RAIROPA GUIꞌCHI BICAA SAN PEDRU
Cucaa Pedru guiꞌchi lu ca xpinni Cristu
1
Naa nga Simón Pedru.
Rune xhiiña Jesucristu ne naca apóstol stiꞌ.
Cucaa guiꞌchi ri lu irá cani ma runi cre casi runi cre du.
Jneza runi Jesucristu,
Dios stinu ni bilá laanu,
ucané para bini cre tu casi pe runi cre du.
Nabé risaca modo runi cre nu.
2 Lauyubi gunibiáꞌ chaahui tu Dios ne Jesús Señor stinu ti jma rusi cuꞌ ca ndaaya laatu ne quixhe dxí ca ladxidóꞌ to.
Ximodo gaca ca xpinni Cristu
3 Nandxóꞌ Dios ne ma gudixhe irá ni caquiꞌñe nu para ibani nu modo na,
ne zacaa nu ni ra gunibiáꞌ chaahui nu Jesús.
Laa guridxi laanu ra biluíꞌ laanu enda nandxóꞌ ne enda nachaꞌhui stiꞌ.
4 Ne laca pur enda nandxóꞌ stibe ca bidii stiidxa be guni be ni nabé galán para laanu,
ne nabé risaca ni,
purti zudii be laanu Espíritu stibe ti gaca nu casi laabe,
ne zalá nu de irá enda nadxaba ni rinanda binni ndaani guidxilayú riꞌ.
5 Ma biiya tu irá ni runi be para laanu,
ne yáquexa ma runi cre tu la?
laucaa ique sa tu jneza,
ne cadi nga si sínuque lauyubi guiene chaahui tu stiidxa Dios.
6 Zacané ni laatu iziidi tu ucueeza tu laatu de guni tu ni na ique tu,
ne ma cadi iree tu gana,
ne laudii xpida tu Dios para guni tu ni na.
7 Ne laca lauyubi gaca tu nachaꞌhui ne binni,
ne laganaxhii laaca de idubi ladxidóꞌ to.
8 Pa uyubi tu guni tu irá nga la?
zanda iquiiñe Jesucristu Señor stinu laatu,
ne zahuinni cadi pur gana si runibiáꞌ tu laabe.
9 Peru pa qué uyubi tu guni tu ni la?
zeda aca tu casi ni nacheepa lú,
o casi ni huaxiéꞌ riná.
Ne cani rizá zacá ruluíꞌ ma bisiaanda pa bisiá Dios ladxidóꞌ.
10 Nga runi,
hermanu caꞌ,
lauyubi usihuinni tu dxandí uníꞌ né Dios laatu ne ulí laatu.
Zacá qué ziuu dxi guiaba tu,
11 ne zuxhele ndaga Dios puerta para laatu ora ma chi chuu tu ra nuu Jesucristu Señor stinu ni bilá laanu.
Laa qué ziuu dxi guiaana dxí de guni mandar.
12 Nga runi qué ziaana dxie de usietenaladxe irá ndi laatu,
neca ma ucuaa tu ni dxandí ne ma zuhuaa chaahui tu lú ni.
13 Ne laga nabane ruaꞌ la?
rabe naquiiñe usietenaladxe laatu para gataná tu.
14 Purti ma biluíꞌ Señor Jesucristu naa mayaca usaana guidxilayú riꞌ.
15 Peru rabe chi acaniá laatu biaꞌ ganda tiꞌ laga nuaa ruaꞌ,
ti qué chuꞌ dxi guiaanda ni laatu neca ma guteꞌ.
Cani biꞌya enda nandxóꞌ sti Cristu
16 Dxi bisiꞌdi du laatu de enda nandxóꞌ sti Jesucristu Señor stinu ne gudxi du laatu zabigueta be guidxilayú la?
cadi de xiga ique si du biree ni,
sínuque biduꞌya pe du enda nandxóꞌ stibe.
17 Purti dxi bisisaca Dios laabe la?
ne laadu nuu du raqué,
ne biduꞌya du pabiáꞌ bizaani ladi be óraque,
dede riaqui biaaniꞌ,
ne bina diaga du ra uníꞌ tobi de ibáꞌ,
na:
“Ndi nga Xiiñe ni nadxieeꞌ,
ne ni rusieche naa.”
18 Bina diaga pe du ca diidxa que,
purti nuu né du Señor lu dani ra uníꞌ Dios ni nandxóꞌ.
19 Ne pur ni biduꞌya du ne ni bina diaga du que,
jma rusi runi cre du irá ni bicaa ca profeta sti Dios chiqué.
Laatu laca zuni tu jneza pa ulabi chaahui tu ni bicaa cabe,
purti naca ni casi ti biaani ruzaani lu guelacahui,
laga si idxiña dxi gueeda Cristu.
Purti dxi gueeda be zeda gaca casi ora ma birá gueela ne ma cuzaani xpiaani dxi,
purti zuuya chaahui tu ne ziene tu irá ni.
20 Peru laguietenalaꞌdxiꞌ:
cadi nisi ze si usiidi binni stiidxa Dios casi racalaꞌdxiꞌ.
21 Purti dede nin ca profeta sti Dios qué nusiidi ca ni ucalaꞌdxi si caꞌ,
sínuque uníꞌ ca ni na Dios casi gudxi Espíritu Santu ni laacaꞌ.