2
Lausaana de icá ique tu ni cadi jneza,
ne lausaana de usiguii tu.
Cadi gaca tu nachaꞌhui de luguiá si,
ne cadi gache lú tu sti stobi,
ne cadi sa né tu cuentu.
2 Lagaca casi baꞌdu deru gule,
ruluiꞌlaꞌdxi gue leche.
Zacaca laatu lauluiꞌlaꞌdxi ganna tu stiidxa Dios ti jma rusi guiene tu para ilá tu.
3 Pa dxandí ma bidii tu cuenta pabiáꞌ nachaꞌhui Señor la?
laguni zacá.
Cristu guie ni nabani
4 Laidxiña ra nuu Señor.
Laabe zeda gaca be ti guie ni nabani.
Qué nisaca be nezalú binni peru Dios gulí laabe ne bisisaca laabe.
5 Laatu laca zeda gaca tu guie ni nabani.
Nga runi laudii lugar iquiiñe Dios laatu ra ucuí xhiuꞌdu ni qué rihuinni.
Chiqué bisigaꞌde ca sacerdote dendxu Dios.
Yanna ma racalaꞌdxi be iquiiñe be laatu casi sacerdote stibe para usigaꞌde tu laabe ni riale ndaani ladxidóꞌ to.
Nga huaxa ziulaꞌdxi be icaa be,
ne zanda guni tu ni purti runi cre tu Jesucristu.
6 Cá lu Xquiꞌchi Dios ra na:
Caguixhe Cristu ndaani guidxi Sion casi ti guie para inaaze dxiichi yuꞌdu stinneꞌ,
ne yuꞌdu ca nga ca xpinneꞌ.
Laabe nga ni ulié ni jma risaca.
Tu guni cre laabe la?
qué ziuu dxi gueeda malaya laa.
7 Risaca be para laatu,
cani runi cre laabe.
Peru para cani qué runi cre la?
zeda gaca be casi ni cá lu Xquiꞌchi Dios:
Guie ni bisaꞌbi cani cucuí yoo que,
guie que pe naaze yoo que yanna.
8 Laca cá ni sicaríꞌ:
Zaca be casi ti guie ni irenda ñee cabe para guiaba cabe,
purti qué rulabi cabe stiidxa be,
ne maca nexhe guiaba cani runi zacá.
Ca xpinni Dios
9 Peru laatu la?
gulí pe Dios laatu para gaca tu xpinni,
ne naca tu casi sacerdote para guni tu xhiiña rey stinu ni nuu ibáꞌ.
Ma naca tu ti guidxi ni ulee chu be para laabe.
Ma sti pe be laatu.
Ne gudixhe be gaca ni zacá para gabi tu binni rihuinni pabiáꞌ nandxóꞌ be pur ni runi be,
purti ulee be laatu de lu guelacahui ne uluu be laatu lu biaani sicarú stibe.
10 Qué ñaca tu xpinni be chiqué,
peru yanna ma xpinni be laatu,
ne zaqueca iruti ña laatu,
peru ma biá be laatu.
Enda ruzuuba diidxaꞌ
11 Hermanu ni nadxiee caꞌ,
laatu nuu tu ndaani guidxilayú casi ni canazá xquidxi binni.
Nga runi rinaba laatu cadi ucaa ique tu ni cadi jneza,
purti irá nga riguba yu laatu ladu initilú xhialma tu.
12 Lasá jneza lade cani qué runi cre Dios,
neca riníꞌ cabe laatu ne napa cabe laatu casi binni malu,
peru zuuya cabe pabiáꞌ jneza runi tu,
ne zacá zusisaca cabe Dios dxi cuidxi cuenta irá xixé.
13 Lauzuuba stiidxa irá cani runi mandar ndaani guidxilayú,
purti nga ni racalaꞌdxi Señor,
naca ni presidente ni jma risaca lade cani runi mandar,
14 o naca ni cani ruseenda be para usaba ná cani ruchee ne para udxiiba cani runi jneza.
15 Purti sicarí nga racalaꞌdxi Dios guni tu:
guni tu jneza para useegu tu ruaa ca binni huati ni qué ganna xi riníꞌ.
16 Ma qué rucaa Dios laatu guni tu ni na ley para ilá tu,
peru cadi tisi qué rucaa be laatu guni tu ni la?
uchee né tu ni,
sínuque laibani modo riulaꞌdxi Dios,
purti ma stibe laatu.
17 Laguni respetar irá binni.
Laganaxhii irá ca hermanu.
Laidxibi Dios.
Laguni respetar presidente.
Xi guni tu ora acaná tu
18 Hermanu caꞌ ni napa xpixuaanaꞌ,
lauzuuba stiidxa caꞌ,
ne laguni respetar laacaꞌ.
Ne cadi ni nachaꞌhui ne ni nadóꞌ si,
sínuque ne cani naduxhuꞌ.
19 Purti zaguu Dios ndaaya laatu pa qué idxiichi tu ora tinde né cabe laatu neca cadi cuchee tu,
ne guni tu ni purti racalaꞌdxi tu guni tu ni na Dios.
20 Pa guiaba ná tu purti cuchee tu,
ne qué idxiichi tu,
ñee na tu ma cayuni tu xiixa nga la?
Peru pa guiaba ná tu neca cadi cuchee tu,
ne qué idxiichi tu la?
óraque huaxa cayuni tu xiixa para guieche né Dios laatu.
21 Para nga uníꞌ né be laatu,
purti laca ucaná Cristu pur laatu.
Yanna laguni casi biꞌni Cristu.
22 Laabe qué nuchee be ne qué nusiguii be,
23 ne ora uluu dí cabe laabe,
qué niguu dí be laacaꞌ.
Ne ora ucaná be,
qué ñabi be laaca gapa gá si ca laacaꞌ,
sínuque bisaana be irá ni lu ná Dios ti laa ruuya irá cosa jneza.
24 Byuaꞌ be irá stonda nu lu cuerpu stibe dxi ucuá be lu cruz que,
para ma cadi ibani nu lu pecadu sínuque ibani nu jneza casi na Dios.
Ne sti ni ucaná be que la?
laatu bilá tu.
25 Chiqué bireeche ndase tu casi dendxu ni cananiti,
peru yanna ma bigueta tu ra nuu Cristu.
Laa nga Pastor stitu ni cayapa xhialma tu.