མར་ཀུ་ 8

ཡི་ཤུའི་ མི་ ལྟོང་ཞི་ ཁར་ཞི་ སལ་ལེ་ ཛེད་།

ཞག་ཤིག་, ཞེན་ཡང་ མི་ཚོག་ མང་པོ་ཞིག་ ཛོམ་, མི་རྒུན་ལ་ ཟ་རྒྱུ་ མེད་པེ་, ཡི་ཤུའི་ ལོབ་ཀྲུག་རྒུན་ འབོ་ ཛེད་ཏེ་ མོལ་། 2 “འི་ མི་རྒུན་ ང་ ཉམ་པོ་ འདེད་ཏེ་ ཞག་ སུམ་ སོང་ ཡང་ ཟ་ཅེ་ལ་ ཅང་ མེད་ཅེ་ཀ་ནི་, ང་ ཉིང་ཞེ་ ཚོར་རེ་རག་། 3 ཀལ་ཏེ་ ངེ་ ཁོང་རྒུན་ ཁང་པ་ ལྟོག་རི་ ལམ་ཅུག་ནི་, ཁོང་རྒུན་ ལམ་རྦར་ལ་ འགོ་ལོང་ ཁོར་རྡེ་ འགྱེལ་ལེན་, ཅེ་ཟེར་ནི་ ཁོང་རྒུ་ནི་ ཕྲོ་ལ་ མ་ ཐག་རིང་ནི་ ཡོང་ཧན་ ཁ་ཅིག་ལ་ ཡོད་ཏེ་ ནོག་།”

4 ཁོང་ངེ་ ལོབ་ཀྲུག་རྒུ་ནི་ ལེན་ཏྃ་, “ཨ་ཧོའེ་ འི་ མི་རྒུན་ལ་ ཏང་ཅེ་ཕི་ ཏི་རྒིར་ འི་ རི་ལྟོང་འབེ་ན་ ཀ་ནི་ ཐོབ་རྦེན་?”

5 ཡི་ཤུའི་ ཁོང་རྒུན་ལ་ འདྲི་ ཛེད་, “ཁྱི་ཞི་ ལག་ལ་ ཏི་རྒིར་ ཙམ་ ཡོད་?” ཁོང་རྒུ་ནི་ ལེན་ཏྃ་, “ཏི་རྒིར་ རྡུན་ ཡོད་ལེ་།”

6 ཏེ་ནི་ ཡི་ཤུའི་ མི་ཚོག་པོ་ལ་ ཐང་ཀེ་ཀ་ འདེད་ཅེ་ལ་ མོལ་། ཁོང་ངེ་ ཏི་རྒིར་ རྡུན་འབོ་ ནམ་མེ་ ཛེད་ཏེ་ ཀོན་འཇོག་ལ་ ཐུག་ཞེ་ཆེ་ ཞུའི་, ཡང་ ཏོ་རྒུན་ ཅག་ཏེ་ རྒོ་ཅེ་ཕི་ ལོབ་ཀྲུག་རྒུན་ལ་ སལ་, ཡང་ ཁོང་རྒུ་ནི་ མི་ཚོག་ལ་ རྒོའེ་རྡེ་ ཏྃ་། 7 ཁོང་རྒུ་ནི་ ལག་ལ་ ཉ་ ཆུང་ཙེ་ ཁ་ཅིག་ལ་ ཡོད་པེན་, ཡི་ཤུའི་ ཏོ་རྒུ་ནི་ཕི་ལ་ ཐུག་ཞེ་ཆེ་ ཞུའི་རྡེ་ ཁོ་རང་ངེ་ ལོབ་ཀྲུག་རྒུན་ལ་ རྒོའེ་རྡེ་ ཏང་ཅེ་ཕི་ མོལ་ལེ་ ཛེད་།

8 ཁོང་རྒུ་ནི་ ཚིམ་ཚིམ་ ཟོའེ་། ལྟིང་ནི་ ལོབ་ཀྲུག་རྒུ་ནི་ ལག་ལུའི་ ཏི་རྒིར་རྒུན་ རྡུའི་རྡེ་ ཙེ་སྤོ་ རྡུན་ ཧང་། 9 ཏེ་ མི་ཚོག་སེ་ན་ མི་ ཧ་ལམ་ ལྟོང་ཞི་ ཡོད་པེན་། མི་རྒུན་ ཁང་པ་ ལོག་ཏེ་ ལམ་ཅུག་རྒེ་ ཛེད་ཏེ་ 10 ཡི་ཤུ་ ལོབ་ཀྲུག་རྒུན་ ཉམ་པོ་ ཆུ་འགྲུལ་ཞིག་རྒེ་ན་ ཞོན་འདེ་ འདལ་མ་ནུ་ཐ་ ཡུལ་ཞོང་ལ་ རྐྱོད་།

པ་རུ་ཤི་པ་རྒུ་ནི་ ལྟའ་ ལྟན་ཅེ་ལ་ ཟེར་།

11 པ་རུ་ཤི་པ་ ཁ་ཅིག་ ཡོྃ་རྡེ་ ཡི་ཤུ་ ཐི་ཚོད་ལྟོའེ་རྡེ་ ཁོང་ལ་ ཀོན་འཇོག་རྒེ་ ཝང་ཆ་ སལ་ཧན་འབོ་ ནེན་ཏེན་ ཅོ་ཅེ་ལ་ ནམ་ཀ་ནི་ ལྟའ་ཞིག་ ལྟོན་ ཟེར་རྡེ་ འུ་ཙུ་ ཏྃ་།

12 ཏོ་ སན་ནེ་རྒྱ་ལ་ ཁོང་ངེ་ ཉིང་ཤུག་ ཏྃ་རྡེ་ མོལ་, “ཅི་ཕི་ འི་ མི་རབ་པོ་ ནམ་ཀ་ནི་ ལྟའ་ ལྟོན་ ཟེ་རེ་ནོག་? ངེ་ ཁྱི་ཞ་ རྡེན་འབའ་ ཟེ་འིན་, ངེ་ འི་ མི་རབ་པོ་ལ་ ཏེ་ཙོག་སེ་ ལྟའ་ཞིག་ མ་ནི་ མི་ལྟན་།” 13 ཏེ་ནི་ ཁོང་རྒུན་ ཕྃ་རྡེ་ ཁོང་ ཚོའེ་ ཕར་ཧ་ ཆུ་འགྲུལ་ལེ་ན་ ཞུ་རྡེ་ རྐྱོད་རྡེ་ ཛེད་།

པ་རུ་ཤི་པ་རྒུན་ འདང་ ཧེ་རོད་འདེ་ རྒྱཔ་འགལ་ལ་ ཤང་ ཧུལ་ལེ་ ཛེད་།

14 ལོབ་ཀྲུག་རྒུན་ལ་ ཏི་རྒིར་ ཁུར་རེ་ལ་ ཞེད་, ཆུ་འགྲུལ་ལེ་ན་ ཁོང་རྒུ་ནི་ ལག་ལ་ ཏི་རྒིར་ ཅིག་ཅིག་ མ་ནི་ མེད་པེན་། 15 ཡི་ཤུའི་ ཁོང་རྒུན་ལ་ སྤང་པུད་རྡེ་ ཛེད་ཏེ་ མོལ་, “པ་རུ་ཤི་པ་རྒུན་ ཏང་ ཧེ་རོད་འདེ་ རྐྱུར་མེ་ཀ་ནི་ ཤང་ ཅོའེ་།”

16 ཁོང་རྒུ་ནི་ ཅིག་ ཏང་ ཅིག་ལ་ ཟེར་, “ཨ་ཧོའེ་ ཏི་རྒིར་ ཁུར་རྡེ་ མེད་པེ་, ཁོང་ངེ་ ཏོ་ མོལ་རྡེ་ ནོག་རྒེ་?” 17 ཡི་ཤུའི་ ཏོ་ ཁྱེན་འདེ་ འདྲི་ ཛེད་, “ཏི་རྒིར་ མེ་ཀ་ནེ་ ཧོར་ལ་ ཁྱི་ཞ་རྒུ་ནི་ ཅེ་ སྤེ་ར་ ཏང་ངེ་ཡོད་? ཏ་རུང་ང་, ཁྱི་ཞ་རྒུན་ལ་ མ་ཐོང་ངེ་ ཡང་ ཧ་མ་ཀོ་རྡེ་? ཁྱི་ཞ་རྒུ་ནི་ ཉིང་ ཏེ་ཟམ་ ཀྱོང་པོ་ འིན་ནེ་? 18 ཁྱི་ཞ་རྒུན་ལ་ མིག་ ཡོད་ཏེ་ལ་ ཐོང་ཉེན་ནེ་ མི་རག་རྒེ་? ནམ་ཅོག་ ཡོད་ཏེ་, ཚོར་ཉེན་ནེ་ མེ་རག་རྒེ་? ཅི་ ཁྱི་ཞ་རྒུན་ལ་ ཅང་ འི་ཏུ་ མེ་རག་རྒེ་? 19 ངེ་ ཏི་རྒིར་ ང་ནི་ མི་ ལྟོང་ང་ འགྲྃ་ཤུག་ཏེ་ ལུའི་ཧ་ནེ་ ཏི་རྒིར་ ཁྱི་ཞི་ རྡུའི་རྦེ་ ཙེ་སྤོ་ ཙམ་ ཀང་?” ཁོང་ལ་ ལེན་སལ་, ཙེ་སྤོ་ ཅུག་ཉི་ལེ་།

20 “ཡང་ ཏི་རྒིར་ རྡུན་ནེ་ མི་ ལྟོང་ཞི་ འགྲྃ་ཤུག་ཏེ་ ལུའི་ཧ་ནེ་ ཏི་རྒིར་ ཁྱི་ཞི་ རྡུའི་རྦེ་ ཙེ་སྤོ་ ཙམ་ ཀང་?” ཁོང་ལ་ ལེན་སལ་, ཙེ་སྤོ་ རྡུན་ལེ་།

21 ཁོང་ངེ་ ཁོང་རྒུན་ལ་ འདྲི་ ཛེད་, “ཏེ་ནི་ ཏ་རུང་ང་ ཁྱི་ཞ་རྒུན་ལ་ ཧ་ཀོ་ མེ་རག་རྒེ་?”

ཞ་ར་ཞིག་ ཕན་ཅུག་རྒེ་ ཛེད་།

22 ཁོང་རྒུན་ འབེད་ས་ཡི་འདཱ་ ཡུལ་ལ་ ལེབ་རྦེ་རྡང་, མི་ ཁ་ཅིག་རྒེ་ ཞ་ར་ཞིག་ ཡི་ཤུ་ས་ ཁྲིད་ཏེ་ ཁྱོྃ་, ཡང་ འཇུ་འཇུ་ ཞུའིན་ ཁོ་ ཆག་སེ་ ཛེད་ཅེ་ལ་ ཞུ་ཝ་ པུལ་། 23 ཡི་ཤུའི་ ཞ་ར་འབོ་ལ་ ལག་པ་ ཐམ་འདེ་ ཀྲོང་ཁྱེར་ནི་ ཕི་ལོག་ལ་ ཁྱེར་རེ་ ཛེད་། ཁོའེ་ མིག་རྒེ་ཀ་ ཐུ་ རྒྱབ་ཏེ་ ཁོ་རང་ངེ་ ཆག་ ཁོའེ་ཀ་ པོར་རྡེ་ འདྲི་ ཛེད་, “ཁྱེ་རང་ལ་ ཅི་ཏོང་འཇིག་ ཐོང་འདུག་རྒེ་?”

24 ཁོའེ་ ཁར་ཁོར་ལ་ ལྟོའེ་ ཡང་ ཟེར་, “ང་ མི་རྒུན་ ཐོང་འདུག་ལེ་, འིན་ན་ སལ་སྤོ་ མན་ཀན་, ལྕང་མ་ འགྲུལ་ཧན་ ཙོག་སེ་རི་ ཐོང་འདུག་ལེ་།”

25 ཡི་ཤུའི་ ཡང་ ཁོ་རང་ངེ་ ཆག་ ཁོའེ་ མིག་རྒུ་ནི་ཀ་ པོར་རེ་ ཛེད་། ཏེ་ནི་ ཁོའེ་ མིག་རྒུན་ པེ་རྡེ་ ཁོ་ ཐོང་ཅེ་ ཁྱུད་པོ་ ལོག་ཏེ་ ཐོབ་, ཡང་ ཁོ་ ཅི་ཚང་མ་ སལ་སྤོ་ ཅོའེ་རྡེ་ ཐོང་། 26 ཁོ་ ཁང་པ་ ལམ་ཅུག་རྒེ་ ཛེ་རྡེན་ ཡི་ཤུའི་ མོལ་ “ཁྱེ་རང་ ལོག་ཏེ་ ཆ་ཟ་ནི་, ཀྲོང་ཁྱེར་རེ་ན་ མ་ཆ་།”

པི་ཏྲ་རེ་ ཡི་ཤུ་ སུ་ འིན་ཀན་འབོ་ ཤེད་།

27 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ འགཱ་ལིལ་ནི་ ཀཱེ་ས་རི་ཡ་ ཕི་ལི་པི་ ཉེ་ཁོར་རེ་ འགམ་ཡུལ་རྒུན་ལ་ རྐྱོད་། ཁོང་རྒུན་ རྐྱོད་ཟ་ནི་ ལམ་ལ་ ཁོང་ངེ་ ལོབ་ཀྲུག་རྒུན་ལ་ འདྲི་ ཛེད་, “མི་རྒུ་ནི་ ང་ སུ་ ནོག་ ཟེར་འདུག་?”

28 ཁོང་རྒུ་ནི་ ལེན་ཏྃ་, “ཁ་ཅིག་རྒེ་ ཁྲུའི་སལ་ཧན་ ཡོ་ཧཱ་ནན་, ཁ་ཅིག་རྒེ་ ལུང་རྟོན་པ་ ཨེ་ལི་ཡཱ་, ཡང་ ཞེན་མ་རྒུ་ནི་ ལུང་རྟོན་པ་རྒུ་ནི་ ཕྲོ་ནི་ ཅིག་ཅིག་ ཞུ་རྡེ་ནོག་ ཟེར་རྡུག་།”

29 ཏེ་ནི་ ཁོང་ངེ་ ཁོང་རྒུན་ལ་ འདྲི་ ཛེད་, “འིན་ན་ ཁྱི་ཞི་ ང་ སུ་ ནོག་ ཟེ་འིན་?” པི་ཏྲ་རེ་ ལེན་ཏྃ་, “ཉེ་རང་ ཀོན་འཇོག་རྒེ་ མ་ཤི་ཀ་ ཞུ་རྡེ་ནོག་།”

30 འིན་ན་ ཡི་ཤུའི་ ཁོང་རྒུན་ལ་ ཁོང་ངེ་ ཧོར་ལ་ སུ་ལ་ མ་ཤེད་ མོལ་རྡེ་ ཀཱ་ སལ་།

ཡི་ཤུའི་ ཁོ་རང་ ཀྲོང་ཤེ་ ཧོར་ལ་ ལུང་རྟན་ ཛེད་།

31 ཏེ་ནི་ ཡ་ཧུ་འདཱ་པེ་ འུ་རྐྱོང་རྒུན་, ལ་མེ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ཀ་ནི་ མི་རིག་རྒེ་པུ་ལ་ རྡུ་ངལ་ མང་པོ་ ཉོང་འདེ་ སེད་རྒོ་ཤེ་ ཡང་ ཞག་ སུམ་མེ་ ལྟིང་ནི་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ཤེ་ ཧོར་རྒུན་ ཡི་ཤུའི་ ལོབ་ཀྲུག་རྒུན་ལ་ ལབ་ཅེ་ འགོ་ཟུག་ ཛེད་། 32 ཡུ་རྦེ་ ཧོར་ལ་ ཁོང་ངེ་ སལ་སྤོ་ ཅོའེ་རྡེ་ ཤེད་རྡེ་ ཛེད་པེ་, པི་ཏྲ་རེ་ ཁོང་ སོ་སོ་ ཁྱེར་རྡེ་ ཁར་རྐྱག་ ཏྃ་།

33 འིན་ན་ ཡི་ཤུ་ འགྱུར་རེ་ ཛེད་ཏེ་ ལོབ་ཀྲུག་རྒུན་ལ་ ཟིའི་རྡེན་ པི་ཏྲར་ལ་ ཀབ་རྐྱོན་ ཛེད་རྡེན་ མོལ་, “རྡུད་, ང་ས་ནི་ ཐག་རིང་ལ་ སོང་། ཁྱེ་རང་ངེ་ སམ་ཚུལ་ ཀོན་འཇོག་རྒེ་ ཆོག་ནི་ མན་འབེ་, མི་ ཆོག་ནི་ ནོག་།”

34 ཏེ་ནི་ མི་ཚོག་ ཏང་ ལོབ་ཀྲུག་རྒུན་ལ་ ཁོང་ས་ ཛོམ་ཅེ་ལ་ འབོ་ ཛེད་ ཡང་ མོལ་, “ངེ་ ལྟིང་འགྲྃ་ནི་ ཡོང་ལ་ ཐེད་ཀན་རྒུན་, རང་འདོད་ ཕྃ་རྡེ་ རང་ངེ་ རྡུ་ངལ་ལེ་ རྐྱང་ཤིང་ ཁུར་རྡེ་ ང་ འགྲྃ་རྒོའེ་། 35 རང་སྲོག་ རྐྱོབ་ཉིན་ ཡོ་ཀ་ནེ་ རྡེན་འབེ་ མི་ཙེ་ རྐྱལ་ལེན་, འིན་ན་ ང་ རྡང་ ནེ་ཚུལ་ ཟང་པེ་ ཏོན་ལ་ ཁོ་རང་ངེ་ སྲོག་ རྐྱལ་ཧན་རྒུ་ནི་ རྡེན་འབེ་ མི་ཙེ་འབོ་ རྐྱོབ་རྦེན་། 36 མི་ཞིག་ལ་ འཇིག་རྟེན་ སོན་ཏེ་ ཐོབ་ཏེ་ རང་ངེ་ ཐ་མེད་པེ་ མི་ཙེ་ རྐྱལ་ནི་ ཅི་ ཕན་ཏོག་? 37 ཡང་ནི་ ཏོ་རྦེ་ ཚབ་ལ་ མི་ཞིག་རྒེ་ ཅི་ ཏང་ཉེན་ནེན་? 38 འི་ མི་རབ་ ལོག་ཡེམ་ འདང་ རྡིག་ཅེན་རྒུ་ནི་ ཕྲོ་ ཀལ་ཏེ་ སུ་ཞིག་རྒེ་ ང་ རྡང་ ངེ་ ལབ་ཞེ་ སྤང་པོ་ ཏང་ཅེ་ལ་ ཁྲེལ་རྦ་ ཚོར་ནི་, ང་ མི་རིག་རྒེ་པུ་ ང་རང་ངེ་ ཡབ་རྦེ་ ཟི་ཞིད་རྡེ་ན་ ཏམ་པེ་ ཕོ་ཉ་རྒུན་ ཉམ་པོ་ ལོག་ཏེ་ ཡོང་ཟ་ནི་, ང་ ཁོའེ་ཀ་ ཁྲེལ་རྦ་ ཚོར་རེན་།”