NI BILUIꞌ JESUCRISTU APOSTOL SAN JUAN
1
Ndi nga ni biluíꞌ Dios Jesucristu para uluíꞌ ca xpinni xi ma zeda dxiña dxi acaꞌ.
Biseenda be ti ángel stibe beda uluíꞌ ni Juan,
tobi de ca xpinni be.
2 Ne laa bicaa irá ni biꞌyaꞌ,
ni gudxi Dios Jesucristu uluíꞌ laa.
3 Dichoso cani guꞌnda guiꞌchi ri ne cani ucaa diaga ni cá lú ni,
ne icaa ni na ni,
purti ma zeda dxiña dxi gaca ni ma uníꞌ Dios chi aca.
Ni bicaa Juan lu ca xpinni Cristu ni nuu Asia
4 Naa nga Juan.
Cucaa guiꞌchi ri lu ca xpinni Cristu ni nuu ndaani gadxe guidxi sti Asia.
Qué huayuu dxi guiaadxa Dios,
ne nuu be yanna ne nexhe gueeda be.
Rinaba laabe cuꞌ be ndaaya laatu ne quixhe dxí be ladxidóꞌ to,
laabe ne gadxe espíritu ni ruzuhuaa lú be ra zuba be lu trono,
5 ne Jesucristu ni ruluíꞌ laanu ni dxandí ne jneza runi ni.
Nirudóꞌ laa bibani de lade gueꞌtuꞌ,
ne runi mandar irá xaíque ni nuu ndaani guidxilayú.
Nadxii be laanu ne bisiá né be rini stibe ladxidóꞌ no.
6 Bidxiiba be laanu casi cani runi mandar ne biꞌni be laanu sacerdote para guni nu xhiiña Dios Bixhoze be.
Iruti ru nandxóꞌ casi laabe.
Cadi guiaana dxí de usisaca binni laabe.
Amén.
7 Zuuya tu zeeda be lade za.
Ne irá binni zuuya laabe,
dede ni bindizi lanza laabe,
ne zuuna cabe ora guꞌya cabe laabe.
Dxandí zacá zaca ni.
8 Na Señor Dios ni jma nandxóꞌ:
―Naa bizuluáꞌ iráꞌ,
ne naa unduuxe ni,
casi zeeda A ne Z lu alfabetu.
Nuaa yanna,
qué huayuu dxi guiaadxaꞌ,
ne qué ziuu dxi guiaadxaꞌ.
Ra biꞌya Juan enda nandxóꞌ sti Cristu
9 Hermanu stitu naa ne nuaa nia laatu tobi si ra cayacaná tu ne lu enda runi mandar sti Dios.
Ne laca huayacané Jesucristu naa cadi ixhacaladxeꞌ,
casi cayacané laatu.
Biseguyoo cabe naa lu isla Patmos purti canayué stiidxa Dios ne irá ni nanna de Jesucristu.
10 Raqué nuaa ti domingu,
dxá ladxiduáꞌ de Espíritu Santu ne bina diaꞌga ucuá ti ridxi neza deche casi ti trompeta,
11 na rabi naa:
―Naa bizuluáꞌ iráꞌ,
ne naa unduuxe ni,
casi ca letra A ne Z.
Bicaa ni guꞌya lu ri lu guiꞌchi ne biseenda ni lu ca xpinni Cristu ni nuu ndaani gadxe guidxi sti Asia.
Cuzeete Efeso,
Esmirna,
Pérgamo,
Tiatira,
Sardis,
Filadelfia,
ne Laodicea.
12 Para bidxigueta luaꞌ guuya tu caníꞌ né naa,
ne biiya gadxe candeleru de oro.
13 Ne galahui de laacani biiya zuhuaa tuuxa ruluíꞌ ti hombre,
nabaqui ti gamixaꞌ de yanni ñee ne xiꞌ ti cinturón de oro xpechu.
14 Naquichi bé guicha ique casi be ne ruzaani guielú be casi bele.
15 Ne ruzaani ñee be casi bronce ni uluu cabe lu gui para bisiá cabe.
Ne zeda aca stidxi be casi rixidxi ra cadiꞌdi stale nisa.
16 Naaze be gadxe luceru lu ná be ladu derechu,
ne nugasa ruaa be ti espada naduxhu iropa ladu,
ne ruzaani lú be casi ruzaani gubidxa.
17 Ora biiya laabe biaba xa ñee be casi tobi ni ma guti.
Peru gudixhe ná be luguiaꞌya ne rabi be naa:
―Cadi idxibi luꞌ.
Naa bizuluáꞌ iráꞌ,
ne naa unduuxe ni.
18 Naa nabaneꞌ.
Gute peru bibane ne ma qué ziuu ru dxi gateꞌ.
Naaze ca llave sti enda guti ne sti ra riaana ca gueꞌtuꞌ.
19 Yanna bicaa ni biꞌya lu riꞌ,
ni nuu yanna ne ni gueeda ruꞌ.
20 Ndi nga riníꞌ ni biꞌya lu ca:
gadxe luceru biꞌya lu naaze que la?
nga cani cayapa ca xpinne ni nuu gadxe guidxi que,
tobi cada guidxi.
Ne gadxe candeleru ca,
nga cani runi cre ni nuu ndaani ca guidxi que.