མར་ཀུའི་ འབྲི་ཛེད་ཀ་ནེ་ ནེ་ཚུལ་ ཟང་པོ་།
ཡོ་ཧཱ་ནན་ ཁྲུའི་སལ་ཧ་ནེ་ མི་རྒུན་ ཀྲལ་འགྲིག་ ཅོའོ་ ཛེད་།
1
ཀོན་འཇོག་རྒེ་ སྲེ་ ཡི་ཤུ་ མ་ཤི་ཀེ་ ཧོར་ལ་ ནེ་ཚུལ་ ཟང་པོ་ནི་ འི་ཟུག་ལ་ འགོ་ཟུག་རྒེན་། 2 ལུང་རྟོན་པ་a ཡེ་ཤ་ཡཱེ་ སྤེ་ཆེ་ན་ འབྲི་ ཛེད་ཀན་ ནང་ཞིན་ ཀོན་འཇོག་རྒེ་ མོལ་,“ལྟོའེ་, ཁྱེ་རང་ངེ་སང་ ངུལ་ལ་ ངེ་ ང་རང་ངེ་ ཁྲིན་ཁྱེར་ཧན་འབོ་ ཀ་ལེན་།
ཁོའེ་ ཁྱེ་རང་ངེ་ཕི་ ལམ་ ཀྲལ་འགྲིག་ ཅོའེན་།”
3 “ཁོའེ་ རི་ལྟོང་ངེ་ན་ ཀུ་ཅུ་ ཏང་ངེན་ མི་རྒུན་ལ་ ཟེར་རེན་,
‘ཙོབོ་ ཕེཔ་ཅེ་ལ་ ཀྲལ་འགྲིག་ ཅོའེ་།
ཡང་ ཁོང་ངེ་ ཕེབ་ལམ་འབོ་ ཀྲང་པོ་ ཅོའེ་།’”
4 ཁྲུའི་སལ་ཧན་ ཡོ་ཧཱ་ནན་ རྐྱོད་རྡེ་ རི་ལྟོང་ངེ་ན་ མི་རྒུན་ལ་ ཤག་སྤ་ ཐོབ་ཅེ་ཕི་ རྡིག་པ་ ཕྃ་རྡེ་ སེམ་འགྱུར་རྡེ་ ཁྲུའི་ནེན་ཅེ་ལ་ ཆོའེ་ཤེད་། 5 ཏེ་ནི་ ཡ་ཧུ་འདཱ་ རྡང་ ཡེ་རུ་ཤ་ལེམ་མེ་ རྒྱལ་སེ་ མི་ སོན་ཏེ་ ཡོ་ཧཱ་ནན་ས་ སོང་འདེ་, རང་རང་ངེ་ རྡིག་པ་ ཅོ་ཀན་རྒུ་ནི་ཕི་ ཀོན་འཇོག་ལ་ ཤག་སྤ་ ཞུའི་། ཡང་ ཡོ་ཧཱ་ནན་ནེ་ ཁོང་རྒུན་ལ་ ཡོར་འདཱན་ སྃ་སྤེ་ན་ ཁྲུའི་སལ་ལེ་ ཛེད་། 6 ཡོ་ཧཱ་ནན་ནེ་ ང་རྦོང་ངེ་ པལ་ལ་ ཐ་ཧ་ནེ་ ཀོའེ་ལག་ ཏང་, རྐྱེད་པེ་ ཀོ་ཝ་རྡེ་ རྐྱེ་ར་ ཅིང་འདེ་ཡོད་པེན་, ཡང་ ཅ་རྒེ་འབུ་ རྡང་ རི་ལྟོང་ངེ་ རང་སི་ ཟ་ཡོད་པེན་།
7 ཡོ་ཧཱ་ནན་ནེ་ ཁྱབ་ཀྲག་ ཅོའེ་, “ངེ་ ལྟིང་ནི་ རྐྱོད་ཅེ་ཅེན་འབོ་, ངེ་སང་ མང་ངེ་ ཝང་ཅེན་, ཡང་ ཞབ་ཤི་ ཙོག་སེ་ ང་ རྒུའི་རྡེ་ ཁོང་ངེ་ ཞཔ་ལམ་མེ་ རོ་རྦུད་ ཀྲོལ་ཤེ་ འོའེ་སྤ་ མེད་། 8 ངེ་ ཁྱི་ཞ་རྒུན་ལ་ ཆུ་ ཉམ་པོ་ ཁྲུའི་ ཏང་ངེ་ཡོད་། འིན་ན་ ཁོང་ངེ་, ཁྱི་ཞ་རྒུན་ལ་ ཏམ་པེ་ ཐུག་ཡིད་ ཉམ་པོ་ ཁྲུའི་ས་ལེན་།”
ཁྲུའི་སལ་ཧན་ ཡོ་ཧཱ་ནན་ནེ་ ཡི་ཤུ་ ཁྲུའི་སལ་།
9 འདི་ཞག་ལ་ ཡི་ཤུ་ འགཱ་ལིལ་ལེ་ ཡུལ་ཞོང་ནི་ ན་ཙ་རེད་ ཀྲོང་ཁྱེར་ལ་ རྐྱོད་, ཡང་ ཡོ་ཧཱ་ནན་ནེ་ ཁོང་ལ་ ཡོར་འདཱན་ནེ་ སྃ་སྤེ་ན་ ཁྲུའི་སལ་ལེ་ ཛེད་། 10 ཡི་ཤུ་ ཆུའི་ ནང་ནི་ འབིང་ཟ་ནི་, ཁོང་ངེ་ ནམ་ཀ་ པེ་རྡེ་ ཏམ་པེ་ ཐུག་ཡིད་ ཁོང་ངེ་ཀ་ ཕུར་རྒོན་ཞིག་རྒེ་ ཚུལ་ལ་ པབ་རྦེ་ ཟི་། 11 ཡང་ ནམ་ཀ་ནི་ སུང་ཧད་ཞིག་རྒེ་ མོལ་, “ཁྱེ་རང་ ངེ་ པུ་ཙ་ ཤེ་སྤའོ་ འིན་, ཁྱེ་རང་ ཉམ་པོ་ ང་ ཧོཔ་ ཐེད་པོ་ འིན་།”
རྡུད་རྡེ་ ཡི་ཤུ་ རྡིག་པེ་ན་ འགྱེལ་ཅུག་ཅེ་ཕི་ ཙོན་འགྲུའི་།
12 ཏེ་རྒ་མ་རྒ་ ཀོན་འཇོག་རྒེ་ ཐུག་ཡིད་རྡེ་ ཡི་ཤུ་ རི་ལྟོང་ངེ་ན་ ཁྱེར་རེ་ ཛེད་། 13 ཏུ་རུ་ ཞག་ ཞིབ་ཅུ་ཚུག་པ་ རྡུད་རྡེ་ ཡི་ཤུ་ རྡིག་པེ་ན་ འགྱེལ་ཤུག་ཅེ་ལ་ ཙོན་འགྲུའི་ ཅོའེ་། ཏེ་ཏུའི་ ཁོང་ རི་ སེམ་ཅེན་རྒུ་ནི་ ཕྲོ་ ཡོད་ཟ་ནི་, ཀོན་འཇོག་རྒེ་ ཕོ་ཉ་རྒུ་ནི་ ཁོང་ལ་ ཞབ་རྟོག་ ཞུ་ ཛེད་།
14 ཡོ་ཧཱ་ནན་ ཟུམ་འདེ་ ཙོན་ཁང་ངེ་ན་ ཧར་རྡེ་ ལྟིང་ནི་ ཡི་ཤུ་ འགཱ་ལིལ་ལེ་ ཡུལ་ཞོང་ངེ་ན་ རྐྱོད་རྡེ་ ཛེད་ཏེ་ ཀོན་འཇོག་རྒེ་ ནེ་ཚུལ་ ཟང་པོ་ ཤེད་རྡེ་ ཛེད་། 15 ཡི་ཤུའི་ མོལ་, “ཞལ་ཆེཏ་ ཛེད་ཀ་ནེ་ ཏུའི་རྦོ་ ལེབ་ཏེ་ ནོག་། ཀོན་འཇོག་རྒེ་ རྒྱལ་སྲིད་ ཉེ་མོ་ ནོག་། ཏོ་རྦེ་ཕི་ རྡིག་པ་ ཕྃ་རྡེ་ སེམ་འགྱུར་རྡེ་ ནེ་ཚུལ་ ཟང་པེ་ན་ ཏེཏ་པ་ ཅོའེ་།”
འགོ་མེ་ ལོབ་ཀྲུག་རྒུན་།
16 ཡི་ཤུ་ འགཱ་ལིལ་ལེ་ ཚོའེ་ ཐ་མ་ནི་ ཞཔ་འགྲུལ་ ཛེ་རྡེན་ ཡོད་ཏུའི་, ཁོང་ངེ་ ཤི་མོན་ འདང་ ཁོའེ་ ནོ་ ཨན་འགྲིརུ་ ཚོའེ་ན་ ཉ་འདོལ་ ཕང་ངེན་ ཟིའི་, ཅེ་ཟེར་ནི་ ཁོང་རྒུན་ ཉ་ ཟུམ་ཀན་ འིན་འབེན་། 17 ཡི་ཤུའི་ ཁོང་རྒུན་ལ་ མོལ་, “ངེ་ རྒྱབ་ནི་ ཡོྃ་རྡེ་ ངེ་ ལོབ་ཀྲུག་ འགྱུར་, ཏེ་ནི་ཕ་ལ་ ངེ་ ཁྱི་ཞ་རྒུན་ལ་ ཉེ་ ཚབ་ལ་ མི་རྒུན་ ཟུམ་ཅེ་ ལབ་རྦེན་།” 18 ཏེ་རྒ་མ་རྒ་ ཉ་འདོལ་ ཕྃ་རྡེ་ ཁོང་རྒུན་ ཡི་ཤུའི་ རྒྱབ་ནི་ འགྲྃ་།
19 ཏེ་ཀ་ནི་ ཙི་རྦིག་ ཐག་རིང་ལ་ རྐྱོད་རྡེ་རྡང་, ཡི་ཤུའི་ ཟེ་འབེ་འདེ་ པུ་ཙ་ ཡ་ཀུབ་ ཏང་ ཡོ་ཧཱ་ནན་ ཟིའི་། ཁོང་རྒུ་ནི་ ཆུ་འགྲུལ་ལེ་ན་ ཁོ་རང་རྒུ་ནི་ ཉ་འདོལ་ ཞིག་སོའེ་ ཅོ་ཡོད་པེན་། 20 ཏེ་རྒ་མ་རྒ་ ཡི་ཤུའི་ ཁོང་རྒུན་ལ་ འབོ་ ཛེད་, ཡང་ ཁོང་རྒུན་ ཁོ་རང་རྒུ་ནི་ ཨ་རྦ་ ཟེ་འབེ་འདེ་ ལ་པ་རྒུན་ ཉམ་པོ་ ཆུ་འགྲུལ་ན་ ཕྃ་རྡེ་ ཡི་ཤུའི་ རྒྱབ་ནི་ འགྲྃ་།
ཡི་ཤུའི་ འགོང་པོ་རྒུན་ ཕིང་ངེ་ ཛེད་།
21 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཀ་ཕར་ན་ཧུམ་ ཀྲོང་ཁྱེར་ལ་ རྐྱོད་། ངལ་ཚོའེ་ ཞག་པོ་ ལེབ་རྦེ་རྡང་, ཁོང་ ཡ་ཧུ་འདཱ་པེ་ འདུ་ཀང་ངེ་ན་ རྐྱོད་ཏེ་ ཆོའེ་ཤེད་ཅེ་ འགོ་ཟུག་། 22 མི་རྒུན་ ཁོང་ངེ་ ལབ་ཞ་རྒུ་ནི་ཀ་ ཧ་ལེ་, ཅེ་ཟེར་ནི་ ཁོང་ངེ་ ལབ་ཞ་རྒུན་ ཆོའེ་ཁྲིམ་ལ་ ཁེ་སྤ་རྒུན་ ཙོག་སེ་ མན་, ཝང་ཆ་ ཉམ་པོ་ སལ་ལེ་ཡོད་པེན་།
23 འདུ་ཀང་ངེ་ན་ འགོང་པོ་ ཞུ་རྡེ་ ཡོ་ཀ་ནེ་ མི་ཞིག་རྒེ་ ཧུན་ནེད་ལ་ ཀུ་ཅུ་ མང་པོ་ ཏང་ངེན་ ཟེར་། 24 “ན་ཙ་རེད་པ་ ཡི་ཤུ་, ཉེ་རང་ལ་ ང་ཞ་རྒུ་ནི་ ལེ་ཧེ་ན་ ཅེ་ འདྲེའེ་རྡེ་ཡོད་? ཉེ་རང་ ང་ཞ་རྒུན་ མེ་ཀན་ ཅོ་ལ་ རྐྱོད་ཏེ་ འིན་ནེ་? ཉེ་རང་ སུ་ ཞུ་རྡེ་ འིན་ཀན་འབོ་ ང་ རྒྱུའི་ཡོད་། ཉེ་རང་ ཀོན་འཇོག་རྒེ་ ཏམ་པའོ་ ཞུ་རྡེ་ནོག་།”
25 འིན་ན་ ཡི་ཤུའི་ ཁོ་ ཀབ་རྐྱོན་ ཛེད་ཏེ་ མོལ་, “ཅེཔ་ཁ་རོག་, ཁོའེ་ཀ་ནི་ འབིང་འདེ་ སོང་།” 26 ཏེ་རྒ་མ་རྒ་, འགོང་འབོ་རྦེ་ ཏེ་ མིའུ་ ཧོཔ་ སྲུག་, ཡང་ ཀུ་ཅུ་ ཏང་ངེན་ ཁོའེ་ ནང་ནི་ འབིང་འདེ་ སོང་།
27 མི་ཚང་མ་ མ་མང་པོ་ ཧ་ལེ་རྡེ་ ཅིག་ ཏང་ ཅིག་ལ་ འདྲི་, “འི་རྦོ་ ཀ་ཟུག་ ལབ་ཞ་ སོ་མ་ཞིག་ ནོག་? ཡུ་ལ་ ཏེ་ཟམ་ ཝང་ཞིག་ འདུག་། འགོང་པོ་རྒུ་ནི་ ཁོང་ངེ་ ཀཱ་ ཉེན་འདུག་།” 28 ཁོང་ངེ་ ཧོར་ལ་ ནེ་ཚུལ་རྦོ་ འགཱ་ལིལ་ལེ་ ཡུལ་ཞོང་ སོན་ཏེ་ན་ འགྱོ་སྤ་ ཕེལ་།
ཡི་ཤུའི་ མི་ མང་པོ་ ཕན་ཅུག་རྒེ་ ཛེད་།
29 ཡི་ཤུ་ ཡ་ཀུབ་ ཏང་ ཡོ་ཧཱ་ནན་རྒུན་ ཉམ་པོ་ ཡ་ཧུ་འདཱ་པེ་ འདུ་ཀང་ནི་ འབིང་འདེ་ ཁོང་ངེ་ ལོབ་ཀྲུག་ ཤི་མོན་ འདང་ ཁོའེ་ ནོ་ ཨན་འགྲིརུ་འི་ ཁང་པ་ རྐྱོད་། 30 ཁོང་རྒུ་ནི་ ཡི་ཤུ་ ཤི་མོན་ནེ་ ན་མེ་ ཨ་མ་ ཚེད་ ཡོྃ་རྡེ་ མལ་སེ་ན་ ཡོ་ཀན་འབེ་ ཧོར་ལ་ ཤེད་, 31 ཡི་ཤུ་ ཨ་མ་ས་ རྐྱོད་ཏེ་ ཁོའེ་ ལག་པ་ ཟུམ་རྡེ་ ཁོ་ ལང་ཅེ་ལ་ ཡ་ཏོ་ ཛེད་། ཏེ་ནི་ ཁོའེ་ ཚེད་པོ་ མེ་ཀན་ སོང་, ཡང་ ཁོའེ་ ཁོང་རྒུན་ལ་ ཞབ་རྟོག་ ཞུའི་།
32 ཏེ་རྒ་ ཕི་ཏོག་ ཉི་མ་ རྐྱོད་ ཚར་རྡེ་ ལྟིང་ནི་, མི་རྒུ་ནི་ ཟུར་མོ་ ཡོ་ཀན་ འདང་ རྡུད་ ཞུ་ཧན་ ཚང་མ་ ཡི་ཤུ་ས་ ཁྱོྃ་། 33 ཀྲོང་ཁྱེར་རེ་ མི་ སོན་ཏེ་ རྒོའེ་ འདུན་ལ་ ཛོམ་། 34 ཟུར་མོ་ ན་ཚོག་ ཡོང་ཀན་ མང་པོ་ ཡི་ཤུའི་ ཕན་ཅུག་རྒེ་ ཛེད་, ཡང་ རྡུད་ ཞུ་ཧན་ མང་པེ་ ནང་ནི་ རྡུད་ ཕིང་ངེ་ ཛེད་, འིན་ན་ ཁོང་ངེ་, རྡུད་རྒུན་ལ་ སྤེ་ར་ ཏང་ཅུག་རྒེ་ མ་ཛེད་, ཅེ་ཟེར་ནི་ ཏོ་རྒུ་ནི་ ཁོང་ སུ་ ཞུ་རྡེ་ འིན་ཀན་འབོ་ ཤེ་རྡེ་ཡོད་པེན་།
ཡི་ཤུའི་ འགཱ་ལིལ་ལེ་ ཡུལ་ཞོང་ངེ་ན་ ཆོའེ་ཤེད་རྡེ་ ཛེད་།
35 ཐོ་རེ་ཚུག་པོ་ ང་ཏོག་ ཟ་ར་ཟི་རེ་སང་ ངུལ་ལ་, ཡི་ཤུ་ ཞྃ་རྡེ་ སུ་ལ་ མེད་སེ་ མལ་ཞིག་ལ་ མོ་ལམ་ ཞུ་ལ་ རྐྱོད་། 36 ཤི་མོན་ འདང་ ཁོའེ་ ཁྲོ་པ་རྒུན་ ཁོང་ ཙལ་ལེ་ སོང་། 37 ཁོང་ ཐོབ་རྦེ་རྡང་ ཁོང་རྒུ་ནི་ ཟེར་, “ཚང་མེ་ ཉེ་རང་ ཙལ་རྡུག་།”
38 འིན་ན་ ཡི་ཤུའི་ ལེན་སལ་, “ཨ་ཧོ་རྒུན་ ཉེ་ཁོར་རེ་ ཞེན་ཡང་ ཀྲོང་ཁྱེར་རྒུན་ལ་ ཆེན་ ཡང་ ངེ་ ཁོང་རྒུན་ལ་ ཆོའེ་ཤེད་རྡེན་། ཏེ་རྒ་ རྒྱུ་ཚན་འབེ་ཕི་ ང་ ཡོྃ་རྡེ་ འིན་།” 39 ཏོ་རྦེ་ཕི་ ཁོང་ འགཱ་ལིལ་ལེ་ ཡུལ་ཞོང་ སོན་ཏེ་ ཡ་ཧུ་འདཱ་པེ་ འདུ་ཀང་རྒུ་ནི་ན་ ཆོའེ་ཤེད་རྡེན་, རྡུད་ ཞུ་ཧན་རྒུ་ནི་ ནང་ནི་ རྡུད་རྒུན་ ཕིང་ངེན་ རྐྱོད་།
ཡི་ཤུའི་ ཛེ་ནེད་ཅེན་ནེ་ མི་ཞིག་ ཕན་ཅུག་རྒེ་ ཛེད་།
40 ཛེ་ནེད་ཅེན་ནེ་ མི་ཞིག་ ཡི་ཤུའི་ འདུན་ལ་ ཡོྃ་ ཡང་ པིག་ཛུམ་ རྒྱབ་ཏེ་ འཇུ་འཇུ་ ཞུའིན་ ཟེར་, “ཀལ་ཏེ་ ཉེ་རང་ ཐུག་ཐེད་ནི་ ང་ རྒྱལ་ཅུག་ཏེ་ སང་མ་ ཛེད་ ཉེན་ནེ་ནོག་།”
41 ཉིང་ཞེ་ སོན་ཏེ་ ཡོད་ཅེའོ་, ཡི་ཤུའི་ ཆག་ རྐྱང་འདེ་ ཁོ་ ཐུག་ཅུག་རྒེ་ ཛེད་ཏེ་ མོལ་, “ང་ ཁྱེ་རང་ རྒྱལ་ཅུག་ཏེ་ སང་མ་ ཅོ་ལ་ ཐེད་རྡེ་རག་།” 42 ཏེ་རྒ་མ་རྒ་ ཏེ་མི་རྦེ་ ཟུྃ་སྤོ་ནི་ ཛེ་ནེད་པོ་ མེ་ཀན་ སོང་ ཡང་ མིའུ་ ཕན་། 43 ཡི་ཤུའི་ ཁོ་ ལོག་ཏེ་ ལམ་ཅུག་རྒེ་ ཛེད་ཟ་ནི་, སྤང་པུད་རྡེན་ མོལ་ལེ་ ཛེད་, 44 “སུ་ལ་ མ་ཤེད་, འིན་ན་ སོང་འདེ་ རང་ངེ་ ཟུྃ་སྤོ་ ལ་མ་ ལྟོན་ ཡང་ མོ་ཤེ་ ཀཱ་ སལ་ཧན་ ནང་ཞིན་ ཀོན་འཇོག་ལ་ ཆོད་པ་ པུལ་, ཏོ་ མི་རྒུན་ལ་ ཁྱེ་རང་ སང་མ་ ཆ་ཀ་ནེ་ སྤང་པོ་ འིན་།”
45 འིན་ན་ ཁོ་ སོང་འདེ་ ཁོ་ སོང་ཀན་རྒུན་ མི་ཚང་མ་ལ་ ཤེད་རྡེན་ ནེ་ཚུལ་རྦོ་ ཕེལ་, ཏོ་རྦེ་ ཅོའེ་རྡེ་ ཁོང་ མི་རྒུན་ལ་ ཐོང་ཅུག་ཏེ་ ཀ་ཟུག་ ཀྲོང་ཁྱེར་ཞིག་རྒེ་ ནང་ལ་ རྐྱོད་ མ་ཉེན་། ཁོང་ མི་ མེད་སེ་ མལ་ལེ་ན་ ཞུའུ་, ཏེ་ནི་ མི་རྒུན་ ཀང་ལུང་ས་ནི་ ཡི་ཤུ་ས་ ཡོྃ་།