9
ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, འེ་ཀ་ ཡོ་ཀན་ ཁ་ཅིག་རྒེ་ ཀོན་འཇོག་རྒེ་ རྒྱལ་སྲིད་ ཝང་ངེ་ན་ རྐྱོད་ཅེ་རྦོ་ ཐོང་འདེ་ མ་ནི་ མི་ཤི་།”ཡི་ཤུའི་ ཟི་ཞིད་ ངོན་།
2 ཞག་ ཀྲུག་རྒེ་ ལྟིང་ནི་ ཡི་ཤུའི་ པི་ཏྲར་, ཡ་ཀུབ་ ཏང་ ཡོ་ཧཱ་ནན་རྒུན་ ཁྲིད་ཏེ་ སུ་ལ་ མེད་སེ་ རི་ ཐོན་པོ་ཞིག་རྒེ་ཀ་ རྐྱོད་། ཏུ་རུ་ ཁོང་རྒུ་ནི་ འདུན་ལ་ ཡི་ཤུའི་ ཧུ་ཟུག་ སོན་ཏེ་ འགྱུར་རྡེ་ 3 ཁོང་ངེ་ ནམ་ཟ་རྦོ་ ཁ་ ཙོག་སེ་ འཇིག་རྟེན་ནི་ན་ སུ་ལ་ ཙམ་ཞིག་ ཁྲུ་ནང་ ཏོ་ཙོག་སེ་ ཀར་སྤོ་ ཅོ་མི་ཉེན་ཤི་ ལག་ལག་ འགྱུར་། 4 ཏེ་ནི་ ཁོང་རྒུ་ནི་ ལུང་རྟོན་པ་ མོ་ཤེ་ རྡང་ ཨེ་ལི་ཡཱེ་ ཡི་ཤུ་ ཉམ་པོ་ ཞལ་ཏ་ ས་ལེན་ འཇལ་།
5 པི་ཏྲ་རེ་ ཡི་ཤུ་ ཟེར་, “ལོབ་རྦོན་ལེ་a ང་ཞ་ འེ་ཀ་ ཡོད་ཅེའོ་ མ་ རྒྱ་ལེ་ སོང་། ང་ཞི་ ཀུར་ སུམ་ སྤུ་རྡེན་, ཉེ་རང་ངེ་ཕི་ ཅིག་, མོ་ཤེ་ཕི་ ཅིག་ ཡང་ ཨེ་ལི་ཡཱེ་ཕི་ ཅིག་།” 6 ཁོ་ ཅི་ ཟེར་རྒོ་ཤེ་རྦོ་ ཧ་མ་ཀོ་རྦེ་, ཁོའེ་ ཏོ་ ཟེར་, ཁོང་རྒུན་ ཧོཔ་ འཇིག་རྡེ་ཡོད་པེན་།
7 ཏེ་ནི་ ཁོང་རྒུན་ སྲིན་ནེ་ ཀབ་, ཡང་ སྲིན་ནེ་ ནང་ནི་ སུང་ཧད་ཅིག་རྒེ་ མོལ་, “འི་རྦོ་ ངེ་ ཤེ་སྤེ་ པུ་ཙ་ འིན་, ཁོའེ་ ཟེར་ཧན་རྒུན་ལ་ ཉོན་།” 8 ཧུན་མེད་ལ་, ཁོང་རྒུ་ནི་ ཁར་ཁོར་ལ་ ལྡ་རྡང་ ཡི་ཤུ་ ཅིག་པོ་ མ་ནི་ མོ་ཤེ་ རྡང་ ཨེ་ལི་ཡཱ་ མ་ཐོང་།
9 རི་ནི་ པབ་ཏེ་ རྐྱོད་རྡེན་ ཡོད་ཟ་ནི་ ཡི་ཤུའི་ ཁོང་རྒུན་ལ་ མི་རིག་རྒེ་པུ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ མ་ནི་ ཁོང་རྒུ་ནི་ ཐོང་ཀན་འབོ་ སུ་ལ་ མི་ཤེད་ཅེ་ལ་ ཀཱ་ སལ་། 10 ཏོ་རྦེ་ཕི་ ཁོང་རྒུ་ནི་ ཏོ་རྒུན་ སུ་ཞི་ལ་ མ་ཤེད་རྡེ་ སང་སྤེར་ན་ པོ་རེན་ ཁོ་རང་ ཅིག་ ཏང་ ཅིག་ལ་ འདྲི་, “‘ཤི་ཀན་རྒུ་ནི་ ཕྲོ་ནི་ ལང་ཤེའོ་’ ཅི་ མོལ་རྡེ་ འིན་ཧེ་?”
11 ཏེ་ནི་ ཁོང་རྒུ་ནི་ ཡི་ཤུ་ འདྲི་, “ཆོའེ་ཁྲིམ་ལ་ ཁེ་སྤ་རྒུ་ནི་ མ་ཤི་ཀ་ རྐྱོད་རྡེ་སང་ ངུལ་ལ་ ལུང་རྟོན་པ་ ཨེ་ལི་ཡཱ་ རྐྱོད་རྒོའེ་ ཅེ་ ཟེར་རྡེ་ནོག་?”
12 ཡི་ཤུའི་ ལེན་སལ་, “ནེན་ཏེན་ལ་, ཅི་ཚང་མ་ ཀྲལ་འགྲིག་ ཅོ་ཅེ་ལ་ ཨེ་ལི་ཡཱ་ ངུལ་ལ་ ཡོང་རྒོའེ་། ཏེ་ནི་ ཅི་ཕི་ ཏམ་པེ་ སུང་རབ་རྦེ་ན་ མོལ་ལེ་ནོག་, ‘མི་རིག་རྒེ་པུ་ རྡུ་ངལ་ ཐོང་འདེ་ རིན་མེད་ ཅོའེ་རྡེ་ ཕང་རྒོའེ་?’ 13 འིན་ན་ ངེ་ ཁྱི་ཞ་ ཟེ་འིན་, ཨེ་ལི་ཡཱ་ ཡོྃ་ ཚར་རྡེ་ འིན་, ཁོང་རྒུ་ནི་ ཁོ་ ཉམ་པོ་ ཅོའེན་ སམ་ཀན་ ཚང་མ་ ཅོའེ་, ཀ་ཟུག་ ཏམ་པེ་ སུང་རབ་རྦེ་ན་ ཁོའེ་ ཧོར་ལ་ འབྲི་ཛེད་ཏེ་ ཡོད་།”
ཡི་ཤུའི་ རྡུད་ ཞུ་ཧ་ནེ་ པུ་ཙ་ཞིག་ ཕན་ཅུག་རྒེ་ ཛེད་།
14 ཁོང་རྒུན་ རི་ནི་ པབ་ཏེ་ རྐྱོད་རྒྱ་ལ་, མི་ཚོག་ མང་པོ་ཞིག་རྒེ་ ཞེན་ ལོབ་ཀྲུག་རྒུན་ལ་ ཧོར་རྡེ་ ཡང་ ཆོའེ་ཁྲིམ་ལ་ ཁེ་སྤ་ ཁ་ཅིག་རྒེ་ ཁོང་རྒུན་ ཉམ་པོ་ ཟེར་ཟེར་ ཏང་ངེན་ ཟིའི་། 15 མི་ཚོག་ སོན་ཏེ་ ཡི་ཤུ་ འཇལ་ལེ་རྡང་, ཁོང་རྒུན་ ཧོཔ་ ཧ་ལེ་ ཡང་ རྒྱུག་ཏེ་ ཁོང་ལ་ ཐུག་རྒེ་ལ་ སོང་།
16 ཡི་ཤུའི་ ལོབ་ཀྲུག་རྒུན་ལ་ འདྲི་ ཛེད་, “ཁྱི་ཞི་ ཁོང་རྒུན་ ཉམ་པོ་ ཅི་ ཧོར་ལ་ ཟེར་ཟེར་ ཏང་ངེ་ཡོད་པེན་?”
17 མི་ཚོག་རྒེ་ ཕྲོ་ནི་ མི་ཞིག་རྒེ་ ལེན་ཏྃ་, “ལོབ་རྦོན་ལེ་ ངེ་ ང་རང་ངེ་ པུ་ཙ་ རྡུད་ ཞུ་རྡེ་ སྤེ་ར་ ཏང་མ་ཉེན་ཀན་འབོ་ ཉེ་རང་ངེ་ཀ་ ཁྱོང་རྦེན་། 18 རྡུད་པོ་ ཁོའེ་ན་ ཞུ་རྡེ་རྡང་ ཁོའེ་, ཁོ་ ཐང་ཀེ་ཀ་ རྒྱབ་ཏུག་ ཡང་ ཁ་ནི་ རྦོའེ་ འབིང་ངེན་ སོ་ རྡམ་འདེ་ ཟུྃ་སྤོ་ སྲན་ཀྲེ་ འགྱུར་རྡུག་། ངེ་ ཉེ་རང་ངེ་ ལོབ་ཀྲུག་རྒུན་ལ་ རྡུད་པོ་ ཕིང་ཅེ་ལ་ ཞུ་ཝ་ པུལ་རྦེན་, འིན་ན་ ཁོང་རྒུན་ལ་ ཏོ་ ཕིང་ མ་ཉེན་།”
19 ཡི་ཤུའི་ མོལ་, “ཏེཏ་པ་ མེ་ཀ་ནེ་ མི་རབ་, ནམ་ཚུག་པ་ ང་ ཁྱི་ཞ་རྒུན་ ཉམ་པོ་ འདེན་? ནམ་ཚུག་པ་ ངེ་ ཁྱེ་རང་རྒུན་ལ་ སྲེན་རྒོའེ་? པུ་ཙ་འབོ་ ང་ས་ ཁྱོང་།”
20 ཏེ་ནི་ ཁོང་རྒུ་ནི་ པུ་ཙ་འབོ་ ཁྱོང་། ཡི་ཤུ་ ཐོང་ངེ་རྡང་, རྡུད་པེ་ ཕྲུ་རྒུའི་ ཟུྃ་སྤོ་ ཧོཔ་ སྲུག་, ཡང་ ཁོ་ ཐང་ཀེ་ཀ་ འགྱེལ་། ཟུྃ་སྤོ་ འ་ངོ་ འི་ངོ་ རིལ་ལེན་ ཁོའེ་ ཁེ་ ནང་ནི་ རྦོའེ་ འབིང་།
21 ཡི་ཤུའི་ ཕྲུ་རྒུའི་ ཨ་རྦ་ལ་ འདྲི་ ཛེད་, “ཁོའོ་ འི་ ཟུར་མོ་ ནམ་ནི་ཕ་ལ་ ཡོད་པེན་?”
ཁོའེ་ ལེན་ཏྃ་, “ཁོ་ ཕྲུ་རྒུ་ ཆུང་ཙེ་ ཡོད་རྒྱ་ལ་། 22 རྡུད་རྡེ་ ཁོ་ ལེན་ མང་པོ་ སེད་ཅེ་ཕི་ མེ་ རྡང་ ཆུའི་ན་ ཕྃ་, ཀལ་ཏེ་ ཉེ་རང་ལ་ ཅི་ཏོང་ཞིག་ ཛེད་ཉེན་ཅེ་ ཡོད་ནི་ ཉིང་ཞེ་ ཛེད་ཏེ་ ང་ཞ་ ཡ་ཏོ་ ཅོའོ་ ཛེད་།”
23 ཡི་ཤུའི་ ཁོ་ མོལ་, “ཅེ་ ཟེ་འིན་ ‘ཀལ་ཏེ་ ཉེ་རང་ངེ་ ཉེན་ནི་?’ ངེ་ཀ་ ཏེཏ་པ་ ཅོ་ཀན་རྒུ་ནི་ཕི་ ང་ ཅི་ཚང་མ་ ཅོ་ཉེན་ཅེ་ ཡོད་།”
24 ཏེ་རྒ་མ་རྒ་ ཕྲུ་རྒུའི་ ཨ་རྦེ་ ཤེད་ཏང་ ངུའི་ཧད་ ཏང་ངེན་ ཟེར་, “ངེ་ ཏེཏ་པ་ ཅོའེན་, ངེ་ ཏེཏ་པ་ ལྡན་ཅུག་རྒེ་ ཛེད་ཏེ་ རྟེམ་པོ་ འགྱུར་ཤེ་ན་ ཡ་ཏོ་ ཅོའོ་ ཛེད་རྡང་།”
25 ཡི་ཤུའི་ མི་ཚོག་ རྒྱུག་རྒེན་ ཁོང་ས་ ཡོང་ལ་ ཟི་རྡེ་རྡང་, རྡུད་པོ་ལ་ ཀབ་རྐྱོན་ ས་ལེན་ ཛེད་ཏེ་ མོལ་, “ཚོར་ མི་ཅུག་ཀན་ འདང་ སྤེ་ར་ ཏང་ མི་ཉེན་ཀ་ནེ་ རྡུད་, ངེ་ ཁྱེ་རང་ལ་ འི་ ཕྲུ་རྒུའི་ ནང་ནི་ འབིང་འདེ་ ཡང་ ཁོའེ་ན་ མ་ནི་ མི་ཆ་ཅེ་ལ་ ཀཱ་ ཏང་ངེ་ཡོད་།”
26 ཏེ་ནི་ རྡུད་པེ་ ཀུ་ཅུ་ ཏྃ་རྡེ་ པུ་ཙེ་ ཟུྃ་སྤོ་ ཧོཔ་ སྲུག་རྒེན་འདང་ ཐང་ཀེ་ཀ་ རྒྱབ་ ཡང་ ཁོའེ་ ནང་ནི་ འབིང་འདེ་ ཡོྃ་། པུ་ཙའོ་ ཤི་ཀན་ ཙོག་སེ་ ཐོང་ ཡང་ མི་ མང་པོ་, “ཁོ་ ཤི་རྡེ་ ནོག་།” ཟེར་། 27 འིན་ན་ ཡི་ཤུའི་ ཆག་ རྐྱང་ངེ་ ཛེད་ཏེ་ པུ་ཙའོ་ལ་ ལྃ་ཤེ་ལ་ ཡ་ཏོ་ ཛེད་, ཡང་ ཁོ་ ཀོའག་ ལྃ་།
28 ལྟིང་ནི་ ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཁང་པེ་ན་ ཅིག་པོ་ ཡོད་ཟ་ནི་, ཁོང་རྒུ་ནི་ ཡི་ཤུ་ འདྲི་, “ང་ཞ་རྒུན་ལ་ རྡུད་པོ་ ཅེ་ ཕིང་ མ་ཉེན་ནེ་ ནོག་?”
29 ཁོང་ངེ་ ཁོང་རྒུན་ལ་, “ཡུ་ཙོག་སེ་ རྡུད་རྒུན་, མོ་ལམ་ འདང་ ཉུང་ནེ་ རྒྱུད་ཏེ་ མ་ནི་ ཕིང་ ཉེན་ནེ་ མག་” མོལ་།
ཡི་ཤུའི་ ཡང་ ཁོ་རང་ ཀྲོྃ་ཤེ་ ཧོར་ལ་ ལུང་རྟན་ ཛེད་།
30 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་, ཏེ་ མལ་ནི་ འབིང་འདེ་ འགཱ་ལིལ་ལེ་ ཡུལ་ཞོང་ རྒྱུད་ཏེ་ རྐྱོད་། ཡི་ཤུའི་ ཁོང་ འདེད་སེ་ མལ་ སུ་ལ་ རྒྱུའི་ ཆ་ཅུག་རྒེ་ མེད་པེན་། 31 ཅེ་ཞུ་ནི་ ཁོང་ངེ་ ཁོ་རང་ངེ་ ལོབ་ཀྲུག་རྒུན་ལ་ ལབ་ཞ་ སལ་ཅེ་ འིན་འབེན་། ཁོང་ངེ་ ཁོང་རྒུན་ལ་ མོལ་, “མི་རིག་རྒེ་པུ་ འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེ་རྡེན་། ཁོང་རྒུ་ནི་ ཁོ་ སེད་རྡེན་, ཡང་ ཞག་ སུམ་པེ་ ཞག་ལ་ སོན་པོ་ ལྃ་ཤུག་རྒེ་ ཛེ་རྡེན་།” 32 ཁོང་རྒུན་ལ་ ཁོང་ངེ་ མོལ་ཧན་འབོ་ ཧ་མ་ཀོ་, འིན་ན་ ཁོང་རྒུན་ལ་ ཏོ་རྦེ་ ཏོན་འབོ་ འདྲི་ཅེ་ ཧམ་བ་ མ་ཡོྃ་།
ཀོན་འཇོག་རྒེ་ རྒྱལ་སྲིད་རྡེ་ན་ ཀྲག་ཤོག་།
33 ཀ་ཕར་ན་ཧུམ་མེ་ ཀྲོང་ཁྱེར་ལ་ ལེབ་ཏེ་ ཁང་པ་ཞིག་རྒེ་ན་ འདེད་ཏེ་ ཡོད་ཏུའི་, ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ འདྲི་ ཛེད་, “ཨ་ཧོ་རྒུན་ འགྲུལ་རྡེ་ ཡོང་ཟ་ནི་, ཁྱི་ཞ་རྒུ་ནི་ ཅི་ ཧོར་ལ་ ཟེར་ཟེར་ ཏང་ངེ་ཡོད་པེན་?” 34 འིན་ན་ ཁོང་རྒུ་ནི་ ལེན་ མ་ཏྃ་, ཅེ་ཟེར་ནི་ ཁོང་རྒུ་ནི་ ཁོ་རང་རྒུ་ནི་ ཕྲོ་ནི་ ཀྲག་ཤོག་ སུ་ འིན་ཀན་འབེ་ ཧོར་ལ་ ཟེར་ཟེར་ ཏང་ངེ་ཡོད་པེན་། 35 ཁོང་ ཐང་ཀེ་ཀ་ ཞུ་རྡེ་ ལོབ་ཀྲུག་ ཅུག་ཉི་རྦོ་ལ་ ཁོ་རང་ས་ འབོ་ ཛེད་ ཡང་ མོལ་, “སུ་ཞིག་ ཚང་མེ་སང་ ཀྲག་པོ་ འགྱུར་ཉིན་ ཡོ་ཀན་རྒུན་ ཚང་མེ་སང་ ལྟིང་འཇུག་པོ་ ཡང་ ཚང་མེ་ ཡོག་པོ་ འགྱུར་རྒོའེ་།”
36 ཕྲུ་རྒུ་ ཆུང་ཙེ་ཞི་ ཁྱོྃ་རྡེ་ ཁོང་རྒུ་ནི་ རྐྱིལ་ལ་ ལྃ་ཤུག་རྒེ་ ཛེད་། ཡི་ཤུའི་ ཕྲུ་རྒུ་འབོ་ པང་ལ་ ནམ་འདེ་ ཁོང་རྒུན་ལ་ མོལ་, 37 “ངེ་ མིང་ངེ་ཕི་ སུ་ཞིག་རྒེ་ འི་ ཕྲུ་རྒུ་ ཆུང་ཙེ་ཞི་ལ་ རྒ་སུའི་ ཅོ་ནི་ ང་ རྒ་སུའི་ ཅོའེ་རྡེ་ འིན་, ཡང་ སུ་ཞིག་རྒེ་ ང་ རྒ་སུའི་ ཅོ་ནི་, ཁོའེ་ ང་ ཅིག་པོ་ལ་ མན་, ང་ ཀ་ལེ་ ཛེད་ཀ་ནེ་ ཡབ་ལ་ རྒ་སུའི་ ཞུའི་རྡེ་ འིན་།”
ཨ་ཧོའེ་ རྒྱཔ་འགལ་ མ་ཅོ་ཀན་རྒུན་ ཨ་ཧོའེ་ ཆོག་སྤ་ ནོག་།
38 ཡོ་ཧཱ་ནན་ནེ་ ཟེར་, “ལོབ་རྦོན་ལེ་ མི་ཞི་རྒེ་ ཉེ་རང་ངེ་ ཚེན་ ཁུར་རྡེ་ རྡུད་ ཕིང་ལ་ ང་ཞི་ ཐོང་, ཡང་ ང་ཞི་ ཁོ་ ཏོ་ མ་ཅོ་ ཟེ་རེན་ ཅེ་ཟེར་ནི་ ཁོ་ ཨ་ཧོའེ་ ཁྲོ་པ་ མན་འབེན་།”
39 ཡི་ཤུའི་ མོལ་, “ཁོ་ རྒག་ མ་རྒག་, ངེ་ མིང་ ཁྱུད་ཅེན་ ཀོལ་རྡེ་ ལྟའ་ ལྟན་འདེ་ ལྟིང་ནི་ ཁོ་ ངེ་ ཧོར་ལ་ སྤེ་ར་ ངན་པ་ མི་ཟེར་། 40 ཨ་ཧོའེ་ རྒྱཔ་འགལ་ མ་ཅོ་ཀན་རྒུན་ ཨ་ཧོ་རྒུ་ནི་ ཆོག་སྤ་ ནོག་། 41 ངེ་ ཁྱི་ཞ་ རྡེན་འབའ་ ཟེ་འིན་, ཁྱི་ཞ་ མ་ཤི་ཀེ་ འིན་ཅེ་རྦོ་ ཆུའི་ ཀོ་རེ་ ཀང་ ཏང་ཀན་རྒུན་ལ་ ནེན་ཏེན་ལ་ སོལ་རེ་ སལ་ལེ་ ཛེ་རྡེན་།”
རྡིག་པེ་ན་ འགྱེལ་ཤུག་ཅེ་།
42 “འིན་ན་ ང་ ཏེཏ་པ་ ཅོ་ཀན་ འི་ ཆུང་ཙེ་རྒུ་ནི་ ནང་ནི་ ཅིག་ལ་ རྡིག་པ་ ཅོ་ཅུག་རྒེ་སང་ ཁོ་རང་ངེ་ རྐྱེ་ རན་ཀྲག་རྒེ་ རྡོ་ ཆོན་མོ་ རྡམ་འདེ་ རྒྱམ་ཚོའེ་ན་ ཕང་ན་ རྒྱལ་། 43 ཀལ་ཏེ་ ཁྱེ་རང་ངེ་ ལག་པེ་ ཁྱེ་རང་ལ་ རྡིག་པ་ ཅོ་ཅུག་རྒེ་ཡོད་ནི་, ཅེད་ཏེ་ ཕོྃ་ཏོང་། ལག་པ་ ཉི་ ཡོད་ཏེ་ ཉ་ཝེ་ མེ་, མ་ནི་ མ་ཤི་ཀ་ནེ་ན་ ཕང་ཅུག་རྒེ་སང་, ལག་པ་ ཅིག་ ཉམ་པོ་ ཐ་མེད་པེ་ མི་ཙེ་ན་ ཆ་ན་ རྒྱལ་། 44 ཏུ་རུ་ ཤ་ ཟ་ཀ་ནེ་ འབུ་ཙིག་རྒུན་ མ་ནི་ མི་ཤི་ ཡང་ མེ་འབོ་ ཏུའི་རྒྱུན་ འབར་རེན་ འདེ་རྡེ་ནོག་། 45 ཀལ་ཏེ་ ཁྱེ་རང་ངེ་ ཧང་པེ་, ཁྱེ་རང་ལ་ རྡིག་པ་ ཅོ་ཅུག་རྒེ་ཡོད་ནི་ ཏོ་ ཅེད་ཏོང་། ཧང་པ་ ཉི་ ཡོད་ཏེ་ ཉ་ཝེ་ན་ ཕང་ཅུག་རྒེ་སང་ ཧང་པ་ ཅིག་ ཉམ་པོ་ ཐ་མེད་པེ་ མི་ཙེ་ན་ ཆ་ན་ རྒྱལ་། 46 ཏུ་རུ་ ཤ་ ཟ་ཀ་ནེ་ འབུ་ཙིག་རྒུན་ མ་ནི་ ཤི་ མག་ ཡང་ མེ་འབོ་ ཏུའི་རྒྱུན་ འབར་རེན་ འདེད་རྡེ་ནོག་། 47 ཡང་ ཀལ་ཏེ་ ཁྱེ་རང་ངེ་ མིག་རྒེ་ རྡིག་པ་ ཅོ་ཅུག་ནི་, ཏོ་ ཏྲུའི་ཏོང་། མིག་ ཉི་ ཡོད་ཏེ་ ཉ་ཝེ་ན་ ཕང་ཅུག་རྒེ་སང་, མིག་ ཅིག་ ཉམ་པོ་ ཀོན་འཇོག་རྒེ་ རྒྱལ་སྲིད་རྡེ་ན་ ཆ་ན་ རྒྱལ་། 48 ‘ཉ་ཝེ་ན་ ཤ་ ཟ་ཀ་ནེ་ འབུ་ཙིག་རྒུན་ མ་ནི་ མི་ཤི་, ཡང་ མེ་འབོ་ ཏུའི་རྒྱུན་ འབར་རེན་ འདེད་རྡེ་ནོག་།’”