མར་ཀུ་ 4

ཞིང་འབད་པེ་ ས་ངོན་ ཏབ་ཀ་ནེ་ སྲུང་ངུ་།

ཡང་ ཡི་ཤུའི་ འགཱ་ལིལ་ལེ་ ཚོའེ་ ཐ་མ་ ལབ་ཞ་ སལ་ཅེ་ འགོ་ཟུག་ ཛེད་། ཁོང་ས་ མི་ཚོག་ མ་མང་པོ་ ཛོམ་རྡེ་ ཁོང་ ཆུ་འགྲུལ་ལེ་ན་ ཞོན་འདེ་ ཞུའུ་, ཡང་ མི་ ཚང་མ་ ཚོའེ་ ཐ་མ་ འདེད་། 2 ཁོང་ངེ་ མི་རྒུན་ལ་ སྲུང་ རྒྱུད་ཏེ་ ལབ་ཞ་ མང་པོ་ སལ་ལེ་ ཛེད་ཏེ་ མོལ་, 3 “ཉོན་ནྃ་, ཞིང་འབད་པ་ཞིག་ ས་ངོན་ ཏབ་རྦེ་ལ་ སོང་། 4 ཞིང་ལ་ ས་ངོན་ ཏབ་ཟ་ནི་ ཁ་ཅིག་ ལམ་མེ་ཀ་ ཀྲུལ་, ཅ་རྒུན་ ཡོྃ་རྡེ་ ཏོ་རྒུན་ ཟོའེ་། 5 ཁ་ཅིག་ ཐལ་རྦ་ མང་པོ་ མེད་སེ་ ཀྲག་རྒེ་ཀ་ ཀྲུལ་, ཐལ་རྦ་ མང་པོ་ མེད་ཅེ་ ས་ངོན་འབོ་ འགྱོ་སྤ་ རྐྱེ་། 6 འིན་ན་ ཉི་མ་ ཕོག་ཏེ་, ཞིང་ རྐྱེ་ཀན་འབོ་ ཚིག་, ཡང་ པ་ཀྲག་ ཐིལ་ལ་ མེད་ཅེ་ཀ་ནི་, ཏོ་ ཧམ་འདེ་ ཤི་། 7 ས་ངོན་ ཁ་ཅིག་ ཚེར་མེ་ ཕྲོ་ ཀྲུལ་, ཡང་ ཚེར་མ་ རྐྱེ་རྡེ་ ནེན་འབེ་, ཞིང་འབོ་ ལྡན་ མ་ཉེན་, ཏོ་རྦེ་ ཅོའེ་རྡེ་ རྟོན་ཏོག་ མ་རྐྱེ་། 8 ས་ངོན་ ཁ་ཅིག་ ས་ཀྱེཏ་ རྒྱལ་ལེ་ ཡོད་སེ་ ཞིང་ངེ་ཀ་ ཀྲུལ་རྦེ་, ཏོ་རྒུན་ རྐྱེ་རྡེ་ ལྡན་འདེ་ ལྟོན་ཏོག་ རྐྱེ་, ཀའོ་ ས་ངོན་ ཏབ་ཀན་འབོ་ སུམ་ཅུ་, ཀྲུག་ཅུ མ་ཚེད་ རྒྱ་ འགྱུར་རྡེ་ རྐྱེ་།” 9 ཏེ་ནི་ ཁོང་ངེ་ མོལ་, “ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”

10 ལྟིང་ནི་ ཡི་ཤུ་ ཅིག་པོ་ ཡོད་ཟ་ནི་, ཁོང་ལ་ ཧོར་རྡེ་ ཡོ་ཀ་ནེ་ ཁོང་ངེ་ ལོབ་ཀྲུག་ ཅུ་ཉི་ རྡང་ ཞེན་རྒུ་ནི་ ཁོང་ངེ་ ཤེད་རྡེ་ ཛེད་ཀ་ནེ་ སྲུང་ངུའི་ ཏོན་ཏག་པོ་ འདྲི་།

11 ཁོང་ངེ་ ལེན་སལ་ལེ་ ཛེད་, “ཀོན་འཇོག་རྒེ་ རྒྱལ་སྲིད་རྡེ་ སང་སྤེར་རྒུན་ ཧ་ཀོ་ཅེ་ ཧབ་ ཁྱི་ཞ་རྒུན་ལ་ སལ་ལེ་ ཛེད་ཏེ་ ནོག་། འིན་ན་ ཀོན་འཇོག་རྒེ་ རྒྱལ་སྲིད་རྡེ་ ཕི་ལོག་ལ་ ཡོ་ཀན་རྒུན་ལ་ ངེ་, ཅི་ཚང་མ་ སྲུང་ངུ་ རྒྱུད་ཏེ་ ཤེད་རྡེ་ཡོད་། 12 ཏམ་པེ་ སུང་རབ་རྦེ་ན་ འབྲི་ཀན་འབོ་ འདྲན་འདྲ་ ཀྲུབ་ཅེ་ལ་ ངེ་ ཏོ་རྦོ་ ཅོ་ཡོད་། ཏོ་རྦོ་,

‘ཁོང་རྒུ་ནི་ ངེ་ ཅོ་ཀན་རྒུན་ ཐོང་འདེ་ ང་ སུ་ འིན་ཀན་འབོ་ ངོ་ཤེ་རྡེ་ མི་འདུག་།

ཁོང་རྒུ་ནི་ ངེ་ ཤེད་ཀན་རྒུན་ ཚོར་ནྃ་ ཧ་ཀོ་ཉེ་ མི་འདུག་།

ཏེ་མ་ནི་ ཁོང་རྒུ་ནི་ སེམ་ ངེ་ ཆོག་ལ་ འགྱུར་རྡེ་

ཁོང་ངེ་ རྡིག་པ་རྒུན་ལ་ ཤག་སྤ་ ཐོབ་ཏེ་ ཡོད་ཁྲོ་།’”

13 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ཀལ་ཏེ་ ཁྱི་ཞ་རྒུན་ལ་ འི་ སྲུང་འབེ་ ཏོན་ཏག་པོ་ ཧ་མ་ཀོ་ནི་, ཏེ་ནི་ ཞེན་ཡང་ སྲུང་ ཚང་མེ་ ཏོན་ཏག་རྒུན་ ཀ་ཟུག་རྒེ་ ཧ་ཀོའེན་? 14 ཞིང་འབད་པེ་ ས་ངོན་ ཏབ་ཅེ་རྦོ་, ཀོན་འཇོག་རྒེ་ ཀའ་ ཤེད་ཅེ་རྦོ་ ནོག་། 15 ལམ་མེ་ཀ་ ས་ངོན་ ཀྲུལ་ཧན་རྒུན་འབོ་ ཀོན་འཇོག་རྒེ་ ཀའ་ ཚོར་ཧན་རྒུན་ ནོག་, འིན་ན་ རྡུད་ ཡོྃ་རྡེ་ ཁོང་རྒུ་ནི་ ཉིང་ངེ་ན་ ཏབ་ཀན་འབོ་ ཀོག་ཏེ་ ཁྱེ་རེ་ནོག་། 16 ཀྲག་རྒེ་ཀ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཚོར་རེ་རྡང་, ཐེད་པོ་ ཉམ་པོ་ ཏེཏ་པ་ ཅོ་ཀན་རྒུན་ ནོག་། 17 འིན་ན་ ཏོ་ལ་ པ་ཀྲག་ ཐིལ་ལ་ མེད་ཅེ་ཀ་ནི་ ཏུའི་ཡུན་རིང་ མི་ལུའི་། ཁོང་རྒུ་ནི་ ཀེའེ་ན་ ཏེཏ་པ་ ཅོ་ཅེ་རྦེ་ རྡུ་ངལ་ རྡང་ པར་རྡོ་ ཐོང་ངེ་རྡང་ ཏེཏ་པ་ ཕང་ངེན་། 18 ཚེར་མ་རྡེ་ ཕྲོ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཚོར་ཧན་རྒུན་ ནོག་, 19 འིན་ན་ མི་ཙེ་ ཚེར་ཧ་ ཡང་ ནོར་ རྡང་ འཇིག་རྟེན་ནེ་ ཞེན་ འདོད་པ་རྒུ་ནི་ ནེན་ཅེ་འབོ་ ཏོ་ལ་ འབྲེ་རྦུ་ མིན་ནེ་ མག་། 20 ས་ཀྱེཏ་ ཟང་པེ་ཀ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཉེན་འདེ་ ཏེཏ་པ་ ཅོ་ཀན་རྒུན་ ནོག་, ཁོང་རྒུན་ལ་ འབྲེ་རྦུ་, ས་ངོན་ ཏབ་ཀན་འབེ་སང་ སུམ་ཅུ་, ཀྲུག་ཅུ ཡང་ རྒྱ་ ལྡཔ་ཏེ་ མིན་ནེ་ནོག་།”

འོད་རྡེ་ སྲུང་ངུ་།

21 ཏེ་ནི་ ཡི་ཤུའི་ ཁོང་རྒུན་ལ་ འདྲི་ ཛེད་, “ཅི་ ཁྱི་ཞི་ རྐྱོང་ཙེ་ ཏུག་ཏེ་ ཟང་རྦུ་ ཡང་ ཅར་པ་ ཡོག་ལ་ པོར་རེན་ནེ་? འོད་པོ་ འོད་རྟག་སེ་ཀ་ མི་པོར་རེ་? 22 རྦེ་རྡེ་ པོར་ཧན་ ཚང་མ་ ཞག་ཅིག་ ངོན་ཅུག་རྒེ་ ཛེ་རྡེན་, ཡང་ ཀབ་ཏེ་ པོར་ཧན་ ཚང་མ་ ཕི་ལོག་ལ་ ཕིང་ངེ་ ཛེ་རྡེན་། 23 ཀལ་ཏེ་ ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”

24 ཁོང་ངེ་ མོལ་, “ཁྱི་ཞི་ ཚོར་ཧན་རྒུན་ལ་ ནྃ་རྟག་ རྒྱལ་ལེ་ ཏོང་ཧེ་། ཁྱི་ཞི་ ཀོལ་ཧ་ནེ་ ཚེད་པོ་ ཁྱི་ཞ་རྒུ་ནི་ཕི་ལ་ ཀོལ་ལེ་ ཛེ་རྡེན་, ཡང་ ཏེ་སང་ མང་ངེ་ ས་ལེན་། 25 ངེ་ ལབ་ཞ་ ཉེན་ཀན་རྒུན་ལ་ མང་ངེ་ ཧ་ཀོ་ཅུག་རྒེ་ ཛེ་རྡེན་, འིན་ན་ མ་ཉེན་ཀན་རྒུ་ནི་ ནང་ནི་ ཧ་ཀོ་རྡེ་ ཡོ་ཀན་འབོ་ལ་ ཁྱེར་རེ་ ཛེ་རྡེན་།”

ས་ངོན་ ལྡན་ནེན་ ཡོ་ཀ་ནེ་ སྲུང་ངུ་།

26 ཡི་ཤུའི་ འི་རྦོ་ལ་ མོལ་, “ཀོན་འཇོག་རྒེ་ རྒྱལ་སྲིད་པོ་, ས་ངོན་ ཞིང་ལ་ ཡོ་ཀ་ནེ་ ཞིང་འབད་པ་ཞིག་ ཙོག་སེ་ ནོག་། 27 ཁོ་ ཉིད་ ཏྃ་རྡེ་ ཡང་ ལྃ་རྡེ་ ཡོད་ཁྲོ་, ཚེན་ཉིན་ མེ་རྡེ་ ས་ངོན་འབོ་ རྐྱེ་རྡེ་ ལྡན་ནེ་ནོག་, འིན་ན་ ཏོ་ ཀ་ཟུག་རྒེ་ ལྡན་ནེན་, ཁོ་ལ་ ཅང་ རྒྱུའི་ མེ་ཀག་། 28 ས་ཀྱེཏ་ ཁོ་རང་ངེ་ ས་ངོན་ རྐྱེ་ཅུག་ཏེ་ ཞིང་ ལྡན་འདེ་ ཉེ་མེ་ འགོ་ འབིང་འདེ་ འགྲུ་ ཀང་ཅུག་རྒེ་ནོག་། 29 འགྲུ་ ཚོའེ་རྡེ་རྡང་, ཞིང་འབད་པ་འབོ་ ཡོྃ་རྡེ་ ཟོ་ར་ ཉམ་པོ་ ཏོ་ ངེ་ནོག་ ཅེ་ཟེར་ནི་, ངཔ་སེ་ ཏུའི་རྦོ་ ལེབ་ཏེ་ ནོག་།”

ཉུང་ཧར་རེ་ ས་ངོན་ནེ་ སྲུང་ངུ་།

30 ཡི་ཤུའི་ མོལ་, “ཀོན་འཇོག་རྒེ་ རྒྱལ་སྲིད་པོ་ ངེ་ ཁྱི་ཞ་ ཀ་ཟུག་ལ་ ཧ་ཀོ་ཅུག་? འི་རྦོ་ ཧ་ཀོ་ཅུག་ཅེ་ཕི་ ངེ་ ཀ་སྲུང་འབོ་ ཀོལ་? 31 ཏོ་, ཉུང་ཧར་རེ་ ས་ངོན་ ཚང་མེ་སང་ ཆུང་ཙེ་ ས་ཀྱེཏ་རྡེ་ན་ ཏབ་ཀན་འབོ་ ཙོག་སེ་ ནོག་། 32 འིན་ན་, ཏབ་རྦེ་རྡང་ ལྡན་འདེ་ ཚེའེ་ན་ ཚང་མེ་སང་ ཆོན་མོ་ ལྕང་མ་ འགྱུ་རེན་, ཡང་ ཡ་ལག་རྒུན་ འི་ཟམ་ ཆོན་མོ་ ཆེན་ ནམ་ཀེ་ ཅ་རྒུ་ནི་ ཏོ་ སིལ་ལེ་ན་ ཚ་ང་ ཅོའེན་།”

33 ཡི་ཤུའི་ འེ་རྒ་ ཙོག་སེ་ སྲུང་ མང་པོ་ ཀོལ་རྡེ་ མི་རྒུན་ལ་ ཧ་ཀོ་ཅེ་ ཁྱུད་ཚུག་པ་ ཀོན་འཇོག་རྒེ་ ཀའ་ ཤེད་རྡེ་ ཛེད་། 34 ཁོང་ངེ་ སྲུང་ངུ་ རྒྱུད་ཏེ་ མ་ཐེ་ལ་ ཅི་ ལབ་ཞ་ཞིག་ སལ་ལེ་ མེད་པེན་, འིན་ན་ ཁོང་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཅིག་པོ་ ཡོད་ཟ་ནི་, ཁོང་ངེ་ སྲུང་ངུ་ ཚང་མེ་ ཏོན་འབོ་ ཧ་ཀོ་ཅུག་རྒེ་ ཛེ་རྡེ་ཡོད་པེན་།

ཡི་ཤུའི་ ལུང་ཀྲག་ ཏང་ ཆུལ་རྦག་ མེ་ཀན་ ཛེད་།

35 ཕི་ཏོག་ ལེབ་རྦེ་རྡང་, ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ཨ་ཧོ་ ཚོའེ་ ཕར་ཧ་ ཆེན་།” 36 མི་ཚོག་པོ་ ཕྃ་རྡེ་ ཁོང་རྒུན་ ཡི་ཤུ་ ཉམ་པོ་ ཆུ་འགྲུལ་ན་ ཞོན་འདེ་ སོང་། ཞེན་ ཆུ་འགྲུལ་རྒུན་ལ་ ཁོང་ངེ་ རྒྱབ་ནི་ ཡོྃ་། 37 ཧུན་མེད་ལ་ ལུང་ཀྲག་ ཀྲག་པོ་ ཡོྃ་, ཡང་ ཆུལ་རྦག་ ཆུ་འགྲུལ་ལེ་ན་ ལེབ་ཏེ་ ཏོ་ ནུབ་ཀྱི་ སོང་།

38 ཡི་ཤུ་ ཆུ་འགྲུལ་ལེ་ འཇུག་ལ་ ཨུ་ཉེ་ཀ་ ཨུ་ པོར་རྡེ་ ཟིམ་འདེ་ ཡོད་པེན་། ལོབ་ཀྲུག་རྒུ་ནི་ ཁོང་ལ་ ཉིད་ཚེད་རྡེ་ ཛེད་ཏེ་ ཟེར་, “ལོབ་རྦོན་ལེ་, ང་ཞ་ ཆུའི་ན་ ནུབ་ཀྱི་ འདུག་, རྐྱོབ་རྦེ་ མི་ཛེ་རྡེ་?”

39 ཡི་ཤུ་ ཞྃ་རྡེ་ ལུང་སྤོ་ལ་ ཀབ་རྐྱོན་ སལ་རྡེ་ ཆུལ་རྦག་པོ་ལ་ མོལ་, “ཅེཔ་ཁ་རོག་, ཀུ་ཅུ་ མ་ཏང་།” ཏེ་ནི་ ལུང་ཀྲག་ མེ་ཀན་ སོང་འདེ་ ཚོའེ་ན་ ལྡུ་མེ་ ཞིའི་རྡེ་ སོང་། 40 ཏེ་ནི་ ཁོང་ངེ་ ལོབ་ཀྲུག་རྒུན་ལ་ འདྲི་ ཛེད་, “ཅེ་ འཇིའི་རྡེ་རག་? ཁྱི་ཞ་རྒུན་ལ་ ངེ་ཀ་ ཏ་རུང་ང་ ཏེཏ་པ་ མེད་རྡེ་ འིན་ནེ་?”

41 ལོབ་ཀྲུག་རྒུན་ སྲན་ཀྲེ་ འཇིའི་རྡེ་ ཅིག་ ཏང་ ཅིག་ལ་ འདྲི་, “ཁོང་ སུ་ ནོག་? ལུང་སྤོ་ རྡང་ ཆུལ་རྦག་རྒུ་ནི་ ཁོང་ངེ་ ཁ་ ཉེན་འདུག་།”