GUIꞌCHI BICAA SAN JUDAS
Cucaa Judas guiꞌchi lu cani ulí Dios
1
Naa nga Judas biꞌchi Jacobo,
ne rune xhiiña Jesucristu.
Cucaa guiꞌchi ri lú tu,
hermanu caꞌ.
Nadxii Dios laatu ne ulí laatu para laa,
ne ma cayapa Jesucristu laatu.
2 Dios ilaselaꞌdxi laatu ne quixhe dxí ladxidóꞌ to ne ganaxhii laatu.
Cani rusiidi ni cadi dxandíꞌ
3 Hermanu ni nadxiee caꞌ,
ma xadxí rabe nucaa ti guiꞌchi lú tu para nusiide laatu de modo bilá nu,
peru yanna ruuya jma naquiiñe inaba laatu cadi idxibi tu ucaa lú tu cani na cadi jneza modo runi cre tu Cristu.
Laatu nanna tu zacá bidii Dios ni laatu ne qué ziuu dxi uchaa ni.
4 Purti sin ganna nu ma biuu caadxi ni qué runi cre Dios lade nu.
Ricaa cabe enda nachaꞌhui sti Dios para guni cabe ni na ique cabe.
Ne zacá qué rusihuinni cabe pa Dios nga tobi lucha xaíque sti irá binni,
laa ne Jesucristu Señor stinu.
Dede chiqué maca cá lu Xquiꞌchi Dios xi enda naná gueda iluxe né cabe.
5 Maca nanna tu ni,
peru racaladxe usietenaladxe laatu ni guca ca binni xquidxi nu.
Neca ulee Dios laacabe de ndaani guidxi Egipto,
peru bidxiña dxi binitilú caadxi de laacabe,
cani qué ñuni cre laa.
6 Ne ca ángel ni qué niná ñaana ra bisaana Dios laaca la?
bisaana ca ni,
ne yanna ma nuseguyoo Dios laaca xaꞌna guelacahui ni qué zaluxe,
para cueza ca dxi cuidxi Dios cuenta laacaꞌ.
7 Ne cásica bizaaca ca ángel que,
zaqueca guca ca binni Sodoma ne Gomorra ne ca guidxi ni nuu gaxha de laacaꞌ.
Bisaba Dios gui ne binitilú laacabe purti uyuu né cabe ni cadi xheela cabe ne uyuu né cabe muxeꞌ.
Yanna guietenalaꞌdxi nu ni ti cadi guni nu casi biꞌni cabe que,
purti irá tu guni zacá zalá lu gui ni qué ziuu dxi gyuíꞌ.
8 Zaqueca canazá ca hombre ni cayabe laatu riꞌ.
Para laacabe la?
ni ixuíꞌ lú cabe nga ni dxandíꞌ,
ne runi dxaba saa cabe xcuerpu cabe.
Qué ruzuuba cabe stiidxa Dios ne riguu dí cabe cani risaca nezalú Dios.
9 Dxi udinde né ángel Miguel binidxabaꞌ runi xcuerpu gueꞌtu Moisés,
qué niguu dí be laa sínuque gudxi be laa:
“Ladxi ná Dios rusaana lii”,
neca naca nda be ángel ni jma nandxóꞌ.
10 Peru ca hombre ni cayabe laatu ri la?
riguu dí cabe ni qué riene cabe.
Runi cabe ni na ique cabe casi runi maniꞌ,
ne nga ni runitilú laacabe.
11 Gapa gá si cabe laacabe,
purti cayuni cabe casi biꞌni Caín,
ne pur bidxichi ma biree chu cabe casi biree chu Balaam.
Ne casi bicaa lú Coré Dios chiqué la?
zaqueca cayuni cabe,
ne zaqueca zanitilú cabe.
12 Ro to gueta juntu purti nadxii saa tu.
Ne laacabe reda chuu cabe lade tu ne runi yuudxu cabe purti qué rituí lú cabe ne qué rulabi cabe irutiꞌ,
sínuque cá ique cabe de laasi cabe.
Zeda gaca cabe casi za sin gupa,
riné bi laaca cherí chericaꞌ.
Laca zeda gaca cabe casi yaga ni qué ricá cuananaxhi lú neca ma gunda xhi,
ne casi yaga ni ma bibidxi dede xcu ne ma guxha cabe laa.
13 Ne zeda gaca cabe casi ola sti nisadóꞌ ora riasa ni naroꞌba ne ruchiacha ni bupu.
Zaqueca rucheeche cabe enda nadxaba stícabe.
Laca naca cabe casi luceru ni canazá renda.
Ma nexhe chaahui ti lugar ra nacahui doꞌ para laacabe.
Raqué nga chuꞌ cabe ne raqué nga guiaana ca cabe.
14 Laca de laacabe uníꞌ Enoc dxi bisiníꞌ Dios laa,
ne Enoc nga tobi de ca xiiñi xiiñi Adán.
Na be:
“Casi ñaca biiya zedané Señor jma de chii mil xpinni,
15 zeeda para cuidxi cuenta binni ne para udxiiba donda ique irá cani qué ñuni jneza,
pur irá enda nadxaba sticaꞌ,
ne pur modo uluu dí ca laabe.”
16 Peru laga caꞌru gueeda be la?
nisi canadxiichi stubi caꞌ,
ne cananíꞌ ca binni,
rinanda ca irá enda nadxaba ni na ique caꞌ.
Rudxiiba ca laca laacaꞌ ne nuu tiru rugá ca binni para si udii laaca ni racalaꞌdxi caꞌ.
Culidxe Judas cani runi cre
17 Peru laatu,
hermanu ni nadxiee caꞌ,
laguietenalaꞌdxi xi na ca apóstol sti Jesucristu Señor stinu chiqué.
18 Gudxi cabe laatu:
“Dxi mayaca iluxe guidxilayú,
stale binni zuxidxi stiidxa Cristu,
ne zazá ca modo na xquenda biaani huati caꞌ.”
19 Ne ma cayuuya tu cayaca ni.
Ma nuu cani cuyubi indaa saa ca xpinni Cristu.
Nisi cá ique ca ni nuu ndaani guidxilayú,
ne qué gapa ca Espíritu sti Dios.
20 Peru laatu,
hermanu ni nadxiee caꞌ,
lauyubi uzuhuaa chaahui tu lu ni runi cre tu,
ne lainaba acané Espíritu Santu laatu ora iníꞌ né tu Dios.
21 Cadi ixele tu de Dios ni nadxii laatu laga cabeza tu dxi udii Señor Jesucristu laanu enda nabani ni qué zaluxe.
Ne zuni be ni purti rilaselaꞌdxi be laanu.
22 Lagacané cani caꞌru uzuhuaa chaahui lu ni runi cre.
23 Laguni pur ulá tu laacabe casi ñaca cabee tu laacabe lu gui,
ne laguiá irá binni ni qué runibiáꞌ Dios.
Lagacané laacaꞌ,
peru laguuya gá qué chi cá enda nadxaba stica laatu.
Laixele de enda ruchee stícabe casi rixele tu de xiixa ni ribixhilaꞌdxi tu.
Usisaca nu Dios
24-25 Tobi lucha si Dios nuu ni ulá laanu.
Ne laabe jma riene be ne randa rapa be laatu para cadi guiaba tu.
Zuchiña be laatu ra nuu be,
ma nayá ladxidóꞌ to ne nayeche tu.
Cadi guiaana dxí nu de usisaca nu laabe ne udxiꞌba nu laabe,
purti qué ziuu dxi guiaana dxí de isaca be ne de aca be nandxóꞌ.
Amen.