GUIꞌCHI BICAA SANTIAGU
1
Naa nga Santiagu.
Rune xhiiña Dios ne xhiiña Señor Jesucristu.
Lu guiꞌchi ri cugapa diuꞌxe laatu,
hermanu caꞌ,
cani za de ca doce xiiñi Israel,
cani reeche ndase lade stale guidxi.
Zusiene Dios ni inaba ni laa
2 Hermanu caꞌ,
laguieche né intiica enda naná gueeda luguiá tu.
3 Purti nanna tu pa tidi tu ni sin iree chu tu de ni runi cre tu,
zacané ni laatu iziidi tu cadi iree tu gana.
4 Lauyubi iziidi tu uzuhuaa chaahui tu sin ixhacalaꞌdxi tu,
intiica gueeda.
Zacá zaniisi tu lu stiidxa Dios.
Ziene chaahui tu ni na,
ne zuni tu ni.
5 Pa nuu tuuxa de laatu caꞌru guiene chaahui xi naquiiñe guni la?
inaba lu Dios usiene laa ne zusiene Dios laa.
Purti tutiica inabaꞌ,
rudii Dios ni laa de idubi ladxidóꞌ sin tinde né laa.
6 Peru ora inaba be la?
naquiiñe guni cre be zacaa be ni canaba be que,
ne cadi cuꞌ xa ique be pa zudii Dios ni o pa coꞌ.
Purti ni riguu xa ique zeda aca casi ola sti nisadóꞌ,
riguiñe ntaa bi laa cherí chericaꞌ.
7 Nga runi,
ni inaba ne cuꞌ xa ique la?
cadi cueza icaa xiixa de Dios.
8 Purti ni ti dxi runi cre,
sti dxi ma qué ganna pa runi cre la?
qué zanda udxii lú neza zeꞌ.
9 Ti hermanu ni qué gapa gasti ndaani guidxilayú ri naquiiñe guieche purti risaca nezalú Dios.
10 Zaqueca ti hermanu ni napa bidxichi,
laca naquiiñe guieche purti ma nanna qué risaca nezalú Dios tisi napa bidxichi.
Purti zanitilú irá ni napa be que,
casi rinitilú guieꞌ guiꞌxhiꞌ.
11 Ora riree gubidxa nabé nandáꞌ,
riguii yaga guiꞌxhi que ne riaba ca guieꞌ que.
Zacá rinitilú enda sicarú stiꞌ.
Zacaca zanitilú ricu laga canazá canayubi gapa jma bidxichi.
Ora gueeda ni nagana
12 Zieche ladxidóꞌ cani tidi ni naná sin ixhacalaꞌdxiꞌ,
purti pa qué ixhacalaꞌdxi cabe la?
zudii Dios laacabe enda nabani ni qué zaluxe.
Nga nga premiu uníꞌ udii irá cani nadxii laa.
13 Ora chuꞌ ni uquiinde laanu uchéꞌ nu la?
cadi zácaxa nu Dios cuquiinde laanu,
purti qué zanda uquiinde ni nadxaba Dios,
ne qué ruquiinde Dios irutiꞌ.
14 Ni riulaꞌdxi nu ni cadi jneza,
nga nga ni ruquiinde laanu,
purti ricá ique nu ni,
ne zacá randa riguba yu ni laanu dede inaaze dxiichi ni laanu.
15 Ne ni qué usaana de icá ique ni cadi jneza la?
zuchee.
Ne ni qué usaana de uchee la?
zati.
16 Laguiene chaahui,
hermanu caꞌ:
17 Irá ni nachaꞌhui ne irá ni dxandí sicarú reeda de ibáꞌ.
Zeeda ni de Dios ni bizáꞌ ca biaani sti ibáꞌ,
ne laa rudii ni laanu.
Qué ziuu dxi uchaa be tu naca be,
nin ti guisi.
18 Bidii be enda nabani laanu ra bini cre nu stiidxa be ni rusiene laanu ni dxandíꞌ,
ne biꞌni be ni purti de laabe biale guni be ni,
ti nirudóꞌ laanu iréꞌ ndu nu lade irá ni bizáꞌ be.
Ni dxandí cayuni ni na Dios
19 Hermanu ni nadxiee caꞌ,
lachuu para ucaa diaga tu,
peru cadi nisi undaa ruaa si tu xiixa,
ne cadi casi ze tu idxiichi tu.
20 Purti ora cadxiichi tuuxa la?
qué zanda guni ni chuꞌlaꞌdxi Dios.
21 Nga runi lacuee irá ni nadxaba de ndaani ladxidóꞌ to,
ne lausaana irá ni cadi jneza.
Laucaalaꞌdxi chi nanda tu stiidxa Dios ni ma ucuá xcu ndaani ladxidóꞌ to,
purti nga nga ni zanda ulá laatu.
22 Laguietenalaꞌdxi naquiiñe guni tu ni na ca diidxa ca,
ne cadi ucaa diaga si tu cani.
Pa zacá cayuni tu la?
caguite si tu laca laatu.
23 Purti tobi ni ucaa diaga stiidxa Dios sin guni ni na ni la?
zeda aca casi tobi ni biꞌya laa lu ti espeju.
24 Biiya si be laabe,
biree be ze be,
ne bisiaanda be ximodo laabe.
25 Peru pa iziꞌdi chaahui nu ley sti Cristu ni jma risaca,
ne izaalaꞌdxi nu guni nu ni na ni,
sin usiaꞌnda nu ni ma bina diaga nu la?
zaguu Dios ndaaya irá ni runi nu.
26 Pa nuu tobi de laatu zácaxa runi ni na Dios,
peru qué rucueeza ruaa de iníꞌ ni cadi jneza la?
caguite laca laa,
purti cadi dxandí cayuni ni na Dios.
27 Ndi nga ni na Dios Bixhoze nu:
Pa dxandí racalaꞌdxi nu guni nu ni na,
acané nu ca bizabi ne ca viuda ni cadiꞌdi ra nagana,
ne ibani nu jneza,
ma cadi casi nabani ca binni ni qué rulabi Dios.