Ibáꞌ cubi ne guidxilayú cubi
21
Udiꞌdi si nga biiya ti ibáꞌ cubi ne ti guidxilayú cubi,
purti ma binitilú ibáꞌ ni uyuu chiqué ne guidxilayú laaca,
ne ma gasti nisadóꞌ.
2 Biiya dxiꞌche Jerusalén cubi,
guidxi roꞌ sti Dios,
zeda yete de ibáꞌ de ra nuu Dios.
Zuchaahui casi ti gunaa ora chi chaganáꞌ.
3 Bina diaꞌga ucuá ti ridxi reciu de ibáꞌ,
na:
―Biiyaꞌ,
ma nabeza Dios lade binni.
Laape be zabeza né be laacaꞌ.
Zaca ca xpinni be,
ne laabe zaca be Dios sticaꞌ.
4 Zuchaa be nisa riete lú caꞌ,
ne ma qué ziuu ru enda guti nin enda ruuna nin enda racaná ladxidóꞌ nin yuubaꞌ,
purti ma udiꞌdi irá ni uyuu chiqué.
5 Oraque na ni zuba lu trono que:
“Biiyaꞌ,
cayune irá xixé cosa nacubi.”
Ne laca na:
―Dxandí irá diidxa riꞌ,
zanda guni cre lu ni.
6 Bigueta rabi be naa:
―Ma uca irá ni nexhe acaꞌ.
Naa bizuluáꞌ,
naa unduuxeꞌ,
casi ca letra A ne Z.
Ni cayati nisa la?
gueeda ra nuaaꞌ,
zusigaꞌde laa nisa ni rudii enda nabani.
7 Tu qué cui sa atrá la?
zacaa irá nga.
Naa zaca Dios sticaꞌ ne laaca zaca ca xiiñeꞌ.
8 Peru cani namuxeꞌ,
cani qué runi cre,
cani qué iquiiñeꞌ,
cani ruuti binni,
cani riuu né ni cadi xheelaꞌ,
cani runi brujería,
cani ruzuxibi xa ñee bidóꞌ,
ne cani rusiguii,
ira xixé ca zalá ca lu gui ne azufre.
Nga nga rairopa enda guti.
Jerusalén cubi
9 Nuu gadxe ángel naaze gadxe copa ra dxá últimu xcadxe plaga.
Beeda tobi na rabi naa:
―Gudáꞌ ulué lii novia,
xheela Dendxú huiiniꞌ.
10 Lu ni culuíꞌ Espíritu Santu naa que,
yené ángel que naa lu ti dani roꞌ ne nasoo,
ne biluíꞌ naa Jerusalén guidxi roꞌ sti Dios zeda yete de ibáꞌ de ra nuu Dios,
11 dede riaꞌqui biaani guidxi que de enda nandxóꞌ sti Dios.
Zeda aca xpiaani ni casi ti guie ni nabé risaca.
Ruluíꞌ ni jaspe,
rihuinni biaani ni casi vidriu.
12 Napa ni ti lindaa naroꞌba ne nasoo,
ne napa lindaa que doce puertaꞌ.
Zuhuaa ti ángel cada ra puertaꞌ,
ne cá lá doce tribu ni za de Israel lu ca puertaꞌ,
tobi cada tobi.
13 Napa ni chonna puerta neza rindani gubidxa,
chonna guiaꞌ,
chonna neza riaazi gubidxa,
chonna gueteꞌ.
14 Zuba ni lu doce guie,
ne cada guie cá lá ca apóstol sti Dendxu huiini que,
biaꞌsi doce.
15 Naaze ángel ni caníꞌ né naa que ti vara de oro para cuꞌ biaꞌ né guidxi que ne puertaꞌ ne lindaa stini.
16 Biaꞌca ziuula guidxi que biaꞌ queca de xilaga.
Uluu biaꞌ ángel que ni.
Napa ni chupa mil chupa gayuaa kilómetru de ziuulaꞌ,
ne de nasoo,
ne biaꞌ queca de xilaga.
17 Oraque uluu biaꞌ be lindaa stini.
Napa ni sesenta y cuatro metru.
Biquiiñe be metru casi riquiiñe binni.
18 Naca lindaa que de guie jaspe,
ne guidxi que de oro chaꞌhui casi vidriu ni nayá.
19 Zuchaahui ca guie ni zuba ni lú de irá clase guie risaca.
Primé que zuchaahui ne guie lá jaspe,
rairopa zafiro,
raguionna ágata,
raidapa esmeralda,
20 raigaayu ónice,
lu xhoopa que cornalina,
lu gadxe que crisólito,
lu xhono berilo,
lu gaꞌ topacio,
lu chii crisoprasa,
lu once jacinto,
ne lu doce que amatista.
21 Idubi doce puerta stini naca de perla,
cada puerta naca de ti perla si,
ne de oro chaꞌhui calle roꞌ stini,
dede rihuinni biaani casi vidriu.
22 Qué ñuuya nin ti yuꞌdu ndaani guidxi que,
purti Señor Dios ni nandxóꞌ,
laa ne Dendxu huiini que,
naca yuꞌdu stini.
23 Ruzaani enda nandxóꞌ sti Dios ni,
ngue runi cadi caquiiñe ni gubidxa nin beeu.
Ne Dendxu que nga biaani stini.
24 Irá xixé binni ni ma bilá zazá lu biaani stini,
ne irá xixé rey ni bini mandar ndaani guidxilayú zedané enda risaca sti ra nuu ni.
25 Qué zieegu puerta stini ridxí ne qué zaxhinni raqué.
26 Ziné cabe enda nandxóꞌ ne enda risaca sti irá xixé guidxi ra nuu ni.
27 Peru qué ziuu dxi chuꞌ xiixa ni nabiidi raqué,
nin ni qué iquiiñeꞌ,
nin ni rusiguii,
sínuque ziuu cani cá si lá lu libru de enda nabani ni napa Dendxu huiini que.