ཚེ་ངན་པ་ འབད་ཀན་རྒུ་ནི་ སྲུང་ངུ་།
12
ཏེ་ནི་ ཡི་ཤུའི་ མི་རྒུན་ལ་ སྲུང་ངུ་རྒུན་ རྒྱུད་ཏེ་ ལབ་ཅེ་ འགོ་ཟུག་ ཛེད་, “མི་ཞིག་རྒེ་ ཁོ་རང་ངེ་ ཞིང་ལ་ རྒུན་འགྲུམ་ ཙུག་ཏེ་ ཀྱང་ཧོར་ ཏྃ་། རྒུན་འགྲུམ་ ཙིར་ཤེ་ཕི་ མལ་ ཏྲུའི་, ཡང་ རྒུན་འགྲུམ་མེ་ ཚེ་ལ་ ལྟ་ཅེ་ཕི་ པིའུ་ སི་། ཏེ་ནི་ རྒུན་འགྲུམ་མེ་ ཚེ་རྦོ་ ཞེན་ ཚེ་འབད་ཀན་རྒུན་ལ་ ཤེ་ལ་ ཏྃ་རྡེ་ ཁོ་རང་ ཞེན་ཡུལ་ཞིག་ལ་ འདེ་ལ་ སོང་། 2 ལྟོན་ཏོག་རྒེ་ ཏུའི་ལ་ ཤིང་ཏོག་རྒེ་ ཧ་ལ་ ནེ་ལ་ རྒུན་འགྲུམ་མེ་ ཚེ་རྡེ་ རྡག་པེ་ ཁོ་རང་ངེ་ ཡོག་པོ་ཞིག་ ཤེ་ལ་ ཏང་ཀན་རྒུ་ནི་ཀ་ ལམ་ཅུག་། 3 འིན་ན་ ཁོང་རྒུ་ནི་ ཡོག་པོ་ ཟུམ་འདེ་ རྡུྃ་, ཡང་ ཁོ་ ལྟོང་ ལོག་ལ་ ལམ་ཅུག་། 4 ཞིང་ངེ་ རྡག་པེ་ ཞེན་ཡང་ ཡོག་པོ་ཞིག་ ལམ་ཅུག་, འིན་ན་ ཁོང་རྒུ་ནི་ ཁོའེ་ འགོའེ་ཀ་ རྡུྃ་ ཡང་ ཁྲེལ་རྦ་ ལྟེན་། 5 ཞེན་ཡང་ ཡོག་པོ་ ལམ་ཅུག་ཀན་འབོ་ སེད་། ཁོའེ་ ཞེན་ མང་པོ་ ལམ་ཅུག་ཀན་རྒུན་ལ་ ཏེ་རྒ་ ཙོག་སེ་ ཅོའེ་, ཁ་ཅིག་ལ་ རྡུྃ་, ཡང་ ཁ་ཅིག་ སེད་། 6 ཏ་ ལམ་ཅུག་རྒེ་ལ་ ཅིག་ཅིག་ ལུའི་རྡེ་ ཡོད་པེན་, ཁོ་རང་ངེ་ ཤེ་སྤ་ ཅོ་ཀ་ནེ་ པུ་ཙ་, ལྟིང་འཇུག་ལ་ ཞིང་ངེ་ རྡག་པེ་ ཁོ་ ལམ་ཅུག་ཏེ་, ‘ཁོང་རྒུ་ནི་ ནེན་ཏེན་ལ་ ངེ་ པུ་ཙ་ སི་ཝ་ ཅོ་ནོག་’ སམ་།”7 “འིན་ན་ ཚེ་འབད་པ་རྒུ་ནི་ ཅིག་ ཏང་ ཅིག་ལ་ ཟེར་, ‘འི་ ཞིང་ངེ་ ནོར་ཧལ་ལ་ ཐོབ་ཅེ་ཅེན་འབོ་ ཡོང་ངེན་ འདུག་, ཤོག་ཧེ་, ཁོ་ སེ་རྡེན་ ཏེ་ནི་ ཁོའེ་ ནོར་ཧལ་རྦོ་ ཨ་ཧོ་ ཐོབ་རྦེན་།’ 8 ཏོ་རྦེ་ཕི་ ཁོང་རྒུ་ནི་ ཁོ་ ཟུམ་འདེ་ སེད་, ཡང་ ཁོའེ་ ཟུྃ་སྤོ་ རྒུན་འགྲུམ་མེ་ ཚེ་ནི་ ཕི་ལོག་ལ་ ཕྃ་།”
9 ཡི་ཤུའི་ འདྲི་ ཛེད་, “ཏེ་ནེ་ རྒུན་འགྲུམ་མེ་ ཚེ་རྡེ་ རྡག་པེ་ ཅི་ ཅོའེན་? ཁོ་ ཡོྃ་རྡེ་, ཚེ་འབད་པ་རྒུན་ སེད་རྡེན་, ཡང་ རྒུན་འགྲུམ་མེ་ ཚེ་རྦོ་ ཞེན་ ཚེ་འབད་པ་ རི་ལ་ ཤེ་ལ་ ཏང་ངེན་། 10 ཅི་ ཁྱི་ཞ་རྒུ་ནི་ ཏམ་པེ་ སུང་རབ་རྦེ་ ནང་ནི་ འི་རྦོ་ མ་སིལ་རྦེ་ནེ་?
‘ཀ་ རྡོ་རྦོ་ ཁང་པ་ སིག་ཀན་རྒུན་ལ་ ཕན་མི་ཐོག་ ཐེའེ་,
ཏེ་རྒ་ རྡོ་རྦོ་ ཁང་པེ་ ཀྲུར་རྡོ་ འགྱུར་
ཀ་འབོ་ ཚང་མེ་སང་ ཁག་ཅེན་ རྡོ་རྦོ་ ནོག་།
11 ཏོ་རྦོ་ ཙོབོ་རྡེ་ ཅོའོ་ ཛེད་ཏེ་ ནོག་,
ཏོ་ ཐོང་འདེ་ ཨ་ཧོ་ ཧ་ལེ་རྡེན་།’”
12 ཡ་ཧུ་འདཱ་པ་ འུ་རྐྱོང་རྒུ་ནི་, ཡི་ཤུ་ ཟུམ་ཅེ་ཕི་ འདོད་པ་ ཡོད་པེན་, ཅེ་ཟེར་ནི་ སྲུང་འབོ་ ཁོང་རྒུ་ནི་ རྒྱཔ་འགལ་ལ་ ཤེད་རྡེ་ འིན་ཀན་འབོ་ ཧ་ཀོ་། འིན་ན་ ཁོང་རྒུན་ མི་ཚོག་ མང་པོ་ལ་ འཇིའི་ཤེ་རྦོ་ ཡི་ཤུ་ ཕྃ་རྡེ་ ཏེ་ཀ་ནི་ སོང་།
རོམ་པེ་རྒྱ་སྤེ་ ཁྲལ་།
13 ལྟིང་ནི་ འུ་རྐྱོང་རྒུ་ནི་, པ་རུ་ཤི་པ་ ཁ་ཅིག་ ཏང་ ཧེ་རོད་འདེ་ ཆོག་སྤ་ ཁ་ཅིག་ ཡི་ཤུའི་ མོལ་ཧེན་ནེ་ སྤེ་ར་ རི་ རྒྱུད་ཏེ་ ཁོང་ ཟུམ་ཅེ་ལ་ ལམ་ཅུག་། 14 ཁོང་རྒུན་ ཡོྃ་རྡེ་ ཁོང་ལ་ ཟེར་, “ལོབ་རྦོན་ལེ་, ཉེ་རང་ངེ་ ཏུའི་རྒྱུན་ ཀྲང་པོ་ མོལ་ཅེའོ་ ང་ཞ་ རྒྱུའི་ཡོད་། ཉེ་རང་ངེ་ ཡ་པེ་ མ་ནི་ ཅོ་ ཛེ་རྡེ་ མག་, ཅེ་ཟེར་ནི་ ཉེ་རང་ངེ་ མི་ ཆེ་ཆུང་ མ་ཟི་རྡེ་ལ་ ཀྲང་པོ་ ཉམ་པོ་ ཀོན་འཇོག་རྒེ་ ལམ་འབོ་ ལབ་རྦེ་ ཛེ་རྡེ་ནོག་། ཏ་ ང་ཞ་རྒུན་ལ་ མོལ་ལེ་ ཛེད་རྡང་, རོམ་མེ་ རྒྱ་སྤོ་ ཁྲལ་ ཤལ་ཅེའོ་ འོའེ་སྤ་ ནོག་རྒེ་, ཡ་ མག་? 15 ང་ཞ་རྒུ་ནི་ ཁྲལ་ ཤལ་རྒོའེ་རྡེ་ ཡ་ མི་རྒོའེ་?” ཁོང་རྒུ་ནི་ ངའིན་ ཅོ་ཀན་འབོ་ ཁྱེན་འདེ་ ཡི་ཤུའི་ མོལ་, “ཅི་ཕི་ ང་ སྤེ་རེ་ རྒྱུད་ཏེ་ ཟུམ་ཅེ་ ཙོན་འགྲུའི་ ཅོ་ཡོད་? རོམ་པེ་ མུལ་ལེ་ པེ་ནེ་ཞིག་ ཁྱོྃ་རྡེ་ ང་ ལྟོན་ནྃ་།” 16 ཁོང་རྒུ་ནི་ པེ་ནེ་ཞིག་ ཁྱོྃ་, ཡང་ ཁོང་ངེ་ འདྲི་ ཛེད་, “འི་ པེ་ནེ་ཀ་ ཡོ་ཀ་ནེ་ པར་ རྡང་ མིང་ སུའི་ ནོག་?” རོམ་པེ་ མུལ་ལེ་ པེ་ནེ་། ཁོང་རྒུ་ནི་ ལེན་ཏྃ་, “རོམ་མེ་ རྒྱ་སྤེ་།”
17 ཏེ་ནི་ ཁོང་ངེ་ ཁོང་རྒུན་ལ་ མོལ་, “རྒྱ་སྤེ་ འིན་ཀན་འབོ་ རྒྱ་སྤོ་ ཏོང་ ཡང་ ཀོན་འཇོག་རྒེ་ འིན་ཀན་འབོ་ ཀོན་འཇོག་ལ་ པུལ་།” ཁོང་ངེ་ ལེན་ སལ་ཧན་འབེ་ཀ་, ཁོང་རྒུན་ མ་སྲན་ཀྲེ་ ཧ་ལེ་།
སོན་པོ་ ལྃ་ཤེ་ ཧོར་ལ་ ཏྲི་ཝ་།
18 ཏེ་ནི་ ཤི་ཀན་རྒུན་ སོན་པོ་ ལང་ངེ་ མག་ ཟེར་ཧ་ནེ་ ས་འདུ་ཀི་པ་རྒུན་ ཡི་ཤུ་ས་ ཏྲི་ཝ་ཞིག་ འདྲི་ལ་ ཡོྃ་ ཡང་ ཟེར་, 19 “ལོབ་རྦོན་ལེ་ མོ་ཤེ་རྡེ་ ཨ་ཧོ་རྒུན་ལ་ ཁྲིམ་འཇིག་ སལ་ལེ་ ཛེད་ཏེ་ འདུག་, ཀལ་ཏེ་ པུ་ཙ་ཞིག་ ཕྲུ་རྒུ་ མེད་རྡེ་ ཤི་ནི་, ཨ་ཅོ་ ཡང་ ནོའེ་ ཁོའེ་ ཕར་རྒྱུད་ ལུའི་ཤེ་ཕི་ ཤི་ཀ་ནེ་ ན་མ་ ཉམ་པོ་ པག་རྟོན་ ཅོའེ་རྡེ་ ཕྲུ་རྒུ་ རྐྱེ་ཅུག་ རྒོའེ་། 20 ཏ་ ཨ་ཅོ་ནོ་ རྡུན་ ཡོད་པེན་, ཨ་ཅོ་ ཆེ་ཤོག་རྦེ་ ན་མ་ ཅོའེ་, ཡང་ ཕྲུ་རྒུ་ མེད་རྡེ་ ཤི་། 21 ཏེ་ནི་ ནོ་ ཉི་སྤ་རྦེ་, ཏེ་རྒ་ པོ་མོ་ ཉམ་པོ་ ན་མ་ ཅོའེ་, འིན་ན་ ཁོ་ལ་ ཕྲུ་རྒུ་ མེད་རྡེ་ ཤི་། ཏེ་རྒ་ ཙོག་སེ་ སུམ་པ་འབོ་ ཉམ་པོ་ སོང་། 22 མ་ཚེད་ ཁོང་ རྡུན་ཀ་ ཕྲུ་རྒུ་ མེད་རྡེ་ ཤི་, ཡང་ ལྟིང་འཇུག་ལ་ པོ་མོ་རྦོ་ ཤི་། 23 པོ་མོ་ ཁོང་ རྡུན་ཀ་ ཉམ་པོ་ ན་མ་ ཅོའེ་རྦེ་, ཤི་ཀན་རྒུན་ སོན་པོ་ ལྃ་རྡེ་ ཏུའི་ལ་ ཁོ་ ཁོང་རྒུ་ནི་ ནང་ནི་ སུའི་ ན་མ་ འགྱུ་རེན་?”
24 ཡི་ཤུའི་ མོལ་, “ཁྱི་ཞི་ ནོར་ཁྲུལ་རྦོ་ ཁྱི་ཞ་རྒུན་ལ་ ཀོན་འཇོག་རྒེ་ ཤུག་ ཡང་ ཏམ་པེ་ སུང་རབ་པོ་ ཧ་མ་ཀོ་ ནོག་། 25 ཀོན་འཇོག་རྒེ་ ཤི་ཀན་རྒུན་ སོན་པོ་ ལང་ངེ་ ཛེད་ཟ་ནི་, ཁོང་རྒུ་ནི་ ན་མ་ མི་ཅོ་ ཡང་ པག་མ་ མི་ཏང་, ཁོང་རྒུན་ རྡེ་བ་ཅན་ནེ་ ཕོ་ཉ་ ཙོག་སེ་ འགྱུ་རེན་།”
26 “འིན་ན་ ཤི་ཀན་རྒུན་ སོན་པོ་ ལྃ་ཤེ་ ཧོར་རྦོ་, ཁྱི་ཞ་རྒུ་ནི་ མོ་ཤེ་ འབྲི་རྡེ་ ཡོ་ཀ་ནེ་ སྤེ་ཆེ་ན་ མ་སིལ་རྦེ་ནེ་? རྦུར་སེ་ མེ་ འབར་ཧ་ནེ་ སྲུང་ངེ་ན་ ཀོན་འཇོག་རྒེ་ མོ་ཤེ་ལ་ མོལ་ལེ་ ཛེད་, ‘ང་ནི་, ཨབ་ར་ཧམ་མེ་ ཀོན་འཇོག་, ཨི་སཱག་རྒེ་ ཀོན་འཇོག་ ཏང་ ཡ་ཀུབ་རྦེ་ ཀོན་འཇོག་ འིན་།’ 27 ཁོང་ནི་ ཤི་ཀན་རྒུ་ནི་ ཀོན་འཇོག་ མན་, སོན་པོ་རྒུ་ནི་ ཀོན་འཇོག་ ནོག་། ཁྱི་ཞ་རྒུ་ནི་ ནོར་ཁྲུལ་ ཆོན་མོ་ ཅོའེ་རྡེ་ ནོག་།”
ཀཱ་རྒྱ་ ཚང་མེ་སང་ ཁག་ཅེན་།
28 ཀྲོའེ་རྡུར་ལ་ ཉེན་ནེན་, ཏུ་རུ་ ཆོའེ་ཁྲིམ་ལ་ ཁེ་སྤ་ཞིག་ ཡོད་པེན་། ཡི་ཤུའི་ ལེན་ རྒྱལ་ལེ་ སལ་ཧན་འབོ་ ཚོར་རྡེ་ ཁོའེ་ ཡི་ཤུ་ འདྲི་, “ཀཱ་རྒྱ་ ཚང་མེ་ ནང་ནི་ ཀའོ་ ཚང་མེ་སང་ ཁག་ཅེན་ ནོག་?”
29 ཡི་ཤུའི་ ལེན་སལ་, “ཚང་མེ་སང་ ཀཱ་རྒྱ་ ཁག་ཅེན་འབོ་ ཡུ་ནོག་ ‘ཉོན་ ཝ་ ཨིས་ར་ཡེལ་པ་རྒུན་, ཙོབོ་ ཨ་ཧོ་རྒུ་ནི་ ཀོན་འཇོག་, ཙོབོ་ ཅིག་ཅིག་ ཞུ་རྡེ་ནོག་། 30 ཙོབོ་ ཁྱི་ཞི་ ཀོན་འཇོག་ལ་ ཉིང་ སོན་ཏེ་, སེམ་ སོན་ཏེ་, སམ་བ་ སོན་ཏེ་ ཡང་ ཤེད་ སོན་ཏེ་ནི་ ཤེ་སྤ་ ཅོའེ་།’ 31 ཉི་སྤ་འབོ་, ‘རང་ལ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ལ་ ཤེ་སྤ་ ཅོའེ་’, ཡུ་རྒུ་ནི་སང་ ཆེ་ ཞེན་ཡང་ ཀཱ་རྒྱ་ ཅང་ མེད་།”
32 ཆོའེ་ཁྲིམ་ལ་ ཁེ་སྤ་རྦེ་ ལེན་ཏྃ་, “རྒྱལ་ལེ་ མོལ་ ལོབ་རྦོན་ལེ་, ཉེ་རང་ངེ་ ཀོན་འཇོག་ ཅིག་ཅིག་ མ་ནི་, ཞེན་ཡང་ མེད་ཏེ་ ནོག་ མོལ་ཅེའོ་ ཀྲང་པོ་ མོལ་རྡེ་ ནོག་། 33 མེ་ན་ སྲག་ཀ་ནེ་ ཆོད་པ་ རྡང་ སེམ་ཅེན་ནེ་ སྲོག་རྒེ་ ཆོད་པ་ ཚང་མ་ པུལ་ཅེ་སང་ མང་ངེ་ ཁག་ཅེན་ ཀོན་འཇོག་ལ་ ཉིང་ སོན་ཏེ་, ཧ་ཀོ་ སོན་ཏེ་ ཡང་ ཤེད་ སོན་ཏེ་ནི་ ཤེ་སྤ་ ཅོ་ཅེ་ མ་ཚེད་ རང་ངེ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ ཤེ་སྤ་ ཅོ་རྒོ་ཤེ་ ནོག་།”
34 ཁོའེ་ མ་ ཤེ་རབ་ཅེན་ནེ་ ལེན་ཏང་ཀན་འབོ་ ཁྱེན་ནེ་ ཛེད་ཏེ་ ཡི་ཤུའི་ ཁོ་ལ་ མོལ་, “ཁྱེ་རང་ ཀོན་འཇོག་རྒེ་ རྒྱལ་སྲིད་ནི་ ཐག་རིང་ལ་ མི་འདུག་།” ཏེ་ ཞག་ནི་ཕ་ལ་ སུ་ཞི་ལ་ ཏྲི་ཝ་ འདྲི་ཅེ་ ཧམ་བ་ མ་ཅོའེ་།
མ་ཤི་ཀ་ སུའི་ ཕར་རྒྱུད་ འིན་།
35 ཡི་ཤུའི་ མི་རྒུན་ལ་ ཀོན་འཇོག་རྒེ་ ཁང་པེ་ན་ ལབ་ཞ་ སལ་ཟ་ནི་, ཁོང་ངེ་ འདྲི་ ཛེད་, “ཆོའེ་ཁྲིམ་ལ་ ཁེ་སྤ་རྒུ་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་, རྒྱ་སྤོ་ འདཱ་འབིད་རྡེ་ ཕར་རྒྱུད་ ནོག་ ཀ་ཟུག་རྒེ་ ཟེ་རེ་ནོག་? 36 འདཱ་འབིད་, ཁོ་རང་ངེ་ ཏམ་པེ་ ཐུག་ཡིད་ རྒྱུད་ཏེ་ འི་ཟུག་ ཟེར་,
‘ཀོན་འཇོག་རྒེ་ ངེ་ ཙོབོ་ལ་ མོལ་།
ངེ་ ཁྱེ་རང་ངེ་ འགྲ་ཝོ་ ཚང་མ་,
ཁྱེ་རང་ངེ་ ཧང་པེ་ ཡོག་ལ་ པོར་པོར་ཚུག་པ་,
ཁྱེ་རང་ ངེ་ ལག་པ་ ཡོའེ་སྤེ་ ཁྲིའི་ཀ་ འདོད་།’”
37 “ཀལ་ཏེ་ འདཱ་འབིད་རྡེ་ མ་ཤི་ཀ་, ‘ཙོབོ་’ ཟེར་རེ་ཡོད་ནི་, ཏེ་ནི་ ཀ་ཟུག་རྒེ་ མ་ཤི་ཀ་ ཁོའེ་ ཕར་རྒྱུད་ ནོག་?” མི་ཚོག་ མང་པེ་ ཁོང་ལ་ ཐེད་པོ་ ཉམ་པོ་ ཉེན་ནེ་ཡོད་པེན་།
38 ལབ་ཞ་ སལ་ཟ་ནི་ ཡི་ཤུའི་ མོལ་, “ཆོའེ་ཁྲིམ་ལ་ ཁེ་སྤ་རྒུ་ནི་ཀ་ནི་ ཤང་ ཅོའེ་། ཁོང་རྒུན་ ཆོའེ་རྡེ་ ཀོའེ་ལག་ རིང་མོ་ ཀོན་འདེ་ འགྲུ་ལེ་ལ་, ཡང་ ཁྲོམ་མེ་ན་ མི་རྒུ་ནི་ཀ་ནི་ སི་ཝ་ ཐོབ་ཅེ་ལ་ ཐེད་རྡེ་ནོག་། 39 འདུ་ཀང་ངེ་ན་ སི་ཝ་ཅེན་ནེ་ མལ་ལེ་ཀ་ ཡང་ འགྲོན་ལ་ ཀྲལ་འགོའེ་ཀ་ འདེད་རྡེ་ལ་ ཐེད་རྡེ་ནོག་། 40 འ་ནེ་ མ་རང་མོ་རྒུན་ལ་ འགོ་ཧོར་རྡེ་ ཁོང་ངེ་ ཁང་པ་ རྡང་ ནོར་རྒུན་ ཁྱེར་ཤེ་, ཡང་ མི་རྒུན་ལ་ ལྟན་ཅེ་ཕི་ མོ་ལམ་ རིང་མོ་ ཞུ་རུག་། ཏོ་རྦེ་ ཅོའེ་རྡེ་ ཁོང་རྒུན་ལ་ ཆེད་པ་ སྲན་ཀྲེ་ ཕོག་རྒེན་།”
འ་ནེ་ མ་རང་མེ་ པུལ་ཧ་ནེ་ ཧོར་།
41 ཀོན་འཇོག་རྒེ་ ཁང་པེ་ན་ ཡི་ཤུ་ མུལ་ རྡུ་ཅེ་ རྒམ་མེ་ འདུན་ལ་ ཐང་ཀེ་ཀ་ ཞུ་རྡེ་ ཏེ་ནི་ མུལ་ པུལ་ཧ་ནེ་ མི་ཚོག་ལ་ ཟི་རྡེ་ཡོད་པེན་། མི་ ཆུག་པོ་ མང་པེ་ མུལ་ མང་པོ་ པུལ་། 42 ཉལ་རྦ་ཅེན་ འ་ནེ་ མ་རང་མོ་ཞིག་ ཡོྃ་རྡེ་ ཟྃ་རྡེ་ པེ་ནེ་ ཉི་ པུལ་, ཀའོ་ རིན་ཐང་ མ་ ཉུང་ཙེ་ཅེན་ འིན་འབེན་།
43 ཡི་ཤུའི་ ཁོ་རང་ངེ་ ལོབ་ཀྲུག་རྒུན་ འབོ་ ཛེད་ཏེ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, འི་ ཨ་ནེ་ མ་རང་མོ་ ཉལ་རྦ་ཅེན་འབེ་ འབུལ་ལྡུཏ་ རྒམ་མེ་ན་ པེ་ནེ་ ཞེན་ ཚང་མེ་སང་ མང་ངེ་ པུལ་, 44 ཁོང་ ཚང་མེ་ ཁོ་རང་རྒུན་ལ་ མང་པོ་ ཡོ་ཀ་ནེ་ ནང་ནི་ ཉུང་ཙེ་ཞིག་ ཏྃ་, འིན་ན་ འི་ ཨ་ནེ་ མ་རང་མོ་རྦེ་ ཉལ་རྦ་ཅེན་ འིན་ནེ་ལ་ ཁོའེ་ སོན་པོ་ ལུའི་ཤེ་ རྒོའེ་ཤེ་ ཡོ་ཀན་ ཚང་མ་ ཏྃ་།”