22
Oraque biluíꞌ ángel que naa ti guiigu nayá guieꞌ.
Ne ndaani ni riree nisa ni rudii enda nabani,
ne nayaꞌni dxindxi ni casi vidriu.
Candani ni ra nuu trono sti Dios ne sti Dendxu huiini que.
2 Didi ni galahui calle roꞌ sti guidxi que,
ne iropa uriá ni zuhuaa yaga rudii enda nabani.
Ricá cuananaxhi lu ni irá beeu,
ne riquiiñe bandaga stini para usianda binni.
3 Qué ziuu gasti ni nadxaba raqué sínuque trono sti Dios ne sti Dendxu huiini chuꞌ raqué ne zusisaca ca xpinni be laabe.
4 Zuuya dxichi pe ca laabe ne zacá lá be lucuá caꞌ.
5 Qué zaxhinni raqué,
ne ma qué zaquiiñe cani nuu raqué linterna nin xpiaani gubidxa purti Señor Dios nga gaca biaani stícabe.
Ne qué ziuu dxi guiaana dxí de guni mandar cabe.
Ma cadxiña dxi gueeda Cristu
6 De raqué na ángel que rabi naa:
―Dxandí ca diidxa riꞌ,
ne zanda guni cre lu cani.
Señor Dios ni bisiníꞌ ca profeta,
laa biseenda ángel stiꞌ beda uluíꞌ ca xpinni xi ma zeda dxiña dxi gacaꞌ.
7 Na Señor:
―Nagueenda zendaꞌ.
Dichoso cani ulabi stiidxa Dios ni cá lu guiꞌchi riꞌ.
8 Biya dxiꞌche ne bina diaꞌga irá ni guca riꞌ.
Biluxe si bina diaꞌgaꞌ ne biiya cani,
bizuxiꞌbe xa ñee ángel culuíꞌ ni naa que para nusisaca laa,
9 peru na rabi naa:
―Cadi guꞌnu nga purti naa laca cayune xhiiña Dios casi cayuꞌnuꞌ,
lii ne ca hermanu stiuꞌ ni ruiꞌ ni gabi Dios laa ne irá xixé ni rulabi ni cá lu guiꞌchi riꞌ.
Lausisaca Dios.
10 Ne laca rabi be naa:
―Cadi ucaachi lu irá ni cá lu guiꞌchi riꞌ,
purti mayaca idxiña dxi gaca irá ni.
11 Peru laga caꞌru ganda dxi gaca ni la?
cani cuchee la?
zuchee ru caꞌ,
ne cani cayuni ni nadxaba la?
zuni ru ca ni,
peru cani nachaꞌhui la?
zuni ru ca enda nachaꞌhuiꞌ ne cani ma biree chu para Dios la?
qué zaxele de laa.
12 ―Zacá zaca ni.
Zenda nagueenda ne zedaniá ni usigaꞌde binni,
cada tobi biaꞌ ni biꞌniꞌ.
13 Maca nuaa dxi bizulú irá ni,
ne zaluxe irá ni,
naa nuaa ruaꞌ.
Naa bizuluáꞌ naa unduuxeꞌ,
casi ca letra A ne Z.
14 Dichoso cani guia ladxidóꞌ casi ñaca niguiibi xhaba,
purti laaca zacaa ca cuananaxhi ni rudii enda nabani ne ziuu ca ra puerta sti guidxi que.
15 Peru cani qué runi cre ne cani runi brujería ne cani riuu né ni cadi xheelaꞌ ne cani ruuti binni ne cani ruzuxibi xa ñee bidóꞌ ne cani rusiguii la?
irá xixé ca ziaana ca fuera.
16 Ne laca na Jesús:
―Cuseenda ángel stinne chi usiene ni ca xpinneꞌ.
Za David de naa ne naa zaya de laa.
Naa nga luceru ruzaani siadóꞌ.
17 Na Espíritu Santu ne xheela Dendxu huiini que:
―Gudáꞌ.
Ne ni guna diaga la?
iníꞌ:
―Gudáꞌ.
Ni cayati nisa la?
gueda gué nisa ni rudii enda nabani sin quixe gastiꞌ.
18 Irá xixé tu,
cani ucaa diaga stiidxa Dios ni cá lu guiꞌchi riꞌ,
gabe caꞌ laatu:
lu guiꞌchi ri zeeda ca plaga ni chi usaba Dios luguiá binni,
ne pa chuꞌ tu cuꞌ xcaadxi diidxa lu ni cá rarí la?
Dios laca zaguu lu plaga stiꞌ.
19 Ne zaqueca,
pa chuꞌ tu cuee xiixa lu stiidxa Dios ni cá lu guiꞌchi ri la?
zuxhá Dios lá lu libru de enda nabani,
ne ma qué ziuu ndaani xquidxi Dios ni riete lu guiꞌchi riꞌ.
20 Na ni caníꞌ:
―Dxandí zenda nagueenda.
―Zacá gaca ni.
Gudáꞌ Señor Jesús.
21 Jesucristu Señor stinu cuꞌ ndaaya irá tu.
Amen.