RAGUIONNA GUIꞌCHI BICAA SAN JUAN
Pabiáꞌ jneza runi Gayu
1
Naa naca ti hermanu gola.
Cucaa guiꞌchi ri lú luꞌ,
Gayu xhamigua ni dxandí nadxieeꞌ.
2 Hermanu ni nadxieeꞌ,
rinaba lu Dios cuꞌ ndaaya lii de irá modo,
ne guni lii naguidxi nazaaca,
cásica cayacané lii sa lu gaxha de laa.
3 Nabé bieche beeda caadxi hermanu gudxi naa pabiáꞌ jneza canazá lu purti zinanda lu ni dxandíꞌ.
4 Gasti ru ni rusieche naa jma que ganna zinanda ca xiiñe ni dxandíꞌ.
5 Hermanu ni nadxieeꞌ,
jneza runi lu ora racanéu ca hermanu,
ne jma rusi cani zeeda de sti guidxi.
6 Huayuíꞌ né cabe ca hermanu de rarí pabiáꞌ nadxii lu laacabe.
Yanna,
ucané laꞌ laacabe de ni caquiiñe cabe para che cabe ra nexhe che cabe,
casi na Dios aca ni.
7 Biree cabe ziguni cabe xhiiña Jesucristu,
ne qué huaná cabe acané cani qué runibiáꞌ Dios laacabe.
8 Nga runi naquiiñe gua nu laacabe ti acané nu laacabe güi cabe stiidxa Dios.
Ra cuchee Diótrefe
9 Bicaa guiꞌchi lu ca xpinni Cristu ni nuu racá,
peru qué na Diótrefe ulabi ni rabi du,
purti racalaꞌdxi aca xaíque stícabe.
10 Nga runi ora chaa racá la?
zulidxe laabe xiñee cusiguii be binni,
canazá be cananíꞌ be laadu,
ne cadi nga si sínuque qué ruchagalú be ca hermanu.
Ne ora racalaꞌdxi ca xcaadxi guni ni la?
ribee be laaca de guni ca ni ne qué riná be chuꞌ ca ra cultu.
11 Hermanu ni nadxieeꞌ,
cadi chi nandu ni cadi cayuni jneza sínuque ni cayuni jneza.
Purti ni cayuni jneza la?
xpinni Dios laa,
peru ni canauchee la?
qué huayuu dxi guꞌya Dios.
Zaꞌbi stiidxa Demetriu
12 Irá binni ruzeete pabiáꞌ jneza runi Demetriu ne rihuinni dxandí ni.
Laadu laca rui né du ni binni,
ne nanna tu qué rusiguii du.
Diuxi
13 Napa stale ni gabe lii peru qué naꞌya ucaa ni,
14 purti rabe mayaca guuya lii.
Oraque zanda güi nu diidxaꞌ.
15 Gata dxí ladxidóꞌ loꞌ.
Cuseenda ca xhamigu lu stiuxi luꞌ.
Bigapa diuxi laꞌ cada tobi de ca xhamigu nu.