ཡི་ཤུ་ རྒྱ་སྤེ་ ཚུལ་ལ་ རྒ་སུ་ ཞུའི་།
11
ཡེ་རུ་ཤ་ལེམ་མེ་ རྒྱལ་སེ་ ཉེ་མོ་ལ་ ཨོ་ལི་ཝེ་ རི་ཀ་a ཡོ་ཀན་ འབེད་ཕ་འགེ་ རྡང་ འབེད་ཐཱ་ནི་ ཀྲོང་ཁྱེར་ལ་ ལེབ་ཀྱི་ ཡོད་རྡེ་རྡང་, ཡི་ཤུའི་ ལོབ་ཀྲུག་ ཉི་ ངུལ་ལ་ ལམ་ཅུག་རྒེ་ ཛེད་ཏེ་ 2 མོལ་, “འ་ ཀྲོང་ཁྱེར་རེ་ན་ སོང་, ཏུ་རུ་ ལེབ་རྦེ་རྡང་, སུ་ལ་ མ་ཞོན་ཀ་ནེ་ པུང་ངུ་ ཅོ་རྦ་ཞིག་ ཏག་རྡེ་ ཐོང་ཅེན་, ཏོ་ ཀྲོལ་རྡེ་ འི་རུ་ ཁྱོང་། 3 ཀལ་ཏེ་ སུ་ཞིག་རྒེ་ ཁྱི་ཞ་རྒུན་ལ་, ‘ཅི་ ཅོ་ཡོད་?’ ཟེར་རྡེ་ འདྲི་ནི་ ‘ཙོབོ་ལ་ རྒོའེ་ཤེ་ འདུག་ ཡང་ འགྱོ་སྤ་ ལོག་ཏེ་ ཁྱོང་ངེན་’ ཟེར་།”4 ཁོང་རྒུན་ སོང་ ཡང་ པུང་ངུ་ ཅོ་རྦ་ སྲང་ངེ་ཀ་ རྒོའེ་ ཕི་ལོག་ལ་ ཏག་རྡེ་ ཡོ་ཀན་འབོ་ ཐོང་། ཁོང་རྒུ་ནི་ ཏོ་ ཀྲོལ་ ཟེར་ནི་ 5 ཏུ་རུ་ ལྃ་རྡེ་ ཡོ་ཀ་ནེ་ མི་ ཁ་ཅིག་རྒེ་ འདྲི་, “ཁྱི་ཞ་རྒུ་ནི་ པུང་ངུ་ ཅོ་རྦ་ ཀྲོལ་རྡེ་ ཅི་ ཅོའེ་རྡེ་ འིན་?” 6 ཡི་ཤུའི་ ཀཱ་ མོལ་ཧན་ ནང་ཞིན་ ཁོང་རྒུ་ནི་ ལེན་ཏྃ་རྦེ་, ཁོང་རྒུན་ལ་ པུང་ངུ་ ཅོ་རྦའོ་ ཁྱེར་ཤུག་། 7 ཁོང་རྒུ་ནི་ པུང་ངུ་ ཅོ་རྦ་འབོ་ ཡི་ཤུ་ས་ ཁྱོྃ་རྡེ་ ཁོ་རང་རྒུ་ནི་ ཀོའེ་ ཏོ་ལ་ ལྟེད་ ཡང་ ཡི་ཤུ་ ཏོ་རྦེ་ཀ་ ཞོན་ནེ་ ཛེད་།
8 མི་ མང་པོ་ཞིག་རྒེ་ རང་རང་ངེ་ ཀོའེ་ ཡི་ཤུ་ རྐྱོད་སེ་ ལམ་མེ་ཀ་ ཏིང་, ཡང་ ཞེན་རྒུ་ནི་ ཞིང་ངེ་ ཐ་མ་ ཡོ་ཀ་ནེ་ ལྕང་མེ་ ཡ་ལག་ ཅེད་ཏེ་ ཏིང་། 9 ཡི་ཤུའི་ རྒྱབ་ ཏང་ འདུན་ལ་ ཡོང་ཀན་རྒུ་ནི་ ཀུ་ཅུ་ ཏང་ངེན་ ཟེར་།
“ཀོན་འཇོག་ལ་ རྟོད་པ་ པུལ་།
ཙོབོ་ ཀོན་འཇོག་རྒེ་ ཝང་ཆེ་ན་ རྐྱོད་ཀན་འབོ་ ཅིན་ལབ་ཅེན་ ནོག་།
10 ཨ་ཧོ་རྒུ་ནི་ ཕ་མ་ འདཱ་འབིད་རྡེ་ ཡོང་ཅེ་ཅེན་ནེ་
རྒྱལ་སྲིད་ལ་ ཅིན་ལབ་ སལ་ཤིག་།
རྡེ་བ་ཅན་ནེ་ ཐོ་ཤོག་རྦོ་ ཞུ་ཧ་ནེ་ ཀོན་འཇོག་ལ་ རྟོད་པ་ པུལ་།”
11 ཡེ་རུ་ཤ་ལེམ་མེ་ ནང་ཀུ་ལ་ ལེབ་རྦེ་རྡང་ ཡི་ཤུ་ ཀོན་འཇོག་རྒེ་ ཁང་པེ་ན་ རྐྱོད་། ཁོང་ངེ་ ཀང་ལུང་ས་ ཟིའི་, འིན་ན་ ཕི་ཏོག་ འགོར་རྡེ་ འིན་ཅེ་ཀ་ནི་, ཁོང་ ལོབ་ཀྲུག་ ཅུག་ཉི་ ཉམ་པོ་ འབེད་ཐཱ་ནི་ ལོག་ཏེ་ རྐྱོད་།
ཡི་ཤུའི་ སྤིག་རྒེ་ ལྕང་མ་ ངན་ ཏབ་རྦེ་ ཛེད་།
12 ཐོ་རེ་ ང་མོ་, ཁོང་རྒུན་ འབེད་ཐཱ་ནི་ རྐྱོད་ཟ་ནི་ ཡི་ཤུ་ ལྟོ་རྡེ་ ཛེད་། 13 ཁོང་ངེ་ ཐག་རིང་ལ་ སྤིག་རྒེ་ ཁ་ཟོའེ་རྡེ་ ལྕང་མེ་ ལོ་མ་ ཀང་འདེ་ ཡོ་ཀན་འཇིག་ ཟིའི་, ཏེ་རྒ་ ཁ་ཟོའེ་ ཡོད་ཁྲོ་ སམ་འདེ་ ཟི་རྡེ་ལ་ རྐྱོད་། འིན་ན་ འདུན་ལ་ ལེབ་རྦེ་རྡང་, ཁོང་ངེ་ ལོ་མ་ མ་ནི་ ཁ་ཟོའེ་ མ་ཟིའི་, ཅེ་ཟེར་ནི་ ཁ་ཟོའེ་ མིན་ཅེ་ ཏུའི་རྦོ་ མ་ལེབ་རྦེ་ འིན་འབེན་། 14 ཏེ་ནི་ ཁོང་ངེ་ ལྕང་མ་ལ་ མོལ་, “ཏེ་ནི་ཕ་ལ་ སུ་ཞིག་རྒེ་, ཁྱེ་རང་ངེ་ཀ་ནི་ ཁ་ཟོའེ་ མི་ཟ་” ཡང་ ཁོང་ངེ་ མོལ་ཧན་འབོ་ ལོབ་ཀྲུག་རྒུ་ནི་ ཚོར་།
ཡི་ཤུའི་ ཀོན་འཇོག་རྒེ་ ཁང་པ་ སང་མ་ ཛེད་།
15 ཁོང་རྒུན་ ཡེ་རུ་ཤ་ལེམ་ལ་ ལོག་ཏེ་ རྐྱོད་, ཏུ་རུ་ ལེབ་རྦེ་རྡང་ ཡི་ཤུ་, ཀོན་འཇོག་རྒེ་ ཁང་པ་ལ་ རྐྱོད་ཏེ་ སེམ་ཅེན་ ཙོང་ཀན་ འདང་ ཉོ་ཀན་རྒུན་ ཕིང་ཅེ་ འགོ་ཟུག་ ཛེད་། ཕུར་རྒོན་ ཙོང་ཀ་ནེ་ ཀུར་སི་ རྡང་ པེ་ནེ་ རྡེབ་ཀ་ནེ་ ཅོག་ཙེ་རྒུན་ འགོ་ལོག་ལ་ ཏང་ངེ་ ཛེད་། 16 ཡང་ སུ་ལ་ ཅ་ལག་ ཁུར་རྡེ་ ཀོན་འཇོག་རྒེ་ ཁང་པེ་ ཀྱང་ཧོར་ རྒྱུད་རྡེ་ འགྲུལ་ཅུག་རྒེ་ མ་ཛེད་།
17 ཡི་ཤུའི་ ཁོང་རྒུན་ལ་ མོལ་, “ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་, ‘ངེ་ ཁང་པ་ རྒྱལ་ཁབ་ ཚང་མེ་ མི་རྒུ་ནི་ མོ་ལམ་ ཞུ་ཅེ་ ཁང་པ་ ཟེ་རེན་’, འིན་ན་ ཁྱི་ཞ་རྒུ་ནི་ ཏོ་ ཅག་པ་རྒུ་ནི་ འབའ་ཝོ་ ཅོའེ་རྡེ་ འདུག་།”
18 ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་, ཡི་ཤུའི་ ཛེད་ཀན་འབོ་ ཚོར་རེ་རྡང་, ཁོང་རྒུ་ནི་ ཁོང་ སེད་ཅེ་ ཐབ་ ཙལ་ཤེ་ འགོ་ཟུག་། འིན་ན་ ཁོང་རྒུན་ ཁོང་ལ་ འཇིའི་རྡེ་ཡོད་པེན་, ཅེ་ཟེར་ནི་ ཡི་ཤུ་ ཤེ་རབ་ཅེན་ནེ་ ལབ་ཞ་ སལ་ཧན་འབེ་ཀ་ མི་ཚོག་ སོན་ཏེ་ ཧ་ལེ་རྡེ་ ཡོད་པེན་།
19 ཕི་ཏོག་ ལེབ་རྦེ་རྡང་, ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ རྒྱལ་ས་ནི་ འབིང་འདེ་ རྐྱོད་།
20 ཐོ་རེ་ ང་མོ་, ཁོང་རྒུན་ ཡི་ཤུའི་ ངན་ ཏབ་རྦེ་ ཛེད་ཀ་ནེ་ སྤིག་རྒེ་ ལྕང་མེ་ འདུན་ནི་ ཆ་རྒྱ་ལ་, ལོབ་ཀྲུག་རྒུ་ནི་ ཏོ་ པ་ཀྲག་ནི་ཕ་ལ་ ཧམ་འདེ་ ཐོང་། 21 ཡི་ཤུའི་ མོལ་ལེ་ ཛེད་ཀན་འབོ་, པི་ཏྲར་ལ་ འི་ཏུ་ ཡོྃ་རྡེ་ ཁོང་ལ་ ཟེར་, “ལོབ་རྦོན་ལེ་ ཟི་རྡང་, ཉེ་རང་ངེ་ ངན་ ཏབ་རྦེ་ ཛེད་ཀ་ནེ་ སྤིག་རྒེ་ ལྕང་མ་འབོ་ ཧམ་འདོག་།”
22 ཡི་ཤུའི་ ལེན་སལ་, “ཀོན་འཇོག་ལ་ ཏེཏ་པ་ ཅོའེ་ཧེ་། 23 ངེ་ ཁྱི་ཞ་ རྡེན་འབའ་ ཟེ་འིན་, ཀལ་ཏེ་ ཁྱི་ཞི་ འི་ རི་རྦོ་ལ་, ‘སོང་ ཡང་ ཁྱེ་རང་ ཚོའེ་ན་ ཕོང་’ ཟེར་ནི་, ཡང་ ཉིང་ངེ་ན་ ཐེ་ཚོམ་ མ་ཅོ་ལ་ ཟེར་ཧན་འབོ་ ཀྲུཔ་རྦེ་ནོག་ སམ་འདེ་ ཏེཏ་པ་ ཅོ་ན་, ཁོའེ་ ཟེར་ཧན་འབོ་ ཀྲུཔ་རྦེན་། 24 ངེ་ ཁྱི་ཞ་རྒུན་ལ་ ཟེ་འིན་, ཁྱི་ཞི་ མོ་ལམ་མེ་ན་ ཅི་ཞིག་ ཞུ་ནྃ་ ཏོ་ ཐོབ་ཚར་རྡེ་ འིན་ སམ་འདེ་ ཏེཏ་པ་ ཅོ་ནི་, ཏོ་ ཁྱི་ཞ་རྒུན་ལ་ ཐོབ་རྦེན་། 25 འིན་ན་ ཁྱེ་རང་རྒུ་ནི་ མོ་ལམ་ ཞུ་ཟ་ནི་, འགོ་མ་ ཁྱི་ཞི་ རྒྱཔ་འགལ་ལ་ ངན་པ་ ཅོའེ་རྡེ་ ཡོ་ཀན་རྒུན་ལ་ ཤག་སྤ་ ཏོང་ཧེ་། ཏེ་ནི་ རྡེ་བ་ཅན་ནེ་ན་ ཞུ་ཧ་ནེ་ ཁྱི་ཞི་ ཡབ་རྦེ་, ཁྱི་ཞ་རྒུ་ནི་ རྡིག་པ་རྒུན་ལ་ ཤག་སྤ་ སལ་ལེ་ ཛེ་རྡེན་། 26 འིན་ན་ ཀལ་ཏེ་ ཁྱི་ཞི་ ཤག་སྤ་ མ་ཏང་ནི་ རྡེ་བ་ཅན་ནེ་ན་ ཞུ་ཧ་ནེ་ ཁྱི་ཞ་རྒུ་ནི་ ཡབ་རྦེ་, ཁྱི་ཞ་རྒུ་ནི་ རྡིག་པ་རྒུན་ལ་ ཤག་སྤ་ སལ་ལེ་ མི་ཛེད་།”
ཡི་ཤུའི་ ཝང་ཆེ་ ཧོར་ལ་ ཀྲོའེ་རྡུར་།
27 ཡང་ ཁོང་རྒུན་ ཡེ་རུ་ཤ་ལེམ་མེ་ན་ ལེཔ་, ཡི་ཤུ་ ཀོན་འཇོག་རྒེ་ ཁང་པེ་ ཀྱང་ཧོར་རེ་ན་, ཞཔ་འགྲུལ་ལ་ རྐྱོད་ཟ་ནི་ ལ་མ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཁོང་ས་ ཡོྃ་རྡེ་ འདྲི་, 28 “ཀ་ ཝང་ཆ་ ཉམ་པོ་ ཁྱེ་རང་ངེ་ ཡུ་རྒུན་ ཅོའེན ཡང་ ཁྱེ་རང་ལ་ འི་ ཝང་ཆ་ སུའི་ ཏྃ་?”
29 ཡི་ཤུའི་ ཁོང་རྒུན་ལ་ མོལ་, “ངེ་ལ་ ཁྱི་ཞ་རྒུན་ལ་ ཏྲི་ཝ་ཞིག་ འདྲི་འིན་, ཀལ་ཏེ་ ཁྱི་ཞི་ ལེན་ཏྃ་ནི་, ཏེ་ནི་ ངེ་ལ་ ཀཱ་ ཝང་ཆ་ རྒྱུད་ཏེ་ ཡུ་རྒུན་ ཅོའེན་ ཁྱི་ཞ་ ཤེད་རྡེན་། 30 ང་ ཤོད་རྡང་, ཡོ་ཧཱ་ནན་ལ་ ཁྲུའི་སལ་ཅེ་ ཝང་ཆ་ ཀོན་འཇོག་རྒེ་ ཆོག་ནི་ ཐོབ་ཏེ་ ནོག་རྒེ་ ཡ་ མི་ ཆོག་ནི་?”
31 ཁོང་རྒུ་ནི་ ཁོ་རང་རྒུ་ནི་ ཕྲོ་ སྤེ་ར་ ཏྃ་རྡེ་ ཟེར་, “ཀལ་ཏེ་ ཀོན་འཇོག་རྒེ་ ཆོག་ནི་ ནོག་ ཟེར་ནི་ ཁོའེ་ ཨ་ཧོ་ལ་, ཁྱི་ཞི་ ཁོའེ་ཀ་ ཏེཏ་པ་ ཅེ་ མ་ཅོའེ་རྦེན་ ཟེ་རེན་? 32 འིན་ན་ ཨ་ཧོའེ་ མི་ ཆོག་ནི་ ནོག་ ཟེར་ཤེ་ ཧམ་བ་ ཅོའེན་ནེ་?” ཁོང་རྒུན་ མི་ཚོག་ལ་ འཇིའི་རྡེ་ཡོད་པེན་, ཅེ་ཟེར་ནི་ མི་ཚང་མེ་ ཡོ་ཧཱ་ནན་ལ་ ལུང་རྟོན་པ་ སི་རྒེ་ཡོད་པེན་། 33 ཏོ་རྦེ་ཕི་ ཁོང་རྒུ་ནི་ ཡི་ཤུ་ ལེན་ཏྃ་, “ང་ཞ་ རྒྱུའི་མེད་།”
ཏེ་ནི་ ཡི་ཤུའི་ ཁོང་རྒུན་ལ་ མོལ་, “ངེ་ལ་ མི་ཤེད་, སུའི་ ཝང་ཆེ་ན་ ངེ་ ཡུ་རྒུན་ ཅོ་ཡོད་།”