མར་ཀུ་ 6

ན་ཙ་རེད་པ་རྒུ་ནི་ ཡི་ཤུ་ སི་ཝ་ མ་ཅོའེ་།

ཡི་ཤུ་ ཏེ་རྒ་ནི་ ལོབ་ཀྲུག་རྒུན་ ཉམ་པོ་ ཁོ་རང་ངེ་ ཀྲོང་ཁྱེར་ ན་ཙ་རེད་ལ་ རྐྱོད་། 2 ངལ་ཚོའེ་ ཞག་ལ་, ཁོང་ངེ་ འདུ་ཀང་ངེ་ན་ ལབ་ཞ་ སལ་ཅེ་ འགོ་ཟུག་, ཡང་ ཁོང་ལ་ ཚོར་ཧན་ མང་པེ་ ཧ་ལེ་རྡེ་ ཅིག་ ཏང་ ཅིག་ལ་ འདྲི་, “འི་ མི་འབོ་ལ་ འི་ ཚང་མ་ ཀ་ནི་ ཐོབ་ཀག་? ཁོ་ འི་ཟུག་ ཤེ་རབ་ སུའི་ ཏྃ་ཧག་? ཀ་ཟུག་རྒེ་ ཁོའེ་ འི་ཟུག་ ཧ་ལེ་ཤེ་ ཛེད་པ་རྒུན་ ལྟན་ནེ་ནོག་? 3 ཁོ་ ཤིང་ཀན་པ་ མ་ནོག་རྒེ་? ཁོ་ མར་ཡམ་མེ་ པུ་ཙ་ ཡང་ ཡ་ཀུབ་, ཡོ་སེབ་, ཡུ་འདཱ་ རྡང་, ཤི་མོན་རྒུ་ནི་ ཨ་ཅོ་ མ་ནོག་རྒེ་? ཁོའེ་ སྲིང་མོ་རྒུན་ འེ་ཀ་ ཨ་ཧོ་རྒུན་ ཉམ་པོ་ མེད་རྡེ་?” ཟེར་རྡེ་ ཏོ་རྒུ་ནི་ ཡི་ཤུ་ ཏེཏ་པ་ མ་ཅོའེ་།

4 ཡི་ཤུའི་ ཁོང་རྒུན་ལ་ མོལ་, “ལུང་རྟོན་པ་ཞིག་ལ་ ཁོ་རང་ངེ་ རང་ཡུལ་, ཉེན་འགྲུམ་ འདང་ ཁོ་རང་ངེ་ ནང་ཚང་ངེ་ན་ མ་ནི་, ཞེན་ ཀང་ལུང་ས་ སི་ཝ་ ཅོ་རུག་།” 5 ཁོང་རྒུ་ནི་ ཏེཏ་པ་ མེད་ཅེ་རྦེ་, ཁོང་ངེ་ ཁོང་རྒུ་ནི་ ཕྲོ་ ཟུར་མོ་ ཡོང་ཀན་ ཁ་ཅིག་རྒེ་ཀ་ ཁོ་རང་ངེ་ ཆག་ པོར་རྡེ་ ཕན་ཅུག་རྒེ་ ཛེད་ཅེ་ མ་ཐེ་ལ་, ཞེན་ཡང་ ཅང་ ཧ་ལེ་ ཛེད་པ་ ལྟན་ནེ་ མ་ཛེད་།

ཡི་ཤུའི་ ཧུ་ཚབ་ ཅུག་ཉི་རྦོ་ ལམ་ཅུག་རྒེ་ ཛེད་།

6 ཡང་ ཁོང་རྒུ་ནི་ ཏེཏ་པ་ མེད་ཅེ་རྦོ་ལ་ ཟི་རྡེ་ ཁོང་ ཧ་ལེ་། ཏེ་ནི་ ཡི་ཤུ་ ལབ་ཞ་ སལ་ལེ་ལ་ འགམ་ཡུལ་ ཅིག་ནི་ ཅིག་ལ་ རྐྱོད་། 7 ཁོང་ངེ་ ལོབ་ཀྲུག་ ཅུག་ཉི་རྦོ་ལ་ འབོ་ ཛེད་, ཡང་ ཉི་ཉི་ ཅོའེ་རྡེ་ རྡུད་ ཞུ་ཧན་རྒུ་ནི་ ནང་ནི་ རྡུད་ ཕིང་ཅེ་ ཝང་ཆ་ སལ་ལེ་ ཛེད་ཏེ་ ཁོང་རྒུན་ ལམ་ཅུག་རྒེ་ ཛེད་། 8 ཁོང་ངེ་ ཁོང་རྒུན་ལ་ ལབ་ཞ་ ས་ལེན་ མོལ་, “ཁྱེ་རང་རྒུ་ནི་ པེ་རྡེ་ཕི་ ལག་རྦེར་རྦོ་ མ་ནི་, ཁར་ཞི་, འཇོ་ལ་ རྡང་ ཁོ་མག་རྒེ་ན་ མུལ་ མ་ཁུར་། 9 འཇའ་ཏོ་ ཀོན་ འིན་ན་ ཀོའེ་ལག་ སྤོ་ཅེ་ མ་ཁུར་།”

10 “ཁྱི་ཞ་ འགྲང་ས་ ཏང་ཀ་ནེ་ ཏེ་རྒ་ ཁང་པེ་ན་ འདོད་ ནམ་ཚུག་པ་ ཏེ་ ཀྲོང་ཁྱེར་ནི་ འབིང་འདེ་ ཆ་ མི་ཆ་། 11 ཀལ་ཏེ་ ཀྲོང་ཁྱེར་ཞིག་རྒེ་ན་ སུ་ཞིག་རྒེ་ ཁྱི་ཞ་ རྒ་སུའི་ མ་ཅོ་ནི་, ཡང་ ཁྱི་ཞི་ ཟེར་ཧན་འབོ་ལ་ མ་ཉེན་ནི་, ཏེ་ནི་ འབིང་འདེ་ ཆ་ཟ་ནི་, རང་ངེ་ འཇའ་ཏོའེ་ ཐལ་རྦ་ སྲུག་ཏེ་ ཁོང་རྒུན་ ཀོན་འཇོག་རྒེ་ ཆེད་པེ་ཕི་ པོར་ཧན་འབོ་ ལྟོན་།”

12 ཏེ་ནི་ ལོབ་ཀྲུག་ ཅུག་ཉི་རྦོ་ རྐྱོད་ཏེ་ མི་རྒུན་ལ་ རྡིག་པ་ ཕྃ་རྡེ་ ཀོན་འཇོག་རྒེ་ ཆོག་ལ་ སེམ་འགྱུར་ཤེ་ལ་ ཆོའེ་ཤེད་། 13 ཁོང་རྒུ་ནི་ རྡུད་ མང་པོ་ ཕིང་འདེ་ ཟུར་མོ་ ཡོང་ཀན་ མང་པོ་ཞིག་ལ་ མར་ ཧུའི་རྡེ་ ཕན་ཅུག་།

ཁྲུའི་སལ་ཧན་ ཡོ་ཧཱ་ནན་ ཀྲོྃ་།

14 ཡི་ཤུའི་ ཚན་ མིང་ཅེན་ འགྱུར་ཤེའོ་ རྒྱ་སྤོ་ ཧེ་རོད་འདེ་ ཁོང་ངེ་ ཧོར་ལ་ ཚོར་། ཁ་ཅིག་རྒེ་ ཟེ་རེ་ཡོད་པེན་, “ཁྲུའི་སལ་ཧན་ ཡོ་ཧཱ་ནན་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཅེ་ཀ་ནི་ ཁོང་ངེ་ ཛེད་པ་ ལྟན་ཅེ་ ཁྱུད་ ཡོད་ཏེ་ ནོག་།” 15 ཞེན་རྒུ་ནི་ ཟེར་, “ཁོང་ནི་ ལུང་རྟོན་པ་ ཨེ་ལི་ཡཱ་ ནོག་།” ཡང་ ཞེན་རྒུ་ནི་, “ངུལ་མེ་ ལུང་རྟོན་པ་ ཙོག་སེ་ ཁོང་ ལུང་རྟོན་པ་ཞིག་ ནོག་།”

16 ཏོ་རྒུན་ ཚོར་རེ་རྡང་, ཧེ་རོད་འདེ་ ཟེར་, “ངེ་ འགོ་ ཅེད་ཅུག་ཀ་ནེ་ ཡོ་ཧཱ་ནན་, ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེ་རྡེ་ནོག་།”

17 ཧེ་རོ་འདེ་ ཡོ་ཧཱ་ནན་ ཟུམ་འདེ་ ལྕ་རྟག་ལ་ རྡམ་འདེ་ ཙོན་ཁང་ལ་ ཧར་ཤེ་ལ་ ཀཱ་ ཏྃ་རྡེ་ འིན་འབེན་། ཁོའེ་ ཏོ་ ཁོ་རང་ངེ་ ཨ་ཅོ་ ཕི་ལིབ་རྦེ་ ན་མ་ ཧེ་རོ་འདི་ཕི་ ཅོའེ་, ཧེ་རོད་འདེ་ ཁོ་ ཉམ་པོ་ ན་མ་ ཅོའེ་རྡེ་ འིན་འབེན་། 18 ཡོ་ཧཱ་ནན་ནེ་ ཧེ་རོད་ལ་ མོལ་ལེ་ཡོད་པེན་, “ཁྱེ་རང་ངེ་ ཨ་ཅོའེ་ ན་མ་ ཉམ་པོ་ ན་མ་ ཅོ་ཅེའོ་ ཀོན་འཇོག་རྒེ་ ཁྲིམ་མེ་ རྒྱཔ་འགལ་ ནོག་།” 19 ཧེ་རོ་འདི་ ཡོ་ཧཱ་ནན་ལ་ སོག་པོ་ ཚོར་རྡེ་ ཁོང་ སེད་ཅེ་ འདོད་པ་ ཅོའེ་, འིན་ན་ ཁོ་ ཅང་ ཅོ་ མ་ཉེན་། 20 ཅེ་ཟེར་ནི་ ཧེ་རོད་འདེ་ ཡོ་ཧཱ་ནན་ མི་ ཀྲང་པོ་ རྡང་ ཏམ་པོ་ འིན་ཀན་འབོ་ ཤེ་རྦེ་, སི་ཝ་ རྡང་ འཇིའི་རྡེ་ན་ ཁོང་ རྐྱོབ་ཏེ་ པོར་། ཡོ་ཧཱ་ནན་ནེ་ མོལ་ཧན་རྒུན་ ཉེན་ཟ་ནི་, རྒྱ་སྤོ་ ཧེ་རོད་ལ་ སེམ་མེ་ན་ མི་རྡེ་ཅེ་ ཡོང་ངེ་ན་ ཁོ་ ཡོ་ཧཱ་ནན་ནེ་ མོལ་ཧན་རྒུན་ ཉེན་ཅེ་ལ་ ཐེད་རྡེ་ཡོད་པེན་།

21 འིན་ན་ རྒྱ་སྤོ་ ཧེ་རོད་འདེ་ རྐྱེ་ཞག་རྒེ་ ཞག་ལ་ ཧེ་རོ་འདི་ ཧབ་ ཐོབ་། ཏེ་ ཞག་ལ་ ཧེ་རོད་འདེ་ ཁོ་རང་ངེ་ ལེ་མི་ འུ་རྐྱོང་, མག་མི་ སྤོན་འབོ་རྒུན་ འདང་, འགཱ་ལིལ་ལེ་ སྤོན་འབོ་རྒུན་ འགྲོན་ལ་ འབོའེ་རྡེ་ ཡོད་པེན་། 22 ཧེ་རོ་འདི་ པོ་མོ་ ཡོྃ་རྡེ་ སེ་ མ་ རྡེ་མོ་ ཏྃ་རྦེ་, ཧེ་རོད་ རྡང་ ཁོང་ངེ་ འགྲོན་པོ་རྒུན་ ཧོཔ་ ཐེད་། རྒྱ་སྤེ་ པོ་མོ་ལ་ ཟེར་, “ཁྱེ་རང་ལ་ འདོད་པ་ ཡོ་ཀན་འབོ་ ང་ ཤོད་, ཡང་ ངེ་ ཏོ་ ཁྱེ་རང་ལ་ ཏང་ངེན་།” 23 ཁོའེ་ ནའ་ ཁུར་རྡེ་ ཟེར་, “ཁྱེ་རང་ངེ་ ཅི་ཞིག་ ཏོང་ ཟེར་ན་, ངེ་ ཏང་ངེན་, ངེ་ རྒྱལ་སྲིད་རྡེ་ ཕེད་པོ་རྒོའེ་ན་ ཏང་ངེན་།”

24 ཁོ་ ཕི་ལོག་ལ་ སོང་འདེ་ ཁོ་རང་ངེ་ ཨ་མ་ འདྲི་, “ངེ་ ཅི་ཏོང་ ཟེར་།” ཨ་མེ་ ཁོ་ལ་ ཟེར་, “ཁྲུའི་སལ་ཧན་ ཡོ་ཧཱ་ནན་ནེ་ འགོ་ ཏོང་ ཟེར་།” 25 ཏེ་རྒ་མ་རྒ་ པོ་མོ་ རྒྱ་སྤོ་ས་ འགྱོ་སྤ་ སོང་འདེ་ ཟེར་, “ཏག་ས་རང་ ང་ ཁྲུའི་སལ་ཧན་ ཡོ་ཧཱ་ནན་ནེ་ འགོ་ ཐ་ལི་ཞིག་རྒེ་ཀ་ རྒོའེ་ཤེ་རག་།”

26 རྒྱ་སྤོ་ མ་སྲན་ཀྲེ་ ཚེར་ འིན་ན་ འགྲོན་པོ་རྒུ་ནི་ འདུན་ལ་ ནའ་ ཁུར་ཧན་འབེ་ ཅོའེ་རྡེ་, ཁོའེ་ པོ་མོ་ལ་ མན་ ཟེར་ མ་ཉེན་། 27 ཏེ་ནི་ ཁོའེ་ ཏེ་རྒ་མ་རྒ་ མི་ སེད་ཅེ་ ལེ་ཧ་ ཅོ་ཀ་ནེ་ མིའུ་ ཙོན་ཁང་ལ་ ཡོ་ཧཱ་ནན་ནེ་ འགོ་ ཁྱོང་ཅེ་ལ་ ལམ་ཅུག་། ཁོ་ སོང་འདེ་ ཙོན་ཁང་ངེ་ན་ ཡོ་ཧཱ་ནན་ནེ་ འགོ་ ཅེད་། 28 ཁོའེ་ ཁོང་ངེ་ འགོ་ ཐ་ལི་ཀ་ ཁྱོྃ་རྡེ་, པོ་མོ་ལ་ ཏྃ་, ཏེ་ནི་ ཁོའེ་ ཁོ་རང་ངེ་ ཨ་མ་ ཏྃ་། 29 ཏོ་ ཚོར་རེ་རྡང་, ཡོ་ཧཱ་ནན་ནེ་ ལོབ་ཀྲུག་རྒུན་ ཡོྃ་རྡེ་ ཁོང་ངེ་ སྤུར་རྦོ་ ཁྱེར་རྡེ་ སྤུར་ཧང་ངེ་ན་ པོར་།

ཡི་ཤུའི་ མི་ ལྟོང་ང་ ཟ་ཅེ་ སལ་ལེ་ ཛེད་།

30 ཧུ་ཚབ་རྒུན་ ཡི་ཤུ་ས་ ལོག་ཏེ་ ཡོྃ་, ཡང་ ཁོང་རྒུ་ནི་ ཅོའེ་ཧན་ འདང་ ལབ་ཀན་ ཚང་མེ་ ཧོར་ལ་ ཤེད་། 31 མི་ མང་པོ་ ཡི་ཤུ་ས་ ཡོང་ངེན་ འདང་ ཆེན་ འདེད་པེ་, ཡི་ཤུ་ རྡང་ ཁོང་ངེ་ ཧུ་ཚབ་རྒུན་ལ་ ངལ་ཚོའེ་རྡེ་ འདོན་ཏང་ འདོན་ཅེ་ ཏུའི་ མ་ཐོབ་། ཏེ་ཕི་ལ་ ཡི་ཤུའི་ མོལ་, “ཤོག་ཧེ་ ཨ་ཧོ་རང་ སུ་ལ་ མེད་སེ་ མལ་ཞི་ཀ་ སོང་འདེ་ ངལ་ཚོ་ ཚོའེན་།”

32 ཏེ་ནི་ ཁོང་རྒུན་ ཆུ་འགྲུལ་ཞིག་རྒེ་ན་ ཞོན་འདེ་ སུ་ལ་ མེད་སེ་ མལ་ཞིག་ལ་ རྐྱོད་། 33 འིན་ན་ མི་ མང་པོ་ཞིག་རྒེ་ ཁོང་རྒུན་ ཏེ་ཀ་ནི་ རྐྱོད་རྡེ་ལ་ ཐོང་ ཡང་ ངོ་ཤེ་། རྒྱམ་ཚོའེ་ ཐ་མ་ ཡོ་ཀ་ནེ་ ཀྲོང་ཁྱེར་ ཚང་མ་ནི་ མི་རྒུན་ རྒྱུག་རྒེན་ སོང་འདེ་ ཁོང་རྒུ་ནི་སང་ ངུལ་ལ་ ཏེ་ མལ་ལེ་ཀ་ ལེཔ་། 34 ཆུ་འགྲུལ་ནི་ པབ་ཏེ་ ཡི་ཤུའི་ མི་ཚོག་ མང་པོ་ ཟི་རྡེ་རྡང་, ཁོང་ལ་ ཁོང་རྒུ་ནི་ཀ་ ཉིང་ཞེ་ རྐྱེ་ ཛེད་ ཅེ་ཟེར་ནི་ ཁོང་རྒུན་ ལུག་ཟི་ མེ་ཀ་ནེ་ ལུག་ ཙོག་སེ་ ཡོད་པེན་། ཡང་ ཁོང་ངེ་ ཁོང་རྒུན་ལ་ ལབ་ཞ་ མང་པོ་ སལ་ཅེ་ འགོ་ཟུག་།

35 ཉི་མ་ རྒེ་རྒེ་ལ་ ཡི་ཤུའི་ ལོབ་ཀྲུག་རྒུན་ ཁོང་ས་ ཡོྃ་རྡེ་ ཟེར་, “ཨ་ཧོ་རྒུན་ ཅང་ མེད་སེ་ རི་ལྟོང་ངེ་ན་ ནོག་ ཡང་ ནམ་ཅུ་རུ་ཀྱི་ འདུག་། 36 ཉེ་ཁོར་རེ་ ས་ཅ་ རྡང་ འགམ་ཡུལ་རྒུན་ལ་ སོང་འདེ་ ཁོ་རང་རྒུ་ནི་ཕི་ ཁར་ཞི་ ཉོ་ཅེ་ལ་ མི་ཚོག་པོ་ ལམ་ཅུག་རྒེ་ ཛེད་།”

37 འིན་ན་ ཡི་ཤུའི་ མོལ་, “ཁྱི་ཞི་ ཁོང་རྒུན་ལ་ ཟ་ཅེ་ ཏོང་།”

ཁོང་རྒུ་ནི་ ཁོང་ལ་ འདྲི་, “འི་ མི་ཚང་མ་ ཁར་ཞི་ ཏང་ཅེ་ཕི་ ལྡ་ རྒྱེད་རྡེ་ ལ་ཆེ་ འདྲན་འདྲེ་ མུལ་ རྒོའེ་རྡོག་། ང་ཞ་ སོང་འདེ་ ཏེ་ཟམ་ཞིག་རྒེ་ མུལ་ རྐྱག་ཏེ་ ཁོང་རྒུན་ལ་ ཁར་ཞི་ ཟ་ཅེ་ ཉོ་?”

38 ཁོང་ངེ་ འདྲི་ ཛེད་, “ཁྱི་ཞི་ ལག་ལ་ ཏི་རྒིར་ ཙམ་ ཡོད་? སོང་འདེ་ ལྟོའེ་།”

ཁོང་རྒུན་ སོང་འདེ་ ལྟོའེ་ ཡང་ ཟེར་, “ཏི་རྒིར་ ང་ རྡང་ ཉ་ ཉི་ འདུག་ལེ་།”

39 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ མི་རྒུན་ པོ་ཙོ་ པོ་ཙོ་ ཅོའེ་རྡེ་ ས་ ངོན་པེ་ཀ་ འདེད་ཅུག་ཅེ་ཕི་ མོལ་། 40 མི་རྒུན་ ངཔ་ཅུ་ རྡང་ རྒྱ་ པོ་ཙོ་ ཅོའེ་རྡེ་ ཐང་ཀེ་ཀ་ འདེད་།

41 ཡི་ཤུའི་ ཏི་རྒིར་ ང་ རྡང་ ཉ་ ཉི་ ཆག་ལ་ ནམ་ ཡང་ ནམ་ཀ་ ཟི་རྡེ་ ཀོན་འཇོག་ལ་ ཐུག་ཞེ་ཆེ་ ཞུའི་, ཏི་རྒིར་ ཅག་ཏེ་ མི་ཚོག་ལ་ རྒོ་ཅེ་ཕི་ ལོབ་ཀྲུག་རྒུན་ལ་ སལ་ལེ་ ཛེད་། ཏེ་རྒ་ ཙོག་སེ་ ཁོང་ངེ་ ཉ་རྦོ་ རྒོའེ་རྡེ་ ཁོང་ ཚང་མ་ལ་ སལ་ལེ་ ཛེད་། 42 ཁོང་ ཚང་མ་ འགྲྃ་འགྲྃ་ ཟོའེ་། 43 ཡང་ ལོབ་ཀྲུག་རྒུ་ནི་ ཏི་རྒིར་ རྡང་ ཉ་ ལག་ལུའི་རྒུན་ རྡུའི་རྦེ་ ཙེ་སྤོ་ ཅུག་ཉི་ ཀང་། 44 ཏི་རྒིར་ རྡང་ ཉ་ ཟ་ཀན་རྒུ་ནི་ ཕྲོ་ ལྡན་ཀ་ནེ་ པུ་ཙ་ ལྟོང་ང་ ཡོད་པེན་།

ཡི་ཤུའི་ ཆུའི་ཀ་ ཞཔ་འགྲུལ་ ཛེད་།

45 ཏེ་རྒ་མ་རྒ་ ཙོབོ་ ཡི་ཤུའི་ མི་ཚོག་པོ་ ལོག་ཏེ་ ལམ་ཅུག་རྒེ་ ཛེད་ཟ་ནི་, ཁོང་ངེ་ ལོབ་ཀྲུག་རྒུན་ ཁོ་རང་ངེ་སང་ ངུལ་ལ་ ཆུ་འགྲུལ་ལེ་ན་ ཚོའེ་ ཕར་ཧ་ ཆོག་ལ་ འབེད་སེ་འདཱེ་ ཀྲོང་ཁྱེར་ལ་ ལམ་ཅུག་རྒེ་ ཛེད་། 46 མི་ཚོག་ སོང་ཚར་རྡེ་ ལྟིང་ནི་ ཁོང་ རི་ཀ་ མོ་ལམ་ ཞུ་ལ་ རྐྱོད་།

47 ནམ་ཅུ་རུ་རྒེ་རྡང་ ལོབ་ཀྲུག་རྒུན་ ཆུ་འགྲུལ་ལེ་ན་ ཚོའེ་ རྐྱིལ་ལ་, ཡང་ ཡི་ཤུ་ རི་ཀ་ ཅིག་པོ་ ཡོད་པེན་། 48 འདུན་ནི་ ལུང་སྤོ་ ཀྲག་པོ་ ཡོྃ་རྦེ་ ཁོང་རྒུན་ལ་ ཆུ་འགྲུལ་ སྲུལ་ཅེ་ལ་ ནག་ མང་པོ་ ཐོང་ངེན་ ཡོ་ཀན་འབོ་ ཡི་ཤུའི་ ཟིའི་། ཧ་ལམ་ ང་ཏོག་ ཆུ་ཙོད་ སུམ་པ་ཞིག་རྒེ་ཀ་ ཡི་ཤུ་ ཚོའེ་ཀ་ནི་ ཞཔ་འགྲུལ་ལ་ ཁོང་རྒུ་ནི་ ཆོག་ལ་ རྐྱོད་, ཡང་ ཁོང་རྒུ་ནི་ ལྡོ་ནི་ ཐལ་རྡེ་ རྐྱོད་ཅེ་ ཡོད་པེ་, 49 ཁོང་རྒུ་ནི་ ཡི་ཤུ་ ཚོའེ་ཀ་ནི་ ཞཔ་འགྲུལ་ལ་ རྐྱོད་རྡེ་ ཐོང་ངེ་རྡང་, ལན་འདྲེ་ ནོག་ སམ་འདེ་ ཀུ་ཅུ་ ཏྃ་། 50 ཡི་ཤུ་ ཐོང་ངེ་རྡང་, ཁོང་ ཚང་མ་ ཧོཔ་ འཇིའི་། ཏེ་རྒ་མ་རྒ་ ཡི་ཤུའི་ ཁོང་རྒུན་ལ་ མོལ་, “འཇིའི་ མ་འཇིའི་ ང་ འིན་, ཧམ་བ་ ཅོའེ་།” 51 ཏེ་ནི་ ཡི་ཤུ་ ཆུ་འགྲུལ་ལེ་ན་ ཞོན་ནེ་ ཛེད་, ཡང་ ལུང་སྤོ་ ཆེད་། ཁོང་ ཚང་མ་ ལྡུ་མེ་ ཧ་ལེ་། 52 ཁོང་རྒུན་ལ་ ཡི་ཤུའི་ ཏི་རྒིར་ ཉམ་པོ་ ཛེད་པ་ ཛེད་ཀན་འབོ་ ཐོང་འབེ་ ཁོང་ སུ་ ཞུ་རྡེ་ འིན་ཀན་འབོ་ ཏ་རུང་ང་ ཧ་མ་ཀོ་, ཁོང་ངེ་ ཉིང་རྒུན་ མ་ ཀྱོང་པོ་ ཡོད་པེན་།

53 ཁོང་རྒུན་ ཚོའེ་ འ་ངོ་ ཆོག་ལ་ རྐྱོད་ ཡང་ ཆུའི་ ཐ་མ་ འགེ་ནེ་ས་རེད་རྡེ་ ཡུལ་ཞོང་ལ་ ལེབ་རྦེ་རྡང་ ཆུ་འགྲུལ་འབོ་ རྡམ་། 54 ཆུ་འགྲུལ་ནི་ ཕི་ལོག་ལ་ འབིང་ངེ་རྡང་, མི་རྒུ་ནི་ ཡི་ཤུ་ འིན་ཀན་འབོ་ ངོ་ཤེ་། 55 ཁོང་རྒུན་ ཡུལ་ཞོང་ སོན་ཏེ་ནི་ རྒྱུག་རྒེན་ སོང་འདེ་ ཟུར་མོ་ ཡོ་ཀན་རྒུན་ མལ་སེ་ཀ་ ཁུར་རྡེ་ ཡི་ཤུ་ ཞུ་རྡེ་ འདེད་ ཟེར་སེ་ མལ་ལེ་ཀ་ ཁྱོྃ་། 56 ཁོང་ ཀྲོང་ཁྱེར་, རྒྱལ་ས་ ཡང་ན་ འགམ་ཡུལ་ ཀ་རུ་ རྐྱོད་ན་ མི་རྒུ་ནི་ ཟུར་མོ་ ཡོ་ཀན་རྒུན་, ཁྲོམ་མེ་ན་ ཕི་ལོག་ལ་ ཕིང་འདེ་ ཁྱོྃ་། ཁོང་རྒུ་ནི་ ཟུར་མོ་ ཡོ་ཀན་རྒུན་ལ་ ཡི་ཤུའི་ ནམ་ཟེ་ ཀྲུ་ཞིག་ལ་ ལག་པ་ སེ་ཅུག་རྒེ་ ཛེད་ཅེ་ལ་ འཇུ་འཇུ་ ཟེ་རེན་ ཞུ་ཝ་ པུལ་, ཡང་ ཁོང་ངེ་ ནམ་ཟ་ ལག་པ་ ཐུག་ཀན་ ཚང་མ་ ཕན་།