PRIME GUIꞌCHI BICAA SAN PEDRU
Cucaa Pedru guiꞌchi lu cani reche ndase
1
Naa nga Pedru.
Naca apóstol sti Jesucristu.
Cucaa guiꞌchi ri lu ca xpinni Dios ni ma cadi nabeza xquidxi,
cani reche ndase neza Ponto,
Galacia,
Capadocia,
Asia,
ne Bitinia.
2 Hermanu caꞌ,
gulí Dios Bixhoze nu laatu casi gudixhe guni chiqué.
Guridxi be laatu ra uníꞌ né Espíritu Santu laatu para guia ladxidóꞌ to ne rini sti Jesucristu ne para uzuuba tu stiidxaꞌ.
Dios ucheeche ndaaya laatu ne quixhe dxí pe ladxidóꞌ to.
Ni cabeza laanu ibáꞌ
3 Usisaca nu Dios,
Bixhoze Jesucristu,
Señor stinu.
Nabé bilaselaꞌdxi be laanu,
nga runi bidii be laanu ti enda nabani cubi,
casi ñaca gule nu sti tiru.
Ne uca ni ra bisibani be Jesucristu de lade gueꞌtuꞌ.
Yanna ma nanna dxichi nu laca zabani nu,
4 ne zacaa nu ni cayapa chaahui be para laanu ibáꞌ.
Qué zanda initilú ni,
nin guiuꞌdxu ni,
nin guioꞌxho ni.
5 Laatu runi cre tu Dios,
nga runi cayapa laatu ne enda nandxóꞌ stiꞌ laga cabeza tu ulá be laatu de cani nuu ndaani guidxilayú riꞌ.
Ma nexhe guni be ni dxi izaa xhi guidxilayú.
6 Ne pur irá nga rieche tu,
neca naquiiñe acaná tu caadxi yanna riꞌ,
peru tobi zidiꞌdi si nga.
7 Zeda gaca fe stitu casi oro.
Ne casi rutiidi cabe oro lu gui para ihuinni pa dxandí oro la?
zacaca cadiꞌdi tu ra naná para ihuinni pa dxandí runi cre tu.
Ne pa tidi tu ni sin guiaba tu la?
zasaca fe stitu jma que oro,
purti oro rinitilú.
Nga runi pa usihuinni tu dxandí runi cre tu Dios la?
zudxiiba be laatu ne zusisaca be laatu dxi gueeda Jesucristu.
8 Qué huayuuya tu laabe peru nadxii tu laabe.
Ne neca qué ruuya tu laabe,
peru runi cre tu laabe ne rieche tu dede qué ridxela tu xi iníꞌ tu,
de tantu ridxá ladxidóꞌ to de enda nayecheꞌ.
9 Purti nanna tu bilá be xhialma tu.
Ne biꞌni be ni purti bini cre tu.
10 Chiqué bizeete ca profeta de ni cudii Dios laanu yanna riꞌ,
ne nabé undaa ique né cabe ñene cabe xii ni.
11 Bisiene Espíritu sti Cristu laaca de enda naná ni chi tidi Cristu,
ne pabiáꞌ zasaca be ora ma udiꞌdi be ni.
Biyubi cabe ñanna cabe tu laabe ne padxí gaca irá ni cayabi Espíritu que laacabe.
12 Peru gudxi Dios laacabe cadi para laacabe ni caníꞌ Espíritu que,
sínuque para laanu.
Ne ca diidxa que ca nga ma bina diaga tu de ruaa cani byuíꞌ né laatu stiidxa Cristu.
Gunda bisiidi cabe ni laatu pur enda nandxóꞌ sti Espíritu Santu ni biseenda Dios de ibáꞌ.
Ne tan sicarú irá ni la?
dede ca ángel ñuulaꞌdxi ca ñene chaahui ca ni.
Na Dios gaca nu nachaꞌhuiꞌ
13 Nga runi lacuu xpiaani tu ne laguni ni dxandí risaca.
Laquixhe idubi xquenda biaani tu lu ni cabeza tu udii Dios laatu dxi gueeda Jesucristu.
14 Lagaca casi baꞌdu ni ruzuuba diidxaꞌ,
ne ma cadi guni tu ni na ique tu casi biꞌni tu dxi caꞌru gunibiáꞌ tu Dios.
15 Lagaca nachaꞌhui de irá ni guni tu casi nachaꞌhui Dios ni uníꞌ né laatu para gaca tu xpinni.
16 Casi cá lú Xquiꞌchi Dios ra na:
“Lagaca nachaꞌhuiꞌ,
purti zacá naa.”
17 Nga runi pa ma rabi tu laabe Bixhoze tu la?
laidxibi laꞌ laabe biaꞌ dxi nabani tu ndaani guidxilayú.
Qué zudxiiba be donda ique tobi jma que stobi sínuque cada tobi biaꞌ ni biꞌniꞌ.
18 Ma bilá Dios laatu de irá enda qué iquiiñe ni bisaana né ca bixhoze gola tu laatu.
Ne nanna ca tu biꞌni be ni ra gudixe be irá ni nuzaabi tu.
Peru qué niguixe né be ni xiixa ni rinitilú casi oro ne plata,
19 sínuque gudixe né be ni rini sti Jesucristu ni risaca jma que irá xixé.
Laa guti casi ca dendxu huiini ni bisigaꞌde cabe Dios chiqué.
Ulí cabe ni jma galán ne ni nazaaca para bisigaꞌde cabe laa.
20 De ante cha guidxilayú maca gudixhe Dios gaca Cristu zacá,
peru deru bisihuinni be ni para bien stitu.
21 Purti pur Cristu runi cre tu laabe.
Laabe bisibani be Cristu de lade gueꞌtuꞌ,
ne bisisaca be laa.
Nga runi runi cre tu laabe ne cá lú tu laabe.
22 Hermanu caꞌ,
dede dxi ucané Espíritu Santu laatu uzuuba tu stiidxa Cristu la?
bia ladxidóꞌ to,
ne ma zanda ganaxhii tu hermanu stitu.
Ne zacá laguni,
laganaxhii saa de idubi ladxidóꞌ to.
23 Laatu ma gule tu sti tiru,
ma cadi de binni guidxilayú ni rati,
sínuque gule tu de stiidxa Dios ni qué ziuu dxi initilú ne ni rudii enda nabani.
24 Casi na lu Xquiꞌchi Dios:
Irá binni zeda gaca casi yaga guiꞌxhiꞌ,
ne enda risaca stícabe zeda gaca casi guieꞌ stini.
Ne casi ribidxi yaga guiꞌxhi ne riaba guieꞌ sti la?
zacaca zadiꞌdi enda risaca stícabe.
25 Peru stiidxa Señor qué ziuu dxi initilú.
Ne laani nga ca diidxa byuíꞌ né cabe laatu,
ni rulá binni.