Cani rusiidi ni cadi dxandíꞌ
2
Chiqué laca uyuu profeta lade ca binni Israel ni na profeta sti Dios laa,
peru cadi dxandí ni.
Ne zaqueca zaca lade tu,
ziuu tu usiidi laatu ni cadi dxandí zeeda de Dios.
Zaguite cabe laatu ne enda rusiguii stícabe ne zudxii deche cabe Señor ni bilá laacabe,
peru nagueenda zanitilú cabe.
2 Stale binni zinanda laacabe ne zuni irá enda nadxaba ni runi cabe,
ne pur laaca zaguiñe yu binni stiidxa Cristu ne neza stiꞌ.
3 Nisi bidxichi ricá ique cabe,
nga runi zaguite cabe laatu ne zusiidi cabe laatu intiica ni cadi dxandí para si gaxha cabe stitu.
Peru dede ma xadxí maca bidxiiba Dios donda ique cabe,
ne qué zalá cabe de lu náꞌ.
4 Purti nin ca ángel ni bichee chiqué qué ñá Dios laacaꞌ sínuque uladxi laacaꞌ,
biseenda laaca gabiá ne biseguyoo laaca ra nacahui,
cá ca cadena laga cabeza ca dxi cuidxi be cuenta irá xixé.
5 Zaqueca qué ñá be ca binni ni qué nulabi laabe chiqué,
sínuque biseenda be ti nisa roꞌ dede bilaahua caꞌ,
ne guti irá caꞌ.
Peru bilá be Noé ni gudxi laaca nusaana ca irá enda ruchee sticaꞌ,
laasi ne xcadxe binni.
6 Laca qué ñá be binni Sodoma ne Gomorra,
bizaaqui be laaca dede gucadé caꞌ.
Biꞌni be ni ti idxibi irá binni ni qué rulabi laabe,
ne ganna ca xi cabeza laacaꞌ.
7 Peru dxi binitilú be Sodoma la?
bilá be Lot,
ti hombre runi jneza ni nabeza ndaani guidxi que,
purti laa si qué ñuulaꞌdxi modo nabani ca binni que.
8 Irá dxi racaná ladxidóꞌ be ora guꞌya be ne guna diaga be irá enda nadxaba cayuni ca binni que,
purti laabe runi be jneza.
9 Zacá nga rulá Dios ni zinanda laa ora cadiꞌdi ca ra nagana,
peru cani qué rulabi laabe la?
rusaana be laaca para guiaba ná ca dxi cuidxi be cuenta iráꞌ.
10 Ne jma rusi zusaba ná be cani canayuni ni na ique ne canananda intiica chuꞌlaꞌdxiꞌ,
cani qué na guni mandar Señor laa.
Raca ca nandxóꞌ ne qué rulabi ca irutiꞌ.
Qué ridxibi caꞌ,
nin para guni ca burla cani risaca ibáꞌ.
11 Nin ca ángel jma risaca ca ne jma nandxóꞌ caꞌ qué riguu dí ca laacabe nezalú Dios.
12 Peru laacabe nabani cabe casi mani purti qué gapa cabe enda biaaniꞌ.
Riguiñe yu cabe ni qué riene cabe.
Ne casi mani rale para igaa si ne gati la?
zaqueca zaca cabe.
13 Zaguixe cabe ni biꞌni cabe.
Zacaná cabe casi bininá cabe stobi.
Enda nayeche stícabe nga guni cabe intiica na ique cabe idubi dxi.
Ora ro né cabe laatu nisi cá ique cabe ni nadxabaꞌ ne runi yuudxu cabe lade tu dede riníꞌ binni laatu.
14 Qué zanda guꞌya cabe ti gunaa maca racalaꞌdxi cabe chuꞌ né cabe laa,
ne qué lica rixhacalaꞌdxi cabe de uchee cabe,
ne zacá ruquiinde cabe cani cadi zuhuaa chaahui lu neza sti Señor.
Ma biaa cabe uyubi cabe para laasi cabe.
Peru ma dxiꞌba dí ique cabe.
15 Cananiti cabe purti bisaana cabe neza chaꞌhui sti Dios,
ne ma ucuaa cabe neza uzá Balaam,
xiiñi Beor,
ni bichee né Dios para si guni ganar bidxichi.
16 Peru gudó Balaam echada pur enda nadxaba stiꞌ,
ra uníꞌ né ti burru laa casi riníꞌ binni,
ne raqué biaana dxí enda huati sti profeta que.
17 Qué iquiiñe cabe.
Zeda gaca cabe casi bizé sin nisa,
o casi za ni riné bi yooxhoꞌ.
18 Ninóuꞌ nuu xpiaani cabe para iníꞌ cabe,
peru qué iquiiñe ni riníꞌ cabe.
Pur irá enda nadxaba ni runi cabe ruquiinde cabe cani deru biree lade cani runi ni cadi jneza.
19 Rabi cabe laaca jma galán ora cadi cá binni yaga purti zacá zanda guni cabe intiica gacalaꞌdxi cabe,
peru laape cabe cá cabe yaga lu enda nadxabaꞌ,
purti intiica ni qué ganda usaana nu la?
cá nu yaga lu ná ni.
20 Ne pa ibigueta tobi ni ma binibiáꞌ Jesucristu ne chuꞌ lu ná enda nadxaba sti guidxilayú ri sti tiru la?
zanaaze dxiichi ni laa ne nabé naná zaca para laa,
jma que dxi caꞌru gunibiáꞌ Señor stinu ni bilá laanu.
21 Jma galán ñaca para laabe pa qué ñunibiáꞌ be neza chaꞌhui sti Señor,
que ibigueta be ora ma binibiáꞌ be ni ne ixele be de ni gudixhe Dios chi nanda nu.
22 Nuu ti dichu na:
“Ribigueta biꞌcu ra bidxiꞌbaꞌ ne bihui ni ma guze nisa nayá ribigueta ndaani nisa beñe.”
Zacaca zeda gaca cani ribigueta lu enda nadxaba sti tiru.