག་ ཡང་ ངེ་ ཁོ་ ཤེ་རྡེ་མེད་།” ཁོ་ ཚོམ་མེ་ རྒོའེ་ འདུན་ལ་ སོང་འདེ་ འདེད་, ཏེ་ནི་ ཅ་པེ་ ཅ་ཧད་ ཏྃ་།
69 ཡོག་མོ་རྦེ་ པི་ཏྲར་ ཏེ་ཀ་ ཐོང་ངེ་རྡང་, ཁོའེ་ ཏེ་ཀ་ ཡོ་ཀན་ ཞེན་མ་རྒུན་ལ་ ཡང་ ཟེར་, “ཁོང་རྒུ་ནི་ ཕྲོ་ནི་ ཅིག་ འི་ མིའུ་ལ་ ནོག་།”
70 འིན་ན་ པི་ཏྲ་རེ་ ཡང་ མི་ཤེ་ཟུན་ ཏྃ་།
ཙི་རྦིག་ཤིག་རྒེ་ ལྟིང་ནི་ ཏུ་རུ་ ལྃ་རྡེ་ ཡོ་ཀན་ ཞེན་ཡང་ ཁ་ཅིག་རྒེ་ པི་ཏྲར་ལ་ ཟེར་, “ནེན་ཏེན་ ཁྱེ་རང་ ཁོའེ་ ཁྲོ་པ་རྒུ་ནི་ ནང་ནི་ ཅིག་ ནོག་, ཅེ་ཟེར་ནི་ ཁྱེ་རང་ལ་ འགཱ་ལིལ་པ་ ནོག་།”
71 པི་ཏྲ་རེ་ ཁོ་ལ་ ངན་ ཏབ་རྡེ་, ནའ་ རྐྱལ་རྡེ་ ཟེར་, “ཁྱེ་རང་རྒུ་ནི་ སྤེ་ར་ ཏང་ཀ་ནེ་ མིའུ་ ངེ་ ཤེ་རྡེ་མེད་།” 72 ཏེ་རྒ་མ་རྒ་ ལེན་ ཉི་སྤ་ ཅ་པེ་ ཅ་ཧད་ ཏྃ་།
ཏེ་ནི་ པི་ཏྲར་ལ་ ཡི་ཤུའི་, “ཅ་པེ་ ཅ་ཧད་ ཉི་སྤ་ ཏང་ངེ་སང་ ངུལ་ལ་, ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་” མོལ་ཧན་འབོ་ འི་ཏུ་ ཡོྃ་, ཡང་ ཁོའེ་ སེམ་ ཆག་རྡེ་ ཁོ་ ངུའི་།