སང་མ་ རྡང་ ཀྲིཔ་།
7
ཡེ་རུ་ཤ་ལེམ་མེ་ རྒྱལ་ས་ནེ་ ཡོང་ཀ་ནེ་ པ་རུ་ཤི་པ་ རྡང་ ཆོའེ་ཁྲིམ་ལ་ ཁེ་སྤ་ ཁ་ཅིག་ ཡི་ཤུ་ས་ ཛོམ་། 2 ཁོང་རྒུ་ནི་ ཡི་ཤུའི་ ལོབ་ཀྲུག་ ཁ་ཅིག་རྒེ་ ཁར་ཞི་ ཟ་སང་ ངུལ་ལ་ ཡ་ཧུ་འདཱ་པེ་ ལུག་སྲོལ་ ནང་ཞིན་ ལག་པ་ མ་ཁྲུ་ཀན་འབོ་ ཐོང་། 3 ཞག་ཤིག་, ཡ་ཧུ་འདཱ་པེ་, མིག་སལ་ལེ་ པ་རུ་ཤི་པ་རྒུ་ནི་, ཁོ་རང་རྒུ་ནི་ ཕ་མེ་ ལུག་སྲོལ་ ནང་ཞིན་ ལག་པ་ ཁྲུའི་རྡེ་ མ་ནི་ ཁར་ཞི་ ཟ་མེད་པེན་། 4 ཁོང་རྒུན་ ཁྲོམ་ནི་ ཡོྃ་རྡེ་, ཁོ་རང་རྒུ་ནི་ ལུག་སྲོལ་ ནང་ཞིན་ ལག་པ་ ཁྲུའི་རྡེ་ མ་ནི་, ཁར་ཞི་ ཟ་མེད་པེན་། ཁོང་རྒུ་ནི་ ཡང་ ལུག་སྲོལ་ མང་པོ་ཞིག་ སྲུང་ངེ་ཡོད་པེན་ སྤེར་ན་, ཀོ་རེ་, ཆུ་ནོད་ ཏང་ ཁྲ་འུ་ ཁྲུ་ཅེ་རྒུན་།5 ཏོ་ཕི་ པ་རུ་ཤི་པ་ རྡང་ ཆོའེ་ཁྲིམ་ལ་ ཁེ་སྤ་རྒུ་ནི་ ཡི་ཤུ་ འདྲི་, “ཉེ་རང་ངེ་ ལོབ་ཀྲུག་རྒུ་ནི་ ལག་པ་ མ་ཁྲུ་ ཁར་ཞི་ ཟོའེ་རྡེ་ ཅེ་ ཨ་ཧོའེ་ ཕ་མེ་ ལམ་ ལུག་སྲོལ་ལེ་ཀ་ འགྲུ་ལེ་ མག་?”
6 ཡི་ཤུའི་ ལེན་སལ་ལེ་ ཛེད་, “ངའིན་a ཅོ་ཀན་པ་ ཁྱི་ཞི་ ཧོར་ལ་ ཀོན་འཇོག་རྒེ་ ཡེ་ཤ་ཡཱ་ རྒྱུད་ཏེ་ ལུང་རྟན་ སལ་ཧན་འབོ་ རྡེན་འབའ་ ནོག་, ཀ་རྦེ་ན་,
‘འི་ མི་རྒུ་ནི་ ཁ་ནི་ ང་ སི་ཝ་ ཅོ་ནང་
ཁོང་རྒུ་ནི་ ཉིང་རྒུན་ ང་ནི་ ཐག་རིང་ལ་ འདུག་།
7 ཁོང་རྒུ་ནི་ ང་ ཅོལ་ཅེའོ་ ཕན་མི་ཐོག་ ནོག་,
ཅེ་ཟེར་ནི་ ཁོང་རྒུ་ནི་ ཀོན་འཇོག་རྒེ་ ཀཱ་ཁྲིམ་མེ་ ཚབ་ལ་
ཁོ་རང་རྒུ་ནི་ ཅོ་ཀ་ནེ་ ཁྲིམ་རྒུན་ ལབ་ཏུག་།’
8 ཁྱི་ཞ་རྒུ་ནི་, ཀོན་འཇོག་རྒེ་ ཀཱ་ཁྲིམ་རྒུན་ལ་ ནང་མེད་ ཅོའེ་རྡེ་ ཏོ་རྦེ་ ཚབ་ལ་ ཁྱི་ཞ་རང་ངེ་ ལུག་སྲོལ་རྒུན་ སྲུང་འདུག་།”
9 ཏེ་ནི་ ཡི་ཤུའི་ མོལ་, “ཁྱི་ཞི་, ཁྱི་ཞ་རང་ངེ་ ལམ་ལུག་སྲོལ་ སྲུང་ཅེ་ལ་ ཐབ་ ཁེ་སྤ་ ཉམ་པོ་ ཀོན་འཇོག་རྒེ་ ཀཱ་ཁྲིམ་རྒུན་ ཕང་འདུག་། 10 སྤེར་ན་ མོ་ཤེ་ ཟེར་, ‘རང་ངེ་ ཨ་རྦ་ རྡང་ ཨ་མ་ལ་ སི་ཝ་ ཅོའེ་, ཡང་ རང་ངེ་ ཨ་རྦ་ ཡང་ ཨ་མ་ལ་ ངན་ ཏབ་ཀན་རྒུན་ སེད་རྒོའེ་།’ 11 འིན་ན་ ཁྱི་ཞི་ མི་རྒུན་ལ་ ཁོ་རང་ངེ་ ཨ་རྦ་ ཡང་ ཨ་མ་, ‘ངེ་ ཉེ་རང་ལ་ རོག་ ཅོ་རྒོ་ཤེའོ་ ཀོར་འབན་ ཙོག་སེ་ ཀོན་འཇོག་ལ་ པུ་ལེན་ ཟེར་རྡེ་ ཞལ་ཆེཏ་ ཅོའེ་རྡེ་ འིན་ ཟེར་ཤེ་ ལབ་ཏུག་།’ 12 ཏུ་ཟུག་ ཅོ་ཅེ་ནི་ ཁྱི་ཞ་རྒུ་ནི་ ཁོང་རྒུན་ལ་ རང་ངེ་ ཨ་རྦ་ ཡང་ ཨ་མ་ལ་ ཡ་ཏོ་ ཅོ་ མ་ཅུག་རྒེ་ ནོག་། 13 ཏེ་རྒ་རྦེ་ཕི་ ཁྱི་ཞ་རང་ངེ་ ལམ་ལུག་སྲོལ་ སྲུང་ཅེ་ན་ ཁྱི་ཞི་ ཀོན་འཇོག་རྒེ་ ཀའ་ ཅག་ཅེ་ མ་ཚེད་ ཞེན་ ཏོ་ཙོག་སེ་ ལེ་ཧ་ མང་པོ་ ཅོ་ནོག་།”
14 ཏེ་ནི་ ཡི་ཤུའི་ མི་ཚོག་ལ་ འབོ་ ཛེད་ཏེ་ མོལ་, “ཁྱི་ཞ་ ཚང་མེ་, ངེ་ ཟེར་ཧན་འབོ་ ཉེན་འདེ་ ཧ་ཀོ་ཅེ་ ཙོན་འགྲུའི་ ཅོའེ་། 15 ཕི་ལོག་ནི་ ཟུྃ་སྤེ་ན་ ཆ་ཀན་རྒུ་ནི་, ཁྱི་ཞ་ ཀྲིཔ་ འགྱུར་ཤུག་རྒེ་ མག་, འིན་ན་ ཁྱི་ཞ་རྒུ་ནི་ སེམ་ནི་ འབིང་ཀན་རྦེ་, ཁྱི་ཞ་རྒུན་ ཀྲིཔ་ འགྱུར་ཤུག་རྒེ་ ནོག་། 16 ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ རྒྱལ་ལེ་ ཅོའེ་རྡེ་ ཉོན་ཧེ་།”
17 ཏེ་ནི་ ཡི་ཤུ་ མི་ཚོག་རྒུན་ ཕྃ་རྡེ་ ཁང་པ་ཞིག་རྒེ་ན་ རྐྱོད་, ཁོང་ངེ་ ལོབ་ཀྲུག་རྒུ་ནི་ ཁོང་ལ་, སྤེ་ སལ་ཧན་འབོ་ ཧ་ཀོ་ཅུག་ཅེ་ལ་ འདྲི་། 18 ཁོང་ངེ་ འདྲི་ ཛེད་, “ཁྱི་ཞ་ ཧ་མ་ཀོ་རྡེ་? ཐོང་ངེ་ མི་འདུག་རྒེ་? ཁྱི་ཞི་ ཟ་ཀ་ནེ་ ཁར་ཞིའུ་ ཁྱི་ཞ་རྒུན་ ཀྲིཔ་ འགྱུར་ཤུག་རྒེ་ མག་, 19 ཁར་ཞི་ ཁྱི་ཞི་ ཉིང་ངེ་ན་ མ་ཆ་ ཀྲོཏ་པེ་ན་ ལེབ་ཏེ་ ཟུྃ་སྤོ་ནི་ ཕི་ལོག་ལ་ འབིང་ངེ་ནོག་།”b
20 ཁོང་ངེ་ མོལ་, “ཁྱི་ཞི་ ནང་ནི་ འབིང་ཀན་འབོ་ ཁྱི་ཞ་རྒུན་ ཀྲིཔ་ འགྱུར་ཤུག་རྒེ་ ནོག་། 21 ཅེ་ཟེར་ནི་ མི་ཞིག་རྒེ་ ཉིང་ནི་, སམ་ཚུལ་ ངན་པ་, ལུའི་འབྲེལ་ ངན་པ་, ཧུ་ཅེ་, མི་ སེད་ཅེ་, 22 རང་ངེ་ ཞི་མེད་ མན་ཀན་ ཞེན་མ་ ཉམ་པོ་ ལུའི་འབྲེལ་ ཅོ་ཅེ་, ཞེ་རྡང་, ངན་སེམ་, འགོམ་ཧོར་ ཏང་ཅེ་, ཏུའི་རྒྱུན་ ལུའི་འབྲེལ་ ངན་པེ་ འདོད་པ་, ཕྲ་རྡོག་, ཞེན་མེ་ ཧོར་ལ་ འབར་ཤེ་, ཕོ་སོ་ རྡང་ ཧན་རི་ འབིང་ངེ་ནོག་། 23 ཏེ་ ཚང་མ་ ནང་ཀུ་ནི་ འབིང་འདེ་ ཁྱི་ཞ་རྒུན་ ཀྲིཔ་ འགྱུར་ཤུག་རྒེ་ ནོག་།”
ཡ་ཧུ་འདཱ་པ་ མན་ཀ་ནེ་ པོ་མོ་ཞིག་རྒེ་ ཏེཏ་པ་།
24 ཏེ་རྒ་ནི་ འབིང་འདེ་ ཡི་ཤུ་ ཏཱ་ཡིར་ རྡང་ སི་འདཱོན་ ཡུལ་ཞོང་ངེ་ ཆོག་ལ་ རྐྱོད་། ཁོང་ ཞུ་རྡེ་ འདེད་སེ་ ཁང་པའོ་ སུ་ཞི་ལ་ རྒྱུའི་ ཆ་ཅུག་རྒེ་ མེད་པེན་, འིན་ན་ ཏོ་ སྃ་རྡེ་ན་ པོར་ མ་ཉེན་། 25 རྡུད་ ཞུ་རྡེ་ ཡོད་ཀན་ པོ་མོ་ ཆུང་ཙེ་ ཨ་མ་ ཡི་ཤུ་ རྐྱོད་ཏེ་ འདུག་ ཟེར་རྡེ་ ཚོར་རེ་རྡང་, ཁོ་ ཡོྃ་རྡེ་ ཁོང་ངེ་ ཞབ་རྦེ་ འདུན་ལ་ འགྱེལ་རྡེ་ 26 ཁོའེ་ ཕྲུ་རྒུའི་ ནང་ནི་ རྡུད་པོ་ ཕིང་ངེ་ ཛེད་ཅེ་ལ་ འཇུ་འཇུ་ ཞུའིན་ ཁོང་ལ་ ཞུ་ཝ་ པུལ་། ཏེ་ པོ་མོ་རྦོ་ སི་རི་ཡཱེ་ ཡུལ་ཞོང་ངེ་ ཕོ་ནི་ཤི་ཡེ་ རྒྱལ་སེ་ན་ རྐྱེ་རྡེ་ ཡ་ཧུ་འདཱ་པ་ མན་པེན་།
27 ཡི་ཤུའི་ ཁོ་ མོལ་, “འགོ་མ་ ངེ་ ཀོན་འཇོག་རྒེ་ ཕྲུ་རྒུ་, ཨིས་ར་ཡེལ་པ་རྒུན་ལ་ འགྲྃ་འགྲྃ་ ཟ་ཅུག་ རྒོའེ་། ཕྲུ་རྒུའི་ ཏི་རྒིར་རྦོ་ ནེན་འདེ་ ཁྱི་ ཕང་ནི་ མ་འགྲིག་རྒེ་ ནོག་།”
28 ཁོའེ་ ལེན་ཏྃ་, “རྡེན་འབའ་ ནོག་ ཙོབོ་ལེ་, འིན་ན་ ཕྲུ་རྒུ་རྒུ་ནི་ ཁར་ཞི་ ཀྲུལ་ཧན་རྒུན་ ཅོག་ཙེ་ ཡོག་ལ་ ཡོ་ཀ་ནེ་ ཁྱི་ཕྲུག་རྒུ་ནི་ལ་ ཟ་རུག་།”
29 ཁོང་ངེ་ མོལ་, “ཏ་ ཁང་པ་ སོང་, ཁྱེ་རང་ངེ་ ལེན་ རྒྱལ་ལེ་ ཏང་ཅེ་རྦེ་ ཅོའེ་རྡེ་, རྡུད་ ཁྱེ་རང་ངེ་ པོ་མེ་ ནང་ནི་ ཕིང་འདེ་ མེད་།” 30 ཁོ་ ཁང་པ་ ལེཔ་ཟ་ནི་, ཁོའེ་ པོ་མོ་ ཆུང་ཙེ་རྦོ་ མལ་སེ་ཀ་ ཉལ་རྡེ་ རྡུད་ འབིང་འདེ་ མེ་ཀན་འབོ་ ཐོང་།
ཡི་ཤུའི་, འགུ་ཏི་ཞིག་ ཕན་ཅུག་རྒེ་ ཛེད་།
31 ཡི་ཤུ་ ཏཱ་ཡིར་ནི་ འབིང་འདེ་ སི་འདཱོན་ ཡུལ་ རྒྱུད་ཏེ་ འདྲེ་ཀ་པོ་ལི་ ཡུལ་ཞོང་ རྒྱུད་ཏེ་ འགཱ་ལིལ་ལེ་ ཚོའེ་ ཆོག་ལ་ རྐྱོད་། 32 མི་ ཁ་ཅིག་རྒེ་ འགུ་ཏི་ རྡང་ ཁ་འགྲིག་ཀ་ནེ་ མི་ཞིག་ ཁོང་ས་ ཁྱོྃ་, ཡང་ ཡི་ཤུ་ འཇུ་འཇུ་ ཞུའིན་ ཁོང་ངེ་ ཆག་ ཁོའེ་ཀ་ པོར་རེ་ ཛེད་ཅེ་ལ་ ཞུ་ཝ་ པུལ་།
33 ཡི་ཤུའི་ མིའུ་ མི་ཚོག་ནི་ སོ་སོ་ ཁྱེར་རེ་ ཛེད་ཏེ་ ཁོ་རང་ངེ་ ཛུ་རྒུ་རྒུན་ ཁོའེ་ ནམ་ཅོག་རྒུ་ནི་ན་ ཅུག་, ཏེ་ལྟིང་ནི་ ཁོ་རང་ངེ་ ཛུ་རྒུ་རྒུ་ནི་ཀ་ ཐུ་ རྒྱབ་ཏེ་ ཁོའེ་ ལྕེ་ལ་ ཐུག་ཅུག་རྒེ་ ཛེད་། 34 ཏེ་ནི་ ཁོང་ངེ་ ནམ་ཀེ་ ལྟག་ལ་ ཟིའི་རྡེ་ འུག་ རིང་མོ་ ནེན་འདེ་ ཁོ་ མོལ་, “ཨེབ་ཕ་ཐ་” ཀ་རྦེ་ ཏོན་ཏག་པོ་ “པེ་ཤིག་” ནོག་། 35 ཏེ་རྒ་མ་རྒ་ མིའུ་ལ་ རྒྱལ་ལེ་ ཅོའེ་རྡེ་ ཚོར་ ཡང་ ཁོའེ་ ལྕེ་འབོ་ ཀྲོལ་རྡེ་ ཁོ་ སྤེ་ར་ སལ་སྤོ་ ཏང་ཉེན་།
36 ཡི་ཤུའི་ མི་ཚོག་ལ་ སུ་ལ་ མི་ཤེད་ཅེ་ལ་ ཀཱ་ སལ་། ཙམ་ཞིག་ མང་ངེ་ ཁོང་ངེ་ མི་ཤེད་ཅེ་ལ་ མོལ་ནྃ་ མི་རྒུ་ནི་ མ་མང་པོ་ ནེ་ཚུལ་རྦོ་ ཕེལ་ཤུག་། 37 མི་རྒུན་ མ་སྲན་ཀྲེ་ ཧ་ལེ་རྡེ་ ཅིག་ ཏང་ ཅིག་ལ་ ཟེར་, “ཁོང་ངེ་ ཅི་ ཛེད་ནྃ་ ཧ་ལེ་ཤེ་ ཡོང་འདུག་། ཁོང་ངེ་, འགུ་ཏི་ལ་ ཚོར་ཤུག་ཅེ་ རྡང་ ཁ་འགྲིག་ཀན་ལ་ སྤེ་ར་ ཏང་ཅུག་རྒེ་ ཛེད་ཏུག་།”