GUIꞌCHI UCUA LU CA BINNI HEBREU
Xiiñi pe Dios beda iníꞌ né laanu
1
Stale tiru ne stale modo huaníꞌ né Dios ca bixhoze gola nu.
Chiqué,
ora racalaꞌdxi be gabi be laaca xiixa la?
uníꞌ né be ti profeta para gabi ni laacaꞌ.
2 Peru yanna ri ma Xiiñi pe be biseenda be,
beda iníꞌ né laanu.
Ne ma bisaana be idubi naca guidxilayú,
ne irá xixé ni nuu,
lu ná Xiiñi be,
purti ne laa bizáꞌ né ni laabe.
3 Biaꞌca nandxóꞌ be nandxóꞌ Xiiñi be,
ne casi laabe Xiiñi be.
Nandxóꞌ Xiiñi be,
ne laa naaze guidxilayú lu náꞌ,
ne ni iníꞌ la?
napa xidé gacaꞌ.
Ra biluxe bixhá Xiiñi be xpecadu nu,
bigueta ra nuu be ibáꞌ,
ne ma zuba cueꞌ be ra cayuni mandar be.
Jma risaca Xiiñi Dios que ca ángel
4 Jma bisisaca Dios laabe que ca ángel,
purti Xiiñi laabe,
ne nga runi dxiꞌba be ca ángel.
5 Qué ñuu dxi ñabi Dios tobi de ca ángel Xiiñiꞌ,
peru Jesucristu gudxi be ni laa,
na be:
Lii nga Xiiñeꞌ.
Dede yanadxí zusihuinne Xiiñe lii.
Bigueta bizeete be Jesucristu sti tiru,
na be:
Naa nga Bixhoze be,
ne laabe nga Xiiñeꞌ.
6 Ne dxi biseenda be Xiiñi be lugola ndaani guidxilayú,
uníꞌ be na be:
Irá ángel stinne zusuxibi xa ñee be.
7 Chiqué bicaa ti profeta ca diidxa ri lu Xquiꞌchi Dios:
Runi Dios ca ángel sti casi bi,
ne nuu tiru runi be laaca casi bele.
8 Peru ra riete Xiiñi Dios la?
na ni bicaa salmo que rabi laabe:
Lii nga Dios,
ne qué ziuu dxi guiaana dxí de guni mandar luꞌ,
ne zuni mandar lu jneza.
9 Rucaa ique lu guni lu ni nachaꞌhuiꞌ,
ne nanalaꞌdxi lu ni nadxabaꞌ.
Nga runi ma bisieche Dios stiuꞌ lii jma que irá xixé.
10 Ne laca na ni bicaa salmo que rabi laabe:
Señor,
lii bizáꞌ lu guidxilayú dxi uyáꞌ,
ne laca lii nga bizáꞌ lu ibáꞌ.
11 Zadxiña dxi initilú irá ni bizáꞌ luꞌ,
peru lii nuu rouꞌ.
Zioꞌxho guidxilayú ne ibáꞌ
casi rioꞌxho xhaba binni.
12 Ne zutopa lu cani casi rutopa binni xhaba,
ne zaca cani nacubi.
Peru lii la?
zaqué si nuu luꞌ,
ne qué zuchaa luꞌ,
ne qué zazaa xhiza luꞌ.
13 Laca cá lu guiꞌchi ra na Dios rabi Xiiñiꞌ:
Gudáꞌ cui gá lu cuee
laga quixhe dxie irá cani rucaa lú lii,
dede ora ma biaba ca xa ñee luꞌ.