མར་ཀུ་ 10

ན་མ་ ཅེད་ཅེ་ ཧོར་ལ་ ཁྲོའེ་རྡུར་།

ཡི་ཤུ་ ཀ་ཕར་ན་ཧུམ་ནི་ འབིང་འདེ་ ཡ་ཧུ་འདཱེ་ ཡུལ་ཞོང་ རྡང་ ཡོར་འདཱན་ སང་སྤེ་ ཕར་ཧ་ རྐྱོད་། ཡང་ མི་ཚོག་ ཁོང་ས་ ཛོམ་, ཡང་ ལོབ་ ནང་ཞིན་ ཁོང་ངེ་ ཁོང་རྒུན་ལ་ ལབ་རྦེ་ ཛེད་།

2 ཐི་ཚོད་ལྟ་ཅེ་ལ་ པ་རུ་ཤི་པ་ ཁ་ཅིག་ ཁོང་ས་ ཡོྃ་རྡེ་ འདྲི་, “པུ་ཙ་ཞིག་ལ་ ཁྲིམ་ ནང་ཞིན་ ཁོ་རང་ངེ་ ན་མ་ ཅེད་ ཆོག་རྒེ་ནོག་རྒེ་?”

3 ཡི་ཤུའི་ ལེན་སལ་ལེ་ ཛེད་, “ན་མ་ ཅེད་ཅེ་ ཧོར་ལ་ ལུང་རྟོན་པ་ མོ་ཤེ་ ཁྲིམ་མེ་ན་ ཅི་ འབྲི་རྡེ་ འདུག་?”

4 ཁོང་རྒུ་ནི་ ལེན་ཏྃ་, “མོ་ཤེ་ ན་མ་ ཅེད་ཀ་ནེ་ ལག་ཁྱེར་ ཏྃ་རྡེ་ པུ་ཙ་ཞིག་ལ་ ན་མ་ ཅེད་ཅེ་ རྒོང་སྤ་ སལ་འདུག་།”

5 འིན་ན་ ཡི་ཤུའི་ ལེན་སལ་, “མོ་ཤེ་ འི་ ཁྲིམ་འབོ་ ཁྱི་ཞི་ ཕ་མེ་པོ་རྒུ་ནི་ ཉིང་ ཀྱོང་པོ་ ཡོད་ཅེ་འབེ་ འབྲི་རྡེ་ ནོག་། 6 འིན་ན་ འགོ་ཟུག་རྒེ་ཀ་ ཅི་ཚང་མ་ ཛེད་ཟ་ནི་, ཀོན་འཇོག་རྒེ་ ‘པུ་ཙ་ རྡང་ པོ་མོ་ ཅོའོ་ ཛེད་།’ 7 ‘ཏེ་རྒ་ རྒྱུ་ཚན་འབེ་ཕི་ པུ་ཙ་ ཁོ་རང་ངེ་ ཨ་རྦ་ རྡང་ ཨ་མ་ ཕྃ་རྡེ་ ཁོ་རང་ངེ་ ན་མ་ ཉམ་པོ་ ཛོམ་འདེ་ 8 ཁོང་ ཉ་ཧ་ ཟུྃ་སྤོ་ ཅིག་ འགྱུར་རེ་ནོག་།’ ཏ་ ཁོང་རྒུན་ ཉི་ མ་ནོག་ ཅིག་ ནོག་། 9 ཏོ་རྦེ་ཕི་ ཀོན་འཇོག་རྒེ་ ཅིག་ ཛེད་ཀན་འབོ་ སུ་ཞི་ལ་ པེ་ མ་ཅུག་།”

10 ཡི་ཤུ་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཁང་པེ་ན་ ཞུ་རྡེ་ ཡོད་ཏུའི་, ཁོང་རྒུ་ནི་ ཁོང་ལ་ ཏོ་རྦེ་ ཧོར་ལ་ འདྲི་། 11 ཁོང་ངེ་ ཁོང་རྒུན་ལ་ མོལ་, “ཁོ་རང་ངེ་ ན་མ་ ཅེད་ཏེ་ ཡང་ པོ་མོ་ཞིག་ ཉམ་པོ་ པག་རྟོན་ ཅོ་ཀན་འབེ་ ཁོ་རང་ངེ་ ན་མེ་ རྒྱཔ་འགལ་ལ་ ལོག་ཡེམ་ ཅོའེ་རྡེ་ ནོག་། 12 ཡང་ ཀལ་ཏེ་ སུ་ཞིག་རྒེ་ ཁོ་རང་ངེ་ མག་པ་ ཅེད་ཏེ་ ཡང་ པུ་ཙ་ ཉམ་པོ་ པག་རྟོན་ ཅོ་ནི་, ཁོའེ་ ལོག་ཡེམ་ ཅོའེ་རྡེ་ ནོག་།”

ཡི་ཤུའི་ ཕྲུ་རྒུ་རྒུན་ལ་ ཅིན་ལབ་ སལ་ལེ་ ཛེད་།

13 མི་རྒུ་ནི་ ཕྲུ་རྒུ་ ཆུང་ཙེ་རྒུན་ ཡི་ཤུའི་ ཆག་སེ་ ཛེད་ཏེ་ ཅིན་ལབ་ སལ་ཅེ་ལ་ ཁྱོྃ་། འིན་ན་ ཁོང་ངེ་ ལོབ་ཀྲུག་རྒུ་ནི་ ཕྲུ་རྒུ་ ཁྱོང་ཀན་རྒུན་ལ་ ཁར་རྐྱག་ ཏྃ་།

14 ཏོ་ ཟིའི་རྡེ་ ཡི་ཤུ་ ཐུག་སྲོ་ རྐྱོད་ ཡང་ ཁོང་རྒུན་ལ་ མོལ་, “ཕྲུ་རྒུ་ ཆུང་ཙེ་རྒུན་ རྒག་ མ་རྒག་ ང་ས་ ཡོང་ཅུག་, ཡུ་རྒུ་ནི་ཕི་ ཀོན་འཇོག་རྒེ་ རྒྱལ་སྲིད་པོ་ ནོག་། 15 ངེ་ ཁྱི་ཞ་ རྡེན་འབའ་ ཟེ་འིན་ ཀོན་འཇོག་རྒེ་ རྒྱལ་སྲིད་, ཕྲུ་རྒུ་ ཆུང་ཙེ་རྒུན་ ཙོག་སེ་ ནེན་འདེ་ མ་ནི་ ཏེ་ན་ ཞུའུ་ མི་ཉེན་།” 16 ཏེ་ནི་ ཁོང་ངེ་ ཕྲུ་རྒུ་རྒུན་ ཁོ་རང་ངེ་ ཆག་རྒེ་ན་ ཁྱོང་ངེ་ ཛེད་, ཡང་ ཁོང་རྒུ་ནི་ཀ་ ཆག་ པོ་རེ་ ཛེད་ཏེ་ ཅིན་ལབ་ སལ་ལེ་ ཛེད་།

མི་ ཆུག་པོ་།

17 ཡི་ཤུ་ ལམ་ནི་ རྐྱོད་ཟ་ནི་, མི་ཞིག་ རྒྱུག་རྒེན་ ཡོྃ་རྡེ་ ཁོང་ངེ་ འདུན་ལ་ པིག་ཛུམ་ རྒྱབ་ཏེ་ འདྲི་, “ལོབ་རྦོན་ ཟང་པོ་ལེ་, ཐ་མེད་པེ་ མི་ཙེ་ ནོར་ཧལ་ལ་ ཐོབ་ཅེ་ཕི་ ངེ་ ཅི་ ཅོ་རྒོའེ་?”

18 ཡི་ཤུའི་ འདྲི་ ཛེད་, “ཅི་ཕི་ལ་ ཁྱེ་རང་ངེ་ ང་ ཟང་པོ་ ཟེ་འིན་? ཀོན་འཇོག་ ཅིག་པོ་ མ་ཐེ་ལ་ སུ་ལ་ ཟང་པོ་ མན་།” 19 ཏེ་ནི་ ཡི་ཤུའི་ ཁོའེ་ ཏྲི་ཝ་ལ་ ལེན་སལ་, “ཁྱེ་རང་ལ་ ཀཱ་རྒྱ་རྒུན་ ཤེ་རྡེ་ནོག་: ‘མི་ མ་སེད་, རང་ངེ་ ཞི་མེད་ མན་ཀན་ ཞེན་མ་ ཉམ་པོ་ ལུའི་འབྲེལ་ མ་ཅོ་, ཧུ་མ་ཧུ་, ཟུན་ནེ་ སྤང་པོ་ མ་ཏྃ་, སུ་ཞི་ལ་ འགོ་མ་ཧོར་, ཨ་རྦ་ རྡང་ ཨ་མ་ སི་ཝ་ ཅོའེ་།’”

20 ཁོའེ་ ལེན་ཏྃ་, “ལོབ་རྦོན་ལེ་, ཏེ་ ཚང་མ་ ངེ་ ཆུང་ཏུའི་ནི་ཕ་ལ་ སྲུྃ་རྡེ་ འིན་།”

21 ཡི་ཤུའི་ ཁོ་ ཟིའི་རྡེ་ ཁོའེ་ཀ་ ཤེ་སྤ་ རྐྱེ་ ཡང་ མོལ་, “ཏ་རུང་ ཁྱེ་རང་ལ་ ཅོ་རྒོ་ཤེ་ ཅིག་ ལུའི་རྡེ་ འདུག་། སོང་ ཡང་ ཁྱེ་རང་ངེ་ རྒྱུ་ནོར་ ཚང་མ་ ཙོྃ་རྡེ་ མུལ་འབོ་ ཉལ་རྦ་ཅེན་རྒུན་ལ་ ཏོང་, རྡེ་བ་ཅན་ནེ་ན་ ཁྱེ་རང་ལ་ པང་ཛོད་ ཐོབ་རྦེན་། ཏེ་ནི་ ཡོྃ་རྡེ་ ངེ་ རྒྱབ་ནི་ འགྲོྃ་།”

22 ཏོ་ ཚོར་རེ་རྡང་ ཁོའེ་ འགོ་ རྒུའི་ ཡང་ ཚེར་ཧ་ ཡོྃ་རྡེ་ སོང་, ཅེ་ཟེར་ནི་ ཁོ་ མ་ཆུག་པོ་ ཡོད་པེན་།

23 ཡི་ཤུའི་ ཁོང་ལ་ ཁར་ཁོར་ མི་ཚོག་ལ་ ཟིའི་ ཡང་ ལོབ་ཀྲུག་རྒུན་ལ་ མོལ་, “ཆུག་པོ་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་ ཙམ་ཤིག་རྒེ་ ཀག་སྤོ་ ནོག་།” 24 ཏོ་ ཚོར་རྡེ་ ཁོང་རྒུན་ མ་ ཧ་ལེ་། འིན་ན་ ཡི་ཤུའི་ ཡང་ མོལ་, “ཤེ་སྤ་ ཕྲུ་རྒུ་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་ མ་ ཀག་སྤོ་ ནོག་། 25 མི་ ཆུག་པོ་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་སང་ ཁབ་རྦེ་ མིག་ནི་ ང་རྦོང་ འབིང་ཅེའོ་, ལ་མོ་ ཆེན་།”

26 ལོབ་ཀྲུག་རྒུན་ མང་ངེ་ ཧ་ལེ་རྡེ་ འདྲི་, “ཏེ་ནི་ སུ་ ཐར་པ་ ཐོབ་རྦེན་?”

27 ཡི་ཤུའི་ ཁོང་རྒུན་ལ་ ཟི་རྡེ་ མོལ་, “ཡུ་ མི་ ཅོ་ མ་ནི་ མི་ཉེན་, འིན་ན་ ཀོན་འཇོག་ལ་ ཅི་ཚང་མ་ ཛེད་ ཉེན་ནེ་ནོག་།”

28 པི་ཏྲ་རེ་ ཡི་ཤུ་ ཟེར་, “ང་ཞི་ ཅི་ཚང་མ་ ཕྃ་རྡེ་, ཉེ་རང་ལ་ འགྲྃ་རྡེ་ འིན་?”

29 ཡི་ཤུའི་ ལེན་སལ་, “ངེ་ རྡེན་འབའ་ ཟེ་འིན་, ང་ ཡང་ ནེ་ཚུལ་ ཟང་པེ་ ཏོན་ལ་ ཁང་པ་ ཡང་ ཨ་ཅོ་ནོ་ རྡང་ ཨ་ཅེ་ ནོ་མོ་ ཡང་ ཨ་རྦ་ རྡང་ ཨ་མ་ ཡང་ ཕྲུ་རྒུ་རྒུན་ རྡང་ ཞིང་ ཕང་ཀན་ ཚང་མ་ལ་ 30 འེ་རྒ་ མི་ཙེ་ན་, ཁང་པ་, ཨ་ཅོ་ནོ་, ཨ་ཅེ་ ནོ་མོ་, ཨ་རྦ་, ཨ་མ་, ཕྲུ་རྒུ་, ཞིང་རྒུ་ནི་ རྒྱ་ལྟབ་ མ་ཚེད་ མི་རྒུ་ནི་ ནག་པར་རྡོ་ ལྟན་ནེན་, ཡང་ མ་འོང་པེ་ ཏུའི་ལ་ ཐ་མེད་པེ་ མི་ཙེ་ ཐོབ་རྦེན་། 31 འིན་ན་ ཏག་ས་ འགོ་ ཡོ་ཀན་ མང་པོ་ ལྟིང་འཇུག་ལ་ ལུའི་རྡེན་ ཡང་ ཏག་ས་ ལྟིང་འཇུག་རྒེ་ཀ་ ཡོ་ཀན་ མང་པོ་ འགོ་ལ་ ལེབ་རྦེན་།”

ཡི་ཤུའི་ ཡང་ ཁོ་རང་ ཀྲོང་ཤེ་ ཧོར་ལ་ ཤེད་རྡེ་ ཛེད་།

32 ཡི་ཤུའི་ འགོ་ ཛེད་ཏེ་ ཁོང་རྒུན་ ལྟག་ལ་ ཡེ་རུ་ཤ་ལེམ་མེ་ རྒྱལ་ས་ རྐྱོད་རྡེན་ ཡོད་པེ་ ལོབ་ཀྲུག་རྒུན་ ཧ་ལེ་ ཡང་ ཁོང་ངེ་ རྒྱབ་ནི་ འགྲྃ་རྡེ་ ཡོང་ཀན་རྒུན་ འཇིའི་རྡེ་ཡོད་པེན་། ཡི་ཤུའི་, ཁོ་རང་ངེ་ ལོབ་ཀྲུག་ ཅུག་ཉི་རྦོ་ སོ་སོ་ ཁྱེར་རྡེ་ ཁོང་ ཉམ་པོ་ ཆ་ཀན་རྒུན་ལ་ ཤེད་རྡེ་ ཛེད་། 33 “ཉོན་ནྃ་, ཨ་ཧོ་རྒུན་ ལྟག་ལ་ ཡེ་རུ་ཤ་ལེམ་ལ་ ཆ་ཅེ་ ནོག་, མི་རིག་རྒེ་པུ་ ལ་མ་ འུ་རྐྱོང་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ལག་ལ་ ལྟེ་རྡེན་ ཡང་ ཁོང་རྒུ་ནི་ ཁོ་ ཤི་ཅེ་ ཆེད་པ་ ཅེད་ཏེ་ ཡ་ཧུ་འདཱ་པ་ མན་ཀན་རྒུ་ནི་ ལག་ལ་ ལྟེ་རྡེན་། 34 ཏེ་ནི་ ཁོང་རྒུ་ནི་ ཁོ་ ཁྲེལ་རྦ་ ལྟན་འདེ་, ཐུ་ རྡང་ རྟལ་ལྕག་ རྒྱབ་ཏེ་ སེད་རྡེན་, ཡིན་ནྃ་ ཞག་ སུམ་པེ་ ཞག་ལ་ ཡང་ སོན་པོ་ ལྃ་རྡེན་།”

ཡ་ཀུབ་ ཏང་ ཡོ་ཧཱ་ནན་ནེ་ ཞུ་ཝ་།

35 ཏེ་ནི་ ཟེ་འབེ་འདེ་ པུ་ཙ་ ཡ་ཀུབ་ ཏང་ ཡོ་ཧཱ་ནན་ ཡི་ཤུ་ས་ ཡོྃ་རྡེ་ ཟེར་, “ལོབ་རྦོན་ལེ་, ཉེ་རང་ངེ་ ང་ཞི་ ཞུ་ཝ་ ཞུ་ཅེའོ་ ཅོའོ་ ཛེད་རྡང་།”

36 ཁོང་ངེ་ འདྲི་ ཛེད་, “ཁྱི་ཞི་ཕི་ ངེ་ ཅི་ ཅོ་?”

37 ཁོང་རྒུ་ནི་ ལེན་ཏྃ་, “ཉེ་རང་ ཉེ་རང་ངེ་ ཟི་ཞིད་ཅེན་ནེ་ ཞུ་ཁྲིའི་ཀ་ ཞུ་ཟ་ནི་, ང་ཞ་ ཉེ་རང་ངེ་ ཆག་ ཡོའེ་སྤ་ རྡང་ ཡོའེ་མེ་ སི་ཝ་ཅེན་ ཀོ་སེ་ཀ་ འདེད་ཅུག་རྒེ་ ཛེད་ལེ་།”

38 འིན་ན་ ཡི་ཤུའི་ ཁོང་རྒུན་ལ་ མོལ་, “ཁྱི་ཞི་ ཞུ་ཝ་ པུལ་ཧན་འབོ་ ཁྱི་ཞ་ ཧ་མ་ཀོ་ ནོག་, ང་ ཐུང་ཅེ་ཅེན་ནེ་ རྡུ་ངལ་ལེ་ ཀོ་རེའོ་ ཁྱི་ཞི་ ཐུང་ཉེན་ཅེ་ རག་རྒེ་ ཡང་ རྡུ་ངལ་ལེ་ ཁྲུའི་ ངེ་ ནེན་ཅེ་ཅེན་འབོ་ ཁྱི་ཞི་ ནེན་ ཉེན་ཅེ་ རག་རྒེ་?”

39 ཁོང་རྒུ་ནི་ ཟེར་, “ཉེན་ཅེ་རག་ལེ་།”

ཏེ་ནི་ ཡི་ཤུའི་ ཁོང་རྒུན་ལ་ མོལ་, “ཁྱི་ཞ་རྒུ་ནི་ ནེན་ཏེན་ལ་ ངེ་ རྡུ་ངལ་ལེ་ ཀོ་རེ་ ནང་ནི་ ཐུང་ངེན་ ཡང་ རྡུ་ངལ་ལེ་ ཁྲུའི་ ངེ་ ནེན་ཅེ་ཅེན་འབོ་ ཉམ་པོ་ ཁྱི་ཞི་ ཁྲུའི་ནེ་ནེན་། 40 འིན་ན་ ངེ་ ཡོའེ་སྤ་ རྡང་ ཡོའེ་མེ་ཀ་ འདེད་ཅུག་ཅེ་ ཝང་ཆ་ ང་ མེད་། ཀོན་འཇོག་རྒེ་ ཏེ་ མལ་རྒུན་ འདམ་མེ་ ཛེད་ཀན་རྒུ་ནི་ཕི་ ཀྲལ་འགྲིག་ ཛེད་རྡེ་ འིན་།”

41 ཏོ་ ཚོར་རེ་རྡང་, ཞེན་ ལོབ་ཀྲུག་ ཅུ་ལ་ ཡ་ཀུབ་ ཏང་ ཡོ་ཧཱ་ནན་ནེ་ཀ་ སྲོ་ ཡོྃ་། 42 ཡི་ཤུའི་ ཁོང་ ཚང་མ་ལ་ འབོ་ ཛེད་ཏེ་ མོལ་, “ཁྱི་ཞ་ རྒྱུའི་མེད་རྡེ་? ཡ་ཧུ་འདཱ་པ་ མན་ཀེན་ ཝང་སྲུལ་པ་རྒུ་ནི་ ཁོ་རང་ངེ་ ཡུལ་མི་རྒུ་ནི་ཀ་ ཉིང་ཞེ་ མེད་པེ་ ཝང་སྲུལ་ལེ་ནོག་, ཡང་ ཁོང་རྒུ་ནི་ ལོན་པོ་རྒུ་ནི་ མི་རྒུན་ལ་ ཧོཔ་ ནག་ ལྟ་ནེན་ ཝང་སྲུལ་ལེ་ནོག་། 43 ཁྱི་ཞི་ན་ ཏོ་ཙོག་སེ་ ཡོང་ མི་རྒོའེ་། ཁྱི་ཞི་ ཕྲོ་ནི་ ཀྲག་པོ་ འགྱུར་ཉིན་ ཡོ་ཀན་འབོ་ ཞེན་མ་རྒུ་ནི་ ཡོག་པོ་ འགྱུར་རྒོའེ་, 44 ཡང་ ཁྱི་ཞི་ ཕྲོ་ནི་ འགོ་ ལེཔ་ཉིན་ ཡོ་ཀན་འབོ་ ཞེན་ ཚང་མེ་ ཚེ་ཡོག་ འགྱུར་རྒོའེ་། 45 ཀ་ཟུག་ མི་རིག་རྒེ་པུ་ ཞབ་རྟོག་ ཞུ་ཅུག་ཅེ་ལ་ མ་ནོག་ ཞབ་རྟོག་ ཞུ་ལ་ ཡོྃ་རྦེན་, ཡང་ མི་ མང་པེ་ སྲོག་རིན་ ཤལ་ཅེ་ལ་ ཁོ་རང་ངེ་ སྲོག་ ཏང་ངེན་།”

པར་ཏི་མུ་ ཟེར་ཧ་ནེ་ ཞ་ར་ ཕན་ཅུག་རྒེ་ ཛེད་།

46 ཁོང་རྒུན་ ཡེ་རི་ཀོའེ་ ཀྲོང་ཁྱེར་ལ་ ལེཔ་། ཡི་ཤུ་, ཁོང་ངེ་ ལོབ་ཀྲུག་རྒུན་ འདང་ མི་ཚོག་ མང་པོ་ཞིག་ ཡེ་རི་ཀོ་ནེ་ འབིང་འདེ་ རྐྱོད་ ཟ་ནི་, ཏི་མེ་ཡུ་ པུ་ཙ་ པར་ཏི་མུ་ ཞ་ར་འབོ་ ལམ་མེ་ ཐ་མ་ ལང་ངེ་ལ་ འདེད་ཏེ་ ཡོད་པེན་། 47 པར་ཏི་མུ་ ན་ཙ་རེད་པ་ ཡི་ཤུ་ རྐྱོད་རྡེན་ ནོག་ ཟེར་རྡེ་ ཚོར་རེ་རྡང་, ཁོའེ་ ཀུ་ཅུ་ ཏང་རྡེ་ ཟེར་, “ཡི་ཤུ་ རྒྱ་སྤོ་ འདཱ་འབིད་རྡེ་ ཕར་རྒྱུད་ ངེ་ཀ་ ཉིང་ཞེ་ ཛེད་།”

48 མི་ མང་པེ་ ཁོ་ལ་ ཁར་རྐྱག་ ཏྃ་རྡེ་ ཅེཔ་ཁ་རོག་ ཟེར་, འིན་ན་ ཁོའེ་ མང་ངེ་ ཀུ་ཅུ་ ཏྃ་རྡེ་ ཟེར་, “རྒྱ་སྤོ་ འདཱ་འབིད་རྡེ་ ཕར་རྒྱུད་, ངེ་ཀ་ ཉིང་ཞེ་ ཛེད་རྡང་།”

49 ཡི་ཤུ་ སྲུང་ངེ་ ཛེད་ ཡང་ མོལ་, “ཁོ་ལ་ འེ་ཀ་ འབོའེ་།” ཏེ་ནི་ ཁོང་རྒུ་ནི་ ཞ་ར་འབོ་ལ་ འབོའེ་རྡེ་ ཟེར་, “ཐེད་པོ་ ཅོའེ་, ལོྃ་, ཁོང་ངེ་ ཁྱེ་རང་ལ་ འབོ་ ཛེད་ཏུག་།” 50 པར་ཏི་མུ་ ཁོ་རང་ངེ་ ཀོའེ་རྦོ་ ཐ་མ་ ཕྃ་, ཆོྃ་རྡེ་ ཁོ་རང་ངེ་ ཧང་པེ་ཀ་ ལྃ་ ཡང་ ཡི་ཤུ་ས་ ཡོང་།

51 ཡི་ཤུའི་ ཁོ་ འདྲི་ ཛེད་, “ངེ་ ཁྱེ་རང་ངེ་ཕི་ ཅི་ ཅོ་?” ཞ་ར་རྦེ་ ཟེར་, “ལོབ་རྦོན་ལེ་, ང་ ཡང་ ཐོང་ཅུག་རྒེ་ ཛེད་།”

52 ཡི་ཤུའི་ ཁོ་ མོལ་, “སོང་ ཁྱེ་རང་ངེ་ ཏེཏ་པེ་ ཁྱེ་རང་ ཕན་ཅུག་ཏེ་ འིན་།” ཏེ་རྒ་མ་རྒ་ ཁོ་ ཐོང་ཉེན་, ཡང་ ཁོ་ ཏེ་རྒ་ ལམ་ནི་ ཡི་ཤུ་ འགྲྃ་རྡེ་ སོང་།