མར་ཀུ་ 5

ཡི་ཤུའི་ རྡུད་ ཞུ་ཧ་ནེ་ མི་ཞིག་ ཕན་ཅུག་རྒེ་ ཛེད་།

ཡི་ཤུ་ ཏང་ཁོང་རྒུན་ ཚོའེ་ ཕར་ཧ་, འགཱ་འདཱ་རཱེ་ ཡུལ་ཞོང་ལ་ རྐྱོད་། 2 ཡི་ཤུ་ ཆུ་འགྲུལ་ནི་ ཕི་ཏ་ འབིང་ངེ་ ཛེ་རྡེ་རྡང་, རྡུད་ ཞུ་ཧན་ ཞིག་ ཁོང་ འཇལ་ལེ་ལ་ རོམ་ཀང་ངེ་ མལ་ནི་ འབིང་འདེ་ ཡོྃ་། 3 ཁོ་ རོམ་ཀང་རྒུ་ནི་ན་ འདེ་ཡོད་པེན་, སུ་ཞིག་རྒེ་ ཁོ་ རྡམ་འདེ་ པོར་ མ་ཉེན་ནེ་ འིན་འབེན་, ལྕ་རྟག་ ཉམ་པོ་། 4 ལེན་ མང་པོ་ཞིག་ ཁོའེ་ ཧང་ལག་རྒུན་ ལྕ་རྟག་ ཉམ་པོ་ རྡམ་འདེ་ པོར་ན་ ཁོའེ་ ལྕ་རྟག་ ཅེད་ཏེ་ ཕྃ་, སུ་ཞི་ལ་ ཁོ་ རྡམ་འདེ་ པོར་ཤེ་ ཤེད་ མེད་པེན་། 5 ཚེན་ཉིན་ མེད་རྡེ་ ཁོ་ རི་ རྡང་ རོམ་ཀང་རྒུ་ནི་ ཕྲོ་ ཁོར་རེན་, ཀུ་ཅུ་ ཏང་ངེན་, རྡོ་ ནོམ་པོ་ ཉམ་པོ་ རང་ངེ་ ཟུྃ་སྤེ་ ཤ་རྒུན་ ཅེད་རྡེན་ འདེ་ཡོད་པེན་།

6 ཁོའེ་ ཐག་རིང་ནི་ ཡི་ཤུ་ འཇལ་ལེ་རྡང་, རྒྱུག་ཏེ་ ཁོང་ངེ་ འདུན་ལ་ ཁོ་རང་ངེ་ པིག་ཛུམ་ རྒྱབ་། 7 ཁོའེ་ན་ ཞུ་ཧ་ནེ་ རྡུད་པེ་ ཀུ་ཅུ་ ཤེད་ཅེན་ ཏྃ་རྡེ་ ཟེར་, “ཡི་ཤུ་ ཀོན་འཇོག་ ཀུན་ཝང་ངེ་ སྲེ་ ཉེ་རང་ ངེ་ ལེ་ཧེ་ན་ ཅེ་ འདྲེའེ་རྡེ་ཡོད་? ང་ ནག་ མི་ལྟན་ཅེ་ལ་, ཀོན་འཇོག་རྒེ་ ཚན་ནེ་ཀ་ ནའ་ ཁུར་རེ་ ཛེད་།” 8 ཅེ་ཟེར་ནི་ ཡི་ཤུའི་ ཁོ་ལ་, “རྡུད་, ཁྱེ་རང་ འི་ མི་རྦེ་ ནང་ནི་ འབིང་འདེ་ ཤོག་” མོལ་ལེ་ ཛེ་རྡེ་ འིན་འབེན་།

9 ཏེ་ནི་ ཡི་ཤུའི་ ཁོ་ འདྲི་ ཛེད་, “ཁྱེ་རང་ངེ་ མིང་ ཅི་ འིན་?”

ཁོའེ་ ལན་ཏྃ་, “ངེ་ མིང་ལ་ རྡུད་ཚོག་ འིན་, ཅེ་ཟེར་ནི་ ང་ཞ་ མང་པོ་ཞིག་ འི་ མི་རྦེ་ན་ ལུའི་རྡེ་ ཡོད་།” 10 ཏེ་ནི་ ཁོའེ་ ཡི་ཤུ་ལ་ ཁོང་རྒུན་ འི་ ཡུལ་ཞོང་ནི་ ཐག་རིང་ལ་ མི་ཕིང་ཅེ་ལ་ འཇུ་ ཞུའི་ ཡང་ནི་ ཡང་ ཞུ་ཝ་ པུལ་།

11 རི་ ཉེ་མོ་ཞིག་རྒེ་ཀ་ ཕག་རྒེ་ ཏུམ་འབུ་ ཆོན་མོ་ཞིག་ ས་ ཟོའེན་ ཡོད་པེན་། 12 རྡུད་རྒུན་ནེ་ ཡི་ཤུ་ལ་ འཇུ་འཇུ་ ཞུའིན་ ཟེར་, “ང་ཞ་ འ་ ཕག་རྒུ་ནི་ཀ་ ཀལ་ལེ་ ཛེད་, ང་ཞ་ ཏོ་རྒུ་ནི་ཀ་ ཆ་ཅུག་རྒེ་ ཛེད་།”

13 ཡི་ཤུའི་ རྒོང་སྤ་ སལ་ལེ་ ཛེད་པེ་, རྡུད་རྒུན་ འབིང་འདེ་ ཕག་རྒུ་ནི་ན་ ཞུའུ་། ཏེ་ ཕག་རྒེ་ ཏུམ་འབུ་ ཧ་ལམ་ ལྟོང་ཉི་ ཟམ་, རི་ནི་ ཡོག་ལ་ རྒྱུག་རྒེན་ཏེ་ ཚོའེ་ན་ ཀྲུལ་ ཡང་ ཆུའི་ན་ ནུབ་ཏེ་ ཤི་།

14 ཕག་ཟི་རྒུན་ ཀྲོང་ཁྱེར་ རྡང་ ཉེ་ཁོར་རེ་ མལ་རྒུན་ལ་ རྒྱུག་རྒེན་འདང་ སོང་ ཡང་ ཆ་ཀན་ ཚང་མ་ ཤེད་, མི་རྒུན་ ཆ་ཀན་རྒུན་ ལྟ་ལ་ སོང་། 15 ཁོང་རྒུན་ ཡི་ཤུ་ས་ ལེབ་རྦེ་རྡང་, རྡུད་ཚོག་ ཞུ་ཧ་ནེ་ མི་རྦོ་, ཀོའེ་ལག་ ཀོན་འདེ་ ཉོ་ མ་ཉོ་ ཏེ་ཀ་ འདེད་ཏེ་ ཐོང་འབེ་ ཁོང་རྒུན་ འཇིའི་། 16 ཏེ་ ཚང་མ་ ཐོང་ཀན་རྒུ་ནི་ རྡུད་རྒུན་ ཞུ་ཧ་ནེ་ མི་ རྡང་ ཕག་རྒུན་ལ་ ཆ་ཀ་ནེ་ ཧོར་རྦེ་ མི་རྒུན་ལ་ ཞིབ་སལ་ ཅོའེ་རྡེ་ ཤེད་། 17 ཏེ་ནི་ མི་རྒུ་ནི་ ཡི་ཤུ་, ཁོང་རྒུ་ནི་ ཡུལ་ནི་ འབིང་འདེ་ རྐྱོད་ འཇུ་འཇུ་ ཟེར་།

18 ཡི་ཤུ་ ཆུ་འགྲུལ་ལེ་ན་ ཞོན་ནེ་ ཛེད་ཟ་ནི་ ངུལ་ལ་ རྡུད་རྒུན་ ཞུ་རྡེ་ ཡོ་ཀ་ནེ་ མི་རྦེ་ ཡི་ཤུ་, ཁོ་ ཁོང་ ཉམ་པོ་ ཡོང་ཅུག་རྒེ་ ཛེད་ཅེ་ལ་ འཇུ་འཇུ་ ཟེ་རེན་ ཞུ་ཝ་ པུལ་། 19 འིན་ན་ ཡི་ཤུའི་ ཁོ་ ཡོང་ མ་ཅུག་ ཡང་ མོལ་, “ཁང་པ་ ཁྱེ་རང་ངེ་ ནང་མི་རྒུན་ས་ སོང་འདེ་, ཙོབོ་ ཀོན་འཇོག་རྒེ་ ཁྱེ་རང་ངེ་ཕི་ ཛེད་ཀན་ ཚང་མ་ རྡང་ ཁྱེ་རང་ངེ་ཀ་ ཁོང་ངེ་ ཙམ་ཤིག་རྒེ་ ཉིང་ཞེ་ ལྟན་ནེ་ ཛེད་ཀན་འབོ་ ཤོད་།” 20 ཏེ་ནི་ ཁོ་ ཏེ་ཀ་ནི་ སོང་འདེ་ རྒྱལ་ས་ ཅུ་ ཡོ་ཀ་ནེ་ ཡུལ་ཞོང་ངེ་ན་ ཡི་ཤུའི་ ཁོ་ ཛེད་ཀན་ ཚང་མ་ ཤེད་, ཡང་ ཁོའེ་ ཤེད་ཀན་རྒུན་ ཚོར་རྡེ་ མི་རྒུན་ ཧ་ལེ་།

པོ་མོ་ ཆུང་ཙེ་ ཤི་ཀན་ འདང་ ཟུར་མོ་ ཡོང་ཧ་ནེ་ ན་ཆུང་ཞིག་།

21 ཡི་ཤུ་ ཡང་ ཆུ་འགྲུལ་ལེ་ན་ འགཱ་ལིལ་ལེ་ ཚོའེ་ འ་ངོ་ ཆོག་རྡེ་ ཕར་ཧ་ ལེབ་རྦེ་རྡང་, ཚོའེ་ ཐ་མ་ ཡོད་ཟ་ནི་ མི་ཚོག་ མང་པོ་ཞིག་ ཛོམ་འདེ་ ཁོང་ལ་ ཁོར་རྡེ་ འདུག་། 22 ཏེ་ནི་ ཡ་ཧུ་འདཱ་པེ་ འདུ་ཀང་ངེ་ འུ་རྐྱོང་ ཡ་ཨིར་ ཟེར་ཧན་འབོ་ ཏུ་རུ་ ཡོྃ་། ཡི་ཤུ་ འཇལ་ལེ་རྡང་, ཁོ་ ཁོང་ངེ་ ཞབ་རྦེ་ འདུན་ལ་ འགྱེལ་རྡེ་ 23 ཉིང་ནི་ འཇུ་འཇུ་ ཞུའིན་ ཟེར་, “ངེ་ པོ་མོ་ ཆུང་ཙ་རྦོ་ ཤི་ཀྱི་ འདུག་། འཇུ་འཇུ་ རྐྱོད་ཏེ་ ཉེ་རང་ངེ་ ཆག་ ཁོའེ་ཀ་ པོ་རེ་ ཛེད་ནི་ ཁོ་ ཕན་འདེ་ སོན་ནེན་།”

24 ཡི་ཤུ་ ཁོ་ ཉམ་པོ་ རྐྱོད་རྡེ་ ཛེད་། མི་ཚོག་ མང་པོ་, ཁོང་ངེ་ ལྟིང་འགྲྃ་ནི་ ཡོྃ་རྡེ་ ཁོང་ལ་ ནེན་འདེ་ ཁྱོྃ་། 25 པུད་ཀ་ནེ་ ལོ་ ཅུག་ཉི་ནི་ཕ་ལ་ ཏུའི་རྒྱུན་ ཟུྃ་སྤོ་ ཞིག་ཅེ་ ཟུར་མོ་ ཡོང་ཀ་ནེ་ པོ་མོ་ཞིག་ མི་ཚོག་རྒེ་ ཕྲོ་ ཡོད་པེན་། 26 ཨམ་ཅི་རྒུ་ནི་ ལྟ་ཏོག་རྒེ་ན་ ནག་ མང་པོ་ ཐོང་འདེ་ ཁོ་རང་ངེ་ མུལ་ ཚང་མ་ རྐྱག་ཏེ་, ཁོ་ རྒྱལ་ལེ་ ཆ་ཅེ་སང་ མང་ངེ་ ཐུ་ སོང་འདེ་ ཡོད་པེན་།

27 ཁོ་ ཡི་ཤུའི་ ཧོར་ལ་ ཚོར་རྦེ་, མི་ཚོག་རྒེ་ན་ ཁོང་ངེ་ རྒྱབ་ནི་ ཡོྃ་རྡེ་ ཁོང་ངེ་ ནམ་ཟ་ལ་ ལག་པ་ ཐུག་། 28 ཅེ་ཟེར་ནི་ ཁོའེ་ ཁོ་རང་ངེ་ སེམ་མེ་ན་ སམ་, “ཀལ་ཏེ་ ཁོང་ངེ་ ནམ་ཟ་ ལག་པ་ ཐུག་ནི་ ངེ་ ཟུར་མོ་ རྒྱལ་ལེ་ནོག་།” 29 ཏེ་རྒ་མ་རྒ་ ཁྲག་པོ་ ཆེད་ཏེ་ སོག་པོ་ ཟུར་མོ་ནི་ ཕན་ཀན་འབོ་ ཁོ་ རྒྱུའི་སོང་།

30 ཏེ་རྒ་ ཏུའི་ལ་, ཁོ་རང་ངེ་ ནང་ནི་ ཕན་ཅུག་ཀ་ནེ་ ཤུག་ འབིང་འདེ་ ཆ་ཀན་འབོ་ ཡི་ཤུའི་ ཁྱེན་། ཁོང་ངེ་ ཁར་ཁོར་ འགྱུར་རེན་ མི་ཚོག་ལ་ ཟི་རྡེ་ འདྲི་, “སུའི་ ངེ་ ཀོའེ་ལག་ལ་ ལག་པ་ ཐུག་པེན་?”

31 ཁོང་ངེ་ ལོབ་ཀྲུག་རྒུ་ནི་ ཁོང་ལ་ ལེན་སལ་, “མི་ཚོག་རྒེ་ ནེ་ནེན་ ཕུ་ལེན་ ཁྱོང་ཅེ་འབོ་ ཉེ་རང་ངེ་ ཟིའི་རྡེ་ནོག་, ཏེ་ནི་ ཉེ་རང་ངེ་ སུའི་ ང་ ལག་པ་ ཐུག་ མོལ་རྡེ་ ཅེ་ འདྲི་ ཛེ་རྡེ་ཡོད་?”

32 འིན་ན་ ལག་པ་ ཐུག་ཀན་འབོ་ལ་ ཟིའི་ཤེ་ལ་ ཁོང་ངེ་ ཁར་ཁོར་ལ་ ཟི་རྡེན་ ཞུའུ་། 33 ཏེ་ནི་ པོ་མོ་རྦེ་ ཁོ་རང་ལ་ སོང་ཀན་རྒུན་ རྒྱུའི་ཡོད་པེ་, འཇི་རྡེན་ འདར་རེན་ ཡི་ཤུའི་ འདུན་ལ་ ཡོྃ་རྡེ་ ཁོང་ངེ་ ཞབ་རྦེ་ཀ་ འགྱེལ་ ཡང་ ཁོང་ལ་ ཅི་ཚང་མ་ ཀྲང་པོ་ ཤེད་། 34 ཡི་ཤུའི་ ཁོ་ མོལ་, “པོ་མོ་ ཁྱེ་རང་ངེ་ ཏེཏ་པེ་ ཁྱེ་རང་ ཕན་ཅུག་ཏེ་ འིན་། ཞི་རྡེ་ ཉམ་པོ་ སོང་, ཁྱེ་རང་ངེ་ རྡུ་ངལ་རྦོ་ མེ་ཀན་ སོང་འདེ་ ནོག་།”

35 ཁོང་ངེ་ ཞལ་ཏ་ ས་ལེན་ ཡོད་ཟ་ནི་, འདུ་ཀང་ངེ་ འུ་རྐྱོང་ ཡ་ཨིར་རེ་ ཁང་པ་ནི་ མི་ ཁ་ཅིག་ ཡོྃ་རྡེ་ ཁོ་ ཟེར་, “ཉེ་རང་ངེ་ པོ་མོ་རྦོ་ ཤི་, ཏ་ ལོབ་རྦོན་ལེ་ འོབ་རྒྱལ་ ལྟན་ནེ་ མ་ཛེད་།”

36 འིན་ན་ ཡི་ཤུའི་ ཁོང་རྒུ་ནི་ ཟེར་ཧན་འབོ་ལ་ ནྃ་ མ་སལ་ལེ་ ཡ་ཨིར་ལ་ མོལ་, “འཇིའི་ མ་འཇིའི་། ཏེཏ་པ་ རང་ ཅོའེ་།”

37 ཏེ་ནི་ ཡི་ཤུའི་ པི་ཏྲར་, ཡ་ཀུབ་ ཏང་, ཁོའེ་ ནོ་ ཡོ་ཧཱ་ནན་ མ་ཐེ་ལ་ ཞེན་སུ་ཞིག་ལ་ ཁོང་ ཉམ་པོ་ ཡོང་ཅུག་རྒེ་ མ་ཛེད་། 38 ཁོང་རྒུན་ འདུ་ཀང་ངེ་ འུ་རྐྱོང་ངེ་ ཁང་པ་ ལེབ་རྒྱ་ལ་, ཀུ་ཅུ་ ཏང་ངེན་, ངུའིན་ མི་ མང་པོ་ཞིག་རྒེ་ ཧི་ལིང་ ཏང་ངེ་ ཡི་ཤུའི་ ཟིའི་། 39 ཁོང་ ནང་ཀུ་ལ་ རྐྱོད་ཏེ་, “ཅི་ཕི་ ངུའིན་ ཡང་ ཧི་ལིང་ ཏང་ངེ་ཡོད་? ཕྲུ་རྒུ་ མ་ཤི་ལ་ ཉིད་ལོག་ཏེ་ འིན་།” མོལ་རྦེ་ 40 ཁོང་རྒུ་ནི་ ཧབ་རྒོད་ ཏྃ་།

ཡི་ཤུའི་ ཁོང་ ཚང་མ་ ཁང་པ་ནི་ ཕི་ལོག་ལ་ ཕིང་འདེ་ པོ་མེ་ ཕ་མ་ རྡང་, ཁོང་རང་ངེ་ ལོབ་ཀྲུག་ སུམ་ཀ་ ཁྲིད་ཏེ་ པོ་མོ་ འདེད་སེ་ ནང་ལ་ རྐྱོད་། 41 ཁོང་ངེ་ པོ་མེ་ ལག་པ་ ཐམ་མེ་ ཛེད་ཏེ་ ཁོ་ མོལ་, “ཏ་ལི་ཐ་ ཀུ་མི་” ཀ་རྦེ་ ཏོན་ཏག་པོ་ “པོ་མོ་ ཆུང་ཙེ་ ལོྃ་” ཟེ་རེ་ནོག་། 42 ཏེ་རྒ་མ་རྒ་ ལོ་ ཅུ་ཉི་ ཆ་ཀ་ནེ་ པོ་མོ་ ཀོའག་ ལྃ་རྡེ་ འགྲུལ་། ཡུ་ ཐོང་འདེ་ ཁོང་རྒུན་ མ་སྲན་ཀྲེ་ ཧ་ལེ་། 43 སོང་ཀན་འབོ་ སུ་ལ་ མི་ཤེད་ཅེ་ལ་ ཡི་ཤུའི་ ཁོང་རྒུན་ལ་ ཀཱ་ སལ་, ཡང་ ཁོང་རྒུན་ལ་ པོ་མོ་རྦོ་ལ་ ཅི་ཏོང་ཞིག་ ཟ་ ཏང་ཅེ་ལ་ མོལ་།