མར་ཀུ་ 13

ཐ་མེ་ ཏུའི་རྡེ་ ལྟའ་རྒུན་།

ཡི་ཤུ་ ཀོན་འཇོག་རྒེ་ ཁང་པ་ནི་ འབིང་འདེ་ རྐྱོད་རྡེ་ ཡོད་ཟ་ནི་, ཁོང་ངེ་ ལོབ་ཀྲུག་ ཅིག་རྒེ་ ཟེར་, “ལོབ་རྦོན་ལེ་ འི་ ཧ་ལེ་ཤེ་ ཀོན་འཇོག་རྒེ་ ཁང་པེ་ ཟི་རྡང་, ཙམ་ཤིག་རྒེ་ ཆོན་མོ་ རྡོ་རྒུན་ སིག་ཅེ་ལ་ ཀོལ་རྡེ་ ནོག་།”

2 ཡི་ཤུའི་ ལེན་སལ་, “ཁྱི་ཞ་རྒུ་ནི་ འི་ ཀོན་འཇོག་རྒེ་ ཁང་པ་ ཧ་ལེ་ཤེ་ སིག་ཀེན་འབོ་ ཐོང་འདུག་རྒེ་? འི་ རྡོ་ ཅིག་ ཏང་ ཅིག་ཀ་ སག་ཏེ་ མི་ལུའི་, ཚང་མ་ ཞི་རྒེན་།”

3 ཀོན་འཇོག་རྒེ་ ཁང་པེ་ འ་ངོ་ ཆོག་རྒེ་ ལུང་སྤེ་ ཨོ་ལི་ཝེ་ རི་ཀ་ ཡི་ཤུ་ ཞུ་རྡེ་ ཡོད་ཟ་ནི་, པི་ཏྲར་, ཡ་ཀུབ་, ཁོའེ་ ནོ་ ཡོ་ཧཱ་ནན་ འདང་ ཨན་འགྲིརུ་རྒུན་ སུ་ལ་ རྒྱུའི་ཆ་ མ་ཅུག་ལ་ ཡི་ཤུ་ས་ ཡོྃ་རྡེ་ འདྲི་, 4 “ང་ཞ་ ཤེད་རྡེ་ ཛེད་རྡང་ ཏོ་ ནམ་ ཆེན་, ཡང་ ཏེ་ ཚང་མ་ འདྲན་འདྲ་ ཀྲུཔ་ཅེ་ ལྟའ་རྒུན་ ཀ་ཟུག་ ཀྲིག་ ཡོང་ངེན་?”

5 ཡི་ཤུའི་ ཁོང་རྒུན་ལ་ མོལ་, “སུ་ཞིག་རྒེ་ ཁྱི་ཞ་ འགོམ་ཧོར་ ཏང་མི་ཅུག་ཅེ་ལ་ ཤང་ ཅོའེ་, 6 ཅེ་ཟེར་ནི་ ‘ངེ་ མིང་ ཁུར་རྡེ་ ང་ འདམ་མེ་ ཛེད་ཀ་ནེ་ མ་ཤི་ཀ་ འིན་’ ཟེར་ཧན་ མང་པོ་ཞིག་ ཡོྃ་རྡེ་ མི་ མང་པོ་ འགོམ་ཧོར་ ཏང་ངེན་། 7 ཁྱི་ཞ་རྒུ་ནི་ མག་ ཏང་ མག་རྒེ་ ཧོར་ལ་ འུ་ཡ་རྒུན་ ཚོར་རྒྱ་ལ་, འཇིའི་ མ་འཇིའི་ཧེ་; ཏོ་རྒུན་ ཆ་རྒོའེ་, འིན་ན་ ཐ་མེ་ ཏུའི་ ཏ་རུང་ མི་ལེབ་། 8 རྒྱལ་ཁབ་ ཅིག་ ཏང་ ཅིག་རྒེ་ ཡང་ རྒྱལ་སྲིད་ ཅིག་ ཏང་ ཅིག་རྒེ་ རྒྱཔ་འགལ་ལ་ མག་ ཏང་ངེན་། ས་ཅ་ མང་པེ་ན་ ལོར་ཧོན་ འདང་ སང་འགུལ་ ཡོང་ངེན་། འིན་ན་ ཏོ་རྒུ་ནི་ ཕྲུ་རྒུ་ རྐྱེ་ཅེ་ འགོ་ཟུག་རྒེ་ ཟུར་མོ་ ཙོག་སེ་ འིན་།”

9 “ཏེ་ཏུའི་ལ་ ཁྱི་ཞ་རྒུན་ ཤང་ ཅོའེ་རྡེ་ འདོད་། ཁྱི་ཞ་རྒུན་ ཏེ་རྒ་ ཡུལ་ལེ་ ཝང་སྲུལ་པ་རྒུ་ནི་ ལག་ལ་ ལྟེད་ཏེ་ འདུ་ཀང་རྒུ་ནི་ན་ ཁྱི་ཞ་ རྟལ་ལྕག་ རྒྱབ་ཅུག་རྒེན་། ངེ་ཀ་ ཏེཏ་པ་ ཡོད་ཅེ་རྦེ་ ཁྲིམ་ཅེད་རྡེ་ལ་ ཀ་ལོན་ འདང་ རྒྱ་སྤོ་རྒུ་ནི་ཀ་ ཁྱི་ཞ་ ཁྱེར་རེན་། ཏེ་ཏུའི་ ཁྱི་ཞ་ ང་ སུ་ འིན་ཀན་འབེ་ སྤང་པོ་ ཁོང་རྒུན་ལ་ ཏང་ཅེ་ ཧབ་ ཐོབ་རྦེན་། 10 ཐ་མེ་ ཏུའི་ ལེབ་རྦེ་སང་ ངུལ་ལ་, ནེ་ཚུལ་ ཟང་པོ་ རྒྱལ་ཁབ་ ཚང་མ་ལ་ ཤེད་རྒོའེ་། 11 ཁྱི་ཞ་རྒུན་ ཟུམ་འདེ་ ཁྲིམ་ཅེད་ཅེ་ལ་ ཁྱོང་ངེ་རྡང, ཅི་ ཟེ་རེན་ སམ་འདེ་ ངུལ་ལ་ ཚེར་ མ་ཚེར་། ཏེ་རྒ་ ཏུའི་ལ་, ཁྱི་ཞ་ ཅི་ ཐོབ་ཀ་ནེ་ སྤེ་ར་ ཚང་མ་ ཟེར་, ཅེ་ཟེར་ནི་ སྤེ་ར་ ཏང་ཀན་འབོ་ ཁྱི་ཞ་རྒུན་ མག་, ཏམ་པེ་ ཐུག་ཡིད་ ནོག་།”

12 “ཨ་ཅོ་རྒུ་ནི་ ནོ་རྒུན་ལ་ ཡང་ ཨ་རྦེ་ པུ་ཙ་ ཡང་ ཕྲུ་རྒུའི་ ཕ་མ་རྒུན་ལ་ ངོ་ལོག་ ཅོའེ་རྡེ་ སེད་ཅུག་རྒེན་། 13 ངེ་ཀ་ ཏེཏ་པ་ ཅོ་ཅེ་འབོ་ མི་ཚང་མེ་ ཁྱི་ཞ་རྒུན་ལ་ སོག་པོ་ ཅོ་ནོག་, འིན་ན་ ཐ་མ་ཚུག་པ་ ངེ་ཀ་ ཏེཏ་པ་ རྟེམ་པོ་ པོར་ཧན་རྒུན་ ཐ་རེན་།”

14 “ནམ་ ‘ཁམ་ལོག་ ཀྲིཔ་ ཅོ་ཀན་འབོ་ ཏམ་པེ་ ཀོན་འཇོག་རྒེ་ ཁང་པེ་ན་’ ཡོད་ཅེའོ་ འོའེ་སྤ་ མན་ནེ་ན་ པོར་རྡེ་ ཐོང་ངེ་རྡང་ སིལ་ཧན་རྒུ་ནི་ ངེ་ ཟེར་ཤེ་ཅེན་རྒུ་ནི་ཀ་ ནྃ་ ཏོང་། ཡ་ཧུ་འདཱེ་ ཡུལ་ཞོང་ངེ་ན་ འདེད་ཀན་རྒུན་ རི་རྒུན་ལ་ ཤོར་རྒོའེ་། 15 ཁང་པེ་ ཁ་ཏོཏ་ལ་ ཡོ་ཀན་རྒུན་ ཡོག་ལ་ པབ་ཏེ་ ཁང་པེ་ན་ ནོར་རྒུན་ ནེན་ནེ་ལ་ མ་ཆ་། 16 ཞིང་ངེ་ཀ་ ལེ་ཧ་ ཅོའེན་ ཡོ་ཀན་རྒུན་ ལོག་ཏེ་ ཁང་པ་ ཀོའེ་ལག་ ཁྱོང་ངེ་ལ་ མ་ཆ་། 17 ཏེ་ཏུའི་ལ་ རྐྱེ་ཅེ་མ་ རྡང་ ཕྲུ་རྒུ་ལ་ འོ་མ་ ཏང་ཀ་ནེ་ ཨ་མ་རྒུན་ལ་ ཙམ་ཤིག་ འཇི་སྤ་ ནོག་། 18 ཡུ་རྒུན་ རྒུན་ཏུའི་ལ་ མི་ཆ་ཤེ་ལ་ མོ་ལམ་ ཞུའི་། 19 ཅེ་ཟེར་ནི་ ཏེ་ཏུའི་ལ་ འི་ཟམ་ རྡུག་ངལ་ ཀྲག་པོ་ ཆེན་, ཀ་འབོ་ ཀོན་འཇོག་རྒེ་ འཇིག་རྟེན་ ཛེད་པེ་ནེ་ཕ་ལ་ ཏག་ས་ཚུག་པ་ མ་ཆ་ ནོག་ ཡང་ ལྟིང་ཞིན་ལ་ མི་ཆ་། 20 ཀལ་ཏེ་ ཙོབོ་ ཀོན་འཇོག་རྒེ་ ཏེ་ཏུའི་རྦོ་ ཉུང་ཙེ་ མ་ཛེད་པེ་ནི་ སུ་ཞིག་ལ་ སོན་པོ་ ལུའི་རྡེ་ མེད་ཁྲོ་, འིན་ན་ ཁོང་ངེ་ འདམ་མེ་ ཛེད་ཀན་རྒུ་ནི་ ཏོན་ལ་, ཏེ་ཏུའི་རྦོ་ ཉུང་ཙེ་ ཅོའོ་ ཛེད་།”

21 “ཏེ་ཏུའི་ལ་ ཀལ་ཏེ་ སུ་ཞིག་རྒེ་ ཁྱི་ཞ་ ‘ལྟོའེ་རྡང་ མ་ཤི་ཀ་ འེ་ཀ་ནེ་ ཡ་ འ་ཀ་ནི་ ཞུ་རྡེ་ འདུག་’ ཟེར་ནི་ རྡེན་ མ་ཆེ་། 22 ཅེ་ཟེར་ནི་ ཟུའི་མ་ མ་ཤི་ཀ་ རྡང་ ཟུའི་མ་ ལུང་རྟོན་པ་རྒུན་ ཡོྃ་རྡེ་ ཧ་ལེ་ཤེ་ ཛེད་པ་ རྡང་ ལྟའ་རྒུན་ ལྟན་འདེ་ ཀོན་འཇོག་རྒེ་ འདམ་མེ་ ཛེད་ཀན་རྒུན་ལ་ འགོམ་ཧོར་ ཏང་ཅེ་ ཙོན་འགྲུའི་ ཅོའེན་། 23 ཤང་ ཅོའེ་, ཏུའི་རྦོ་ ལེབ་རྦེ་སང་ ངུལ་ལ་ ངེ་ ཁྱི་ཞ་ ཅི་ཚང་མ་ ཤེད་རྡེ་ འིན་།”

24 “ཏེ་ཏུའི་ལ་, རྡུ་ངལ་ལེ་ ལྟིང་ནི་

‘ཉི་མ་ མུན་ཀྲག་ འགྱུ་རེན་,

ལྡ་ཝེ་ འོད་ མི་ཏང་

25 ནམ་ནི་ ཧར་མ་རྒུན་ ཀྲུལ་ལེན་,

ཡང་ ནམ་ཀེ་ ཝང་རྒུན་ རྒུལ་ལེ་ ཛེ་རྡེན་།’”

26 “ཏེ་ནི་ མི་ཚང་མེ་, མི་རིག་རྒེ་པུ་ ཝང་ འདང་ ཟི་ཞིད་ ཀྲག་པོ་ ཉམ་པོ་ སྲིན་ནེ་ཀ་ ཞོན་འདེ་ ཡོང་ངེ་ ཐོང་ངེན་། 27 ཡང་ ཁོའེ་, ཕོ་ཉ་རྒུན་ འཇིག་རྟེན་ སོན་ཏེ་ ནང་ནི་ ཁོ་རང་ངེ་ འདམ་ཀན་རྒུན་ རྡུ་ཅེ་ལ་ ཀལ་ལེན་།”

28 “སྤིག་རྒེ་ ཁ་ཟོའེ་ ལྕང་མེ་ཀ་ནི་ ལབ་ཞ་ ནེ་ནེན་། ཏོ་རྦེ་ ཡ་ལག་ ངོན་པོ་ སོང་འདེ་ ལོ་མ་ སོ་མ་ འབིང་རྒྱ་ལ་, ཡར་ ཉེ་མོ་ ལེབ་ཀན་འབོ་ ཤེ་རྡེ་ནོག་། 29 ཏེ་རྒ་ ཙོག་སེ་ ཁྱི་ཞ་རྒུ་ནི་ ཏེ་ ལྟའ་རྒུན་ ཐོང་རྒྱ་ལ་, ང་ ལོག་ཏེ་ ཡོང་ཅེ་ ཏུའི་ ཉེ་མོ་, རྒོ་ འདུན་ལ་ ལེབ་ཏེ་ ཡོ་ཀན་འབོ་ ཁྱི་ཞ་རྒུ་ནི་ ཤེའེ་རྡེན་། 30 ངེ་ ཁྱི་ཞ་ རྡེན་འབའ་ ཟེ་འིན་, འི་ མི་རབ་པོ་ མེ་ཀན་ ཆ་སང་ ངུལ་ལ་ ཏོ་ ཚང་མ་ ཆེན་། 31 ནམ་ཀ་ རྡང་ འཇིག་རྟེན་ ཉ་ཧ་ མེ་ཀན་ ཆེན་, འིན་ན་ ངེ་ ཟེར་ཧན་རྒུན་ མེ་ཀན་ མ་ནི་ མི་ཆ་།”

32 “ཏེ་ ཚང་མ་ ཆ་ཅེ་ ཞག་ ཡང་ ཏུའི་ཚོད་པོ་ ཀོན་འཇོག་ ཡབ་ ཅིག་པོ་ལ་ མ་ནི་ ཡང་ སུ་ལ་ རྒྱུའི་མེད་, རྡེ་བ་ཅན་ནེ་ ཕོ་ཉ་ ཡང་ པུ་ཙ་ལ་། 33 ཏེ་ཏུའི་རྦོ་ ཁྱི་ཞ་རྒུན་ལ་ རྒྱུའི་མེད་ཅེ་ཀ་ནི་, ཉིད་ མ་ཏང་ལ་ ཤང་ ཅོའེ་རྡེ་ འདོད་།”

34 “ཏོ་ མི་ཞིག་ ས་ཅ་ ཐག་རིང་ཞིག་ལ་ པེ་ལ་ ཆ་ཀན་ ཙོག་སེ་ ནོག་། ཁང་པ་ནི་ འབིང་ངེ་སང་ ངུལ་ལ་ ཁོའེ་ ཡོག་པོ་རྒུན་ལ་ རང་རང་ངེ་ ལེ་ཧ་ ཅོ་ཅེ་ལ་ ཁག་ ཀལ་རྡེ་ རྒོ་ སྲུང་པ་ལ་ ཤང་ ཅོའེ་རྡེ་ ཁོ་ ལོག་ཏེ་ ཡོང་ཅེ་ལ་ སྲུྃ་རྡེ་ འདོད་ ཟེ་རེ་ནོག་། 35 ཏོ་རྦེ་ཕི་ ཤང་ ཅོའེ་, ཅེ་ཟེར་ནི་ ཁང་རྡག་ ཕི་ཏོག་, ཚན་ནི་ རྐྱིལ་, ཟ་ར་ཟི་རེ་ནི་ ཡང་ ང་ཏོག་, ནམ་ ལོག་ཏེ་ ཡོང་ངེན་ ཁྱི་ཞ་རྒུན་ལ་ རྒྱུའི་མེད་རྡེ་ ནོག་། 36 ཀལ་ཏེ་ ཁོ་ ཧུན་མེད་ལ་ ལེབ་ནི་, ཁྱི་ཞ་རྒུན་ ཉིད་ལོག་ཏེ་ ཡོ་ཀན་འབོ་ ཐོང་ མི་རྒོའེ་། 37 ངེ་ ཁྱི་ཞ་རྒུན་ལ་ ཟེར་ཧན་འབོ་ ཚང་མ་ལ་ ཟེ་འིན་; ཤང་ ཅོའེ་ཧེ་།”